Jobo Ma̧ȩ 2 - Biblia Pume

Ütë tjamo̧ judi ado ütarami̧ dari̧ japarëremȩdejȩ Jobo ju̧i̧

¹ Ado cja̧rȩmo̧ doremȩrä, Ütë tjamo̧ ja̧ mu̧i̧tjoi̧ pio judiro̧ pio ju̧i̧ ja̧ dëbëräpȩ a̧doparërea̧ ji̧, a̧dëräpȩ a̧doparërea̧ ji̧, Ichiae pio judiborë ado a̧doparëremȩde.

² Ado Jeova judi iëno̧ë ta̧rëa̧dejȩ: —Danȩ, ¿yudiri jana̧nȩ? Ado Ichiae judi dëbë yo̧mȩrȩ yo̧a̧dejȩ: —Yudiri jana̧dë, jabechji̧ chiri nö̧tai̧ oa tai̧mi̧ dari̧ jä chjaoremȩrȩ jana̧requede.

³ Ado Jeova judi yo̧ë ta̧rëa̧dejȩ: —¿Dadëa̧nȩ ca̧ mu̧i̧tjoi̧ ju̧i̧, Jobo pio ju̧i̧? Danȩ, pumȩ chjadëde. Cüdë yo̧a̧mi̧ japamȩde. Coëma cjiari̧ cjo̧ro̧de, no̧ tjamo̧i̧ oa jämi̧ dari̧. Chjai̧dë pio ju̧i̧ putu jura̧ a̧dë chami̧ dari̧ japamȩde. Jabechji̧ pio coa ba chia jo̧rȩtamȩrȩ cjo̧ro̧de, chjai̧dë oa japapea̧ ji̧ uapamȩrȩ. Ado chiriräpȩ cjo̧ro̧ji̧ri̧ pumȩ judiro̧ pio judimi̧ dari̧ cjo̧ro̧dë madirȩ. Ado no̧mȩ, mȩnȩ coaiäpȩmo̧ yo̧a̧ pio oaiä, dëdë, pio ju̧i̧ ja̧remȩ pio ju̧i̧ goarijä tänȩrea̧ yürüa̧requedemȩ. Judi chjai̧dëri̧ japadëa̧ ba oa, jibëa̧remȩ pio ju̧i̧ conȩdarea̧ yürüa̧requedemȩ. Jabo danȩ, gito ana̧ri̧ jo̧rȩtaräbo, jabechji̧ coëma cjiari̧ cjo̧ro̧de. Pio coaiäpȩmo̧ chjacjiamȩri̧ jo̧rȩtamȩrȩ cjo̧ro̧de a̧no̧ mirȩ jo̧rȩtadëmȩrȩ —yo̧a̧dejȩ.

⁴ Jabo Ichiae judi dëbë yo̧mȩrȩ yo̧a̧dejȩ: —Jabo cjäri̧ madimȩ, jibëa̧ i pio ju̧i̧mo̧i̧ jo̧rȩtamȩrȩ cjo̧ro̧de. Judi jabë chjadëri̧ cjo̧ro̧rea̧ chia oaiä, judi jabë chjari̧ cjo̧ro̧ oaiä, jabechji̧ pio mȩaiäpȩmo̧ chjai̧dëri̧ japadëdimȩ.

⁵ Jabo danȩ, pio ju̧i̧ ja̧ go̧a̧ pio ju̧i̧ conȩdarä judi, jibëa̧ i pio ju̧i̧ gito ana̧ri̧ ja̧bo tänȩrä judi, dëdë, ma̧ cjüëtü tjamo̧mȩrȩ ni̧bätäremȩdimȩ ya̧mi̧ dari̧.

⁶ Ado pio ju̧i̧ ta̧rëa̧ oaiä, Jeova judi yo̧a̧dejȩ: —Goë jaevä ado ja̧di. Mȩnȩ jo̧rȩta̧mi̧ japajo̧ȩ. Mȩnȩ jo̧rȩtami̧ gito ana̧ri̧ ja̧bo tänȩjo̧ȩ ju̧i̧ ja̧ go̧a̧ pio ju̧i̧. Jabo ja̧bo tänȩdëjo̧ȩ jabo. Ja̧bo tänȩrea̧ yürüdërequedemȩ jabechji̧ —yo̧a̧dejȩ.

⁷ Ado Ütë tjamo̧ judi ja̧di ta̧rëri̧ ni̧bä ëte, Ichiae judi a̧dë cjarapea̧dejȩ. Ado chjaodëri̧ japarëremȩdejȩ Jobo ju̧i̧. Gito ana̧ tjamo̧ri̧ tara tänȩrëremȩdejȩ pumȩ taradai̧ tarari̧. Ma̧i̧ da chuma̧ oa idëpa tänȩa̧dejȩ jibëa̧ icjara codë oa, jibëa̧ ta ëteri pio judiri jibëa̧ tjübëräpȩ yuro.

⁸ Ado Jobo judi bë yuroräpȩ jämȩrȩ chadärärëremȩde cjo̧dë tjaräpȩ ju̧ri̧, pumȩrȩ jura̧ duri pio ju̧i̧ aeno̧rea̧räpȩ ju̧ri̧. Ado dabu yocodë pënȩremȩ pio ju̧i̧ mitëmȩrȩ coaria̧dejȩ jibëa̧ co oa.

⁹ Ado jibëa̧ iei̧ jini̧ yo̧a̧nȩjȩ: —Mȩnȩ ana̧ tjamo̧ri̧ tararäbo ¿coëma cjiari̧ cjo̧ro̧parenȩ mȩnȩ? Cjäri̧ ma, ja̧di dari̧ jo̧rȩtarea̧mi̧dëde. Chja jabechji̧ ërecjiamȩrȩ jo̧rȩtajo̧ȩ Ütë tjamo̧ ju̧i̧. Ma̧ cjüëtümȩrȩ goae tarari̧ aenȩ aene ni̧bäjo̧ȩ. Ado ja̧di dari̧ japa ëte, jabechji̧ ja̧boemȩrenȩ.

¹⁰ Jabo Jobo judi ta̧rë ja̧bodëa̧dejȩ jibëa̧ iei̧ ji̧. Ado yo̧a̧dejȩ: —Cjäri̧ mamȩ, japëtarayi̧mi̧ dari̧ ni̧bämȩ. Jo̧rȩtarea̧ chiadëyi̧mi̧ dari̧ ni̧bämȩ. Damȩ, Ütë tjamo̧ judi ibë eami̧ oa chjadëri̧ yürürä judi, ¿tjana̧ japarea̧rȩ? Tjana̧ japadë, jabechji̧ ma̧ chiadëri̧ cjiaji̧ri̧rȩ darea̧ro̧jo̧ȩ. Ado pio ju̧i̧iä yo̧cama̧. Judi ibë chjai̧dë pio ju̧i̧bo chjätä tänȩrä judi, peaja̧di chjadëri̧ jo̧rȩtatäreji̧ri̧rea̧rȩ —yo̧a̧dejȩ Jobo judi jibëa̧ iei̧ ji̧iäpȩmo̧. Ado Jobo judi a̧dë chjäte gitoi̧ dari̧ cjo̧ro̧rërea̧räbo, jabechji̧ jibëa̧ yara̧ cja̧rȩmȩ co chjai̧dëri̧ ni̧bädërëremȩdejȩ Ütë tjamo̧ ju̧i̧iäpȩmo̧.

Jobo ja̧ jadü judiro̧ tjarari̧rȩ goë daera̧pea̧diro̧jo̧ȩ

¹¹ Ado Jobo judi jibëa̧ jadü tjarari̧ oa ëbarëremȩdejȩrȩ. Cja̧rȩmȩrȩ Eripja quȩmȩrëremȩde. Tema̧ quȩmȩ chiririmȩrëremȩde. Ado cja̧rȩmo̧ üdë Bida quȩmȩrëremȩde. Ado Bida judi Choa quȩmȩ chiririmȩrëremȩde. Ado cja̧rȩmo̧ judi Chopa quȩmȩrëremȩde. Ado Chopa judi Namata quȩmȩ chiririmȩrëremȩde. Aja̧, Jobo ja̧ jadü pio judiro̧rëreji̧ri̧dirȩ. Ado Jobo pio ju̧i̧ chjiari ta̧rëa̧ oaiä, “Aja̧, gito ana̧ri̧ tarade” yo̧a̧ oa ta̧rëa̧ oaiä, jabechji̧ goëdepea̧ pio ju̧i̧ chjiari jo̧rȩtaji̧ri̧pea̧dirȩ. Ado ja̧dëa ji̧ ütara̧ doro goëdepea̧diro̧jo̧ȩ ori̧ bagari̧ ëba chapea̧ oa.

¹² Jabë jachiri pio judiri darëreji̧ri̧diro̧jo̧ȩ, jabo 'Jobo pio judidida' quëna̧ dadëa̧diro̧jo̧ȩ. Ado cja̧rȩmo̧rämi̧ cjiarëreji̧ri̧diro̧jo̧ȩ. Jabo queri̧na̧ra̧rä, 'Aja̧, pio judidida' quëna̧ji̧ri̧pea̧rä, jabechji̧ gito ana̧ tjamo̧ri̧ jo̧rȩtaji̧ri̧pea̧dirȩ. Ado to̧bari̧ ejaro cjiaji̧ri̧pea̧dirȩ ma̧ chjua jo̧rȩtarea̧mi̧dëri̧. Jabechji̧ jibëa̧ jadü pio ju̧i̧ daea̧ oaiä, pumȩmi̧ dadëpea̧mȩ oa daea̧ oaiä, jabechji̧ gito ana̧ tjamo̧ri̧ jo̧rȩtaji̧ri̧rȩ mu̧i̧ quirarëreji̧ri̧diro̧jo̧ȩ jibëa̧ chjiboremȩ oa. Ado dabu pjo̧no̧i̧ pio jui̧ mitë ëte, a̧dëräpȩmo̧ quibë aeno̧a̧diro̧jo̧ȩ jibëa̧ tjübërä gu̧rorea̧mi̧ dari̧.

¹³ Ado ja̧di dari̧ japa ëte Jobo ja̧ cotoräpȩ ju̧ri̧ chadäräa̧dirȩ. Jabo ni̧bädëa̧diro̧jo̧ȩ jabo jabechji̧, cjapi maeari̧ charëreji̧ri̧dirȩ. Aja̧, 7 do nö̧ta cjapiri̧ cjia maeari̧ ëba charëreji̧ri̧diro̧jo̧ȩ, ni̧bä chjaorea̧mi̧dëri̧. 'Aja̧, ibëa̧ jadü judi gito ana̧ tjamo̧dida, a̧dë chjäte gito ja̧bodida, a̧dë chjäte conȩda oa cjiami̧ dari̧ cjiadida' quëna̧ jo̧rȩta̧ oaiä, jabechji̧ mau maeari̧ cjiaji̧ri̧rȩ ëba charëreji̧ri̧diro̧jo̧ȩ.