Japarea̧ 3 - Biblia Pume

Pedro judi ta pirumȩ pio ju̧i̧ chjaparȩa̧ oaiä, ana̧ri̧ jo̧rȩtaji̧ri̧pe järëreji̧ri̧dirȩ pumȩ judiro̧

¹ Ado cja̧rȩmo̧ doremȩrä Juan judi ado Pedro judi järëreji̧ri̧dirȩ Ütë tjamo̧ ja̧ bëräpȩ. Judio judiro̧ Ütë tjamo̧ pio ju̧i̧ ni̧bäpea̧ ji̧ jädiärërea̧mi̧rä järëreji̧ri̧dirȩ dorë chjiaräpȩmo̧diäa̧rä.

² Ado Ütë tjamo̧ ja̧ bëräpȩ dae jäji̧ri̧rȩ darëreji̧ri̧diro̧jo̧ȩ ta pirumȩ pio ju̧i̧. Jojini̧rȩ ara̧ri ja̧ tai̧dëmȩ pio ju̧i̧ daea̧diro̧jo̧ȩ. Aja̧, jibëa̧ pumȩ judiro̧ doti̧mi̧ ara jä chjaoriärëreji̧ri̧diro̧jo̧ȩ Ütë tjamo̧ ja̧ bëräpȩ ju̧ri̧ chëre cjo̧dëpea̧ oa. Ütë tjamo̧ ja̧ bëräpȩ yu̧a̧rea̧ ya cotoräpȩ ju̧ri̧ chapea̧ oa, 'chjacjiamȩ' quȩmȩ joë ya cotoropȩ ju̧ri̧ chapea̧ oa, ara jä chjaoriärëreji̧ri̧diro̧jo̧ȩ yu̧a̧ji̧ri̧ pio ji̧ri̧iä cjo̧dëpea̧ oa.

³ Ja̧dëa ji̧ Pedro judi, Juan judiborë chjätätea̧ ji̧, ta pirumȩ pio judi cjo̧dëno̧a̧dejȩrȩ.

⁴ Ado pio jibëiäpȩmo̧ cjo̧dëa̧mȩ oa gatë daea̧diro̧jo̧ȩ. Ja̧dëa ji̧ Pedro judi yo̧a̧dejȩ: —Dëbë daibe.

⁵ Ado ta pirumȩ judi, 'Aja̧, chëre yürüpa jirodiro̧coada' quëna̧ jo̧rȩtamȩrȩ dëbë daea̧dejȩrȩ järi tjamo̧pe jämȩrȩ.

⁶ Ja̧dëa̧ ji̧ Pedro judi yo̧a̧dejȩ: —Danȩ, chëre goadërequede cüdë. Mö̧na̧requede, jabo cüdë goa̧ pio ju̧i̧ yürüparequedemȩ. Jabechji̧ Jechu Quiricho pio ju̧i̧ ja̧ quȩrä, Nachare quȩmȩ bë ma̧ri̧räpȩ ütëparëremȩ pio ju̧i̧ ja̧ quȩrä tai̧tä yo̧tarequedemȩ —yo̧a̧dejȩ.

⁷ Ja̧dëa ji̧ Pedro judi jibëa̧ ichi oa mu̧i̧ chjuari mitëmȩrȩ mu̧i̧ cjitërëremȩdejȩ ta pirumȩ ju̧i̧. Ado chjaodëri̧ ju chjadëparëremȩde. Chjaodëri̧ coë mape bagarëremȩdejȩ jibëa̧ ta cara ju üdë.

⁸ Ado ta piruremȩ üdë goae tarari̧ cjitëno̧mȩpea̧de yo̧dümȩrȩ. Ado tarupea̧de ta̧i̧pea̧ ji̧. Tjamo̧ davä, ta̧i̧mȩrȩ, chiqui chjaomȩrȩ, Ütë tjamo̧ pio ju̧i̧iäpȩmo̧ chjacjiamȩri̧ ni̧bämȩrȩ pio ji̧ri̧ nö̧ta yu̧a̧rëremȩde Ütë tjamo̧ ja̧ bëräpȩ, Jechurë chjadüa̧ pio ji̧ri̧ nö̧ta.

⁹ Ado pumȩ bubarë ta̧i̧mȩpea̧mȩ oa daea̧ oaiä, Ütë tjamo̧ pio ju̧i̧iäpȩmo̧ chjacjiamȩri̧ ni̧bämȩ oa ta̧rëa̧ oaiä,

¹⁰ ana̧ri̧ jo̧rȩtaji̧ri̧pea̧dirȩ. 'Chia chia, pio judidida, 'chjacjiamȩ' quȩmȩ joë ya cotoi̧räpȩ ju̧ri̧ ji̧dë ma charemȩ pio judidida, chëre cjo̧dë chjaoremȩ pio judidida, ta piruremȩ pio judidida' quëna̧ jo̧rȩtaji̧ri̧rȩ ana̧ri̧ jo̧rȩtaji̧ri̧pea̧dirȩ. 'Jabechji̧ ¿yö̧ta dari̧ chjapea̧ oa cjiacjivadi?' quëna̧ jo̧rȩtaji̧ri̧rȩ cjoai̧tä cjoai̧tä darëreji̧ri̧diro̧jo̧ȩ, ana̧ri̧ jo̧rȩtaji̧ri̧rȩ.

Pedro judi a̧ra̧ano̧rëremȩdejȩrȩ icharaita ji̧ri̧

¹¹ Ado ta piruremȩ judi, jabechji̧ Pedro pio ju̧i̧ ja̧ ichi oa mitë ano̧dëa̧dejȩ, Juan pio ju̧i̧bo. Ado pumȩ judiro̧ gürü toboe cjiaji̧ri̧rȩ, ¿yö̧ta dari̧ tai̧mȩpea̧cji̧vadi' quëna̧ jo̧rȩtaji̧ri̧rȩ jäeno̧a̧diro̧jȩrȩ pio ji̧ri̧iäpȩ, Ütë tjamo̧ ja̧ bë dairäpȩ ju̧ri̧, ji̧dë u̧i̧ chjadëri̧ datämi̧ cjiaji̧ri̧rȩ. Ütë tjamo̧ ja̧ bëri judiri cjaȩta̧ra̧rimo̧ a̧rüa̧ oa cjiamȩräpȩ ju̧ri̧, tutia̧ oa cjiadëmȩräpȩ ju̧ri̧, 'Choromo̧ ja̧ bë' quȩmȩ bëräpȩ ju̧ri̧ jäeno̧a̧dirȩ jachidë dapea̧ oa.

¹² Ado Pedro judi pumȩ bubarë gürü toboe cjiaji̧ri̧ oa daea̧ oaiä, iëno̧ë ta̧rëa̧dejȩrȩ: —Danȩrȩ ca̧ pumȩ, Icharai pio judiri ja̧ maea oa iëno̧ë ta̧rërequededibe. ¿Jabo tjana̧ ju̧i̧iä ana̧ri̧ jo̧rȩtanȩrȩ? ¿Tjana̧ ju̧i̧iä ya yabë cjiaji̧ri̧rȩ cjoai̧tä cjoai̧tä dae cjiarenȩro̧ibe? 'Jabechji̧ judiro̧ chjadëri̧ cjo̧ro̧a̧ oaiä chjaparȩrea̧ chia jirodiro̧da, pio judiro̧ jibëa̧ ma̧na̧ri̧ chjaparȩa̧ jirodiro̧ju̧i̧da, jibëa̧ jauëchja oaiä chjaparȩa̧ jirodiro̧ju̧i̧da' quëna̧rea̧mi̧dëde.

¹³ Jabechji̧ Ütë tjamo̧ pio judide pio yoa pumȩ oa chjaparȩa̧mȩ judi. Ibëa̧ ütëti̧rȩa judiro̧ quëna̧rërea̧ Ütë pio judide. Danȩrȩ, Abaraa̧ judi quëna̧rërea̧ Ütë pio ju̧i̧ quëna̧rëremȩdejȩ Icha judi. Ado Jacobo judi peaja̧di quëna̧rëremȩdejȩ. Ado judiro̧ quëna̧rërea̧ Ütë pio judi chjaparȩa̧dejȩ. Tjamo̧ davä. Jibëa̧ mu̧i̧tjoi̧ ju̧i̧, Jechu pio ju̧i̧ a̧dë chjäte ba chiaparȩpea̧ oa chjaparȩa̧dejȩ pumȩ judiro̧ ütëborë Jechu pio ju̧i̧iäpȩmo̧ ma chjacjiamȩri̧ jo̧rȩtapea̧ oa. Jabo cjäri̧ manȩrȩ, a̧dë chjäte ma̧i̧ dari̧ japea̧nȩrȩ —yo̧a̧dejȩrȩ.— Ütë tjamo̧ judi ba chiaparȩa̧ pio ju̧i̧ jiada̧renȩro̧jo̧ȩ. Ütë tjamo̧ judi na̧rȩa̧ pumȩ pio ju̧i̧ jiada̧renȩro̧jo̧ȩ. Pirato pio judi dibë yo̧tarërea̧ ji̧, "Cjäri made, ja̧bo tänȩdëpea̧de jabo baä tänȩpea̧de" yo̧tarërea̧ ji̧, cjäri̧ marenȩro̧jo̧ȩ, chjuari̧ jiada̧renȩro̧jo̧ȩ. 'Jabechji̧ Jechu pio judi ja̧bo tänȩpea̧dida' quëna̧ jo̧rȩtaji̧ri̧rȩ yürüa̧renȩro̧jo̧ȩ ja̧bo tänȩa̧ oa cjiapea̧ oa. Tjamo̧ davä. Pirato pio ju̧i̧ ja̧ dachoro järiji̧ri̧rȩ yürüa̧renȩro̧jo̧ȩ ja̧bo tänȩa̧ oa cjiapea̧ oa —yo̧a̧dejȩrȩ—.

¹⁴ Ado mȩnȩro̧ Jechu pio ju̧i̧ chjiari goë tuti cjo̧dëtärea̧ ji̧, cjäri̧ manȩrȩ, pumȩ ji̧ri̧ ja̧bo tänȩrëremȩ pio ju̧i̧ ano̧ mire mitëa̧renȩro̧jo̧ȩ. Mȩnȩro̧ tatachja tjamo̧mȩ pio ju̧i̧ mitëtärea̧ ji̧, a̧dë chjäte chjadëmȩ pio ju̧i̧ mitëtärea̧ ji̧, chjai̧dëri̧ jape chjaomȩ pio ju̧i̧ ano̧ mire mitëji̧ri̧rȩ goë tuti cjo̧dëa̧renȩrȩ Pirato pio ju̧i̧iä.

¹⁵ Cjo̧ro̧rea̧ yürümȩ pio ju̧i̧ ja̧bo tänȩa̧renȩro̧jo̧ȩ. Jabo danȩrȩ ca̧ oti̧, —yo̧a̧dejȩrȩ— mȩnȩro̧ ja̧bo tänȩrërea̧ pio ju̧i̧ bëdü tänȩa̧dejȩ Ütë tjamo̧ judi. Tjamo̧ davä. Mȩnȩro̧ ja̧bo tänȩa̧ pio judi bëdüa̧ oa cjiade yaba̧. Irä daea̧rea̧ro̧jo̧ȩ a̧ro̧rȩ. Bedüa̧mȩ oa irä daea̧rea̧ro̧jo̧ȩ.

¹⁶ Ado pio judi tjamo̧de ta piruremȩ pio ju̧i̧ chjaparȩa̧mȩ judi, a̧ro̧rȩdë. Jabechji̧ Jechu pio ju̧i̧ ja̧ jauëchja oaiä chjapea̧ oa cjiade. Pio ju̧i̧ ja̧ quȩ pio oaiä ju chjadëpea̧de. Tjamo̧ davä. A̧ro̧rȩ quëna̧ oaiä, 'Aja̧, Jechu judi chjaparȩmȩdida' quëna̧ oaiä, jabechji̧ chjaparȩa̧ oa cjiade yaba̧ pio mȩnȩro̧ ütëbodärärë dari̧ —yo̧a̧dejȩrȩ—.

¹⁷ Jabo danȩrȩ ca̧ oti̧, tjamo̧ri̧ dabarequede pio dibë chjiari, tjamo̧ yo̧ji̧ri̧ pio ji̧ri̧ chjiari. Jabechji̧ dabadëa̧nȩrȩ. Mȩnȩro̧ ma̧i̧ dari̧ japea̧ ji̧, 'Aja̧, Jechu judi Chjätä Tänȩmȩ pio judidida' quëna̧ dabadërëreji̧ri̧nȩrȩ.

¹⁸ Jabo danȩrȩ, Ütë tjamo̧ judi pearä judi ütarë jo̧rȩtarërea̧ üdë, Chjätä Tänȩmȩ judi gitoi̧ dari̧ ja̧bopea̧ pio ju̧i̧ chjiari ütarë jo̧rȩtarërea̧ üdë tjamo̧i̧padäräa̧ oa cjiadiäa̧de yaba̧. Tjamo̧ davä. Ütërë ea jana̧ chjadüa̧ oa ni̧bäji̧ri̧ pio judiro̧ Chjätä Tänȩmȩ pio ju̧i̧ chjiari jabërä yo̧rërea̧ ma̧ȩ üdë tjamo̧i̧padäräa̧ oa cjiadiäa̧de Ütë tjamo̧ pio judi tänȩa̧ oaiä. Jabechji̧ pio judi ütarë jo̧rȩtarërea̧mi̧ gitoi̧ dari̧ ja̧boa̧de Jechu judi.

¹⁹ Ja̧di tara ano̧ mire jo̧rȩtachjivä ca̧ oti̧, —yo̧a̧dejȩrȩ—. Mȩnȩro̧ Ütë tjamo̧ pio ju̧i̧iäpȩmo̧ chjai̧dëri̧ japea̧ üdë duridëparȩa̧ oa cjiapea̧ oa, jabechji̧ chjere jo̧rȩtachji̧vä mȩnȩro̧ ma̧ chjupi̧ cjiari̧ jo̧rȩtami̧ dari̧ jo̧rȩtapea̧ oa. Aja̧, Ütë tjamo̧ judi pio dibë cjatäcjie jo̧rȩtarea̧ yürüpea̧ oa, jabechji̧ ano̧ mire jo̧rȩtachji̧vä.

²⁰ Ado mȩnȩro̧ ja̧di dari̧ poë cürë jo̧rȩtarä judi, jabechji̧ Ano̧mȩ pio ju̧i̧iä ma̧ chjupi̧ cjiari̧ jo̧rȩtarea̧ dapanȩrȩ. Ado Ütë tjamo̧ judi ado chjereno̧ chjadüpadejȩ Chjätä Tänȩmȩ Jechu pio ju̧i̧, pio dibë chjiari peadëri ja̧ mitëa̧ oa cjiarëremȩ pio ju̧i̧.

²¹ Jabo jabëde jabo. A̧dëräpȩ ju̧ri̧ cjiade. Ado pio ju̧ri̧pȩ cjiadiäpea̧ chiade Ütë tjamo̧ judi chjö̧na̧i̧ oa pea chja mape bagari̧ jëdano̧a̧ yuro. Jabo jëdano̧rea̧ japamitërä, dëdë, ado chjereno̧ chjadüpadejȩ Ütë tjamo̧ judi —yo̧a̧dejȩrȩ—. Peaja̧di ta̧rëri̧ go̧ȩpea̧ oa cjiade ma̧ȩ üdë, Ütërë ea jana̧ chjadüa̧ oa ni̧bäji̧ri̧ pio judiro̧ go̧ȩparërea̧ oaiä.

²² Tjamo̧ davä. Moiche judi peaja̧di ta̧rëri̧ yo̧rëremȩdejȩrȩ ibëa̧ ütëti̧rea̧ pio ji̧ri̧iäpȩmo̧ Jechu judi birapea̧ pio ju̧i̧ chjiari, judi ma̧na̧pea̧ pio ju̧i̧ chjiari. Ta̧rëchji̧vä judi yo̧rërea̧ pio ju̧i̧: "Dibëa̧ Ano̧mȩ Ütë pio judi chjadüpadidibe cja̧rȩmȩ oa. Aja̧, Ütërë ea jana̧ chjadüa̧ oa ni̧bäpamȩ pio ju̧i̧ chjadüpadejȩ. Pio coa chjadürërea̧mi̧ chjadüpadejȩ peaja̧di. Tjaoëmȩ oa chjadüdëpadejȩ jabo dibëa̧ chjarerä cjo̧ro̧pamȩ pio ju̧i̧ chjadüpadejȩ, dibëa̧ pumȩ pio ju̧i̧", yo̧rëremȩde Moiche judi, "Ado danȩrȩ, pio jiro pumȩ judi yo̧a̧mi̧ ta̧rë ta̧rë japapea̧ maeade.

²³ Ado eami̧ pumȩ üdë pio ju̧i̧ ta̧rë ta̧rë japadërä judi, jabechji̧ dairäpȩmo̧ tutia̧ oa cjiami̧ dari̧ cjiadiäpade gito ana̧ tjamo̧ri̧, jibëa̧ pumȩ pio ji̧ri̧ nö̧ta ëba cjiarea̧mi̧dëri̧."

²⁴ Aja̧ ca̧ oti̧, ja̧di ta̧rëri̧ yo̧rëremȩde Moicherea̧ judi ibëa̧ ütëti̧rea̧ ji̧ri̧. Jabo danȩrȩ, pio judimo̧rȩdë, jabo o judiro̧ peaja̧di ni̧bärëreji̧ri̧dirȩ pio jiro japamitë pio ju̧i̧ chjiari, a̧ro̧rȩ cjo̧ro̧mȩ japamitë pio ju̧i̧ chjiari —yo̧a̧dejȩrȩ Pedro judi—. Danȩrȩ, Chamue judi, ado pio ju̧i̧ ja̧ duri oa ano̧ mire ni̧bäji̧ri̧ pio judiro̧borë ni̧bä marëreji̧ri̧dirȩ pio jiro japamitë pio ju̧i̧ chjiari. Jechu judi birë ma̧na̧pea̧ pio ju̧i̧ chjiari ni̧bärëreji̧ri̧dirȩ Ütërë ea jana̧ chjadüa̧ oa.

²⁵ Ado danȩrȩ ca̧ oti̧, Ütërë ea jana̧ chjadüa̧ oa ni̧bäji̧ri̧ judiro̧ dibëa̧ ütëti̧ pio ji̧ri̧iäpȩmo̧ ni̧bä chjaorërea̧ ma̧ȩ üdë, jabechji̧ dibëa̧bode mȩnȩro̧ pio judiri ja̧ji̧ri̧ tara. Pio ju̧i̧iä Ütë tjamo̧ judi yürë cji̧däa̧ ma̧ȩ üdë, pio ji̧ri̧iäpȩmo̧ yürë cji̧däa̧ ma̧ȩ üdë, jabechji̧ pio dibëa̧bode —yo̧a̧dejȩrȩ—. Danȩrȩ, ta̧rëchji̧vä ma̧ȩ oa, Ütë tjamo̧ judi Abaraa̧ pio ju̧i̧iäpȩmo̧ yo̧ë cji̧därërea̧ ma̧ȩ oa: "Na̧ea̧ri ja̧mȩ pio ju̧i̧iä chjadëri̧ cjiadiärea̧ dapadirȩ chiri nö̧tai̧ oa cjo̧ro̧ji̧ri̧ pumȩ judiro̧ Ütë tjamo̧ pio judi tänȩa̧ oaiä." Aja̧, ja̧di ta̧rëri̧ yo̧rëremȩdejȩ Ütë tjamo̧ judi Abaraa̧ pio ju̧i̧iäpȩmo̧.

²⁶ Ado pio mȩnȩro̧ chjadëri̧ cjiadiärea̧ dapea̧ oa, jabechji̧ pio dibëiäpȩmo̧ chjadürëremȩdejȩ Ütë tjamo̧ judi jibëa̧ Mu̧i̧tjoi̧ pio ju̧i̧. O ji̧ri̧ ja̧ yabochja pio dibëiäpȩmo̧ yürü chjadürëremȩdejȩ pio mȩnȩro̧ chjadëri̧ cjiadiärea̧ dapea̧ oa, mȩnȩro̧ chjai̧dë ja̧ chja̧oerä cjo̧ro̧chea oa, pio dibë chjai̧dë pio ju̧i̧ putu jura̧ a̧dë chami̧ dari̧ japa tänȩpea̧ oa —yo̧mȩrȩ ni̧bä chjaorëremȩdejȩrȩ icharaita ji̧ri̧ Pedro judi.