Japarea̧ 27 - Biblia Pume

Chiri tjamo̧ cjo̧ro̧mȩ ütë pio judi chjadürëremȩdejȩ Pablo ju̧i̧ Domaräpȩ

¹ Ado ja̧dëa ji̧ Pjeto pio judi jo̧rȩtamȩpea̧rä, 'Aja̧, chjadüpea̧diro̧da yaba̧, Pablo pio ju̧i̧ ado chaäa̧ oa cjiaji̧ri̧ pio ji̧ri̧bo chjadüpea̧diro̧da' quëna̧ jo̧rȩtamȩpea̧rä, jabechji̧ pio ji̧ri̧ yürürëremȩdejȩrȩ tjamo̧ yo̧mȩ guadia pio ju̧i̧iäpȩmo̧, Jurio quȩmȩ pio ju̧i̧iäpȩmo̧. Ado Jurio judi ¿chjiade? Chjiadëde, jabechji̧ ja̧bepamȩrȩ cjo̧ro̧rëremȩde guadia buba pio ji̧ri̧ nö̧ta. Aja̧, “Domaräpȩ cjo̧ro̧mȩ ütë tjamo̧ pio ju̧i̧ ja̧ buba” quȩmȩ guadia pio ji̧ri̧ nö̧ta ja̧beparëremȩde. Ado Pjeto judi chaäa̧ oa cjiaji̧ri̧ pio ji̧ri̧ yürüa̧ ji̧, jabechji̧ Jurio pio ju̧i̧iäpȩmo̧ yürürëremȩdejȩrȩ Doma bë ma̧ri̧räpȩ chjadëri̧ ëba baäpea̧ oa, Itaria quȩmȩ chiriräpȩ ëba baäpea̧ oa. Ado danȩrȩ, pio yoa ma̧ȩ oa go̧ȩpamȩ judi, jabechji̧ Uruca quȩmȩ pio judirequede. Aja̧, pio cüdëborë tai̧rëremȩrequede Pablo pio ju̧i̧ nöta.

² Ado a̧ro̧rȩ bua̧rea̧ro̧jo̧ȩ uimo̧mȩ chara ana̧ oa. Adamitio quȩmȩ bë ma̧ri̧ri pio judiri jana̧mȩ chara oa bua̧rea̧ro̧jo̧ȩ, ado chjereno baäpea̧ querediämȩ chara oa. Ado chjaodëri̧ go̧dürëreji̧ri̧rea̧rȩ. Aja̧ jiro chara ana̧ra̧ go̧düa̧rea̧rȩ, Achiaräpȩ cjiamȩ pjurërea̧räpȩmo̧ baäpaji̧ri̧rȩ, chara ana̧rȩ pjurërea̧räpȩmo̧. Ado Aritaco quȩmȩ judi, Techaronica quȩmȩ chiririmȩ judi, Machedonia quȩmȩ bë ma̧ri̧rimȩ pio judi peaja̧di tai̧rëremȩde pio ibë nö̧ta.

³ Ado dopea̧rä, Chido̧ quȩmȩ bë ma̧ri̧räpȩ go̧düdärärëreji̧ri̧rea̧rȩ. Ado Jurio judi, tjamo̧ yo̧mȩ guadia pio judi Pablo pio ju̧i̧iäpȩmo̧ cjäri̧ri̧ cjia daea̧ oaiä, jabechji̧ ju̧ri̧pȩ pjurërea̧räpȩ go̧düdärä ëte birarea̧ yürürëremȩdejȩ chara ana̧ri pio judiri. Jabechji̧ jibëa̧ pumȩ pio ji̧ri̧ goëdapea̧ oa birarea̧ yürüa̧dejȩ, jibëa̧ pumȩ judiro̧ jëa̧ a̧dopea̧ oa, jënȩ goadëa̧ pio ju̧i̧ chjadëri̧ yürüpea̧ oa.

⁴ Ado pio judiri go̧düji̧ri̧rȩ baärëreji̧ri̧rea̧rȩ. Jabo tjamo̧i̧ baätärea̧ ji̧, ja̧di dari̧ baärea̧ dadëa̧rea̧rȩ dëbë pjaepea̧ oaiä. Pio ju̧i̧iä Chipire quȩmȩ chiri oëmo̧ baärëreji̧ri̧rea̧rȩ, ma̧i̧ dari̧ pjaepadëmȩräpȩmo̧. Ui tjoro a̧rȩmȩ chiri üdë tuti a̧rȩa̧ oaiä, jabechji̧ chjadëri̧ baärea̧ daea̧rea̧rȩ.

⁵ Ja̧dëa ji̧ Chirichia quȩmȩ chiri yuro oa chjätä ëte, Pja̧piria quȩmȩ chiri yuro oa chjätä ëte, Mira quȩmȩ bë ma̧ri̧räpȩ go̧düdärärëreji̧ri̧rea̧rȩ Irichia quȩmȩ chiriräpȩ. Aja̧, ju̧ri̧pȩ pjurërea̧räpȩ go̧düdärä ëte, bira̧rea̧ro̧jo̧ȩ uimo̧mȩ chara ana̧ oa.

⁶ Ado ju̧ri̧pȩ tjamo̧ yo̧mȩ guadia üdë, Jurio quȩmȩ pio judi ado cja̧rȩmo̧ uimo̧mȩ chara ana̧ oa daea̧ oaiä, Itaria quȩmȩ chiriräpȩmo̧ baäpamȩ chara oa daea̧ oaiä, jabechji̧ chjaodëri̧ ano̧ mire bua tänȩrëremȩdiibe. Aja̧, a̧ro̧rȩ Itaria quȩmȩ chiriräpȩ chjadëri̧ baädärärea̧ dapea̧ oa, Doma bë ma̧ri̧räpȩ chjadëri̧ go̧düdärärea̧ dapea̧ oa, jabechji̧ ano̧ mire bua tänȩa̧diibe.

⁷ Ado a̧ro̧rȩ pio judiri go̧dürërea̧ ji̧, jaerira̧ baärëreji̧ri̧rea̧rȩ. Jabechji̧ dëbë pjaepe baäa̧ oaiä, do ji̧ra̧ nö̧ta baärëreji̧ri̧rea̧rȩ chjao tjamo̧ri̧. Ado japamitë chjätä ëte Nido quȩmȩ bë ma̧ri̧ dëbëräpȩ go̧düdäräa̧rea̧rȩ. Jabo ma̧i̧ dari̧ dëbë pjaepea̧ oaiä tjamo̧i̧ cjiari̧ baärea̧ dadëa̧rea̧rȩ. Pio ju̧i̧iä ano̧ mire baäa̧rea̧rȩ Quereta quȩmȩ chiriräpȩmo̧, ui ana̧ tjoro a̧rȩmȩ chiriräpȩmo̧. Pio jiro chiri yuromo̧ chjätäpea̧ oa, chirirë tuti a̧rȩa̧ chja̧oerä chjadëri̧ chjätäpea̧ oa ano̧ mire baärëreji̧ri̧rea̧rȩ Charome quȩmȩ bë ma̧ri̧ oa chjätäji̧ri̧rȩ.

⁸ Ado chjao tjamo̧ri̧ baäji̧ri̧rȩ Quereta chiri queri̧ tjamo̧räpȩ baärëreji̧ri̧rea̧rȩ jaerira̧. Ado japamitë chjätä ëte jibëa̧ quȩ chiamȩ bë ma̧ri̧räpȩ ju̧ri̧ go̧düdäräa̧rea̧rȩ. Aja̧, “Uimo̧mȩ Chararë Pjurërea̧ Chjadëräpȩ” quȩmȩ bë ma̧ri̧räpȩ ju̧ri̧ go̧düdäräa̧rea̧rȩ, Arachea quȩmȩ bë ma̧ri̧ queri̧räpȩ.

⁹ Jabo cjäri̧ marea̧rȩ, a̧ro̧rȩ chjao tjamo̧ri̧ ma̧na̧ oaiä, dëbë pjaepe ma̧na̧ oaiä, jabechji̧ dae järea̧ dadëa̧rea̧rȩ jabo japamitë ana̧ tjamo̧ri̧ chjätärëremȩdiibe uipe järea̧mi̧ dari̧, ui ana̧ üdë uapai̧ da tjamo̧pe bagarea̧mi̧ dari̧. Pio ju̧i̧iä Pablo judi chi̧dëearëremȩdejȩrȩ chararä ja̧bepaji̧ri̧ pio ji̧ri̧. Aja̧, ja̧di ta̧rëri̧ yo̧mȩrȩ yo̧a̧dejȩrȩ:

¹⁰ —Danȩrȩ oari, ni̧bä chjaotämi̧ cjiarequededibe —yo̧a̧dejȩrȩ—. Ta̧rëchji̧coe. Danȩrȩ, pio yudiri go̧dürea̧mi̧dëde. Pio yaba̧mi̧rä chara ana̧ra̧ pio ju̧ri̧ra̧ go̧dürea̧mi̧dëde. Uipea̧diibe. Ado uipea̧ oaiä, uapai̧ da tjamo̧pea̧diibe ui ana̧ üdë. Ado a̧ro̧rȩ yaba̧ pio judirije go̧dürä judi, cjäri̧ made, chara ana̧ üdë chami̧pai̧ dade. Ado uimo̧mȩ chararë chia baäa̧ chjö̧na̧i̧rȩ uiräpȩmo̧ aeno̧a̧ oa cjiapai̧ dade. Ado pio a̧ro̧rȩborë jemu̧i̧ ja̧bopai̧ darea̧rȩ. Pio ju̧i̧iä chi̧dëeatarequededibe. Jabechji̧ baärea̧mi̧dëde —yo̧tarëremȩdejȩrȩ.

¹¹ Jabo cjäri̧ madejȩ, tjamo̧ yo̧mȩ guadia pio judi ta̧rë ja̧bodëa̧dejȩ Pablo ju̧i̧. Pio ju̧i̧ ta̧rë ja̧botärea̧ ji̧, ta̧rë ja̧bodëa̧dejȩ jabo chara ana̧mȩ pio ju̧i̧mo̧i̧ ta̧rë ja̧borëremȩdejȩ, chara tjamo̧ tai̧mȩ pio ju̧i̧bo.

¹² Jabechji̧ jënȩro̧ cjiamȩräpȩ üdë uimo̧mȩ chara ana̧ oa chjadëri̧ pjurë tänȩrea̧mi̧dë tara, ui üdë yuropea̧rä yuro pjurë tänȩrea̧mi̧dë tara, jabechji̧ cjiadiärea̧ taradëa̧dirȩ. Tjamo̧ davä. Chara ana̧ üdë pio ju̧ri̧pȩ chjadëri̧ tutia̧ oa cjiarea̧mi̧dë tara, yarëpai̧ dari̧ cjia tara, jabechji̧ cjiadiädëri̧ cjiarëreji̧ri̧dirȩ. Aja̧, oari judiro̧ ütëbodërë jabo noi̧dërë cjiadiädëri̧ cjiarëreji̧ri̧dirȩ, jabo pjurë tänȩrea̧ chjadëräpȩ baätämi̧ cjiarëreji̧ri̧dirȩ Quereta quȩmȩ chjiriräpȩ ju̧ri̧, Pjeniche quȩmȩ bë ma̧ri̧räpȩ ju̧ri̧. 'Aja̧, pio ju̧ri̧pȩ baätäreji̧ri̧a̧ro̧da, uipe baga̧räbo, uapai̧ dape baga̧räbo go̧dütäreji̧ri̧a̧ro̧da, jabechji̧ pjurë tänȩrea̧ chjadëi̧ oa goadiro̧da, ado jono̧pea̧rä yuro pio ju̧ri̧pȩ cjiadiätäreji̧ri̧a̧ro̧da, jabechji̧ chjadëri̧ go̧düdärärea̧mi̧dëräbo go̧dütäreji̧ri̧a̧ro̧da' quëna̧ jo̧rȩtarëreji̧ri̧dirȩ.

Ui ana̧ tjoroji̧ri̧ oa ma̧i̧ dari̧ pupuriparëremȩdejȩrȩ

¹³ Ado Iribia quȩmȩ chiriri pio judiri ano̧ mire pjaepamȩpea̧rä, tocoi̧mi̧ pjaepamȩpea̧rä, 'Aja̧, pio yaba̧ go̧dütäreji̧ri̧a̧ro̧da, Pjenicheräpȩ chjadëri̧ baädärärea̧ daeji̧ri̧a̧ro̧da' quëna̧ jo̧rȩtaji̧ri̧rȩ uëräpȩmo̧ mu̧i̧ gatërëreji̧ri̧diro̧jo̧ȩ chara ana̧ oa baädëparȩrea̧ pio ju̧i̧, chjiparari chacha tjamo̧ pio ju̧i̧. Ado go̧düji̧ri̧rȩ baärëreji̧ri̧rea̧rȩ Quereta chiri yuro oa, ui cjücjürü tjamo̧dëräpȩ.

¹⁴ Jabo cjäri̧ madiibe, chjaodëri̧ ano̧ mire pjaepapea̧diibe uapai̧ da tjamo̧ri̧. Chiriri pio judiri acji ma̧na̧diibe to̧bari̧ pupuripamȩ üdë.

¹⁵ Ado pjaepa dëbë baätärea̧ ji̧, cjäri̧ marea̧rȩ, japarea̧ dadëa̧rea̧rȩ. Chjaodëri̧ ano̧ mire aeno̧a̧diibe. Pio ju̧i̧iä jabechji̧, pupuripamȩ üdë aeno̧a̧ oa baärëreji̧ri̧rea̧rȩ japarea̧ decjiari̧.

¹⁶ Ado aeno̧a̧ oa baäji̧ri̧rȩ Cauda quȩmȩ chiri queri̧räpȩ chjätärëreji̧ri̧rea̧rȩ, ui ana̧ tjoro chamȩ chiri boi̧chji̧ queri̧räpȩ. Ado tuti a̧rȩa̧ oaiä, jabechji̧ tocoi̧mi̧ cjatäcjiarëremȩdiibe ma̧i̧ da tjamo̧ri̧ pupuriparërea̧ ji̧. Ado pio ju̧i̧iä chjaodëri̧ bua tänȩa̧diro̧jo̧ȩ chara boi̧chji̧ oa, ibë chjätä tänȩpamȩ chara boi̧chji̧ pio ju̧i̧. Aja̧, chara ana̧ duriräpȩ pjurë boaremȩ pio ju̧i̧ uëräpȩmo̧ bua tänȩa̧diro̧jo̧ȩ dabadëpe bagachea oa. Chjao tjamo̧räbo bua tänȩrea̧ daea̧diro̧jo̧ȩ.

¹⁷ Ado chara boi̧chji̧ pio ju̧i̧ bua tänȩa̧ duri oa, chara ana̧ pio ju̧i̧ ji̧dë u̧i̧ chjuari̧ cjiapea̧ oa jëdano̧rëreji̧ri̧diro̧jo̧ȩ, pupuripea̧ oaiä yarëa̧ oa cjiachea oa. Jabechji̧ cja̧ȩta̧ra̧ri ja̧ chiriri pio judiri ëtemo̧ go̧io ëte, cja̧ȩta̧ra̧ pënȩräpȩmo̧ yura̧diro̧jo̧ȩ chara ana̧ üdë chjua tjamo̧ri̧ cjiapea̧ oa. Ado pio ju̧i̧ uëri bira tänȩrëreji̧ri̧diro̧jo̧ȩ pjaepa mitëmȩ pio ju̧i̧, chabana ana̧mi̧ da pio ju̧i̧. Jabechji̧ judiro̧ nö̧ ga̧o̧ȩ queri̧räpȩ chjätäa̧ oaiä, Iribia quȩmȩ chiri yuroro cjiamȩ nö̧ ga̧o̧ȩ queri̧räpȩ chjätäa̧ oaiä, uapa tjamo̧pe bagarëreji̧ri̧dirȩ chararä tai̧ji̧ri̧ judiro̧. Ado pio ju̧i̧iä, 'Chia chia, ma̧i̧ dari̧ pupuripamȩ üdë pio jiro nö̧ ga̧o̧ȩräpȩmo̧ aeno̧pai̧ dadiibëda, pio ju̧ri̧ chadärä tänȩpai̧ dadiibëda' quëna̧ jo̧rȩtaji̧ri̧rȩ bira tänȩa̧diro̧jo̧ȩ chara ana̧ üdë goae tarari̧ aenoa̧ oa cjiachea oa. Jabo pjaepa mitëmȩ pio ju̧i̧ bira tänȩa̧räbo, jabechji̧ oëra̧ti̧ oa paeroriä baä tänȩrëremȩdejȩ chara ana̧ oa pupuripamȩ üdë.

¹⁸ Ado dopea̧rä, pupuripamȩ üdë ji̧dë u̧i̧ uapai̧ dari̧ pupuripe baga̧rä, jabechji̧ chararäremȩ pio ju̧i̧ aeno̧rëreji̧ri̧diro̧jo̧ȩ uiräpȩmo̧. Aja̧, o oa aeno̧a̧diro̧jo̧ȩ chara pio ju̧i̧ bücjüchjai̧parȩpea̧ oa.

¹⁹ Ado ja̧dëa ji̧ dopea̧rä, chararä ja̧beparea̧ pio ju̧i̧bo aeno̧a̧diro̧jo̧ȩ, chararäremȩ pio ju̧i̧. Aja̧, aeno̧rea̧mi̧dëräbo uiräpȩmo̧ aeno̧a̧diro̧jo̧ȩ ji̧dë u̧i̧ bücjüchjai̧parȩpea̧ oa.

²⁰ Jabo cjäri̧ marea̧rȩ, cjatäcjiarea̧ dadëa̧rea̧rȩ jabo ji̧dë u̧i̧ ma̧i̧ dari̧ pupuriparëremȩdiibe. Do oa datärea̧ ji̧, büë oa datärea̧ ji̧, cjäri̧ marea̧ro̧jo̧ȩ, dadëa̧rea̧ro̧jo̧ȩ. Jabechji̧ do ji̧ra̧ nö̧ta dadëa̧rea̧rȩ. Ado pio ju̧i̧iä a̧ro̧rȩ, 'Jabo cjäri̧ maa̧ro̧da, ja̧bopaa̧ro̧da, a̧ro̧rȩ ütëborë jemu̧i̧ ja̧bopaa̧ro̧da, japarea̧ decjiadida, chjätärea̧mi̧dëdida' quëna̧ jo̧rȩtaji̧ri̧pea̧rea̧rȩ, jidatarea̧ chiadë maearë.

²¹ Ado a̧ro̧rȩ ütëborë ana̧ri̧ jo̧rȩta̧ oaiä, jabechji̧ do ji̧ra̧ nö̧ta juradërëreji̧ri̧rea̧rȩ. Tjamo̧ davä. Japamitë ana̧ri̧ juradërëreji̧ri̧rea̧rȩ. Jabo ja̧dëa ji̧ Pablo judi, pumȩ chjarerä cjitëmȩrȩ yo̧rëremȩdiibe: —Danȩrȩ oari, chjadëri̧ ta̧rë ja̧boa̧täreji̧ri̧renȩro̧coe —yo̧a̧diibe—. Quereta quȩmȩ chiriri pio judiri go̧düdëa̧täreji̧ri̧nȩrȩ. Jabechji̧ chi̧dëeatea̧requededibe jabo ta̧rë ja̧bodëa̧renȩro̧coe. Mȩnȩro̧ ta̧rë ja̧boa̧rä judi, ja̧di dari̧ chjätädëa̧täreji̧ri̧rea̧rȩ. Ado ba chia üdë uiräpȩmo̧ aeno̧a̧ oa cjiadiädëa̧täremȩde.

²² Jabo yaba̧ ado chjereno̧ chidëearequededibe. Jabechji̧ uapadëchji̧vä. Järidëpe bagadëchji̧vä. Jabechji̧ mȩnȩro̧ cja̧rȩmȩrȩ jemu̧i̧ ja̧bodëpanȩrȩ. Chara ana̧ üdë chami̧a̧ oa cjiaparäbo, jabechji̧ a̧ro̧rȩ ütëbodärärë chjadëri̧ chjätärea̧ daparea̧rȩ. Pio ju̧i̧iä yo̧requededibe, uapadëchji̧vä.

²³ Jabechji̧ pio yabo gȩnȩrä, cüdë chjacjiamȩri̧ jo̧rȩta̧ Ütë pio judi, ca̧ Ano̧mȩ Ütë pio judi chjadüa̧ oa goëdaera̧pea̧dique a̧dërimȩ mu̧i̧tjoi̧ pio judi.

²⁴ Ado yo̧a̧dique: “Uapadëvä Pablo. Danȩ, Domaräpȩ cjo̧ro̧mȩ ütë tjamo̧ pio ju̧i̧ ja̧ dëbëräpȩ cjiadäräpea̧ chiarenȩ. Pio ju̧i̧iä mȩa ëba tai̧ji̧ri̧ pio ji̧ri̧ ütëbo oa chadëri̧ chjätärea̧ yürüpadejȩrȩ Ütë tjamo̧ judi. Pio mȩa cjäri̧ri̧ cjia daea̧ oaiä, jabechji̧ ütëbo oa chjadëri̧ chjätärea̧ yürüpadejȩrȩ” yo̧a̧dique.

²⁵ Pio ju̧i̧iä chi̧dëearequededibe oari. Uapadëchji̧vä. 'Jabechji̧ Ütë tjamo̧ judi yo̧a̧mi̧ japamȩdida, judi ma̧ȩ chjadüa̧mi̧ japadärämȩdida, a̧dërimȩ mu̧i̧tjoi̧ pio judi coa yo̧a̧mi̧ japapadida' quëna̧ jo̧rȩtamȩrȩ chi̧dëearequededibe.

²⁶ Jabo ui ana̧ tjoro a̧rȩmȩ chiriräpȩmo̧ aeno̧a̧ oa cjiami̧ dari̧ cjiadiäparea̧rȩ jabo —yo̧mȩrȩ chi̧dëea̧rëremȩdejȩrȩ Pablo judi.

Uimo̧mȩ chara üdë chjadëdëpe bagarëremȩde uirä

^27-28 Ado a̧ro̧rȩ yo̧a̧ri̧ chemana codë oa goaji̧ri̧pea̧rä, a̧ro̧rȩ pupuripea̧ domȩri ja̧ yo̧a̧ri̧ chemana goaji̧ri̧pea̧rä, jabechji̧ Adiriatico quȩmȩ ui ana̧räpȩ oëra̧ti̧ aeno̧a̧ oa cjiarëreji̧ri̧rea̧rȩ. Ado gȩnȩ tjomo̧pea̧rä, chara ana̧rä ja̧bepaji̧ri̧ judiro̧ jo̧rȩtaji̧ri̧pea̧dirȩ. 'Aja̧, chiri quȩriräpȩ jiroa̧ro̧da, ¿ado ui üdë na̧pai̧ cjücjürüdida yaba̧, chara üdë chadäräpai̧ da jirodida' quëna̧ jo̧rȩtaji̧ri̧rȩ ütararea̧ ca̧i̧ oa bira tänȩrëreji̧ri̧diro̧jo̧ȩ ui cjücjürüräpȩmo̧. Ado 36 metro cjücjürü oa ütara̧diro̧jo̧ȩ. Ja̧dëa ji̧ japamitë chjätä ëte ado atara̧rä, 27 metro cjücjürü oa ütara̧diro̧jo̧ȩ.

²⁹ Ado pio ju̧i̧iä chararä ja̧bepaji̧ri̧ pio judiro̧, 'Jabo cjäri̧ madida, chara ana̧ üdë ta̧dë bori̧dë tjamo̧räpȩ aechadäräpa jirodida' quëna̧ jo̧rȩtaji̧ri̧rȩ uapa tjamo̧rëreji̧ri̧dirȩ. Pio ju̧i̧iä chara apëri pio judiri bira tänȩa̧diro̧jo̧ȩ ma̧i̧ da chacha chjiparari oa uiräpȩmo̧. Aja̧, chara ana̧ üdë ji̧dë u̧i̧ jachi oa baächea oa, ta̧dërä aechadäräa̧ oa cjiachea oa, jabechji̧ baädëparȩrea̧ chacha pio ju̧i̧ bira tänȩa̧diro̧jo̧ȩ jadüchiami̧ oa. Ado ja̧di dari̧ japa ëte oari judiro̧ ütëborë jibëa̧ ütë pio ji̧ri̧iä goë cjo̧dërëreji̧ri̧dirȩ do üdë jo̧ȩra̧pe dopatä.

³⁰ Jabo ja̧dëa ji̧ chara ana̧rä ja̧bepaji̧ri̧ judiro̧ orë taruparëreji̧ri̧dirȩ chara boi̧chji̧ oa bira tänȩpea̧ ji̧ jënȩro̧ o ji̧ri̧ goadi a̧dë baäpea̧ oa. Aja̧, chjiparari chacha oa chara ana̧ yu̧ra̧ri pio judiri bira tänȩcji̧ quëna̧ japaji̧ri̧rȩ bira tänȩrëreji̧ri̧diro̧jo̧ȩ chara boi̧chji̧ pio ju̧i̧.

³¹ Jabo Pablo judi chjaodëri̧ yo̧a̧dejȩ tjamo̧ yo̧mȩ guadia pio ju̧i̧iäpȩmo̧, guadia o ji̧ri̧iäpȩmo̧bo: —Danȩrȩ, chararä ja̧bepaji̧ri̧ judiro̧ ütëborë chara ana̧räpȩ chjadëri̧ cjiadiädërä judi, jabechji̧ pio mȩnȩro̧ chjätärea̧ dadëpanȩrȩ —yo̧a̧dejȩrȩ.

³² Pio ju̧i̧ ta̧rëa̧ oaiä guadia judiro̧ chjaodëri̧ tuti budoa̧diro̧jo̧ȩ chara boi̧chji̧ oa bira tänȩrea̧ ca̧i̧ pio ju̧i̧. Ado uiräpȩ cjatä ëte, aeno̧a̧ oa cjiarëremȩde dabadëpe bagari̧.

³³ Ja̧dëa ji̧ do üdë tatapea̧ querediärä, Pablo judi yo̧a̧dejȩrȩ: —Danȩrȩ, yo̧a̧ri̧ chemana goanȩrȩ mȩnȩro̧ juradëa̧ri ja̧. Bücjüri̧ cjia tjamo̧ oaiä, juradëa̧nȩrȩ.

³⁴ Ado pio ju̧i̧iä yo̧tarequededibe mȩnȩro̧ juratä. Mȩnȩro̧ ju chiapea̧ oa, pumȩdieno̧rea̧ dapea̧ oa juratä yo̧tarequededibe. Jabechji̧ mȩnȩro̧ cja̧rȩmȩrȩ ja̧bodëpa tara, jabechji̧ juratäreji̧ri̧nȩrȩ —yo̧a̧dejȩrȩ.

³⁵ Ado ja̧di ta̧rëri̧ yo̧ ëte, Pablo judi mitërëremȩdejȩ chja̧pe oa. Ado pio ju̧i̧ mitë ëte, Ütë tjamo̧ pio ju̧i̧iäpȩmo̧ ni̧bärëremȩdejȩ ütëborë ta̧rëri̧. Ado ja̧di dari̧ japa ëte, jabechji̧ jura̧dejȩ. Quirë ëte juradejȩ.

³⁶ Ado pio ju̧i̧iä ütëborë järiji̧ri̧pea̧dirȩ. Peaja̧di juraji̧ri̧pea̧dirȩ.

³⁷ Ado a̧ro̧rȩ ütëborë, chara ana̧räji̧ri̧ judiro̧, jabechji̧ pumȩ ji̧ra̧ tjamo̧rëreji̧ri̧rea̧rȩ. Aja̧, 276 pumȩrëreji̧ri̧rea̧rȩ.

³⁸ Ado ütëborë mairi̧ jura ëte chararä ja̧bepaji̧ri̧ pio judiro̧ ji̧dë u̧i̧ bücjüchjaparȩrëreji̧ri̧diro̧jo̧ȩ chara ana̧ oa tirigo cho chjö̧na̧i̧ oa uiräpȩmo̧ aeno̧a̧ oaiä.

Chara ana̧ üdë tuti chiarëremȩde ma̧i̧ dari̧ gö̧ma̧ oaiä

³⁹ Ado do üdë dopea̧rä, chararä ja̧bepaji̧ri̧ judiro̧ darëreji̧ri̧diro̧jo̧ȩ chiri oa. Ado pio ju̧i̧ daea̧rä, '¿tjana̧ chiridida, a̧ro̧rȩ dabadërea̧ chiridida' quëna̧ jo̧rȩtaji̧ri̧rȩ darëreji̧ri̧diro̧jo̧ȩ. Jabo chiri oa ütarë daea̧ oaiä dabu nȩgȩ maräpȩ darëreji̧ri̧diro̧jo̧ȩ, ta̧dë decjiaräpȩ. Ado pio ju̧i̧ daea̧ oaiä, 'Aja̧, pio ju̧ri̧pȩ baätäreji̧ri̧a̧ro̧da, uimo̧mȩ chara ana̧ üdë pio ju̧ri̧pȩ chadäräpai̧ dadida, cjürürüdëräpȩ ju̧ri̧ chadäräpai̧ dadida' quëna jo̧rȩtaji̧ri̧rȩ jëdano̧a̧dirȩ ja̧dira̧ baäpea̧ ji̧.

⁴⁰ Pearä judi tuti coa̧diro̧jo̧ȩ ca̧i̧ oa, chara ana̧ oa baädëparȩrea̧ pio judiri ma̧na̧mȩ ca̧i̧ pio ju̧i̧. Aja̧, tuti coa̧diro̧jo̧ȩ chacha üdë uiräpȩmo̧ aeno̧pea̧ oa, chara oa ji̧dë u̧i̧ bücjüchjai̧parȩpea̧ oa. Ado ja̧di dari̧ japa ëte, tai̧to pio ju̧i̧ jareno̧a̧diro̧jo̧ȩ judiro̧ ado chjereno̧ coëma cjiari̧ tai̧pea̧ oa dabu nȩgȩ maräpȩmo̧. Ado ja̧di dari̧ japa ëte ado chjereno̧ uëräpȩmo̧ bua tänȩa̧diro̧jo̧ȩ pjaepa mitëmȩ pio ju̧i̧, chabana ana̧mi̧ da pio ju̧i̧. Ado ja̧di dari̧ japaji̧ri̧rȩ taruparëreji̧ri̧dirȩ chiriräpȩmo̧ baäpea̧ oa, dabu nȩgȩ maräpȩmo̧ go̧düdäräpea̧ oa.

⁴¹ Jabo chara yu̧ra̧ üdë cjücürüdëräpȩ ju̧ri̧ chjaodëri̧ chadärärëremȩde chjuari̧ cjiari̧. Ado gö̧ma̧ boi̧dërë, uapai̧ darë acji ma̧na̧ chjaoa̧ oaiä, cjäri̧ made, chara apëräremȩ pio judi chjaodëri̧ taruparëremȩde yarëpea̧ ji̧.

⁴² Ja̧dëa ji̧ guadia judiro̧ järipea̧dirȩ yura̧ oa cjiaji̧ri̧ pio ji̧ri̧ ja̧bo tänȩpea̧ oa. 'Aja̧, baäpai̧ dadiro̧da, chaäa̧ oa cjiareji̧ri̧ pio judiro̧ chjaodëri̧ goadi a̧dë baäpai̧ dadiro̧ibëda' quëna̧ jo̧rȩtaji̧ri̧rȩ ja̧bo tänȩpareji̧ri̧diro̧jȩrȩ ütëbo oa.

⁴³ Jabo tjamo̧ yo̧mȩ guadia üdë ja̧di dari̧ japarea̧ yürüdëa̧dejȩrȩ. Jabechji̧ Pablo judi ja̧botä eadëa̧ oaiä tänȩrea̧ yürüdëa̧dejȩrȩ. Jabo ütëbo oa yo̧a̧dejȩrȩ: “Danȩrȩ, uirä bagurarea̧ dabaji̧ri̧ judiro̧ goë jaechji̧vä. O ji̧ri̧ ja̧ yaboi̧ uiräpȩmo̧ chiquichji̧vä chiriräpȩ yuro bagurapea̧ oa.

⁴⁴ Ado o judiro̧, jabechji̧ dami̧ti̧ oa mitëchji̧vä chjadëri̧ go̧düdäräpea̧ oa. Eami̧ to oa, chararemȩ to pënȩ oa, jabechji̧ mitëchji̧vä chiriräpȩ chjadëri̧ go̧düdäräpea̧ oa” yo̧a̧dejȩrȩ. Ado a̧ro̧rȩ ja̧di dari̧ japea̧ oaiä, jabechji̧ ütëborë chjadëri̧ go̧düdärärëreji̧ri̧rea̧rȩ chiriräpȩ yuro. Aja̧, cja̧rȩmȩrȩ jemu̧i̧ ja̧borea̧ decjiaji̧ri̧rȩ go̧düdäräa̧rea̧rȩ.