Juan 1 - Biblia Pume

Jechu judi Ma̧ȩ quȩmȩ pio judide

¹ Pearä judiräri ja̧, jabë dabu decjiarä Ma̧ȩ quȩmȩ pio judi cjiarëremȩde. Ütë tjamo̧ pio ju̧i̧ nö̧ta cjiarëremȩde. Jabechji̧ Ma̧ȩ quȩmȩ pio judiborë Ütë tjamo̧de.

² Ado pio judiborë Ütë tjamo̧ tara, jabechji̧ Ütë tjamo̧ pio ju̧i̧ nö̧ta ëba cjia marëremȩdejȩ pearäri ja̧.

³ Ado Ma̧ȩ quȩmȩ pio ju̧i̧iä chjö̧na̧i̧ oa pareaparëremȩde Ütë tjamo̧ judi. Jabechji̧ pio judi pareapadëa̧rä judi, eami̧ti̧ üdë cjiadë matäremȩde. Eami̧ cjo̧ro̧mȩ üdë cjo̧ro̧rea̧ chiadëtäremȩde.

⁴ Jabechji̧ cjo̧ro̧rea̧ yürümȩ pio judide. Pio ju̧i̧iämo̧i̧ taruparëremȩde cjo̧ro̧rea̧ üdë. Ado cjo̧ro̧rea̧ yürümȩ pio judi tatami̧ darä jo̧rȩtarea̧ yürümȩde pumȩ ütëbo ja̧ oa.

⁵ Jabechji̧ bagönȩ tjomi̧ daräpȩ ju̧ri̧ goae tarari̧ tatami̧ dari̧ cjiade. Ado bagönȩmi̧ da üdë tatami̧ damȩ pio ju̧i̧ boarea̧mi̧dëdejȩ. Jabechji̧ chö̧räparea̧mi̧dëri̧ cjiade.

⁶ Ado cja̧rȩmȩ pumȩrȩ cjo̧ro̧rëremȩde Juan quȩmȩ judi. Ütë tjamo̧ pio judi chjadüa̧ oa cjo̧ro̧rëremȩde.

⁷ Tatami̧ damȩ pio ju̧i̧ chjiari ni̧bä chjaopea̧ oa chjadüa̧ oa cjo̧ro̧rëremȩde pumȩ judiro̧ chjadëri̧ ta̧rëpea̧ oa, chjadëri̧ quëna̧pea̧ oa.

⁸ Jabo Juan judi tatami̧ damȩ pio judidërëremȩde, jabo jabechji̧ pio ju̧i̧ chjiari ni̧bä chjaopea̧ oa cjo̧ro̧rëremȩde.

⁹ Ado tatami̧ damȩ judi, jabechji̧ tjamo̧i̧ cjiari̧ tatamȩ pio judide. Pio yoa chirirä ma̧na̧rëremȩde pumȩ ütëbodärä oa tatarä jo̧rȩta tänȩmi̧ dari̧ japapea̧ oa.

¹⁰ Jabo cjäri̧ madiro̧jo̧ȩ, tatami̧ damȩ pio judi pio yoa chirirä cjiaräbo, Ütë tjamo̧ judi pio ju̧i̧iä chjö̧na̧i̧däräti̧ oa pareapea̧räbo, jabechji̧ pio yoa chirirä cjo̧ro̧ji̧ri̧ judiro̧ quëna̧ dadëa̧diro̧jo̧ȩ. ‘Pio judidida’ quëna̧ dadërëreji̧ri̧diro̧jo̧ȩ.

¹¹ Jabechji̧ jibëa̧ chiriräpȩ cjo̧rera̧pea̧räbo, jibëa̧ pumȩ charerä cjo̧rera̧pea̧räbo, jiadarëreji̧ri̧diro̧jo̧ȩ.

¹² Jabo o judiro̧ jiadadëa̧diro̧jo̧ȩ. Ba chia daea̧diro̧jo̧ȩ. Quëna̧diro̧jo̧ȩ. Ado pio ji̧ri̧iäpȩmo̧ Ütë tjamo̧ ja̧ u̧ri̧pe bagarea̧ yürürëremȩdejȩrȩ pio jȩaiäpȩmo̧ quëna̧ji̧ri̧ oa.

¹³ Jabo pumȩ judiro̧ jibëa̧ bori̧ ji̧ri̧ nö̧rirëmi̧ cjiari̧ nö̧ria̧ oa cjiadëa̧dirȩ. Ëbaji̧ri̧ judiro̧ ëba mo̧a̧ ëte, iei̧rȩ ararä ëbami̧ dari̧ cjo̧ro̧dëa̧dirȩ, jabo jabechji̧ tjaoëpai̧ dari̧ nö̧ria̧ oa cjiadiäa̧dirȩ. Jabechji̧ Ütë tjamo̧ pio judi ütarë jo̧rȩta̧mi̧ nö̧ria̧ oa cjiadiärëreji̧ri̧dirȩ pio ju̧i̧ ja̧ u̧ri̧pe järea̧mi̧ dari̧.

Ma̧ȩ quȩmȩ pio judi pumȩpe bagarëremȩde

¹⁴ Ma̧ȩ quȩmȩ pio judi pumȩpe bagarëremȩde. Icjara chiamȩpe järëremȩde. Ado ibëa̧ chjarerä cjo̧ro̧rera̧pea̧de. Ado ibëa̧ chjarerä cjo̧ro̧mȩ oa irä darëreji̧ri̧rea̧ro̧jo̧ȩ jibëa̧ chjacjiamȩrea̧ pio ju̧i̧. Tjamo̧ davä. Jibëa̧ jauëcharea̧ oa daea̧rea̧ro̧jo̧ȩ, a̧dë chjäte tatari̧ cjiamȩ oa. Danȩrȩ, Ama̧i̧ Ütë judi Joja pio ju̧i̧mo̧i̧ ëbarëremȩdejȩ cja̧rȩmȩ oa. Ado pio ju̧i̧ ja̧ chjacjiamȩrea̧ pio ju̧i̧ darëreji̧ri̧rea̧ro̧jo̧ȩ ji̧dë ma cjäri̧ri̧ cjiamȩrȩ a̧domȩ ju̧i̧, ji̧dë ma tjamo̧i̧ cjiari̧ ni̧bämȩ ju̧i̧.

¹⁵ Ado Juan judi pumȩ ji̧ri̧ ni̧bä chjaoa̧ ji̧, uirä go̧e cjaeä chudamȩ pio judi ni̧bä chjaoa̧ ji̧, jabechji̧ irä darëremȩdejȩ Jechu pio ju̧i̧. Ado ja̧dëa ji̧ to̧bari̧ yo̧mȩrȩ ja̧di ta̧rëri̧ ëna̧diärëremȩdejȩrȩ pumȩ ji̧ri̧: "Danȩrȩ, cüdë dibë jabërä yo̧rërea̧ pumȩ pio judide. Jabechji̧ cüdë dibë jabërä yo̧a̧ ji̧, 'Aja̧, ca̧ duri oa ma̧na̧pamȩ judi pio coa u̧i̧ ba chiade. Coa jabë ara̧dëa̧rä cjiarëremȩ pio judide' yo̧a̧ ji̧, jabechji̧ pio pio yoa chjiari ni̧bä chjaorëremȩrequededibe" yo̧mȩrȩ yo̧rëremȩdejȩrȩ Juan judi Ma̧ȩ quȩmȩ pio ju̧i̧ chjiari.

¹⁶ Ado Ma̧ȩ quȩmȩ pio judi, ütararea̧mi̧dëri̧ yürürea̧ goamȩ pio judi a̧dë chjäte cjäri̧ri̧ cjiamȩrȩ ji̧dë ma yürü chjaorëremȩdiibe ji̧ra̧ tjamo̧ oa, ibë yürüdëpe bagarea̧ decjiari̧. Jabechji̧ jënȩ ji̧dë ma yürüpea̧ üdë goarijärea̧mi̧dëde.

¹⁷ Danȩrȩ, Ütë tjamo̧ judi Moiche pio ju̧i̧iä tüdüa̧mi̧ darä cjo̧ro̧pea̧ ma̧ȩ pio ju̧i̧ yürürëremȩdiibe. Jabo Jechu pio ju̧i̧iä ji̧dë u̧i̧ chja̧dë oa yürürëremȩdiibe. Jabechji̧ cjäri̧ri̧ cjiamȩrȩ a̧dorea̧ pio ju̧i̧ yürüdiibe, tjamo̧i̧ cjiari̧ quëna̧rea̧ pio ju̧i̧bo.

¹⁸ Danȩrȩ, eami̧ pumȩrȩ cja̧rȩmȩ co Ütë tjamo̧ pio ju̧i̧ daea̧ ma ja̧didë jabo Joja pio judi chjadëri̧ dabarea̧ yürürëremȩdiibe pio ju̧i̧ chjiari. Danȩrȩ, Ütë tjamo̧ judi ëbadejȩ jibëa̧ ja oa, cja̧rȩmȩ oa. Jabechji̧ Jäjäa pio ju̧i̧iäpȩde. Ji̧mo̧ cjiadirȩ, cja̧rȩmȩ maearë. Ado Joja judi peaja̧di Ütë tjamo̧de. Ado danȩrȩ, pio judide davä ibë chjadëri̧ dabarea̧ yürürëremȩ judi Jäjäa pio ju̧i̧ chjiari.

Juan judi, chudamȩ pio judi ni̧bärëremȩde Jechu pio ju̧i̧ chjiari

¹⁹ Jerucharȩräpȩ tjamo̧ yo̧ji̧ri̧ judio pio judiro̧ chjadüa̧ oa järëreji̧ri̧dirȩ pumȩ judiro̧ Juan pio ju̧i̧iä irä ta̧rëpea̧ oa, uirä chudarëremȩ pio ju̧i̧iä chjadëri̧ ta̧rëpea̧ oa. O ji̧ri̧ chjiari goë tuti ja̧bepaji̧ri̧ judiro̧, ado Devi pio judiri ja̧ji̧ri̧ pio judiro̧ järëreji̧ri̧dirȩ peaja̧di chjadëri̧ ta̧rëpea̧ oa. Ado Juan pio ju̧i̧iäpȩ go̧düdäräa̧rä, ja̧di ta̧rëri̧ yo̧ji̧ri̧rȩ iëno̧ë ta̧rërëreji̧ri̧diro̧jo̧ȩ: —¿Chjia tjamo̧nȩ? —iëno̧ë ta̧rëa̧diro̧jo̧ȩ—. Chjadëri̧ yo̧ibe.

²⁰ Ado Juan judi dëbë yo̧dëri̧ cjiadëmȩrȩ, jabechji̧ chjadëri̧ daba tänȩrëremȩdejȩrȩ goadirea̧ decjiari̧. Ja̧di ta̧rëri̧ dëbë yo̧a̧dejȩrȩ: —Danȩrȩ, Ütërë mitëa̧ Chjätä Tänȩmȩ pio judidërequede. Pumȩ pio ji̧ri̧ Chjätä tänȩpamȩ pio judidërequede —yo̧a̧dejȩrȩ.

²¹ Jabo iëno̧ë ta̧rëji̧ri̧ judiro̧ cjiadiädëji̧ri̧rȩ ji̧dë ma̧ iëno̧ iëno̧ cjia̧diro̧jo̧ȩ. —Jabo chjadëri̧ yo̧ibe. ¿Chjia tjamo̧nȩ ado ja̧di. Ütërë mitëa̧ Chjätä Tänȩmȩ pio judidërä judi, ¿chjia tjamo̧nȩ? ¿Ja̧borëremȩrȩ bëdüa̧ oa cjiamȩ Eria pio judidënȩ? —iëno̧ë ta̧rëa̧diro̧jo̧ȩ. Jabo Juan judi dëbë yo̧a̧dejȩrȩ: —Cjäri̧ marequede. Eria pio judidërequede —dëbë yo̧a̧dejȩrȩ. Ja̧dëa ji̧ ado iëno̧ë ta̧rëa̧diro̧jo̧ȩ: —Jabo ¿chjianȩ ado ja̧di. Moicherë yo̧rërea̧ ¿pio judidënȩ? Ütërë ea jana̧ chjadüa̧ oa ni̧bäparemȩ ¿pio judidënȩ? —iëno̧ë ta̧rëa̧diro̧jo̧ȩ. —Cjäri̧ marequede. Pio judidërequede —dëbë yo̧a̧dejȩrȩ.

²² Ja̧dëa ji̧ yo̧a̧diro̧jo̧ȩ: —Chjadëri̧ yo̧ibe. Ibë chjadüa̧ji̧ri̧ pio ji̧ri̧iäpȩmo̧ chjadëri̧ yo̧pea̧ oa jabechji̧ chjadëri̧ yo̧ibe. ¿Tjana̧ yo̧nȩ pio mȩa chjiari? —iëno̧ë ta̧rëa̧diro̧jo̧ȩ.

²³ Ado judiro̧ iëno̧ ta̧rë chjaoa̧ oaiä, ja̧di ta̧rëri̧ dëbë yo̧mȩrȩ yo̧rëremȩdejȩrȩ Juan judi, Ichaiarë go̧ȩparërea̧ ma̧ȩra̧ pio ju̧ri̧ra̧: —Danȩrȩ, chiri tjoräpȩ to̧bari̧ ëna̧diämȩ pio judirequede —yo̧a̧dejȩrȩ—. ‘Chjadëri̧ jëdano̧chji̧vä. Danȩrȩ, Ano̧mȩ pio judi chjadëri̧ ma̧na̧rea̧ dapea̧ oa, jabechji̧ no̧ oa coëmape bagami̧ dari̧ cjiapea̧ oa chjadëri̧ jëdano̧chji̧vä' yo̧mȩrȩ ëna̧diämȩrequede. Jabechji̧ Ichaia quȩmȩrea̧ pio judi yo̧rërea̧ duri pio ju̧i̧ yo̧mȩrȩ ëna̧diärequede —yo̧mȩrȩ dëbë yo̧a̧dejȩrȩ Juan judi.

²⁴ Ado Juan pio ju̧i̧ iëno̧ë ta̧rëreji̧ri̧ judiro̧, orë pjaricheo pio judiro̧ chjadüa̧ oa judiro̧ iëno̧ë ta̧rërëreji̧ri̧diro̧jo̧ȩ.

²⁵ Ado Juan pio ju̧i̧ ta̧rëa̧ oaiä ado iëno̧ë ta̧rëa̧diro̧jo̧ȩ, ja̧di ta̧rëri̧ yo̧ji̧ri̧rȩ: —Jabo cjäri̧ marenȩ. Mȩnȩ Ütërë mitëa̧ Chjätä Tänȩmȩ pio judidërä judi, ado Eria quȩmȩrea̧ pio judidërä judi, ¿chjianȩ? Ado Ütërë ea jana̧ chjadüa̧ oa ni̧bäparemȩ pio judidërä judi, ¿chjia ja̧ ma̧ȩrä go̧ȩ cjaeä chudarenȩjȩrȩ pumȩ ji̧ri̧? —iëno̧ë ta̧rëa̧diro̧jo̧ȩ.

²⁶ Ja̧dëa ji̧ Juan judi dëbë yo̧mȩrȩ yo̧a̧dejȩrȩ: —Danȩrȩ, uirä go̧ȩ cjaeä chudarequedejȩrȩ, jabo dibëa̧ chjarerä cjiade cja̧rȩmȩ üdë pio coa u̧i̧ ba chiamȩ judi. Tjamo̧ davä. Pio yide. Dibëa̧ chjareräpȩde jabo ‘pio judidida’ quëna̧ dabadë marenȩro̧jo̧ȩ.

²⁷ Ju̧i̧ ja̧ yaboi̧ a̧ra̧ano̧requededibe jabo ji̧dë duri oa pio judi ano̧ mire a̧ra̧ano̧padidibe. Jabechji̧ ca̧ duri oa tarupapade. Jabo ca̧ duri oa tarupaparäbo, jabechji̧ pio coa u̧i̧ ba chiade. Cüdëmi̧ dadëde. Ju chia tjamo̧de. Ado cüdë, jabechji̧ nö̧tadëreconȩ. Jabomo̧ mu̧i̧tjoi̧requede. Ba chiadërequede. Ado pio ju̧i̧iä jabechji̧, pio ju̧i̧ ja̧ ta jo̧ë cä oa jareno̧pea̧ ji̧ nö̧tadë marequede. Jabechji̧ cüdë ju̧i̧ ja̧ mu̧i̧tjoi̧ tara, judi a̧dë chjäte ba chia tjamo̧ tara, jabechji̧ ju̧i̧ ja̧ ta jo̧ë cä oa jareno̧pea̧ ji̧ tjamo̧ri̧ nö̧tadërequede —yo̧mȩrȩ dëbë yo̧rëremȩdejȩrȩ Juan judi jȩa iäno̧ë ta̧rë chjaoji̧ri̧ oa.

²⁸ Pio jiro pumȩ judiro̧ Juan pio ju̧i̧ ana̧ri̧ iëno̧ iëno̧ ta̧rë chjaorërea̧ ji̧, jabechji̧ Betania quȩmȩräpȩmȩ oa iëno̧ë ta̧rë chjaorëji̧ri̧diro̧jo̧ȩ bea Joroda̧ oëräpȩmȩ oa, pumȩ ji̧ri̧ uirä go̧e cjaeä chuda̧räpȩ cjiamȩ oa.

Jechu judi Ütë tjamo̧ ja̧ oveja pëi̧ chjami̧ dade

²⁹ Ja̧dëa ji̧ dopea̧rä Juan judi darëremȩdejȩ Jechu ju̧i̧ pio jȩaiäpȩmo̧ jana̧mȩ oa. Ado pio ju̧i̧ damȩrȩ ja̧di tärëri̧ yo̧rëremȩdejȩrȩ pumȩ ji̧ri̧: —Dachji̧jo̧ȩ —yo̧a̧dejȩrȩ—. Pio yüdëje Ütë tjamo̧ ja̧ oveja pëi̧ chjami̧ dade. Jabechji̧ Ütë tjamo̧ judi chjadürëremȩdejȩ ovejami̧ dari̧ ja̧bopea̧ oa, pumȩ judiro̧ chjai̧dëri̧ japea̧ üdë duridëparȩa̧ oa cjiapea̧ oa. Dachji̧jo̧ȩ —yo̧a̧dejȩrȩ—.

³⁰ Jabechji̧ pio yoa pumȩ oa jo̧rȩtamȩrȩ yo̧a̧requededibe ado cja̧rȩmo̧ doremȩrä cüdë dibë ni̧bä chjaoa̧ ji̧ —yo̧a̧dejȩrȩ—. Jabechji̧ dibë yo̧a̧ ji̧, ‘Aja̧, ca̧ duri oa ma̧na̧pamȩ judi pio coa u̧i̧ ba chiade’ yo̧a̧ ji̧, ‘ca̧ ai̧ jini̧ coa jabë aradëa̧rä cjiarëremȩde’ yo̧a̧ ji̧, jabechji̧ pio yoa chjiari yo̧a̧requededibe —yo̧a̧dejȩrȩ—. Jabechji̧ pio yoa pumȩ pio ju̧i̧ chjiari jo̧rȩtamȩrȩ yo̧remȩquededibe.

³¹ Jabo pio cüdëborë dabadëa̧reconȩ pearä judi. 'Chjätä Tänȩmȩ pio judidida' quëna̧ dabadëa̧reconȩ, jabo yaba̧ tjamo̧ri̧ dabareconȩ. Ado pio ju̧i̧iä uira̧ go̧e cjaeä chudera̧pea̧requede Icharai pio judiri ja̧ji̧ri̧ pio judiro̧ tjamo̧ri̧ dabapea̧ oa, 'Jechu judi Chjätä Tänȩmȩ pio judi tjamo̧dida' quëna̧ dabapea̧ oa —yo̧mȩrȩ yo̧rëremȩdejȩrȩ pumȩ ji̧ri̧ Juan judi Jechu pio ju̧i̧ chjiari.

³² Ado Juan judi ji̧dë u̧i̧ yo̧mȩrȩ pio yoa ma̧ȩbo a̧de yo̧rëremȩdejȩrȩ pumȩ ji̧ri̧: —Danȩrȩ, daea̧reconȩ Tjo tjamo̧ pio ju̧i̧. Jotoco puami̧ dari̧ biramȩ oa daea̧reconȩ a̧dëri pio judiri biramȩ oa, Jechuro cjiadäräa̧mȩ oa.

³³ Jabo pio ju̧i̧ daea̧mȩborë, ‘jabechji̧ Ütë tjamo̧ ja̧ Jojadida’ quëna̧ dabadëa̧täremȩreconȩ. Jabo Ütë tjamo̧ judi coa jabërä ni̧bäa̧ oaiä, uira̧ go̧e cjaeä chudapea̧ oa chjadürëremȩ pio judi coa jabërä ni̧bäa̧ oaiä, jabechji̧ dabamȩpea̧requede. Ado coa yo̧a̧ ji̧, ja̧di ta̧rëri̧ yo̧rëremȩdique: "Danȩ Juan, Jechuro cjiadiäpea̧ oa biradärämȩ oa daparenȩ Tjo tjamo̧ pio ju̧i̧" yo̧a̧dique. "Pio judi tjamo̧de. Tjo tjamo̧ra̧ pio ju̧ri̧ra̧ go̧ȩ cjaeä chudapamȩ pio judi tjamo̧de" yo̧a̧dique.

³⁴ Ado Jechuro cjiadiäpea̧ oa biradäräa̧mȩ oa irä daea̧ oaiä, jabechji̧ tjamo̧ri̧ dabamȩrȩ yo̧requededibe yaba̧. Jechu judi Ja tjamo̧ pio judi tjamo̧de. Ütë tjamo̧ ja̧ Joja pio judi tjamo̧de —yo̧mȩrȩ yo̧rëremȩdejȩrȩ pumȩ ji̧ri̧ uirä chudarëremȩ pio judi.

Jechu judi mitërëremȩde jibëa̧ jadü ji̧ri̧

³⁵ Ja̧dëa ji̧ dopea̧rä, Juan judi ëba cjiarëremȩdejȩrȩ jibëa̧ jadü yo̧a̧ri̧ oa.

³⁶ Ado chjätämȩ oa daea̧dejȩ Jechu pio ju̧i̧. Ado pio ju̧i̧ damȩrȩ ja̧di ta̧rëri̧ yo̧a̧dejȩrȩ: —Danȩrȩ, Ütë tjamo̧ ja̧ oveja pëi̧ chjami̧ dade.

³⁷ Ado jibëa̧ jadü judiro̧ pio ju̧i̧ ta̧rëa̧ oaiä, ano̧ mire cho̧rë järëreji̧ri̧diro̧jo̧ȩ.

³⁸ Ado Jechu judi pio jȩa cho̧rë jäji̧ri̧ pio ji̧ri̧ damȩrȩ iëno̧ë ta̧rëa̧dejȩrȩ. —¿Tjana̧ oa na̧tanȩrȩ? —iëno̧ë ta̧rëa̧dejȩrȩ. Ado dëbë yo̧ji̧ri̧rȩ iëno̧ë ta̧rëa̧diro̧jo̧ȩ. —A̧ra̧ano̧mȩ, ¿tjana̧räpȩ cjo̧ro̧renȩ?

³⁹ Ado Jechu judi dëbë yo̧a̧dejȩrȩ: —Cho̧rë jana̧chji̧coe chjadëri̧ dapea̧ oa. Ado ëba järëreji̧ri̧diro̧jo̧ȩ do üdë chjiaräpȩmo̧diäa̧rä. Ado daea̧diro̧jo̧ȩ jënȩ cjo̧ro̧mȩ bë oa. Ado pio ju̧i̧ nö̧ta cjiadiärëreji̧ri̧dirȩ gȩnȩpea̧rä yuro.

⁴⁰ Cja̧rȩmȩ üdë, Juan pio ju̧i̧iä ta̧rë ëte Jechu pio ju̧i̧ cho̧rë järemȩ pio judi, A̧däre quȩmȩrëremȩde. Chimo̧ Pedro ja̧ omȩrëremȩde.

⁴¹ Ado Jechu pio ju̧i̧ nö̧ta ëba cjiadiäa̧ duri oa chjaodëri̧ järëremȩde jibëa̧ omȩ pio ju̧i̧ dadäräpea̧ oa. Ado pio ju̧i̧ dadäräa̧rä, yo̧a̧dejȩ: —Danȩ Chimo̧, Ütërë mitëa̧ Chjätä Tänȩmȩ pio ju̧i̧ dadäräa̧rea̧ro̧jo̧ȩ. Pumȩ ji̧ri̧ chjätärea̧ yürüpamȩ pio ju̧i̧ dadäräa̧rea̧ro̧jo̧ȩ. Goëdetäro̧jo̧ȩ.

⁴² Ado chjaodëri̧ ëba järëremȩdejȩ jibëa̧ omȩ oa Jechu pio ju̧i̧iäpȩ. Ado judiro̧ Jechu pio ju̧i̧iäpȩ go̧düdäräa̧rä, Jechu judi Chimo̧ pio ju̧i̧iäpȩmo̧ damȩrȩ yo̧a̧dejȩ: —Danȩ, Chimo̧ quȩmȩrenȩ. Juan quȩmȩ pio ju̧i̧ ja̧ jojarenȩ. Jabo ano̧ mire quȩpajarequedemȩ yaba̧. Jabechji̧ Chimo̧ quȩmȩrërea̧ ji̧, Chepa quȩparenȩ yaba̧. Ado Chepa yo̧a̧ ji̧, Pedro yo̧rea̧de. Peaja̧di “ta̧dë ana̧” yo̧rea̧de —yo̧a̧dejȩ.

⁴³ Ado dopea̧rä Jechu judi, 'Aja̧, Garirea quȩmȩ chiriräpȩ jätäquëda’ quëna̧ jo̧rȩtamȩrȩ järëremȩde. Ado ju̧ri̧pȩ dadäräa̧dejȩ Pjeripe quȩmȩ ju̧i̧. Ado pio ju̧i̧ damȩrȩ yo̧a̧dejȩ: —Cho̧rë jana̧coe. Ado jadea ji̧ cho̧rë jäa̧dejȩ.

⁴⁴ Ado pio jiro pumȩ üdë, Pjeripe pio judi, Bechaida quȩmȩ bë ma̧ri̧ri pio judirimȩrëremȩde. Ado A̧däre judi, Pedro judi peaja̧di pio judiriji̧ri̧rëreji̧ri̧dirȩ.

⁴⁵ Ado Pjeripe judi jäeno̧a̧de Natanera quȩmȩ pio ju̧i̧ dadäräpea̧ oa. Ado pio ju̧i̧ dadäräa̧rä, yo̧a̧dejȩ: —Danȩ, Ütërë mitëa̧ Chjätä Tänȩmȩ pio ju̧i̧ dadäräa̧rea̧ro̧jo̧ȩ. Moicherë go̧ȩparërea̧ pumȩ pio ju̧i̧ dadäräa̧rea̧ro̧jo̧ȩ. Ütërë ea jana̧ chjadüa̧ oa ni̧bäji̧ri̧ judiro̧ go̧ȩparërea̧ pumȩ pio ju̧i̧ dadäräa̧rea̧ro̧jo̧ȩ. Danȩ, Jechu pio judide. Joche quȩmȩ pio ju̧i̧ ja̧ joja pio judide. Tjamo̧ davä. Nachare quȩmȩ bë ma̧ri̧rimȩde.

⁴⁶ Ado pio ju̧i̧ ta̧rëa̧ oaiä Natanera judi dëbë yo̧a̧dejȩ: —Jabo cjäri̧ made, ibë a̧dopamȩ pumȩ judi Nachare quȩmȩ bë ma̧ri̧ri pio judiri go̧dürea̧mi̧dëde. Jabechj, pio jiro bë ma̧ri̧ üdë ba chiadëde. Jabo Pjeripe judi dëbë yo̧a̧dejȩ: —Jaeibe. Goëdetäro̧jo̧ȩ.

⁴⁷ Ado järëreji̧ri̧dirȩ. Ado Jechu judi Natanera pio ju̧i̧ cjacjarë damȩrȩ, ja̧di ta̧rëri̧ yo̧rëremȩde pio ju̧i̧ chjiari, quëri̧na̧ra̧mȩ pio ju̧i̧ chjiari: —Chia chia, pio yodëje Icharai pio judiri ja̧ tjamo̧mȩde. Jabechji̧ u̧i̧pe u̧i̧pe ni̧bädëmȩde, jabo jënȩ jo̧rȩtami̧ yo̧mȩde goadirea̧ decjiari̧.

⁴⁸ Ado Natanera judi Jechurë yo̧a̧ pio ju̧i̧ ta̧rëna̧ra̧mȩrȩ iëno̧ë ta̧rëa̧dejȩ: —¿Yö̧ta dari̧ dabane pio coa chjiari? Ado Jechu judi dëbë yo̧a̧dejȩ: —Danȩ, cüdë mȩa irä dadëräbo, jabechji̧ igera quȩmȩ to chja̧oerä cjiamȩ oa daea̧requedemȩ jabërä, Pjeripe judi mȩa jabë yabëdëa̧rä.

⁴⁹ Pio ju̧i̧ ta̧rëa̧ oaiä Natanera judi ana̧ri̧ jo̧rȩtamȩpea̧de dacho bëremi̧ cjiari̧. Ado yo̧a̧dejȩ Jechu ju̧i̧: —A̧ra̧ano̧mȩ, Ütë tjamo̧ ja̧ Joja tjamo̧renȩ. Dai chirirä cjo̧ro̧mȩ Ütërenȩ. Icharai pio judiri ja̧ji̧ri̧ ja̧ Ütërenȩ. Jabechji̧ ibëa̧ tjamo̧ yo̧mȩrenȩ.

⁵⁰ Ado Jechu judi dëbë yo̧a̧dejȩ: —Chia chia. “Igera quȩmȩ to chja̧oerä cjiamȩ oa jabërä daea̧requedemȩ” pio ju̧i̧mo̧i̧ ma̧ȩ oa ta̧rëa̧ oaiä ¿chjaodëri̧ quëna̧mȩpea̧renȩ? Jabo cjäri̧ marenȩ, ji̧dë u̧i̧ jauëchja cjiari̧ japamȩ oa daparenȩque.

⁵¹ Ado Jechu judi ji̧dë u̧i̧ yo̧mȩrȩ a̧de yo̧rëremȩdejȩrȩ pumȩ ütëbo oa: —Danȩrȩ, tjamo̧dë yo̧dërequededibe jabo tjamo̧i̧ cjiari̧ yo̧requededibe. Ji̧dë duri oa japamitë chjätäa̧rä areië baämȩ oa daparenȩro̧jo̧ȩ a̧dë pio ju̧i̧. Ado Ütë tjamo̧ ja̧ mu̧i̧tjoi̧ judiro̧ pio coaiä a̧dëräpȩmo̧ buadiä buadiä cjiaji̧ri̧ oa daparenȩro̧jȩrȩ. Ado pio coaiä biradiä biradiä cjiaji̧ri̧ oa daparenȩro̧jȩrȩ peaja̧di. Jabechji̧ Pumȩrȩ Ara̧ Tjamo̧ pio judirequede. Ado pio coaiä ja̧di dari̧ japaji̧ri̧ oa daparenȩro̧jȩrȩ. Aja̧, ja̧di ta̧rëri̧ yo̧mȩrȩ yo̧rëremȩdejȩrȩ Jechu judi pio jȩa chjiari judiro̧ dabëmi̧.