Japarea̧ 8 - Biblia Pume

^1-2 Ado Chauro judi ja̧boa̧mȩ oa daea̧rä, Eteba quȩmȩrea̧ pio ju̧i̧ irä daea̧rä, 'chja jabechji̧ ja̧boa̧dida, chjadëri̧ ja̧bo tänȩa̧diro̧ju̧i̧da' quëna̧ jo̧rȩtamȩrȩ darëremȩdejȩ. Ado Ütë tjamo̧ ju̧i̧ chjacjiamȩri̧ jo̧rȩtaji̧ri̧ pio judiro̧ orë na̧ra̧diro̧jo̧ȩ Etebarea̧ ju̧i̧. Gito ana̧ri̧ jo̧rȩtaji̧ri̧rȩ na̧ra̧diro̧jo̧ȩ, ana̧ri̧ ejaro cjiaji̧ri̧rȩ. Ado pio jiro domȩ ju̧i̧iä, Eteba pio ju̧i̧ ja̧bo tänȩa̧ domȩ ju̧i̧iä, Jeruchara̧räpȩ a̧doparea̧ pio ju̧i̧ conȩdapea̧ ji̧ taruparëreji̧ri̧dirȩ quëna̧dëji̧ri̧ pio judiro̧. Ma̧i̧ dari̧ conȩdapea̧ ji̧ taruparëreji̧ri̧dirȩ. Ado pio ju̧i̧iä oëra̧ti̧ oa chjuchjupechärëreji̧ri̧dirȩ quëna̧ji̧ri̧ judiro̧. Tjamo̧ davä. Judea quȩmȩ chiriräpȩmo̧, Chamaria quȩmȩ chiriräpȩmo̧ chjuchjupechärëreji̧ri̧dirȩ oëra̧ti̧ oa. Jechurë chjadüa̧ pio judiro̧mo̧rȩ cjiadiärëreji̧ri̧dirȩ Jerucharȩräpȩ.

Chauro judi ma̧i̧ dari̧ conȩdae chjaorëremȩdejȩ Quiricho ja̧ a̧doparea̧ pio ji̧

³ Ado Chauro judi jaboti̧ri̧ japamȩpea̧de. Jabechji̧ järi tjamo̧pea̧de quëna̧ji̧ri̧ pio ji̧ri̧ cho̧rë jä chjaopea̧ ji̧. Jo̧ nö̧ta oa acji yu̧a̧rëremȩde davä quëna̧ji̧ri̧ pio ji̧ri̧ mitëpea̧ oa, pio ji̧ri̧ coë a̧rȩriäri̧ mu̧i̧ go̧düpea̧ oa, chaärea̧ bëräpȩ tutipea̧ oa. Aja̧, ja̧di dari̧ japamȩrȩ japarëremȩdejȩrȩ, ivi pio ji̧ri̧bo. Jabechji̧ quëna̧ji̧ri̧ pio ji̧ri̧ tjamo̧ri̧ goarijä tänȩtämi̧ cjiamȩrȩ ma̧i̧ dari̧ conȩdae chjaorëremȩdejȩrȩ.

Felipe judi ma̧ȩ chjadëi̧ pio ju̧i̧ a̧ra̧ano̧rëremȩde Chamaria quȩmȩräpȩ

⁴ Ado quëna̧ji̧ri̧ pio judiro̧ ma̧i̧ dari̧ conȩda̧ oa cjia̧ oaiä, oëra̧ti̧ oa chjuchupechärëreji̧ri̧dirȩ Jechu pio ju̧i̧ chjiari ma̧ȩ oa a̧ra̧ano̧riä baäji̧ri̧rȩ.

⁵ Ado cja̧rȩmȩrȩ, Felipe quȩmȩ pio judi, Chamaria quȩmȩ chiriräpȩ cjiamȩ bë ma̧ri̧räpȩ go̧düdärä ëte a̧ra̧ano̧rëremȩdejȩrȩ Ütërë mitëa̧ Chjätä Tänȩmȩ pio ju̧i̧ chjiari.

⁶ Ado pumȩ no̧i̧dërë Felipe ju̧i̧ jauëchja cjiari̧ japamȩ oa daea̧ oaiä, jabechji̧ ütëborë ta̧rë ja̧boji̧ri̧rȩ ta̧rëtämi̧ cjiarëreji̧ri̧diro̧jo̧ȩ a̧ra̧ano̧mȩ oa.

⁷ Ado Felipe judi yaröcarë boa̧ pio ji̧ri̧ peaja̧di no̧i̧dë oa chjaparȩrëremȩdejȩrȩ. Ado judiro̧ a̧dë go̧düa̧ ji̧, ma̧i̧ dari̧ a a ma cjiari̧ ëna̧ quira̧ti̧ cjiaji̧ri̧rȩ go̧dürëreji̧ri̧dirȩ. Ado jibëa̧ tara̧ tai̧rea̧mi̧dëji̧ri̧ pio ji̧ri̧ chjadëri̧ chjaparȩrëremȩdejȩrȩ peaja̧di. Ado o ji̧ri̧, chjadëri̧ tai̧dëji̧ri̧ pio ji̧ri̧bo chjaparȩrëremȩdejȩrȩ chjadëri̧ tai̧rea̧mi̧ dari̧.

⁸ Pio ju̧i̧iä pio jiro bë ma̧ri̧räpȩ cjo̧ro̧ji̧ri̧ pio judiro̧ a̧dë chjäte ma̧ chiadëri̧ cjiaji̧ri̧pea̧dirȩ.

⁹ Jabo pio ju̧ri̧pȩ cja̧rȩmȩrȩ cjo̧ro̧rëremȩde Chimo̧ quȩmȩ pio judi. To̧je go̧a̧mȩ jauëchjamȩrȩ cjo̧ro̧rëremȩde, pumȩ ji̧ri̧ u̧i̧pe chjaomȩrȩ. Jabechji̧ jënȩ daba̧ jauëchjara̧ pio ju̧ri̧ra̧ peadëri ja̧ na̧rȩriärëremȩdejȩrȩ Chamariaräpȩ cjo̧ro̧ji̧ri̧ pio ji̧ri̧. Ado judi ja̧di dari̧ japea̧ oaiä, jabechji̧ ana̧ri̧ jo̧rȩtarëreji̧ri̧dirȩ. '¿Jabo yö̧ta dari̧ japacjivadi? japarea̧mi̧dë pio ju̧i̧ japamȩdida' quëna̧ jo̧rȩtaji̧ri̧rȩ darëreji̧ri̧diro̧jo̧ȩ, dacho bëremi̧ cjiaji̧ri̧rȩ. Ado Chimo̧ judi pio jȩa chjiari cjapiri̧ cjiadëmȩrȩ ji̧dë ma goaeri̧ ni̧bärëremȩde, ja̧di ta̧rëri̧ yo̧mȩrȩ: "Aja̧, Pumȩ jauëchjarequede, pumȩ ba chia tjamo̧requede" yo̧mȩrȩ yo̧ chjaorëremȩde.

¹⁰ Pio ju̧i̧iä Chamariaräpȩ cjo̧ro̧ji̧ri̧ pio judiro̧ ütëbodärärë ba chia da marëreji̧ri̧diro̧jo̧ȩ. Tjamo̧ davä. Tjamo̧ cjo̧ro̧ji̧ri̧ pio judiro̧, ado tjamo̧ cjo̧ro̧dëji̧ri̧ pio judiro̧borë ba chia da marëreji̧ri̧diro̧jo̧ȩ. Jabechji̧ judi eami̧ oa ni̧bä chjaoa̧ ji̧, a̧dë jo̧rȩtarea̧ decjiari̧ ta̧rë ja̧bo marëreji̧ri̧diro̧jo̧ȩ. 'Jabechji̧ jauëchja cjiari̧ japadida, Ütë tjamo̧ pio judi ju chiarea̧ yürüa̧ oaiä japarea̧ chia jirodida, pumȩ ba chia tjamo̧dida' quëna̧ jo̧rȩtaji̧ri̧rȩ ana̧ri̧ ni̧bä chjaorëreji̧ri̧dirȩ pio ju̧i̧ chjiari.

¹¹ Jabechji̧ Chimo̧ judi peadëri ja̧ pumȩ ji̧ri̧ jauëchja cjiari̧ na̧rȩ chjaoa̧ oaiä, japamitë ana̧ri̧ u̧i̧pea̧ oaiä, pumȩ ji̧ri̧ ana̧ri̧ jo̧rȩta tänȩa̧ oaiä, jabechji̧ ta̧rë ja̧bo marëreji̧ri̧diro̧jo̧ȩ.

¹² Jabo Felipe judi pio ju̧ri̧pȩ a̧ra̧ano̧rërea̧ ji̧, Ütë tjamo̧ ja̧ ma̧ȩ oa a̧ra̧ano̧rërea̧ ji̧, no̧i̧dërë quëna̧ji̧ri̧pea̧dirȩ. Tjamo̧ davä. Judi Ütërë yo̧a̧ chja̧oerä yu̧a̧pea̧ pio ju̧i̧ chjiari a̧ra̧ano̧a̧ ji̧, ado 'Jechu judi Chjätä Tänȩmȩ pio judidida' quëna̧pea̧ pio ju̧i̧ chjiari ma̧ȩ chjadëi̧ oa a̧ra̧ano̧a̧ ji̧, jabechji̧ no̧i̧dë tjamo̧rȩ quëna̧ji̧ri̧pea̧dirȩ. Ado chjaodëri̧ uirä go̧e cjaeä chuda̧ oa cjiadiärëreji̧ri̧dirȩ ütëborë, iviborë.

¹³ Ado Chimo̧ pio judiborë quëna̧mȩpea̧de. Ado uirä chuda̧ ëte, Felipe pio ju̧i̧ nö̧ta ëba tai̧mȩpea̧de. Ado Felipe judi jauëchja cjiari̧ jape chjaomȩ oa daea̧ oaiä, ana̧ri̧ jo̧rȩtamȩpea̧de Chimo̧ judi. Dacho bëremi̧ cjiamȩrȩ cjoai̧tä darëremȩdejȩ.

¹⁴ Ado Jechurë chjadüa̧ pio judiro̧, Jerucharȩräpȩ cjiadiäa̧ji̧ri̧ pio judiro̧ Chamariaräpȩ cjo̧ro̧ji̧ri̧ pio ji̧ri̧ chjiari ta̧rëa̧ oaiä, “Aja̧, pio judiro̧borë Ütë tjamo̧ ja̧ ma̧ȩ oa quëna̧ji̧ri̧pea̧dirȩ” yo̧a̧ oa ta̧rëa̧ oaiä, jabechji̧ Pedro pio ju̧i̧ chjadürëreji̧ri̧diro̧jo̧ȩ, Juan pio ju̧i̧bo. Aja̧, pea quëna̧ji̧ri̧pea̧ pio ji̧ri̧ jäe dapea̧ oa chjadüa̧diro̧jȩrȩ Jechurë chjadüa̧ judiro̧ orë.

¹⁵ Ado judiro̧ pio ju̧ri̧pȩ go̧düdärä ëte, pea quëna̧ji̧ri̧ pio ji̧ri̧ chjiari goë cjo̧dërëreji̧ri̧dirȩ Ütë tjamo̧ pio ju̧i̧iä. Tjo tjamo̧ judi jibëa̧ icjararä bëpera̧tä eaji̧ri̧rȩ goë cjo̧dëa̧dirȩ.

¹⁶ Jabechji̧ Tjo tjamo̧ judi pio ji̧ri̧ ja̧ icjararä jabë bëpadëa̧ pio ju̧i̧iä, ja̧di ta̧rëri̧ goë cjo̧dëa̧dirȩ. Jabechji̧ judiro̧ uirä go̧e cjaeä chuda̧ oa cjia̧räbo, judiro̧ Jechu Quiricho pio ju̧i̧ ja̧ quȩ oaiä go̧e cjaeä chuda̧ oa cjia̧räbo, jabë Tjo tjamo̧ra̧ pio ju̧ri̧ra̧ jabë go̧e cjaeä chuda̧ oa cjiadërëreji̧ri̧dirȩ.

¹⁷ Ja̧dëa ji̧ Pedro judi, Juan judi jibëa̧ ichira̧ ida̧rä, chjaodëri̧ bëpea̧de Tjo tjamo̧ judi pio ji̧ri̧ ja̧ icjararä.

¹⁸ Ado Chimo̧ judi Jechurë chjadüa̧ judiro̧ japea̧ pio ju̧i̧ irä daea̧ ji̧, judiro̧ pea quëna̧ji̧ri̧ pio ji̧ri̧ ida̧ oaiä Tjo tjamo̧ pio ju̧i̧ chiaji̧ri̧pea̧ oaiä, jabechji̧ chëre oa yürütarëremȩdejȩrȩ pio judiborë ja̧di dari̧ japarea̧ dapea̧ oa.

¹⁹ Ja̧di ta̧rëri̧ yo̧mȩrȩ yo̧tarëremȩdejȩrȩ: —Danȩrȩ, pio coaiäpȩmo̧bo yürüchji̧coe cüdë peaja̧di dari̧ japarea̧ dapea̧ oa. Jabechji̧ pio jiro jauëchja oa ea tjamo̧requede peaja̧di. Cüdë eami̧ pumȩ oa ca̧ ichira̧ idarä, peaja̧di bëpatäremȩdejȩ Tjo tjamo̧ judi. Aja̧, pio ju̧i̧ japarea̧ chjadëri̧ yürütä earequededibe —yo̧tea̧dejȩrȩ.

²⁰ Jabo Pedro judi dëbë yo̧mȩrȩ yo̧a̧dejȩ: —Cjäri̧ marenȩ. Cjüëtü tjamo̧räpȩ aeno̧a̧ oa cjiatänȩ, na̧ chërebo —dëbë yo̧a̧dejȩ—. Ma̧i̧ dari̧ jo̧rȩtarenȩ. Danȩ, Ütë tjamo̧ judi pio judirimȩ marë yürüdejȩ Tjo tjamo̧ ju̧i̧. Badëri̧ yürüdejȩ. Chërera̧ pio ju̧ri̧ra̧ gatërea̧mi̧dëde. A̧dë chjäte oëra̧ jo̧rȩtarenȩ.

²¹ Pio ju̧i̧iä pio ibë nö̧ta ja̧beparea̧mi̧dërenȩ. Jabechji̧ coëma cjiari̧ jo̧rȩtadëmȩ oa cjacjarë daba dadimȩ Ütë tjamo̧ judi.

²² Ja̧di tara yo̧requedemȩ. Ano̧ mire jo̧rȩtavä. Mȩnȩ chjai̧dëri̧ jo̧rȩta̧ pio ju̧i̧ chjiari goë cjo̧dëvä Ütë tjamo̧ pio ju̧i̧iä mȩnȩ duridëparȩa̧ oa cjiapea̧ oa. Ado Ütë tjamo̧ judi duridëparȩrea̧ tararä judi, dëdë duridëparȩpai̧ dadimȩ. Pio ju̧i̧iä cjo̧dëjo̧ȩ.

²³ Jabechji̧ dabarequede pio mȩa chjiari. Pio ibëiäpȩmo̧ quëbamȩrȩ darenȩibe. Chai̧dëra̧ pio ju̧ri̧ra̧ tabüa̧ oa cjiami̧ dari̧ cjiarenȩ. Jabechji̧ chjai̧dë ja̧ mu̧i̧tjoi̧renȩ. Pio ju̧i̧iä cjo̧dëjo̧ȩ —yo̧mȩrȩ to̧bari̧ yo̧rëremȩdejȩ Pedro judi.

²⁴ Ado Chimo̧ judi pio ju̧i̧ ta̧rëa̧ oaiä, ja̧di ta̧rëri̧ dëbë yo̧rëremȩdejȩrȩ: —Cjäri̧ri̧ cjia dachji̧coe. Jabechji̧ Ano̧mȩ pio ju̧i̧iä goë cjo̧dëchji̧vä pio coa chjiari. Jabechji̧ mȩnȩro̧ yo̧a̧ pio judi pio coaiäpȩmo̧ acji cjatächea oa, goë cjo̧dëchji̧vä —yo̧a̧dejȩrȩ.

²⁵ Ado Jechurë chjadüa̧ pio judiro̧ Chimo̧ pio ju̧i̧ nö̧ta ni̧bäa̧ duri oa, jabechji̧ ni̧bä chjaorëreji̧ri̧diro̧jȩrȩ quëna̧ji̧ri̧ pio ji̧ri̧iäpȩmo̧. Aja̧, jënȩro̧ Jechu pio ju̧i̧ chjiari quëna̧ pio ju̧i̧ ni̧bä chjaoa̧diro̧jȩrȩ, Ano̧mȩ ja̧ ma̧ȩ pio ju̧i̧bo. Ado ja̧di dari̧ japa ëte, ado chjereno̧ baärëreji̧ri̧dirȩ Jerucharȩräpȩ. Jabo jaerira̧ baäa̧dirȩ jëreeadëji̧ri̧rȩ. Jabechji̧ bë ma̧ri̧ ji̧ra̧räpȩ chjätäji̧ri̧rȩ ma̧ȩ chjadëi̧ pio ju̧i̧ a̧ra̧ano̧riä baärëreji̧ri̧dirȩ Chamariaräpȩ cjo̧ro̧ji̧ri̧ pio ji̧ri̧.

Felipe judi a̧ra̧ano̧rëremȩdejȩ Etiopia quȩmȩ chiririmȩ ju̧i̧

²⁶ Ado cjaremo̧ doremȩrä a̧dërimȩ mu̧i̧tjoi̧ pio judi ma̧ȩ yürera̧rëremȩdejȩ Felipe ju̧i̧. Ja̧di ta̧rëri̧ yo̧mȩrȩ yo̧a̧dejȩ: —Na̧ea̧ oa jëdano̧vä tai̧pea̧ oa —yo̧a̧dejȩ—. Gacha quȩmȩräpȩmo̧ baämȩ no̧räpȩ jävä. Ado Jerucharȩ pio judiri baämȩ no̧ oa daemȩrenȩjo̧ȩ. Pio ju̧i̧ mitëvä chiri maearäpȩ baämȩ no̧ oa —yo̧a̧dejȩ.

²⁷ Ado pio ju̧i̧ ta̧rëa̧ oaiä, Felipe judi jëdano̧ ëte järëremȩde. Ado no̧räpȩ tai̧mȩrȩ chjaodëri̧ daea̧dejȩ yai charara̧ baämȩ ju̧i̧. Ado pio jiro pumȩ judi, jabechji̧ tjamo̧ yo̧mȩrȩ cjo̧ro̧rëremȩde Etiopia quȩmȩ chiriräpȩ. Etiopia quȩmȩ chiri ütëyi̧ pio ji̧ ja̧ chëre oa tjamo̧ boeamȩrȩ ja̧beparëremȩde. Ado pio jiro pumȩ pio judi järëremȩde Jerucharȩräpȩ Ütë tjamo̧ pio ju̧i̧iäpȩmo̧ chjacjiamȩri̧ jo̧rȩtapea̧ oa.

²⁸ Ado pio judiri cuchupë baämȩ oa, jibëa̧ bëräpȩ baämȩ oa darëremȩdejȩ Felipe judi, jibëa̧ yai chararä uë chamȩ oa. Aja̧, go̧ȩ ni̧bämȩ oa daea̧dejȩ. Ütërë ea jana̧ chjadüa̧ oa ni̧bämȩ judi go̧ȩpea̧ duri pio ju̧i̧ go̧ȩ ni̧bämȩ oa daea̧dejȩ, Ichaia pio judi go̧ȩparërea̧ duri pio ju̧i̧.

²⁹ Ado Tjo tjamo̧ judi Felipe pio ju̧i̧ yo̧a̧dejȩ: —Jäeno̧vä. Yai chararäpȩ jäeno̧vä. Chara yuroropȩ jävä.

³⁰ Ado pio ju̧i̧iä Felipe judi jäeno̧a̧de yai chararäpȩ. Ado yai chara yuroro tai̧mȩrȩ ta̧rëa̧dejȩ pumȩ ju̧i̧ Ütë tjamo̧ ja̧ ma̧ȩ oa go̧ȩ ni̧bämȩ oa. Ichaia judi go̧ȩparërea̧ duri pio ju̧i̧ go̧ȩ ni̧bämȩ oa ta̧rëa̧dejȩ. Ado pio ju̧i̧iä Felipe judi iëno̧ë ta̧rëa̧dejȩ: —¿Bapë go̧ȩ ni̧bädënȩ? ¿Chjaodëri̧ dabaparea̧mi̧ dari̧ go̧ȩ ni̧bädënȩ? —iëno̧ë ta̧rëa̧dejȩ.

³¹ Jabo tjamo̧ yo̧mȩ judi dëbë yo̧a̧dejȩ: —Cjäri̧ marequede, chjadëri̧ dabadëreconȩ. Jabechji̧ pio coa chjadëri̧ a̧domȩ pio ju̧i̧ dadëa̧ oaiä, '¿tjana̧ yo̧cjivadi?' quëna̧ jo̧rȩtamȩrȩ go̧ȩ ni̧bäreconȩ ma̧ȩ oa. Ado ja̧di ta̧rëri̧ yo̧ ëte, pio jȩa nö̧ta ëba chapea̧ oa buatä yo̧a̧dejȩ Felipe ju̧i̧. Pio ju̧i̧iä Felipe judi bua ëte ëba charëremȩdejȩ.

³² Ado tjamo̧ yo̧mȩ judi jiro ma̧ȩ oa go̧ȩ ni̧bärëremȩde ja̧di ta̧rëri̧ go̧ȩ ni̧bämȩrȩ: “Oveja oa ja̧bo tänȩrea̧räpȩ mu̧i̧ jämi̧ dari̧ japea̧diro̧jo̧ȩ. Ado oveja boi̧ üdë jibëa̧ cö̧ oa täarä cjapiri̧ cjiami̧ dari̧ cjiadiäremȩde peaja̧di.

³³ Ado idëri̧ cjia tjamo̧ tänȩa̧diro̧jo̧ȩ ma̧i̧ dari̧ ya̧ea̧ oaiä. Ado cja̧rȩmȩrȩ goë tuti ni̧bätärea̧ ji̧, cja̧rȩmȩ co chjai̧dëri̧ japadëmȩ pio ju̧i̧ chjiari goë tuti ni̧bätärea̧ ji̧, pio ju̧i̧ chjiari coëma cjiari̧ ütarë datärea̧ ji̧, cjäri̧ madiro̧jo̧ȩ, chjai̧dëri̧ japamȩmi̧ da oa daea̧diro̧jo̧ȩ, a̧dë chjäte ma̧i̧ dari̧ japaji̧ri̧rȩ. Ado pio judiri ja̧ji̧ri̧ pio ji̧ri̧ chjiari ni̧bärea̧mi̧dëde. Jabechji̧ jiro decjiade. Pio ju̧i̧ jabërä ja̧bo tänȩa̧ oaiä, jabechji̧ jibëa̧ bo oa nö̧rirea̧ dadëa̧de." Aja̧, ja̧di ta̧rëri̧ go̧ȩ ni̧bärëremȩde üi̧ üdë.

³⁴ Ado go̧ȩ ni̧bädäräa̧rä, Etiopiarimȩ pio judi iëno̧ë ta̧rëa̧dejȩ Felipe ju̧i̧: —¿Chjia ju̧i̧ chjiari go̧ȩparëremȩde Ichaia judi? ¿Chjia ju̧i̧ chjiari ma̧ȩde pio yodë ma̧ȩ üdë? ¿Pio jȩa chjiari go̧ȩparëremȩde? Chjadëri̧ yo̧coe —yo̧a̧dejȩ.

³⁵ Pio ju̧i̧ ta̧rëa̧ oaiä, Felipe judi taruparëremȩde a̧ra̧ano̧pea̧ ji̧. Ichaia judi go̧ȩparërea̧ ma̧ȩra̧ pio ju̧ri̧ra̧ tarupamȩrȩ a̧ra̧ano̧mȩpea̧dejȩ. Jachi tjamo̧ oa jämȩrȩ japami̧ dari̧ ütara̧mi̧ carupë a̧ra̧ano̧rëremȩdejȩ Jechu pio ju̧i̧ chjiari ma̧ȩ chjadëi̧ pio ju̧i̧.

³⁶ Ado japamitë chjätä ëte, charara̧ jäji̧ri̧rȩ tja boi̧chji̧ oa dae chjätärëreji̧ri̧diro̧jo̧ȩ. Ado Etiopiarimȩ judi pio ju̧i̧ daea̧ oaiä, yo̧a̧dejȩ Felipe ju̧i̧: —Danȩ, pio ju̧ri̧pȩde ui üdë. Jabechji̧, ¿chjadëdëtäremȩde mȩnȩ coa uirä go̧e cjaeä chudarä judi?

³⁷ Ado Felipe judi dëbë yo̧a̧dejȩ: —Danȩ, mȩnȩ na̧ chji̧ra̧ tjamo̧ri̧ quëna̧mȩpea̧rä judi, dëdë, go̧e cjaeä chudaparequedemȩ. Ado Etiopiarimȩ judi dëbë yo̧a̧dejȩ: Aja̧, quëna̧mȩpea̧requede. Jechu Quiricho pio ju̧i̧ chjiari coëma cjiari̧ quëna̧mȩpea̧requede. 'Aja̧, Jechu Quiricho judi, Ütë tjamo̧ pio ju̧i̧ ja̧ Jadida' quëna̧ dabamȩpea̧requede.

³⁸ Ado pio ju̧i̧ yo̧mȩrȩ tjamo̧ yo̧mȩ pio judi chjaodëri̧ yo̧a̧dejȩ jibëa̧ mu̧i̧tjoi̧ oa yae chara oa cjiadiä tänȩtä. Ja̧dëa ji̧ yo̧a̧ri̧borë yae charari pio judiri bira̧dirȩ uiräpȩ jäpea̧ oa. Ado tjaräpȩ yu̧a̧ ji̧, Felipe judi go̧e cjaeä chuda̧dejȩ tjamo̧ yo̧mȩ ju̧i̧.

³⁹ Ado uiri pio judiri go̧düa̧ ji̧, chjaodëri̧ a̧dë cjarapea̧dejȩ Felipe judi. Ano̧mȩ ja̧ Tjo pio judi japea̧ oaiä, chjaodëri̧ a̧dë cjarapea̧dejȩ. Ado Etiopiarimȩ judi Felipe pio ju̧i̧ datärea̧ ji̧, jabechji̧ ado judiri dadëpea̧dejȩ, jabo pio ju̧i̧ dadëa̧räbo, jabechji̧ a̧dë chjäte ma̧ chiadëri cjiamȩrȩ baärëremȩde jibëa̧ chiriräpȩ yuro.

⁴⁰ Ado Felipe judi Etiopiarimȩ pio ju̧i̧ nö̧ta cjiarërea̧ ji̧, chjaodëri̧ ano̧ mire cjiamȩpea̧de ado cja̧rȩmo̧räpȩ. Aja̧, Achota quȩmȩräpȩ ano̧ mire cjiamȩpea̧de. Ado pio judiri baämȩrȩ baäa̧de Checharearäpȩmo̧. Ado baäa̧ nö̧ta, bë ma̧ri̧ nö̧tai̧ oa a̧ra̧ano̧riä baärëremȩde ma̧ȩ chjadëi̧ pio ju̧i̧.