Juan 10 - Biblia Pume

Oveja jidamȩ pio ju̧i̧ chjiari ni̧bä chjaorëremȩdejȩrȩ Jechu judi

^1-2 Ado Jechu judi ji̧dë u̧i̧ yo̧tämi̧ cjiamȩrȩ a̧de ni̧bä chjaorëremȩdejȩrȩ pumȩ ji̧ri̧: —Danȩrȩ, tjamo̧i̧ cjiari̧ yo̧requededibe —yo̧a̧dejȩrȩ—. Oveja jidamȩ judi chjadëri̧ jidadejȩrȩ oveja pio ji̧ri̧. Ado gȩnȩpea̧rä, tutia̧rä yu̧a̧ tänȩdejȩrȩ totarea̧räpȩ, judiro̧ chjadëri̧ mo̧a̧pea̧ oa. Ado oveja jidamȩ judi totarea̧räpȩ yu̧a̧rä, jabechji̧ tjaoëri yu̧a̧dëmȩde, jabo yu̧a̧rea̧ jo̧ë yari pio judiri yu̧a̧de chjadëri̧. Jabo ja̧di dari̧ japadëmȩde garümȩ judi. Tjaoëri yu̧a̧mȩde. Uëri buë ëte yu̧a̧de garüpea̧ oa. Pumȩ chjadëdëde.

³ Ado jo̧ë ya jidamȩ judi, jabechji̧ chjadëri̧ are ië yürüdejȩ oveja jidamȩ ja̧ oa. Ado oveja jidamȩ judi ëna̧diädejȩrȩ oveja ji̧ri̧. Jibëa̧ quȩ oa yo̧mȩrȩ ëna̧diädejȩrȩ. Ado ëna̧diämȩ oa daba ta̧rëdiro̧jo̧ȩ. Ado yabo jämȩrȩ ëba go̧düdejȩrȩ totarea̧ri pio judiri dairäpȩmo̧.

⁴ Tjamo̧ davä. Oveja jidamȩ judi oveja pio ji̧ri̧ totarea̧ dairäpȩ ëba go̧düa̧rä, yabo ëba jä madejȩrȩ. Ado cho̧rë jädiro̧jo̧ȩ. Ju̧i̧ ja̧ ma̧ȩ oa daba ta̧rëji̧ri̧rȩ cho̧rë jädiro̧jo̧ȩ.

⁵ Ado cja̧rȩmo̧ oa cho̧rë jädëdiro̧jo̧ȩ, jabo a̧dë bagureno̧diro̧jo̧ȩ ji̧dëri̧. Jabechji̧ jibëa̧ ma̧ȩ oa daba ta̧rëdë tara, a̧dë bagureno̧diro̧jo̧ȩ.

⁶ Jabo Jechu judi pio jiro na̧rȩrea̧ ma̧ȩra̧ yo̧a̧ ji̧, bapë ta̧rëdërëreji̧ri̧diro̧jo̧ȩ pumȩ judiro̧. ‘¿Tjana̧ yo̧cjivadi?’ quëna̧ jo̧rȩtarëreji̧ri̧dirȩ.

Jechu pio judide oveja jidamȩ chjadë üdë

⁷ Ado Jechu judi ji̧dë u̧i̧ yo̧mȩrȩ a̧de ni̧bä chjaorëremȩdejȩrȩ pumȩ ji̧ri̧: —Tjamo̧i̧ cjiari̧ yo̧requededibe. Cüdë yu̧a̧rea̧ jo̧ë yami̧ darequede. Ado pio coaiämo̧i̧ yu̧a̧rea̧ dadirȩ oveja judiro̧.

⁸ Jabo ca̧ yaboi̧ jana̧rëreji̧ri̧ pio judiro̧ oëra̧ a̧ra̧ano̧ji̧ri̧dirȩ. Oveja eacji̧ quëna̧ japaji̧ri̧dirȩ. Jabomo̧ garüji̧ri̧rëreji̧ri̧dirȩ. Pumȩ chjadëdërëreji̧ri̧dirȩ. Ado pio ju̧i̧iä oveja judiro̧ ta̧rë ja̧bodëa̧diro̧jȩrȩ.

⁹ Jabo danȩrȩ, jo̧ë yami̧ darequede cüdë —yo̧a̧dejȩrȩ—. Ado ovejami̧ daji̧ri̧ pumȩ judiro̧ pio coaiä yu̧a̧rea̧ dapadirȩ, chjätärea̧ daji̧ri̧rȩ. Pio coaiä go̧dürea̧ dapadirȩ peaja̧di, mairi̧ jurariä tai̧ji̧ri̧mi̧ dari̧ cjo̧ro̧pea̧ oa.

¹⁰ Jabo garümȩ judi chjai̧dëri̧ japapea̧ pio ju̧i̧mo̧i̧ jo̧rȩtade oveja pio ji̧ri̧ chjiari. Baë mitëtämi̧ cjiadejȩrȩ. Ja̧bo tänȩtämi̧ cjiadejȩrȩ. Yuropa tänȩtämi̧ cjiadejȩrȩ. Jabo ja̧didërequede cüdë —yo̧a̧dejȩrȩ—. Jabechji̧ mȩnȩro̧ a̧dë chjäte goae tarari̧ cjo̧ro̧rea̧ dapea̧ oa yürera̧pea̧requededibe.

¹¹ Aja̧, oveja jidamȩ chjadërequede. Ado oveja jidamȩ judi, jabechji̧ jibëa̧ icjara oa yürüde oveja ja̧ oa, nȩmȩparea̧ decjiari̧. Jabechji̧ ano̧ mire ja̧bopea̧ oa yürüde judiro̧ chjätärea̧ dapea̧ oa.

¹² Jabo chëre boapea̧ pio ju̧i̧mo̧i̧ jo̧rȩtamȩrȩ ja̧bepamȩ judi, oveja oa tjamo̧ri̧ jidami̧ dari̧ jidadëde. Jabo o judiro̧ tänȩa̧rämo̧ jidade. Ado pio ju̧i̧iä chjadëri̧ jidadëdejȩrȩ jibëa̧dë tara —yo̧a̧dejȩrȩ—. Ado aure chjuamȩmi̧ da üdë acji jana̧rä chjadëri̧ jidatärea̧ ji̧, cjäri̧ madejȩrȩ, chjaodëri̧ a̧dë bagureno̧dejȩrȩ oveja ji̧ri̧. Ado aure chjuamȩmi̧ da üdë oëra̧ti̧ oa chjuchupechäri̧ baä tänȩdejȩrȩ cja̧rȩmȩ buba jurarërea̧ ji̧. Ado chjaodëri̧ mitëno̧dejȩrȩ uapai̧ dari̧.

¹³ Jabechji̧ o judiro̧ tänȩa̧ oa jidamȩ judi chëre boapea̧ pio ju̧i̧mo̧i̧ jo̧rȩtade. Oveja pio ji̧ri̧ ba chia dadëdejȩrȩ. Pio ji̧ri̧ chjiari bücjüri̧ cjiadëde. Ado pio ju̧i̧iä chjaodëri̧ a̧dë bagureno̧dejȩrȩ.

^14-15 Danȩrȩ, oveja jidamȩ chjadërequede —yo̧a̧dejȩrȩ—. Ado ca̧ Ama̧i̧ pio ju̧i̧ chjadëri̧ dabareconȩ, ado peaja̧di chjadëri̧ dabadique. Ado peaja̧dimi̧ dari̧ dabareconȩ ca̧ oveja pio ji̧ri̧, ado judiro̧ peaja̧di dabadiro̧coe. Ado ca̧ ovejami̧ da pio ji̧ri̧ ja̧ oa yürürequede ca̧ icjara oa ano̧ mire ja̧bopea̧ oa.

¹⁶ Ado o oa peaja̧di goarequedejȩrȩ ovejami̧ da pio ji̧ri̧. Peaja̧di ca̧ea̧dirȩ, jabo pio yoa totarea̧rä cjiadëdirȩ. Pio ji̧ri̧bo ëna̧diäpea̧ chiarequedejȩrȩ. Ado ta̧rë ja̧bopadiro̧coe ca̧ ma̧ȩ oa. Ado ëba ma̧na̧parequedejȩrȩ. Ado cja̧rȩmȩ bubape bagari̧ goaparequedejȩrȩ ji̧mo̧ ma cjo̧ro̧ji̧ri̧ oa. Ado ütëbo oa jidaparequedejȩrȩ, oveja jidamȩ cja̧rȩmȩrȩ —yo̧mȩrȩ ni̧bä chjaorëremȩdejȩrȩ Jechu judi pumȩ ji̧ri̧iäpȩmo̧.

¹⁷ Ado Jechu judi ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaorëremȩdejȩrȩ pumȩ ji̧ri̧: —Danȩrȩ, ca̧ icjara oa ja̧bopea̧ oa yürüpea̧ chiarequede ca̧ cjo̧ro̧rea̧ pio ju̧i̧ —yo̧a̧dejȩrȩ—. Jabo ja̧di dari̧ japa ëte, ado chjereno̧ cjo̧ro̧parequede. Ado pio ju̧i̧iä ea tjamo̧dique ca̧ Ama̧i̧ judi.

¹⁸ Eami̧ üdë coa ja̧bo tänȩrea̧mi̧dëdique. Jabo jabechji̧, ca̧ea̧ ma̧na̧ri̧ jo̧rȩtamȩrȩ yürürequede ca̧ icjara oa ja̧bopea̧ oa —yo̧a̧dejȩrȩ—. Jabechji̧ jauëchjamȩrȩ yürüpai̧ darequede ca̧ icjara oa judiro̧ coa ja̧bo tänȩpea̧ oa. Ado cüdë jauëchja tara, jabechji̧ ado chjereno̧ mitëpai̧ darequede peaja̧di ca̧ cjo̧ro̧rea̧ pio ju̧i̧. Ado chjereno̧ cjo̧ro̧pai̧ darequede. Ado peaja̧di dari̧ japatä yo̧a̧dique ca̧ Ama̧i̧ judi —yo̧a̧dejȩrȩ Jechu judi.

¹⁹ Jabo Jechu judi ja̧di ta̧rëri̧ yo̧a̧ oaiä yo̧a̧ri̧ bubami̧ dari̧ jo̧rȩtarëreji̧ri̧dirȩ judio judiro̧.

²⁰ O judiro̧: —Jabo cjäri̧ made, yaröca chiade —yo̧ chjaoreji̧ri̧dirȩ no̧i̧dërë—. Cjarari̧ cjiapea̧de. ¿Tjana̧ ju̧i̧iä ta̧rë charenȩro̧jo̧ȩ? —yo̧a̧dirȩ.

²¹ Jabo o judiro̧ yo̧a̧dirȩ: —Cjäri̧ made, yaröca chiamȩ judi ja̧di ta̧rëri̧ ni̧bädëmȩde. Yaröca chiamȩ judi da cotomȩ pio ju̧i̧ chjaparȩrea̧mi̧dëde —yo̧a̧dirȩ. Aja̧ ja̧di ta̧rëri̧ yo̧ji̧ri̧pea̧dirȩ yo̧a̧ri̧ bubami̧ dari̧ jo̧rȩtaji̧ri̧rȩ.

Cüdë Ama̧i̧ tjamo̧ pio judimi̧ dari̧ cjiarequede yo̧a̧dejȩrȩ Jechu judi

^22-23 Uipamȩ nö̧ta chjöchja tjamo̧pea̧rä, judio judiro̧ a̧dope chjaorëreji̧ri̧dirȩ Jerucharȩräpȩ do chjätäpea̧ oa. Jabechji̧ judiro̧ no̧mȩ tjamo̧ri ja̧ Ütë tjamo̧ ja̧ bë oa jëdano̧rërea̧ ji̧, acji jana̧rëreji̧ri̧ pio judiro̧ iëchäa̧rä, ado chjereno̧ jëdano̧rërea̧ ji̧, Ütë ja̧ bë üdë chjai̧dë gȩrȩ chiadëpe bagami̧ dari̧ cjiadiäpea̧ oa japarërea̧ ji̧, jabechji̧ a̧dope chjaorëreji̧ri̧dirȩ pio ju̧i̧ jo̧rȩtapea̧ oa. Ado pio jiro do chjätärea̧ do üdë ma̧na̧na̧ra̧rä, Jechu pio judiborë järëremȩde a̧dopapea̧ oa. Ado tai̧rëremȩde Ütë tjamo̧ ja̧ bë yuroro. Ütë ja̧ bëri pio judiri cjaȩta̧ra̧ pënȩrimo̧ a̧rüa̧ oa cjiamȩräpȩ ju̧ri̧, tutia̧ oa cjiadëmȩräpȩ ju̧ri̧ tai̧rëremȩde Choromo̧ quȩmȩräpȩ ju̧ri̧.

²⁴ Ado judio judiro̧ no̧i̧dërë Jechu pio ju̧i̧ daji̧ri̧rȩ tjoro tänȩa̧diro̧jo̧ȩ. Ado iëno̧ë ta̧rëa̧diro̧jo̧ȩ: —Danȩ, chjadëri̧ yo̧ibe a̧ro̧rȩ pio mȩa chjiari dabapea̧ oa —yo̧a̧diro̧jo̧ȩ—. Ji̧dë ma jidata tänȩdëibe. Danȩ, ¿Ütërë mitëa̧ Chjätä Tänȩmȩ pio judi tjamo̧dënȩ? Are iëmi̧ dari̧ yo̧ibe, a̧ro̧rȩ tjamo̧i̧ cjiari̧ dabarea̧mi̧ dari̧ —yo̧a̧diro̧jo̧ȩ.

²⁵ Ado Jechu judi dëbë yo̧a̧dejȩrȩ: —Danȩrȩ, peadë yo̧a̧requededibe, jabo quëna̧tärea̧ ji̧ quëna̧dëa̧renȩro̧coe —yo̧a̧dejȩrȩ—. Cüdë dibëa̧ chjarerä japea̧ pio ji̧ japea̧ mareconȩ ca̧ Ama̧i̧ pio ju̧i̧ ja̧ ma̧ȩrä, pio judi yürüa̧ jauëchjara̧. Ado cüdë japea̧ üdë, jabechji̧ pio coa chjiari chjadëri̧ na̧rȩdidibe. ‘Ütërë mitëa̧ Chjätä Tänȩmȩ pio judi tjamo̧dida’ quëna̧rea̧mi̧ dari̧ na̧rȩdidibe.

²⁶ Jabo cjäri̧ manȩrȩ, quëna̧dërenȩro̧coe —yo̧a̧dejȩrȩ—. Ca̧ ovejami̧ dadë tara, quëna̧dërenȩro̧coe.

²⁷ Jabechji̧ ca̧ ovejami̧ daji̧ri̧ pio judiro̧ ta̧rë ja̧bodiro̧coe. Ado chjadëri̧ dabarequedejȩrȩ peaja̧di. Ado chjadëri̧ cho̧rë jana̧diro̧coe.

²⁸ Ado bucho ana̧ cjo̧ro̧rea̧ yürürequedejȩrȩ, judiro̧ ja̧borea̧mi̧dëri̧. Ado pio coaiä chjadëri̧ mitëa̧ oa cjiami̧ dari̧ cjia̧ oaiä, jabechji̧ eami̧ üdë baë mitërea̧ dadëpadiro̧coe —yo̧a̧dejȩrȩ—.

²⁹ Danȩrȩ, ca̧ Ama̧i̧ pio judi yürüa̧dique ca̧ ovejami̧ da pio ji̧ri̧. Ado ca̧ Ama̧i̧ judi, jabechji̧ a̧dë chjäte jauëchjamȩ pio judide. Ado cja̧rȩmo̧rȩ nö̧tadë madejȩ. Ado pio ju̧i̧iä eami̧ üdë ovejami̧ da pio ji̧ri̧ baë mitërea̧mi̧dëde. Jabechji̧ jibëa̧ ichimi̧ darä cjiadirȩ. Ado eami̧ üdë ju̧i̧ ja̧ ichirämi̧ dari̧ cjiaji̧ri̧ pio ji̧ri̧ baë mitërea̧mi̧dëde.

³⁰ Ado cüdë, ca̧ Ama̧i̧borë, jabechji̧ cja̧rȩmȩrea̧rȩ —dëbë yo̧mȩrȩ yo̧rëremȩdejȩrȩ Jechu judi.

³¹ Jabo pio ju̧i̧ ta̧rëa̧ oaiä, cjäri̧ madiro̧jo̧ȩ, goëdëri̧ cjia tjamo̧pea̧diro̧jo̧ȩ. ‘Jabechji̧ Ütë tjamo̧ pio ju̧i̧ nö̧tamȩmi̧ dari̧ yo̧dibëda' quȩna̧ jo̧rȩtaji̧ri̧re goëdëri̧ cjia tjamo̧pea̧diro̧jo̧ȩ. Ado pio ju̧i̧iä ta̧dë oa mitëno̧a̧dirȩ pio ju̧i̧iäpȩmo̧ ae ja̧bo tänȩpea̧ oa.

³² Jabo Jechu judi yo̧a̧dejȩrȩ: —Danȩrȩ, dibëa̧ dachoro co ji̧ra̧ri̧ chjadëri̧ a̧doa̧requedejȩrȩ pumȩ ji̧ri̧, chjadëri̧ japamȩrȩ —yo̧a̧dejȩrȩ—. Ado cüdë ja̧di dari̧ japea̧ oaiä, jabechji̧ ca̧ Ama̧i̧ pio ju̧i̧ ja̧ ma̧ȩrä chjadëri̧ na̧rȩa̧requedibe, pio ju̧i̧ ja̧ jauëchjara̧. Ado pio ju̧i̧iä iëno̧ë ta̧rërequededibe. ¿Tjana̧pea̧ ji̧ ae ja̧bo tänȩtämi̧ cjiarenȩro̧coe? ¿Ado tjana̧ na̧rȩrea̧ oaiä ana̧ri̧ jo̧rȩtaji̧ri̧pea̧renȩrȩ? ¿Tjana̧ na̧rȩrea̧ oaiä ae ja̧bo tänȩtämi̧ cjiarenȩro̧coe? —yo̧mȩrȩ iënoë ta̧rëa̧dejȩrȩ Jechu judi.

³³ Jabo ma̧ cjüëtüri̧ jo̧rȩtaji̧ri̧rȩ dëbë yo̧a̧diro̧jo̧ȩ: —Cjäri̧ marea̧rȩ, mȩnȩ chjadëri̧ japea̧ pio ju̧i̧iä ae ja̧bo tänȩdëri̧ cjiarea̧ro̧mȩ, jabo mȩnȩ Ütë tjamo̧ pio ju̧i̧iäpȩmo̧ chjai̧dëri̧ ni̧bäa̧ pio ju̧i̧iä. Aja̧, pio ju̧i̧iä ja̧bo tänȩtämi̧ cjiarea̧ro̧mȩ. Danȩ, jabomo̧ pumȩrenȩ, jabo Ütë tjamo̧mi̧ dari̧ ni̧bärenȩ. ‘Ütë tjamo̧ pio judiquëda’ quëna̧mȩmi̧ dari̧ ni̧bärenȩibe. Pio ju̧i̧iä ae ja̧bo tänȩtämi̧ cjiarea̧ro̧mȩ —yo̧ji̧ri̧rȩ aenȩ yo̧a̧diro̧jo̧ȩ.

³⁴ Jabo Jechu judi yo̧a̧dejȩrȩ: —Danȩrȩ, Moicherë go̧ȩparërea̧ ma̧ȩrä go̧ȩpea̧ oa cjiade Ütë tjamo̧ judi icharaita tjamo̧ yo̧ji̧ri̧ pio ji̧ri̧iäpȩmo̧ yo̧rërea̧ ma̧ȩ üdë —yo̧a̧dejȩrȩ—. Jabechji̧ icharaita judiro̧, tjamo̧ yo̧ji̧ri̧ pio ji̧ri̧ ja̧ chja̧oerä cjo̧ro̧rëreji̧ri̧dirȩ. Pio ji̧ri̧ ja̧ ma̧ȩ oa ta̧rëa̧ oaiä na̧e chiapea̧dirȩ Ütë tjamo̧ judi yo̧a̧ pio ju̧i̧ chjiari. Ado pio ju̧i̧iä ja̧di ta̧rëri̧ yo̧rëremȩdejȩrȩ Ütë tjamo̧ judi tjamo̧ yo̧ji̧ri̧ pio ji̧ri̧iäpȩmo̧. “Mȩnȩro̧ pio ji̧ri̧ ja̧ ütënȩrȩ” yo̧rëremȩdejȩrȩ.

³⁵ Aja̧, ja̧di ta̧rëri̧ go̧ȩpea̧ oa cjiade ma̧ȩ üdë. Ado Ütë tjamo̧ ja̧ ma̧ȩ pio ju̧i̧ chjiari tjamo̧ri̧ dabarea̧rȩ. ‘Oëra̧ cjiapamȩ jirodida’ quëna̧rea̧mi̧dëde. Jabechji̧ coëma cjiade tjaoëdiäpe bagarea̧ decjiari̧. Pio ju̧i̧ tjamo̧ri̧ dabarea̧rȩ. Ado pio ju̧i̧iä iëno̧ë ta̧rërequededibe.

³⁶ Ütë tjamo̧ judi icharaita tjamo̧ yo̧ji̧ri̧ pio ji̧ri̧iäpȩmo̧ “ütënȩrȩ” yo̧a̧rä judi, ¿tjana̧ ju̧i̧iä cjarari̧ cjiape baga̧nȩrȩ cüdë yo̧a̧ pio ju̧i̧ chjiari, cüdë, “Ütë tjamo̧ ja̧ Jojarequede” yo̧a̧ pio ju̧i̧ chjiari? Jabechji̧, Ama̧i̧ tjamo̧ pio judi mitërëremȩdique china̧chjari̧ tutimȩrȩ. Ado mitëa̧ oa cjiamȩ oa chjadürëremȩdique pio yoa chirirä. Tjamo̧ davä. Pio judi chjadüa̧ oa cjiarequede. Ado pio ju̧i̧iiä iëno̧ë ta̧rërequededibe. ¿Tjana̧ ju̧i̧iä ja̧di ta̧rëri̧ aenȩ ni̧bärenero̧coe? ¿Tjana̧ ju̧i̧iä “Chjai̧dëri̧ ni̧bärenȩ Ütë tjamo̧ pio ju̧i̧iäpȩmo̧” yo̧renȩro̧coe?

³⁷ Danȩrȩ, cüdë ca̧ Ama̧i̧ judi jauëchja cjiari̧ japatä yürüa̧ pio ju̧i̧ japadërä judi, jabechji̧ quëna̧dëchji̧coe.

³⁸ Jabo judi yürüa̧ pio ju̧i̧ jauëchja cjiari̧ japarä judi, ca̧ ma̧ȩ oa ta̧rë ja̧bodëräbo, jabechji̧ quëna̧täreji̧ri̧nȩrȩ cüdë na̧rȩa̧ pio ju̧i̧iä. Ado mȩnȩro̧ quëna̧ oaiä, jabechji̧ na̧e chia tjamo̧pe bagarea̧ dapanȩrȩ pio coa chjiari, ca̧ Ama̧i̧ pio ju̧i̧ chjiaribo. ‘Jabechji̧ cja̧rȩmȩ madiro̧da, ji̧mo̧ ja̧ madiro̧da’ quëna̧ jo̧rȩtarea̧ daparenȩro̧ibe —yo̧a̧dejȩrȩ.

³⁹ Ado Jechu judi ja̧di ta̧rëri̧ yo̧a̧ oaiä, ado järipea̧dirȩ pio ju̧i̧ mitëpea̧ ji̧. Jabo Jechu judi a̧dë cjaraparëremȩdejȩrȩ mitërea̧mi̧dëri̧.

Jechu judi Jerucharȩ bë ma̧ri̧ri go̧dürëremȩde

⁴⁰ Ado Jechu judi ado chjereno̧ järëremȩde bea Joroda̧ oëräpȩ, Juan üdë go̧e cjaeä chudarërea̧räpȩ. Ado ju̧ri̧pȩ cjiadiäa̧de.

⁴¹ Ado pumȩ no̧i̧dërë go̧düdärärëreji̧ri̧dirȩ pio ju̧i̧iäpȩ. Ado Juan pio judi yo̧rërea̧ pio ju̧i̧ jo̧rȩtaji̧ri̧rȩ ni̧bärëreji̧ri̧dirȩ Jechu pio ju̧i̧ chjiari: —Aja̧, Juan judi cja̧rȩmȩ co jauëchja cjiari̧ na̧rȩdërëremȩdibe, jabo judi yorërea̧ ma̧ȩ üdë, Jechu pio ju̧i̧ chjiari yo̧rërea̧ ma̧ȩ üdë, jabechji̧ tjamo̧i̧ cjiari̧ cjiadiäa̧ maeade —yo̧a̧dirȩ.

⁴² Ado ju̧ri̧pȩji̧ri̧ judiro̧ no̧i̧dërë quëna̧ji̧ri̧pea̧diro̧jo̧ȩ Jechu ju̧i̧.