Juan 12 - Biblia Pume

Maria jini̧ arë cjarärëreyi̧nȩjȩ goaeri̧ pjȩa̧mȩ joarea̧ oa Jechu ja̧ tarä

¹ Uëmo̧ a̧dë chjätärea̧ do üdë jabë ma̧na̧dëa̧rä, jabë 6 do pjärämȩrä, Jechu judi ado järëremȩde Betania quȩmȩ bë ma̧ri̧räpȩ. Jënȩ bëdü tänȩa̧ pio ju̧i̧iäpȩ järëremȩde, Dacharorë cjo̧ro̧mȩräpȩ.

² Ado ju̧ri̧pȩ go̧düdäräa̧rä, jurapea̧ oa a̧doparëreji̧ri̧dirȩ Jechu pio ju̧i̧ ba chia jo̧rȩtaji̧ri̧rȩ. Ado jurarea̧ üdë chjo̧ȩa̧pea̧rä, Marta jini̧ a̧depea̧nȩjȩ jurarea̧ oa mechjaräpȩ. Ado Jechu judi chamȩ mechjaräpȩ ju̧ri̧ charëremȩde Dacharo judi peaja̧di, o judiro̧borë.

³ Ja̧dëa ji̧ Maria jini̧, goaeri̧ pjȩa̧mȩ joarea̧ ba chia tjamo̧ oa mitëyi̧rȩ arë cjaräa̧nȩjȩ Jechu ja̧ tarä. Nado quȩmȩ yo̧ra̧ japea̧ oa cjiamȩ goaeri̧ pjȩa̧mȩ joarea̧ oa, cja̧rȩmȩ kilo tjomo̧mi̧ arë cjaräa̧nȩjȩ. Ado ja̧di dari̧ japa ëte, jibëa̧ cö̧ra̧ pio ju̧ri̧ra̧ bubëgua̧nȩjȩ gaüparȩpea̧ oa. Ado a̧dë chjäte goaeri̧ pjȩa̧ üdë jo̧ tjo nö̧tai̧ oa goeri̧ pjea̧ cjiaremȩde bërä, pumȩ judiro̧ ütëborë tararea̧mi̧ dari̧.

⁴ Ado Jechu ja̧ jadü judi cja̧rȩmȩrȩ, Juda Icariote pio judi, Jechu pio ju̧i̧ u̧i̧pë gatë tänȩpamȩ pio judi yo̧a̧de:

⁵ —Jabo cjäri̧ manȩ, oëra̧ japea̧nȩ pio yi̧nëje —yo̧a̧dejȩrȩ—. Pio jiro goaeri̧ pjȩa̧mȩ joarea̧ üdë gatë tänȩa̧ oa cjia̧täremȩde chjö̧na̧i̧ti̧ oa cjäri̧ ja̧boji̧ri̧ pio ji̧ri̧iäpȩmo̧ chjarapë yürüpea̧ oa. Danȩrȩ, a̧dë chjäte ba chiade. Cja̧rȩmȩ ui codë oa ja̧bepea̧ bade, jono̧ra̧ a̧de. Ja̧di dari̧ japadëa̧täreyi̧nȩ —yo̧a̧de.

⁶ Aja̧, ja̧di ta̧rëri̧ yo̧rëremȩde Juda Icariote judi iei̧ pio ji̧ chjiari, judi garümȩ tara. Tjamo̧ davä. Judi chjö̧na̧i̧ti̧ oa cjäri̧ ja̧boji̧ri̧ pio ji̧ri̧ tjamo̧ri̧ a̧dorea̧ taradërëremȩde, jabo chëre maea oa jo̧rȩtarëremȩde judi garümȩ tara. Jabechji̧ Jechu ja̧ jadü ja̧ chëre pio ju̧i̧ boeamȩ tjamo̧rëremȩde. Chjibo jo̧ërä boea̧ oa goarëremȩde ji̧ri̧ ja̧ chëre oa, jabo babui̧ra̧ baë mitërëremȩde pio ji̧ri̧iä. Pio ju̧i̧iä Jechu ja̧ tarä arë cjarätä ea tjamo̧dëa̧dejȩ iei̧ ji̧.

⁷ Jabo Jechu judi tuti yo̧a̧dejȩ: —Jabo cjiajȩ. Chja ja̧di japatäni̧que —yo̧a̧dejȩ—. Ja̧di dari̧ japatämi̧ cjiayi̧rȩ jabërä jëdano̧nȩjȩ ca̧ icjara oa ta̧dë cjararä chjadëri̧ arë a̧ra̧ oa cjiabëmi̧. Jabo cjiajȩ.

⁸ Jabechji̧ ji̧dë ma a̧dorea̧ daparenȩro̧jȩrȩ chjö̧na̧i̧ti̧ oa cjäri̧ ja̧boji̧ri̧ pio ji̧ri̧iäpȩmo̧, jabo ji̧dë ma dadëparenȩro̧coe. Pio ju̧i̧iä jabechji̧, chjadëri̧ japea̧ni̧que —yo̧mȩrȩ yo̧a̧dejȩ Juda ju̧i̧iäpȩmo̧ Jechu judi.

Dacharo pio ju̧i̧bo ja̧bo tänȩpea̧ ji̧ järipea̧dirȩ tjamo̧ yo̧ji̧ri̧ judiro̧

⁹ Judio judiro̧ no̧i̧dërë goë ta̧rëji̧ri̧pea̧dirȩ Jechu judi Betania quȩmȩ bë ma̧ri̧räpȩ go̧düdäräa̧ pio ju̧i̧ chjiari. Ado pio ju̧i̧iä ja̧dira̧ järëreji̧ri̧dirȩ. Jabo Jechu pio ju̧i̧mo̧ jo̧rȩtaji̧ri̧rȩ jädëa̧dirȩ. Jabechji̧ Jechu judi bëdü tänȩa̧ oa cjiamȩ pio ju̧i̧bo datämi̧ cjiaji̧ri̧rȩ järëreji̧ri̧dirȩ, ja̧boa̧remȩ pio ju̧i̧ dapea̧ oa.

¹⁰ Ado pio ju̧i̧iä tjamo̧ goë tuti ja̧bepaji̧ri̧ pio judiro̧ järi tjamo̧pea̧dirȩ Dacharo pio ju̧i̧bo ja̧bo tänȩpea̧ ji̧.

¹¹ Jabechji̧ Dacharo pio ju̧i̧iä judio judiro̧ no̧i̧dërë pio jibë jiadaji̧ri̧pea̧diro̧jȩrȩ, Jechu pio ju̧i̧iäpȩmo̧ ano̧ mire quëna̧pea̧ oa. Ado pio ju̧i̧iä järi tjamo̧pea̧dirȩ Dacharo pio ju̧i̧bo ja̧bo tänȩpea̧ ji̧.

Jechu judi go̧düdärärëremȩde Jerucharȩräpȩ

¹² Ja̧dëa ji̧ dopea̧rä, pumȩ no̧i̧dë tjamo̧rȩ ta̧rëji̧ri̧pea̧dirȩ Jechu judi Jerucharȩräpȩ go̧düdäräpea̧ pio ju̧i̧ chjiari. Uëmo̧ a̧dë chjätärea̧ doro a̧dopera̧pea̧ji̧ri̧ pio judiro̧, Jerucharȩräpȩ a̧dopera̧pea̧ji̧ri̧ pio judiro̧ ta̧rëji̧ri̧pea̧dirȩ.

¹³ Ado Jechu pio jui̧ chjiari̧ ta̧rëa̧ oaiä, chjaodëri̧ budeno̧a̧dirȩ tjotjo a̧rümi̧ da oa, ji̧ra̧ tjamo̧ oa. Ado mu̧i̧ji̧ri̧rȩ järëreji̧ri̧dirȩ jana̧pamȩ pio ju̧i̧ dëbëdiäpea̧ oa. Ado ja̧dëa ji̧ Jechu pio ju̧i̧ no̧ro jana̧mȩ oa daea̧ji̧ri̧rȩ ja̧di ta̧rëri̧ ëna̧diäa̧dirȩ: —Ibëa̧ Ano̧mȩ pio yoa chjacjiamȩri̧ ni̧bätäro̧jo̧ȩ. Jabechji̧ a̧dëräpȩ cjiamȩ Ano̧mȩ pio judi chjadüa̧ oa ma̧na̧diibe. Jabechji̧ chjacjiamȩri̧ ni̧bätäro̧jo̧ȩ ibëa̧ Ütë oa, Icharai pio judiri ja̧ji̧ri̧ ja̧ Ütë oa —yo̧ji̧ri̧rȩ ëna̧diärëreji̧ri̧dirȩ.

¹⁴ Ado Jechu judi buro pëi̧ chja oa mitëmȩrȩ boë cha̧dejȩ go̧ȩpea̧ oa cjiarëremȩ ma̧ȩ üdë yo̧rërea̧mi̧. Ja̧di ta̧rëri̧ go̧ȩpea̧ oa cjiarëremȩde ma̧ȩ üdë jabërä:

¹⁵ “Jerucharȩ bë ma̧ri̧räpȩ cjo̧ro̧ji̧ri̧ pio mȩnȩro̧, jabechji̧ uapadëchji̧vä, jabo dachji̧vä. Danȩrȩ, dibëa̧ Ütë judi ma̧na̧de buro pëi̧ chjarä boë chamȩrȩ.”

¹⁶ Aja̧, ja̧di ta̧rëri̧ go̧ȩpea̧ oa cjiarëremȩde ma̧ȩ üdë jabërä, Jechu judi buro pëi̧ chjarä boë chabëmi̧. Jabo Jechu ja̧ jadü judiro̧ pio jiro ma̧ȩ pio ju̧i̧ chjiari tjamo̧ri̧ dabadërëreji̧ri̧dirȩ pearä judi. Jabo dëdë, japamitë chjätä ëte, Jechu judi a̧dëräpȩ ado chjereno̧ baäa̧rä, dëdë, na̧e chiapea̧dirȩ pio jiro ma̧ȩ pio ju̧i̧ chjiari, Jechu judi buro pëi̧ chjarä boë chamȩrȩ go̧düdäräa̧ pio ju̧i̧ chjiari, pumȩ judiro̧ Jechu ju̧i̧iäpȩmo̧ ja̧di dari̧ japea̧ pio ju̧i̧ chjiari.

¹⁷ Ado Jechu judi Dacharo pio ju̧i̧ bëdü tänȩa̧ ma̧ȩ üdë, ta̧dë cjararä arë a̧ra̧ oa cjiaremȩ pio ju̧i̧ bëdü tänȩa̧ ma̧ȩ üdë, jabechji̧ oëra̧ti̧ oa baärëremȩde irä darëreji̧ri̧ pio ji̧ri̧iä, pumȩ judiro̧ ütëbodärärë ta̧rërea̧mi̧ dari̧ ja̧boa̧remȩ pio ju̧i̧ chjiari.

¹⁸ Ado pio ju̧i̧iä pumȩ bubarë dëbëdiärëreji̧ri̧diro̧jo̧ȩ Jerucharȩräpȩ go̧düdäräa̧mȩ pio ju̧i̧. Jabechji̧ ja̧boa̧mȩ pio ju̧i̧ bëdü tänȩa̧mȩ pio ju̧i̧ irä datämi̧ cjiaji̧ri̧rȩ jidatarëreji̧ri̧diro̧jo̧ȩ, jauëchja cjiari̧ japea̧mȩ pio ju̧i̧.

¹⁹ Jabo pjaricheo judiro̧ ja̧di ta̧rëri̧ ni̧bä chjaoa̧dirȩ jibëa̧ dëbëti̧ra̧ chia: —Jabo cjäri̧ marea̧rȩ, eami̧ oa japarea̧ dadërea̧rȩ. Dae jädë marea̧rȩ. Boadärädiibe Jechu judi. Ütëbodäräti̧rȩ cho̧rë jäa̧ madiro̧jo̧ȩ —yo̧a̧dirȩ pjarichjeo pio judiro̧, ana̧ri̧ jo̧rȩtaji̧ri̧rȩ.

Jechu judi ni̧bä chjaorëremȩdejȩrȩ jënȩ ja̧bopea̧ pio ju̧i̧ chjiari.

²⁰ Ado judiodë judiro̧ orë peaja̧di a̧dopea̧ oa cjiarëreji̧ri̧dirȩ Jerucharȩräpȩ. Peaja̧di järëreji̧ri̧dirȩ Ütë tjamo̧ pio ju̧i̧iäpȩmo̧ chjacjiamȩri̧ jo̧rȩtapea̧ oa, do chjätärea̧ do nö̧ta.

²¹ Ado judiro̧ goëdepea̧diro̧jo̧ȩ Jechu ja̧ jadü cja̧rȩmȩ oa, Pjeripe pio ju̧i̧. Ado Pjeripe judi Garirea quȩmȩ chiriräpȩ ütëpea̧mȩrȩ cjo̧ro̧rëremȩde, Bechaida quȩmȩ bë ma̧ri̧räpȩ. Ado yo̧a̧diro̧jo̧ȩ: —Danȩ, ¿tjana̧räpȩde Jechu judi? —iëno̧ë ta̧rëa̧diro̧jo̧ȩ—. Datämi̧ cjiarea̧ro̧jo̧ȩ.

²² Ado pio ju̧i̧ ta̧rëa̧ oaiä, Pjeripe judi a̧dë jäa̧dejȩrȩ judiodë pio ji̧ri̧. A̧däre pio ju̧i̧ ma̧ȩ yürüpea̧ oa, a̧dë jäa̧dejȩrȩ. Ado A̧däre pio ju̧i̧ dadäräa̧rä, judiro̧ yo̧a̧ri̧rȩ ma̧ȩ yürepea̧diro̧jo̧ȩ Jechu ju̧i̧.

²³ Ado Jechu judi judiodë pio ji̧ri̧ chjiari ta̧rëa̧ oaiä, taruparëremȩde ni̧bä chjaopea̧ ji̧ jënȩ ja̧bopea̧ pio ju̧i̧ chjiari. Ja̧di ta̧rëri̧ yo̧mȩrȩ dëbë yo̧rëremȩdejȩrȩ jibëa̧ jadü yo̧a̧ri̧ oa: —Danȩrȩ, ca̧ chjacjiamȩrea̧ üdë chjadëri̧ na̧rȩa̧ oa cjiapea̧ do üdë ma̧na̧pea̧ querediä tjamo̧dique —yo̧a̧dejȩrȩ—. Danȩrȩ, Pumȩrȩ Ara̧ Tjamo̧ pio judirequede. Ado ca̧ chjacjiamȩrea̧ üdë chjadëri̧ na̧rȩa̧ oa cjiapea̧ do üdë ma̧na̧pea̧ querediä tjamo̧dique.

²⁴ Ado pio ju̧i̧iä tjamo̧i̧ cjiari̧ yo̧requededibe. Tirigo quȩmȩ cho üdë daburo ponȩrä, buiude ji̧ra̧ tjamo̧pe järea̧mi̧ dari̧. Cho iremȩ üdë ja̧boa̧rämo̧ buiurea̧mi̧ dade cho tjoremȩ üdë. Ado buiuro, no̧i̧dë tjamo̧pe bagapade. Jabo iremȩ üdë ja̧bodërä judi, buiudëpade. Iremȩ üdë ja̧bodërä judi, jibëa̧ma̧i̧ cjiami̧ dari̧ cjiadiäpade cho üdë. Jabechji̧ ji̧ra̧ jätärea̧ ji̧, jibëa̧ma̧i̧mi̧ dari̧ cjiadiäpade. Jabechji̧ ja̧bopea̧ chiade iremȩ üdë jibëa̧ma̧i̧ cjiami̧ dari̧ cjiachea oa —yo̧mȩrȩ yo̧rëremȩdejȩrȩ Jechu judi jënȩ ja̧bopea̧ pio ju̧i̧ chjiari.

²⁵ Ado ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaoa̧dejȩrȩ: —Danȩrȩ, pio yoa chirirä ja̧ maeara̧ jo̧rȩtamȩrȩ cjo̧ro̧mȩ judi, jibëa̧ maea oa jo̧rȩtamȩrȩ cjo̧ro̧mȩ judi bucho ana̧ cjo̧ro̧rea̧ dadëpade. Jabo dai chirirä ja̧ jo̧rȩtarea̧ra̧ cjo̧ro̧dëmȩ judi, jibëa̧ maea oa jo̧rȩtamȩrȩ cjo̧ro̧dëmȩ judi, jabechji̧ bucho ana̧ cjo̧ro̧rea̧ dapade —yo̧a̧dejȩrȩ Jechu judi—.

²⁶ Danȩrȩ, ca̧ ma̧ȩrä cjo̧ro̧tämi̧ cjiamȩ pio judi, jabechji̧ cho̧rë ma̧na̧mi̧ dari̧ quëna̧tädique. Ado ja̧di dari̧ japamȩ pio judi, jabechji̧ pio cüdë cjiamȩräpȩ cjiapade. Ado ca̧ Ama̧i̧ judi ba chia dapadejȩrȩ ca̧ ma̧ȩrä cjo̧ro̧ji̧ri̧ pio ji̧ri̧ —yo̧mȩrȩ yo̧a̧dejȩrȩ Jechu judi.

²⁷ Ado Jechu judi ji̧dë u̧i̧ yo̧mȩrȩ a̧de ni̧bä chjaoremȩdejȩrȩ: —Danȩrȩ, a̧dë chjäte gitori̧ jo̧rȩtarequede ca̧ chji̧ oa chacha tjamo̧mi̧ dari̧ —yo̧a̧dejȩrȩ—. ¿Jabo yö̧ta yo̧pea̧de ca̧ Ama̧i̧ ju̧i̧iäpȩmo̧? “Cjäri̧ ma Ama̧i̧, ana̧ri̧ tara tänȩdëcoe” ¿yo̧pea̧? Jabechji̧ cüdë ana̧ri̧ tarachea oa chjadëri̧ chjätä tänȩcoe Ama̧i̧” ¿yo̧pea̧? Cjäri̧ marequede, ja̧di ta̧rëri̧ yo̧dëpareconȩ ca̧ Ama̧i̧ ju̧i̧. Jabechji̧ goae tjamo̧dë pio ju̧i̧bo chjätäpea̧ oa birë ma̧na̧requede —yo̧a̧dejȩrȩ Jechu judi jibëa̧ jadü yo̧a̧ri̧ oa.

²⁸ Ado ja̧dëa ji̧ Jechu judi ni̧bäa̧dejȩ jibëa̧ Ama̧i̧ ju̧i̧. Ja̧di ta̧rëri̧ ni̧bämȩrȩ yo̧a̧dejȩ: —Jabechji̧ Ama̧i̧, mȩnȩ jo̧rȩta̧mi̧ japavä na̧ chjacjiamȩrea̧ üdë chjadëri̧ na̧rȩa̧ oa cjiapea̧ oa, pumȩ judiro̧ pio mȩaiäpȩmo̧ ba chia jo̧rȩtapea̧ oa —yo̧a̧dejȩ. Ado chjaodëri̧ a̧dëri pio judiri ma̧na̧mȩ ma̧ȩ oa ta̧rërëreji̧ri̧diro̧jo̧ȩ ja̧di ta̧rëri̧ yo̧mȩ oa: —Aja̧, ca̧ chjacjiamȩrea̧ pio ju̧i̧ chjadëri̧ na̧rȩa̧reconȩ peadë. Jabo peadë na̧rȩa̧räbo, jabechji̧ ado chjereno̧ na̧rȩpareconȩ —yo̧mȩrȩ yo̧rëremȩde Ütë tjamo̧ judi.

²⁹ Ado ju̧ri̧pȩ cjiaji̧ri̧ pumȩ judiro̧ orë ma̧ȩ oa ta̧rëa̧ oaiä, jabomo̧ dörö earämi̧ cjiarëreji̧ri̧diro̧jo̧ȩ. Jabo o judiro̧ yo̧a̧dirȩ: —Cjäri̧ made, dörö ea ma ja̧didë, jabo a̧dërimȩ mu̧i̧tjoi̧ pio judi ni̧bäa̧ jirodejȩ Jechu ju̧i̧ —yo̧a̧dirȩ.

³⁰ Jabo Jechu judi yo̧a̧dejȩrȩ: —Danȩrȩ, mȩnȩro̧ pio yabo ta̧rëa̧ ma̧ȩ üdë, jabechji̧ pio coa a̧dopea̧ oa ni̧bädëa̧de, jabo pio dibë a̧dopea̧ oa ni̧bäa̧de.

³¹ Danȩrȩ, dai chiriräpȩti̧ oa cjo̧ro̧ji̧ri̧ pio ji̧ri̧ bape chjaopea̧ do üdë ma̧na̧diibe. Ado yaröca ütë pio judi boadäräa̧ oa cjiapea̧ do üdë peaja̧di ma̧na̧diibe. Tjamo̧ davä. Yaröca ütë pio judi, Ichiae pio judi, dai chirirä cjiamȩ ütë pio judi boadäräa̧ oa cjiapea̧ do üdë ma̧na̧diibe.

³² Jabo cüdë toro uëräpȩmo̧ cji̧däa̧ oa cjiarä, jabechji̧ oëra̧ti̧ oa cjo̧ro̧ji̧ri̧ pumȩ ütëbodärä oa a̧doparequedejȩrȩ, judiro̧ pio coaiäpȩmo̧ quëna̧pea̧ oa —yo̧mȩrȩ yo̧rëremȩdejȩrȩ Jechu judi.

³³ Aja̧, ja̧di dari̧ yo̧rëremȩdejȩrȩ Jechu judi. Jabechji̧ pumȩ judiro̧ chjadëri̧ dabapea̧ oa, ‘Aja̧, ja̧di dari̧ ja̧bopadida, toro ja̧bopadida’ quëna̧ dabapea̧ oa yo̧rëremȩdejȩrȩ.

³⁴ Ado pumȩ buba judiro̧ pio ju̧i̧ ta̧rëa̧ oaiä, yo̧a̧diro̧jo̧ȩ: —Danȩ, ibëa̧ ma̧ȩ üdë, tüdüa̧mi̧ darä cjo̧ro̧pea̧ ma̧ȩ üdë ni̧bädiibe Ütërë mitëa̧ Chjätä Tänȩmȩ pio ju̧i̧ chjiari —yo̧a̧diro̧jo̧ȩ—. “Aja̧, Ütërë mitëa̧ Chjätä Tänȩmȩ judi bucho ana̧ cjo̧ro̧pade” yo̧diibe ma̧ȩ üdë. “Ja̧bopade” yo̧dëdiibe. Ado ja̧dirä judi, ¿tjana̧ ju̧i̧ä ja̧di ta̧rëri̧ yo̧renȩ? —iëno̧ë ta̧rëa̧diro̧jo̧ȩ—. ¿Tjana̧ ju̧i̧iä “Pumȩrȩ Ara̧ Tjamo̧ pio judi toro uëräpȩmo̧ cjiari̧ cji̧däa̧ oa cjiapade” yo̧a̧renȩibe? Oëra̧ baämi̧ dari̧ cjiade. Ado ¿chjia tjamo̧de jiro Pumȩrȩ Ara̧ Tjamo̧ judi? Chjadëri̧ yo̧ibe —yo̧a̧diro̧jo̧ȩ.

³⁵ Ado Jechu judi dëbë yo̧a̧dejȩrȩ: —Danȩrȩ, japamitë boi̧chji̧ maea oa cjiadique tatami̧ damȩ ju̧i̧, dibëa̧ chjarerä cjo̧ro̧pea̧ ji̧. Jabechji̧ dibë a̧dë baäpea̧ ji̧ querediä tjamo̧requede. Ado pio ju̧i̧iä yo̧requededibe. Tatami̧ damȩ pio judi jabë cjo̧ro̧a̧ nö̧ta, jabechji̧ tatami̧ darämo̧ cjo̧ro̧chji̧vä. Aja̧, bagönȩ üdë dibë chjaodëri̧ acji jana̧mi̧ dari̧ japachea oa tatami̧ darämo̧ cjo̧ro̧chji̧vä. Jabechji̧ bagönȩrä ta̧i̧mȩ judi, ‘ja̧dira̧ baäquëda’ quëna̧ dabadëmȩrȩ ta̧ide.

³⁶ Pio ju̧i̧iä yo̧requededibe. Tatami̧ damȩ pio judi pio dibëdi jabë ëba cjo̧ro̧a̧ nö̧ta, jabechji̧ quëna̧chji̧jo̧ȩ. Ado coaiäpȩmo̧ quëna̧ji̧ri̧ judiro̧, tata u̧ri̧ maearë cjo̧ro̧padirȩ —yo̧mȩrȩ yo̧rëremȩdejȩrȩ Jechu judi. Jechu judi ja̧di ta̧rëri̧ yo̧ ëte, a̧dë baärëremȩdejȩrȩ pumȩ ji̧ri̧ jibëa̧ma̧i̧ cjiapea̧ oa, pumȩ pio ji̧ri̧ a̧dë goadipea̧ oa.

Pumȩ judiro̧ quëna̧dëa̧diro̧jo̧ȩ Jechu ju̧i̧

³⁷ Jabechji̧ judi pumȩ ja̧ dachoro co ji̧ra̧ri̧ jauëchja cjiari̧ na̧rȩa̧räbo, quëna̧dëa̧diro̧jo̧ȩ.

³⁸ Jabechji̧ tjamo̧i̧ cjiari̧ cjiadiäa̧de davä Ichaia judi jabërä go̧ȩparërea̧ ma̧ȩ üdë, Ütërë ea jana̧ chjadüa̧ oa ni̧bämȩ pio judi jabërä go̧ȩparërea̧ ma̧ȩ üdë. Ja̧di ta̧rëri̧ go̧ȩparëremȩde: "Ano̧mȩ, ¿tjana̧ ju̧i̧iä pumȩ judiro̧ ta̧rë ja̧bodë madiro̧ibe? Ütë tjamo̧ ja̧ jauëchja pio ju̧i̧ irä dae chjaoa̧räbo, jabechji̧ jiadadirȩ. ¿Tjana̧ ju̧i̧iä ji̧dë ma jiadadiro̧jo̧ȩ?" Aja̧, ja̧di ta̧rëri̧ go̧ȩpea̧ oa cjiarëremȩde ma̧ȩ üdë pumȩ judiro̧ jiadapea̧ pio ju̧i̧ chjiari.

³⁹ Ado judiro̧ ji̧dë ma jiade ta̧rërërea̧ oaiä, jabechji̧, quëna̧rea dadëa̧dirȩ. Ichaia pio judi yo̧rërea̧mi̧ quëna̧rea̧ dadëa̧dirȩ. Ado judiro̧ quëna̧rea̧ dadëa̧ oaiä, jabechji̧ ja̧di dari̧ japarëremȩdejȩrȩ Ütë tjamo̧ judi, Ichaia pio judi yo̧rërea̧mi̧. Ta̧rëchji̧vä:

⁴⁰ “Aja̧, Ütë tjamo̧ judi da coto tänȩmi̧ dari̧ japea̧dejȩrȩ, mo̧a̧ mo̧a̧ cjo̧ro̧ji̧ri̧mi̧ dape järi̧. Ado jibëa̧ chji̧ oa tuti carami̧ dari̧ japea̧dejȩrȩ dabaparea̧mi̧dëri̧. Jabechji̧ judiro̧ chjaparȩa̧ oa cjiami̧ dari̧ cjiachea oa, judiro̧ ano̧ mire jo̧rȩtachea oa, judiro̧ dadiäji̧ri̧mi̧ dari̧ jo̧rȩtachea oa, jabechji̧ ja̧di dari̧ japarëremȩdejȩrȩ Ütë tjamo̧ judi.”

⁴¹ Aja̧, ja̧di ta̧rëri̧ jabërä yo̧rëremȩde Ichaia judi Jechu pio ju̧i̧ chjiari. Jabechji̧ pio ju̧i̧ ja̧ chjacjiamȩrea̧ oa jabërä darërea̧ oaiä, ja̧di ta̧rëri̧ yo̧rëremȩde.

⁴² Ado judirä, tjamo̧ yo̧ji̧ri̧ judio no̧i̧dërë peaja̧di quëna̧ji̧ri̧pea̧diro̧jo̧ȩ Jechu ju̧i̧. Jabo pio ju̧i̧ chjiari chjadë maearä ni̧bätärea̧ ji̧, uaparëreji̧ri̧dirȩ pjaricheo pio ji̧ri̧iä. ‘Jabo cjäri̧ maa̧ro̧da, a̧ro̧rȩ Jechu pio ju̧i̧ chjiari ni̧bärä judi, aeno̧padiro̧ibëda, judiorë a̧doparea̧ bëräpȩ a̧doparea̧ yurüdëpadiro̧ibëda’ quëna̧ jo̧rȩta̧ji̧ri̧rȩ cjapi maeari̧ cjiadiärëreji̧ri̧dirȩ, pio ju̧i̧ chjiari chjadëri̧ ni̧bätärea̧ ji̧,.

⁴³ Jabechji̧ pumȩ ja̧ ya oaiä goaeri̧ ta̧rëa̧ üdë ji̧dë ui goaerëremȩde pio ji̧ri̧iä. Jabechji̧ Ütë tjamo̧ judi pio ji̧ri̧ chjiari chjacjiamȩri̧ ni̧bäa̧ üdë goae tjamo̧tärea̧ ji̧, goae tjamo̧dërëremȩdejȩrȩ. Tjamo̧ davä. Ütë tjamo̧ judi pio jibëiäpȩmo̧ chjacjiamȩri̧ yo̧a̧ üdë goae tjamo̧dërëremȩdejȩrȩ.

Pumȩ judiro̧ jiada̧ ma̧ȩra̧ ütarapadejȩrȩ Jechu judi cjiadiä japamitërä

⁴⁴ Ado Jechu judi to̧bari̧ ëna̧diämȩrȩ ni̧bärëremȩdejȩrȩ pumȩ buba oa: —Danȩrȩ, pio coaiäpȩmo̧ quëna̧mȩ judi, pio coaiäpȩmo̧ ma quëna̧dëde, jabo coa chjadüa̧mȩ pio ju̧i̧iäpȩmo̧bo quëna̧mȩde —yo̧a̧dejȩrȩ—.

⁴⁵ Ado pio coa damȩ judi, coa chjadüa̧mȩ pio ju̧i̧bo dadejȩ.

⁴⁶ Danȩrȩ, tatamȩmi̧ darë pio yoa chiriräpȩ birë ma̧na̧requede chiriräpȩti̧ oa cjo̧ro̧ji̧ri̧ judiro̧ pio coaiäpȩmo̧ quëna̧pea̧ oa, judiro̧ bagönȩmi̧ darä cjiadiächea oa.

⁴⁷ Jabo pumȩ judiro̧ ca̧ ma̧ȩ oa ta̧rë ëte quëna̧dërä judi, jabechji̧ bape chjaoa̧ oa cjiapadirȩ. Jabo pio cüdë bape chjaodëparequedejȩrȩ. Jabechji̧ pumȩ pio ji̧ri̧ bape chjaopea̧ oa birë ma̧na̧dërequede, jabo pumȩ pio ji̧ri̧ chjätärea̧ yürüpea̧ oa ma̧na̧requede ji̧dëri̧.

⁴⁸ Jabo dëdë, coa jiadaji̧ri̧ pio judiro̧, ca̧ ma̧ȩ oa jiadaji̧ri̧ pio judiro̧, jabechji̧ ütara ëte bape chjaoa̧ oa cjiapadirȩ. Jabechji̧ cüdë ni̧bä chjaoa̧ ma̧ȩra̧ pio ju̧ri̧ra̧ ütara ëte bape chjaoa̧ oa cjiapadirȩ cjiadiäa̧ japamitërä. Tjamo̧ davä. Judiro̧ coa jiada̧ ma̧ȩra̧ pio ju̧ri̧ra̧ bape chjaoa̧ oa cjiapadirȩ.

⁴⁹ Tjamo̧i̧ cjiari̧ yo̧requededibe. Danȩrȩ, ca̧ea̧ ma̧na̧ri̧ jo̧rȩtamȩrȩ ni̧bädë marequede, jabo coa chjadüa̧mȩ pio judi yo̧a̧ duri pio ju̧i̧mo̧i̧ ni̧bärequededibe, ca̧ Ama̧i̧rȩ yo̧a̧ duri pio ju̧i̧mo̧i̧.

⁵⁰ Ado judi ni̧bäa̧ üdë, bucho ana̧ cjo̧ro̧rea̧ yürümȩde. Ado pio ju̧i̧iä yo̧requededibe ado. Cüdë ni̧bäa̧ üdë, ca̧ Ama̧i̧ judi yo̧a̧ duri maeade —yo̧mȩrȩ ni̧bä chjaorëremȩdejȩrȩ pumȩ ji̧ri̧ Jechu judi.