Japarea̧ 26 - Biblia Pume

Pablo judi pio jȩa chjiari ni̧bärëremȩdejȩ Agiripa quȩmȩ ütë pio ju̧i̧

¹ Ado ja̧dëa ji̧ Agiripa judi yo̧rëremȩdejȩ Pablo ju̧i̧: —Jaevä, ni̧bäibe. Jabechji̧ pio mȩa chjiari ni̧bätä earequedemȩ —yo̧a̧dejȩ. Ado pio ju̧i̧ ta̧rëa̧ oaiä, Pablo judi ichipë cjiamȩrȩ taruparëremȩde pio jȩa chjiari tuti ni̧bäpea̧ ji̧. Ja̧di ta̧rëri̧ yo̧mȩrȩ ni̧bä chjaorëremȩdejȩ:

² —Danȩ ca̧ ütë Agiripa, pio mȩaiäpȩmo̧ ni̧bärea̧ da tara, jabechji̧ ma̧ chiadëri̧ cjia tjamo̧requede —yo̧a̧dejȩ—. Tjamo̧ davä. Cüdë mȩa ni̧bä chjaorea̧ da tara, judio judiro̧ pio coaiäpȩmo̧ aechide yo̧a̧ pio ju̧i̧ chjiari ni̧bärea̧ da tara, jabechji̧ ma̧ chiadëri̧ cjia tjamo̧requede.

³ Jabechji̧ pio mȩnȩ chjadëri̧ dabarenȩ judio pio ji̧ri̧ chjiari —yo̧a̧dejȩ—. Tjamo̧ davä. No̧mȩ cjo̧ro̧rëreji̧ri̧ judiorë a̧ra̧ano̧rërea̧ pio ju̧i̧ chjiari, a̧ro̧rȩ ji̧dë ma japariä cjo̧ro̧a̧ pio ju̧i̧ chjiari, jabechji̧ chjadëri̧ dabarenȩ. Ado a̧ro̧rȩ, judio pio judiro̧ cja̧rȩmȩ chji̧ chiami̧ dari̧ jo̧rȩtadë pio ju̧i̧ chjiaribo dabarenȩ. Pio ju̧i̧iä ma̧ chiadëri̧ cjiarequede na̧ dëbëräpȩ ni̧bäpea̧ ji̧. Ado yaba̧, jabechji̧ ma̧ chjua ta̧rëtä earequedemȩ ca̧ ütë, jëreearea̧ decjiari̧. Jabechji̧ cjäri̧ri̧ cjia ta̧rëcoe ma̧ȩ go̧a̧ti̧ oa ni̧bä chjaopamȩ oa —yo̧a̧dejȩ.

⁴ —Danȩ ca̧ ütë, cüdë boi̧chji̧ri ja̧ cjo̧ro̧rërea̧ pio ju̧i̧ chjiari chjö̧na̧i̧ oa daba maeadirȩ judio judiro̧ ütëborë. Cüdë pearä judi ca̧ chiriräpȩ cjo̧ro̧rërea̧ ji̧, ado ji̧dë duri oa Jerucharȩräpȩ ju̧ri̧ ano̧ mire bëparërea̧ ji̧, jabechji̧ daba maeadirȩ. Tjamo̧ davä. Cüdë cjo̧ro̧a̧ nö̧ta, chjö̧na̧i̧ oa daba maeadirȩ.

⁵ Ado cüdë pjaricheope bagarërea̧ ji̧ peaja̧di dabadirȩ. Tjamo̧ davä. Cüdë järi tjamo̧ji̧ri̧ pio ji̧ri̧ nö̧tamȩpea̧ ji̧, judiorë a̧ra̧ano̧rërea̧ ma̧ȩrä cjo̧ro̧pea̧ ji̧ järiji̧ri̧ pio ji̧ri̧ nö̧tamȩpea̧ ji̧, o ji̧ri̧iä ji̧dë u̧i̧ järi̧ji̧ri̧ pio ji̧ri̧ nö̧tamȩpea̧ ji̧, jabechji̧ daba maeadirȩ. Ado judiro̧ yo̧rea̧ tararä judi, peaja̧di ta̧rëri̧ yo̧pai̧ dadiro̧mȩ pio coa chjiari —yo̧a̧dejȩ—.

⁶ Ado yaba̧ o judiro̧ coa aechide yo̧a̧ oaiä, jabechji̧ pio yi na̧ dëbëräpȩ cjiarequede mȩnȩ coa ütarë ta̧rë ëte bape chjaopea̧ oa. Tjamo̧ davä. Cüdë, Ütërë ibëa̧ ütëti̧rea̧ pio ji̧ri̧iäpȩmo̧ yo̧ë cji̧därërea̧ ma̧ȩ pio ju̧i̧ jidatamȩrȩ cjo̧ro̧a̧ oaiä, Ütë tjamo̧ judi ja̧boa̧ji̧ri̧ pio ji̧ri̧ bëdü tänȩpea̧ pio ju̧i̧ chjiari jidatamȩrȩ cjo̧ro̧a̧ oaiä, jabechji̧ pio yi na̧ dëbëräpȩ cjiarequede ütara̧ oa cjiapea̧ oa.

⁷ Jabo pio cüdëmo̧rȩ jidatamȩrȩ cjo̧ro̧dërequede, jabo judio pio judiro̧borë jidataji̧ri̧rȩ cjo̧ro̧dirȩ ütëborë. Tjamo̧ davä. Icharai ja̧ u̧ri̧ pio judiri ja̧ji̧ri̧ pio judiro̧ 12 bubarë peaja̧di dari̧ jidataji̧ri̧rȩ cjo̧ro̧dirȩ bëdüpea̧ pio ju̧i̧ chjiari. Ado pio ju̧i̧iä do yoa, gȩnȩ yoa chjacjiamȩri̧ jo̧rȩtadiro̧jo̧ȩ Ütë tjamo̧ pio ju̧i̧. Jabo danȩ ca̧ ütë, pio judiro̧ cüdë jidatami̧ jidataräbo, jabechji̧ aechide yo̧ chjaodiro̧coe.

⁸ Jabo danȩrȩ, pio dibë ütëbo oa iëno̧ë ta̧rërequededibe. ¿Tjana̧ ju̧i̧iä oëra̧ jo̧rȩtanȩrȩ Ütë tjamo̧ pio ju̧i̧ chjiari? Jabechji̧ ja̧boa̧mȩ pio ju̧i̧ bëdü tänȩrea̧mi̧dëdida' quëna̧rea̧mi̧dëde —yo̧a̧dejȩ ütë oa Pablo judi, a̧dopaji̧ri̧ pio ji̧ri̧bo.

⁹ Ado Pablo judi cjiadiädëmȩrȩ ja̧di ta̧rëri̧ yo̧mȩrȩ a̧de ni̧bä chjaorëremȩdejȩ: —Danȩ ca̧ ütë, cüdë pearä judi ca̧ chji̧ra̧ jo̧rȩtarërea̧ ji̧, 'jabechji̧ cüdë nö̧tarä yuro dëbëpe chjaomi̧ dari̧ japatäremȩquiji̧ri̧da, Nacharerimȩ pio ju̧i̧iäpȩmo̧ quëna̧ji̧ri̧ pio ji̧ri̧ conȩdatäremȩquiji̧ri̧da' quëna̧ jo̧rȩtamȩrȩ cjo̧ro̧rëremȩrequede.

¹⁰ Ado pio ju̧i̧iä ma̧i̧ dari̧ jape chjaorëremȩrequedejȩrȩ Jerucharȩräpȩ quëna̧ji̧ri̧ pio ji̧ri̧. Ado tjamo̧ goë tuti ja̧bepaji̧ri̧ pio judiro̧ ma̧ȩ oa go̧ȩpe yürüa̧ oaiä, jabechji̧ Ütë tjamo̧ ja̧ pumȩ no̧i̧dë oa mitërëremȩrequedejȩrȩ chaärea̧räpȩ tutia̧ oa cjia tänȩpea̧ oa. Ado tjamo̧ yo̧ji̧ri̧ pio judiro̧ quëna̧ji̧ri̧ pio ji̧ri̧ ütarë bape chjaorërea̧ ji̧, pio ji̧ri̧ ja̧bo tänȩrërea̧ ji̧, 'jabechji̧ chjadëdida' quëna̧ jo̧rȩtamȩrȩ darëremȩrequede.

¹¹ Ado danȩ, tjaoërämo̧dë jabo babui̧ra̧ jädiärëremȩrequede Judiorë a̧doparea̧ bë ji̧ra̧räpȩ. Ado quëna̧ji̧ri̧ pio judiro̧ Jechu pio ju̧i̧ quëna̧dëpe bagapea̧ oa, goae tarari̧ bide cjaeärëremȩrequedejȩrȩ, judiro̧ Jechu pio ju̧i̧ chjiari chjai̧dëri̧ ni̧bäpea̧ oa. Jabechji̧ oëra̧ti̧ a̧rȩmȩ bë ma̧ri̧räpȩ tai̧mȩrȩ cho̧rë jä chjaorëremȩrequedejȩrȩ a̧dë chjäte ërecjiamȩrȩ, pio ji̧ri̧ goae tarari̧ conȩdapea̧ oa.

¹² Pio ju̧i̧iä järëremȩrequede Damaco quȩmȩ bë ma̧ri̧räpȩ. Aja̧, tjamo̧ goë tuti ja̧bepaji̧ri̧ pio judiro̧ go̧ȩpe yürüa̧ go̧ȩ i pio ju̧i̧ goamȩrȩ jäa̧requede quëna̧ji̧ri̧ pio ji̧ri̧ conȩdapea̧ oa.

¹³ Ado ja̧dëa ji̧ ca̧ ütë, dorë tjomo̧ro, a̧ro̧rȩ järea̧ no̧ro tai̧ji̧ri̧ oa, chjaodëri̧ tatarëremȩdiibe. Aja̧, a̧dëri pio judiri chjaodëri̧ tatarëremȩdiibe a̧dë chjäte tatari̧ cjiamȩ pio judi. Pio coa, ca̧ jadü pio ji̧ri̧bo ma̧i̧ dari̧ tatarëremȩdiibe do ju̧i̧ u̧i̧ tatamȩ pio judi.

¹⁴ Ado a̧ro̧rȩ ütëborë chjaodëri̧ cjatäeno̧a̧rea̧rȩ daburäpȩmo̧. Ado ja̧dëa ji̧ coa ni̧bämȩ ma̧ȩ pio ju̧i̧ ta̧rëa̧reconȩ ebereo ma̧ȩra̧ ni̧bämȩ oa. Aja̧, ja̧di ta̧rëri̧ ni̧bämȩ oa ta̧rëa̧reconȩ: “Chauro, Chauro, ¿tjana̧ ju̧i̧iä conȩdarenȩque?” iëno̧ë ta̧rëa̧dique. “Danȩ, mȩnȩ pio coa jiada̧ oaiä, jabechji̧ na̧ iräpȩmo̧ conȩdami̧ dari̧ japarenȩ” yo̧a̧dique.

¹⁵ Ja̧dëa ji̧ iëno̧ë ta̧rëa̧reconȩ: “¿Jabo chjianȩ Ano̧mȩ?” Ado Ano̧mȩ pio judi dëbë yo̧a̧dique: “Chjiadë, jabechji̧ Jechu pio judirequede” yo̧a̧dique. “Mȩnȩ conȩda̧ pio judirequede.

¹⁶ Jabo cjitëvä. Na̧ tara̧ cjitëvä. Jabechji̧ pio mȩa na̧rȩpea̧ oa cjiana̧ra̧requede pio mȩa mitëpea̧ oa, pio mȩnȩ ca̧ mu̧i̧tjo̧i̧pe jäpea̧ oa. Jabechji̧ mȩnȩ pio yaba̧ daea̧ pio chjiari ni̧bä chjaotä earequedemȩ pumȩ ji̧ri̧iäpȩmo̧” yo̧a̧dique. “Ado ji̧dë duri oa cüdë mȩa ado na̧rȩrä, jabechji̧ pio ju̧i̧ chjiaribo ni̧bä chjaotä earequedemȩ” yo̧a̧dique.

¹⁷ “Ado cüdë mȩa uapai̧ daräpȩ a̧ra̧ano̧pea̧ oa chjadüro, jabechji̧ chjadëri̧ jidaparequedemȩ. Jabechji̧ judio judiro̧, ado judiodë pio judiro̧borë mȩa mai̧ dari̧ japachea oa chjadëri̧ jidaparequedemȩ.

¹⁸ Aja̧, da cotomi̧ dari̧ cjiaji̧ri̧ pio ji̧ri̧iäpȩ chjadüparequedemȩ. Ado mȩnȩ pio coa chjiari a̧ra̧ano̧a̧ oaiä, jabechji̧ jibëa̧ dacho oa chjadëri̧ are iëa̧ oa cjiami̧ dari̧ cjiadiäpadirȩ” yo̧a̧dique. “Aja̧, pio mȩaiä ta̧rëa̧ oaiä, jabechji̧ bagönȩrä cjo̧ro̧mi̧ dari̧ cjiaji̧ri̧ pio judiro̧ tatami̧ daräpȩ ano̧ mire cjo̧ro̧rea̧ dapadirȩ. Ichiae ja̧ chja̧oerä cjo̧ro̧ji̧ri̧ pio judiro̧ go̧dürea̧ dapadirȩ Ütë tjamo̧ ja̧ chja̧oeräpȩ ano̧ mire cjo̧ro̧pea̧ oa” yo̧a̧dique. “Jabechji̧ judiro̧ pio coaiäpȩmo̧ quëna̧ oaiä, jënȩro̧ chjai̧dëri̧ japea̧ pio judi duridëparȩa̧ oa cjiadiäpade. Ado judiro̧ duridëparȩa̧ oa cjiarä, jabechji̧ Ütërë mitëa̧ pumȩ pio ji̧ri̧ nö̧ta cjiadiäpadirȩ” yo̧mȩrȩ yo̧a̧dique Ano̧mȩ judi —yo̧mȩrȩ ni̧bä chjaorëremȩdejȩ Pablo judi Agiripa quȩmȩ ütë pio ju̧i̧iäpȩmo̧, o ji̧ri̧iäpȩmo̧bo.

¹⁹ Ado Pablo judi cjiadiädëmȩrȩ ja̧di ta̧rëri̧ a̧de ni̧bä chjaorëremȩdejȩ: —Pio ju̧i̧iä ca̧ ütë Agiripa, cüdë Jechu pio ju̧i̧iä ma̧ȩ oa ta̧rëa̧ oaiä, jabechji̧ jiadadëa̧reconȩ. Tjamo̧ davä. A̧dëri pio judiri ma̧na̧mȩ ma̧ȩ oa ta̧rëa̧ oaiä, cüdë a̧dëräpȩmȩ oa daea̧ pio judiri ma̧na̧mȩ ma̧ȩ oa ta̧rëa̧ oaiä, jabechji̧ jiadadëa̧reconȩ jabo ta̧rëdiäa̧reconȩ —yo̧a̧dejȩ—.

²⁰ Ado cüdë pearä a̧ra̧ano̧rërea̧ ji̧, jabechji̧ tarupë a̧ra̧ano̧rëremȩrequede Damacoräpȩ ju̧ri̧. Ado judiri ano̧ mire a̧ra̧ano̧a̧requede Jerucharȩräpȩ. Ado judiri Judea quȩmȩ chiri nö̧tai̧ oa ano̧ mire a̧ra̧ano̧a̧requede. Aja̧, oëra̧ti̧ oa a̧ra̧ano̧riä tai̧rëremȩquede Icharai pio judiri ja̧ji̧ri̧ pio ji̧ri̧iäpȩmo̧, judiodë pio ji̧ri̧iäpȩmo̧bo. Ado cüdë a̧ra̧ano̧riä tai̧a̧ ji̧, "Aja̧, ano̧ mire jo̧rȩtachji̧vä mȩnȩro̧ chjai̧dëri̧ japea̧ pio ju̧i̧ chjiari" yo̧a̧requedejȩrȩ. "Ütë tjamo̧ pio ju̧i̧iäpȩmo̧ ano̧ mire quëna̧chji̧vä. Ado ja̧dëa ji̧ mȩnȩro̧ tjamo̧ri̧ quëna̧ji̧ri̧pea̧rä, jabechji̧ chjadëri̧ na̧rȩriä cjo̧ro̧täreji̧ri̧nȩrȩ mȩnȩro̧ quëna̧ji̧ri̧pea̧ pio ju̧i̧ chjiari" yo̧a̧requedejȩrȩ. "Aja̧, mȩnȩro̧ quëna̧ji̧ri̧pea̧rä, jabechji̧ dami̧ti̧ chjadë oa japariä cjo̧ro̧täreji̧ri̧nȩrȩ ütëbo oa chjadëri̧ na̧rȩpea̧ oa" yo̧mȩrȩ yo̧a̧requedejȩrȩ cüdë a̧ra̧ano̧riä tai̧a̧ ji̧, ca̧ ütë Agiripa —yo̧a̧dejȩ Pablo judi—.

²¹ Jabo cjäri̧ madiro̧coe. Cüdë ja̧di ta̧rëri̧ a̧ra̧ano̧a̧ oaiä, mitëa̧diro̧coe judio judiro̧. Ütë tjamo̧ ja̧ bëräpȩmȩ oa mitëa̧diro̧coe. Ado chjaodëri̧ ja̧bo tänȩtarëreji̧ri̧diro̧coe —yo̧a̧dejȩ—.

²² Jabo danȩ ca̧ ütë, cüdë pea quëna̧mȩpea̧ domȩri ja̧ Ütë tjamo̧ pio judi chjadëri̧ a̧dodique. Ado coa chjadëri̧ a̧doa̧ oaiä, jabechji̧ ja̧bo tänȩrea̧ dadëa̧diro̧coe. Ado pio ju̧i̧iä pio yi na̧ dëbëräpȩ cjiarequede yaba̧ Ütë tjamo̧ ja̧ ma̧ȩ pio ju̧i̧ chjiari ni̧bä chjaomȩrȩ —yo̧a̧dejȩ—. Ado pio mȩamo̧dë, jabo pumȩ ütëbodärä oa ni̧bä chjaorequededibe pumȩ ba chiami̧ da pio ji̧ri̧iäpȩmo̧, ado ba chiami̧ dadë pio ji̧ri̧iäpȩmo̧bo. Jabo danȩ, ca̧ea̧ ma̧na̧ri̧ jo̧rȩtamȩrȩ a̧ra̧ano̧dë marequededibe jabo Moicherea̧ judi, ado Ütërë ea jana̧ chjadüa̧ oa ni̧bärëreji̧ri̧ pio judiro̧ yo̧rërea̧ duri maea oa ni̧bä chjaorequededibe. Aja̧, judiro̧ yo̧rërea̧ ma̧ȩ duri maea oa, ji̧dë duri oa japamitë chjätä ëte chjätäpea̧ pio ju̧i̧ chjiari ma̧ȩ oa a̧ra̧ano̧requededibe, ca̧ea̧ ma̧na̧ri̧ jo̧rȩta̧ duridë maea oa —yo̧a̧dejȩ—.

²³ Tjamo̧ davä. Chjätä Tänȩmȩ judi cjo̧ro̧pea̧ pio ju̧i̧ chjiari, judi ma̧i̧ dari̧ conȩda̧ oa cjiapea̧ pio ju̧i̧ chjiari, judi ja̧bo ëte bëdüpea̧ pio ju̧i̧ chjiari, ado o ji̧ri̧ ja̧ yaboi̧ bëdüpea̧ pio ju̧i̧ chjiari jabërä go̧ȩparëreji̧ri̧dirȩ. Ado bëdüa̧ oa cjiamȩ pio judi judio pio ji̧ri̧iäpȩmo̧ chjätärea̧ ma̧ȩ pio ju̧i̧ a̧ra̧ano̧pea̧ pio ju̧i̧ chjiari, judi judiodë pio ji̧ri̧iäpȩmo̧bo a̧ra̧ano̧pea̧ pio ju̧i̧ chjiari jabërä go̧ȩparëreji̧ri̧dirȩ peaja̧di. Ado judiro̧ jabërä go̧ȩparërea̧ pio ju̧i̧ chjiari ma̧ȩ oa a̧ra̧ano̧mȩrȩ doparequede cüdë —yo̧mȩrȩ ni̧bä chjaorëremȩdejȩ Pablo judi Agiripa quȩmȩ ütë pio ju̧i̧iäpȩmo̧.

Quëna̧tä yo̧tarëremȩdejȩ Agiripa ju̧i̧ Pablo judi

²⁴ Ado Pablo judi pio jȩa chjiari ja̧di ta̧rëri̧ ni̧bämȩ oa to̧bari̧ tuti yo̧rëremȩdejȩ Pjeto judi: —Jabo cjäri̧ marenȩ Pablo, cjarari̧ cjiami̧ dari̧ cjiarenȩ —yo̧a̧dejȩ—. Coëma cjiari̧ jo̧rȩtarea̧mi̧dëpea̧renȩ. Jabechji̧ mȩnȩ a̧dë chjäte ji̧ra̧ri̧ dabapea̧ pio oaiä, jabechji̧, chjadëri̧ jo̧rȩtarea̧ chiadëpe baga̧renȩ —yo̧a̧dejȩ.

²⁵ Jabo Pablo judi dëbë yo̧a̧dejȩ: —Cjäri̧ marequede ca̧ ütë Pjeto, cjarari̧ cjiami̧ damȩrȩ ni̧bä chjaodërequededibe, jabo urëdi oa jo̧rȩtamȩrȩ ni̧bä chjaorequededibe ma̧ȩ coëma oa, ma̧ȩ chja tjamo̧ oa.

²⁶ Ado cüdë ni̧bä chjaoa̧ pio ju̧i̧ chjiari chjadëri̧ dabade ca̧ ütë Agiripa judi. Pio ju̧i̧iä oëadëmȩmi̧ dari̧ ni̧bä chjaoreconȩ idëri̧ cjiarea̧ decjiari̧ —yo̧a̧dejȩ—. Jabechji̧ cüdë ni̧bä chjaoa̧ pio ju̧i̧ chjiari ma̧ȩ üdë goadia̧ oa cjiadëde. Tutia̧mi̧ dari̧ cjiadëde jabo jabechji̧, ütëborë dabarea̧mi̧ dari̧ cjiade. Ja̧di tara Agiripa pio judiborë pio ju̧i̧ chjiari dabade ca̧ ütë —yo̧a̧dejȩ.

²⁷ Ado Pablo judi Agiripa ütë pio ju̧i̧iä iëno̧ë ta̧rëtämi̧ cjiamȩrȩ ano̧ mire ni̧bä chjaorëremȩdejȩ: —Danȩ ca̧ ütë Agiripa, Ütërë ea jana̧ chjadüa̧ oa ni̧bäji̧ri̧ pio judiro̧ go̧ȩparërea̧ ma̧ȩ pio ju̧i̧ ¿quëna̧dënȩ? Dëdë, 'tjamo̧ri̧ quëna̧mȩdida' quëna̧ dabarequedemȩ —yo̧a̧dejȩ.

²⁸ Ado Agiripa judi dëbë yo̧a̧dejȩ Pablo ju̧i̧: —Mȩnȩ pio coaiäpȩmo̧ cja̧rȩmȩ coi̧mo̧ ni̧bä chjaoa̧ oaiä, 'Jechu Quiricho pio ju̧i̧iäpȩmo̧ chjaodëri̧ quëna̧mȩpe baga tänȩpai̧ dacuni̧da' ¿quëna̧dënȩ? —iëno̧ë ta̧rëa̧dejȩ.

²⁹ Ado Pablo judi dëbë yo̧a̧dejȩ: —Mȩnȩ chjaodëri̧ quëna̧mȩpe baga̧rä judi chjadë tjamo̧täremȩde. Ado mȩnȩ japamitë chjätä ëte quëna̧mȩpe baga̧rä judi peaja̧di chjadëtäremȩde. Danȩ, pio mȩa chjiari goë cjo̧dërequede Ütë tjamo̧ pio ju̧i̧iä, coa ta̧rë chaji̧ri̧ pio ji̧ri̧ chjiaribo. Jabechji̧ mȩnȩro̧ ütëborë pio cüdëmi̧ dari̧ cjiatä earequededibe. Jabo cjäri̧ marequededibe. Pio cüdë chaäa̧ oa cjiami̧ dari̧ cjiatä eadërequededibe jabo pio cüdë Jechu Quiricho pio ju̧i̧ quëna̧mi̧ dari̧ quëna̧tä earequededibe —yo̧mȩrȩ ni̧bä chjaorëremȩdejȩ ütë oa Pablo judi. Ado judiri cjiadiärëremȩde.

³⁰ Ado pio ju̧i̧iä ütëborë cjitëa̧dirȩ. Agiripa quȩmȩ ütë judi, Pjeto judi, chiri tjamo̧ cjo̧ro̧mȩ ütë pio judi, ado Bereniche quȩyi̧ jini̧ cjitëa̧dirȩ o pio ji̧ri̧ nö̧ta.

³¹ Ado go̧düa̧ duri oa, jibëa̧ ma̧na̧ri̧ jo̧rȩtaji̧ri̧rȩ ni̧bä chjaorëreji̧ri̧dirȩ jibëa̧ dëbëti̧ra̧ chia: —Jabo cjäri̧ made, pio jiro üi̧ üdë chjai̧dëri̧ japadërëremȩde —yo̧a̧dirȩ—. Ja̧bo tänȩrea̧mi̧dëde. Chaärea̧ bëräpȩ cjo̧ro̧ tänȩrea̧mi̧dëde —yo̧a̧dirȩ jibëa̧ dëbëti̧ra̧ chia.

³² Ado Agiripa judi a̧dë yo̧mȩrȩ yo̧a̧dejȩ Pjeto ju̧i̧: —Pablo judi yo̧dëa̧rä judi, “Aja̧, Domaräpȩ cjo̧ro̧mȩ ütë tjamo̧ pio ju̧i̧ ja̧ dëbëräpȩ cjiadiätämi̧ cjiarequede ano̧ mire ütarë bape chjaopea̧ oa” yo̧dëa̧rä judi, jabechji̧ baä tänȩtäreji̧ri̧rea̧ro̧jo̧ȩ pio yaba̧, jabo jabechji̧ jare chjadüa̧ oa cjiami̧ dari̧ baä tänȩtäreji̧ri̧rea̧ro̧jo̧ȩ —yo̧rëremȩde Agiripa quȩmȩ ütë judi.