Jobo Ma̧ȩ 1 - Biblia Pume

Taruparea̧ Ma̧ȩ

¹ Cja̧rȩmȩ pumȩrȩ cjo̧ro̧rëremȩde Ucha quȩmȩ chiriräpȩ. Aja̧ Jobo quȩmȩrëremȩde. Coëma cjiari̧ cjo̧ro̧mȩrȩ cjo̧ro̧rëremȩde, no̧ tjamo̧i̧ oa jämi̧ dari̧. Jabechji̧ chjai̧dë pio ju̧i̧ putu jura̧ a̧dë chami̧ dari̧ japarëremȩde. Ütë tjamo̧ pio ju̧i̧ ba chia joretamȩrȩ cjo̧ro̧rëremȩde, chjai̧dë oa japapea̧ ji̧ uapamȩrȩ.

² Ado Jobo judi ëbarëremȩdejȩrȩ jibëa̧ u̧ri̧ ji̧ri̧. Cja̧ȩta̧ra̧ ichiri yo̧a̧ri oa ëbarëremȩdejȩrȩ jibëa̧ ja pio ji̧ri̧. Ado tjarari̧ oa ëbarëremȩdejȩrȩ jibëa̧ jabi ji̧ri̧ peaja̧di. Ichi chjö̧na̧i̧ oa ëbamȩrȩ cjo̧ro̧rëremȩde.

³ Ado Jobo judi a̧dë chjäte ji̧ra̧ri̧ goamȩrȩ cjo̧ro̧rëremȩde. Jabechji̧ ütarari̧mi̧dëri̧ goamȩrȩ cjo̧ro̧rëremȩde. Jabëdiädëmȩrȩ cjo̧ro̧rëremȩde bücjüri̧ cjiadëmȩrȩ. Jabechji̧ no̧i̧dë tjamo̧ oa, 7 mil oveja oa goamȩrȩ cjo̧ro̧rëremede. Ado 3 mil cameyo oa goarëremȩde peaja̧di no̧i̧dë tjamo̧ oa. Ado 1 mil baca oa, 500 buro oa goarëremȩde peaja̧di, ji̧ra̧ tjamo̧ oa. Ado jibëa̧ mu̧i̧tjoi̧ judiro̧ peaja̧di ji̧ra̧rëreji̧ri̧dirȩ. Jabechji̧ pumȩ ba chia tjamo̧mȩrȩ cjo̧ro̧rëremȩde. Tjamo̧ davä. Dorë biramȩräpȩmo̧ cjo̧ro̧ji̧ri̧ judiro̧ ütëbodärärë, jabechji̧ ba chia da marëreji̧ri̧diro̧jo̧ȩ. Ba chia jo̧rȩta marëreji̧ri̧diro̧jo̧ȩ.

⁴ Ado Jobo ja̧ u̧ri̧ judiro̧ jibëa̧ bërämo̧ cjo̧ro̧rëreji̧ri̧dirȩ cja̧rȩmȩ bërä cjo̧ro̧dëji̧ri̧rȩ. Ado babui̧ra̧ ano̧ mire a̧dope chjaorëreji̧ri̧dirȩ ado cja̧rȩmo̧ bërä, ado cja̧rȩmo̧ bërä. Jurapea̧ oa, jarapea̧ oa, airi̧ cjia airi̧ cjia a̧dopapea̧ oa a̧dope chjaorëreji̧ri̧dirȩ. Ado jibëa̧ ayi̧ca̧i̧ pio ji̧ri̧bo ma̧ȩ chjadüa̧ oaiä, peaja̧di a̧dope chjaorëreji̧ri̧ni̧rȩ jibëa̧ oti̧ pio ji̧ri̧ nö̧ta.

⁵ Ado Jobo ja̧ u̧ri̧ judiro̧ a̧dopë cjiadiäa̧rä, judiro̧ jibëa̧ bëräpȩ ado chjereno̧ baädäräa̧rä, jabechji̧ Jobo judi goë tuti yürürëremȩdejȩ Ütë tjamo̧ ju̧i̧. Jabechji̧ judiro̧ chjai̧dëri̧ japea̧rä judi duridëparȩa̧ oa cjiapea̧ oa, jabechji̧ pio ji̧ri̧ chjiari goë tuti yürürëremȩde. Aja̧, goe gu̧rori̧ cäë yürürëremȩde peadai̧rä ja̧di dari̧ jo̧rȩtamȩrȩ: 'Aja̧, ca̧ u̧ri̧ judiro̧ Ütë tjamo̧ pio ju̧i̧iäpȩmo̧ chjai̧dëri̧ japea̧ jirodiro̧da, jibëa̧ chjira̧ oëra̧ joreta jirodiro̧da, Ütë tjamo̧ judi ba chia tjamo̧dë jirodida quëna̧pai̧ dadiro̧da, ado pio juiiä pio ji̧ri̧ chjiari goë tuti yürütäremȩquëda' quëna̧ jo̧rȩtamȩrȩ goe gu̧rori̧ cäë yürürëremȩde pio ji̧ri̧ chjiari. Aja̧, jadi dari̧ japamȩrȩ japarëremȩde Jobo judi jibëa̧ u̧ri̧ pio ji̧ri̧ chjiari, judiro̧ a̧dopea̧mi̧ nö̧ta.

Ütë tjamo̧ judi ütarami̧ dari̧ japarëremȩdejȩ Jobo ju̧i̧

⁶ Ado cja̧rȩmo̧ doremȩrä Ütë tjamo̧ ja̧ mu̧i̧tjoi̧ pio judiro̧ Jeova pio ju̧i̧ ja̧ dëbëräpȩ a̧dope cjiarëreji̧ri̧dirȩ orë. Aja̧, a̧dëräpȩ a̧dope cjiarëreji̧ri̧dirȩ. Ado Ichiae pio judiborë a̧doparëremȩde pio jiri nö̧ta.

⁷ Ado Jeova judi yo̧ë ta̧rëa̧dejȩ Ichiae pio jui: —Danȩ, ¿yudiri jana̧renȩ? Ado Ichiae judi dëbë yo̧mȩrȩ yo̧a̧dejȩ: —Yudiri jana̧dë, jabechji̧ chiri nö̧tai̧ oa tai̧mi̧ dari̧ jä chjaoremȩrȩ jana̧requede.

⁸ Ja̧dëa ji̧ Jeova judi yo̧a̧dejȩ: —Danȩ, ca̧ mu̧i̧tjoi̧ pio ju̧i̧, Jobo quȩmȩ pio ju̧i̧ ¿daba dadëa̧nȩ? Pio ju̧i̧ ¿ütarë dadëa̧nȩ? Danȩ, coëma cjiari̧ cjo̧ro̧de judi, no̧ tjamo̧i̧ oa jämi̧ dari̧. Chjai̧dë pio ju̧i̧ putu jura̧ a̧dë chami̧ dari̧ japamȩde. Chiriräpȩ cjo̧ro̧ji̧ri̧ pio judiro̧mi̧ dari̧ cjo̧ro̧dë made, jabo jabechji̧ tjaoëpai̧ dari̧ cjo̧ro̧de. Pio coa ba chia joretamȩrȩ cjo̧ro̧de, chjai̧dë oa japapea̧ ji̧ uapamȩrȩ. Ado pio ju̧i̧iä yo̧ë ta̧rërequedemȩ. Pio ju̧i̧ ¿ütarë dadëa̧nȩ? —yo̧a̧dejȩ Jeova judi.

⁹ Ado Ichiae judi pio ju̧i̧ ta̧rëa̧ oaiä, dëbë yo̧a̧dejȩ Ütë tjamo̧ ju̧i̧: —Jabo cjäri̧ made, badëri̧ quëna̧dëdimȩ.

¹⁰ Jabechji̧ mȩnȩ ji̧dë ma chjadëri̧ jida̧ pio ju̧i̧iämo̧i̧ quëna̧dimȩ. Danȩ, pio mȩnȩ tänȩa̧ oa tutia̧ tjoro cjo̧ro̧mi̧ dari̧ cjo̧ro̧de. Tüdüa̧mi̧ darä cjo̧ro̧de. Ja̧di tara bücüri̧ cjiadëmȩrȩ cjo̧ro̧de. Ju̧i̧ ja̧ bë üdë, ju̧i̧ ja̧ u̧ri̧ judiro̧, ju̧i̧ ja̧ oveja üdë, ju̧i̧ ja̧ mu̧i̧tjoi̧ judiro̧, jibëa̧ tjado üdë, ju̧i̧ ja̧ cameyo üdë, jabechji̧ chjadëri̧ jida̧ oa cjia maeade. Chjadëri̧ boea oa cjia maeade cüdë eami̧ oa japarea̧ decjiari̧. Ja̧di tara bücjüri̧ cji̧adëmȩrȩ cjo̧ro̧de. Ado mȩnȩ chjadëri̧ jida̧ pio ju̧i̧iä, jibëa̧ üdë no̧i̧dë tjamo̧pe baga̧de ji̧dëri̧. Aja̧, mȩnȩ chjadëri̧ jida̧ pio ju̧i̧iä a̧dë chjäte ji̧ra̧ri̧ goamȩpea̧dejȩ jibëa̧ mu̧i̧tjui̧ oa, jibëa̧ oveja oa, jibëa̧ baca oa. Tjamo̧ davä. Oëra̧ yo̧dërequedemȩ. Mȩnȩ chjadëri̧ jida̧ pio ju̧i̧iämo̧i̧ quëna̧dimȩ.

¹¹ Jabo danȩ, mȩnȩ chjadëri̧ jidadërä judi, jabechji̧ quëna̧dëtäremȩdimȩ chjaodëri̧. Tjamo̧ davä. Mȩnȩ jibëa̧ pio ju̧i̧ chjö̧na̧i̧ oa goarijä tänȩrä judi, jabechji̧ ma̧ cjüëtüri̧ jo̧rȩtamȩrȩ ma̧ȩ goaedëti̧ oa ni̧bätäremȩdimȩ, mȩa chjuari jiadamȩrȩ —yo̧a̧dejȩ Ichiae judi.

¹² Ja̧dëa ji̧ Jeova judi yo̧a̧dejȩ: —Goë jaevä ado ja̧di. Jabechji̧ mȩnȩ jo̧rȩtami̧ japavä. Jobo ja̧ pio ju̧i̧, jabechji̧ mȩnȩ jo̧rȩta̧mi̧ japavä. Jënȩ goa pio ju̧i̧ co̧nȩdarea̧ yürürequedemȩ. Jabo Jobo pio ju̧i̧iäpȩmo̧ eami̧ oa japadëvä. Pio ju̧i̧iäpȩmo̧, jibëa̧ i pio ju̧i̧iäpȩmo̧ conȩdarea̧ yürüdërequedemȩ —yo̧a̧dejȩ. Ado Ütë tjamo̧ judi ja̧di ta̧rëri̧ yo̧ ëte, Ichiae judi a̧dë cjarapea̧dejȩ.

¹³ Ja̧dëa ji ado cja̧rȩmo̧ doremȩrä, Jobo ja̧ u̧ri̧ pio judiro̧ a̧dopea̧ oa cjiarëreji̧ri̧dirȩ jojadi tjamo̧ pio ju̧i̧ ja̧ bëräpȩ. Jurapea̧ oa, bino quȩmȩ ërü oa jarapea̧ oa a̧dopea̧ oa cjiarëreji̧ri̧dirȩ. Ado judiro̧ a̧dopea̧ cjararä,

¹⁴ cja̧rȩmȩrȩ ma̧ȩ yürera̧pea̧dejȩ Jobo ju̧i̧ jibëa̧ bëräpȩmȩ oa. Ja̧di ta̧rëri̧ yo̧mȩrȩ yo̧a̧dejȩ: —Danȩ, chiriräpȩremȩrequede buro pio ju̧i̧ nö̧ta, baca pio ju̧i̧ nö̧ta. Ado buro üdë, jabechji̧ cärä juraremȩde. Ado a̧ro̧rȩ, na̧ mu̧i̧tjoi̧ judiro̧ orë, jabechji̧ ja̧bepareji̧ri̧rea̧rȩ. Bacara̧ pio ju̧ri̧ra̧ ja̧bepareji̧ri̧rea̧rȩ dabu oa chjadëri̧ cabëpapea̧ oa.

¹⁵ Jabo cjäri̧ madiro̧ibe, chjaodëri acji jana̧diro̧ibe chabeno quȩji̧ri̧ pumȩ judiro̧. Na̧ mu̧i̧tjoi̧ ütëbodärä oa chjaodëri̧ ja̧bo tänȩa̧diro̧jȩrȩ, ca̧ jadüreji̧ri̧ pio ji̧ri̧. Dëbëribo jo̧dë chiamȩ tjapënȩra̧ pio ju̧ri̧ra̧ ja̧bo tänȩa̧diro̧jȩrȩ. Ado pio ji̧ri̧ ja̧bo tänȩa̧ ëte, buro chjö̧na̧i̧ oa baë ma̧ȩ baäa̧diro̧jo̧ȩ bacabo. Jiro decjiapea̧de. Pio cüdëmo̧rȩ cjiadiäa̧mȩrȩ ma̧ȩ yürera̧pea̧requedemȩ jo̧ȩra̧pe —yo̧a̧dejȩ.

¹⁶ Ado Jobo jui̧iäpȩmo̧ ni̧bämȩ judi jabë ni̧bädärädëa̧rä ado cja̧rȩmo̧ mu̧i̧tjoi̧rȩ chjaodëri̧ go̧düdärärëremȩde. Ado ja̧di ta̧rëri̧ yo̧mȩrȩ yo̧a̧dejȩ: —Danȩ, Ütë tjamo̧ pio judi tänȩa̧ oa, a̧dëri pio judiri ma̧i̧ dari̧ bërepe chjaoremȩde oveja chjö̧na̧i̧rȩ tüe ja̧borea̧mi̧ dari̧. Jiro decjiapea̧de. Ado oveja jidareji̧ri̧ pio judiro̧borë tüe ja̧boa̧ maeadirȩ. Pumȩ decjiapea̧dirȩ. Pio cüdëmo̧rȩ cjiadiäa̧mȩrȩ ma̧ȩ yürera̧pea̧requedemȩ —yo̧a̧dejȩ.

¹⁷ Ado pio jiro ni̧bämȩ judi jabë ni̧bädärädëa̧rä, Jobo ja̧ mu̧i̧tjoi̧ ado cja̧rȩmo̧rȩ chjaodëri̧ go̧düdäräa̧de. Ado tuti yo̧mȩrȩ yo̧a̧dejȩ Jobo ju̧i̧iäpȩmo̧: —Danȩ, cadeo quȩji̧ri̧ pumȩ pio judiro̧, tjarari̧ bubarë, chjaodëri̧ acji jana̧diro̧ibe. Ado ca̧ jadüreji̧ri̧ chjö̧na̧i̧ oa, na̧ mu̧i̧tjo̧i̧reji̧ri̧ pio ji̧ri̧ ja̧bo tänȩa̧diro̧jȩrȩ. Ado baë ma̧ȩ baäa̧diro̧jo̧ȩ cameyo chjö̧na̧i̧därä oa. Jirodë mapea̧de. Pumȩ decjiapea̧dirȩ. Pio cüdëmo̧rȩ cjiadiäa̧mȩrȩ ma̧ȩ yürera̧pea̧requedemȩ —yo̧a̧dejȩ.

¹⁸ Ado ma̧ȩ yürümȩ judi jabë ni̧bädärädëa̧rä, Jobo ja̧ mu̧i̧tjoi̧ üdë, ado cja̧rȩmo̧rȩ go̧düdäräa̧de. Ado jëreeamȩrȩ yo̧a̧dejȩ: —Danȩ, na̧ u̧ri̧ judiro̧ a̧dopea̧ oa cjiareji̧ri̧dirȩ na̧ ja yabomȩ tjamo̧ pio ju̧i̧ ja̧ bëräpȩ. Jurapea̧ oa, jarapea̧ oa, a̧dopea̧ oa cjiareji̧ri̧dirȩ.

¹⁹ Jabo cjäri̧ madejȩrȩ, a̧dë chjäte ma̧i̧ dari̧ pupuripamȩ üdë chiri maeari pio judiri acji go̧düdäräa̧dejȩrȩ. Jo̧ pio ju̧i̧ badëri̧ are ia oaiä, chjaodëri̧ acji cjatäa̧dejȩrȩ na̧ u̧ri̧ ütëbo oa. Quȩ ma cjiari̧ cjiadiäa̧dirȩ. Jiro decjiapea̧dirȩ. Pio cüdëmo̧rȩ cjiadiäa̧mȩrȩ ma̧ȩ yürera̧pea̧requedemȩ —yo̧a̧dejȩ.

²⁰ Ado Jobo judi pio ma̧ȩ chjö̧na̧i̧ oa ta̧rëa̧ oaiä, jabechji̧ cjitë ëte mu̧i̧ quirarëremȩdejȩ jibëa̧ chjibo oa. Gito ana̧ tjamo̧ri̧ jo̧rȩtamȩrȩ mu̧i̧ quira̧dejȩ. Ado jibëa̧ tjübë cö̧ decjiape bagari̧ coarirëremȩdejȩ chjö̧na̧i̧ oa. Ado ja̧di dari japa ëte goë tobo china̧därärëremȩde daburo Ütë tjamo̧ pio ju̧i̧iäpȩmo̧ chjacjiamȩri̧ jo̧rȩtapamȩrȩ.

²¹ Ado yo̧rëremȩde: —Jabechji̧de coaiä. Jabechji̧ ca̧ ai̧ pio jini̧ coa ararërea̧ ji̧, mö̧na̧ maea oa ararëreyi̧ni̧que goadë maea oa. Ado peaja̧di dari̧ baäparequede cüdë ja̧boa̧rä. Goamȩrȩ baädëparequede. Ca̧ ichirä chjuari̧ mitëmȩrȩ baädëparequede jabo mö̧na̧mȩrȩ baäparequede cüdë. Aja̧, goadëmȩrȩ baäparequede. Jabo jabechji̧de. Jeova pio judi jo̧rȩta̧mi̧ yürürëremȩdique. Aja̧, judi jo̧rȩta̧mi̧ yürürëremȩdique ca̧ u̧ri̧ ji̧ri̧. Judi jo̧rȩta̧mi̧ yürürëremȩdique ca̧ cameyo oa, ca̧ oveja oa, ca̧ buro oa. Aja̧, pio judi jo̧rȩta̧mi̧ chjadëri̧ yürüa̧dique. Ado pio judi jo̧rȩta̧mi̧, ado chjereno̧ mitëa̧dejȩ yaba̧ cüdë goarea̧mi̧dëpe bagari̧. Jabo jabechji̧de. Ado Jeova pio judi chjacjiamȩri̧ jo̧rȩtapea̧ ma̧ȩade. Chjacjiamȩri̧ ni̧bäpea̧ maeade —yo̧rëremȩde.

²² Ado Jobo judi chjai̧dë oa chjätäa̧räbo, jabechji̧ Ütë tjamo̧ pio ju̧i̧iäpȩmo̧ chjai̧dëri̧ japadërëremȩde. Ütë tjamo̧ pio ju̧i̧ chjiari oëra̧ yo̧dëa̧de. Cja̧rȩmȩ co chjai̧dëri̧ ni̧bädëa̧dejȩ Ütë tjamo̧ ju̧i̧iä. Jabechji̧ chjuari̧ quëna̧mȩrȩ cjo̧ro̧rëremȩde.