Jobo Ma̧ȩ 42 - Biblia Pume

Jobo judi dëbë yo̧rëremȩdejȩ Jeova pio ju̧i̧iäpȩmo̧

¹ Ja̧dëa ji̧ Jobo judi dëbë yo̧rëremȩdejȩ Jeova pio ju̧i̧iäpȩpȩmo̧. Ja̧di ta̧rëri̧ yo̧mȩrȩ yo̧a̧dejȩ:

² —Pio mȩa chjiari chjadëri̧ dabarequede Jeova —yo̧a̧dejȩ—. 'Jabechji̧ a̧dë chjäte ju chiamȩti̧ pio judidida, jënȩ jo̧rȩta̧mi̧ japamȩdida, ado cja̧rȩmo̧rȩ dëbëpe chjaorea̧mi̧dëri̧ japamȩdida, jabechji̧ jënȩ ütara̧mi̧ japamȩdida' quëna̧ dabarequede pio mȩa chjiari.

³ Jabo cjäri̧ marequede, chjadëri̧ yo̧dëa̧requede pio mȩa chjiari. Ado pio ju̧i̧iä iëno̧ë ta̧rëa̧renȩque. Aja̧, ¿chjiade dabadëmȩrȩ ni̧bämȩ judi? iëno̧ë ta̧rëa̧renȩque. ¿Chjiade cüdë chi̧dëea̧ ma̧ȩ pio ju̧i̧ badë jo̧rȩtamȩ judi? yo̧remȩrenȩque. Tjamo̧ davä Jeova, oëra̧ jo̧rȩtamȩrȩ yo̧a̧requede pio mȩa chjiari. Uëmo̧ uëmo̧ jo̧rȩtami̧ dari̧ ni̧bäa̧requede tjamo̧ri̧ dabadëmȩrȩ. A̧dë chjäte urëdi oa jo̧rȩtarea̧ pio ju̧i̧ chjiari dabarea̧mi̧dëri̧ cjiarequede bomi̧ darë.

⁴ Ado pio ju̧i̧iä yo̧a̧renȩque. “Jabechji̧ chjadëri̧ ta̧rë chacoe yaba̧” yo̧remȩrenȩque. “Aja̧, mȩnȩ a̧dë chjäte dabamȩrä judi, jaevä, pio coaiäpȩmo̧ dabapa tänȩparenȩque” yo̧remȩrenȩque. “Aja̧, pio cüdë iëno̧ë ta̧rëa̧ pio ju̧i̧ dëbë yo̧mȩrȩ dabapa tänȩparenȩque” yo̧remȩrenȩque. Aja̧, ja̧di dari̧ yo̧remȩrenȩque cüdë ma̧i̧ dari̧ yo̧a̧ oaiä.

⁵ Jabo cjäri̧ marequede Jeova, cüdë pio mȩa chjiari pearä ta̧rërërea̧ ji̧, jabomo̧ uëmo̧ uëmo̧ jo̧rȩtami̧ dari̧ ta̧rëa̧requede. Ta̧ra̧ puë maeara̧ ta̧rëa̧requede. Acji cjaeä ta̧rëtärea̧ ji̧, birë jämi̧ dari̧ ta̧rëtärea̧ ji̧, ja̧di dari̧ ta̧rëdëa̧requede. Jabo danȩ ca̧ Ütë, ja̧didërequede yaba̧. Jabechji̧ ca̧ chji̧räpȩmo̧ acji cjaeä ta̧rëa̧requedemȩ. Ca̧ dachora̧ irä dami̧ dari̧ jo̧rȩtarequedemȩ yaba̧.

⁶ Ado pio ju̧i̧iä gito ana̧ tjamo̧ri̧ jo̧rȩtarequede davä, cüdë yo̧a̧ pio ju̧i̧ chjiari. Ado ca̧ chji̧ra̧ ano̧ mire jo̧rȩta̧ oaiä, cüdë chjere jo̧rȩta̧ oaiä, jabechji̧ pio yi daburo charequede cjo̧dë tjaräpȩ, ana̧ tjamo̧ri̧ jo̧rȩtamȩrȩ —yo̧mȩrȩ dëbë yo̧rëremȩdejȩ Jobo judi Ütë tjamo̧ pio ju̧i̧iäpȩmo̧. Ja̧di ta̧rëri̧ yo̧mȩrȩ ni̧bä chjaoa̧dejȩ Ütë tjamo̧ ju̧i̧iäpȩmo̧ Jobo judi.

Cjiadiärea̧ Ma̧ȩ

¹⁰ Ado Jobo judi jibëa̧ jadü ji̧ri̧ chjiari, pio jȩa goë daera̧pea̧ji̧ri̧ pio ji̧ri̧ chjiari goë cjo̧dë ëte Ütë tjamo̧ judi chjaparȩrëremȩdejȩ. Ado Ütë tjamo̧ judi tuti japea̧ oaiä, jabechji̧ a̧dë chjäte ji̧ra̧ri̧ goamȩpea̧de ado chjereno̧. Judi pearä goarërea̧ ju̧i̧ u̧i̧ ji̧ra̧ oa goarëremȩde. Dami̧ti̧ oa goamȩpea̧de ado chjereno̧. Cja̧rȩmȩ buba maea oa goami̧ dari̧ goarërea̧ ji̧, yo̧a̧ri̧ buba oa goami̧ dari̧ ano̧ mire goamȩpea̧de.

¹¹ Ado pumȩ no̧i̧dërë goë daepea̧diro̧jo̧ȩ jibëa̧ bëräpȩ ju̧ri̧. Aja̧, jibëa̧ ayimai̧ judiro̧, jibëa̧ ayi̧mai̧ judiro̧, jibëa̧ ami̧ jini̧ro̧, jibëa̧ ayi̧cai̧ jini̧ro̧ goë daepea̧diro̧jo̧ȩ. Ado ju̧i̧di ja̧dëji̧ri̧ pio judiro̧borë goë daepea̧diro̧jo̧ȩ, pio ju̧i̧ dabareji̧ri̧ pio judiro̧. Ado a̧dopë cjiaji̧ri̧rȩ goae tjamo̧ oa jurarëreji̧ri̧dirȩ, airi̧ cjiaji̧ri̧rȩ. Ado Jobo ju̧i̧ goë daera̧pea̧ji̧ri̧ pio judiro̧ ütëborë chëre yürürëreji̧ri̧diro̧jo̧ȩ ichi chaärea̧bo. Aja̧, orora̧ japea̧ ichi chaärea̧ oa yürüa̧diro̧jo̧ȩ ji̧ra̧ oa. Ado ori̧ bagari̧ ëba cjiaji̧ri̧rȩ a̧dorëreji̧ri̧diro̧jo̧ȩ jënȩ ana̧ri̧ tararërea̧ ji̧, Ütërë tänȩa̧ oa chjai̧dë oa chjätärërea̧ ji̧. Cjatäcjie joretarea̧mi̧ dari̧ a̧dorëreji̧ri̧diro̧jo̧ȩ cjäri̧ri̧ cjia daji̧ri̧rȩ.

¹² Ado Ütë tjamo̧ judi Jobo ju̧i̧ pearä ana̧ri̧ a̧dorërea̧ ji̧, jabechji̧ ji̧dë u̧i̧ ana̧ri̧ a̧dorëremȩdejȩ jibëa̧ üdë ji̧dë u̧i̧ ji̧ra̧ tjamo̧pe bagarea̧mi̧ dari̧. Tjamo̧ davä. Jabechji̧ Jobo judi 14 mil oveja oa goadërërea̧ ji̧, ja̧di ji̧ra̧ oa goamȩpea̧de. Ado 6 mil cameyo oa goadërërea̧ ji̧, ja̧di dari̧ goamȩpea̧de. Ado 2 mil baca oa goadërërea̧ ji̧, ja̧di ji̧ra̧ oa goamȩpea̧de. Ado cja̧rȩmȩ mil buro iei̧ oa goadërërea̧ ji̧, ja̧di dari̧ goamȩpea̧de.

¹³ Ado jibëa̧ u̧ri̧ judiro̧ ütëborë a̧dë ja̧borërea̧ ji̧, jabechji̧ ado chjereno̧ ëbarea̧mi̧ dari̧ nö̧rirea̧ yürürëremȩdejȩ Ütë tjamo̧ judi. Ado pio ju̧i̧iä japamitë chjätä ëte, jabechji̧ 7 oa ëbamȩpea̧dejȩrȩ jibëa̧ ja ji̧ri̧. Ado jibëa̧ jabi ji̧ri̧ peaja̧di ëbamȩpea̧dejȩrȩ tjarari̧ oa.

¹⁴ Ado jojabi yaboyi̧ pio ji̧ Jemima quȩra̧ quȩparëremȩdejȩ. Ado tjoroyi̧ pio ji̧ Quechia quȩpea̧dejȩ. Ado duriyi̧ pio ji̧ Querepu quȩra̧ quȩpea̧dejȩ.

¹⁵ Ado Jobo ja̧ jabi jini̧ro̧ a̧dë chjäte chjacjiaji̧ri̧rëreji̧ri̧ni̧rȩ ado cja̧rȩmo̧rȩ nö̧tarea̧mi̧dëri̧. Ado Jobo judi jibëa̧ jabi pio ji̧ri̧bo jo̧rȩtamȩrȩ mitërëremȩdejȩrȩ pio ju̧i̧ ja̧remȩ pio ju̧i̧ mitërea̧ dapea̧ oa, jënȩ goë boea pio ju̧i̧ mitërea̧ dapea̧ oa. Jabechji̧ jibëa̧ ja pio ji̧ri̧mo̧i̧ mitëdëa̧dejȩrȩ, jabo jibëa̧ jabi pio ji̧ri̧bo a̧de mitërëremȩdejȩrȩ, jënȩ goë boea̧ pio ju̧i̧ ütëbo oa chjarapë yürüpea̧ oa, jënȩ ja̧boa̧rä chjadëri̧ chjarapë yürüpea̧ oa.

¹⁶ Ado Jobo judi japamitë ana̧ tjamo̧ri̧ cjo̧ro̧rëremȩde. Judi gito ana̧ tjamo̧ri̧ tararemȩrȩ chjapa ëte, jabechji̧ 140 ui nö̧ta a̧de cjo̧ro̧rëremȩde jibëa̧ jadamai̧ pio ji̧ri̧ daea̧rä yuro, jibëa̧ jadamai̧ taru pio ji̧ri̧bo daea̧rä yuro.

¹⁷ Ado ja̧dëa ji̧ ja̧boa̧de ütamai̧ tjamo̧padäräa̧mȩrȩ.