Japarea̧ 9 - Biblia Pume

Chauro judi ano̧ mire pumȩpe baga̧de.

¹ Jabo Chauro judi, järidëpe bagadëmȩrȩ ji̧dë ma ja̧bo tänȩpai̧ ta̧rëri̧ yo̧ë cji̧de chjaorëremȩdejȩrȩ quëna̧ji̧ri̧ pio ji̧ri̧, cjatäcjie jo̧rȩtarea̧ decjiari̧. Pio ji̧ri̧ ütëbo oa chaäa̧ oa cjiatä ea tjamo̧mȩrȩ järëremȩde Ütë tjamo̧ ja̧ bëräpȩ tjamo̧ goë tuti ja̧bepamȩ pio ju̧i̧ dapea̧ oa.

² Aja̧, quëna̧ji̧ri̧ pio ji̧ri̧ chaärea̧ go̧ȩ i pio ju̧i̧ cjo̧dëpea̧ oa, Damaco quȩmȩ bë ma̧ri̧räpȩ quëna̧ji̧ri̧ pio ji̧ri̧ mitë ëte chaä tänȩpea̧ oa järëremȩde. Tjamo̧ davä. 'Jechu judi Ütë tjamo̧ pio ju̧i̧iäpȩ baärea̧ no̧mi̧ dadida, coëma cjiari̧ baämȩ no̧mi̧ dadida' quëna̧ji̧ri̧ pio ji̧ri̧ chaäpea̧ oa, Judiorë a̧doparea̧ bëräpȩ quëna̧ji̧ri̧ pio ji̧ri̧ chaäpea̧ oa, eami̧ quëna̧yi̧ iei̧ pio ji̧bo chaäpea̧ oa järëremȩde go̧ȩ i pio ju̧i̧ cjo̧dëpea̧ oa tjamo̧ goë tuti ja̧bepamȩ pio ju̧i̧iä. Ado pio ju̧i̧iäpȩ go̧düdäräa̧mȩrȩ, ja̧di ta̧rëri̧ yo̧rëremȩdejȩ: —Danȩ, Damacoräpȩ jäparequede quëna̧ji̧ri̧ pio ji̧ri̧ mitëpea̧ oa, tabüa̧ oa goa ma̧na̧pea̧ oa Jerucharȩräpȩ chaäpea̧ oa —yo̧a̧dejȩ—. Pio ju̧i̧iä quëna̧ji̧ri̧ pio ji̧ri̧ chaärea̧ go̧ȩ i oa cjo̧dera̧pea̧requedemȩ Aja̧, pio ju̧ri̧pȩ goë na̧rȩpea̧ oa, Judiorë a̧doparea̧ bëräpȩ tjamo̧ yo̧ji̧ri̧ pio ji̧ri̧ goë na̧rȩpea̧ oa, judiro̧ coa mitërea̧ yürüpea̧ oa, cjo̧dera̧pea̧requedemȩ —yo̧mȩrȩ cjo̧dëa̧dejȩ tjamo̧ goë tuti ja̧bepamȩ pio ju̧i̧iä.

³ Ado go̧ȩ i pio ju̧i̧ mitë ëte, Chauro judi jäëno̧rëremȩde Damacoräpȩmo̧. Ado go̧düdäräpea̧ querediämȩ oa, chjaodëri̧ a̧dëri pio judiri ma̧i̧ dari̧ tatarëremȩdejȩ jibëa̧ yuroti̧ oa, bërepe chjaomi̧ dari̧.

⁴ Pio ju̧i̧iä daburäpȩmo̧ cjatëno̧a̧de. Ado jȩa ni̧bämȩ pio ju̧i̧ ta̧rëa̧dejȩ: —Chauro, Chauro ¿tjana̧ ju̧i̧iä conȩdarenȩque? —iëno̧ë ta̧rëa̧dejȩ.

⁵ Ado Chauro judi dëbë yo̧mȩrȩ iëno̧ë ta̧rëa̧dejȩ: —¿Chjianȩ Ano̧mȩ? 'Pio judidida' quëna̧ dabadërequedemȩ. Ado ni̧bämȩ judi dëbë yo̧a̧dejȩ: —Chjiadë, Jechu pio judirequede. Mȩnȩ ma̧i̧ dari̧ conȩda̧ pio judirequede.

⁶ Jabo cjitëvä yaba̧. Damacoräpȩ jävä. Ado idëpȩ go̧düdäräpamȩ oa ma̧ȩ yürüpadimȩ pumȩ judi. Jabechji̧ mȩnȩ dabapea̧ oa, 'Aja̧, ja̧di dari̧ japatäremȩquëda' quëna̧ dabapea̧ oa, ma̧ȩ yürüpadimȩ. Jävä —yo̧mȩrȩ yo̧rëremȩdejȩ Jechu judi Chauro pio ju̧i̧iäpȩmo̧.

⁷ Ado Chauro pio ju̧i̧ nö̧ta tai̧reji̧ri̧ pio judiro̧ uapa tjamo̧pea̧dirȩ. Cjapi maearë cjiadiärëreji̧ri̧dirȩ. Ni̧bämȩ pio ju̧i̧ ta̧rërëreji̧ri̧diro̧jo̧ȩ jabo eami̧ oa dadëa̧dirȩ. Pio ju̧i̧iä ana̧ri̧ jo̧rȩtaji̧ri̧pea̧dirȩ.

⁸ Ado Chauro judi ma̧ȩ ta̧rë ëte, cjitërëremȩde. Jabo jibëa̧ dacho oa are ië datea̧ ji̧, cjäri̧ made, dadërëremȩde. Tocoi̧mi̧ dadërëremȩde. Pio ju̧i̧iä Chauro pio ju̧i̧ nö̧ta tai̧ji̧ri̧ pio judiro̧ jibëa̧ ichi oa mitëji̧ri̧rȩ mu̧i̧ järëreji̧ri̧diro̧jo̧ȩ Damacoräpȩ yuro.

⁹ Ado tjarari̧ do nö̧ta Chauro judi dadërëremȩde. Jabechji̧ da cotomi̧ darë cjo̧ro̧rëremȩde. Ado judi eami̧ oa juratärea̧ ji̧, cjäri̧ made, juradërëremȩde. Ado ui oa jaratärea̧ ji̧, peaja̧di jaradërëremȩde. Jabechji̧ tjarari̧ do nö̧ta juradërëremȩde, ado jaradërëremȩde.

¹⁰ Ado cja̧rȩmȩrȩ cjo̧ro̧rëremȩde Damacoräpȩ, Anania quȩmȩ pio judi. Quëna̧mȩrȩ cjo̧ro̧rëremȩde. Ado Ano̧mȩ Jechu pio judi darämi̧ cjia tänȩmȩrȩ yo̧a̧dejȩ: —Danȩ Anania —yo̧a̧dejȩ. Ado Anania judi dëbë yo̧mȩrȩ yo̧a̧dejȩ: —Aja̧, pio yirequede Ano̧mȩ.

¹¹ Ado Ano̧mȩ judi yo̧a̧dejȩ: —Jëdano̧vä. Jäeno̧vä. 'Coëma cjiari̧' quȩmȩ järea̧ no̧räpȩ jäeno̧vä —yo̧a̧dejȩ—. Pio ju̧ri̧pȩ cjo̧ro̧de Juda judi. Ado mȩnȩ pio ju̧i̧ ja̧ bëräpȩ go̧düdäräa̧rä, jabechji̧ Tachoräpȩ cjo̧ro̧rëremȩ pio ju̧i̧ chjiari iëno̧ë ta̧rëemȩrenȩjo̧ȩ, Chauro quȩmȩ pio ju̧i̧ chjiari. Jabechji̧ pio yaba̧mi̧rä ni̧bädique, pio coaiäpȩmo̧ jo̧rȩtamȩrȩ.

¹² Ado pio cüdë darämi̧ cjia tänȩa̧ oaiä, pio mȩa i ana̧bo dami̧ dari̧ darämi̧ cjiadimȩ. Anania quȩmȩ pio ju̧i̧ darämi̧ cjiadimȩ. Pio jȩaiäpȩ jädäräa̧mȩ oa darämi̧ cjiadimȩ. Na̧ ichi dëbëribo idamȩ oa, jënȩ ado chjereno̧ dapea̧ oa ida̧mȩ oa da̧rämi̧ cjiadimȩ. Pio ju̧i̧iäpȩ jätä earequedemȩ. Jäeno̧vä —yo̧mȩrȩ yo̧rëremȩdejȩ Anania ju̧i̧ Ano̧mȩ Jechu judi.

¹³ Jabo Anania judi pio ju̧i̧ ta̧rëmȩrȩ dëbë yo̧a̧dejȩ Jechu ju̧i̧: —Jabo danȩ Ano̧mȩ, pumȩ no̧i̧dë oaiä ta̧rë chjaoa̧requede davä pio jiro üi̧ pio ju̧i̧ chjiari —yo̧a̧dejȩ—. Ma̧i̧ dari̧ japamȩde na̧ pumȩ pio ji̧ri̧iäpȩmo̧. Aja̧, "Ütë tjamo̧ ja̧ pumȩ pio ji̧ri̧, Jerucharȩräpȩ cjo̧ro̧ji̧ri̧ pio ji̧ri̧ ma̧i̧ dari̧ conȩda̧de" yo̧a̧ oa ta̧rëa̧requede.

¹⁴ Ado yaba̧ pio yi acji jana̧diibe peaja̧di, Damacoräpȩ. Tjamo̧ goë tuti ja̧bepamȩ pio judi yürüa̧ oa go̧ȩ i goamȩrȩ acji jana̧diibe. Jabechji̧ quëna̧ji̧ri̧ pio ji̧ri̧ chaäpea̧ go̧ȩ i oa goamȩrȩ acji jana̧diibe pio mȩaiäpȩmo̧ chjacjiamȩri̧ jo̧rȩtaji̧ri̧ pio ji̧ri̧ tabüpea̧ oa, pio ji̧ri̧ chaäpea̧ oa. Ja̧di ta̧rëri̧ yo̧a̧ oa ta̧rë chjaoa̧requede —dëbë yo̧a̧dejȩ Jechu ju̧i̧.

¹⁵ Jabo Ano̧mȩ judi dëbë yo̧a̧dejȩ Anania ju̧i̧: —Jabechji̧ goëdeno̧jo̧ȩ. Pio ju̧i̧ mitëa̧reconȩ ca̧ mu̧i̧tjoi̧mȩrȩ ja̧bepapea̧ oa, pumȩ judiro̧ pio coa chjiari ta̧rëpea̧ oa —yo̧a̧dejȩ—. Tjamo̧ davä. Judiodë judiro̧ pio coa chjiari ta̧rëpea̧ oa, chiri ütë cjo̧ro̧ji̧ri̧ pio judiro̧ peaja̧di ta̧rëpea̧ oa, ado Icharai pio judiri ja̧ji̧ri̧ pio judiro̧borë ta̧rëpea̧ oa, mitëa̧reconȩ.

¹⁶ Ado pio cüdë na̧rȩpareconȩ judi pio coa chjiari gitoi̧ dari̧ tarapea̧ pio ju̧i̧ chjiari. Ja̧di tara jabechji̧, goëdeno̧jo̧ȩ —yo̧a̧dejȩ.

¹⁷ Ado pio ju̧i̧ ta̧rëa̧ oaiä Anania judi goëdepea̧dejȩ Chauro pio ju̧i̧. Ado judi cjiamȩ jo̧räpȩ yu̧a̧därä ëte jibëa̧ ichi dëbëribora̧ ida̧dejȩ. Ado yo̧a̧dejȩ: —Danȩ omȩ Chauro, jana̧requede. Ano̧mȩ Jechu pio judi chjadüa̧ oa jana̧requede. Tjamo̧ davä. Jana̧rea̧ no̧ro mȩa na̧rȩremȩ pio judi chjadüa̧ oa jana̧requede mȩnȩ ado chjereno̧ dapea̧ oa, mȩnȩ Tjo tjamo̧ ja̧ chja̧oerä cjo̧ro̧pea̧ oa.

¹⁸ Ado Anania judi ja̧di ta̧rëri̧ yo̧a̧ oaiä, Chauro ja̧ dachori pio judiri chjaodëri̧ a̧dë cjatäeno̧a̧dejȩ cho̧ guidimi̧ darë. Judi ado chjereno̧ darea̧mi̧ dari̧ a̧dë cjatäeno̧a̧dejȩ. Ado damȩpea̧mȩrȩ cjitëno̧a̧de. Ado jȩa go̧e cjaeä chudatä ea̧ oaiä, chjaodëri̧ go̧e cjaeä chuda̧dejȩ.

¹⁹ Ado uirä chuda̧ duri oa jurarea̧ oa juramȩpea̧de. Jabechji̧ tjarari̧ do nö̧ta eami̧ oa juradëa̧ oaiä, ta̧mȩcho̧ ja̧bomȩrȩ juramȩpea̧de ado chjereno̧ ju to̧bape bagari̧. Ado Chauro judi quëna̧mȩpa ëte, jibëa̧ bëräpȩ jo̧ȩra̧pe baätärea̧ ji̧, jabechji̧ japamitë boi̧chji̧ cjiadiärëremȩde Damacoräpȩ quëna̧ji̧ri̧ pio ji̧ri̧ nö̧ta.

Chauro judi Damacoräpȩ a̧ra̧ano̧rëremȩde Ütë tjamo̧ ja̧ ma̧ȩ oa.

²⁰ Ado chjaodëri̧ taruparëremȩde davä Jechu pio ju̧i̧ chjiari a̧ra̧ano̧pea̧ ji̧ judiorë a̧doparea̧ bë ji̧ra̧räpȩ. “Aja̧, Jechu judi Ütë tjamo̧ ja̧ Joja pio judide, Ja tjamo̧ pio judide” yo̧mȩrȩ a̧ra̧ano̧rëremȩdejȩrȩ.

²¹ Ado Chauro ju̧i̧ ta̧rëji̧ri̧ pio judiro̧ ütëborë ana̧ri̧ jo̧rȩtaji̧ri̧pea̧dirȩ dacho bëremi̧ cjiaji̧ri̧rȩ. Ado jibëa̧ dëbëti̧ra̧ chia iëno̧ iëno̧ ta̧rëji̧ri̧pea̧dirȩ. —Quëna̧ji̧ri̧ pio ji̧ri̧ ma̧i̧ dari̧ japaremȩ ¿pio judidëde? Jechu pio ju̧i̧ quëna̧ji̧ri̧ pio ji̧ri̧, Jerucharȩräpȩ quëna̧ji̧ri̧ pio ji̧ri̧ ma̧i̧ dari̧ conȩdae chjaoremȩ ¿pio judidëde? Ado yaba̧ quëna̧ji̧ri̧ pio ji̧ri̧ acji jana̧pea̧ oa, tjamo̧ goë tuti ja̧bepamȩ pio ju̧i̧iäpȩ tabüa̧bo goa baäpea̧ oa, Jerucharȩräpȩ chaäpea̧ oa jana̧remȩ ¿pio judidëde? —iëno̧ iëno̧ cjiarëreji̧ri̧dirȩ jibëa̧ dëbëti̧ra̧ chia Chauro pio ju̧i̧ chjiari ana̧ri̧ jo̧rȩtaji̧ri̧rȩ.

²² Jabo Chauro judi, jabechji̧ ji̧dë u̧i̧ goae tarari̧ a̧ra̧ano̧mȩpea̧de Ütë tjamo̧ pio judi tänȩa̧ oaiä. 'Aja̧, Jechu judi Chjätä Tänȩmȩ pio judidida, Ütë tjamo̧ judi mitëa̧ pio judi tjamo̧dida' quëna̧pe järea̧mi̧ dari̧ to̧bari̧ a̧ra̧ano̧ chjaorëremȩdejȩrȩ Damacoräpȩ cjo̧ro̧ji̧ri̧ judio pio ji̧ri̧iäpȩmo̧. Tjamo̧ davä. 'Chauro judi a̧ra̧ano̧a̧ üdë ba chia tjamo̧dëdida, ado Jechu judi tjamo̧ri̧ Chjätä tänȩdëmȩdida' quëna̧rea̧mi̧dëri̧ coëma cjiari̧ a̧ra̧ano̧rëremȩdejȩrȩ dëbë ni̧bätarea̧ decjiaji̧ri̧ oa.

Chauro judi goadi a̧dë baärëremȩdejȩrȩ judio ji̧ri̧.

²³ Jabo japamitë chjätä ëte tjamo̧ yo̧ji̧ri̧ judio pio judiro̧ goëdëri̧ cjia tjamo̧pea̧diro̧jo̧ȩ Chauro ju̧i̧, Jechu pio ju̧i̧ chjiari a̧ra̧ano̧ chjaoa̧ oaiä. Pio ju̧i̧iä a̧doparëreji̧ri̧dirȩ Chauro ju̧i̧ ja̧bo tänȩpea̧ pio ju̧i̧ chjiari ni̧bä chjaopea̧ oa.

²⁴ Ado ni̧bä chjao ëte, tarupea̧dirȩ Damacoräpȩ go̧dürea̧ joë yari judiri goë cjia jidapea̧ ji̧. 'Aja̧, Chauro judi baäpea̧ querediä jirodida, ado judi baäpamȩ oa mitëpaa̧ro̧ju̧i̧da, ja̧bo tänȩpaa̧ro̧ju̧i̧da' quëna̧ jo̧rȩtaji̧ri̧rȩ goë cjia jidatarëreji̧ri̧diro̧jo̧ȩ do nö̧ta, gȩnȩ nö̧ta. Jabo Chauro judi goë ta̧rëa̧ oaiä, na̧e chiapea̧de.

²⁵ Pio ju̧i̧iä gȩnȩpea̧rä, jibëa̧ jadü judiro̧ tutirea̧ uë tjamo̧ri pio judiri, darea̧ joë yari pio judiri jaerira̧ mu̧i̧ bira tänȩrëreji̧ri̧diro̧jo̧ȩ taio boi̧dërä. Tutia̧ dairäpȩmo̧ bira tänȩrëreji̧ri̧diro̧jo̧ȩ daburäpȩmo̧. Ado ja̧di dari̧ japea̧ oaiä, jabechji̧ chjadëri̧ goadi a̧dë baärea̧ darëremȩde. Aja̧, pio jȩa ja̧bo tänȩtämi̧ cjiaji̧ri̧ pio judiro̧ eami̧ oa japarea̧ decjiari̧ goadi baärea̧ darëremȩde.

Chauro judi dabamȩparëremȩdejȩrȩ Jerucharȩräpȩ quëna̧ji̧ri̧ pio ji̧ri̧

²⁶ Ja̧dëa̧ ju̧i̧ Chauro judi chjadëri̧ baärëremȩde Jerucharȩräpȩ. Jabo judi quëna̧ji̧ri̧ pio ji̧ri̧ nö̧ta a̧dopatea̧ ji̧, uapaji̧ri̧rȩ darëreji̧ri̧diro̧jo̧ȩ. 'Jabechji̧ tjamo̧ri̧ quëna̧mȩpea̧dida' quëna̧ dadëa̧diro̧jo̧ȩ.

²⁷ Jabo Bernabe quȩmȩ pio judi chjadëri̧ a̧doa̧dejȩ. Jabechji̧ ëba jäa̧dejȩ Jechurë chjadüa̧ pio ji̧ri̧iäpȩ. Judiro̧ Chauro pio ju̧i̧ chjiari dabadëchea oa, jabechji̧ chjadëri̧ goë tuti ni̧bä chjaorëremȩdejȩrȩ. Aja̧, Ano̧mȩ judi Damacoräpȩmo̧ järea̧ no̧ro ju̧ri̧ ni̧bäa̧ pio ju̧i̧ chjiari, ado Chauro judi Ano̧mȩ pio ju̧i̧ daea̧ pio ju̧i̧ chjiari goë tuti ni̧bä chjaoa̧dejȩrȩ. Ado Chauro judi Damacoräpȩ ju̧ri̧ Jechu pio ju̧i̧ chjiari uapadëmȩrȩ to̧bari̧ a̧ra̧ano̧a̧ pio ju̧i̧ chjiaribo goë tuti ni̧bä chjaoa̧dejȩrȩ.

²⁸ Ado Jechurë chjadüa̧ judiro̧ pio ju̧i̧ ta̧rëa̧ oaiä, jabechji̧ cjatäcjie jo̧rȩtaji̧ri̧pea̧dirȩ. 'Aja̧, quëna̧mȩpea̧ jirodida' quëna̧ jo̧rȩtaji̧ri̧pea̧diro̧jo̧ȩ. Ado pio ju̧i̧iä Chauro judi quëna̧ji̧ri̧ pio ji̧ri̧ nö̧ta cjiadiärëremȩde. Ado pio ji̧ri̧ nö̧ta tai̧mȩrȩ Jerucharȩ bë ma̧ri̧ nö̧tai̧ oa a̧ra̧ano̧ chjaorëremȩde Ano̧mȩ Jechu pio ju̧i̧ chjiari. Uapadëmȩrȩ a̧ra̧ano̧rëremȩde.

²⁹ Ado giriego ma̧ȩ oa ni̧bäji̧ri̧ judio pio ji̧ri̧bo goae tarari̧ ni̧bä chjaorëremȩdejȩrȩ Chauro judi. Aja̧, judiro̧ pio jȩa nö̧ta dëbë ni̧bätarea̧mi̧ dari̧ ni̧bä chjaoa̧dejȩrȩ judiro̧ Jechu pio ju̧i̧ chjiari coëma cjiari̧ quëna̧pea̧ oa. Jabo cjäri̧ madiro̧jo̧ȩ, pio ju̧i̧iäpȩmo̧ goëdëri̧ cjiape bagaji̧ri̧rȩ järipea̧dirȩ pio ju̧i̧ ja̧bo tänȩpea̧ ji̧.

³⁰ Jabo quëna̧ji̧ri̧ judiro̧ pio ju̧i̧ chjiari goë ta̧rëa̧ oaiä, chjaodëri̧ goadi ëba baärëreji̧ri̧diro̧jo̧ȩ Checharea quȩmȩ bë ma̧ri̧räpȩ yuro. Ado judiri chjadüa̧diro̧jo̧ȩ Tacho quȩmȩ bë ma̧ri̧räpȩ yuro. Ja̧di dari̧ japarëreji̧ri̧dirȩ Chauro pio ju̧i̧ ja̧bo tänȩchea oa.

³¹ Ado pio jiro japamitërä, Ütërë ëna̧diäa̧ oa a̧dopaji̧ri̧ pio judiro̧ chjadëri̧ cjo̧ro̧rëreji̧ri̧dirȩ, ma̧ chjupi̧ cjiari̧ jo̧rȩtaji̧ri̧rȩ. Jabechji̧ judiro̧ eami̧ chjai̧dë oa chjätädëa̧ oaiä, o judiro̧ pio jibë conȩdadëa̧ oaiä, jabechji̧ chji̧ goaera̧ jo̧rȩtaji̧ri̧rȩ cjo̧ro̧rea̧ darëreji̧ri̧dirȩ, uapadëji̧ri̧rȩ. Tjamo̧ davä. Judearäpȩ a̧doparea̧ üdë, Garirearäpȩ a̧doparea̧ üdë, Chamariaräpȩ a̧doparea̧ üdë, ado oëra̧ti̧ oa a̧doparea̧ üdë, jabechji̧ chjadëri̧ cjo̧ro̧rea̧ da marëreji̧ri̧dirȩ. Ado Tjo tjamo̧ pio judi ana̧ri̧ a̧doa̧ oaiä, ju to̧bari̧ cjiadiämi̧ dari̧ cjiarëreji̧ri̧dirȩ, ji̧dë u̧i̧ ütëchjai̧pe järea̧mi̧ dari̧. Ado judi a̧doa̧ oaiä, jabechji̧ quëna̧ji̧ri̧ pio judiro̧ goëje ji̧ra̧pe järëreji̧ri̧dirȩ. Ado quëna̧ji̧ri̧ pio judiro̧ Ütë tjamo̧ pio ju̧i̧iäpȩmo̧ eami̧ chjai̧dë oa japatärea̧ ji̧, cjäri̧ madirȩ, japadërëreji̧ri̧dirȩ. Jabechi̧ judiro̧ Ütë tjamo̧ pio ju̧i̧iäpȩmo̧ ba chia jo̧rȩtaji̧ri̧rȩ cjo̧ro̧a̧ oaiä, uaparëreji̧ri̧dirȩ pio ju̧i̧iäpȩmo̧ chjai̧dëri̧ japapea̧ ji̧.

Pedro judi chjaparȩrëremȩdejȩ Enea quȩmȩ ju̧i̧.

³² Ado Pedro judi, jabechji̧ oëra̧ti̧ oa jämȩrȩ bë tai̧rëremȩde quëna̧ji̧ri̧ pio ji̧ri̧ goëdepea̧ oa. Ado ja̧di dari̧ japamȩrȩ Dida quȩmȩ bë ma̧ri̧ boi̧chji̧räpȩ quëna̧ji̧ri̧ pio ji̧ri̧bo goëdepea̧dejȩrȩ.

³³ Ado ju̧ri̧pȩ go̧düdärä ëte darëremȩdejȩ pumȩ oa, Enea quȩmȩ oa. Tai̧rea̧mi̧dëmȩ oa, ju aäpapea̧mȩ oa daea̧dejȩ, jibëa̧ tjae mo̧a̧rea̧ri pio judiri cjitërea̧mi̧dëmȩ oa. Ja̧di dari̧ cjo̧ro̧rëremȩde 8 ui nö̧ta.

³⁴ Ado Pedro judi yo̧a̧dejȩ: —Danȩ Enea, Jechu Quiricho pio judi chjaparȩdimȩ. Cjitëvä. Na̧ tjae mo̧a̧rea̧ pio ju̧i̧ jëdano̧ ëte mitëjo̧ȩ —yo̧a̧dejȩ. Ado Enea judi chjaodëri̧ cjitëno̧a̧de.

³⁵ Ado idëpȩ cjo̧ro̧ji̧ri̧ pio judiro̧ ütëborë pio ju̧i̧ daea̧ oaiä, chjaodëri̧ quëna̧ji̧ri̧pea̧diro̧jo̧ȩ Ano̧mȩ Jechu pio ju̧i̧iäpȩmo̧. Tjamo̧ davä. Dida quȩmȩ bë ma̧ri̧ boi̧chji̧räpȩ cjo̧ro̧ji̧ri̧ judiro̧, ado Charona quȩmȩ chiriräpȩ cjo̧ro̧ji̧ri̧ judiro̧ quëna̧ji̧ri̧pea̧dirȩ noi̧dërë.

Pedro judi chjaparȩrëremȩdejȩ Tabita quȩyi̧ ji̧.

³⁶ Ado cja̧rȩmȩrȩ cjo̧ro̧rëreyi̧nȩ Jope quȩmȩ bë ma̧ri̧räpȩ. Quëna̧yi̧rȩ cjo̧ro̧rëreyi̧nȩ Tabita quȩyi̧ pio jini̧. Ado jibëa̧ quȩ oa giriego ma̧ȩra̧ yo̧a̧ ji̧, Doca yo̧rëreji̧ri̧diro̧jȩ, 'böa' yo̧rea̧ ma̧ȩ quȩ oa. Ado Doca jini̧, jabechji̧ o ji̧ri̧iäpȩmo̧ ji̧dë ma a̧do chjaoyi̧rȩ cjo̧ro̧rëreyi̧nȩ. Cjäri̧ ja̧boji̧ri̧ pio ji̧ri̧ chjadëri̧ a̧do chjaorëreyi̧nȩjȩrȩ.

³⁷ Jabo Pedro judi jabë Dida quȩmȩräpȩ cjia̧ nö̧ta, gito ja̧boyi̧pea̧nȩ. Ado cjatäcjiarea̧ dadëa̧ oaiä chjaodëri̧ jaboeno̧a̧nȩ. Pio ju̧i̧iä judiro̧ japarërea̧mi̧ jëdano̧a̧diro̧jo̧ȩ jibëa̧ icjararemȩ oa na̧ra̧pea̧ oa. Joa̧diro̧jo̧ȩ. Ado joa ëte uëräpȩ cjiamȩ jo̧ tjoräpȩ ju̧ri̧ are a̧ra̧diro̧jȩ.

³⁸ Ado Joperäpȩ quëna̧ji̧ri̧ judiro̧, "Aja̧ Pedro judi Dida bë ma̧ri̧ boi̧chji̧räpȩde" yo̧a̧ oa ta̧rë oaiä, chjaodëri̧ chjadüa̧diro̧jo̧ȩ yo̧a̧ri pumȩ ji̧ri̧ ma̧ȩ yüre jäpea̧ oa. Jabechji̧ Jope quȩmȩ bë ma̧ri̧ üdë Dida quȩmȩ bë ma̧ri̧ boi̧chji̧ri pio judiri jachidë oaiä, jabechji̧ chjaodëri̧ chjadüa̧diro̧jȩrȩ. Ado Pedro pio ju̧i̧ daea̧ ji̧, pio jibë nö̧ta jo̧ȩra̧pe jätä yo̧a̧diro̧jo̧ȩ.

³⁹ Pio ju̧i̧ ta̧rëa̧ oaiä, chjaodëri̧ jäëno̧a̧de Pedro judi pio ji̧ri̧ nö̧ta. Ado ju̧ri̧pȩ go̧düdäräa̧mȩ oa ëba jäa̧diro̧jo̧ȩ jo̧ tjo uëräpȩ ju̧ri̧, ja̧boa̧yi̧ ja̧ icjararäpȩ ju̧ri̧. Ado ju̧ri̧pȩ a̧dopea̧ oa cjiarëreji̧ri̧ni̧rȩ oari chiarëreji̧ri̧ ivi jini̧ro̧. Ejaro cjiaji̧ri̧rȩ a̧dopea̧ oa cjiarëreji̧ri̧ni̧rȩ. Ado jini̧ro̧ Pedro pio ju̧i̧ daea̧ oaiä, chjaodëri̧ tjoro tänȩa̧ni̧ro̧jo̧ȩ. Ado Tabitarea̧ jini̧ pio jibëiäpȩmo̧ care yürüa̧rea̧ chjiboremȩ pio ju̧i̧ chjaodëri̧ goë na̧rȩa̧ni̧ro̧jo̧ȩ, gito ana̧ri̧ jo̧rȩtaji̧ri̧rȩ.

⁴⁰ Jabo Pedro judi pio jiro ivi ütëbo oa dairäpȩ go̧dü tänȩa̧ duri oa, ju chatura̧ cjiamȩrȩ ni̧bäa̧dejȩ Ütë tjamo̧ ju̧i̧. Ado ni̧bäa̧ duri oa, icjara pio ju̧i̧iäpȩmo̧ gatë damȩrȩ yo̧a̧dejȩ: —Tabita. Cjitëvä. Ado chjaodëri̧ are ië daea̧nȩ jibëa̧ dacho oa. Ado Pedro pio ju̧i̧ dayi̧rȩ chayi̧pea̧nȩ.

⁴¹ Ado Pedro judi jibëa̧ ichira̧ chjadëri̧ a̧doa̧dejȩ cjitëpea̧ ji̧. Ja̧dëa ji̧ ado chjereno̧ yu̧a̧pea̧ oa ëna̧diäa̧dejȩrȩ quëna̧ji̧ri̧ pio ji̧ri̧, oari chiarëreji̧ri̧ ivi pio ji̧ri̧bo. Ado yu̧a̧ji̧ri̧ oa na̧rȩa̧dejȩrȩ bëdüa̧yi̧ pio ji̧.

⁴² Ado jini̧ bëdüa̧ pio ju̧i̧ chjiari ma̧ȩ üdë chjaodëri̧ chjäteno̧rëremȩde Jope quȩmȩ bë ma̧ri̧räpȩ yuro. Ado pio ju̧i̧iä no̧i̧dërë quëna̧ji̧ri̧pea̧diro̧jo̧ȩ Ano̧mȩ Jechu pio ju̧i̧iäpȩmo̧.

⁴³ Ado Pedro judi, jabechji̧ do ji̧rari̧ cjiadiärëremȩde Jope quȩmȩ bë ma̧ri̧räpȩ ju̧ri̧. Chimo̧ quȩmȩ pio ju̧i̧ nö̧ta, ira̧ ja̧bepamȩ pio ju̧i̧ nö̧ta cjiadiärëremȩde.