Japarea̧ 24 - Biblia Pume

Pjeri quȩmȩ chiri ütë pio ju̧i̧ ja̧ dëbëräpȩji̧ri̧rȩ aechide yo̧rëreji̧ri̧diro̧jo̧ȩ Pablo ju̧i̧ judio judiro̧

¹ Ado cja̧rȩichimo̧ do chjätä ëte, tjamo̧ goë tuti ja̧bepamȩ judi, Anania quȩmȩ pio judi järëremȩde Checharearäpȩ judio tjamo̧ yo̧ji̧ri̧ pio ji̧ri̧ nö̧ta. Ado Teturo quȩmȩ pio judiborë järëremȩde tjamo̧ ni̧bämȩrȩ ja̧bepapea̧ oa, tjamo̧ aechide ni̧bämȩrȩ ja̧bepapea̧ oa. Ado judiro̧ ütëborë go̧düdäräa̧rä, Pjeri quȩmȩ chiri ütë ja̧ dëbëräpȩ a̧dopaji̧ri̧rȩ aechide yo̧rëreji̧ri̧diro̧jo̧ȩ Pablo pio ju̧i̧iäpȩmo̧.

² Ado ja̧dëa ji̧ ütë judi guadia pio ju̧i̧iä Pablo pio ju̧i̧ ma̧ȩ chjadüa̧rä, judiborë a̧dopera̧pea̧de. Ado ja̧dëa ji̧ Teturo pio judi taruparëremȩde Pablo pio ju̧i̧iäpȩmo̧ aechide yo̧pea̧ ji̧. Ja̧di ta̧rëri̧ yo̧mȩrȩ yo̧rëremȩdejȩ chiri ütë cjo̧ro̧mȩ pio ju̧i̧iäpȩmo̧: —Danȩ, ibëa̧ ütë, ba chia tjamo̧renȩ —yo̧a̧dejȩ—. Ado chjadëri̧ japea̧renȩibe. Jabechji̧ mȩnȩ chjadëri̧ ja̧bepea̧ pio oaiä, mȩnȩ urëdi tjamo̧ oa jo̧rȩtamȩrȩ ütëmȩrȩ ja̧bepea̧ oaiä, jabechji̧ no̧mȩ tjamo̧ri ja̧ chjadëri̧ jida̧ oa cjo̧ro̧ marea̧rȩ judio judiro̧ acji tai̧ji̧ri̧ judiro̧ jana̧rea̧mi̧dëri̧. Aja̧, a̧ro̧rȩ pio yoa chirirä ji̧dë u̧i̧ chjadëri̧ cjo̧ro̧rea̧mi̧ dari̧ jabepe chjaorëremȩrenȩ pio ibë chjiari —yo̧a̧dejȩ—.

³ Pio ju̧i̧iä a̧ro̧rȩ ütëborë ma̧ chiadëri̧ cjiaji̧ri̧rȩ darea̧ro̧jo̧ȩ mȩnȩ chjadëri̧ ja̧bepea̧ pio ju̧i̧. 'Jabechji̧ chjadëri̧ japea̧diibëda, a̧dë chjäte chjadëri̧ japea̧diibëda' quëna̧ jo̧rȩtarea̧ro̧mȩ.

⁴ Ado yaba̧, jabechji̧ ma̧ȩ go̧a̧ti̧ tjamo̧ oa ni̧bä chjaodëparequedemȩ. 'Jabechji̧ jamȩpai̧ dari̧ cjiadida, japamitë ana̧ri̧ ta̧rë charea̧mi̧dëdida' quëna̧ jo̧rȩta̧ oaiä, jabechji̧ jëreeamȩrȩ ni̧bä chjaoparequedemȩ. Jabo cjäri̧ri̧ cjia daibe ütë. Cjäri̧ri̧ cjia ta̧rëibe ibëa̧ ma̧ȩ ji̧ra̧ tjamo̧dë oa.

⁵ Danȩ, pio yoa üi̧ pio ju̧i̧ chjiari na̧e chiapea̧rea̧rȩ —yo̧a̧dejȩ—. Pumȩ chjai̧dëde. Uapai̧ dade. Ma̧i̧ dari̧ japamȩde. Oëra̧ti̧ chamȩ bë ma̧ri̧räpȩ tai̧ chjaomȩde judio pio ji̧ri̧ cjarari̧ cjiape baga tänȩpea̧ oa, judiro̧ chjai̧dëri̧ japapea̧ oa —yo̧a̧dejȩ—. Jabomo̧ mu̧i̧tjoi̧mi̧ dadëde jabo tjamo̧ yo̧mȩmi̧ dade. Jabechji̧ ta̧rë ja̧bodiro̧jo̧ȩ pumȩ judiro̧, ado cho̧rë jädiro̧jo̧ȩ ji̧dëri̧. Danȩ, Nacharerimȩ pio judi teracabari̧ a̧ra̧ano̧rërea̧ ma̧ȩrä cjo̧ro̧ji̧ri̧ pio judiro̧ cho̧rë jädiro̧jo̧ȩ. Jabechji̧ pio ju̧i̧ ja̧ chja̧oerä cjo̧ro̧ maeadirȩ —yo̧a̧dejȩ—.

^6-7 Ado pio yodëje, cjäri̧ made, a̧dë chjäte ma̧i̧ dari̧ japamȩde. Oëadëmȩde. Danȩ, Ütë tjamo̧ ja̧ bë üdë chjai̧dë gȩrȩ chiami̧ dari̧ cjiadiäpea̧ oa, china̧chja pio ju̧i̧ japajatea̧de. Ado pio ju̧i̧iä mitëa̧rea̧ro̧jo̧ȩ —yo̧a̧dejȩ—.

⁸ Danȩ, mȩnȩ pio yoa üi̧ oa iëno̧ iëno̧ ta̧rërä judi, peaja̧di chjaodëri̧ na̧e chiaparenȩ pio ju̧i̧ chjiari. 'Aja̧, Teturo judi tjamo̧ri̧ yo̧dicoada, jabo oëra̧ aechide yo̧dëa̧diji̧da' quëna̧parenȩ peaja̧di ca̧ ütë —yo̧mȩrȩ cjiadiärëremȩde Teturo judi.

⁹ Ado Teturo pio ju̧i̧ nö̧taji̧ri̧ judio pio judiro̧ peaja̧di ta̧rëri̧ aechide yo̧rëreji̧ri̧diro̧jo̧ȩ Pablo pio ju̧i̧iäpȩmo̧. Ado ja̧dëa ji̧ ütë pio ju̧i̧iäpȩmo̧ yo̧a̧diro̧jo̧ȩ: —Aja̧ ütë, Teturo judi oëra̧ yo̧dëdimȩ jabo coëma cjiari̧ yo̧dimȩ —yo̧a̧diro̧jo̧ȩ.

Pablo judi pio jȩa chjiari ni̧bärëremȩde ütë pio ju̧i̧iäpȩmo̧.

¹⁰ Ja̧dëa ji̧ ütë judi jibëa̧ ichira̧ na̧rȩmȩrȩ Pablo pio ju̧i̧ ano̧ mire ni̧bä tänȩrëremȩdejȩ. Pio ju̧i̧iä Pablo judi ano̧ mire ni̧bä chjaorëremȩdejȩ ütë pio ju̧i̧iäpȩmo̧, ja̧di ta̧rëri̧ yo̧mȩrȩ: —Danȩ ca̧ ütë, ui ji̧ra̧ tjamo̧ri ja̧ ibëa̧ ütëmȩrȩ cjo̧ro̧mȩrenȩ pio yoa chirirä —yo̧a̧dejȩ—. Ado chjadëri̧ ja̧bepe chjaorëremȩrenȩ peadëri ja̧. Pio ju̧i̧iä ma̧ chiadëri̧ cjia tjamo̧requede pio coa chjiari ni̧bäpea̧ oa pio mȩaiäpȩmo̧.

¹¹ Danȩ ca̧ ütë, 12 domȩri ja̧ go̧düdäräa̧requede Jerucharȩräpȩ. Ütë tjamo̧ pio ju̧i̧iäpȩmo̧ chjacjiamȩri̧ jo̧rȩtapea̧ oa go̧düdäräa̧requede. Ado mȩnȩ, 'cjäri̧ madida, pio jiro doro tjamo̧ri̧ go̧düdärädëa̧ jirodida' quëna̧rä judi, jabechji̧ eami̧ pumȩ oaiä chjaodëri̧ ta̧rëpai̧ darenȩ pio coa chjiari.

¹² Aja̧, ado cüdë Jerucharȩräpȩ go̧düdärä ëte, jabechji̧ jäa̧requede Ütë tjamo̧ ja̧ bëräpȩ. Jabo danȩ ca̧ ütë, ado ca̧rȩmo̧ pumȩ pio ju̧i̧ nö̧ta ba dëbë ni̧bätamȩ oa dadärädëa̧diro̧coe pumȩ judiro̧. Ado pumȩ ji̧ri̧ cjarari̧ cjiape baga tänȩmȩ oa peaja̧di dadärädëa̧diro̧coe. Ado judiorë a̧doparea̧ bëräpȩ ja̧di dari̧ japamȩ oa peaja̧di dadärädëa̧diro̧coe. Jabechji̧ eami̧räpȩ ja̧di dari̧ japea̧ ma ja̧didë.

¹³ Ado pio coaiäpȩmo̧ aechide ni̧bäji̧ri̧ pio judiro̧, jabechji̧ tjamo̧ri̧ jo̧rȩta tänȩrea̧ goadë madirȩ. Mö̧na̧mi̧ dari̧ cjo̧ro̧dirȩ. Mȩnȩ coa irä darëremȩ pio ju̧i̧iä chjadëri̧ ta̧rëtärea̧ ji̧, ta̧rërea̧ dadëparenȩ —yo̧a̧dejȩ—.

¹⁴ Jabo danȩ ca̧ ütë, coëma cjiari̧ ni̧bä chjaotämi̧ cjiarequedemȩ goadirea̧ decjiari̧ —yo̧a̧dejȩ—. 'Jabechji̧ Jechu judi Ütë tjamo̧ pio ju̧i̧iäpȩ baärea̧ no̧mi̧ dadida' quëna̧ jo̧rȩtamȩrȩ chjacjiamȩri̧ jo̧rȩtareconȩ ibëa̧ ütëti̧rea̧ ja̧ Ütë pio ju̧i̧iäpȩmo̧. Jabo ja̧di dari̧ quëna̧pea̧ üdë, "oëra̧de” yo̧dirȩ pio yodëro̧je. Jechu pio ju̧i̧ chjiari ma̧ȩ oa ta̧rërä teracabarämi̧ cjiadiro̧jo̧ȩ. Jabo danȩ ca̧ ütë, cüdë Jechu pio ju̧i̧ chjiari quëna̧mȩborë quëna̧mȩrequede pio yodëro̧mi̧ dari̧. Tjamo̧ davä. Moicherë go̧ȩparërea̧ ma̧ȩ pio ju̧i̧bo quëna̧requede. Ütërë ea jana̧ chjadüa̧ oa ni̧bäji̧ri̧ pio judiro̧ go̧ȩparërea̧ ma̧ȩ pio ju̧i̧bo quëna̧requede —yo̧a̧dejȩ—.

¹⁵ Ado danȩ, pio yodëro̧je Ütë tjamo̧ ju̧i̧ jidatami̧ jidatarequede peaja̧di bëdüpea̧ pio ju̧i̧ chjiari. 'Aja̧, Ütë tjamo̧ judi ütëbodärä oa bëdü tänȩpadiji̧ri̧da, chjadë pio ji̧ri̧, chjai̧dë pio ji̧ri̧bo bëdü tänȩpadiji̧ri̧da' quëna̧ jo̧rȩtarequede cüdë, pio yodëro̧mi̧ dari̧ —yo̧a̧dejȩ—.

¹⁶ Ado ja̧di dari̧ quëna̧ pio ju̧i̧iä, jabechji̧ cüdë nö̧tarä yuro tüdüa̧mi̧ darä cjo̧ro̧tämi̧ cjiarequede Ütë tjamo̧ pio ju̧i̧iäpȩmo̧ chjai̧dëri̧ japachea oa, ca̧ pumȩ pio ji̧ri̧iäpȩmo̧ oëra̧ japachea oa. Aja̧ ca̧ ütë, cüdë nö̧tarä yuro ja̧di dari̧ cjo̧ro̧tämi̧ cjiarequede chji̧ chjadë oa goapea̧ oa, ca̧ chji̧ üdë pio coaiäpȩmo̧ aeno̧mi̧ dari̧ japachea oa —yo̧a̧dejȩ.

¹⁷ —Ado danȩ ca̧ ütë, cüdë ui ji̧ra̧ nö̧ta oëra̧ti̧ oa tai̧mȩrȩ cjo̧ro̧rërea̧ ji̧, 'jabechji̧ Jerucharȩräpȩ ado chjereno̧ jätäremȩquëda' quëna̧ jo̧rȩtamȩrȩ pio ju̧ri̧pȩ go̧düdäräa̧requede do ji̧ra̧dëri ja̧. Jabechji̧ ca̧ pumȩ pio ji̧ri̧iäpȩmo̧ yürüpea̧ oa, chjö̧na̧i̧ti̧ oa cjäri̧ ja̧boji̧ri̧ pio ji̧ri̧iäpȩmo̧ chëre oa yürüpea̧ oa, ado Ütë tjamo̧ pio ju̧i̧iäpȩmo̧ cäë yürüpea̧ oa, jabechji̧ go̧düdäräa̧requede.

¹⁸ Ado ja̧di dari̧ japamȩ oa dadäräa̧diro̧coe Ütë tjamo̧ ja̧ bëräpȩmȩ oa —yo̧a̧dejȩ—. Tjamo̧ davä. Cüdë pea joadäräa̧mȩ oa, cüdë chjai̧dë gȩrȩ chiadëmȩmi̧ dari̧ cjiadiäpea̧ oa joadäräa̧mȩ oa daräräa̧diro̧coe. Pumȩ ji̧ra̧dëräpȩmȩ oa, pumȩ judiro̧ cjarari̧ cjiadëräpȩmȩ oa dadäräa̧diro̧coe. Jabo judio judiro̧, Achia quȩmȩ chiririji̧ri̧ judio pio judiro̧, dëdë, pio ju̧ri̧pȩrëreji̧ri̧dirȩ.

¹⁹ Ado pio judiro̧dirȩ coa chjiari ma̧ȩ chjádë yürüa̧ji̧ri̧ judiro̧. Ado cüdë tjamo̧ri̧ chjai̧dëri̧ japea̧rä judi, jabechji̧ pio judiro̧borë pio yi na̧ dëbëräpȩ cjiatäreji̧ri̧dirȩ pio mȩaiäpȩmo̧ irä yo̧pea̧ oa chjadëri̧. Jabo cjäri̧ madirȩ, jana̧dëa̧dirȩ.

²⁰ Pio ju̧i̧iä pio yodëro̧je chjadëri̧ yo̧täreji̧ri̧diro̧mȩ goadirea̧ decjiari̧ —yo̧a̧dejȩ—. Pio yodëro̧je cüdë chjai̧dëri̧ japea̧ pio ju̧i̧ tjamo̧ri̧ dabarä judi, cüdë Jerucharȩräpȩ tjamo̧ yo̧ji̧ri̧ pio ji̧ri̧ ja̧ dëbëräpȩmȩ oa iëno̧ iëno̧ ta̧rërërea̧ oaiä chjadëri̧ dabapea̧rä judi, jabechji̧ coëma cjiari̧ yo̧täreji̧ri̧diro̧mȩ.

²¹ Jabo cjäri̧ madirȩ —yo̧a̧dejȩ—. Yo̧rea̧ chiadëdirȩ. Cüdë chjai̧dëri̧ japea̧ pio ju̧i̧ chjiari dabadëdirȩ. Jabo danȩ ca̧ ütë, cüdë pio ji̧ri̧iäpȩmo̧ bëdürea̧ pio ju̧i̧ chjiari ma̧ȩ oa to̧bari̧ yo̧a̧ oaiä, Jerucharȩräpȩji̧ri̧ oa bëdürea̧ pio ju̧i̧ chjiari ni̧bä chjaoa̧ oaiä, jabechji̧ adëdiämi̧ tarari̧ jo̧rȩtaji̧ri̧pea̧ jirodirȩ. Jabechji̧ pio jiro ma̧ȩ üdë goae tjamo̧dëpe bagura jiroremȩdejȩrȩ. Ado pio ju̧i̧iä na̧ dëbëräpȩ cjia jirorequede pio yaba̧ domȩ oa ca̧ ütë. Aja̧, cüdë 'ja̧boa̧ji̧ri̧ pio judiro̧ 'bëdürea̧ dapadiro̧da' quëna̧ jo̧rȩtamȩrȩ cjo̧ro̧a̧ oaiä, jabechji̧ na̧ dëbëräpȩ cjiarequede pio mȩnȩ coa ütarë bape chjaopea̧ oa. Jabechji̧ cüdë bëdürea̧ pio ju̧i̧ chjiari yo̧a̧ oaiämo̧i̧ aechide yo̧ jirodiro̧coe yaba̧ ca̧ ütë —yo̧mȩrȩ ni̧bä chjaorëremȩdejȩ Pjeri quȩmȩ ütë pio ju̧i̧iäpȩmo̧ Pablo judi.

²² Jabo Pjeri judi Jechu pio ju̧i̧ chjiari peadë daba̧ oaiä, 'Aja̧, Jechu judi Ütë tjamo̧ pio ju̧i̧iäpȩ baärea̧ no̧mi̧ dadida’ quëna̧ daba̧ oaiä, jabechji̧ cjiadiä tänȩrëremȩdejȩrȩ ütëbo oa. Ado Pablo pio ju̧i̧iäpȩmo̧ yo̧a̧dejȩ: —Danȩ, guadia ütë pio judi, Irichia quȩmȩ pio judi jana̧rä, ado chjereno̧ ni̧bä chjaoparea̧rȩ. Ado pio jiro doro, mȩa chjadëri̧ ütarë ta̧rë ëte, ütarë bape chjaorea̧ ma̧ȩ oa yürüparequede —yo̧a̧dejȩ.

²³ Ado ütë judi ja̧di ta̧rëri̧ yo̧ ëte, tjamo̧ yo̧mȩ guadia pio ju̧i̧iäpȩmo̧ ano̧ mire ni̧bä chjaorëremȩdejȩ Pablo pio ju̧i̧ chjiari. —Danȩ, Pablo pio ju̧i̧ chjadëri̧ jidajo̧ȩ —yo̧a̧dejȩ—. ‘Jabo tjamo̧ri̧ chaäa̧ oa cjiapea̧ chiadida, uapai̧ da tjamo̧ jirodida’ quëna̧ dadëjo̧ȩ. Ado danȩ, jibëa̧ jadü judiro̧ pio ju̧i̧ goëdaera̧parä judi, eami̧ jurarea̧ oa, chjibo oa goa jana̧rä judi, jabechji̧ goëdarea̧ yürüjȩrȩ chjadëri̧. China̧chjadëde —yo̧mȩrȩ yo̧rëremȩdejȩ Pjeri ütë judi tjamo̧ yo̧mȩ guadia pio ju̧i̧iäpȩmo̧.

Pablo judi ni̧bä chjaorëremȩdejȩ Pjeri ju̧i̧, jibëa̧ iei̧bo.

²⁴ Do ji̧ra̧dë chjätä ëte, Pjeri judi jachi oa tai̧mȩrȩ ma̧na̧rëremȩde jibëa̧ iei̧ pio ji̧ nö̧ta. Judiorëreyi̧nȩ. Duruchia quȩyi̧rëreyi̧nȩ. Ado Pjeri judi Pablo pio ju̧i̧iä ado chjereno̧ ta̧rëtämi̧ cjiamȩrȩ ma̧ȩ chjadürëremȩdejȩ pio jȩaiäpȩ jätä. Ado Pablo judi go̧düdäräa̧rä, ni̧bä chjaorëremȩdejȩ. Jechu Quiricho pio ju̧i̧ chjiari, pio ju̧i̧iäpȩmo̧ quëna̧pea̧ pio ju̧i̧ chjiari ni̧bä chjaoa̧dejȩ.

²⁵ Ado coëma cjiari̧ cjo̧ro̧pea̧ pio ju̧i̧ chjiaribo ni̧bä chjaoa̧dejȩ. Peaja̧di ni̧bä chjaoa̧dejȩ icjararä chjai̧dë pio ju̧i̧ chjuari̧ jiadapea̧ pio ju̧i̧ chjiari. Aja̧, ana̧ri̧ ni̧bä chjaorëremȩdejȩ, jibëa̧ iei̧bo. Ado Ütë ja̧ ërecjia̧ üdë daburäpȩmo̧ acji cjatäpea̧ pio ju̧i̧ chjiari ni̧bä chjaoa̧ ji̧, ütara̧ doro acji cjatäpea̧ pio ju̧i̧ chjiari ni̧bä chjaoa̧ ji̧, Ütë tjamo̧ judi pumȩ ji̧ri̧ ütarë bape chjaopea̧ pio ju̧i̧ chjiari ni̧bä chjaoa̧ ji̧, uapa tjamo̧pe bagarëremȩde Pjeri judi. Ado pio ju̧i̧iä chjaodëri̧ tuti yo̧a̧dejȩ Pablo ju̧i̧, ja̧di ta̧rëri̧ yo̧mȩrȩ: —Jabechji̧de yaba̧. Ado chjereno̧ baävä. Ado cüdë ado cja̧rȩmo̧ doro ta̧rë charea̧ darä, jabechji̧ yo̧ chjadüparequedemȩ ado. Jabo jabechji̧de yaba̧. Baävä —yo̧a̧dejȩ.

²⁶ Ado Pjeri judi, yo̧a̧ri̧ jo̧rȩtarea̧ chiamȩrȩ ni̧bä chjaoera̧tä yo̧ chjadürëremȩdejȩ Pablo ju̧i̧. Dëdë, ta̧rëtämi̧ cjiarëremȩdejȩ Ütë tjamo̧ ja̧ ma̧ȩ oa, jabo pio ju̧i̧mo̧i̧ oa jo̧rȩtadëa̧de. Jabechji̧ chëre pio ju̧i̧bo jo̧rȩtarëremȩde. ‘Aja̧, Pablo judi chëre yürüpai̧ da jirodicoada, tjamo̧ri̧ baätä ea̧ oaiä chëre yürüpai̧ dadicoada, pio ju̧i̧iä ado dëbëdiätäreji̧ri̧a̧ro̧da’ quëna̧ jo̧rȩtarëremȩde. Ado pio ju̧i̧iä babui̧ra̧ ma̧ȩ chjadürëremȩdejȩ Pablo ju̧i̧ pio jȩa nö̧ta ni̧bä chjaoera̧tä, pio jȩaiäpȩmo̧ chëre oa yürütä chjadëri̧ baä tänȩpea̧ oa. Jabo cjäri̧ madejȩ, Pablo judi chëre oa yürüdëa̧dejȩ.

²⁷ Ado Pjeri judi Pablo pio ju̧i̧ baä tänȩtärea̧ ji̧, baä tänȩdërëremȩdejȩ. Jabechji̧ judio judiro̧ pio jȩaiäpȩmo̧ ba chia jo̧rȩtapea̧ oa, baä tänȩdëa̧dejȩ. Ado yo̧a̧ri̧ ui codë oa chjätä ëte, Pjeri judi chiri ütëmȩrȩ cjo̧ro̧rërea̧ ji̧, ütëdëpe bagarëremȩde. Ado cja̧rȩmo̧ oa ano̧ mire ütë tänȩrëreji̧ri̧diro̧jo̧ȩ Pochio Pjeto quȩmȩ pio ju̧i̧.