Japarea̧ 28 - Biblia Pume

Pablo judi porë juia̧räbo ja̧bodëa̧ oaiä, jabechji̧ ütërämi̧ cjiarëreji̧ri̧diro̧jo̧ȩ Mataräpȩ cjo̧ro̧ji̧ri̧ judiro̧

¹ Ado a̧ro̧rȩ uapai̧ da pio ju̧i̧ chjadëri̧ chjätä ëte, a̧ro̧rȩ go̧düdärärërea̧ chiri pio ju̧i̧ chjiari chjadëri̧ dabaji̧ri̧pea̧rea̧rȩ. Aja̧, ui ana̧ tjoro a̧rȩmȩ chiriräpȩ go̧düdäräa̧ oa cjiarëreji̧ri̧rea̧rȩ, Mata quȩmȩ chiriräpȩ. Jabechji̧ pio idëpȩ cjo̧ro̧ji̧ri̧ pio ji̧ri̧iä ta̧rëa̧ oaiä, 'Aja̧, Mata quȩmȩ chiriräpȩa̧ro̧da' quëna̧ji̧ri̧pea̧rea̧rȩ.

² Ado ju̧ri̧pȩ cjo̧ro̧ji̧ri̧ judiro̧, jabechji̧ cjäri̧ri̧ cjia darëreji̧ri̧diro̧ibe. Chjadëri̧ a̧doa̧diro̧ibe ji̧dëri̧. Jabechji̧ chjöchjari̧ cjüea̧ oaiä, a̧ro̧rȩ chjöchja ja̧boa̧ oaiä, jabechji̧ cjo̧dë oa cäë yürürëreji̧ri̧diro̧ibe a̧ro̧rȩ cäa cäape jäpea̧ oa.

³ Ado Pablo judi cjo̧do oa a̧doparemȩrȩ a̧rȩ a̧rȩ cäarëremȩdejȩ cjo̧dëräpȩ ju̧ri̧. Ado po üdë cjüëtü tjamo̧ oaiä, chjaodëri̧ go̧dëno̧a̧de cjo̧do cjarari pio judiri. Ado Pablo ja̧ ichi pio ju̧i̧ chjaodëri̧ juino̧a̧dejȩ.

⁴ Ado ju̧ri̧pȩ cjo̧ro̧ji̧ri̧ judiro̧ ma̧i̧ da ë chiamȩ po pio ju̧i̧ daea̧ oaiä, Pablo ja̧ ichiri baramȩ oa daea̧ oaiä, jibëa̧ dëbëti̧ra̧ chia ni̧bä chjaoji̧ri̧pea̧dirȩ ja̧di ta̧rëri̧ yo̧ji̧ri̧rȩ: “Aja̧, pio yodëje ma̧i̧ da chjai̧dë oa japea̧ jirodida, ado cja̧rȩmo̧ pumȩ oa ja̧bo tänȩa̧ jirodiji̧da, ado ui ana̧räpȩ jemu̧i̧ ja̧botärea̧ ji̧ ja̧bodëa̧dida, jabo goadirea̧ dadëdida, cjo̧ro̧rea̧ dadëpadida, jabechji̧ jënȩ chjai̧dë oa japea̧ ba oa bape chjaoa̧ oa cjiapea̧ chiadida, ado pio ju̧i̧iä porë jui ja̧bo tänȩa̧ oaiä bape chjaoa̧ oa cjiapadida' quëna̧ jo̧rȩtaji̧ri̧rȩ ni̧bä chjaorëreji̧ri̧dirȩ jibëa̧ dëbëti̧ra̧ chia.

⁵ Jabo Pablo judi po ë taradëmȩrȩ mu̧i̧ mu̧i̧ bidea̧ oaiä, jabechji̧ cjo̧dëräpȩ a̧dë cjatäa̧dejȩ.

⁶ Jabo ju̧ri̧pȩ cjo̧ro̧ji̧ri̧ judiro̧, 'Aja̧, chjaodëri̧ a̧rȩdäräpai̧ dadida, ë üdë boa̧ oaiä ma̧ri̧pe bagapai̧ dadida, chjaodëri̧ a̧rȩdäräpai̧ dadida' quëna̧ jo̧rȩtaji̧ri̧rȩ cjoai̧tä cjoai̧tä darëreji̧ri̧diro̧jo̧ȩ. Jabo japamitë ana̧ chjätä ëte daburäpȩ a̧rȩdärädëa̧ oaiä, jabechji̧ Pablo pio ju̧i̧ chjiari ano̧ mire jo̧rȩtaji̧ri̧pea̧dirȩ. 'Chia chia, ütë jirodida, jauëcha jirodida' quëna̧ jo̧rȩtaji̧ri̧rȩ daea̧diro̧jo̧ȩ.

⁷ Ado a̧ro̧rȩ cjiamȩ chiri queri̧räpȩ ju̧ri̧ a̧rȩrëremȩde Pubio pio ju̧i̧ ja̧ chiri üdë. Ado Pubio judi, jabechji̧ ui tjoro chamȩ chiri tjamo̧ cjo̧ro̧mȩrȩ cjo̧ro̧rëremȩde. Ado pio judiborë cjäri̧ri̧ cjia darëremȩdiibe. Jabechji̧ tjarari̧ do nö̧ta chjadëri̧ ëba jurarëremȩdiibe. Mo̧a̧rea̧ yürüa̧diibe peaja̧di.

⁸ Jabo pio ju̧i̧ nö̧rimȩ judi tjae mo̧a̧rea̧rä a̧rȩrëremȩde taipa ja̧bomȩrȩ, a baämȩra̧ a̧de. Ado Pablo judi pio ju̧i̧ ja̧ jo̧ tjoräpȩ yu̧a̧mȩrȩ jibëa̧ ichira̧ ida̧dejȩ. Ado idamȩrȩ Ütë tjamo̧ pio ju̧i̧iäpȩmo̧ ni̧bä chjaoa̧de pio ju̧i̧ chjiari. Ado cjatäcjiarea̧ daea̧de.

⁹ Ado gito ja̧boji̧ri̧rȩ cjo̧ro̧ji̧ri̧ judiro̧, jiro ui tjoro chamȩ chiriräpȩ taraji̧ri̧ pio judiro̧, Pablo judi chjaparȩa̧ pio ju̧i̧ chjiari goë ta̧rëa̧ oaiä, jabechji̧ pio ju̧i̧iäpȩ go̧düdärärëreji̧ri̧dirȩ gito ja̧boji̧ri̧ judiro̧ ütëborë. Ado chjapea̧ oa cjia marëreji̧ri̧dirȩ.

¹⁰ Ado pio ju̧i̧iä dami̧ti̧ oa yürürëreji̧ri̧diro̧ibe ji̧ra̧ tjamo̧ oa. Ado ja̧dëa ji̧ japamitë chjätä ëte a̧ro̧rȩ ado cja̧rȩmo̧ uimo̧mȩ chara ana̧ oa ano̧ mire bua̧ji̧ri̧ oa, ado yürürëreji̧ri̧diro̧ibe dami̧ti̧ oa a̧ro̧rȩ chjadëri̧ baäpea̧ oa, a̧ro̧rȩ jabëdiädëji̧ri̧rȩ baäpea̧ oa.

Pablo judi Domaräpȩ go̧düdärärëremȩde

¹¹ Ado a̧ro̧rȩ Mata quȩmȩ chiriräpȩ tjarari̧ gupënȩ goarërea̧ ji̧, a̧ro̧rȩ ui ana̧ tjoro china̧mȩ chirirä tjarari̧ gupënȩ goarërea̧ ji̧, jabechji̧ ano̧ mire bua̧rea̧rȩ ado cja̧rȩmo̧ uimo̧mȩ chara ana̧ oa. Areja̧diari pio judiri jana̧rëremȩ oa bua̧rea̧ro̧jo̧ȩ. Jabo pio jiro chara ana̧ üdë uipea̧ nö̧ta, ma̧i̧ dari̧ pupuripea̧ nö̧ta, jabechji̧ pjurërea̧ chjadëräpȩ pjurërëremȩde Mataräpȩ. Jabo ja̧dëa ji̧ jono̧pea̧rä, jabechji̧ ado chjereno̧ tai̧mȩpea̧de. Ado pio ju̧i̧iä bua̧rea̧ro̧jo̧ȩ. Ado pio jiro chara ana̧ üdë, jabechji̧ yo̧a̧ri̧ ütëmi̧ da quȩra̧ pio ju̧ri̧ra̧ quȩpea̧ oa cjiarëremȩde, chjara ara̧ oa cjiamȩmi̧ dara̧ pio ju̧ri̧ra̧, Ütë Chjara quȩra̧ pio ju̧ri̧ra̧.

¹² Ado a̧ro̧rȩ Mata quȩmȩ chiriri pio judiri go̧düji̧ri̧rȩ go̧düdärärëreji̧ri̧rea̧rȩ Chiracucha quȩmȩ bë ma̧ri̧räpȩ. Ado tjarari̧ do nö̧ta cjiadiärëreji̧ri̧rea̧rȩ pio ju̧ri̧pȩ.

¹³ Ado chara ana̧ oa ado chjereno̧ bua ëte, go̧düji̧ri̧rȩ go̧düdärärëreji̧ri̧rea̧rȩ Aregio quȩmȩ bë ma̧ri̧räpȩ. Ado ja̧dëa ji̧ dopea̧rä pjaepa üdë chjadëri̧ cjitëa̧ oaiä, jabechji̧ a̧ro̧rȩ pea go̧düdäräa̧ pio judiri go̧dürea̧ daea̧rea̧rȩ. Ado yo̧a̧ri̧ do chjätä ëte, Putori quȩmȩ bë ma̧ri̧räpȩ go̧düdärärëreji̧ri̧rea̧rȩ.

¹⁴ Ado ju̧ri̧pȩ cjo̧ro̧ji̧ri̧ judiro̧ orë, jabechji̧ Jechu pio ju̧i̧ quëna̧rëreji̧ri̧diro̧jo̧ȩ. Ado pio ji̧ri̧ dëbëdiäa̧rearo̧jȩrȩ. Ado judiro̧ pio jibë nö̧ta cjiadiätä yo̧a̧ oaiä, jabechji̧ cja̧rȩmȩ chemana nö̧ta cjiadiärëreji̧ri̧rea̧rȩ. Ado ja̧dëa ji̧ go̧düa̧rea̧rȩ. Uimo̧mȩ chara ana̧ maeara̧ tai̧rërea̧ ji̧, jabechji̧ tara̧ ano̧ mire baärëreji̧ri̧rea̧rȩ. Ado japamitë chjätä ëte Doma queri̧räpȩ go̧düdärärëreji̧ri̧rea̧rȩ.

¹⁵ Ado Domaräpȩ quëna̧ji̧ri̧ pio judiro̧ a̧ro̧rȩ go̧düdäräa̧ pio ju̧i̧ chjiari goë ta̧rëa̧ oaiä, Pablo judi jana̧pea̧ pio ju̧i̧ chjiari goë ta̧rëa̧ oaiä, jabechji̧ go̧dëno̧rëreji̧ri̧dirȩ pio ibë dëbëdiäpea̧ oa. Aja̧, bë ma̧ri̧ boi̧chji̧räpȩ ju̧ri̧, Apio quȩmȩ no̧ro Gatë Tänȩrea̧ Bë quȩmȩ bë ma̧ri̧ boi̧chji̧räpȩ ju̧ri̧ dadäräa̧diro̧ibe. Ado o judiro̧, ji̧dë duri oa jana̧ji̧ri̧ pio judiro̧, jabechji̧ Tjarari̧ Cjiadiärea̧ Bë quȩmȩ bë ma̧ri̧ boi̧chji̧räpȩ ju̧ri̧ dëbëdiäa̧diro̧ibe. Ado Pablo judi pio ji̧ri̧ daea̧ oaiä, jabechji̧ järi tjamo̧pe bagarëremȩde ja̧di dari̧ jo̧rȩtamȩrȩ. 'Aja̧, Ütë tjamo̧ judi chjadëri̧ japea̧diibëda, quëna̧ji̧ri̧ pio ji̧ri̧ dëbëdiärea̧ yürüa̧diibëda, chjadëri̧ japea̧diibëda' quëna̧ jo̧rȩtamȩrȩ ni̧bärëremȩdejȩ Ütë tjamo̧ ju̧i̧iäpȩmo̧.

¹⁶ Ado a̧ro̧rȩ Domaräpȩ go̧düdärärërea̧ ji̧, jabechji̧ chaärea̧ bëräpȩ tutidëa̧diro̧jo̧ȩ jabo jabechji̧ tjaoëräpȩ cjo̧ro̧rea̧ yürürëreji̧ri̧diro̧jo̧ȩ. Ado jibëa̧ bëräpȩ cjo̧ro̧mȩ oa, jabechji̧ cja̧rȩmȩ guadiarë jidarëremȩdejȩ chaäa̧ oa cjiadëmȩ oa.

Pablo judi Domaräpȩ cjo̧ro̧ji̧ri̧ judio pio ji̧ri̧ ni̧bä chjaorëremȩdejȩrȩ

¹⁷ Tjarari̧ do chjätä ëte, Pablo judi ma̧ȩ chjadürëremȩdejȩrȩ tjamo̧ yo̧ji̧ri̧ judio pio ji̧ri̧iäpȩmo̧ pio jȩaiäpȩ a̧dopera̧tä. Ado a̧dopera̧pea̧ji̧ri̧ oa ja̧di ta̧rëri̧ yo̧mȩrȩ ni̧bä chjaorëremȩdejȩrȩ: —Danȩrȩ ca̧ oti̧, chjadëri̧ ta̧rëchji̧coe —yo̧a̧dejȩrȩ—. Judio tjamo̧ yo̧ji̧ri̧ judiro̧ mitëa̧diro̧coe Jerucharȩräpȩmȩ oa domano pio ji̧ri̧iäpȩmo̧ yürüpea̧ oa, pio coa ja̧bo tänȩpea̧ oa. Cüdë ibëa̧ pumȩ pio ji̧ri̧iäpȩmo̧ eami̧ chjai̧dë oa japadëa̧räbo, cüdë ibëa̧ ütëti̧rȩ yo̧rërea̧ ma̧ȩ pio ju̧i̧ jiadadëa̧räbo, jabechji̧ mitëa̧diro̧coe.

¹⁸ Jabo domano tjamo̧ yo̧ji̧ri̧ pio judiro̧ coa iëno̧ iëno̧ ta̧rërërea̧ ji̧, coa ütarë ta̧rëa̧ ji̧, 'Cjäri̧ madida, ja̧bo tänȩrea̧mi̧dëdida, jabechji̧ baä tänȩpea̧dida' quëna̧ jo̧rȩtaji̧ri̧pea̧ji̧ri̧rȩ yo̧tea̧diro̧jȩrȩ pio jiro judio pio ji̧ri̧iäpȩmo̧.

¹⁹ Jabo cjäri̧ madiro̧jȩrȩ, pio coa baärea̧ yürütä ea tjamo̧dërëreji̧ri̧diro̧jȩrȩ. Pio ju̧i̧iä Domaräpȩ cjo̧ro̧mȩ ütë pio ju̧i̧iäpȩmo̧ ano̧ mire chjadütä yo̧a̧reconȩ ütë oa, cüdë Domaräpȩ cjo̧ro̧mȩ ütë pio ju̧i̧ ja̧ dëbëräpȩ ano̧ mire cjiatä. 'Jabechji̧ Domaräpȩ cjo̧ro̧mȩ ütë pio judi ano̧ mire ütarë bape chjaotäremȩdicoada, pio judi ano̧ mire ütarë ta̧rëtäremȩdicoada' quëna̧ jo̧rȩtamȩrȩ yo̧a̧reconȩ ütë oa. Jabo danȩrȩ, ca̧ pumȩ pio ji̧ri̧iäpȩmo̧ aechide yo̧rea̧ jo̧rȩtamȩrȩ yo̧dëa̧reconȩ ütë oa. Jabechji̧ judio tjamo̧ yo̧ji̧ri̧ judiro̧ pio coaiäpȩmo̧ ana̧ri̧ aechide yo̧a̧ ba oa ba dëbë aechide yo̧rea̧ taradëa̧requede.

²⁰ Aja̧ ca̧ oti̧, pio ju̧i̧iä a̧dopera̧tä yo̧ chjadüa̧requededibe cüdë dibë irä ni̧bä chjaopea̧ oa, mȩnȩro̧ pio coa chjiari tjamo̧ri̧ dabapea̧ oa. Danȩrȩ, pio yirequede yura̧ oa cjiamȩrȩ, pio jiro chatu chiamȩ chjipararira̧ yura̧ oa cjiamȩrȩ. Jabechji̧ yura̧ oa cjiarequede cüdë Chjätä Tänȩmȩ pio ju̧i̧ quëna̧mȩ tara. Aja̧, Ütë tjamo̧ judi no̧mȩ tjamo̧ri ja̧ yo̧ë cji̧därërea̧ pio ju̧i̧ quëna̧mȩpea̧ tara, Icharai pio judiri ja̧ji̧ri̧ pio judiro̧ peadëri ja̧ jidatarërea̧ pio ju̧i̧ quëna̧mȩpea̧ tara, yura̧ oa cjiarequede. Aja̧, pio ju̧i̧ tjamo̧ri̧ dabatä eamȩrȩ a̧dopera̧tä yo̧ chjadüa̧requededibe ca̧ oti̧ —yo̧mȩrȩ ni̧bä chjaorëremȩdejȩrȩ Pablo judi Domaräpȩ tjamo̧ yo̧ji̧ri̧ judio pio ji̧ri̧iäpȩmo̧.

²¹ Ja̧dëa ji̧ dëbë yo̧rëreji̧ri̧diro̧jo̧ȩ: —Danȩ, a̧ro̧rȩ pio mȩa chjiari ma̧ȩ ta̧rëdë marea̧rȩ. Judea chiriräpȩji̧ri̧ judiro̧ pio mȩa chjiari go̧ȩ i oa go̧ȩpe chjadüdëa̧diro̧ibe. Ado ibëa̧ pumȩ judiro̧, pio judiri pea ma̧na̧reji̧ri̧ pio judiro̧borë pio mȩa chjiari ma̧ȩ chjai̧dë oa goa ma̧na̧dëa̧diro̧ibe. Jabechji̧ ta̧rëdë marea̧rȩ.

²² Jabo tjamo̧ri̧ ta̧rëtämi̧ cjiarea̧rȩ mȩnȩ quëna̧ pio ju̧i̧ chjiari. Jabechji̧ oëra̧ti̧ oa cjo̧ro̧ji̧ri̧ judiro̧ dëbëpe chjaodiro̧jȩrȩ pio mȩnȩ quëna̧mi̧ quëna̧ji̧ri̧ pio ji̧ri̧iäpȩmo̧. Ado pio ju̧i̧iä chjadëri̧ ta̧rëtämi̧ cjiarea̧rȩ a̧ro̧rȩ —yo̧ji̧ri̧rȩ dëbë yo̧rëreji̧ri̧diro̧jo̧ȩ Pablo ju̧i̧.

²³ Ja̧dëa ji̧ judiro̧ baäbea yaboi̧, Pablo judi pio jibëiäpȩmo̧ ni̧bä chjaopea̧ do pio ju̧i̧ ütarë cji̧däa̧diro̧jo̧ȩ. Ado ütarë cji̧dä ëte baäa̧dirȩ. Ja̧dëa̧ ji̧ jënȩro̧ ütara̧ do üdë dopea̧rä a̧dë chjäte no̧i̧dërë a̧dopera̧parëreji̧ri̧dirȩ Pablorë cjo̧ro̧mȩräpȩ. Ado peadai̧rä tarupamȩrȩ a̧ra̧ano̧rëremȩdejȩrȩ gȩnȩpea̧rä yuro Ütërë yo̧a̧ chja̧oerä cjo̧ro̧pea̧ pio ju̧i̧ chjiari. Aja̧, Moicherë Chjätä Tänȩmȩ pio ju̧i̧ chjiari go̧ȩparërea̧ ma̧ȩ pio ju̧i̧ ana̧ri̧ ni̧bä chjaoa̧dejȩrȩ. Ado Ütërë ea jana̧ chjadüa̧ oa ni̧bäji̧ri̧ judiro̧ Chjätä Tänȩmȩ pio ju̧i̧ chjiari go̧ȩparërea̧ ma̧ȩ pio ju̧i̧bo ana̧ri̧ ni̧bä chjaorëremȩdejȩrȩ. Jënȩ nö̧tarä yuro goae tarari̧ ni̧bä chjaorëremȩdejȩrȩ urëdi tjamo̧ oa jo̧rȩta tänȩpea̧ oa, Jechu pio ju̧i̧ chjiari coëma cjiari̧ quëna̧pea̧ oa.

²⁴ Ado pio ju̧i̧ ta̧rëa̧ oaiä, 'Aja̧, tjamo̧ri̧ ni̧bä chjaodiibëda' quëna̧ jo̧rȩtaji̧ri̧rȩ quëna̧ji̧ri̧pea̧dirȩ o judiro̧. Jabo o judiro̧ quëna̧dëa̧dirȩ.

²⁵ Pablo ju̧i̧ ta̧rë chaji̧ri̧ judiro̧ ütëborë cja̧rȩmȩ coëma cjiadiäri̧ jo̧rȩtatärea̧ ji̧, cja̧rȩmȩ chji̧ chiami̧ dari̧ jo̧rȩtatärea̧ ji̧, jibëa̧ dëbëti̧ra̧ chia to̧bari̧ dëbë ni̧bätaji̧ri̧pe bagarëreji̧ri̧dirȩ. Ja̧dëa ji̧ baätä järiji̧ri̧ oa ja̧di ta̧rëri̧ yo̧a̧dejȩrȩ Pablo judi: —Danȩrȩ, Tjo tjamo̧ judi Ichaia pio ju̧i̧iä dibëa̧ ütëti̧rea̧ pio ji̧ri̧iäpȩmo̧ ma̧ȩ oa yürürërea̧ ji̧, jabechji̧ tjamo̧i̧ cjiari̧ baämȩ ma̧ȩ oa yürürëremȩdejȩrȩ, ma̧ȩ coëma tjamo̧ oa. Ta̧rëchji̧vä:

²⁶ "Aja̧ Ichaia, pio jiro pumȩ pio ji̧ri̧iäpȩmo̧ goëde jätä earequedemȩ. Ja̧di ta̧rëri̧ yo̧tä earequedemȩ pio ji̧ri̧iäpȩmo̧: ‘Danȩrȩ, ji̧dë ma ta̧rë ta̧rë cjianȩrȩ jabo cjäri̧ manȩrȩ, tjamo̧ri̧ bapë ta̧rërea̧ dadënȩrȩ. Ta̧ra̧ cotomi̧ danȩrȩ. Ado ji̧dë ma dae cjianȩrȩ jabo tjamo̧ri̧ darea̧ dadëji̧ri̧mi̧ danȩrȩ. Da cotomi̧ danȩrȩ.

²⁷ Ta̧ra̧ puë chiadëti̧rȩ ji̧dë ma chjuari̧ jiadanȩrȩ mȩnȩro̧. Dibëa̧ ta̧ra̧ puë üdë tuti chami̧ dari̧ cjiade chjadëri̧ ta̧rërea̧mi̧dëri̧. Da pjurumi̧ dari̧ jo̧rȩtanȩrȩ. Jabechji̧ mȩnȩro̧ dibëa̧ dachora̧ tjamo̧ri̧ bapë darea̧ daea̧rä judi, mȩnȩro̧ dibëa̧ ta̧ra̧ puëra̧ tjamo̧ri̧ bapë ta̧rërea̧ daea̧rä judi, mȩnȩro̧ dibëa̧ chji̧ra̧ urëdi tjamo̧ oa jo̧rȩtarea̧ daea̧rä judi, dëdë, pio coaiäpȩmo̧ ano̧ mire jo̧rȩtatäreji̧ri̧nȩrȩ. Ado cüdë, jabechji̧ chjadëri̧ chjaparȩtäremȩrequededibe. Jabo cjäri̧ manȩrȩ, ano̧ mire jo̧rȩtadënȩrȩ.'" —Aja̧, ja̧di ta̧rëri̧ yo̧mȩrȩ ma̧ȩ yürürëremȩdejȩrȩ Tjo tjamo̧ judi dibëa̧ ütëti̧rea̧ pio ji̧ri̧iäpȩmo̧ Ichaia pio ju̧i̧iä.

^28-29 Aja̧, Ütë tjamo̧ ja̧ ma̧ȩ oa tjamo̧ri̧ quëna̧dëri̧ cjiarenȩro̧jo̧ȩ. Ado pio ju̧i̧iä pio jiro ma̧ȩ üdë, jabechji̧ judiodë pio ji̧ri̧iäpȩmo̧ ano̧ mire chjadüa̧ oa cjiade yaba̧. Tjamo̧ davä. Chjätä tänȩrea̧ ma̧ȩ üdë, Ütë tjamo̧ judi pumȩ pio ji̧ri̧iäpȩmo̧ chjätä tänȩpea̧ ma̧ȩ üdë ano̧ mire yürüa̧ oa cjiade yaba̧ judiodë pio ji̧ri̧iäpȩmo̧. Ado judiro̧ jiadadëpadiro̧jo̧ȩ jabo ta̧rë ja̧bopadiro̧jo̧ȩ quëna̧ji̧ri̧pe bagarea̧mi̧ dari̧ —yo̧mȩrȩ ni̧bä chjaodärärëremȩdejȩrȩ judio ji̧ri̧ Pablo judi.

Cjiadiärea̧ Ma̧ȩ

³⁰ Ado Pablo judi, jabechji̧ Domaräpȩ cjiadiärëremȩde. Yo̧a̧ri̧ ui codë oa pio ju̧ri̧pȩ cjo̧ro̧rëremȩde. Jibëa̧ bëräpȩ cjo̧ro̧tärea̧ ji̧, ado cja̧rȩmo̧ ja̧ bëräpȩ cjo̧ro̧rëremȩde. Jabo judi chjadëri̧ ba ano̧a̧ oaiä, jënȩ cjo̧ro̧a̧ ba oa bë ana̧mȩ pio ju̧i̧iäpȩmo̧ chjadëri̧ ba ano̧a̧ oaiä, jabechji̧ chjadëri̧ cjo̧ro̧rea̧ darëremȩde. Ado eami̧ pumȩ üdë pio jȩaiäpȩ goëdaera̧pea̧mȩ pio ju̧i̧, jabechji̧ cjäri̧ri̧ cjiamȩrȩ darëremȩdejȩ chjadëri̧ jeamȩrȩ.

³¹ Ado ji̧dë ma a̧ra̧ano̧rëremȩde Ütërë yo̧a̧ chja̧oerä cjo̧ro̧pea̧ pio ju̧i̧ chjiari. Ji̧dë ma a̧ra̧ano̧rëremȩde Ano̧mȩ Jechu Quiricho pio ju̧i̧ chjiari. Aja̧, uapadëmȩrȩ, oëadëmȩmi̧ dari̧ a̧ra̧ano̧rëremȩde, idëri̧ cjiadëmȩrȩ.