Japarea̧ 7 - Biblia Pume

Eteba judi ana̧ri̧ ni̧bä chjaorëremȩdejȩrȩ tjamo̧ ütarë yo̧ji̧ri̧ judio pio ji̧ri̧

¹ Ja̧dëa ji̧ o ji̧ri̧ chjiari tjamo̧ goë tuti ja̧bepamȩ pio judi iëno̧ë ta̧rërëremȩdejȩ Eteba ju̧i̧: —¿Tjamo̧ri̧ yo̧dirȩ pio yodëro̧je pio mȩa chjiari?

² Ado Eteba judi ma̧ȩ go̧a̧ti̧ tjamo̧ra̧ pio ju̧ri̧ra̧ dëbë yo̧mȩrȩ ni̧bä chjaorëremȩdejȩrȩ ütëbo oa, ja̧di ta̧rëri̧ yo̧mȩrȩ: —Danȩrȩ ca̧ oti̧, chjadëri̧ ta̧rëchji̧coe. Ibëa̧ tarurea̧ judi, Abaraa̧ pio judi Mechopotamia quȩmȩräpȩ jabë cjo̧ro̧rëremȩ oa, Ütë tjamo̧ judi, a̧dë chjäte tatari̧ cjiamȩ Ütë pio judi idëpea̧dejȩ —yo̧a̧dejȩrȩ—. Ara̧ quȩmȩräpȩ jabë baädëmȩ oa idëpea̧dejȩ ma̧ȩ yürüpea̧ oa.

³ Ado ja̧di ta̧rëri̧ yo̧mȩrȩ yo̧rëremȩdejȩ: —Jabechji̧ a̧dë baäjȩrȩ na̧ pumȩ ji̧ri̧ —yo̧a̧dejȩ—. Ado na̧ chiri oa a̧dë baäjo̧ȩ peaja̧di. Jabechji̧ cüdë mȩa na̧rȩpea̧ chiriräpȩ baätä earequedemȩ —yo̧a̧dejȩ.

⁴ Ado Abaraa̧ judi pio jiro ma̧ȩ oa ta̧rëa̧ oaiä, jabechji̧ baärëremȩde, ibëa̧ tarurea̧ pio judi. Aja̧, Cadea quȩmȩ bë ma̧ri̧ri pio judiri go̧dümȩrȩ go̧dürëremȩde Ara̧ quȩmȩräpȩ baäpea̧ oa, pio ju̧ri̧pȩ ano̧ mire cjo̧ro̧pea̧ oa. Ado Abaraa̧ judi pio juri̧pȩ cjo̧ro̧a̧ nö̧ta, a̧dë ja̧borëremȩdejȩ jibëa̧ ama̧i̧ judi, jȩa nö̧rimȩ pio judi. Ado judi ja̧boa̧ duri oa, pio yoa chiriräpȩmo̧ ma̧na̧na̧ra̧rëremȩde —yo̧a̧dejȩrȩ—. Tjamo̧ davä. Ütë tjamo̧ judi tänȩa̧ oa, pio yoa chiriräpȩmo̧ ma̧na̧na̧ra̧de, mȩnȩro̧ cjo̧ro̧mȩ chiri pio yoaje.

⁵ Jabo pio jiro japamitërä Ütë tjamo̧ judi pio jiro chiri oa jabë yürüdëa̧dejȩ. Jibëa̧pe bagapea̧ oa jabë yürüdëa̧dejȩ. Cja̧rȩmȩ chiri cotoi̧ oa, jabëtari̧mi̧ oa jabë yürüdëa̧dejȩ. Jabomo̧ ma̧ȩ yürë cji̧dämȩrȩ yo̧rëremȩdejȩ, ja̧di ta̧rëri̧ yo̧mȩrȩ: "Aja̧, yürüparequedemȩ pio yoa chiri oa" yo̧a̧dejȩ. "Na̧ea̧ri ja̧ji̧ri̧ pio ji̧ri̧bo yürüparequedejȩrȩ. Pio yoa chiri üdë, jabechji̧ na̧ea̧pade. Ado na̧ea̧ri ja̧ji̧ri̧ pio ji̧ri̧ ja̧bopade" yo̧mȩrȩ yo̧ë cji̧därëremȩdejȩ Abaraa̧ ju̧i̧ Ütë tjamo̧ judi, jabë bo decjiarëremȩ oa.

⁶ Ado Ütë tjamo̧ judi ji̧dë u̧i̧ yo̧mȩrȩ ja̧di ta̧rëri̧ a̧de yo̧rëremȩdejȩ Abaraa̧ ju̧i̧: "Danȩ, na̧ea̧ri ja̧ji̧ri̧ judiro̧ jabomo̧ cjo̧ro̧e jäji̧ri̧mi̧ dari̧ cjo̧ro̧padirȩ tjaoë ja̧ chiriräpȩ ju̧ri̧" yo̧a̧dejȩ. "Ado pio idëpȩ cjo̧ro̧ji̧ri̧ pio judiro̧ tänȩa̧ oa, mu̧i̧tjoi̧ maearë cjo̧ro̧padirȩ. Pio judiro̧ tänȩa̧ oa, conȩda̧ oa cjo̧ro̧padirȩ 400 ui nö̧ta.

⁷ Jabo danȩ, pio jiro pumȩ ji̧ri̧ ana̧ri̧ bape chjaoparequedejȩrȩ jabo. Tjamo̧ davä. Na̧ea̧ri ja̧ji̧ri̧ pio ji̧ri̧ mu̧i̧tjoi̧parȩa̧ ba oa, ana̧ri̧ bape chjaoparequedejȩrȩ. Ado ja̧di dari̧ japea̧ duri oa, jabechji̧ Ejito chiriri pio judiri chjadëri̧ go̧dü tänȩparequedejȩrȩ. Tjamo̧ davä. Pio yoa chiri oa chjadëri̧ ano̧ mire cjo̧ro̧pea̧ oa, na̧ea̧ri ja̧ji̧ri̧ pio judiro̧ yoa chirirä pio coaiäpȩmo̧ chjacjiamȩri̧ jo̧rȩtariä cjo̧ro̧pea̧ oa, go̧dü tänȩparequedejȩrȩ" yo̧mȩrȩ yo̧rëremȩdejȩ Abaraa̧ pio ju̧i̧iäpȩmo̧ Ütë tjamo̧ judi —yo̧rëremȩdejȩrȩ judio tjamo̧ yo̧ji̧ri̧ pio ji̧ri̧iäpȩmo̧ Eteba judi.

⁸ —Ado danȩrȩ, Ütë tjamo̧ judi Abaraa̧ pio ju̧i̧ no̧mȩ ma̧ȩ yürë cji̧därërea̧ ji̧, na̧rȩrea̧ yürürëremȩdejȩ —yo̧a̧dejȩrȩ Eteba judi—. Budotä yo̧a̧dejȩ oari bori̧ pio ji̧ri̧. Ja̧di tara Abaraa̧ judi Icha pio ju̧i̧ nö̧rirërea̧ ji̧, jabechji̧ 8 do chjätä ëte budorëremȩdejȩ. Ado Icha judi ütëpa ëte, peaja̧di dari̧ japarëremȩdejȩ Jacobo boi̧ pio ju̧i̧. Ado Jacobo judi oari bori̧ ji̧ri̧ nö̧rirërea̧ ji̧, peaja̧di dari̧ japarëremȩdejȩrȩ ütëbo oa. Budoa̧dejȩrȩ icharaita ja̧ tarupaji̧ri̧ pio ji̧ri̧. Aja̧, 12 oa budoa̧dejȩrȩ bori̧rëreji̧ri̧ oa. Jabechji̧ Ütë tjamo̧ judi Abaraa̧ pio ju̧i̧iäpȩmo̧ jabërä yürë cji̧därërea̧ ma̧ȩ üdë pio ji̧ri̧ ja̧bo tara, jabechji̧ ja̧di dari̧ japamȩrȩ budo marëremȩdejȩrȩ oari bori̧ pio ji̧ri̧ —yo̧a̧dejȩrȩ.

⁹ —Ado danȩrȩ, Jacobo judi budorërea̧ taru pio judiro̧ ütëpa ëte, ma̧i̧ dari̧ japarëreji̧ri̧diro̧jo̧ȩ jibëa̧ ayi̧ma̧i̧ oa, Joche quȩmȩ pio ju̧i̧ —yo̧a̧dejȩrȩ Eteba judi. Aja̧, quëbaji̧ri̧rȩ darëreji̧ri̧diro̧jo̧ȩ. Ado pio ju̧i̧iä gatë tänȩa̧diro̧jo̧ȩ. Tjamo̧ davä. Ejitoräpȩ ju̧ri̧ mu̧i̧tjoi̧mȩrȩ cjo̧ro̧pea̧ oa gatë tänȩa̧diro̧jo̧ȩ. Jabo Ütë tjamo̧ judi a̧dë jo̧rȩtadërëremȩdejȩ. A̧dë baädëa̧dejȩ jabo chjadëri̧ jidarëremȩdejȩ.

¹⁰ Jabechji̧ judi eami̧ chjai̧dë oa chjätäa̧ ji̧, chjadëri̧ chjätä tänȩrëremȩdejȩ. Ado japamitë chjätä ëte Joche judi Pjarao̧ ja̧ dëbëräpȩ cjiadärärërea̧ ji̧, Ejito chiri ütë pio ju̧i̧ ja̧ dëbëräpȩ cjiadärärërea̧ ji̧, jabechji̧ Ütë tjamo̧ pio judi a̧dë chjäte dabarea̧ yürürëremȩdejȩ. Tjamo̧ davä. Chiri ütë pio ju̧i̧iäpȩmo̧ chjadëri̧ dëbë yo̧pea̧ oa, pio jȩaiä iëno̧ iëno̧ cjiamȩ pio ju̧i̧ chjadëri̧ dëbë yo̧pea̧ oa, dabarea̧ yürürëremȩdejȩ. Ado pio ju̧i̧iä chiri ütë pio judi ba chia tjamo̧ darëremȩdejȩ Joche ju̧i̧. Ado pio ju̧i̧ ba chia damȩrȩ chiri tjamo̧ jidamȩ tänȩrëremȩdejȩ. Ado pio ju̧i̧ uëri jibëa̧ cjo̧ro̧rea̧ bë oa tjamo̧ jidamȩ tänȩa̧dejȩ peaja̧di. Aja̧, ja̧di dari̧ japarëremȩdejȩ Ütë tjamo̧ judi Joche pio ju̧i̧, chjadëri̧ jidamȩrȩ —yo̧mȩrȩ ni̧bä chjaorëremȩdejȩrȩ Eteba judi tjamo̧ yo̧ji̧ri̧ pio ji̧ri̧iäpȩmo̧.

¹¹ Ado ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaorëremȩdejȩrȩ: —Ado danȩrȩ ca̧ pumȩ, japamitë chjätä ëte Joche judi Pjarao̧ ja̧ oa jabë ja̧bepë yürürërea̧rä, pio jiro chiri üdë jurarea̧ oa yürüdëmȩpea̧de. Aja̧, chiri üdë ma̧i̧ dari̧ gaüpea̧ oaiä, jurarea̧ decjiapea̧de. Jabechji̧ Ejito quȩmȩ chiri üdë jurarea̧ ji̧ra̧ oa yürürërea̧ ji̧, yürüdëmȩpea̧de. Ado Canaa̧ quȩmȩ chiri üdë peaja̧di jurarea̧ ji̧ra̧ oa yürürërea̧ ji̧, peaja̧di yürüdëmȩpea̧de. Ado pio ju̧i̧iä ibëa̧ tarurea̧ judiro̧, Jacobo pio judi, ju̧i̧ ja̧ u̧ri̧ pio judiro̧borë ta̧mȩcho̧ ja̧bo ga̧rȩ baä marëreji̧ri̧dirȩ jurarea̧ oa dadëa̧ oaiä. Pio ju̧i̧iä gito ana̧ri̧ taraji̧ri̧pea̧dirȩ.

¹² Jabo ja̧dëa ji̧ Jacobo judi ta̧rëa̧ oaiä, "Aja̧, Ejito chiriräpȩ ju̧ri̧ jabë jurarea̧de" yo̧a̧ oa ta̧rëa̧ oaiä, "Aja̧, Ejitoräpȩ ju̧ri̧ jurarea̧ oa gatërea̧ dadirȩ pumȩ judiro̧" yo̧a̧ oa ta̧rëa̧ oaiä, jabechji̧ chjadürëremȩdejȩrȩ joja ji̧ri, ibëa̧ tarurea̧ pio ji̧ri̧ jurarea̧ gatepea̧ oa. Ado judiro̧ Ejitoräpȩ cja̧rȩmȩ co jädërërea̧ ji̧, ja̧dira̧ järëreji̧ri̧dirȩ.

¹³ Ado ji̧dë duri oa japamitë chjätä ëte Jacobo judi jibëa̧ u̧ri̧ pio ji̧ri̧ ado chjereno̧ chjadürërea̧ ji̧, jabechji̧ Joche judi chjadëri̧ daba tänȩrëremȩdejȩrȩ jibëa̧ oti̧ ji̧ri̧ pio jȩa chjiari. 'Aja̧, Joche pio judidida' quëna̧ dabadërërea̧ ji̧, daba tänȩrëremȩdejȩrȩ. Ado pjarao̧ judi Joche ja̧ pumȩ pio ji̧ri̧ chjiari dabadërërea̧ ji̧, peaja̧di dabamȩpea̧dejȩrȩ.

¹⁴ Ja̧dëa ji̧ Joche judi ma̧ȩ chjadürëremȩdejȩ jibëa̧ ama̧i̧ pio ju̧i̧iäpȩmo̧ jibëa̧ oti̧ pio ji̧ri̧iä. Aja̧, pio jȩa nö̧rimȩ pio ju̧i̧iäpȩmo̧ ma̧ȩ chjadüa̧dejȩ. Jabechji̧ jibëa̧ pumȩ ütëborë Ejitoräpȩ ma̧na̧mi̧ ma̧na̧tä eamȩrȩ yo̧ chjadüa̧dejȩ. Ado judiro̧ ütëborë pio jiro japamitërä, 75 pumȩrëreji̧ri̧dirȩ.

¹⁵ Ado Jacobo judi pio jiro ma̧ȩ oa ta̧rëa̧ oaiä, jabechji̧ baärëremȩde Ejito quȩmȩ chiriräpȩ. Jibëa̧ pumȩ pio ji̧ri̧ nö̧ta baärëremȩde. Ado ju̧ri̧pȩ japamitë cjo̧ro̧ ëte, ja̧borëremȩde. Ado japamitë ana̧ chjätä ëte, pio ju̧i̧ ja̧ u̧ri̧ pio judiro̧borë ja̧borëreji̧ri̧dirȩ, ibëa̧ tarurea̧ pio judiro̧borë. Aja̧, Ejito quȩmȩ chiriräpȩ ju̧ri̧ quȩ ma cjiari̧ ja̧borëreji̧ri̧dirȩ.

¹⁶ Jabo judiri ja̧ ji̧ri̧ pio judiro̧ ju̧ri̧pȩ na̧ra̧dërëreji̧ri̧diro̧jȩrȩ jabo. Jabechji̧ jibëa̧ icjararemȩ pio ji̧ri̧ ara baärëreji̧ri̧diro̧jȩrȩ Chiquema quȩmȩräpȩ ju̧ri̧, jënȩro̧ cjo̧ro̧rërea̧räpȩ ju̧ri̧. Pio ju̧ri̧pȩ na̧ra̧diro̧jȩrȩ jibëa̧ icjararemȩ pio ji̧ri̧ na̧ra̧rea̧ ta̧dë cjararä. Ibëa̧ taru Abaraa̧ judi Amoro quȩmȩ ja̧ u̧ri̧ pio ji̧ri̧iä chërera̧ gatërërea̧ ta̧dë cjararä ju̧ri̧ na̧ra̧rëreji̧ri̧diro̧jȩrȩ —yo̧mȩrȩ yo̧a̧dejȩrȩ Eteba judi.

¹⁷ Ado Eteba judi ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaorëremȩdejȩrȩ: —Ado Ütë tjamo̧ judi Abaraa̧ pio ju̧i̧iäpȩmo̧ yo̧ë cji̧därërea̧ üdë querediäa̧rä, judi Abaraa̧ pio judiri ja̧ji̧ri̧ pio ji̧ri̧ Ejito chiriri pio judiri go̧dü tänȩpea̧ üdë querediäa̧rä, jabechji̧ ibëa̧ pumȩ pio judiro̧ ji̧ra̧ tjamo̧pe bagarëreji̧ri̧dirȩ.

¹⁸ Ado pio jiro japamitërä, ado cja̧rȩmo̧rȩ ano̧ mire ütërëremȩde Ejitoräpȩ ju̧ri̧. Joche pio ju̧i̧ dabadërëremȩ pio judi ano̧ mire ütërëremȩde. 'Aja̧, Joche pio judidida' quëna̧dëmȩ pio judi ano̧ mire ütëpea̧de.

¹⁹ Ado pio jiro ütë pio judi oëadë tjamo̧mȩrȩ u̧i̧parëremȩdejȩrȩ ibëa̧ ütëti̧rea̧ pio ji̧ri̧ —yo̧a̧dejȩrȩ—. Aja̧, judiro̧ chjai̧dëri̧ cjiadiäpea̧ oa, judiro̧ chjaodëri̧ yuropapea̧ oa, gitoi̧ dari̧ conȩdarëremȩdejȩrȩ. Jabechji̧ jënȩro̧ pea nö̧ria̧ pio ji̧ri̧ dairäpȩ ano̧tä yo̧tarëremȩdejȩrȩ, jibëa̧ bori̧ pio judiro̧ ja̧bopea̧ oa ano̧tä yo̧tärëremȩdejȩrȩ —yo̧mȩrȩ ni̧bä chjaorëremȩdejȩrȩ Eteba judi pio jȩaiäpȩmo̧ ma̧i̧ dari̧ ërecjiaji̧ri̧ pio ji̧ri̧iäpȩmo̧.

²⁰ —Ado pio jiro japamitërä Moiche boi̧rȩ ara̧ oa cjiarëremȩde —yo̧a̧dejȩrȩ Eteba judi—. Üi̧ boi̧ chjacjiamȩ tjamo̧rëremȩde. Ado nö̧riji̧ri̧ pio judiro̧ jibëa̧ ja oa dairäpȩ ano̧tärea̧ ji̧, cjäri̧ madiro̧jo̧ȩ, ja̧di dari̧ japadërëreji̧ri̧dirȩ, jabo chjadëri̧ goadi jidarëreji̧ri̧diro̧jo̧ȩ ji̧dëri̧. Aja̧, tjarari̧ gupënȩ nö̧ta chjadëri̧ jida̧diro̧jo̧ȩ jibëa̧ bëräpȩ ju̧ri̧.

²¹ Jabo tjarari̧ gupënȩ chjätä ëte goadirea̧ dadëa̧ oaiä, jabechji̧ dairäpȩ ano̧a̧nȩjȩ arayi̧ jini̧. Jabo ja̧botärea̧ ji̧, pjarao̧ ja̧ jabi pio jini̧ darëreyi̧nȩjȩ. Ado mitë ëte ëba baärëreyi̧nȩjȩ jibëa̧ jami̧ da oa ütëparȩpea̧ oa.

²² Ado pio ju̧i̧iä dami̧ti̧ dabarea̧ oa dabaparëremȩde Moiche judi Ejitoräpȩ a̧ra̧ano̧ji̧ri̧ pio ji̧ri̧iä. Jabechji̧ judi ütëpea̧ nö̧ta, ji̧dë ma a̧ra̧ano̧rëreji̧ri̧diro̧jo̧ȩ chjö̧na̧i̧ oa, cjiadiärea̧ decjiari̧. Pio ju̧i̧iä goae tarari̧ ni̧bä chjaorea̧ chiamȩpea̧de. Ado ba chia maea oa japamȩpea̧de chjaocjiarea̧ decjiari̧. Jabechji̧ 'pumȩ ba chia tjamo̧dida' quëna̧ jo̧rȩtaji̧ri̧rȩ da marëreji̧ri̧diro̧jo̧ȩ pumȩ judiro̧ —yo̧mȩrȩ yo̧a̧dejȩrȩ Eteba judi.

²³ —Ado Moiche judi 40 ui goamȩpea̧rä, 'Aja̧, ca̧ pumȩ pio ji̧ri̧ goëdetäremȩquiji̧ri̧da' quëna̧ jo̧rȩtamȩrȩ goëdepea̧dejȩrȩ —yo̧a̧dejȩrȩ judio ji̧ri̧ Eteba judi—.

²⁴ Ado ja̧dëa ji̧ judi tai̧a̧ ji̧, jibëa̧ pumȩ pio ju̧i̧pȩmo̧ gitoi̧ dari̧ japamȩ oa daea̧dejȩ cja̧rȩmȩ oa, Ejitoräpȩ cjo̧ro̧mȩ pio ju̧i̧. Ado jibëa̧ pumȩ pio ju̧i̧iäpȩmo̧ chjai̧dëri̧ japea̧ ba oa, tuti japamȩrȩ chjaodëri̧ gu̧na̧rëremȩdejȩ bape chjaopea̧ oa.

²⁵ 'Jabechji̧ ca̧ pumȩ judiro̧ pio coa chjiari tjamo̧ri̧ daba jirodiro̧da' quëna̧ jo̧rȩtarëremȩde Moiche judi. 'Aja̧, Ütë tjamo̧ judi chjadüa̧ oa a̧doera̧pea̧dibëda, Ejito chiriri pio judiri chjadëri̧ go̧dü tänȩra̧pea̧dibëda, quëna̧ jo̧rȩta jirodiro̧coada' quëna̧ jo̧rȩtarëremȩde Moiche judi. Jabo cjäri̧ madiro̧jo̧ȩ, ja̧di dari̧ quëna̧ jo̧rȩtaji̧ri̧rȩ dadëa̧diro̧jo̧ȩ.

²⁶ Ado ja̧dëa ji̧ dopea̧rä, Moiche judi ejichio pio ju̧i̧ gu̧na̧rea̧ dopea̧rä, ado goëdepea̧dejȩrȩ jibëa̧ pumȩ ji̧ri̧. Ado icharaita yo̧a̧ri̧ oa jibëa̧ dëbëti̧ra̧ chia japatäaji̧ri̧ oa daea̧ oaiä, chi̧dëeatarëremȩdejȩrȩ. "Jabo cjäri̧ ma ca̧ oti̧, cja̧rȩmȩ pumȩnȩrȩ. Ji̧mo̧ ja̧nȩrȩ. ¿Tjana̧pea̧ ji̧ dibëa̧ dëbëti̧ra̧ chia goe chiari̧ japatanȩrȩ?" yo̧mȩrȩ iëno̧ë ta̧rëtea̧dejȩrȩ.

²⁷ Jabo cjäri̧ madiro̧jo̧ȩ. Ta̧rë ja̧bodëa̧diro̧jo̧ȩ. Ado ja̧ omȩ pio ju̧i̧iäpȩmo̧ conȩdaremȩ pio judi goae tarari̧ gi̧de ae cji̧däa̧dejȩ Moiche ju̧i̧. Ado dëbë yo̧mȩrȩ iëno̧ë ta̧rëa̧dejȩ: "¿Chjiarë tänȩa̧ oa ibëa̧ ütëpea̧renȩ yaba̧?" dëbë yo̧a̧dejȩ. "¿Chjiarë tänȩa̧ oa ibë ütaramȩpea̧renȩ? Jabo cjäri̧ marenȩ, ibëa̧ ütë ma ja̧didërenȩ.

²⁸ Ado yaba̧, ¿tjana̧ japapea̧de? Mȩnȩ pe judi ejichio pio ju̧i̧ ja̧bo tänȩa̧mi̧ ¿ja̧bo tänȩdëparenȩque? ¿Peaja̧di dari̧ japaparenȩque? "iëno̧ë ta̧rëa̧dejȩ Moiche ju̧i̧.

²⁹ Jabo cjäri̧ made, Moiche judi pio ju̧i̧ ta̧rëa̧ oaiä, uapa tjamo̧mȩpea̧de. Ado jibëa̧ chji̧ oa bücjü ma cjiari̧ jo̧rȩtamȩrȩ goae tarari̧ baärëremȩde jo̧ȩra̧pe. Jachi tjamo̧ oa baärëremȩde Madiana quȩmȩ chiriräpȩ yuro. Ado pio ju̧ri̧pȩ ano̧ mire cjo̧ro̧mȩpea̧de. Ado japamitë chjätä ëte ëba̧dejȩ jibëa̧ iei̧ ji̧. Ado nö̧rirëremȩdejȩrȩ oari bori̧ ji̧ri̧. Aja̧, yo̧a̧ri̧ oa nö̧rirëremȩdejȩrȩ.

³⁰ Ado Eteba judi cjiadiädëmȩrȩ ja̧di ta̧rëri̧ a̧de ni̧bä chjaorëremȩdejȩrȩ: —Ado 40 ui chjätä ëte, a̧dërimȩ mu̧i̧tjoi̧ pio judi na̧rȩrëremȩdejȩ Moiche pio ju̧i̧. To boi̧chji̧rä cjiamȩrȩ, cjo̧dë tjoro cjiamȩrȩ na̧rȩrëremȩdejȩ. Aja̧, chiri maearäpȩmȩ oa, Chinai quȩmȩ ya̧mi̧ queri̧räpȩmȩ oa na̧rȩa̧dejȩ.

³¹ Ado pio ju̧i̧ daea̧ oaiä ana̧ri̧ jo̧rȩtamȩpea̧de Moiche judi. '¿Tjana̧cjivadi, ¿tjana̧ ju̧i̧iä tjaepadëri̧ tüdiji̧da' quëna̧ jo̧rȩtamȩrȩ goëdepea̧dejȩ jachidë dapea̧ oa. Jabo to queri̧räpȩ go̧düdärätea̧mȩ oa, Ano̧mȩ pio judi jabërä yo̧a̧dejȩ:

³² "Na̧ ütëti̧ pio ji̧ri̧ ja̧ Ütërequede" yo̧a̧dejȩ. "Abaraa̧ pio ju̧i̧ ja̧ Ütërequede. Ado Icha pio ju̧i̧ ja̧ Ütërequede. Ado Jacobo pio ju̧i̧ ja̧ Ütërequede peaja̧di" yo̧mȩrȩ yo̧rëremȩdejȩ Moiche pio ju̧i̧iäpȩmo̧. Ado Moiche judi pio ju̧i̧ ta̧rëa̧ oaiä uapa tjamo̧pea̧de. Uëräpȩmo̧ da miretärea̧ ji̧, cjäri̧ made, ëteräpȩmo̧ da miremȩpea̧de, i ma̧na̧gura cjiamȩrȩ.

³³ Ado ja̧dëa ji̧ Ano̧mȩ judi ado yo̧a̧dejȩ: "Danȩ Moiche, cjüëno̧vä na̧ ta joë oa. Jabechji̧ mȩnȩ cjiamȩ dabu üdë china̧chjade cüdë pio yi tara.

³⁴ Ado danȩ, dabarequede ca̧ pumȩ pio ji̧ri̧ chjiari. Jabechji̧ daba damȩrȩ darequedejȩrȩ Ejitoräpȩji̧ri̧ oa. Gitoi̧ dari̧ conȩda̧ oa cjiaji̧ri̧ oa darequedejȩrȩ. Ado a a ma cjiari̧ baäji̧ri̧ oa ta̧rëa̧ oaiä, jabechji̧ birarequede pio ji̧ri̧ chjätä tänȩpea̧ oa. Ja̧di tara chjadëri̧ ta̧rëcoe. Jabechji̧ pio mȩa chjadüparequedemȩ mȩnȩ Ejitoräpȩ jäpea̧ oa, na̧ pumȩ pio ji̧ri̧ chjadëri̧ a̧dopea̧ oa" yo̧mȩrȩ yo̧rëremȩdejȩ Moiche ju̧i̧ Ano̧mȩ pio judi —yo̧rëremȩdejȩrȩ Eteba judi.

³⁵ Ado cjiadiädëmȩrȩ ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaorëremȩdejȩrȩ Eteba judi: —Aja̧, icharaita judiro̧ pio jiro japamitërä jiadarëreji̧ri̧diro̧jo̧ȩ Moiche pio ju̧i̧. Ütë tjamo̧ judi pio ju̧i̧ chjadüa̧räbo, jabechji̧ ibëa̧ ütëti̧ judiro̧ jiadarëreji̧ri̧diro̧jo̧ȩ. Icharai pio judiri ja̧ji̧ri̧ pio judiro̧ jiada̧diro̧jo̧ȩ. "¿Chjiarë tänȩa̧ oa ibëa̧ ütëpea̧renȩ?" yo̧a̧diro̧jo̧ȩ. "¿Chjiarë tänȩa̧ oa ibë ütaramȩpea̧renȩ?" yo̧a̧diro̧jo̧ȩ. Jabo Ütë tjamo̧ pio judi tjamo̧rëremȩde Moiche pio ju̧i̧ mitëmȩ judi. Tjamo̧ davä. Ibëa̧ ütëti̧ pio ji̧ri̧ tjamo̧ ëba tai̧mȩpea̧ oa, ibëa̧ ütëti̧ pio ji̧ri̧ tjamo̧ go̧dü tänȩmȩpea̧ oa, mitëa̧ oa cjiarëremȩde Ütë tjamo̧ pio ju̧i̧iä. Jabechji̧ tüe baärëremȩ to boi̧chji̧rä cjiarëremȩ pio judi, gäria̧ oa cjiamȩ toro cjiarëremȩ pio judi mitërëremȩdejȩ. Ado pio judi chjadüa̧ oa go̧dü tänȩmȩpea̧de —yo̧a̧dejȩrȩ Eteba judi—.

³⁶ Ado ja̧dëa ji̧ Moiche judi icharaita pio ji̧ri̧ Ejito quȩmȩ chiriri pio judiri yabo ëba go̧dürërea̧ ji̧, jabechji̧ ana̧ri̧ na̧rȩmȩrȩ ëba go̧dürëremȩdejȩrȩ, jauëchja cjiari̧ jape chjaomȩrȩ. Aja̧, Ejitoräpȩ ju̧ri̧, ui coëcoëaräpȩ ju̧ri̧, ado chiri maearäpȩ ju̧ri̧ ana̧ri̧ na̧rȩrëremȩdejȩrȩ ibëa̧ ütëti̧rea̧ ji̧ri̧ 40 ui nö̧ta.

³⁷ Ado danȩrȩ ca̧ oti̧, pio jiro Moiche pio judide Ütërë chjadüpea̧ pio ju̧i̧ chjiari jabërä ni̧bärëremȩ judi. Jabechji̧ judi icharaita pio ji̧ri̧iiäpȩmo̧ no̧mȩ tjamo̧ri ja̧ ni̧bärërea̧ ji̧, judi Ütërë chjadüpea̧ pio ju̧i̧ chjiari jabërä ni̧bärërea̧ ji̧, jabechji̧ ja̧di ta̧rëri̧ ni̧bärëremȩdejȩrȩ: "Aja̧, Ütërë ea jana̧ chjadüa̧ oa ni̧bämȩ pio ju̧i̧ chjadüpadidibe dibëa̧ chjarerämȩ pio ju̧i̧. Aja̧, pio coa chjadürërea̧mi̧ chjadüpadejȩ peaja̧di" yo̧mȩrȩ yo̧rëremȩdejȩrȩ Moiche judi Ütërë chjadüpea̧ pio ju̧i̧ chjiari.

³⁸ Ado danȩrȩ ca̧ pumȩ, pio jiro Moiche pio judide ibëa̧ ütëti̧rea̧ pio ji̧ri̧ nö̧ta tjamo̧ ëba tai̧rëremȩ judi chiri maearäpȩ ju̧ri̧. Ado a̧dërimȩ mu̧i̧tjoi̧ pio judi Moiche pio ju̧i̧ ni̧bärërea̧ ji̧, Chinai quȩmȩ ya̧mi̧ uëräpȩ ju̧ri̧ ni̧bärërea̧ ji̧, peaja̧di ibëa̧ ütëti̧rea̧ pio ji̧ri̧ nö̧tarëremȩde. Jabechji̧ pio jiro ya̧mi̧ uëräpȩ ju̧ri̧ mitërea̧ darëremȩde davä cjo̧ro̧rea̧ yürümȩ ma̧ȩ pio ju̧i̧ pio ibëiäpȩmo̧ ano̧ mire yürüpea̧ oa —yo̧rëremȩdejȩrȩ Eteba judi.

³⁹ —Jabo cjäri̧ maeadiro̧jo̧ȩ, ibëa̧ ütëti̧rea̧ judiro̧ Moiche pio ju̧i̧ chjadëri̧ ta̧rë ja̧botärea̧ ji̧, ta̧rëdiädëri̧ cjiarëreji̧ri̧diro̧jo̧ȩ. Ado pio ju̧i̧ chjuari jiadaji̧ri̧rȩ ado chjereno̧ baätämi̧ cjiaji̧ri̧pea̧dirȩ Ejitoräpȩ.

⁴⁰ Ado pio ju̧i̧iä ja̧di ta̧rëri̧ yo̧rëreji̧ri̧diro̧jo̧ȩ Aro̧ pio ju̧i̧iäpȩmo̧: “Danȩ, ibëa̧ ütëmi̧ da pio ji̧ri̧ chjadëri̧ jëdane yürüibe, ibë chjadëri̧ ano̧ mire yabo ëba baämi̧ dari̧ japapea̧ oa Ejitoräpȩmo̧” yo̧a̧diro̧jo̧ȩ. “Jabechji̧ pio jiro Moiche pio ju̧i̧ chjiari, pio ibë Ejito chiriri pio judiri ëba ma̧na̧remȩ pio ju̧i̧ chjiari dabadërea̧rȩ. Ja̧di tara jabechji̧, jëdane yürüibe" yo̧a̧diro̧jo̧ȩ.

⁴¹ Ado ja̧dëa ji̧ teracaba pio ju̧i̧ jëdano̧rëreji̧ri̧diro̧jo̧ȩ baca boi̧mi̧ da oa. Ado goe gu̧rori̧ cäë yürüji̧ri̧pea̧diro̧jo̧ȩ. Ado jënȩro̧ jëdano̧a̧ pio ju̧i̧ ba chia jo̧rȩtaji̧ri̧rȩ airi̧ cjia airi̧ cjia a̧doparëreji̧ri̧dirȩ. Aja̧, juraji̧ri̧rȩ, ma̧ chiadëri̧ cjiari̧ go̧a̧ji̧ri̧rȩ a̧doparëreji̧ri̧dirȩ.

⁴² Jabo judiro̧ ja̧di dari̧ japea̧ oaiä, Ütë tjamo̧ judi putu jura̧ a̧dë chami̧ dari̧ jiadarëremȩdejȩrȩ. Jabechji̧ judiro̧ pio jȩaiäpȩmo̧ ma quëna̧tärea̧ ji̧, teracaba ütë pio ji̧ri̧iäpȩmo̧ ano̧ mire quëna̧rea̧ yürürëremȩdejȩrȩ. 'Aja̧, büë üdë ütëdida, do üdë ütëdida, gupënȩ üdë jauëchjadida' quëna̧dërërea̧ ji̧, ja̧di dari̧ quëna̧ jo̧rȩtarea̧ yürürëremȩdejȩrȩ. Peaja̧di ta̧rëri̧ go̧ȩpea̧ oa cjiade Ütërë eajana̧ chadüa̧ oa ni̧bäji̧ri̧ pio judiro̧ go̧ȩparërea̧ ma̧ȩ üdë. Jabechji̧ ta̧rëchji̧vä judiro̧ go̧ȩpea̧ ji̧, Ütë tjamo̧ pio judi yo̧rërea̧ pio ji̧: "Aja̧, Icharai pio judiri ja̧ji̧ri̧ pio dibëiäpȩmo̧ ni̧bä chjaorequededibe. Danȩrȩ, mȩnȩro̧ chiri maearäpȩ chjätäti̧ cjiarërea̧ ji̧, 40 ui nö̧ta chjätäti̧ cjiarërea̧ ji̧, cjäri̧ marenȩro̧coe, mȩnȩro̧ pio coaiäpȩmo̧ chjacjiamȩri̧ jo̧rȩtaji̧ri̧rȩ goe gu̧rori̧ cäë yürütärea̧ ji̧, ja̧di dari̧ japadë marëreji̧ri̧renȩro̧coe.

⁴³ Jabo ma̧i̧ dari̧ japaji̧ri̧rȩ japarëreji̧ri̧nȩrȩ. Jabechji̧ Moroco quȩmȩ ütë pio ju̧i̧, pumȩrȩ jëdano̧a̧ ütë pio ju̧i̧ ba chia jo̧rȩtaji̧ri̧rȩ goa baärëreji̧ri̧renȩro̧jo̧ȩ, pio ju̧i̧ ja̧ bëmi̧ da pio ju̧i̧bo. Ado Depja̧ quȩmȩ ütë pio ju̧i̧, büëmi̧ da ütë pio ju̧i̧bo jo̧rȩtaji̧ri̧rȩ goa baärëreji̧ri̧renȩro̧jo̧ȩ, pio ju̧i̧ ja̧ bëmi̧ da oa peaja̧di. Pio ju̧i̧iä jachiti̧ oa baä tänȩparequededibe, bape chjaomȩrȩ. Tjamo̧ davä. Babironia quȩmȩ chiri oëräpȩ ju̧ri̧ ano̧ mire cjo̧ro̧pea̧ oa chjadüparequededibe jachi tjamo̧ oa." Aja̧ ca̧ pumȩ, ja̧di ta̧rëri̧ yo̧mȩrȩ yo̧rëremȩde Ütë tjamo̧ judi ibëa̧ ütëti̧rea̧ pio ji̧ri̧iäpȩmo̧, judiro̧ teracaba ütë oa quëna̧rërea̧ ji̧.

⁴⁴ Ado Eteba judi cjiadiädëmȩrȩ ja̧di ta̧rëri̧ a̧de ni̧bä chjaorëremȩdejȩrȩ: —Danȩrȩ ca̧ oti̧, ibëa̧ ütëti̧rea̧ pio judiro̧ chiri maearäpȩ chjätäti̧ cjiarërea̧ ji̧, jabechji̧ irä goarëreji̧ri̧diro̧jo̧ȩ dëbëdiärea̧ jo̧ pio ju̧i̧. Ütë tjamo̧ judi Moiche pio ju̧i̧iäpȩmo̧ ütarë yo̧rërea̧mi̧, pio ju̧i̧iäpȩmo̧ na̧rȩrërea̧mi̧ japea̧ oa goarëreji̧ri̧diro̧jo̧ȩ —yo̧a̧dejȩrȩ—.

⁴⁵ Ado japamitë chjätä ëte, pio judiro̧ ano̧ mire yürürëreji̧ri̧diro̧jȩrȩ jibëa̧ u̧ri̧ pio ji̧ri̧iäpȩmo̧, goëje cjo̧ro̧ji̧ri̧ pio ji̧ri̧iäpȩmo̧, goëje dabapaji̧ri̧ pio ji̧ri̧iäpȩmo̧. Ado pio ju̧i̧ ara ma̧na̧rëreji̧ri̧diro̧jo̧ȩ pio yoa chiri oa, Ütë tjamo̧ judi pio jibëiäpȩmo̧ yürüa̧ chiri oa. Jabechji̧ Ütë tjamo̧ judi pio yoa chirirä cjo̧ro̧rëreji̧ri̧ pio ji̧ri̧ baä tänȩrërea̧ ji̧, ado ibëa̧ ütëti̧rea̧ judiro̧ Jochue pio ju̧i̧ nö̧ta acji yu̧a̧rërea̧ ji̧, jabechji̧ pio yoa chiri oa ara ma̧na̧rëreji̧ri̧diro̧jo̧ȩ dëbëdiärea̧ jo̧ pio ju̧i̧. Ado pio jiro dëbëdiärea̧ jo̧ pio judi, jabechji̧ japamitë ana̧ri̧ cji̧däa̧ oa cjiarëremȩde pio yoaiäpȩ. Tjamo̧ davä. Davi pio judi icharaita ja̧ ütëpea̧rä yuro pio yoaiäpȩ cji̧däa̧ oa cjiarëremȩde.

⁴⁶ Ado Ütë tjamo̧ judi pio jȩaiäpȩmo̧ cjäri̧ri̧ cjiamȩrȩ daea̧ tara, jabechji̧ Ütë tjamo̧ ja̧ bë pio ju̧i̧ japapea̧ pio ju̧i̧ chjiari cjo̧dërëremȩdejȩ Davi judi. 'Aja̧, Ütë tjamo̧ ja̧ bë oa japatäremȩquëda, ta̧dë ana̧ra̧ japatäremȩquëda, Jacobo pio ju̧i̧ ja̧ Ütë ja̧ oa cji̧dë yürütäremȩquëda' quëna̧ jo̧rȩtamȩrȩ cjo̧dërëremȩdejȩ Ütë tjamo̧ pio ju̧i̧iä.

⁴⁷ Jabo cjäri̧ madejȩ. Japarea̧ yürüdëa̧dejȩ. Davi pio ju̧i̧ japa tänȩtärea̧ ji̧, joja pio ju̧i̧ ano̧ mire japarea̧ yürürëremȩdejȩ, Choromo̧ pio ju̧i̧.

⁴⁸ Jabo danȩrȩ ca̧ oti̧, coëma cjiari̧ jo̧rȩtatäreji̧ri̧rea̧rȩ Ütë tjamo̧ pio ju̧i̧ chjiari —yo̧a̧dejȩrȩ—. Danȩrȩ, a̧dë chjäte Ütë tjamo̧ pio judi pumȩrȩ japea̧ bërämo̧ bëpadëmȩde. Jabechji̧ pumȩrȩ jibëa̧ ichira̧ pio ju̧ri̧ra̧ japea̧ bërämo̧ cjo̧ro̧dëmȩde. Peaja̧di ta̧rëri̧ go̧ȩparëremȩde Ütërë ea jana̧ chjadüa̧ oa ni̧bämȩ judi. Ta̧rëchji̧vä Ano̧mȩ ja̧ ma̧ȩ oa:

⁴⁹ "Danȩrȩ, a̧dëräpȩ üdë ca̧ charea̧mi̧ dade. Pio judiri yo̧ chjadümȩrȩ cjiarequede. Ado cüdë pareapea̧ dabu üdë, jabechji̧ ca̧ ta boë cjaeä charea̧mi̧ dade. Pio ju̧i̧iä cüdë tjamo̧ri̧ bëpea̧ jo̧ oa japarea̧mi̧dënȩrȩ. Danȩrȩ, ¿yö̧ta dari̧ japatäreji̧ri̧cjivanȩrȩ cüdë bëpapea̧ jo̧ oa? Ado cüdë järätä chjapami̧ dari̧ cjiapea̧ oa, cüdë ca̧ jo̧räpȩ ju̧ri̧ järätä chjapami̧ dari̧ cjiapea̧ oa, ¿yö̧ta dari̧ cji̧dätäreji̧ri̧cjivanȩrȩ?

⁵⁰ Cjäri̧ manȩrȩ, japarea̧mi̧dënȩrȩ. Danȩrȩ, pio cüdërequede chjö̧na̧i̧ oa pareapamȩ judi. A̧dë oa, dabu oa, chjö̧na̧i̧däräti̧ oa pareapamȩ pio judi tjamo̧requede cüdë. Ado cüdë chjadëri̧ cjo̧ro̧pea̧ bë oa tjamo̧ri̧ japarea̧mi̧dënȩrȩ." Aja̧ ca̧ oti̧, pio jiro ma̧ȩ oa go̧ȩparëremȩde Ütërë ea jana̧ chjadüa̧ oa ni̧bämȩ judi Ütë tjamo̧ pio judi ja̧di ta̧rëri̧ yo̧a̧ ji̧ —yo̧a̧dejȩrȩ.

⁵¹ —Jaboti̧ri̧ji̧ri̧nȩrȩ mȩnȩro̧ —yo̧a̧dejȩrȩ Eteba judi—. Jabechji̧ dibëa̧ ütëti̧rea̧ judiro̧ jape chjaorërea̧mi̧ jape chjaonȩrȩ. Judiro̧ Tjo tjamo̧ pio ju̧i̧ jiadarërea̧mi̧ ji̧dë ma jiade chjaonȩrȩ peaja̧di. Ji̧dë ma dëbë järirenȩro̧jo̧ȩ. Jabechji̧ ta̧rë puë chiadëti̧rȩ cjianȩrȩ Ütë tjamo̧ ja̧ ma̧ȩ oa ta̧rë ja̧bodëji̧ri̧rȩ. Jabechji̧ mȩnȩro̧ ano̧ mire jo̧rȩtatärea̧ ji̧, ano̧ mire jo̧rȩtadëri̧ cjianȩrȩ.

⁵² Danȩrȩ, dibëa̧ ütëti̧rea̧ judiro̧ Ütë tjamo̧ ja̧ ma̧ȩ oa ni̧bärëreji̧ri̧ ütëbodärä oa conȩdae chjaorëreji̧ri̧diro̧jȩrȩ, cja̧rȩmȩrȩ cjiadiädëri̧. ¿Chjia oa conȩdadëa̧diro̧jo̧ȩ? ¿Yö̧ta quȩmȩ oa conȩdadëa̧diro̧jo̧ȩ? Cjäri̧ madiro̧jȩrȩ, ütëbodäräti̧ oa conȩdae chjaorëreji̧ri̧diro̧jȩrȩ. Ja̧bo tänȩrëreji̧ri̧diro̧jȩrȩ. Jabechji̧ Ütë tjamo̧ ja̧ Mu̧i̧tjoi̧ pio ju̧i̧ chjiari jabërä ni̧bärëreji̧ri̧ pio ji̧ri̧ ja̧bo tänȩrëreji̧ri̧diro̧jȩrȩ. Cja̧rȩmȩ co chjai̧dëri̧ japadëpamȩ Mu̧i̧tjoi̧ pio ju̧i̧ chjiari a̧ra̧ano̧rëreji̧ri̧ pio ji̧ri̧ ja̧bo tänȩrëreji̧ri̧diro̧jȩrȩ ütëbo oa. Ado yaba, judiro̧ yo̧rërea̧ pio ju̧i̧bo ja̧bo tänȩa̧renȩro̧jo̧ȩ pio mȩnȩro̧. Tjamo̧ davä. Pio mȩnȩro̧ ja̧bo tänȩa̧renȩro̧jo̧ȩ Ütë tjamo̧ ja̧ Mu̧i̧tjoi̧ pio ju̧i̧. Jabechji̧ mȩnȩro̧ chjai̧dëri̧ yürüa̧ oaiä, mȩnȩro̧ Ütë tjamo̧ ja̧ Mu̧i̧tjoi̧ pio ju̧i̧ ja̧bo tänȩji̧ri̧ pio ji̧ri̧iäpȩmo̧ yürüa̧ oaiä, jabechji̧ pio mȩnȩro̧ ja̧bo tänȩa̧renȩro̧jo̧ȩ.

⁵³ Jabechji̧ mȩnȩro̧ Ütë tjamo̧ ja̧ ma̧ȩ oa irä mitëa̧räbo, mȩnȩro̧ tüdüa̧mi̧ darä cjo̧ro̧pea̧ ma̧ȩ oa Moiche pio ju̧i̧iä irä mitëa̧räbo, a̧dëriji̧ri̧ mu̧i̧tjoi̧ pio judiro̧ chia ma̧na̧mȩ ma̧ȩ oa mitëa̧räbo, cjäri̧ manȩrȩ, chjuari̧ jiada̧renȩro̧jo̧ȩ, ta̧rëdiädëti̧ji̧ri̧rȩ —yo̧mȩrȩ to̧bari̧ yo̧rëremȩdejȩrȩ Eteba judi. Ado judiri cjiadiärëremȩde.

Ta̧dëra̧ ae ja̧bo tänȩa̧diro̧jo̧ȩ Eteba ju̧i̧

⁵⁴ Jabo judio tjamo̧ yo̧ji̧ri̧ pio judiro̧ Eteba judi carupë ni̧bä chjaoa̧ pio ju̧i̧ ta̧rëa̧ oaiä, ma̧ cjüëtü tjamo̧pe järëreji̧ri̧dirȩ, cjatäcjie jo̧rȩtarea̧ decjiari̧. Jo̧dërë co̧ȩrȩ ea cjiari̧ ërecjia tjamo̧pea̧diro̧jo̧ȩ.

⁵⁵ Jabo Eteba judi Tjo tjamo̧ ja̧ chja̧oerä cjiamȩrȩ uëräpȩmo̧ cjarucha darëremȩde. Ado a̧dëräpȩmo̧ damȩrȩ daea̧dejȩ Ütë tjamo̧ pio ju̧i̧, a̧dë chjäte tatari̧ cjiamȩ ju̧i̧. Ado pio ju̧i̧ ja̧ mu̧i̧ chjua cotoro cjiamȩ oa peaja̧di daea̧dejȩ Jechu pio ju̧i̧.

⁵⁶ Ado pio ji̧ri̧ damȩrȩ yo̧a̧dejȩrȩ pumȩ ji̧ri̧: —Danȩrȩ, are ië baämȩ oa dareconȩ a̧dë oa. Ado dareconȩ Pumȩrȩ Ara̧ Tjamo̧ pio ju̧i̧. Ütë tjamo̧ pio ju̧i̧ ja̧ mu̧i̧ chjua cotoro cjiamȩ oa dareconȩ —yo̧a̧.

⁵⁷ Jabo cjäri̧ madiro̧jo̧ȩ, tjamo̧ yo̧ji̧ri̧ pio judiro̧ Eteba judi yo̧a̧ pio ju̧i̧ ta̧rëdëri̧ cjia̧ oaiä, jabechji̧ tuti ina̧diro̧jo̧ȩ jibëa̧ ta̧ra̧ puë oa, ëna̧ quirati̧ cjiaji̧ri̧rȩ. Ado cja̧rȩmȩ bubarë acji bagurarëreji̧ri̧diro̧jo̧ȩ chjaodëri̧.

⁵⁸ Ado chjuari̧ mitëa̧diro̧jo̧ȩ. Ado coë a̧rȩriäri̧ mu̧i̧ jäa̧diro̧jo̧ȩ Jerucharȩ dairäpȩ ta̧dëra̧ pio ju̧ri̧ra̧ ae ja̧bo tänȩpea̧ oa. Ado goae tarari̧ apea̧ oa cjüëno̧a̧diro̧jo̧ȩ jibëa̧ chjibo oa. Ado Chauro quȩmȩ pio judi jidarëremȩdejȩ jibëa̧ chjibo oa judiro̧ ae cjia̧ nö̧ta.

⁵⁹ Ado Eteba pio ju̧i̧iäpȩmo̧ aea̧ ji̧, ji̧dë ma ëna̧diärëremȩdejȩ jibëa̧ Ano̧mȩ ju̧i̧, ja̧di ta̧rëri̧ yo̧mȩrȩ: —Ano̧mȩ Jechu, mitëvä ca̧ tjo oa —ëna̧diärëremȩdejȩ.

⁶⁰ Ado ju chatura̧ cjatämȩrȩ to̧bari̧ yo̧a̧dejȩ: —Aja̧ Ano̧mȩ, judiro̧ pio coaiäpȩmo̧ chjai̧dëri̧ japea̧ ba oa ba eadëjȩrȩ. Jabechji̧ duridëparȩmi̧ dari̧ japajȩrȩ —yo̧a̧dejȩ. Ado ja̧di ta̧rëri̧ yo̧ ëte, ja̧borëremȩde Eteba judi.