Juan 11 - Biblia Pume

Dacharo quȩmȩ judi ja̧boa̧de

^1-2 Cja̧rȩmȩ üi̧ judi Dacharo quȩmȩrëremȩde. Betania quȩmȩ bë ma̧ri̧räpȩ cjo̧ro̧rëremȩde jibëa̧ ami̧ ji̧ri̧ nö̧ta, Maria pio ji̧ nö̧ta, Marta pio ji̧ nö̧ta. Ado chjadëri̧ cjo̧ro̧rërea̧ ji̧, Dacharo judi gito ja̧bomȩrȩ cjo̧ro̧mȩpea̧de. Ado Maria jini̧ pio jini̧nȩ Jechu pio ju̧i̧iäpȩ järëreyi̧nȩ. Goaeri̧ pjȩa̧mȩ joarea̧ oa Ano̧mȩ pio ju̧i̧ ja̧ tarä arë cjarärëreyi̧ pio jini̧nȩ. Jibëa̧ cö̧ra̧ Ano̧mȩ ja̧ ta oa bubëguarëreyi̧ pio jini̧nȩ. Pio ji̧ ja̧ ayi̧ma̧i̧ judi gito ja̧bomȩpea̧de.

³ Ado pio ju̧i̧iä yaboji̧ri̧ jini̧ro̧ ma̧ȩ chjadüa̧ni̧ro̧jo̧ȩ Jechu ju̧i̧iäpȩmo̧ pumȩ pio ju̧i̧iä. “Aja̧ Ano̧mȩ, mȩnȩ ea̧ tjamo̧ pumȩ pio judi gito ana̧pea̧de” yo̧mȩ ma̧ȩ pio ju̧i̧ yo̧ji̧ri̧rȩ ma̧ȩ chjadürëreji̧ri̧ni̧ro̧jo̧ȩ.

⁴ Ado Jechu judi ma̧ȩ ta̧rëa̧ oaiä ja̧di ta̧rëri̧ yo̧a̧de: —Dacharo judi taramȩborë bucho ana̧ ja̧bodëpade. Jabo jabechji̧ gito ja̧bode Ütë ja̧ jauëchjarea̧ üdë chjadëri̧ na̧rȩa̧ oa cjiapea̧ oa. Ado ca̧ jauëchjarea̧ pio judiborë chjadëri̧ na̧rȩa̧ oa cjiapea̧ oa ja̧bode peaja̧di. Jabechji̧ pumȩ judiro̧ ca̧ jauëchjarea̧ oa darä, ‘Aja̧, Ütë tjamo̧ ja̧ Joja üdë a̧dë chjäte ba chiadida’ quëna̧ jo̧rȩtapadiro̧coe. Ado pio ju̧i̧iä gito ja̧bode —yo̧a̧de.

^5-6 Ado Jechu judi, jabechji̧ ea tjamo̧rëremȩdejȩrȩ pio jiro pumȩ ji̧ri̧. Aja̧, Marta pio ji̧, ji̧ ja̧ oyi̧ Maria pio ji̧, ado Dacharo pio ju̧i̧ ea tjamo̧rëremȩdejȩrȩ. Jabo pio ji̧ri̧ ea tjamo̧räbo, ado Dacharo pio ju̧i̧ chjiari ma̧ȩ oa ta̧rëa̧räbo, jabechji̧ chjaodëri̧ jädërëremȩde. Jo̧ȩra̧pe jätärea̧ ji̧, jënȩ cjo̧ro̧mȩri pio judiri chjaodëri̧ jätärea̧ ji̧, jabechji̧ jëreeadëmȩrȩ cjiadiäa̧de yo̧a̧ri̧ do.

⁷ Ado yo̧a̧ri̧ do chjätä ëte, yo̧a̧dejȩrȩ jibëa̧ jadü ji̧ri̧: —Jaeibe. Goëdetärea̧ro̧jȩrȩ. Ado chjereno̧ jätärȩ Judearäpȩ, Dacharo cjo̧ro̧mȩräpȩ —yo̧a̧dejȩrȩ.

⁸ Jabo ju̧i̧ ta̧rëa̧ oaiä, Jechu ja̧ jadü judiro̧ bücjüri̧ cjiaji̧ri̧rȩ yo̧a̧diro̧jo̧ȩ: —Jabo cjäri̧ marenȩ a̧ra̧ano̧mȩ, ja̧dira̧ järea̧mi̧dëde. Jabechji̧ ado cja̧rȩmo̧ doremȩrä pio ju̧ri̧pȩji̧ri̧ judiro̧ ta̧dëra̧ pio ju̧ri̧ra̧ ae ja̧bo tänȩtämi̧ cjiareji̧ri̧diro̧mȩ. ¿Pio ju̧i̧ dabamȩborë ja̧dira̧ jätämi̧ cjianȩ? —yo̧ë ta̧rëa̧diro̧jo̧ȩ.

⁹ Jabo Jechu judi dëbë yo̧mȩrȩ yo̧a̧dejȩrȩ doro jäpea̧ pio ju̧i̧ chjiari: —Danȩrȩ, doro jäa̧ üdë chjadëde —yo̧a̧dejȩrȩ—. Uapai̧ dadëde. Chjadëri̧ järea̧mi̧ dade. Jabechji̧ do üdë japamitë ana̧ri̧ mo̧ëdiibe a̧ro̧rȩ chjadëri̧ tai̧rea̧mi̧ dari̧. Jabechji̧ doro tai̧ji̧ri̧ judiro̧ chjadëri̧ dariä jädirȩ. Chjadëri̧ da mireriä tai̧rea̧ dadirȩ, ta ano̧e cjatärea̧ decjiari̧.

¹⁰ Jabo gȩnȩrä tai̧ji̧ri̧ judiro̧, cjäri̧ madirȩ, ta ano̧e cjatäpai̧ dadirȩ tatarä jädë tara. Jabechji̧ järea̧ no̧ oa darea̧mi̧dë oaiä chjadëri̧ tai̧rea̧ dadëde. Ado pio ju̧i̧iä uapai̧ dade —yo̧a̧dejȩrȩ jibëa̧ jadü ji̧ri̧ Jechu judi. Aja̧, jibëa̧ jadü judiro̧ chjadëri̧ dabapea̧ oa, 'Aja̧, pio yaba̧ jäpea̧ üdë chjadëdida, järea̧mi̧ dadida, chjai̧dë oa chjätädëpaa̧ro̧da’ quëna̧ dabapea̧ oa, ja̧di ta̧rëri̧ ni̧bä chjaorëremȩdejȩrȩ toro tai̧pea̧ pio ju̧i̧ chjiari.

¹¹ Ado ja̧dëa ji̧ a̧de yo̧a̧dejȩrȩ jibëa̧ jadü ji̧ri̧: —Danȩrȩ, ibëa̧ jadü üdë, Dacharo pio judi jabomo̧ mo̧a̧mȩpea̧de, jabo jäparequede bëdü tänȩpea̧ oa —yo̧a̧dejȩrȩ.

¹² Ado ju̧i̧ ta̧rëa̧ oaiä jibëa̧ jadü judiro̧ dëbë yo̧a̧diro̧jo̧ȩ: —Jabomo̧ mo̧a̧rä judi, jabechji̧ chjadëri̧ bëdüpade —yo̧a̧diro̧jo̧ȩ.

¹³ Jabo Jechu judi “mo̧a̧mȩpea̧de” yo̧a̧ ji̧, jabomo̧ mo̧a̧rämi̧ cjiareji̧ri̧diro̧jo̧ȩ. Jabo cjäri̧ made, mo̧a̧rea̧ pio ju̧i̧ jo̧rȩtamȩrȩ yo̧dëa̧dejȩrȩ. Jabechji̧ Dacharo judi ja̧boa̧ pio ju̧i̧ jo̧rȩtamȩrȩ yo̧a̧dejȩrȩ.

¹⁴ Ado pio ju̧i̧iä Jechu judi chjadë maearä cjiami̧ dari̧ cjiapea̧ oa yo̧a̧dejȩrȩ: —Danȩrȩ, Dacharo judi ja̧boa̧de.

¹⁵ Ado cüdë jabë ju̧ri̧pȩ go̧düdärädëa̧ oaiä, jabechji̧ ma̧ chiadëri̧ cjiarequede. Ado pio dibëiä chjadëde peaja̧di. Jabechji̧ yaba̧ ji̧dë u̧i̧ quëna̧rea̧ daparenȩro̧coe. Jaeibe. Jätärȩ yaba̧ —yo̧a̧dejȩrȩ Jechu judi.

¹⁶ Ado Jechu judi ja̧di ta̧rëri̧ yo̧a̧ oaiä, jibëa̧ jadü üdë, Toma pio judi yo̧a̧dejȩrȩ jadü pio ji̧ri̧iäpȩmo̧: —Jaeibe, cho̧rë jätäro̧jo̧ȩ. Pio a̧ro̧rȩborë jätäreji̧ri̧rea̧rȩ ibëa̧ Ano̧mȩ pio ju̧i̧ nö̧ta. Jabechji̧ a̧ro̧rȩ ja̧borä judi, pio ju̧i̧ nö̧ta ja̧botäreji̧ri̧rea̧rȩ —yo̧a̧dejȩrȩ. Ado Toma judi, peaja̧di “Chjara” quȩmȩrëremȩde.

Jechu judi bëdü tänȩmȩ pio judi cjo̧ro̧rea̧ yürümȩ pio judide

¹⁷ Jechu judi jibëa̧ jadü pio ji̧ri̧ nö̧ta Betania quȩmȩ bë ma̧ri̧räpȩ go̧düdäräa̧rä, jadüchiami̧ dori ja̧ arë ara̧ oa cjiarëremȩde Dacharo judi ta̧dë cjararä.

¹⁸ Ado Betania quȩmȩ bë ma̧ri̧ üdë Jerucharȩ bë ma̧ri̧ queri̧räpȩde. Jachi tjamo̧dëde.

¹⁹ Ado pio ju̧i̧iä judio judiro̧ no̧i̧dërë go̧düdärärëreji̧ri̧dirȩ Jerucharȩ bë ma̧ri̧ri pio judiri. Jabechji̧ Marta pio ji̧ dapea̧ oa, Maria pio ji̧ dapea̧ oa, go̧düdäräa̧dirȩ jibëa̧ omȩrea̧ pio ju̧i̧ ana̧ri̧ jo̧rȩtaji̧ri̧ pio ji̧ri̧ ori̧ bagari̧ ëba cjiapea̧ oa, jini̧ro̧ cjatäcjie jo̧rȩtarea̧ dapea̧ oa.

²⁰ Ja̧dëa ji̧ Marta jini̧ Jechurë jana̧ pio ju̧i̧ chjiari ta̧rëa̧ oaiä, jäeno̧a̧nȩ pio ju̧i̧ dëbëdiäpea̧ oa, jachi chjaräpȩ. Jabo ji̧di ja̧yi̧ jini̧, Maria pio jini̧, jabechji̧ bërä cjiadiäa̧nȩ.

²¹ Ado Marta jini̧ Jechu pio ju̧i̧iäpȩ go̧düdäräa̧rä, yo̧a̧nȩjȩ: —Danȩ ca̧ Ano̧mȩ, mȩnȩ jabërä jana̧rea̧ daea̧rä judi, mȩnȩ pio ibëdirä judi, jabechji̧ ca̧ omȩ üdë ja̧bodëa̧täremȩde.

²² Jabo judi ja̧boa̧räbo, chjadëri̧ dabarequede jabo. Jabechji̧ mȩnȩ na̧ Ama̧i̧ pio ju̧i̧iä cjo̧dërä judi, mȩnȩ cjo̧dëa̧mi̧ yürüpadimȩ —yo̧a̧nȩjȩ.

²³ Ja̧dëa ji̧ Jechu judi yo̧a̧dejȩ: —Damȩ, na̧ omȩ judi bëdüpadi cjo̧ro̧pea̧ oa —yo̧a̧dejȩ.

²⁴ Ado Marta jini̧: —Aja̧ ca̧ Ano̧mȩ, dabarequede ju̧i̧ —yo̧a̧nȩjȩ—. ‘Aja̧, cjiadiärea̧ japamitërä bëdüpadida’ quëna̧ dabarequede.

²⁵ Ado Jechu judi a̧de yo̧a̧dejȩ: —Damȩ, bëdü tänȩmȩ pio judiquë. Cjo̧ro̧rea̧ yürümȩ pio judiquë. Pio coaiäpȩmo̧ quëna̧ji̧ri̧ pio judiro̧ cjo̧ro̧padiro̧, ja̧boa̧ji̧ri̧borë.

²⁶ Ado coaiäpȩmo̧ quëna̧ji̧ri̧rȩ cjo̧ro̧ji̧ri̧ pio judiro̧, jabechji̧ ja̧bodëpadiro̧ bucho ana̧. ¿Peaja̧di quëna̧dëmȩ? —iëno̧ë ta̧rëa̧dejȩ.

²⁷ —Dë Ano̧mȩ, peaja̧di quëna̧requede —dëbë yo̧a̧nȩjȩ—. ‘Aja̧, Ütërë mitëa̧ Chjätä Tänȩmȩ pio judidida, Ütë tjamo̧ ju̧i̧ ja̧ Joja pio judi tjamo̧dida, Ütërë yo̧rërea̧mi̧ pio yoa chiriräpȩ birë ma̧na̧diibëda’ quëna̧ dabarequedemȩ —yo̧a̧nȩjȩ Jechu ju̧i̧ Marta jini̧.

Jechu judi eamȩpea̧de gitori̧ jo̧rȩta̧ oaiä

²⁸ Ado Marta jini̧ ja̧di ta̧rëri̧ yo̧ ëte, cuchupë baäeno̧a̧nȩ. Ado jibëa̧ bëräpȩ go̧düdäräa̧rä, goadi yo̧yi̧rȩ yo̧a̧nȩjȩ jibëa̧ oyi̧ ji̧, Maria pio ji̧: —Damȩ, A̧ra̧ano̧mȩ judi jana̧di. Jachi tjamo̧dëräpȩdi —yo̧a̧nȩjȩ—. Ado pio mȩa chjiari iëno̧ë ta̧rëa̧dicoa —yo̧a̧nȩjȩ.

²⁹ Ado Maria jini̧ Jechu judi jana̧pea̧ pio ju̧i̧ chjiari ta̧rëa̧ oaiä, chjaodëri̧ cjitë ëte jäeno̧a̧nȩ pio ju̧i̧ dëbëdiäpea̧ oa.

³⁰ Jabo jabërëremȩde Jechu judi. Jabechji̧ Marta jini̧ pio ju̧i̧ nö̧ta ni̧bä chjaorea̧räpȩ cjiarëremȩde jabë.

³¹ Ado judio judiro̧ Maria pio ji̧ nö̧ta ori̧ bagari̧ ëba cjiera̧pea̧ji̧ri̧ pio judiro̧ daea̧diro̧jȩ chjaodëri̧ cjitëno̧ ëte go̧düyi̧ oa. Ado chjaodëri̧ cho̧rë jäeno̧a̧diro̧jȩ. ‘Ta̧dë cjararäpȩ jä jironi̧da, ejaro cjiapea̧ oa jä jironi̧da’ quëna̧ jo̧rȩtaji̧ri̧rȩ cho̧rë jäa̧diro̧jȩ.

³² Ado Maria jini̧ Jechu pio ju̧i̧iäpȩ go̧düdäräa̧rä, ju chatura̧ cjiadiäyi̧rȩ yo̧a̧nȩjȩ: —Danȩ Ano̧mȩ, mȩnȩ pio yirä judi, ja̧bodëa̧täremȩde ca̧ ayi̧ma̧i̧rea̧ judi —yo̧a̧nȩjȩ.

³³ Ado ejaro cjiayi̧ oa daea̧dejȩ Jechu judi. Ado ji̧ nö̧ta ëba jana̧reji̧ri̧ pio ji̧ri̧bo daea̧dejȩrȩ ejaro cjiaji̧ri̧ oa. Ado ana̧ri̧ jo̧rȩtamȩpea̧de jibëa̧ chji̧rä. Ado iëno̧ë ta̧rëa̧dejȩ:

³⁴ —¿Tjana̧räpȩ arë ara̧nȩro̧ju̧i̧ ja̧boa̧mȩ ja̧ icjara oa? —iëno̧ë ta̧rëa̧dejȩ Jechu judi. Ado Maria jini̧ dëbë yo̧a̧nȩjȩ: —Goëdetäro̧jo̧ȩ Ano̧mȩ.

³⁵ Ado Jechu pio judiborë da ui gu̧rori̧ eamȩpea̧de.

³⁶ Ado judio judiro̧ eamȩ oa daea̧ oaiä, jibëa̧ dëbëti̧ra̧ chia ni̧bä chjaorëreji̧ri̧dirȩ, ja̧di ta̧rëri̧ yo̧ji̧ri̧rȩ: —Aja̧, Dacharo pio ju̧i̧ ea tjamo̧rëremȩdejȩ —yo̧a̧dirȩ Jechu pio ju̧i̧ chjiari.

³⁷ Jabo o judiro̧ yo̧a̧dirȩ: —Danȩrȩ, da cotoreji̧ri̧ pio ji̧ri̧ chjaparȩa̧dejȩrȩ ado chjereno̧ darea̧mi̧ dari̧. Ado pea ja̧boa̧mȩ pio ju̧i̧ jabërä peaja̧di ¿chjaparȩrea̧ dadëa̧täremȩdejȩ? —yo̧ji̧ri̧rȩ iëno̧ë ta̧rëa̧dirȩ o judiro̧.

Jechu judi bëdü tänȩrëremȩdejȩ Dacharo ju̧i̧

³⁸ Ado Jechu judi jibëa̧ chji̧rä ana̧ri̧ jo̧rȩtamȩrȩ jäa̧de Dacharo ju̧i̧ arë ara̧räpȩ, ta̧dë cjararäpȩ. Ado tutia̧ oa cjiarëremȩde ta̧dë chachara̧.

³⁹ Ado Jechu judi yo̧a̧dejȩrȩ: —Yuroropȩmo̧ arë jo̧ȩra̧chji̧jo̧ȩ ta̧dë oa —yo̧a̧dejȩrȩ. Jabo ja̧boa̧mȩ pio ju̧i̧rea̧ ja̧ jo̧ȩra̧mi̧ jini̧, Marta pio jini̧ chjaodëri̧ tuti yo̧a̧nȩjȩ: —Jabo cjäri̧ made, ja̧di dari̧ japarea̧mi̧dëde. Pea arë ara̧ oa cjia ma ja̧didëde. Jabechji̧ jadüchiami̧ dopea̧de yaba̧ ca̧ Ano̧mȩ. A̧dë chjäte pjȩa̧pe baga̧ jirode —yo̧a̧nȩjȩ.

⁴⁰ Jabo Jechu judi yo̧a̧dejȩ: —¿Tjana̧ yo̧a̧cama̧ pio yabo a̧ro̧rȩ pea ni̧bä chjaoa̧ ji̧? Tjana̧dë, "Jabechji̧ mȩnȩ quëna̧rä judi, Ütë ja̧ jauëchjarea̧ pio ju̧i̧ dapamȩ" yo̧remȩcama̧. Jabechji̧ cjiadiäje —yo̧a̧dejȩ.

⁴¹ Ja̧dëa ji̧ Jechu ja̧ ma̧ȩrä yuroräpȩmo̧ cjiari̧ arë jo̧ȩra̧diro̧jo̧ȩ ta̧dë chacha oa. Ado ja̧dëa ji̧ Jechu judi uëräpȩmo̧ caruchë damȩrȩ ja̧di ta̧rëri̧ ni̧bärëremȩdejȩ jibëa̧ Ama̧i̧ ju̧i̧: —Danȩ Ama̧i̧, cüdë mȩa ni̧bärä, jabechji̧ ta̧rë ja̧borenȩque. Ado pio ju̧i̧iä chjadëri̧ japarenȩque.

⁴² ‘Aja̧, ji̧dë ma ta̧rë ja̧bodicoada’ quëna̧ dabarequede pio mȩa chjiari Ama̧i̧. Ado yaba̧ jabechji̧ ütëborë ta̧rërea̧mi̧ dari̧ ni̧bärequedemȩ to̧bari̧ ni̧bämȩrȩ. Aja̧, pio yi a̧dopea̧ oa cjiaji̧ri̧ pio judiro̧borë ta̧rëpea̧ oa, cüdë mȩa yo̧a̧ pio ju̧i̧ ta̧rëpea̧ oa, mȩnȩ pio coa chjadüa̧ pio ju̧i̧ chjiari quëna̧pea̧ oa, jabechji̧ ütëborë ta̧rërea̧mi̧ dari̧ ni̧bärequedemȩ. Aja̧ Ama̧i̧, pio ju̧i̧mo̧i̧ yo̧requedemȩ. Ja̧ditäde —yo̧a̧dejȩ.

⁴³ Ado ja̧di dari̧ yo̧ ëte, ma̧ȩ to̧bari̧ ëna̧diämȩrȩ ëna̧diärëremȩde ütëborë ta̧rërea̧mi̧ dari̧: —Dacharo, go̧düvä —ëna̧diäa̧de.

⁴⁴ Ado Dacharo judi chjaodëri̧ go̧düa̧de. Ja̧boa̧mȩ oa purirea̧ chjibo cotora̧ pio ju̧ri̧ra̧ puria̧ oa cjiamȩrȩ go̧düa̧de. Jibëa̧ ichi üdë, jibëa̧ ta üdë puria̧ oa cjiamȩrȩ go̧düa̧de. Ado jibëa̧ dacho üdë peaja̧di puria̧ oa cjiaremȩde chjibo cotora̧. —Jareno̧chji̧jo̧ȩ judi chjadëri̧ baärea̧mi̧ dari̧ —yo̧a̧dejȩrȩ Jechu judi. Ado jareno̧a̧diro̧jo̧ȩ. Ado jareno̧a̧ oa cjiarä, baäa̧de Dacharo judi.

Tjamo̧ yo̧ji̧ri̧ judio judiro̧ järi tjamo̧pea̧dirȩ Jechu pio ju̧i̧ ja̧bo tänȩpea̧ ji̧

⁴⁵ Ado Maria pio ji̧ goëdaera̧pea̧ji̧ri̧ pio judiro̧ no̧i̧dërë irä darëreji̧ri̧diro̧jo̧ȩ Jechu ju̧i̧, jauëchja cjiari̧ japea̧mȩ oa. Ado pio ju̧i̧iä quëna̧ji̧ri̧pea̧diro̧jo̧ȩ orë.

⁴⁶ Jabo o judiro̧ pjaricheo pio ji̧ri̧iäpȩ baäeno̧a̧dirȩ. Ado Jechu judi japea̧ pio ju̧i̧ ni̧bä chjaoa̧diro̧jȩrȩ.

⁴⁷ Ado pio ju̧i̧iä pjaricheo judiro̧, ado o ji̧ri̧ chjiari tjamo̧ goë tuti ja̧bepaji̧ri̧ pio judiro̧ ëna̧diäa̧diro̧jȩrȩ tjamo̧ yo̧ji̧ri̧ pio ji̧ri̧iäpȩmo̧. Chjaodëri̧ a̧dopapea̧ oa ëna̧diäa̧diro̧jȩrȩ. Ado a̧dopea̧ oa cjiarä, ja̧di ta̧rëri̧ ni̧bä chjaorëreji̧ri̧dirȩ jibëa̧ dëbëti̧ra̧ chia ni̧bäji̧ri̧rȩ: —¿Tjana̧ japaparea̧rȩ? —iëno̧ë ta̧rëa̧dirȩ—. Danȩrȩ, pio jiro üi̧ üdë jauëchja cjiari̧ jape chjaomȩrȩ cjo̧ro̧de.

⁴⁸ Ado a̧ro̧rȩ eami̧ oa tuti japadërä judi, ütëbodärärë quëna̧padiro̧jo̧ȩ. Ado ütëborë quëna̧rä judi, domano̧ pio judiro̧ acji jana̧pai̧ da jirodiro̧ibe. Ütë tjamo̧ ja̧ bë pio ju̧i̧ baë iëchäpea̧ oa, pio ibë tjamo̧ yo̧ji̧ri̧dëpe baga tänȩpea̧ oa, judio ütëbodärä oa chjuchjuti̧mi̧ baä tänȩpea̧ oa, chjaodëri̧ acji jana̧pai̧ da jirodiro̧ibe —yo̧a̧dirȩ.

⁴⁹ Jabo cja̧rȩmȩrȩ, Caipa quȩmȩ judi, pio jiro uirä tjamo̧ goë tuti ja̧bepamȩrȩ cjo̧ro̧rëremȩ pio judi yo̧a̧dejȩrȩ o ji̧ri̧iäpȩmo̧: —Jabo cjäri̧ manȩrȩ, japëtaraji̧ri̧ tjamo̧nȩrȩ.

⁵⁰ Danȩrȩ, judio judiro̧ ütëborë goarijäa̧ oa cjiachea oa, jabechji̧ cja̧rȩmȩ üdë ano̧ mire ja̧botäremȩde pumȩ pio ji̧ri̧ chjiari. Ji̧dë u̧i̧ chjadëtäremȩde —yo̧a̧dejȩrȩ.

⁵¹ Jabo Caipa judi jibëa̧ ma̧na̧ri̧ jo̧rȩtamȩrȩ yo̧dëa̧de, jabo Ütë tjamo̧ pio judi tänȩa̧ oa yo̧rëremȩde. Jabechji̧ Ütërë ea jana̧ chjadüa̧ oa ni̧bärëremȩde. Tjamo̧ davä. Judio pio ji̧ri̧ chjiari tjamo̧ goë tuti ja̧bepamȩ tara, jabechji̧ Ütërë ea jana̧ chjadüa̧ oa ni̧bärëremȩde Jechu pio ju̧i̧ chjiari, judio pio ji̧ri̧ ja̧ oa ano̧ mire ja̧bopea̧ pio ju̧i̧ chjiari.

⁵² Ado judio pio ji̧ri̧mo̧ ni̧bädëa̧de, jabo Ütë tjamo̧ ja̧ u̧ri̧paji̧ri̧ pio ji̧ri̧ chjiaribo ni̧bärëremȩde, chiriräpȩti̧ oa chjuchuti̧mi̧ cjo̧ro̧ji̧ri̧ pio ji̧ri̧ chjiaribo. Tjamo̧ davä. Jechu judi Ütë tjamo̧ ja̧ u̧ri̧paji̧ri̧ ütëbo ja̧ oa ano̧ mire ja̧bopea̧ pio ju̧i̧ chjiaribo ni̧bärëremȩde. Jabechji̧ jibëa̧ u̧ri̧paji̧ri̧ judiro̧ ütëborë Jechu pio ju̧i̧iä cja̧rȩmȩrä a̧dopea̧ oa cjiapea̧ oa, ni̧bärëremȩde jabërä Caipa pio judi, jibëa̧ ma̧na̧ri̧ jo̧rȩtadëmȩrȩ.

⁵³ Ado tjamo̧ yo̧ji̧ri̧ judio judiro̧ a̧dopea̧ pio judiri yurori järi tjamo̧ji̧ri̧pea̧dirȩ Jechu pio ju̧i̧ ja̧bo tänȩpea̧ ji̧. ‘Jabechji̧ tjamo̧ri̧ ja̧bopea̧ chiadida, yö̧ta dari̧ ja̧bo tänȩrea̧ dapaa̧ro̧ju̧i̧da’ quëna̧ jo̧rȩtaji̧ri̧pea̧dirȩ.

⁵⁴ Ado pio ju̧i̧iä Jechu judi Judea chiriräpȩ chjadë maearä cjiami̧ dari̧ tai̧rërea̧ ji̧, ja̧di dari̧ tai̧dëmȩpea̧de. Jabechji̧ pio jiro chiri oa a̧dë baämȩrȩ baärëremȩde Epjarai̧ quȩmȩ bë mari̧räpȩ, chiri tjo queri̧räpȩ. Ado ju̧ri̧pȩ cjiadiäa̧de jibëa̧ jadü pio ji̧ri̧ nö̧ta.

⁵⁵ Ado uëmo̧ a̧dë chjätärea̧ do üdë ma̧na̧pea̧ ji̧ querediä tjamo̧rëremȩde, do chjätärea̧ do pio judi. Ado pio ju̧i̧iä pumȩ no̧i̧dërë, oëra̧ti̧ oa cjo̧ro̧ji̧ri̧ pio judiro̧ jabërä järëreji̧ri̧dirȩ Jerucharȩräpȩ chjai̧dë gȩrȩ chiadëji̧ri̧mi̧ dari̧ cjiadiäpea̧ oa Ütë tjamo̧ pio ju̧i̧iä.

⁵⁶ Ado pio judiro̧ na̧tarëreji̧ri̧diro̧jo̧ȩ Jechu pio ju̧i̧. Ado Ütë tjamo̧ ja̧ bëräpȩ cjiaji̧ri̧rȩ jibëa̧ dëbëti̧ra̧ iëno̧ iëno̧ ta̧rërëreji̧ri̧dirȩ: —¿Yö̧ta dari̧ jo̧rȩtanȩrȩ Jechu pio ju̧i̧ chjiari? ¿Jana̧dëpade? ¿Do chjätärea̧ doro a̧dopapea̧ oa jana̧dëpade? —yo̧rëreji̧ri̧dirȩ.

⁵⁷ Ado pjaricheo judiro̧, ado o ji̧ri̧ chjiari tjamo̧ goë tuti ja̧bepaji̧ri̧ pio judiro̧borë mitëtämi̧ cjia tjamo̧rëreji̧ri̧diro̧jo̧ȩ Jechu ju̧i̧. Chaäpea̧ oa mitëtämi̧ cjiarëreji̧ri̧diro̧jo̧ȩ. Ado pio ju̧i̧iä jabërä ma̧ȩ chjadüa̧diro̧jȩrȩ pumȩ ji̧ri̧iäpȩmo̧, pio jibëiäpȩmo̧ ma̧ȩ yürütä Jechu pio ju̧i̧ chjiari, pio ju̧i̧ darä judi pio jibëiäpȩmo̧ ma̧ȩ yürütä.