Jochue 1 - Biblia Pume

Canaa̧ quȩmȩ chiriräpȩ mitëtä yo̧rëremȩdejȩ Jochue ju̧i̧ Jeova judi

¹ Ado Jeova ja̧ mu̧i̧tjoi̧ judi ja̧boa̧ duri oa, Moiche pio judi ja̧boa̧ duri oa, Jeova pio judi yo̧rëremȩdejȩ Jochue ju̧i̧. Aja̧, Nu quȩmȩ pio ju̧i̧ ja̧ joja oa, Moicherea̧ pio ju̧i̧ a̧doremȩ oa yo̧rëremȩdejȩ ja̧di ta̧rëri̧ yo̧mȩrȩ:

² —Danȩ, ca̧ mu̧i̧tjui̧remȩ judi, Moicherea̧ pio judi ja̧boa̧ tara, jabechji̧ pio mȩaiäpȩmo̧ ano̧ mire yo̧requedemȩ yaba̧. Jabechji̧ jëdano̧vä. Ado Icharai pio judiri ja̧ji̧ri̧ pio ji̧ri̧ chjadëri̧ yabo ëba baämi̧ dari̧ ëba baätä earequedemȩ. Jabechji̧ bea Joroda̧ oëräpȩmo̧ chjätäpea̧ oa, cüdë dibë yürüpea̧ chiriräpȩ yu̧a̧pea̧ oa ëba baätä earequedemȩ.

³ Danȩ Jochue, cüdë Moiche pio ju̧i̧ yo̧ë cji̧därërea̧mi̧ yo̧ë cji̧därequedemȩ peaja̧di chiri pio ju̧i̧ chjiari. Jabechji̧ pio jiro chiri chjö̧na̧i̧ oa yürüa̧requededibe, cüdë Moiche pio ju̧i̧ yo̧rërea̧mi̧. Tjamo̧ davä. Mȩnȩro̧ boë cjaeä chjätäpea̧ chiri pio judi, jabechji̧ pio dibëiäpȩmo̧ yürüa̧ oa cjiade peadë. Pio cüdë yürüa̧ oa pio dibëa̧pea̧de.

⁴ Aja̧, chiri boi̧dë oa yürüparequededibe. Ado mȩnȩ dabadëchea oa, jabechji̧ chjadëri̧ ütarë yo̧parequedemȩ. Danȩ, jiro chiri üdë Negebo quȩmȩ chiriri pio judiri tarupade. Ado pio judiri Iribano quȩmȩ ya̧mi̧räpȩ yuro a̧rȩde. Aja̧, cja̧rȩmȩ go̧a̧ti̧ oa a̧rȩde. Ado Eupjarate quȩmȩ bea üdë a̧rȩmȩri pio judiri, Mediteraneo quȩmȩ ui ana̧räpȩ yuro a̧rȩde peaja̧di. Cja̧rȩmȩ ana̧de. Pënȩ a̧rȩdëde. Chiri cotodëde. Cja̧rȩmȩ codë go̧a̧ti̧de. Aja̧, pio ju̧i̧ yürürequededibe ititarë cjo̧ro̧mȩ chiri pio ju̧i̧.

⁵ Danȩ Jochue, mȩnȩ cjo̧ro̧a̧ nö̧ta, jabechji̧ eami̧rȩ mȩa boadärärea̧ dadëpadiro̧mȩ. Jabechji̧ Moiche pio ju̧i̧ ëba cjiarërea̧mi̧ ëba cjiarequedemȩ peaja̧di. Ji̧dë ma ëba cjiaparequedemȩ bucho ana̧. Cja̧rȩmȩ coi̧ a̧dë baädëparequedemȩ.

⁶ Pio ju̧i̧iä jabechji̧ järi tjamo̧vä. Uapadëmȩrȩ to̧bari̧ cjiami̧ dari̧ cjiavä. Jabechji̧ pio mȩnȩ na̧ pumȩ pio ji̧ri̧ chjadëri̧ yabo ëba baämi̧ dari̧ a̧do oaiä, jabechji̧ pio yoa chiri oa mitërea̧ dapadirȩ icharaita judiro̧ jibëa̧pe bagari̧. Tjamo̧ davä. Cüdë icharaita ja̧ ütëti̧rea̧ pio ji̧ri̧iäpȩmo̧ yo̧rërea̧ chiri pio ju̧i̧ tjamo̧ri̧ mitëdärärea̧ dapadiro̧jo̧ȩ.

⁷ Jabo pio yoamo̧i̧ ma̧ȩ oa yo̧requedemȩ jabo. Jabechji̧ järi tjamo̧vä. Uapadëmȩrȩ to̧bari̧ cjiami̧ dari̧ cjiavä. Ado chjadëri̧ ta̧rëdiävä ma̧ȩ codë oa, cüdë ca̧ mu̧i̧tjoi̧ Moiche oa yo̧rërea̧ ma̧ȩ pio ju̧i̧. Jabechji̧ o oa a̧dë jo̧rȩtarea̧ decjiari̧ chjadëri̧ ta̧rëdiävä mȩnȩ dae jämi̧ dari̧ cjo̧ro̧pea̧ oa, ade cjiami̧ dari̧ cjiachea oa.

⁸ Ji̧dë ma go̧ȩ ni̧bävä ca̧ ma̧ȩ oa. Pio ju̧i̧ jo̧rȩtariä dopavä. Doro gȩnȩräbo urëdi oa jo̧rȩtajo̧ȩ mȩnȩ chjadëri̧ ta̧rëdiäpea̧ oa. Ado ja̧di dari̧ japarä judi, jabechji̧ dae jämi̧ dari̧ cjo̧ro̧parenȩ chjadëri̧, poëdiämi̧ tarari̧ cjiarea̧ decjiari̧.

⁹ Pio cüdë ja̧di ta̧rëri̧ yo̧mȩrȩ yo̧requedemȩ mȩnȩ järi tjamo̧mȩrȩ cjo̧ro̧pea̧ oa, mȩnȩ to̧bari̧ cjiami̧ dari̧ cjiapea̧ oa. Tjamo̧ davä. Uapadëvä. Järidëpe bagadëvä. Jabechji̧ Jeova quȩmȩ Ütë pio judirequede. Ado mȩnȩ tai̧a̧ nö̧ta ji̧dë ma ëba cjiaparequedemȩ, a̧dë baärea̧ decjiari̧ —yo̧mȩrȩ yo̧rëremȩdejȩ Jeova judi Jochue pio ju̧i̧iäpȩmo̧.

Jochue judi jëdano̧tä yo̧rëremȩdejȩrȩ icharaita ji̧ri̧

¹⁰ Ja̧dëa ji̧ Jeova pio ju̧i̧iä ta̧rë ëte, Jochue judi ma̧ȩ yürürëremȩdejȩrȩ tjamo̧ yo̧ji̧ri̧ pio ji̧ri̧iäpȩmo̧. Ja̧di ta̧rëri̧ yo̧mȩrȩ yo̧rëremȩdejȩrȩ:

¹¹ —Danȩrȩ, jächji̧vä pumȩ ji̧ri̧iäpȩ ma̧ȩ yürüpea̧ oa —yo̧a̧dejȩrȩ—. Tjarari̧ do chjätä ëte, bea Joroda̧ oëräpȩmo̧ chjätäparea̧rȩ. Jeova judi yürüa̧ chiri pio ju̧i̧ mitëpea̧ oa, Ütë tjamo̧ judi yürüa̧ chiri pio ju̧ri̧pȩ cjo̧ro̧pea̧ oa chjätäparea̧rȩ. Ja̧di tara ma̧ȩ yürüjȩrȩ. Jurarea̧ oa jëdano̧tädirȩ judiro̧ no̧ro chjadëri̧ jurapea̧ oa. Aja̧, jäe dachji̧jȩrȩ pumȩ pio ji̧ri̧ chjadëri̧ yo̧pea̧ oa —yo̧mȩrȩ yo̧rëremȩdejȩrȩ tjamo̧ yo̧ji̧ri̧ pio ji̧ri̧iäpȩmo̧.