Japarea̧ 5 - Biblia Pume

Tjo tjamo̧ pio ju̧i̧ ma̧ȩ chjádë yürüa̧ji̧ri̧ pio ji̧ri̧ ja̧bo tänȩa̧dejȩrȩ Ütë tjamo̧ judi

¹ Ado cja̧rȩmo̧rȩ cjo̧ro̧rëremȩde peaja̧di jibëa̧ chiri oa goamȩrȩ, Anania quȩmȩ judi. Jibëa̧ iei̧ pio ji̧ ëbamȩrȩ cjo̧ro̧rëremȩde Chipira quȩyi̧ ji̧. Ado gatë tänȩtämi̧ cjiamȩrȩ gatë tänȩrëremȩdejȩ jibëa̧ chiri oa ado cja̧rȩmo̧ pumȩ pio ju̧i̧iäpȩmo̧.

² Jabo Anania judi jibëa̧ iei̧ pio ji̧ nö̧ta chjadëri̧ jo̧rȩtatärea̧ ji̧, chjadëri̧ jo̧rȩtadëa̧de. 'Jaeboquëda, u̧i̧patäremȩquiji̧ri̧da, cüdë Jechurë chjadüa̧ pio ji̧ri̧ yürürä, jabechji̧ chëre ütëbo oa yürüdëtäremȩquëda jabo o oamo̧i̧ yürütäremȩquiji̧ri̧da, chiri ba ütëbo oa yürücji̧ quëna̧ japamȩrȩ o oamo̧i̧ yürütäremȩquiji̧ri̧da' quëna̧ jo̧rȩtamȩrȩ järimȩpea̧de jibëa̧ iei̧ pio ji̧ nö̧ta. Ado ja̧dëa ji̧ Anania judi jibëa̧ chiri oa gatë tänȩ ëte, goa järëremȩdejȩ chëre oa Jechurë chjadüa̧ pio ji̧ri̧iäpȩmo̧ yürüpea̧ oa. Judi jibëa̧ iei̧ pio ji̧ nö̧ta jo̧rȩta̧mi̧ yürüa̧dejȩ chëre oa, pumȩ ji̧ri̧ u̧i̧patämi̧ cjiaji̧ri̧rȩ. Aja̧, chëre ütëbo yürücji̧ quëna̧ japamȩrȩ yürüa̧dejȩrȩ.

³ Jabo Pedro judi yo̧mȩrȩ iëno̧ë ta̧rëa̧dejȩ Anania ju̧i̧: —¿Jabo tjana̧ ju̧i̧iä na̧ chji̧ oa boarea̧ yürüa̧renȩjo̧ȩ Ichiae pio ju̧i̧? —iëno̧ë ta̧rëa̧dejȩ—. ¿Tjana̧ ju̧i̧iä ma̧ȩ chjádë yürüa̧renȩ Tjo tjamo̧ pio ju̧i̧iäpȩmo̧? Danȩ, mȩnȩ chiri baremȩ pio ju̧i̧ ütëbo oa yürücji̧ quëna̧ japea̧renȩ. ¿Tjana̧ ju̧i̧iä ja̧di dari̧ japea̧renȩ? —iëno̧ë ta̧rëa̧dejȩ—.

⁴ Danȩ, mȩnȩ pio jiro chiri oa jabë gatë tänȩdëa̧rä, jabechji̧ na̧ea̧remȩde. Ado mȩnȩ gatë tänȩa̧ ba oa mitëa̧ chëre üdë, peaja̧di na̧ea̧remȩde ütëborë. Ado mȩnȩ jo̧rȩta̧mi̧ japea̧rä judi, mȩnȩ boa̧ chërera̧ pio ju̧ri̧ra̧ jo̧rȩtami̧ japea̧rä judi, jabechji̧ chjadëtäremȩde na̧ea̧ tara —yo̧a̧dejȩ—. Ado mȩnȩ pio ibëiäpȩmo̧ jabëtari̧mi̧ maea oa yürürea̧ tararä judi, jabechji̧ jabëtari̧mi̧ maea oa yürüa̧täremȩrenȩ. Jabechji̧ chjadëtäremȩde. Jabechji̧ mȩnȩ tara̧mi̧ yürüa̧täremȩrenȩ jabo u̧i̧parea̧ decjiari̧ —yo̧a̧dejȩ—. Pio ju̧i̧iä iëno̧ë ta̧rërequedemȩ Anania. ¿Jabo tjana̧ ju̧i̧iä ma̧ȩ chjádë yürüa̧renȩ? Mȩnȩ tjamo̧ri̧ yürütärea̧ ji̧, mȩnȩ u̧i̧parea̧ decjiari̧ yürütärea̧ ji̧, ¿tjana̧ ju̧i̧iä ütëbo oa yürücji̧ quëna̧ u̧i̧patea̧renȩ? Pumȩ pio ji̧ri̧iäpȩmo̧ tjamo̧ri̧ ma̧ȩ chjádë yürüdëa̧renȩ jabo Ütë tjamo̧ pio ju̧i̧iäpȩmo̧ ma̧ȩ chjádë yürüa̧renȩ —yo̧mȩrȩ yo̧rëremȩdejȩ Anania ju̧i̧ Pedro judi.

⁵ Ado Anania judi pio jiro ma̧ȩ oa ta̧rë ëte, chjaodëri̧ ja̧boa̧mȩrȩ cjatäëno̧a̧de daburo. Ado goë ta̧rëji̧ri̧ judiro̧ ütëbodärärë i ma̧na̧gurami̧ tarari̧ jo̧rȩtaji̧ri̧pea̧dirȩ, uapa tjamo̧ji̧ri̧rȩ.

⁶ Ja̧dëa ji̧ pea ütëpea̧ oari pio judiro̧ ja̧boa̧mȩ pio ju̧i̧rea̧ ja̧ icjara oa chjibo cotoi̧ra̧ puri ëte, a̧doparea̧ bëri judiri arë go̧dü tänȩ ëte, daburo na̧ra̧diro̧jo̧ȩ dairäpȩ.

⁷ Ji̧dë duri oa do üdë ji̧dë u̧i̧ uëpea̧rä, 3 ora chjätä ëte, Anania pio ju̧i̧rea̧ ja̧ iei̧ pio jini̧ peaja̧di yu̧a̧däräa̧nȩ a̧doparea̧ bëräpȩ, ëbamȩ judi ja̧boa̧ pio ju̧i̧ chjiari dabadëyi̧rȩ.

⁸ Ado Pedro judi yo̧mȩrȩ iëno̧ë ta̧rëa̧dejȩ: —Damȩ, ¿napai̧ chërerä gatë tänȩa̧mȩnȩro̧ju̧i̧ dibëa̧ chiriremȩ oa? Mȩnȩ na̧ üi̧ pio ju̧i̧ nö̧ta jo̧rȩta̧mi̧ gatë tänȩa̧ ji̧, ¿ja̧di chëre ji̧ra̧rä gatë tänȩdëa̧mȩnȩro̧ju̧i̧? Ado Anania ja̧ iei̧ pio jini̧ dëbë yo̧yi̧rȩ ma̧ȩ chjádë yürüa̧nȩjȩ Pedro ju̧i̧: —Aja̧, ja̧di chërerä gatë tänȩa̧rea̧ro̧jo̧ȩ ibëa̧ chiriremȩ oa.

⁹ Ado ja̧dëa ji̧ Pedro judi yo̧a̧dejȩ: —¿Jabo tjana̧ ju̧i̧iä u̧i̧patea̧nȩro̧ju̧i̧ Ano̧mȩ ja̧ Tjo pio ju̧i̧? —iëno̧ë ta̧rëa̧dejȩ—. ¿Tjana̧ ju̧i̧iä ütarami̧ dari̧ japea̧nȩro̧ju̧i̧. 'Jabechji̧ dabadaemȩ jirodida, a̧ro̧rȩ chëre oa u̧i̧paji̧ri̧rȩ yürürä judi, Tjo tjamo̧ judi dabadaemȩ jirodida' quëna̧ jo̧rȩtareji̧ri̧nȩro̧ Tjo tjamo̧ pio ju̧i̧ ütarami̧ dari̧ japapea̧ oa. ¿Jabo tjana̧ ju̧i̧iä ja̧di dari̧ japatea̧nȩro̧ju̧i̧? Damȩ, pio yabo na̧ üi̧rea̧ pio ju̧i̧ ja̧ icjararemȩ oa na̧ra̧reji̧ri̧ pio judiro̧ bätätä eari̧ jana̧diro̧ma̧ na̧ icjara pio ju̧i̧bo daburo na̧ra̧pea̧ oa.

¹⁰ Ado judirä chjaodëri̧ ja̧boa̧nȩ Chipira jini̧. Daburäpȩ cjatäëno̧a̧nȩ Pedro ja̧ dëbëräpȩ pio ju̧ri̧. Ado oari judiro̧ yu̧a̧däräa̧ ji̧, pio ji̧ ja̧ icjararemȩ oa daea̧ oaiä, dairäpȩ arë go̧düdärä ëte na̧ra̧diro̧jȩ jibëa̧ jadü ja̧ yuroro.

¹¹ Ado a̧doparea̧ codërë jibëa̧ chji̧ oa bücjü ma cjiari̧ jo̧rȩtaji̧ri̧pea̧dirȩ, uape uape jo̧rȩtaji̧ri̧rȩ. Ado judiro̧mo̧rȩdë jabo goë goë ta̧rëa̧ji̧ri̧ pio judiro̧borë bücjü ma cjiari̧ jo̧rȩtaji̧ri̧pea̧dirȩ.

Jechurë chjadüa̧ pio judiro̧ no̧i̧dë oa chjaparȩrëreji̧ri̧diro̧jȩrȩ, pumȩ bubarë quëna̧ji̧ri̧pe bagarea̧mi̧ dari̧

¹² Ado Jechurë chjadüa̧ pio judiro̧ ana̧ri̧ na̧rȩji̧ri̧rȩ jauëchja cjiari̧ chjaparȩ chjaorëreji̧ri̧diro̧jȩrȩ pumȩ no̧i̧dë oa. Ütëborë darea̧mi̧ dari̧ chjaparȩrëreji̧ri̧diro̧jȩrȩ. Ado quëna̧ji̧ri̧ pio judiro̧ ütëborë, jabechji̧ Ütë tjamo̧ ja̧ bë yuroräpȩ ju̧ri̧ ji̧dë ma a̧dope chjaorëreji̧ri̧dirȩ. Ütë tjamo̧ ja̧ bëri pio judiri cjaȩta̧ra̧rimo̧ a̧rüa̧ oa cjiamȩräpȩ ju̧ri̧, tutia̧ oa cjiadëmȩräpȩ ju̧ri̧, 'Choromo̧ ja̧ bë' quȩmȩ bëräpȩ ju̧ri̧ ji̧dë ma a̧dope chjaorëreji̧ri̧dirȩ.

¹³ Jabo quëna̧dëji̧ri̧ judiro̧ ëba a̧dopadërëreji̧ri̧diro̧jȩrȩ quëna̧ji̧ri̧ pio ji̧ri̧ nö̧ta. Jabechji̧ pio ji̧ri̧ ba chia daea̧räbo ëba a̧dopadërëreji̧ri̧diro̧jȩrȩ uapa tara.

¹⁴ Jabo o judiro̧ noi̧dërë quëna̧ji̧ri̧pea̧diro̧jo̧ȩ Ano̧mȩ ju̧i̧, goëje ji̧ra̧ tjamo̧pe järea̧mi̧ dari̧. Aja̧, oari judiro̧, iviborë quëna̧ji̧ri̧pea̧dirȩ.

¹⁵ Ado Jechurë chjadüa̧ judiro̧ ji̧dë ma ana̧ri̧ na̧rȩ chjaoa̧ oaiä, jabechji̧ pumȩ judiro̧ gito ja̧boji̧ri̧ pio ji̧ri̧ jibëa̧ bëri pio judiri ara jä chjaorëreji̧ri̧diro̧jȩrȩ järea̧ no̧räpȩ yuro pio ju̧ri̧pȩ ano̧ mire a̧rȩpea̧ oa. Ado Pedro judi chjätäa̧rä, ju̧i̧ ja̧ chja̧oe üdë pio ji̧ri̧ ja̧ icjara uëmo̧ chja̧oe chjätäpea̧ oa, gito ja̧boji̧ri̧ judiro̧ chjaparȩa̧ oa cjiarëreji̧ri̧dirȩ. Jabechji̧ ja̧di dari̧ japarëreji̧ri̧dirȩ.

¹⁶ Ado Jerucharȩ dairäpȩ cjiamȩ bë ma̧ri̧ri pio judiribo go̧düdärä chjaorëreji̧ri̧dirȩ pumȩ bubarë. Gito ja̧boji̧ri̧ pio ji̧ri̧ ëba go̧düdärärëreji̧ri̧diro̧jȩrȩ, yaröca chiaji̧ri̧ pio ji̧ri̧bo. Ado ütëbodärärë chjaparȩa̧ oa cjiarëreji̧ri̧dirȩ, cja̧rȩmȩrȩ cjiadiädëri̧.

Jechurë chjadüa̧ pio ji̧ri̧ chaärëreji̧ri̧diro̧jȩrȩ

¹⁷ Jabo tjamo̧ yo̧ji̧ri̧ judiro̧ Jechurë chjadüa̧ pio judiro̧ ana̧ri̧ na̧rȩa̧ pio ju̧i̧ chjiari ta̧rëa̧ oaiä ana̧ri̧ jo̧rȩtaji̧ri̧pea̧dirȩ. Jabechji̧ quëbaji̧ri̧rȩ jo̧rȩtaji̧ri̧pea̧dirȩ. Aja̧, tjamo̧ goë tuti ja̧bepamȩ pio judi, jibëa̧ jadüborë, ado Chaducheo pio judiro̧borë ana̧ri̧ jo̧rȩtaji̧ri̧pea̧dirȩ pio ji̧ri̧ chjiari ta̧rëa̧ oaiä. Ado pio ju̧i̧iä järipea̧dirȩ pio ji̧ri̧ dëbëpe chjaopea̧ oa.

¹⁸ Ado acji mitërëreji̧ri̧diro̧jȩrȩ. Ado chaärëreji̧ri̧diro̧jȩrȩ chaärea̧ bëräpȩ ju̧ri̧.

¹⁹ Jabo gȩnȩpea̧rä, Ano̧mȩrȩ chjadüa̧ mu̧i̧tjoi̧ pio judi are iëa̧dejȩ chaärea̧ bë tuti cararea̧ joë ya pio ju̧i̧. Ado dairäpȩ yuro chjadëri̧ ëba jäa̧dejȩrȩ. Ado dairäpȩ go̧düdärä ëte, ja̧di ta̧rëri̧ yo̧a̧dejȩrȩ a̧dërimȩ mu̧i̧tjoi̧ judi:

²⁰ —Jaechji̧vä. Ütë tjamo̧ ja̧ bëräpȩ jächji̧vä. Ado ju̧ri̧pȩ go̧düdärä ëte, jabechji̧ ni̧bä chjaochji̧jȩrȩ pumȩ ji̧ri̧ judiro̧ chjadëri̧ dabapapea̧ oa pea chjari̧ cjo̧ro̧pea̧ pio ju̧i̧ chjiari, Ütërë yürüa̧ cjo̧ro̧rea̧ pio ju̧i̧ chjiari. Jächji̧vä —yo̧a̧dejȩrȩ mu̧i̧tjoi̧ judi.

²¹ Ado pio ju̧i̧ ta̧rëa̧ ju̧i̧iä, Jechurë chjadüa̧ pio judiro̧ Ütë tjamo̧ ja̧ bëräpȩ jäeno̧a̧dirȩ. Ado peadai̧rä go̧düdäräa̧dirȩ. Ado chjaodëri̧ taruparëreji̧ri̧dirȩ a̧ra̧ano̧pea̧ ji̧ pea chjari̧ cjo̧ro̧pea̧ pio ju̧i̧ chjiari. Jabo judiro̧ Ütë tjamo̧ ja̧ bëräpȩ a̧ra̧ano̧a̧ nö̧ta, tjamo̧ yo̧ji̧ri̧ pio judiro̧ jëdano̧a̧dirȩ a̧dopapea̧ ji̧. Tjamo̧ goë tuti ja̧bepamȩ judi jibëa̧ jadü pio ji̧ri̧ nö̧ta ma̧ȩ chjadüa̧diro̧jȩrȩ judio tjamo̧ yo̧ji̧ri̧ pio ji̧ri̧iäpȩmo̧ a̧dopera̧tä pio ji̧ri̧ nö̧ta. Ja̧dëa ji̧ judiro̧ ütëborë güdodäräa̧rä, guadia pio ji̧ri̧ chjadütea̧diro̧jȩrȩ Jechurë chjadüa̧ pio ji̧ri̧ ëba jana̧tä.

²² Jabo guadia judiro̧ chaärea̧ bëräpȩ go̧düdäräa̧rä, dadärädëa̧diro̧jȩrȩ. Ado pio ju̧i̧iä ado chjereno̧ jäeno̧a̧dirȩ tjamo̧ yo̧ji̧ri̧ pio ji̧ri̧iäpȩmo̧. Ado ja̧di ta̧rëri̧ yo̧rëreji̧ri̧diro̧jȩrȩ:

²³ —Danȩrȩ, a̧ro̧rȩ chaärea̧ bëräpȩ go̧düdäräa̧rä, jabechji̧ chjuari̧ cjia maea oa daea̧rea̧ro̧jo̧ȩ tuti cararea̧ joë ya oa —yo̧a̧diro̧jȩrȩ—. Ado guadia ji̧ri̧ ütëbo oa daea̧rea̧ro̧jȩrȩ peaja̧di chjadëri̧ jidaji̧ri̧ oa. Jabo chjaärea̧ jo̧ tjoräpȩ yu̧a̧ ji̧, jabechji̧ dadëa̧rea̧ro̧jȩrȩ. A̧dë cjarapea̧diro̧ibe —yo̧a̧diro̧jȩrȩ.

²⁴ Ado tjamo̧ goë tuti ja̧bepaji̧ri̧ pio judiro̧ pio ju̧i̧ ta̧rëa̧ oaiä, ado Ütë tjamo̧ ja̧ bë oa jidaji̧ri̧ pio ji̧ri̧ ja̧ ütë üdë pio ju̧i̧ ta̧rëa̧ oaiä, ana̧ri̧ jo̧rȩtaji̧ri̧pea̧dirȩ Jechurë chjadüa̧ pio ji̧ri̧ chjiari. '¿Tjana̧räpȩcjivadiro̧, ¿yö̧ta dari̧ go̧dürea̧ daea̧cjivadiro̧' quëna̧ jo̧rȩtaji̧ri̧pea̧dirȩ.

²⁵ Ado pio jiro japamitërä, cja̧rȩmȩ üdë chjaodëri̧ go̧düdäräa̧de, ma̧ȩ goa jana̧mȩ judi. Ado ja̧di ta̧rëri̧ yo̧a̧dejȩrȩ: —Danȩrȩ, mȩnȩro̧ chaärea̧ bëräpȩ chaäa̧rea̧ pio judiro̧ jabechji̧ Ütë tjamo̧ ja̧ bëräpȩdirȩ. Ado pio ju̧ri̧pȩ a̧ra̧ano̧diro̧jȩrȩ pumȩ ji̧ri̧ —yo̧a̧dejȩrȩ.

²⁶ Ado Ütë tjamo̧ ja̧ bë oa jidaji̧ri̧ guadia pio judiro̧ pio ju̧i̧ ta̧rëa̧ oaiä, jibëa̧ ütë pio ju̧i̧ nö̧ta chjaodëri̧ jäeno̧a̧diro̧jȩrȩ ado chjereno̧ ëba jana̧pea̧ oa. Jabo chjuari̧ mitë ëte ëba jana̧tärea̧ ji̧, bücüi̧ra̧ japarëreji̧ri̧diro̧jȩrȩ pumȩ judiro̧ pio jibëiäpȩmo̧ ta̧dëra̧ pio ju̧ri̧ra̧ ae ja̧bo tänȩchea oa. 'Aja̧, pumȩ bubadiro̧da, ta̧dëra̧ ae ja̧bo tänȩpai̧ dadiro̧ibëda' quëna̧ jo̧rȩta̧ oaiä, jabechji̧ gitori̧ japadëa̧diro̧jȩrȩ uapa tara.

²⁷ Ja̧dëa ji̧ yu̧a̧ tänȩ ëte, Jechurë chjadüa̧ pio ji̧ri̧ tjamo̧ yo̧ji̧ri̧ judiro̧ a̧doparea̧ jo̧ tjoräpȩ yu̧a̧ tänȩ ëte, pio ji̧ri̧ ja̧ yaboräpȩ cjia tänȩa̧diro̧jȩrȩ. Ja̧dëa ji̧ tjamo̧ goë tuti ja̧bepamȩ pio judi iëno̧ë ta̧rëa̧dejȩrȩ:

²⁸ —Danȩrȩ, a̧ro̧rȩ dibë nö̧ta no̧mȩ a̧doparërea̧ ji̧, to̧bari̧ yo̧tea̧rea̧ro̧dibe mȩnȩro̧ Jechu pio ju̧i̧ chjiari ni̧bä chjaodëtä. Jabo cjäri̧ manȩrȩ, ma̧i̧ dari̧ japea̧renȩrȩ —yo̧a̧dejȩrȩ—. Jerucharȩräpȩ cjo̧ro̧ji̧ri̧ judiro̧ ütëbodärärë ta̧rërea̧mi̧ dari̧ a̧ra̧ano̧rëreji̧ri̧nȩrȩ pio ju̧i̧ chjiari. Ado pio ju̧i̧ uëri pio ibëiäpȩmo̧ aeno̧ chjaorenȩro̧ibe Jechu judi ja̧boa̧ pio ju̧i̧ chjiari.

²⁹ Jabo Pedro judi jibëa̧ jadü pio ji̧ri̧ nö̧ta dëbë yo̧ji̧ri̧rȩ yo̧a̧diro̧jȩrȩ ütëbo oa: —Danȩrȩ, dibëa̧ ma̧ȩrä cjo̧ro̧dërea̧rȩ jabo Ütë tjamo̧ pio ju̧i̧ ja̧ ma̧ȩrämo̧ cjo̧ro̧rea̧rȩ —yo̧a̧diro̧jȩrȩ—. Pio ju̧i̧iä dibëa̧ ma̧ȩ pio ju̧i̧ jiadarea̧ro̧jo̧ȩ.

³⁰ Danȩrȩ, pio mȩnȩro̧ tjamo̧nȩrȩ Jechu pio ju̧i̧ ja̧bo tänȩrëreji̧ri̧ judiro̧. Pio mȩnȩro̧ tänȩa̧ oa toro cji̧däa̧diro̧jo̧ȩ chjipararira̧. Jabo danȩrȩ, ibëa̧ ütëti̧rea̧ ja̧ Ütë pio judi bëdü tänȩrëremȩdejȩ —yo̧a̧diro̧jȩrȩ—.

³¹ Ado bëdü tänȩ ëte, cjitë tänȩrëremȩdejȩ a̧dëräpȩ yuro jibëa̧ mu̧i̧ chjua cotoi̧räpȩ chadäräpea̧ oa. Tjamo̧ davä. Ano̧mȩ pio ju̧i̧, Chjätä Tänȩmȩ pio ju̧i̧ cjitë tänȩa̧dejȩ Icharai pio judiri ja̧ji̧ri̧ pio judiro̧ ano̧ mire jo̧rȩtapea̧ oa, pio judiro̧ duridëparȩa̧ oa cjiapea̧ oa.

³² Ado a̧ro̧rȩ irä daea̧ oaiä, jabechji̧ Jechu pio ju̧i̧ chjiari ni̧bäji̧ri̧pea̧rea̧rȩ. Ado a̧ro̧rȩmo̧rȩdë jabo Tjo tjamo̧ pio judiborë ni̧bämȩde pio ju̧i̧ chjiari. Tjamo̧ davä, Ütë tjamo̧ judi quëna̧ji̧ri̧ pio ji̧ri̧iäpȩmo̧ yürüa̧ pio judi peaja̧di ni̧bäde davä Jechu pio ju̧i̧ chjiari —yo̧ji̧ri̧rȩ dëbë ni̧bä chjaorëreji̧ri̧diro̧jȩrȩ tjamo̧ yo̧ji̧ri̧ pio ji̧ri̧iäpȩmo̧ Jechurë chjadüa̧ pio judiro̧.

³³ Jabo tjamo̧ yo̧ji̧ri̧ judiro̧ pio jiro ma̧ȩ oa ta̧rëa̧ oaiä, a̧dë chjäte ërecjiapea̧dirȩ. Ado chjaodëri̧ ja̧bo tänȩtämi̧ cjiaji̧ri̧pea̧diro̧jȩrȩ Jechurë chjadüa̧ pio ji̧ri̧.

^34-35 Jabo cja̧rȩmȩrȩ, paricheorë tuti chi̧dëearëremȩdejȩrȩ, Gamariera quȩmȩ pio judi. Aja̧, pumȩ ütëborë ba chia darërea̧ pio judi, tjamo̧ yo̧mȩrȩ cjo̧ro̧mȩ pio judi, ichi chjö̧na̧i̧ ma̧ȩ oa a̧ra̧ano̧mȩrȩ cjo̧ro̧mȩ pio judi chjadëri̧ tuti chi̧dëea̧dejȩrȩ jibëa̧ jadü pio ji̧ri̧, tjamo̧ ütarë yo̧ji̧ri̧ judio pio ji̧ri̧. Ado Jechurë chjadüa̧ judiro̧ ta̧rëchea oa, jabechji̧ a̧doparea̧ jo̧ tjo dairäpȩmo̧ chjadüa̧dejȩrȩ judiro̧ goadi ni̧bä chjaopea̧ oa pio ji̧ri̧ chjiari. Ado judiro̧ go̧düa̧ duri oa, ja̧di ta̧rëri̧ yo̧mȩrȩ tuti chi̧dëearëremȩdejȩrȩ: —Danȩrȩ ca̧ oti̧, Icharai pio judiri ja̧ maea oa ni̧bä chjaorequededibe —yo̧a̧dejȩrȩ—. Jabo danȩrȩ, quëna̧chji̧vä. Pio jiro oari pio ji̧ri̧iäpȩmo̧ oëra̧ japadëchji̧jȩrȩ.

³⁶ Jabechji̧ no̧mȩ cjo̧ro̧rëremȩ pio ju̧i̧, Teuda quȩmȩ pio ju̧i̧ ¿jo̧rȩtadënȩrȩ ca̧ jadü? Dëdë, jo̧rȩta jirorenȩro̧jo̧ȩ. Pio judi goaeri̧ yo̧a̧ oaiä, no̧i̧dërë cho̧rë jäa̧diro̧jo̧ȩ. 'Ba chiadida, tjamo̧ yo̧mȩdida, ibë a̧dorea̧mi̧ dadida' quëna̧ jo̧rȩtaji̧ri̧rȩ cho̧rë järëreji̧ri̧diro̧jo̧ȩ. Aja̧, 400 oari judiro̧ cho̧rë jäa̧diro̧jo̧ȩ. Jabo japamitë chjätä ëte, pumȩrȩ tänȩa̧ oa ja̧boa̧de. Ado ju̧i̧ cho̧rë järeji̧ri̧ pio judiro̧, cjäri̧ madirȩ, chjuchjupechärëreji̧ri̧dirȩ. Ado yaba̧ ji̧dë ma jo̧rȩtadë madiro̧jo̧ȩ.

³⁷ Ado ji̧dë duri oa japamitë chjätä ëte pumȩ ütëbo oa ütararërea̧ ji̧, Garirea quȩmȩ chiriri pio judirimȩ pio judi ma̧na̧de, Juda quȩmȩ pio judi. Ado no̧i̧dërë pio ju̧i̧ ano̧ mire cho̧rë järëreji̧ri̧diro̧jo̧ȩ. Jabo peaja̧di ja̧bo tänȩa̧diro̧jo̧ȩ orë. Ado ju̧i̧ cho̧rë järeji̧ri̧ pio judiro̧ peaja̧di oëra̧ti̧ oa chjuchjupechäa̧ oa cjia maeadirȩ yaba̧.

³⁸ Ja̧di tara yo̧requededibe ca̧ oti̧. Eami̧ oa japadëchji̧jȩrȩ pio jiro oari pio ji̧ri̧iäpȩmo̧. Jabechji̧ japadëchji̧jȩrȩ. Judiro̧ japea̧ üdë pumȩ pio ju̧i̧iä tarupea̧rä judi, jabechji̧ badëde. Chjaodëri̧ goarijäpade.

³⁹ Jabo danȩrȩ, judiro̧ japea̧ üdë Ütë tjamo̧ pio ju̧i̧iä tarupea̧rä judi, jabechji̧ goarijädëpade. Ado mȩnȩro̧ pio jiro oari pio ji̧ri̧iäpȩmo̧ dëbëpe chjaoa̧ oaiä, jabechji̧ Ütë tjamo̧ pio ju̧i̧iäpȩmo̧ dëbëpe chjaomi̧ dari̧ cjiapai̧ danȩrȩ. Ja̧di tara yo̧requededibe. Quëna̧chji̧vä —yo̧mȩrȩ tuti chi̧dëearëremȩdejȩrȩ Gamaiera judi.

⁴⁰ Ado tjamo̧ yo̧ji̧ri̧ judiro̧ Gamariera pio ju̧i̧ ja̧ ma̧ȩ oa ta̧rë ëte, ado chjereno̧ yu̧a̧ tänȩa̧diro̧jȩrȩ Jechurë chjadüa̧ pio ji̧ri̧. Ado tjamo̧ yo̧ji̧ri̧ pio judiro̧ yo̧a̧ oa, bide cjaeäji̧ri̧ pio judiro̧ bide cjaeärëreji̧ri̧diro̧jȩrȩ. Ja̧bo tänȩtärea̧ ji̧, jabomo̧ bidë cjaeäa̧ oa cjiadiä tänȩdiro̧jȩrȩ. Gamariera pio judi yo̧a̧ oaiä, cjiadiämi̧ tarari̧ cjiadiärëreji̧ri̧dirȩ. Ado bide cjaeäa̧ duri oa, ado to̧bari̧ yo̧a̧diro̧jȩrȩ Jechu pio ju̧i̧ chjiari ni̧bä chjaodëtä, cjapiri̧ cjo̧ro̧tä. Ado ja̧di ta̧rëri̧ chi̧dëea ëte, baä tänȩrëreji̧ri̧diro̧jȩrȩ.

⁴¹ Ado Jechurë chjadüa̧ judiro̧ tjamo̧ ütarë yo̧ji̧ri̧ judio ja̧ a̧doparea̧ jo̧ tjori pio judiri gitori̧ taraji̧ri̧rȩ go̧düa̧ ji̧, jabechji̧ ma̧ chiadëri̧ cjiari̧ jo̧rȩtaji̧ri̧rȩ baärëreji̧ri̧dirȩ. 'Aja̧, nö̧taa̧ro̧da, Jechu pio ju̧i̧ chjiari chjai̧dë oa chjätäpea̧ ji̧ nö̧taa̧ro̧da, ado a̧ro̧rȩ chjai̧dë oa chjätäa̧ oaiä Ütë tjamo̧ judi ba chiaparȩmi̧ dari̧ japadiibëda, jabechji̧ a̧ro̧rȩ bide cjaeäa̧ oa cjia̧ oaiä ba chiaparȩmi̧ dari̧ japea̧diibëda' quëna̧ jo̧rȩtaji̧ri̧rȩ ma̧ chiadëri̧ cjiaji̧ri̧rȩ baärëreji̧ri̧dirȩ.

⁴² Ado judiro̧, jabechji̧ doti̧mi̧ a̧ra̧ano̧ chjaorëreji̧ri̧diro̧jo̧ȩ ma̧ȩ chjadëi̧ pio ju̧i̧, cjapiri̧ cjiarea̧ decjiari̧. Ütë tjamo̧ ja̧ bëräpȩ ju̧ri̧ ji̧dë ma a̧ra̧ano̧rëreji̧ri̧dirȩ, pumȩ ja̧ bëräpȩbo. Aja̧, Jechu pio ju̧i̧ chjiari ma̧ȩ oa a̧ra̧ano̧ chjaoa̧dirȩ Chjätä Tänȩmȩ pio ju̧i̧ chjiari ma̧ȩ oa.