Juan 18 - Biblia Pume

Mitera̧pea̧diro̧jo̧ȩ Jechu ju̧i̧

¹ Jechu judi jibëa̧ Ama̧i̧ pio ju̧i̧iä goë cjo̧dëa̧ duri oa, järëremȩde jibëa̧ jadü pio ji̧ri̧ nö̧ta. Aja̧, Chedoro̧ quȩmȩ dürü oëräpȩ järëreji̧ri̧dirȩ. Ado ju̧ri̧pȩ cjiarëremȩde tjado üdë. Ado yu̧a̧diro̧jo̧ȩ.

² Jabechji̧ pio ju̧ri̧pȩ jädiärëremȩde Jechu judi jibëa̧ jadü pio ji̧ri̧ nö̧ta a̧dopapea̧ ji̧. Ado pio ju̧i̧iä Juda judiborë dabarëremȩde pio jiro tjado pio ju̧i̧ chjiari. Tjamo̧ davä. Jechu pio ju̧i̧ u̧i̧pë gatë tänȩpamȩ pio judiborë dabarëremȩde.

³ Ado pio ju̧i̧iä, ‘Aja̧, tjadoräpȩ ju̧ri̧ a̧dopë cjia jirodiro̧da’ quëna̧ dabamȩrȩ järëremȩde domano guadia buba pio ji̧ri̧ nö̧ta, Ütë tjamo̧ ja̧ bë oa jidaji̧ri̧ guadia pio ji̧ri̧ nö̧ta. Jabechji̧ tjamo̧ goë tuti ja̧bepaji̧ri̧ pio judiro̧ chjadüa̧ oa, pjaricheo pio judiro̧borë chjadüa̧ oa järëreji̧ri̧dirȩ. Ado dëbëribo jo̧dë chiamȩ tjapënȩ jujuai̧ oa araji̧ri̧rȩ, gu̧na̧rea̧ to araji̧ri̧rȩ go̧düdäräa̧dirȩ tataparea̧ goaji̧ri̧rȩ, cjo̧dë chiamȩ to araji̧ri̧rȩ.

⁴ Ado Jechu judi, jabechji̧ chjö̧na̧i̧ oa dabarëremȩde jabërä. ‘Ja̧di dari̧ japapadiro̧coada’ quëna̧ daba marëremȩde. Ado pio ju̧ri̧pȩ acji go̧düdäräa̧ji̧ri̧ oa dëbë cjiadärämȩrȩ, iëno̧ë ta̧rëa̧dejȩrȩ: —¿Chjia oa na̧tanȩrȩ? —yo̧a̧dejȩrȩ.

⁵ Ado judiro̧: —Chjia oa na̧tadë, jabechji̧ Jechu pio ju̧i̧ na̧tarea̧ro̧jo̧ȩ, Nacharë bë ma̧ri̧rimȩ pio ju̧i̧ —yo̧a̧diro̧jo̧ȩ. Ado ja̧dëa ji̧ Jechu judi yo̧a̧dejȩrȩ: —Pio judirequede —yo̧a̧dejȩrȩ. Ado Juda judi, u̧i̧pë gatë tänȩmȩ pio judi ëba cjiarëremȩdejȩrȩ.

⁶ Ado Jechu judi pio ji̧ri̧iäpȩmo̧ dëbë yo̧a̧ ji̧, “Pio judirequede” yo̧a̧ ji̧, jabechji̧ duriräpȩmo̧ cjatäa̧ maeadirȩ daburo ütëborë.

⁷ Ja̧dëa ji̧ Jechu judi ado iëno̧ë ta̧rëa̧dejȩrȩ: —¿Chjia oa na̧tanȩrȩ? Ado judiro̧ daburi pio judiri cjitë ëte ado dëbë yo̧a̧diro̧jo̧ȩ: —Chjia oa na̧tadë, jabechji̧ Jechu pio ju̧i̧ na̧tarea̧ro̧jo̧ȩ, Nacharë bë ma̧ri̧rimȩ pio ju̧i̧ —yo̧a̧diro̧jo̧ȩ.

⁸ Ado Jechu judi yo̧a̧dejȩrȩ: —Pio yabo yo̧a̧requededibe. Pio judirequede. Ado pio coamo̧ na̧tarä judi, jabechji̧ ca̧ pumȩ pio ji̧ri̧ baärea̧ yürütäreji̧ri̧renȩro̧jȩrȩ, pio coadiji̧ri̧ pio ji̧ri̧ —yo̧a̧dejȩrȩ.

⁹ Jabechji̧ ja̧di ta̧rëri̧ yo̧rëremȩde Jechu judi jibëa̧ jadü pio ji̧ri̧ chjiari, jënȩ jibëa̧ Ama̧i̧ oa jabërä yo̧a̧rea̧ ma̧ȩ üdë coëma cjiari̧ cjiadiäpea̧ oa. Ado judi jibëa̧ Ama̧i̧ oa jabërä yo̧a̧ ji̧, ja̧di ta̧rëri̧ yo̧a̧dejȩ: “Aja̧ Ama̧i̧, mȩnȩ coa yürüa̧ pio judiro̧ cja̧rȩmȩrȩ dabadëpea̧ oa cjiadëa̧dirȩ.” Aja̧, ja̧di ta̧rëri̧ yo̧a̧dejȩ. Ado pio ju̧i̧iä yo̧a̧dejȩrȩ acji jana̧ji̧ri̧ pio ji̧ri̧ jibëa̧ jadü pio ji̧ri̧ baärea̧ yürütä.

¹⁰ Ado Chimo̧ Pedro pio judi acji jana̧ji̧ri̧ oa daea̧ oaiä, chjaodëri̧ mu̧i̧ coëno̧a̧dejȩ jibëa̧ coana̧rea̧ go̧a̧ti̧ oa, dëbëribo jo̧dë chiamȩ coana̧rea̧ oa. Ado goae tarari̧ gu̧na̧mȩrȩ, cja̧rȩmȩ oa ta̧ra̧ tuti guna̧dejȩ. Tjamo̧ davä. Tjamo̧ goë tuti ja̧bepamȩ pio ju̧i̧ ja̧ mu̧i̧tjoi̧ ja̧ ta̧ra̧ tuti guna̧dejȩ, mu̧i̧ chjuari ja̧ ta̧ra̧ pio ju̧i̧. Maco quȩmȩ pio ju̧i̧ ta̧ra̧ tuti gu̧na̧dejȩ.

¹¹ Jabo Pedro ju̧i̧iäpȩmo̧ yo̧a̧dejȩ Jechu judi: —Jo̧ërä ado chjereno̧ go̧iovä na̧ coana̧rea̧ oa —yo̧a̧dejȩ—. Jabechji̧ ca̧ Ama̧i̧ judi coa a̧dë chjäte goaedëti̧ oa chjätä tänȩräbo, jabechji̧ ta̧rëdiäpareconȩ. 'Jabechji̧ ca̧ Ama̧i̧ judi coa chjai̧dë oa chjätä tänȩa̧ üdë jabechji̧dida, dabamȩrȩ chjätä tänȩdicoada’ quëna̧pareconȩ —yo̧mȩrȩ yo̧rëremȩdejȩ Jechu judi Chimo̧ Pedro pio ju̧i̧iäpȩmo̧.

Jechu pio ju̧i̧ mitë ëte Ana̧ quȩmȩ ja̧ dëbëräpȩ cjia tänȩrëreji̧ri̧diro̧jo̧ȩ

¹² Ja̧dëa ji̧ domano guadia judiro̧, tjamo̧ tai̧mȩ guadiaborë chjaodëri̧ mitërëreji̧ri̧diro̧jo̧ȩ Jechu ju̧i̧, Ütë ja̧ bë oa jidaji̧ri̧ guadia pio judiro̧borë. Ado mitë ëte, yurë cji̧dëno̧a̧diro̧jo̧ȩ.

¹³ Ado yurëno̧ ëte, yabochja ëba järëreji̧ri̧diro̧jo̧ȩ Ana̧ quȩmȩ pio ju̧i̧iäpȩ, pearä tjamo̧ goë tuti ja̧beparëremȩ pio ju̧i̧iäpȩ. Ado Ana̧ pio judi tjamo̧ goë tuti ja̧bepamȩ pio ju̧i̧ ja̧ joja̧ȩterëremȩde. Jabechji̧ Caipa quȩmȩ pio judi ja̧ȩtȩrëremȩdejȩ. Aja̧, ano̧ mire tjamo̧ goë tuti ja̧bepamȩrȩ cjo̧ro̧rëremȩde pio jiro uirä Caipa judi.

¹⁴ Ado danȩrȩ, Caipa pio judirëremȩde judio tjamo̧ yo̧ji̧ri̧ pio ji̧ri̧iäpȩmo̧ yo̧rëremȩ judi, Aja̧, cja̧rȩmȩ pumȩrȩ o pio ji̧ri̧ chjiari ano̧ mire ja̧bopea̧ pio ju̧i̧ chjiari yo̧rëremȩ judi.

Pedro judi ma̧ȩ chjádë yürürëremȩde Jechu pio ju̧i̧ chjiari

¹⁵ Ado guadia judiro̧ Jechu pio ju̧i̧ tjadori pio judiri ëba go̧düa̧ ji̧, Chimo̧ Pedro pio judi duriräpȩ dae cjië jämȩrȩ cho̧rë järëremȩdejȩrȩ ado cja̧rȩmo̧ jadü pio ju̧i̧ nö̧ta, Jechu ja̧ jadü pio ju̧i̧ nö̧ta. Ado Jechu ju̧i̧ ëba jäa̧ji̧ri̧ judiro̧ tjamo̧ goë tuti ja̧bepamȩ pio ju̧i̧ ja̧ bëräpȩ go̧düdäräa̧rä, jabechji̧ pio ju̧i̧ ja̧ bë yurorä yu̧a̧dirȩ, tutia̧ tjoräpȩ. Ado Pedro pio ju̧i̧ nö̧ta järemȩ pio judiborë yu̧a̧de. Jabechji̧ tjamo̧ goë tuti ja̧bepamȩ pio judi dabarëremȩdejȩ pio jiro jadü oa. ‘Pio judidida’ quëna̧ dabarëremȩdejȩ. Ado pio ju̧i̧iä chjaodëri̧ yu̧a̧rea̧ daea̧de.

¹⁶ Jabo Pedro judi yu̧a̧tärea̧ ju̧i̧, tutia̧ dairäpȩ cjiadiäa̧de jo̧ë ya cotoräpȩ ju̧ri̧. Jabo jibëa̧ jadü üdë ado chjereno̧ duriräpȩmo̧ jäëno̧ ëte, ni̧bäa̧dejȩ jo̧ë ya jidayi̧ ji̧, Pedro pio ju̧i̧ chjadëri̧ yu̧a̧rea̧ yürütä. Ado pio ji̧ nö̧ta ni̧bä ëte, jabechji̧ Pedro pio ju̧i̧ ëba yu̧a̧dejȩ tutia̧ tjoräpȩ ju̧ri̧, Jechurë cjiamȩräpȩ ju̧ri̧.

¹⁷ Jabo yu̧a̧mȩ oa joë yarä jidayi̧ iei̧ pio jini̧ iëno̧ë ta̧rëa̧nȩjȩ Pedro ju̧i̧: —¿Pio mȩnȩborë pio yabo goa ma̧na̧ pio ju̧i̧ ja̧ jadüdënȩ? —iëno̧ë ta̧rëa̧nȩjȩ. Jabo Pedro judi dëbë yo̧a̧dejȩ: —Cjäri̧ maquë. Pio ju̧i̧ ja̧ jadüdëquë —yo̧a̧dejȩ.

¹⁸ Ado chjöchja tjamo̧rëremȩde. Ado pio ju̧i̧iä mu̧i̧tjoi̧ judiro̧, ado ütë ja̧ bë oa jidaji̧ri̧ pio judiro̧borë cjo̧dë oa cäa̧diro̧jo̧ȩ. Ado cjo̧dë yuroro cjiarëreji̧ri̧dirȩ tara cjiapea̧ oa, cäacääpe bagapea̧ oa. Ado Pedro pio judiborë jä ëte, ëba cjiarëremȩdejȩrȩ chjöchja tjamo̧ oaiä.

Tjamo̧ goë tuti ja̧bepamȩ pio judi iëno̧ iëno̧ ta̧rërëremȩdejȩ Jechu ju̧i̧

¹⁹ Ado pearä tjamo̧ goë tuti ja̧beparëremȩ pio judi, Ana pio judi iëno̧ iëno̧ cjiarëremȩdejȩ Jechu ju̧i̧ judi a̧ra̧ano̧a̧ pio ju̧i̧ chjiari, jibëa̧ jadü pio ji̧ri̧ chjiari.

²⁰ Ado Jechu judi ja̧di ta̧rëri̧ dëbë yo̧a̧dejȩ: —Danȩ, cüdë a̧ra̧ano̧a̧ ji̧, jabechji̧ ütëborë chjadëri̧ ta̧rërea̧mi̧ dari̧ a̧ra̧ano̧a̧ marequede chjadë maeari̧. Judiorë a̧dopamȩräpȩ, Ütë tjamo̧ ja̧ bëräpȩbo a̧ra̧ano̧a̧requede, pumȩrȩ a̧dopamȩräpȩ ju̧ri̧. Cja̧rȩmȩ co goadi a̧ra̧ano̧dëa̧requede.

²¹ Ado pio ju̧i̧iä iëno̧ë ta̧rërequedemȩ. ¿Tjana̧ ju̧i̧iä iëno̧ë ta̧rërenȩque? Jabechji̧ pio coaiä iëno̧ë ta̧rëdëtäremȩrenȩ, jabo pio coaiä ta̧rëji̧ri̧ pio ji̧ri̧iä iëno̧ë ta̧rëtäremȩrenȩjȩrȩ. “¿Yö̧ta dari̧ a̧ra̧ano̧a̧de?” yo̧mȩrȩ iëno̧ë ta̧rëtäremȩrenȩjȩrȩ pio ji̧ri̧. Jabechji̧ tjamo̧ri̧ dabadirȩ davä cüdë yo̧a̧ pio ju̧i̧ chjiari.

²² Jabo Jechu judi pio jȩa iëno̧ë ta̧rëmȩ pio ju̧i̧ ja̧di ta̧rëri̧ dëbë yo̧a̧ oaiä, jabechji̧ guadia üdë cja̧rȩmȩrȩ goae tarari̧ bidea̧dejȩ Jechu ju̧i̧ chamachoro. Ado ërejämȩrȩ yo̧a̧dejȩ Jechu ju̧i̧: —Jabo cjäri̧ made, tjamo̧ goë tuti ja̧bepamȩ pio ju̧i̧iäpȩmo̧ ja̧di ta̧rëri̧ ni̧bärea̧mi̧dëde —yo̧a̧dejȩ.

²³ Jabo Jechu judi dëbë yo̧a̧dejȩ guadia oa: —Danȩ, cüdë eami̧ oa chjai̧dëri̧ ni̧bäa̧rä judi, chjadëri̧ yo̧coe ütëborë ta̧rëri̧. Jabo cüdë coëma cjiari̧ yo̧a̧rä judi, ¿tjana̧ ju̧i̧iä bidea̧renȩque? —yo̧mȩrȩ iëno̧ë ta̧rëa̧dejȩ.

²⁴ Ado Ana̧ judi, pearä tjamo̧ goë tuti ja̧beparëremȩ pio judi Jechu pio ju̧i̧iä ta̧rë ëte, yura̧ oa cjiamȩ oa chjadürëremȩdejȩ Caipa pio ju̧i̧iäpȩ, ano̧ mire tjamo̧ goë tuti ja̧bepamȩ pio ju̧i̧iäpȩ.

Pedro judi ado ma̧ȩ chjádë yürürëremȩde Jechu pio ju̧i̧ chjiari

²⁵ Ado Pedro judi, jabechji̧ cjo̧dë yuroro tara cjiarëremȩde cäacääpe bagapea̧ oa. Ado pio ju̧i̧iä jȩa yuroro cjiaji̧ri̧ pio judiro̧ yo̧a̧diro̧jo̧ȩ: —¿Pio mȩnȩborë pio yabo goa ma̧na̧ pio ju̧i̧ ja̧ jadüdënȩ? —iëno̧ë ta̧rëa̧diro̧jo̧ȩ. Jabo Pedro judi ma̧ȩ chjádë yürümȩrȩ yo̧a̧dejȩrȩ: —Cjäri̧ marequede. Pio ju̧i̧ ja̧ jadüdërequede —yo̧a̧dejȩrȩ.

²⁶ Ja̧dëa ji̧ tjamo̧ goë tuti ja̧bepamȩ pio ju̧i̧ ja̧ mu̧i̧tjoi̧ üdë, Pedrorë ta̧ra̧ tuti gu̧na̧rea̧ pio ju̧i̧ ja̧ omȩ üdë yo̧a̧dejȩ: —Danȩ, pio idëpȩ tjadoro cjiamȩ oa daea̧ jirorequedemȩ pio yabo goa ma̧na̧ pio ju̧i̧ nö̧ta cjiamȩ oa —yo̧a̧dejȩ.

²⁷ Jabo Pedro judi ado ma̧ȩ chjádë yürümȩrȩ yo̧a̧dejȩ: —Cjäri̧ marequede. Pio ju̧i̧ ja̧ jadü tjamo̧dërequede. Ado chjaodëri̧ eamȩpea̧de ocararo üi̧ üdë.

Ano̧ mire ëba järëreji̧ri̧diro̧jo̧ȩ Jechu ju̧i̧ Pirato pio ju̧i̧iäpȩ

²⁸ Ja̧dëa ji̧ peadai̧rä japamitë boi̧chji̧ chjätä ëte, Caipa ja̧ bëri pio judiri ëba järëreji̧ri̧diro̧jo̧ȩ Jechu ju̧i̧ Pirato pio ju̧i̧ ja̧ bë ana̧räpȩ, chiri tjamo̧ cjo̧ro̧mȩ pio ju̧i̧ ja̧ bëräpȩ. Jabo judio tjamo̧ yo̧ji̧ri̧ judiro̧ yu̧a̧tärea̧ ji̧, dairäpȩ cjiadiäa̧dirȩ. ‘Aja̧, judio maa̧ro̧da, ado judiodërë cjo̧ro̧mȩ ja̧ bëräpȩ yu̧a̧rea̧mi̧dëdida, china̧chjadida, jabechji̧ a̧ro̧rȩ yu̧a̧rä judi, chjai̧dë gȩrȩ chiami̧ dari̧ cjiapai̧ daa̧ro̧da, ado uëmo̧ a̧dë chjätärea̧ do nö̧ta chjadëri̧ juratärea̧ ji̧, jurarea̧ dadëpaa̧ro̧da, jabechji̧ dairäpȩ tutia̧ oa cjiami̧ dari̧ cjiadiätäreji̧ri̧a̧ro̧da’ quëna̧ jo̧rȩta̧ oaiä, jabechji̧ dairäpȩ cjiadiäa̧dirȩ.

²⁹ Ado pio ju̧i̧iä Pirato judi go̧düa̧de dairäpȩ, pio judiro̧ cjiamȩräpȩ. Ado Jechu pio ju̧i̧ damȩrȩ iëno̧ë ta̧rëa̧dejȩrȩ: —¿Tjana̧ chjai̧dë oa japamȩ oa aechide yo̧renȩro̧jo̧ȩ pio yoa? —yo̧a̧dejȩrȩ.

³⁰ Ado dëbë yo̧a̧diro̧jo̧ȩ: —Danȩ, judi chjai̧dëri̧ japadëa̧rä judi, ëba jana̧dëa̧täreji̧ri̧rea̧ro̧jo̧ȩ pio mȩaiäpȩ —dëbë yo̧a̧diro̧jo̧ȩ.

³¹ Ado Pirato judi dëbë yo̧mȩrȩ yo̧a̧dejȩrȩ: —Jabechji̧ ëba baächji̧jo̧ȩ. Dibëa̧ ma̧ȩra̧ ütara ëte, bape chjaochji̧jo̧ȩ. Tüdüa̧mi̧ darä cjo̧ro̧pea̧ ma̧ȩra̧ ütara ëte, jabechji̧ bape chjaochji̧jo̧ȩ pio mȩnȩro̧ jo̧rȩta̧mi̧ —yo̧a̧dejȩrȩ. Jabo dëbë yo̧a̧diro̧joȩ: —Jabo cjäri̧ marea̧rȩ, a̧ro̧rȩ judio tara, eami̧ oa ja̧bo tänȩrea̧ dadë marea̧ro̧jo̧ȩ —yo̧a̧diro̧jo̧ȩ—. Jabechji̧ domano̧ pio ji̧ri̧ ja̧ chja̧oerä cjo̧ro̧rea̧rȩ. Ado ibë ja̧bo tänȩrea̧ yürüdë madiro̧ibe. Pio ju̧i̧iä eami̧ pumȩ oa ja̧bo tänȩrea̧ dadërea̧ro̧jo̧ȩ. Jabechji̧ domano pio mȩnȩro̧ tänȩa̧rämo̧ ja̧bo tänȩrea̧mi̧ dade —yo̧ji̧ri̧rȩ dëbë yo̧a̧diro̧jo̧ȩ.

³² Jabechji̧ ja̧di ta̧rëri̧ yo̧rëreji̧ri̧dirȩ judio tjamo̧ yo̧ji̧ri̧ judiro̧ eami̧ pumȩ oa ja̧bo tänȩpea̧ pio ju̧i̧ chjiari. Ado ja̧di ta̧rëri̧ yo̧a̧ oaiä, jabechji̧ tjamo̧i̧ cjiari̧ cjiadiäa̧de Jechurë no̧mȩ yo̧rërea̧ ma̧ȩ üdë, jënȩ toro ja̧bopea̧ pio ju̧i̧ chjiari ma̧ȩ üdë.

³³ Ado ja̧dëa ji̧ Pirato judi ado chjereno̧ yu̧a̧de jibëa̧ bë ana̧räpȩ. Ado Jechu pio ju̧i̧ ëna̧diäa̧dejȩ. Ado pio jȩaiäpȩ jana̧mȩ oa iëno̧ë ta̧rëa̧dejȩ: —Chjadëri̧ yo̧coe. ¿Chjianȩ mȩnȩ? ¿Judio pio ji̧ri̧ ja̧ tjamo̧ yo̧mȩ pio judidënȩ? ¿Na̧ chja̧oerä cjo̧ro̧dëdirȩ? —iëno̧ë ta̧rëa̧dejȩ.

³⁴ Jabo Jechu judi dëbë yo̧a̧dejȩ: —¿Chjiaiä ta̧rëmȩrȩ iëno̧ë ta̧rërenȩque? ¿Na̧ea̧ ma̧na̧ri̧ jo̧rȩtamȩrȩ yo̧renȩque? Jabo ado cja̧rȩmo̧ pio ju̧i̧iä ta̧rëmȩrȩ yo̧renȩque? —yo̧mȩrȩ iëno̧ë ta̧rëa̧dejȩ Jechu judi.

³⁵ Ado Pirato judi ërecjiamȩrȩ dëbë yo̧a̧dejȩ: —¿'Judio jirodida' quëna̧renȩque? Cjäri̧ marequede, judiodërequede. Judio ji̧ri̧ ja̧ oa daba ma ja̧didë. Danȩ, na̧ pumȩ pio judiro̧dirȩ judio judiro̧. Ado pio judiro̧dirȩ mȩa mitëa̧ji̧ri̧ judiro̧. Ado ëba jana̧diro̧mȩ pio coaiäpȩ. Tjamo̧ goë tuti ja̧bepaji̧ri̧ pio ji̧ri̧ nö̧ta eba jana̧diro̧mȩ. Pio ju̧i̧iä daba jironȩ. ¿Tjana̧ chjai̧dë oa japea̧renȩ?

³⁶ Ado Jechu judi dëbë yo̧a̧dejȩ: —Danȩ, cüdë pio yoa chirirä tjamo̧ yo̧mȩrȩ cjo̧ro̧dërequede —yo̧a̧dejȩ—. Cüdë yo̧a̧ chja̧oerä cjo̧ro̧ji̧ri̧ judiro̧ pio yoa chirirä ja̧rä judi, chjaodëri̧ acji jana̧täreji̧ri̧dirȩ pio coa a̧dopea̧ oa, judio tjamo̧ yo̧ji̧ri̧ judiro̧ pio coa mitërea̧ dachea oa. Jabo cjäri̧ madirȩ, ca̧ chja̧oerä cjo̧ro̧ji̧ri̧ judiro̧ pio yoa chirirä ja̧dëdirȩ —dëbë yo̧a̧dejȩ.

³⁷ Pio ju̧i̧ ta̧rëa̧ oaiä, Pirato judi iëno̧ë ta̧rëa̧dejȩ: —¿Jabo mȩnȩ tjamo̧ yo̧mȩrȩ cjo̧ro̧dënȩ? —yo̧a̧dejȩ. Ado Jechu judi dëbë yo̧a̧dejȩ: —Dëdë, tjamo̧ yo̧mȩre cjo̧ro̧quede. Birë ma̧na̧mȩrȩ ara̧ oa cjiarëremȩrequede pio yoa chirirä cjo̧ro̧pea̧ oa, tjamo̧i̧ cjiari̧ baämȩ ma̧ȩ pio ju̧i̧ ni̧bäpea̧ oa. Tjamo̧i̧ cjiari̧ baämȩ ma̧ȩ pio ju̧i̧ ta̧rë ja̧boji̧ri̧ pio judiro̧, ta̧rë ja̧bodiro̧coe —yo̧a̧dejȩ.

³⁸ Ja̧dëa ji̧ Pirato judi iëno̧ë ta̧rëa̧dejȩ: —Jabo chjadëri̧ yo̧coe. ¿Tjana̧de tjamo̧i̧ cjiari̧ baämȩ ma̧ȩ üdë? Yo̧coe —yo̧a̧dejȩ. Aja̧, ja̧di ta̧rëri̧ yo̧mȩrȩ iëno̧ë ta̧rëa̧dejȩ Jechu ju̧i̧. ‘Tjamo̧i̧ cjiari̧ baämȩ jo̧rȩtarea̧ pio ju̧i̧ chjiari tjamo̧ri̧ dabarea̧mi̧dë jirodida’ quëna̧ jorȩtamȩrȩ iëno̧ë ta̧rëa̧dejȩ. Ja̧dëa ji̧ Pirato judi Jechu pio ju̧i̧ nö̧ta ni̧bä ëte, ado chjereno̧ go̧dürëremȩde a̧dopë cjiaji̧ri̧ pio ji̧ri̧iäpȩ. Ado yo̧a̧dejȩrȩ: —Danȩrȩ, pio jiro üi̧ üdë chjai̧dëri̧ japadëa̧de. Ja̧bo tänȩrea̧mi̧dëde.

Jechu pio ju̧i̧ ja̧bo tänȩpea̧ oa yürürëremȩdejȩrȩ guadia ji̧ri̧ Pirato judi

³⁹ Ado pio ju̧i̧iä cja̧rȩmȩ oa go̧dü tänȩparequede yaba̧. Jabechji̧ mȩnȩro̧ no̧mȩ tjamo̧ri ja̧ pio coa yo̧rërea̧ oaiä, jabechji̧ cja̧rȩmȩ oa chaäa̧ oa cjiamȩ pio ju̧i̧ go̧dü tänȩmȩpea̧requede. Jabechji̧ cja̧rȩmȩ co ui nö̧ta, uëmo̧ a̧dë chjätärea̧ do nö̧ta, cja̧rȩmȩ oa go̧dü tänȩmȩpea̧requede. Ado pio ju̧i̧iä iëno̧ë ta̧rërequededibe yaba̧. Cüdë pio yoa go̧dü tänȩrä judi, judio ja̧ tjamo̧ yo̧mȩ ütë pio ju̧i̧ go̧dü tänȩrä judi, ¿jabechji̧ chjadëdëde? —yo̧a̧dejȩrȩ.

⁴⁰ Jabo to̧bari̧ dëbë yo̧ji̧ri̧rȩ yo̧a̧diro̧jo̧ȩ: —Cjäri̧ made, ju̧i̧ go̧dü tänȩdëpea̧. Jabechji̧ Baraba quȩmȩ pio ju̧i̧ go̧dü tänȩtä earea̧ro̧mȩ —yo̧a̧dirȩ. Ado Baraba judi chaäa̧ oa cjiarëremȩde chjai̧dëri̧ ja̧pea̧ ju̧i̧iä, garüa̧ pio ju̧i̧iä.