Japarea̧ 6 - Biblia Pume

Ca̧i̧ta̧ra̧ ichiri yo̧a̧ri̧ pumȩ ji̧ri̧ mitëa̧diro̧jȩrȩ chjö̧na̧i̧ti̧ oa cjäri̧ ja̧boji̧ri̧ pio ji̧ri̧ a̧dopea̧ oa

¹ Ado pio jiro japamitërä quëna̧ji̧ri̧ judiro̧ ji̧dë u̧i̧ goëje ji̧ra̧pe järëreji̧ri̧dirȩ, no̧i̧dë tjamo̧pe bagarea̧mi̧ dari̧. Jabo judiro̧ ütëborë cja̧rȩmȩ chji̧ chiami̧ dari̧ jo̧rȩtatärea̧ ji̧, ja̧di dari̧ jo̧rȩtadërëreji̧ri̧dirȩ o judiro̧. Pio ju̧i̧iä giriego ma̧ȩ oa ni̧bäji̧ri̧ judio pio judiro̧ yo̧rëreji̧ri̧diro̧jȩrȩ ebereo ma̧ȩ oa ni̧bäji̧ri̧ judio pio ji̧ri̧iäpȩmo̧. Ja̧di ta̧rëri̧ yo̧ji̧ri̧rȩ yo̧a̧diro̧jȩrȩ: —Danȩrȩ, mȩnȩro̧ chëre oa chjarapë yürüa̧ ji̧, ibëa̧ pumȩ ji̧ri̧, oari chiarëreji̧ri̧ ivi pio ji̧ri̧ yürüa̧ ji̧ chjadëri̧ chjarapë yürütärea̧ ji̧, chjadëri̧ yürüdë marenȩro̧jȩrȩ —yo̧a̧diro̧jȩrȩ—. Jabëtari̧mi̧ maea oa yürürenȩro̧jȩrȩ. Dibëa̧ pumȩ ji̧ri̧ yürüa̧mi̧ yürütärea̧ ji̧, ja̧di dari̧ yürüdë marenȩro̧jȩrȩ. Jabëtari̧mi̧ maea oa yürürenȩro̧jȩrȩ ji̧dë u̧i̧ ji̧ra̧ri̧ yürütärea̧ ji̧. Dibëa̧ pumȩ pio ji̧ri̧ doti̧mi̧ yürüa̧mi̧ yürütäreji̧ri̧renȩro̧jȩrȩ peaja̧di —yo̧ji̧ri̧rȩ yo̧a̧diro̧jȩrȩ ebereo ma̧ȩ oa ni̧bäji̧ri̧ judio pio ji̧ri̧iäpȩmo̧ giriego ma̧ȩ oa ni̧bäji̧ri̧ judio pio judiro̧.

² Ado pio ju̧i̧iä Jechurë chjadüa̧ judiro̧, 12rë, chjaodëri̧ a̧dopa tänȩrëreji̧ri̧diro̧jȩrȩ quëna̧ji̧ri̧ ütëbo oa. Ado ja̧di ta̧rëri yo̧a̧diro̧jȩrȩ: —Danȩrȩ, a̧ro̧rȩ Ütë tjamo̧ ja̧ ma̧ȩ oa a̧ra̧ano̧ji̧ri̧rȩ ja̧beparea̧rȩ —yo̧a̧diro̧jȩrȩ—. Pio ju̧i̧ a̧dë jo̧rȩtarea̧mi̧dëde. A̧ro̧rȩ chërera̧ ano̧ mire ja̧beparä judi, pumȩ pio ji̧ri̧ chjarapë yürüpea̧ pio ju̧i̧ ano̧ mire ja̧beparä judi, cjäri̧ made, chjadëdëtäremȩde. Ado pio ju̧i̧iä ja̧di dari̧ ano̧ mire ja̧beparea̧mi̧dëde.

³ Ja̧di tara yo̧rea̧ro̧dibe. Mitëchji̧vä 7 oari ji̧ri̧. Aja̧, Tjo tjamo̧ ja̧ chja̧oerä cjo̧ro̧ji̧ri̧ pio ji̧ri̧, a̧dërimȩ dabarea̧ chiaji̧ri̧ pio ji̧ri̧, ütëbo ja̧ dachoro coëma cjiari̧ cjo̧ro̧ji̧ri̧ pio ji̧ri̧ mitëchji̧jȩrȩ. Chëre oa chjadëri̧ chjarapë yürüpea̧ oa, jurarea̧ oa chjadëri̧ chjarapë yürüpea̧ oa mitëchji̧jȩrȩ —yo̧a̧diro̧jȩrȩ—. Pio jiro ja̧beparea̧ oa yürüparea̧ro̧jȩrȩ judiro̧ chjadëri̧ chjarapë yürüpea̧ oa.

⁴ Jabo a̧ro̧rȩ, jabechji̧ china̧chjari̧ tutia̧ oa cjiami̧ dari̧ cjiarea̧rȩ ca̧ oti̧, oëra̧diämi̧ dari̧ ja̧bepachea oa. Jabechji̧ Ütë tjamo̧ judi pio ibëiäpȩmo̧ yürüa̧ ja̧beparea̧ pio ju̧i̧ a̧dë jo̧rȩtarea̧mi̧dëde. Ado pio ju̧i̧iä ji̧dë ma ni̧bäparea̧ro̧jo̧ȩ Ütë tjamo̧ pio ju̧i̧iäpȩmo̧. Ado Ütë tjamo̧ ja̧ ma̧ȩ oa ji̧dë ma a̧ra̧ano̧parea̧ro̧jo̧ȩ peaja̧di. Jabechji̧ china̧chjari̧ tutia̧ oa cjiami̧ dari̧ cjiarea̧rȩ oëra̧ti̧ a̧dë jo̧rȩtarea̧ decjiari̧ —yo̧ji̧ri̧rȩ yo̧a̧diro̧jȩrȩ Jechurë chjadüa̧ judiro̧ quëna̧ji̧ri̧ pio ji̧ri̧iäpȩmo̧.

⁵ Ado pio ju̧i̧ ta̧rëa̧ oaiä, ütëbodärärë, 'Aja̧, chjadëri̧ chi̧dëea̧diro̧ibëda, peaja̧di dari̧ japatäreji̧ri̧a̧ro̧da' quëna̧ jo̧rȩtaji̧ri̧rȩ mitërëreji̧ri̧diro̧jȩrȩ pumȩ ji̧ri̧, 7 oa. Eteba quȩmȩ oa, Tjo tjamo̧ ja̧ chja̧oerä cjo̧ro̧mȩ oa mitëa̧diro̧jo̧ȩ, chjuari̧ quëna̧mȩ oa. Peaja̧di Felipe, Porocoro, Nicano, Timo̧, ado Paramena mitërëreji̧ri̧diro̧jȩrȩ. Ado pio ji̧ri̧ uëri Nicora quȩmȩ pio ju̧i̧bo mitëa̧diro̧jo̧ȩ, A̧tioquiaräpȩ cjo̧ro̧rëremȩ pio ju̧i̧. Judiodërëremȩde jabo judiorë quëna̧mi̧ quëna̧rëremȩde. Aja̧, pio ju̧i̧bo mitëa̧diro̧jo̧ȩ.

⁶ Ado pio ji̧ri̧ mitë ëte, ëba järëreji̧ri̧diro̧jȩrȩ Jechurë chjadüa̧ pio ji̧ri̧iäpȩ. Ado judiro̧ ida̧diro̧jȩrȩ. Ado idaji̧ri̧rȩ ni̧bäa̧diro̧jo̧ȩ Ütë tjamo̧ ju̧i̧iäpȩmo̧.

⁷ Ado Ütë tjamo̧ ja̧ ma̧ȩ üdë, jabechji̧ jachiti̧ oa chjuchjupechärëremȩde oëra̧ti̧ oa. Ado Jerucharȩräpȩ quëna̧ji̧ri̧ judiro̧ no̧i̧dë tjamo̧pe bagarëreji̧ri̧dirȩ. Ado o ji̧ri̧ chjiari goë tuti ja̧bepaji̧ri̧ pio judiro̧borë quëna̧ji̧ri̧pea̧dirȩ no̧i̧dërë.

Goëdëri̧ cjiaji̧ri̧rȩ mitëa̧diro̧jo̧ȩ Eteba ju̧i̧

⁸ Ado Eteba judi, jabechji̧ Ütë tjamo̧ pio judi tjamo̧ri̧ a̧doa̧ oa cjo̧ro̧rëremȩde, pumȩ ji̧ri̧ ana̧ri̧ jo̧rȩta tänȩmȩrȩ. Tjamo̧ davä. Jauëchja cjiari̧ jape chjaomȩrȩ cjo̧ro̧rëremȩde, pumȩ ji̧ri̧ goae tarari̧ na̧rȩmȩrȩ.

⁹ Jabo judio judiro̧ orë dëbëpe chjaorëreji̧ri̧diro̧jo̧ȩ. Aja̧, ado cja̧rȩmo̧ a̧doparea̧ bëräpȩ a̧dopaji̧ri̧ judio judiro̧, 'Mu̧i̧tjoi̧dëpea̧' quȩmȩ a̧doparea̧ bëräpȩ a̧dopaji̧ri̧ judio pio judiro̧ ana̧ri̧ dëbëpe chjaorëreji̧ri̧diro̧jo̧ȩ. Ado pio ji̧ri̧ nö̧ta ëba a̧dopaji̧ri̧ pio judiro̧borë dëbëpe chjaorëreji̧ri̧diro̧jo̧ȩ. Chirenȩ quȩmȩ bë ma̧ri̧riji̧ri̧ judiro̧, ado Areja̧dia quȩmȩ bë ma̧ri̧riji̧ri̧ judiro̧, ado Chirichia quȩmȩ chiririji̧ri̧ judiro̧ peaja̧di ana̧ri̧ dëbëpe chjaorëreji̧ri̧diro̧jo̧ȩ, Achia quȩmȩ chiririji̧ri̧ pio judiro̧borë. Jabechji̧ judiro̧ Eteba pio ju̧i̧ ea tjamo̧dëa̧ oaiä, pio ju̧i̧ nö̧ta goae tarari̧ dëbë yo̧ chjaopea̧ oa a̧doparëreji̧ri̧dirȩ.

¹⁰ Jabo cjäri̧ madiro̧jo̧ȩ. Eteba judi Tjo tjamo̧rȩ a̧dë chjäte dabarea̧ yürüa̧ oa ni̧bäa̧ oaiä, jabechji̧ goae tarari̧ dëbëparea̧ dadërëreji̧ri̧diro̧jo̧ȩ.

¹¹ Pio ju̧i̧iä chëre oa goadi yürürëreji̧ri̧diro̧jȩrȩ o ji̧ri̧iäpȩmo̧ Eteba pio ju̧i̧ chjiari ma̧ȩ chjádë yürüpea̧ oa, pio ju̧i̧iäpȩmo̧ goae tarari̧ aechide ni̧bäpea̧ oa. Ado pio ju̧i̧iä ja̧di ta̧rëri yo̧rëreji̧ri̧dirȩ, ma̧ȩ chjádë yürüji̧ri̧ judiro̧: —Aja̧, irä ta̧rëa̧rea̧ro̧jo̧ȩ Eteba ju̧i̧. Chjai̧dëri̧ ni̧bämȩ oa irä ta̧rëa̧rea̧ro̧jo̧ȩ —yo̧a̧dirȩ—. Ütë tjamo̧ ja̧ bë pio ju̧i̧ chjiari chjai̧dëri̧ ni̧bäa̧mȩ oa, Moiche pio ju̧i̧ chiari̧ chjai̧dëri̧ ni̧bäa̧mȩ oa ta̧rëa̧rea̧rȩ i ana̧borë —yo̧ji̧ri̧rȩ aechide yo̧rëreji̧ri̧dirȩ ma̧ȩ chjádë yürüji̧ri̧ judiro̧.

¹² Ado judiro̧ ja̧di ta̧rëri̧ aechide ni̧bäa̧ oaiä, pumȩ noi̧dërë ërecjia tjamo̧pe bagarëreji̧ri̧diro̧jo̧ȩ Eteba pio ju̧i̧iäpȩmo̧. Jabechji̧ ma̧ȩ tjamo̧rämi̧ cjiaji̧ri̧rȩ ërecjiapea̧diro̧jo̧ȩ. Ado tjamo̧ yo̧ji̧ri̧ judiro̧, ado Moicherë go̧ȩparërea̧ ma̧ȩ oa a̧ra̧ano̧ji̧ri̧ pio judiro̧borë ërecjia tjamo̧pea̧diro̧jo̧ȩ. Ado ma̧ cjüëtü maeari̧ jo̧rȩtaji̧ri̧rȩ chjuari̧ mitëa̧diro̧jo̧ȩ. Ado ëba jäa̧diro̧jo̧ȩ tjamo̧ ütarë yo̧ji̧ri̧ judio pio ji̧ri̧iäpȩ.

¹³ Ado ma̧ȩ chjádë yürüji̧ri̧ pio ji̧ri̧ dadärä ëte, jabechji̧ Eteba pio ju̧i̧iäpȩmo̧ aechide ni̧bäpea̧ oa tänȩrëreji̧ri̧diro̧jȩrȩ. Ado ja̧di ta̧rëri̧ ni̧bäji̧ri̧pea̧dirȩ: —Danȩrȩ, pio yodëje ji̧dë ma chjai̧dëri̧ ni̧bämȩde Ütë tjamo̧ ja̧ bë pio ju̧i̧ chjiari —yo̧a̧diro̧jȩrȩ—. Ado Moicherë go̧ȩparërea̧ ma̧ȩ pio ju̧i̧ chjiari ji̧dë ma chjai̧dëri̧ ni̧bämȩde peaja̧di.

¹⁴ Jabechji̧ irä ta̧rëa̧ro̧jo̧ȩ oëra̧ yo̧a̧mȩ oa. "Aja̧, Jechu judi, Nacharerimȩ pio judi Ütë tjamo̧ ja̧ bë pio yoa iëchäpadejȩ” yo̧a̧mȩ oa irä ta̧rëa̧rea̧ro̧jo̧ȩ. “Ado a̧ro̧rȩ Moicherë go̧ȩparërea̧ ma̧ȩrämo̧ cjo̧ro̧rërea̧ ji̧, jabechji̧ ano̧ mire cjo̧ro̧pea̧de yaba̧ tjaoëpai̧ darä" yo̧a̧mȩ oa irä ta̧rëa̧rea̧ro̧jo̧ȩ —yo̧ji̧ri̧rȩ goae tarari̧ aechide yo̧rëreji̧ri̧diro̧jo̧ȩ Eteba pio ju̧i̧iäpȩmo̧.

¹⁵ Ado judiro̧ Eteba pio ju̧i̧ chjiari ma̧ȩ chjádë yürüa̧ nö̧ta, pumȩ judiro̧ ütëborë, tjamo̧ ütarë yo̧ji̧ri̧ judio pio judiro̧borë dae chjaorëreji̧ri̧diro̧jo̧ȩ Eteba ja̧ chamacho pio ju̧i̧. Jabechji̧ a̧dërimȩ mu̧i̧tjoi̧ ja̧ chamachomi̧ da oa, ma̧i̧ dari̧ tatari̧ cjiamȩ oa cjoai̧tä cjoai̧tä dae chjaorëreji̧ri̧diro̧jo̧ȩ, a̧dë darea̧ decjiari̧.