Japarea̧ 25 - Biblia Pume

Pablo judi pio jȩa chjiari ni̧bä chjaorëremȩdejȩ Pjeto ju̧i̧

¹ Ado Pjeto pio judi go̧düdärärëremȩde Checharea quȩmȩ bë ma̧ri̧räpȩ ano̧ mire ütëmȩrȩ ja̧bepapea̧ oa. Ado pio ju̧ri̧pȩ tjarari̧mo̧i̧ doi̧ chjätä ëte, go̧dürëremȩde Jerucharȩräpȩ jäpea̧ oa.

² Ado Pjeto judi pio ju̧ri̧pȩ go̧düdärä ëte, tjamo̧ yo̧ji̧ri̧ judio pio judiro̧ järirëreji̧ri̧dirȩ jȩa nö̧ta ni̧bä chjaopea̧ oa, Pablo pio ju̧i̧ chjiari ta̧rë tänȩpea̧ oa. Aja̧, tjamo̧ goë tuti ja̧bepaji̧ri̧ pio judiro̧, ado ütëti̧ pio judiro̧borë Pablo pio ju̧i̧iäpȩmo̧ aechide yo̧ji̧ri̧rȩ ni̧bä chjaorëreji̧ri̧diro̧jo̧ȩ, ja̧di ta̧rëri̧ yo̧ji̧ri̧rȩ:

³ —Aja̧ ütë, cjäri̧ri̧ cjia daibe. Jabechji̧ Pablo pio ju̧i̧ chjadëri̧ chjadüjo̧ȩ pio jauëräpȩmo̧, Jerucharȩräpȩmo̧ —yo̧a̧diro̧jo̧ȩ—. Jabo cjäri̧ madiro̧jo̧ȩ. Pablo pio ju̧i̧ ja̧bo tänȩtämi̧ cjiarëreji̧ri̧diro̧jo̧ȩ. Tjamo̧ davä. Jerucharȩräpȩ jäpamȩ oa goadi jida ëte ja̧bo tänȩtämi̧ cjiarëreji̧ri̧diro̧jo̧ȩ. Pio ju̧i̧iä ja̧di ta̧rëri̧ yo̧a̧diro̧jo̧ȩ.

⁴ Jabo Pjeto judi dëbë yo̧mȩrȩ yo̧a̧dejȩrȩ: —Danȩrȩ, Checharearäpȩ ju̧ri̧ chaäa̧ oa cjiade Pablo judi. Ado cüdë ju̧ri̧pȩ baäpea̧ ji̧ querediärequede.

⁵ Pio ju̧i̧iä dibëa̧ ütëti̧ pio judiro̧ pio coadi jätäreji̧ri̧dirȩ. Ado Pablo judi chjai̧dëri̧ japea̧rä judi, judi tjamo̧ri̧ chjai̧dëri̧ japea̧rä judi, jabechji̧ pio ju̧ri̧pȩ aechide yo̧pai̧ darenȩro̧jo̧ȩ —yo̧a̧dejȩrȩ.

⁶ Ado Pjeto judi japamitë cjiadiärëremȩde Jerucharȩräpȩ ju̧ri̧. Tjamo̧ri̧ dabadëde, jabo 8 do nö̧ta cjiadiäa̧ jirode. Jabo dabadë, 10 dopamȩ. Jabo pio jiro do üdë chjätä ëte, go̧dürëremȩde ado chjereno̧ baäpea̧ oa Checharearäpȩ. Ado judio tjamo̧ yo̧ji̧ri̧ pio ji̧ri̧ nö̧ta tai̧mȩrȩ baärëremȩde. Ado ja̧dëa ji̧ Pjeto judi pio ju̧ri̧pȩ go̧düdärä ëte dopea̧rä, ütarë bape chjaopea̧ oa chamȩrȩ yo̧ chjadürëremȩdejȩrȩ jibëa̧ guadia ji̧ri̧ Pablo pio ju̧i̧ eba jana̧tä.

⁷ Ado pio ju̧i̧ ëba jana̧rä, ado Jerucharȩ pio judiri jana̧reji̧ri̧ judio pio judiro̧ pio ju̧i̧ daea̧rä, cjäri̧ madiro̧jo̧ȩ, chjaodëri̧ tjoro tänȩa̧diro̧jo̧ȩ. Ado taruparëreji̧ri̧dirȩ pio ju̧i̧iäpȩmo̧ aechide yo̧pea̧ ji̧. —Jabo cjäri̧ marenȩ, ma̧i̧ da chjai̧dë oa japamȩrenȩ —yo̧ji̧ri̧rȩ aechide yo̧ chjaoa̧diro̧jo̧ȩ. Jabo tjamo̧i̧ cjiari̧ jo̧rȩta tänȩrea̧ yürüdëa̧diro̧jo̧ȩ ütë ju̧i̧iäpȩmo̧.

⁸ Ja̧dëa ji̧ pio jȩa chjiari ni̧bärëremȩdejȩrȩ Pablo judi. Ja̧di ta̧rëri̧ yo̧mȩrȩ dëbë yo̧a̧dejȩrȩ jënȩro̧ aechide yo̧a̧ pio ju̧i̧ chjiari: —Jabo cjäri̧ marequede —yo̧a̧dejȩrȩ—. Oëra̧ yo̧nȩrȩ. Judio judiro̧ tüdüa̧mi̧ dari̧ cjo̧ro̧pea̧ ma̧ȩ oa chjai̧dëri̧ japadëa̧requede. Ado Ütë tjamo̧ ja̧ bë oa peaja̧di chjai̧dë gȩrȩ chiami̧ dari̧ cjiapea̧ oa japadëa̧reconȩ. Ado Domaräpȩ cjo̧ro̧mȩ ütë pio ju̧i̧iäpȩmo̧, Checha pio ju̧i̧iäpȩmo̧ peaja̧di chjai̧dëri̧ japadëa̧reconȩ —yo̧a̧dejȩrȩ.

⁹ Jabo Pjeto judi judio judiro̧ pio jȩaiäpȩmo̧ ea tjamo̧tä eamȩrȩ iëno̧ë ta̧rëa̧dejȩ Pablo ju̧i̧: —Jabo danȩ, a̧ro̧rȩ Jerucharȩräpȩ ju̧ri̧ ano̧ mire a̧dopapea̧ oa järä judi, jabechji̧dëde pio mȩaiä? —iëno̧ë ta̧rëa̧dejȩ—. Judio judiro̧ pio mȩaiäpȩmo̧ aechide yo̧a̧ pio ju̧i̧ chjiari pio ju̧ri̧pȩ ano̧ mire a̧doparä judi, cüdë mȩa pio ju̧ri̧pȩ ta̧rë ëte ütarë bape chjaorä judi, ¿jabechji̧dëde? ¿Yö̧ta jo̧rȩtanȩ mȩnȩ? —yo̧mȩrȩ iëno̧ë ta̧rëa̧dejȩ.

¹⁰ Ado Pablo judi dëbë yo̧mȩrȩ yo̧a̧dejȩ: —Jabo cjäri̧ marequede —yo̧a̧dejȩ—. Jerucharȩräpȩ jädëri̧ cjia tjamo̧requede. Pio coa ja̧bo tänȩtämi̧ cjiaji̧ri̧ pio ji̧ri̧iäpȩ ado chjereno̧ jädëri̧ cjiarequede. Jabechji̧ pio yi na̧ dëbëräpȩ cjiarequede. Ado Domaräpȩ cjo̧ro̧mȩ ütë judi, Checha pio judi tänȩa̧ oa pio yoa chiri oa ütëmȩrȩ ja̧bepamȩpea̧renȩ. Pio ju̧i̧iä pio mȩnȩ ütarë bape chjaotäremȩrenȩque pio yoaiä. Danȩ, judio pio ji̧ri̧iäpȩmo̧ chjai̧dëri̧ japadëa̧requedejȩrȩ. Pio ju̧i̧ chjadëri̧ dabarenȩ.

¹¹ Jabo dëdë, cüdë tjamo̧ri̧ chjai̧dë oa japea̧rä judi, jabechji̧ goadidëtäremȩrequedemȩ. Chja jabechji̧, coa ja̧bo tänȩrea̧ yürütäremȩrequedemȩ. Jabo judiro̧ coa chjiari aechide yo̧a̧ üdë, ma̧ȩ chjádë ma tara, jabechji̧ pio coa ja̧bo tänȩpea̧ oa yürüdëparequede ca̧ icjara oa. Jabechji̧ Domaräpȩ cjo̧ro̧mȩ ütë pio ju̧i̧ ja̧ dëbëräpȩ ano̧ mire cjiadiätämi̧ cjiarequede ado ja̧di. Pio judi coa ano̧ mire ütarë bape chjaotä eareconȩ —yo̧mȩrȩ dëbë yo̧rëremȩdejȩ Pablo judi Pjeto quȩmȩ ütë pio ju̧i̧iäpȩmo̧.

¹² Ado Pjeto judi jȩa chi̧dëeaji̧ri̧ pio ji̧ri̧iä ta̧rë ëte, dëbë yo̧a̧dejȩ: —Jabechji̧de ado ja̧di. Mȩnȩ domaräpȩ cjo̧ro̧mȩ ütë pio ju̧i̧ ja̧ dëbëräpȩ ano̧ mire cjiadiätämi̧ cjiarä judi, jabechji̧ pio ju̧i̧ ja̧ dëbëräpȩ ano̧ mire cjiadiäparenȩ. Pio ju̧i̧iä ja̧dira̧ baä tänȩparequedemȩ —yo̧a̧dejȩ. Ado Pablo judi ja̧di dari̧ yo̧a̧ oaiä, jabechji̧ judio judiro̧ pio ju̧i̧ mitëtärea̧ ji̧, cjäri̧ madiro̧jo̧ȩ, mitërea̧ dadëa̧diro̧jo̧ȩ.

Pjeto judi Pablo pio ju̧i̧ chjiari ni̧bä chjaorëremȩdejȩ Agiripa quȩmȩ ütë oa

¹³ Ado do ji̧ra̧ri̧ chjätä ëte ado cja̧rȩmo̧ chiri ütë judi, Agiripa quȩmȩ pio judi Checharearäpȩ go̧düdärärëremȩde ja̧ oyi̧ pio ji̧ nö̧ta, Bereniche quȩyi̧ pio ji̧ nö̧ta. Pjeto pio judi pea ütëpea̧ oaiä, jabechji̧ pio ju̧i̧ jeaera̧pea̧diro̧jo̧ȩ, ma̧ chiadëri̧ cjiaji̧ri̧rȩ.

¹⁴ Ado do ji̧ra̧dë chjätä ëte, Pjeto judi Agiripa pio ju̧i̧ nö̧ta ni̧bä chjaoa̧ ji̧, jabechji̧ Pablo pio ju̧i̧ chjiari ni̧bä chjaorëremȩdejȩ, ja̧di ta̧rëri̧ yo̧mȩrȩ: —Aja̧, Pjeri judi, ca̧ yabo ütërëremȩ pio judi, jabechji̧ chaäa̧ oa cjiamȩ oa a̧dë baärëremȩdejȩ cja̧rȩmȩ oa —yo̧a̧dejȩ—.

¹⁵ Ado cüdë Jerucharȩräpȩ jäa̧rea̧ ji̧, tjamo̧ goë tuti ja̧bepaji̧ri̧ pio judiro̧ aechide yo̧a̧diro̧jo̧ȩ, judio ütëti̧ pio judiro̧borë. Jabechji̧ ja̧bo tänȩtä ea tjamo̧ji̧ri̧rȩ yo̧tea̧diro̧coe.

¹⁶ "Jabo cjäri̧ marea̧rȩ" yo̧a̧requedejȩrȩ. "A̧ro̧rȩ, domano pio judiro̧ ja̧di dari̧ japadërea̧rȩ. Jabechji̧ eami̧ pumȩ oa, chjai̧dëri̧ japamȩ pio ju̧i̧ chjaodëri̧ bape chjaodërea̧ro̧jo̧ȩ jabo jabechji̧, pio jȩaiäpȩmo̧ aechide yo̧ji̧ri̧ pio ji̧ri̧iäpȩmo̧ dëbë yo̧rea̧ yürürea̧ro̧jo̧ȩ yabochja judi pio jȩa chjiari jabërä chjadëri̧ ni̧bäpea̧ oa. Ado ja̧dëa ji̧ ütë judi pio ju̧i̧iä chjadëri̧ ta̧rë ëte, dëdë, ütarë bape chjaoparea̧ro̧jo̧ȩ. “Aja̧, ja̧di dari̧ japarea̧rȩ domano judiro̧” yo̧a̧requedejȩrȩ —yo̧a̧dejȩ—.

¹⁷ Ado judio tjamo̧ yo̧ji̧ri̧ judiro̧ pio jiro ma̧ȩ oa ta̧rëa̧ oaiä, jabechji̧ pio jauëräpȩmo̧ jana̧dirȩ. Ado cüdë, 'jabechji̧ ado cja̧rȩmo̧ doro a̧dopatäremȩquëda' quëna̧ jo̧rȩdëa̧requede, jabo jabechji̧ dopea̧rä a̧dopea̧requede pio ji̧ri̧ nö̧ta. Ado ca̧ charea̧räpȩ chadäräa̧requede ütarë bape chjaopea̧ oa. Ado ja̧dëa ji̧ Pablo pio ju̧i̧ jauëräpȩmo̧ ëba jana̧pea̧ oa yo̧ chjadüa̧requedejȩrȩ guadia ji̧ri̧.

¹⁸ Ja̧dëa ji̧ Pablo pio ju̧i̧ aechide yo̧ji̧ri̧ pio judiro̧ cjitëa̧rä, jabechji̧ judi ma̧i̧ da chjai̧dë oa japea̧ pio ju̧i̧ chjiari aechide yo̧parämi̧ cjiaremȩrequedejȩrȩ jabo cjäri̧ madiro̧jo̧ȩ, ja̧di ta̧rëri̧ yo̧dëa̧dirȩ.

¹⁹ Jabechji̧ badë maea oa yo̧reji̧ri̧dirȩ. “Aja̧, a̧ro̧rȩ a̧ra̧ano̧mi̧ a̧ra̧ano̧dëde pio yodëje” yo̧reji̧ri̧dirȩ. Ado peaja̧di Jechubea pio ju̧i̧ chjiari chjarapë jo̧rȩtareji̧ri̧dirȩ. Jabechji̧ tjamo̧ yo̧ji̧ri̧ judio pio judiro̧ yo̧a̧ ji̧, “Aja̧, ja̧boa̧ oa cjiade” yo̧a̧dirȩ, jabo Pablo judi yo̧a̧ ji̧, “Cjäri̧ made, bëdüa̧ oa cjiade yaba̧” yo̧a̧de. Ado pio ju̧i̧iä dëbë ni̧bätareji̧ri̧diro̧jo̧ȩ. Aja̧ Agiripa, pio ju̧i̧ chjiarimo̧i̧ aechide yo̧reji̧ri̧diro̧jo̧ȩ teracaba maeara̧.

²⁰ Ado cüdë pio ju̧i̧ ta̧rëa̧ oaiä, 'Jabo cjäri̧ maquëda, ¿yö̧ta japatäremȩquëda, ¿yö̧ta dari̧ iëno̧ iëno̧ cjiatäremȩquiji̧ri̧da' quëna̧ jo̧rȩtamȩpea̧requede. Pio ju̧i̧iä Jerucharȩräpȩ jäpea̧ pio ju̧i̧ chjiari iëno̧ë ta̧rëa̧reconȩ Pablo ju̧i̧. “Danȩ, judio judiro̧ aechide yo̧a̧ pio ju̧i̧ chjiari Jerucharȩräpȩ ju̧ri̧ ano̧ mire ütarë bape chjaotäremȩrequedemȩ cüdë chjadëri̧ ütarë bape chjaorea̧ dapea̧ oa” yo̧mȩrȩ yo̧a̧reconȩ.

²¹ Jabo Pablo judi pio ju̧i̧ ta̧rëa̧ oaiä, cjäri̧ made, Domaräpȩ cjo̧ro̧mȩ ütë pio judi ano̧ mire ütarë bape chjaotä eamȩpea̧de chjaodëri̧. Jabechji̧ ca̧ guadiarë jida̧ chja̧oerä cjiadiätämi̧ cjiaremȩde Domaräpȩ baärea̧ daea̧rä yuro. Pio ju̧i̧iä guadiarë jida̧ chja̧oerä cjo̧ro̧ tänȩa̧reconȩ. Ado jabechji̧ ja̧di dari̧ cjo̧ro̧pade cüdë Domaräpȩ cjo̧ro̧mȩ ütë pio ju̧i̧iäpȩ chjadürea̧ daea̧rä yuro —yo̧mȩrȩ ni̧bä chjaorëremȩdejȩ Agiripa quȩmȩ ütë oa, Pjeto judi Pablo pio ju̧i̧ chjiari.

²² Ado Agiripa judi pio ju̧i̧ ta̧rëa̧ oaiä, dëbë yo̧a̧dejȩ Pjeto ju̧i̧: —Danȩ, pio cüdëborë ta̧rëtämi̧ cjiareconȩ pio jiro üi̧ oa —yo̧a̧dejȩ. Ado Pjeto judi dëbë yo̧a̧dejȩ: —Jabechji̧ pio yaba̧ dopea̧rä ta̧rëparenȩjo̧ȩ.

Ütëti̧ judiro̧ a̧doparëreji̧ri̧dirȩ Pablo pio ju̧i̧ ta̧rëpea̧ oa.

²³ Ado dopea̧rä Agiripa judi, Bereniche quȩyi̧borë yu̧a̧rëreji̧ri̧dirȩ a̧doparea̧ jo̧ tjo ana̧ tjamo̧räpȩ, jibëa̧ chjibo ba chia tjamo̧ra̧ ina̧ oa cjiaji̧ri̧rȩ. Ado ütëborë pio jibëiäpȩmo̧ cjäri̧ri̧ cjia daji̧ri̧rȩ chjadëri̧ jearëreji̧ri̧diro̧jȩrȩ, chjacjiamȩri̧ ni̧bäji̧ri̧rȩ. Ado tjamo̧ yo̧ji̧ri̧ guadia pio judiro̧borë yu̧a̧rëreji̧ri̧dirȩ, Checharearäpȩ tjamo̧ cjo̧ro̧ji̧ri̧ pio ji̧ri̧ nö̧ta.

²⁴ Ado Pablo judi a̧doparea̧ jo̧ tjoro yu̧a̧rä, Pjeto judi ütëbo oa yo̧a̧dejȩrȩ: —Danȩ Agiripa, chiri ütë cjo̧ro̧mȩ oa ni̧bärequedemȩ. Ado tjamo̧ cjo̧ro̧ji̧ri̧ ütëbodärä oa ni̧bärequededibe peaja̧di, a̧dopera̧pea̧ji̧ri̧ pio ji̧ri̧bo —yo̧a̧dejȩrȩ—. Danȩrȩ, pio yoa üi̧ oa darenȩro̧jo̧ȩ. Judio judiro̧ ütëborë aechide yo̧rërea̧ pio judide. Aja̧, Jerucharȩräpȩ cjo̧ro̧ji̧ri̧ judio judiro̧ aechide yo̧ chjaodiro̧jo̧ȩ. Ado pio yoaiä cjo̧ro̧ji̧ri̧ judio judiro̧ peaja̧di aechide yo̧ chjaodiro̧jo̧ȩ. Jabechji̧ pio coa goëdaera̧pea̧diro̧coe pio jiro üi̧ oa goae tarari̧ aechide yo̧pea̧ oa. Ma̧i̧ dari̧ ëna̧diäreji̧ri̧dirȩ pio yoa üi̧ oa ja̧bo tänȩpea̧ pio ju̧i̧ chjiari.

²⁵ Jabo cüdë ütarë ta̧rë cha̧rea̧ ji̧, 'jabechji̧ ma̧i̧ da chjai̧dë oa japea̧dida, ja̧bo tänȩpea̧dida' quëna̧ jo̧rȩtadëa̧requede. Jabechji̧ ma̧i̧ da chjai̧dë oa japadëa̧de. Ado judi Domaräpȩ cjo̧ro̧mȩ ütë tjamo̧ pio judi ano̧ mire ütarë bape chjaotä cjo̧dëa̧ oaiä, jabechji̧ pio ju̧i̧iäpȩ chjadüpareconȩ.

²⁶ Jabo cjäri̧ marequede. Pablo pio ju̧i̧ chjiari eami̧ oa go̧ȩparea̧ goadërequede. 'Tjana̧ ma̧ȩ oa go̧ȩpatäremȩquëda, chjai̧dëri̧ japadëa̧dida, ca̧ ütë oa eami̧ oa go̧ȩpe chjadütärea̧ ji̧, go̧ȩparea̧ goadëquëda' quëna̧ jo̧rȩta̧ oaiä, jabechji̧ pio mȩnȩro̧ ütëborë chjadëri̧ ütarë ta̧rëtä earequededibe —yo̧a̧dejȩrȩ—. Ado danȩ Agiripa, mȩnȩ pio jiro üi̧ oa iëno̧ iëno̧ ta̧rërea̧ tararä judi, judi chjai̧dë oa japea̧bea pio ju̧i̧ chjiari chjadëri̧ dabapea̧ oa iëno̧ iëno̧ ta̧rërea̧ tararä judi, jabechji̧ chjadëtäremȩde. Jabechji̧ a̧docoe cüdë domaräpȩ cjo̧ro̧mȩ ütë tjamo̧ pio ju̧i̧iäpȩmo̧ go̧ȩpe chjadürea̧ goadë tara.

²⁷ Ado chaäa̧ oa cjiamȩ ju̧i̧, go̧ȩ i decjiamȩ ju̧i̧, jabechji̧ chjadürea̧mi̧dëde. Jabechji̧ judi chjai̧dëri̧ japea̧ pio ju̧i̧ chjiari chjadëri̧ go̧ȩpe chjadüa̧rämo̧ chjadürea̧mi̧ dade —yo̧mȩrȩ tarupë ni̧bärëremȩdejȩrȩ a̧dopera̧pea̧ pio ji̧ri̧iäpȩmo̧ Pjeto judi.