Japarea̧ 23 - Biblia Pume

¹ Ado Pablo judi, tjamo̧ yo̧ji̧ri̧ judio pio ji̧ri̧iäpȩmo̧ cjoai̧tä damȩrȩ taruparëremȩde pio ji̧ri̧iäpȩmo̧ ni̧bä chjaopea̧ ji̧. —Danȩrȩ ca̧ oti̧, cüdë boi̧chji̧ri ja̧ pio yoa chirirä cjo̧ro̧a̧ nö̧ta, jabechji̧ Ütë tjamo̧ ja̧ dachoro cjo̧ro̧rëremȩrequede chji̧ chjadëra̧ pio ju̧ri̧ra̧ jo̧rȩtamȩrȩ. Aja̧, cjo̧dërë tüe baämi̧ dari̧ jo̧rȩtarea̧ decjiari̧, ca̧ chji̧ üdë pio coaiäpȩmo̧ aeno̧mi̧ dari̧ japarea̧ decjiari̧ cjo̧ro̧rëremȩrequede pio ju̧i̧ ja̧ dachoro —yo̧a̧dejȩrȩ Pablo judi.

² Jabo tjamo̧ goë tuti ja̧bepamȩ judi, Anania quȩmȩ pio judi pio ju̧i̧ ta̧rëa̧ oaiä, Pablo pio ju̧i̧ ja̧ ya pio ju̧i̧ goae tarari̧ bide cjaeätä yo̧rëremȩdejȩrȩ ju̧i̧ ja̧ queri̧räpȩ cjiaji̧ri̧ pumȩ pio ji̧ri̧. Ado ju̧i̧ ta̧rëa̧ oaiä, dëdë, goae tarari̧ bide cjaeäa̧diro̧jo̧ȩ ya oa.

³ Jabo Pablo judi tjamo̧ goë tuti ja̧bepamȩ pio ju̧i̧iäpȩmo̧ yo̧mȩrȩ yo̧a̧dejȩ: —Ado Ütë tjamo̧ judi peaja̧di bide cjaeäpadimȩ pio mȩa —yo̧a̧dejȩ—. Jabechji̧ yo̧a̧ri̧ ya chiamȩmi̧ dari̧ cjo̧ro̧mȩ pio ju̧i̧, pumȩ chjadë tjamo̧cji quëna̧ japamȩ pio ju̧i̧ ja̧bo tänȩrea̧mi̧ dari̧ bide cjaeäpadimȩ peaja̧di. Danȩ, pio ju̧ri̧pȩ dae charenȩ pio coa ütarë dapea̧ oa, Moicherë go̧ȩparërea̧ ma̧ȩra̧ pio ju̧ri̧ra̧ ütarë ta̧rëpea̧ oa. Jabo cjäri̧ marenȩque, mȩnȩ pio coaiäpȩmo̧ bide cjaeätä yo̧a̧ pio ju̧i̧iä, jabechji̧ Moicherë go̧ȩparërea̧ ma̧ȩ pio ju̧i̧ jiadarenȩ. Ado pio ju̧i̧iä peaja̧di bide cjaeämi̧ dari̧ japajadimȩ Ütë tjamo̧ judi —yo̧a̧dejȩ.

⁴ Ja̧dëa ji̧ Pablo ja̧ queri̧räpȩ cjiaji̧ri̧ pio judiro̧ yo̧a̧diro̧jo̧ȩ: —Jabo cjäri̧ marenȩjo̧ȩ, tjamo̧ goë tuti ja̧bepamȩ pio ju̧i̧iäpȩmo̧ chjai̧dëri̧ ni̧bädëtäremȩrenȩjo̧ȩ. Jabechji̧ Ütë tjamo̧ pio judi tänȩa̧ oa tjamo̧ goë tuti ja̧bepamȩpea̧de —yo̧a̧diro̧jo̧ȩ.

⁵ Ado pio ju̧i̧ ta̧rëa̧ oaiä Pablo judi dëbë yo̧a̧dejȩrȩ: —Danȩrȩ ca̧ oti̧, 'tjamo̧ goë tuti ja̧bepamȩ pio judidida' quëna̧ dabadëa̧requede. Jabechji̧ ado cja̧rȩmo̧rämi̧ cjiaremȩreconȩ. 'Pio judidida' quëna̧ daba̧rä judi, jabechji̧ ja̧di ta̧rëri̧ yo̧dëa̧täremȩreconȩ. Jabechji̧ Ütë tjamo̧ ja̧ ma̧ȩ pio ju̧i̧ dabarequede. Aja̧, “Tjamo̧ yo̧mȩ pio ju̧i̧ chjiari chjai̧dëri̧ ni̧bädëvä” yo̧mȩ ma̧ȩ pio ju̧i̧ dabarequede. Pio ju̧i̧iä yo̧dëa̧täremȩreconȩ tjamo̧ri̧ dabarä judi —yo̧a̧dejȩrȩ.

⁶ Ado Pablo judi tjamo̧ yo̧ji̧ri̧ pio ji̧ri̧ ütarë damȩrȩ poë cürë jo̧rȩtamȩpea̧de tjamo̧ ütarë yo̧ji̧ri̧ judio pio ji̧ri̧ chjiari. 'Chia chia, yui chiami̧ dari̧ jo̧rȩtadiro̧da, cja̧rȩmȩ jo̧rȩtarea̧ chiadëdiro̧da, o judiro̧ tjaoëpai̧ dari̧ jo̧rȩtadiro̧da, cja̧rȩmȩ chji̧ chiami̧ dari̧ jo̧rȩtadëdiro̧da, o judiro̧ pjaricheodiro̧da, jabo o judiro̧ chjaducheodiro̧da, yo̧a̧ri̧ bubami̧ dadiro̧da, ji̧mo̧ jo̧rȩtadëdiro̧da' quëna̧ jo̧rȩtamȩrȩ ado chjereno̧ taruparëremȩde pio ji̧ri̧iäpȩmo̧ to̧bari̧ ni̧bä chjaopea̧ ji̧. —Jabo danȩrȩ ca̧ oti̧, ta̧rëchji̧coe! —yo̧a̧dejȩrȩ—. Pjaricheorequede cüdë. Ado ca̧ ama̧i̧ judi peaja̧di pjaricheode, ca̧ ai̧ pio jini̧borë. Ado coa aechide yo̧ji̧ri̧ judiro̧, cjäri̧ madiro̧coe, aechide yo̧ chjaodiro̧coe cüdë bëdürea̧ pio ju̧i̧ chjiari quëna̧mȩ tara. Cüdë tjamo̧i̧ cjiari̧ quëna̧ oaiä, 'Aja̧, ja̧boa̧ji̧ri̧ pio judiro̧ ado chjereno̧ bëdüpadiro̧da' quëna̧ jo̧rȩta̧ oaiä, jabechji̧ aechide yo̧ chjaodiro̧coe o judiro̧.

⁷ Ado Pablo judi bëdüpea̧ pio ju̧i̧ chjiari ni̧bä chjaoa̧ oaiä, yo̧a̧ri̧ bubape bagami̧ dari̧ cjiadiärëreji̧ri̧dirȩ a̧dopea̧ oa cjiaji̧ri̧ judiro̧. Aja̧, pjaricheo judiro̧ ado chjaducheo judiro̧ chjaodëri̧ dëbë ni̧bätaji̧ri̧pe bagarëreji̧ri̧dirȩ, yo̧a̧ri̧ bubape bagami̧ dari̧.

⁸ Jabechji̧ Chjaducheo judiro̧, 'Aja̧, ja̧boa̧ji̧ri̧ pio judiro̧ ado chjereno̧ bëdüpadiro̧da' quëna̧dë madirȩ. Ado tjo maearë cjiaji̧ri̧ pio ji̧ri̧ chjiaribo quëna̧dëdirȩ. Ado pio ju̧i̧iä yaröca pio ji̧ri̧ chjiari, a̧dëriji̧ri̧ mu̧i̧tjoi̧ pio ji̧ri̧ chjiari quëna̧dë madirȩ. Jabo pjaricheo judiro̧, dëdë, quëna̧ maeadirȩ pio ji̧ri̧ chjiari. Ado ja̧boa̧ji̧ri̧ judiro̧ ado chjereno̧ bëdüpea̧ pio ju̧i̧ chjiari quëna̧dirȩ peaja̧di. Pio ju̧i̧iä yo̧a̧ri̧ bubape bagami̧ dari̧ cjiadiärëreji̧ri̧dirȩ judio tjamo̧ yo̧ji̧ri̧ judiro̧ Pablorë bëdüpea̧ pio ju̧i̧ chjiari ni̧bä chjaoa̧ oaiä.

⁹ Ado ji̧dë u̧i̧ to̧bari̧ ni̧bätaji̧ri̧pe baga̧ oaiä, jabechji̧ cjitërëreji̧ri̧dirȩ o judiro̧. Aja̧, Moicherë go̧ȩparërea̧ ma̧ȩ pio ju̧i̧ a̧ra̧ano̧ji̧ri̧ pio judiro̧ orë, pjaricheo pio ji̧ri̧ nö̧taji̧ri̧ pio judiro̧ orë cjitëa̧dirȩ. Ado taruparëreji̧ri̧dirȩ Pablo pio ju̧i̧ chjiari to̧bari̧ goë tuti ni̧bäpea̧ ji̧. Jabechji̧ Pablo pio judi yo̧a̧ oaiä, chjaodëri̧ ano̧ mire dëbë cjiadiämi̧ dari̧ cjiadiärëreji̧ri̧dirȩ Pablo pio ju̧i̧ dëbëpe chjaorërea̧ ji̧. —Danȩrȩ, pio jiro üi̧ üdë, 'jabechji̧ chjai̧dëri̧ japea̧dida' quëna̧ dadërea̧ro̧jo̧ȩ— yo̧a̧diro̧jȩrȩ o ji̧ri̧. —Jabechji̧ tjamo̧ri̧ dabadërea̧rȩ. Jabo Tjo maearë Pablo pio ju̧i̧iäpȩmo̧ ma̧ȩ yürüa̧ oaiä ja̧di dari̧ quëna̧mȩpea̧ jirode. Aja̧ a̧dërimȩ mu̧i̧tjoi̧ pio judi ma̧ȩ yürüa̧ oa ja̧di dari̧ quëna̧mȩpea̧ jirode davä. Ado pio ju̧i̧iä jabechji̧de ibëiä —dëbë yo̧ji̧ri̧rȩ to̧bari̧ yo̧rëreji̧ri̧diro̧jȩrȩ chjaducheo pio ji̧ri̧iäpȩmo̧ Pablo pio ju̧i̧ chjiari.

¹⁰ Jabo cjäri̧ madirȩ, dëbë ni̧bätaji̧ri̧ pio judiro̧ cjatäcjie jo̧rȩtarea̧ dadëji̧ri̧rȩ ji̧dë u̧i̧ ma̧i̧ dari̧ dëbë ni̧bä chjaorëreji̧ri̧dirȩ, ma̧ cjüëtü tjamo̧ri̧ jo̧rȩtaji̧ri̧rȩ. Ado guadia ütë pio ju̧i̧ daea̧ oaiä, 'Jabo cjäri̧ madiro̧da, ma̧i̧ dari̧ japadiro̧da, ado Pablo pio ju̧i̧ dëbë mu̧i̧ quirë ja̧bo tänȩpai̧ dadiro̧ju̧i̧da, Pablo pio ju̧i̧ gito ana̧ri̧ japapai̧ dadiro̧ju̧i̧da' quëna̧ jo̧rȩtamȩrȩ jabërä chjadüeno̧a̧dejȩrȩ jibëa̧ guadia ji̧ri̧ Pablo pio ju̧i̧ jo̧ȩra̧pe mitëpea̧ oa, guadiarë cjo̧ro̧mȩ bë ana̧räpȩmo̧ ëba baäpea̧. Ado ja̧di dari̧ japamȩrȩ chjadëri̧ ëba baärëreji̧ri̧diro̧jo̧ȩ Pablo ju̧i̧ guadiarë cjo̧ro̧mȩ bë ana̧räpȩ.

¹¹ Ado gȩnȩpea̧rä Ano̧mȩ Jechu judi chjaodëri̧ idëpea̧de Pablo ja̧ yuroro. Ado yo̧a̧dejȩ: “Danȩ, uapadëvä jabo jabechji̧ järivä. Mȩnȩ Jerucharȩräpȩ pio coa chjiari ni̧bä chjaorërea̧ ji̧, Domaräpȩ peaja̧di ni̧bä chjaotä earequedemȩ pio coa chjiari.” Ja̧di ta̧rëri̧ yo̧mȩrȩ yo̧rëremȩdejȩ Pablo ju̧i̧ Ano̧mȩ judi.

Pablo ju̧i̧ ja̧bo tänȩpea̧ ji̧ järiji̧ri̧pe bagarëreji̧ri̧dirȩ

¹² Ado dopea̧rä judio judiro̧ orë a̧dopera̧parëreji̧ri̧dirȩ Pablo pio ju̧i̧ ja̧bo tänȩpea̧ pio ju̧i̧ chjiari ni̧bä chjaopea̧ oa. 'Aja̧, ja̧bo tänȩtäreji̧ri̧a̧ro̧ju̧i̧da, ja̧di dari̧ japaji̧ri̧rȩ ja̧bo tänȩtäreji̧ri̧a̧ro̧ju̧i̧da' quëna̧ jo̧rȩtaji̧ri̧rȩ ni̧bä chjaorëreji̧ri̧dirȩ. Ado Pablo pio ju̧i̧ tjamo̧ri̧ ja̧bo tänȩtämi̧ cjiaji̧ri̧rȩ yo̧ë cji̧därëreji̧ri̧dirȩ jibëa̧ dëbëti̧ra̧ chia. 'Aja̧, Pablo pio ju̧i̧ ja̧bo tänȩpea̧ pio ju̧i̧mo̧i̧ jo̧rȩtapaa̧ro̧da yaba̧, jurarea̧ oa juradëpaa̧ro̧da, eami̧ jararea̧ oa jaradëpaa̧ro̧da, jabechji̧ Pablo pio ju̧i̧ ja̧bo tänȩa̧rämo̧ ado jurapaa̧ro̧da' quëna̧ jo̧rȩtaji̧ri̧rȩ yo̧ë cji̧därëreji̧ri̧dirȩ ma̧ȩ chjádë yürürea̧mi̧dëri̧, ano̧ mire jo̧rȩtarea̧mi̧dëri̧.

¹³ Ado Pablo ju̧i̧ ja̧bo tänȩtämi̧ cjiaji̧ri̧ judiro̧ ji̧ra̧ tjamo̧rëreji̧ri̧dirȩ. Jabechji̧ 40dërëreji̧ri̧dirȩ. Ji̧dë u̧i̧ ji̧ra̧rëreji̧ri̧dirȩ.

¹⁴ Ado ja̧dëa ji̧ a̧dopea̧ duri oa, goëdepea̧diro̧jȩrȩ tjamo̧ goë tuti ja̧bepaji̧ri̧ pio ji̧ri̧, judio ütëti̧ pio ji̧ri̧bo. Ado yo̧a̧diro̧jȩrȩ: —Danȩrȩ juradëparea̧rȩ Pablo pio ju̧i̧ ja̧bo tänȩa̧rä yuro —yo̧a̧diro̧jȩrȩ—. Tjamo̧ri̧ yo̧rea̧ro̧dibe. Ja̧di dari̧ japapea̧ ji̧ yo̧ë cji̧däa̧rea̧rȩ ano̧ mire jo̧rȩtarea̧ decjiari̧.

¹⁵ Ja̧di tara pio mȩnȩro̧ chjadëri̧ a̧dotäreji̧ri̧renȩro̧ibe, tjamo̧ ütarë yo̧ji̧ri̧ judio pio judiro̧borë. Jabechji̧ ma̧ȩ chjadütäreji̧ri̧nȩrȩ guadia ütë pio ju̧i̧iäpȩmo̧ Pablo pio ju̧i̧ ëba jana̧tä jauëräpȩmo̧. Jabechji̧ Pablo pio ju̧i̧ ji̧dë u̧i̧ iëno̧ iëno̧ cjia ta̧rëtämi̧ cjiacji̧ quëna̧ japaji̧ri̧rȩ ma̧ȩ chjadütäreji̧ri̧renȩro̧jo̧ȩ. Jabo Pablo pio ju̧i̧ ëba jana̧rä, jabechji̧ goadi jidataji̧ri̧rȩ ja̧bo tänȩparea̧ro̧jo̧ȩ no̧ro. Jabechji̧ jauëräpȩmo̧ jana̧rea̧ dadëpade —yo̧ji̧ri̧rȩ ni̧bä chjaorëreji̧ri̧diro̧jȩrȩ.

¹⁶ Jabo Pablo ju̧i̧di ja̧yi̧ pio ji̧ ja̧ joja pio judi goadi ta̧rërëremȩde judiro̧ ni̧bä chjaoa̧ pio ju̧i̧ chjiari, Pablo pio ju̧i̧ ja̧bo tänȩpea̧ pio ju̧i̧ chjiari. Pio ju̧i̧iä jäeno̧a̧de guadiarë cjo̧ro̧mȩ bë ana̧räpȩ Pablo pio ju̧i̧ na̧e chiaparȩpea̧ oa.

¹⁷ Ado Pablo judi pio ju̧i̧ ta̧rëa̧ oaiä, yo̧a̧dejȩ tjamo̧ yo̧mȩ guadia oa: —Danȩ, pio yoa pëi̧ chja oa chjadëri̧ ëba jäjo̧ȩ guadia ütë pio ju̧i̧iäpȩ. Ma̧ȩ ba chia oa ni̧bä chjaopadejȩ.

¹⁸ Pio ju̧i̧iä ëba jäa̧dejȩ üi̧ pëi̧ chja oa guadia ütë pio ju̧i̧iäpȩ. Ado tjamo̧ yo̧mȩ guadia pio judi yo̧a̧dejȩ ütë ju̧i̧iäpȩmo̧: —Danȩ ütë, chaäa̧ oa cjo̧ro̧mȩ judi, Pablo pio judi chjadüa̧ oa ëba jana̧reconȩ pio yoaje. Ni̧bätämi̧ cjiadimȩ.

¹⁹ Ado guadia ütë üdë ichi oa mitëmȩrȩ ëba jäa̧dejȩ judiro̧ jibëa̧ma̧i̧ ni̧bä chjaopea̧ oa. Ado ja̧dëa̧ ji̧ iëno̧ë ta̧rëa̧dejȩ: —¿Tjana̧ yo̧era̧pea̧renȩque?

²⁰ Ado pëi̧ chja üdë dëbë yo̧a̧dejȩ: —Danȩ, tjamo̧ yo̧ji̧ri̧ judio pio judiro̧ u̧i̧patämi̧ cjiadiro̧mȩ —yo̧a̧dejȩ—. Cja̧rȩmȩ chji̧ chiami̧ dari̧ jo̧rȩtaji̧ri̧rȩ ma̧ȩ chjadüpadiro̧mȩ jaco Pablo pio ju̧i̧ ëba jätä pio ji̧ri̧iäpȩ. Jabechji̧ ji̧dë u̧i̧ iëno̧ iëno̧ ta̧rëtämi̧ cjiacji̧quëna̧ japaji̧ri̧rȩ u̧i̧patämi̧ cjiadiro̧mȩ.

²¹ Jabo ta̧rë ja̧bodëjȩrȩ. Danȩ, oari no̧i̧dërë goadi jidatapadiro̧jo̧ȩ no̧ro Pablo pio ju̧i̧ ja̧bo tänȩpea̧ oa. 40dëdirȩ jabo ji̧dë u̧i̧ ji̧ra̧dirȩ. Ano̧ mire jo̧rȩtarea̧ decjiari̧ yo̧ë cji̧däa̧dirȩ Pablo pio ju̧i̧ ja̧bo tänȩpea̧ pio ju̧i̧ chjiari. Jabechji̧ juradëpadirȩ, ado jaradëpadirȩ jënȩro̧ Pablo pio ju̧i̧ ja̧bo tänȩa̧rä yuro. Järi tjamo̧dirȩ davä ja̧di dari̧ japapea̧ ji̧. Ado pio yaba̧mi̧rä, jabechji̧ jëdano̧a̧ oa cjiadirȩ, jabo pio mȩamo̧ jidatadiro̧mȩ chjadëri̧ ta̧rëpea̧ ji̧ Pablo pio ju̧i̧ chjadüpea̧ pio ju̧i̧ chjiari —yo̧mȩrȩ yo̧rëremȩdejȩ guadia ütë pio ju̧i̧iäpȩmo̧ pëi̧ chja üdë.

²² Ja̧dëa ji̧ guadia ütë judi dëbë yo̧a̧dejȩ: —Cjapiri̧ cjo̧ro̧vä. Mȩnȩ pio coaiäpȩmo̧ yo̧a̧ pio ju̧i̧ chjiari yo̧dëpea̧de. Jabechji̧ cjapiri̧ cjo̧ro̧vä —yo̧a̧dejȩ. Ado ja̧dëa ji̧ baä tänȩrëremȩdejȩ üi̧ pëi̧ chja ju̧i̧.

²³ Ja̧dëa ji̧ guadia ütë judi ëna̧diäa̧dejȩrȩ tjamo̧ yo̧ji̧ri̧ guadia oa, yo̧a̧ri̧ oa ma̧ȩ yürüpea̧ oa. Ado jana̧ji̧ri̧ oa ja̧di ta̧rëri̧ yo̧rëremȩdejȩrȩ: —Danȩrȩ, guadia oa chjadëri̧ jëdano̧chji̧jȩrȩ Checharea quȩmȩ bë ma̧ri̧räpȩ jäpea̧ oa —yo̧a̧dejȩrȩ—. Pio yaba̧ gȩnȩrä a la 9rä jäpanȩrȩ. Tara̧ tai̧ji̧ri̧ guadia oa, 200 oa jëdano̧chji̧jȩrȩ. Ado yaera̧ tai̧ji̧ri̧ guadia oa peaja̧di jëdano̧chji̧jȩrȩ 70 oa. Ado yipjatë araji̧ri̧ guadia oa peaja̧di jëdano̧chji̧jȩrȩ 200 oa.

²⁴ Ado Pablo pio judiborë yaera̧ tai̧pea̧ oa jëdanȩ yürüchji̧jo̧ȩ. Ado chjadëri̧ jidachji̧jo̧ȩ judi Pjeri quȩmȩ chiri ütë pio ju̧i̧iäpȩ chjadëri̧ go̧düdäräpea̧ oa —yo̧mȩrȩ yo̧a̧dejȩrȩ tjamo yo̧ji̧ri̧ guadia pio ji̧ri̧iäpȩmo̧.

²⁵ Ado pio ji̧ri̧iä chjadüpea̧ oa go̧ȩparëremȩde ma̧ȩ oa guadia ütë üdë. Ja̧di ta̧rëri̧ yo̧mȩ ma̧ȩ oa go̧ȩparëremȩde:

²⁶ “Danȩ, Carudio Irichia quȩmȩrequede cüdë. Pio mȩaiäpȩmo̧ go̧ȩpe chjadürequedemȩ a̧dë chjäte ütë oa, Pjeri quȩmȩ oa. Jearequedemȩ.

²⁷ Danȩ, judio judiro̧ pio jiro üi̧ oa mitë ëte ja̧bo tänȩtea̧diro̧jo̧ȩ. Jabo cüdë pio ju̧i̧ chjiari ta̧rëa̧ oaiä, jäeno̧a̧requede ca̧ guadia pio ji̧ri̧ nö̧ta pio ju̧i̧ chjadëri̧ chjätä tänȩpea̧ oa. 'Jabechji̧ domano chjadida, domano go̧ȩ i goamȩrȩ dopadida' quëna̧ dabamȩpea̧ oaiä, jabechji̧ jäeno̧a̧requede pio ju̧i̧ a̧dopea̧ oa.

²⁸ Ado pio ju̧i̧ chjiari tjamo̧ri̧ dabatämi̧ cjiamȩrȩ, 'Aja̧, pio jiro chjai̧dë oa japea̧dida, pio ju̧i̧iä aechide yo̧ chjaodiro̧ju̧i̧da' quëna̧ dabapea̧ oa, jabechji̧ ëba jäa̧reconȩ tjamo̧ yo̧ji̧ri̧ judiorë a̧doparea̧ bëräpȩ.

²⁹ Ado a̧ro̧rȩ ju̧ri̧pȩ go̧düdäräa̧rä, aeno̧a̧diro̧jo̧ȩ. “Aja̧, judiorë a̧ra̧ano̧rea̧ ma̧ȩrä cjo̧ro̧dëde” yo̧a̧dirȩ. “Pio jiro ma̧ȩ oa jiadamȩrȩ cjo̧ro̧de” yo̧a̧dirȩ. Jabo pio ju̧i̧ ta̧rëa̧ oaiä, 'Cjäri̧ madida, ja̧bo tänȩrea̧mi̧dëdida, chaärea̧ bëräpȩ chaärea̧mi̧dëdida, jabo judiorë a̧ra̧ano̧rea̧ ma̧ȩ pio ju̧i̧mo̧i̧ jiada̧ jirodida' quëna̧ jo̧rȩtamȩpea̧requede.

³⁰ Ado pumȩ judiro̧ yo̧a̧ oa ta̧rëa̧ oaiä, “Aja̧, judio judiro̧ orë pio ju̧i̧ ja̧bo tänȩpea̧ ji̧ järi tjamo̧pea̧dirȩ” yo̧a̧ oa ta̧rëa̧ oaiä, 'jabechji̧ pio mȩaiäpȩmo̧ chjadütäremȩcuni̧da' quëna̧ jo̧rȩtamȩrȩ chjadüpareconȩ. Ado danȩ, pio jiro üi̧ pio ju̧i̧iäpȩmo̧ ana̧ri̧ aechide yo̧ji̧ri̧ pio ji̧ri̧iäpȩmo̧ ma̧ȩ chjadüa̧requedejȩrȩ pio mȩaiäpȩ jätä, pio mȩaiäpȩ ano̧ mire aechide yo̧tä Pablo pio ju̧i̧iäpȩmo̧. Aja̧ ütë, pio ju̧i̧mo̧i̧ ma̧ȩ oa go̧ȩpe chjadürequedemȩ.”

³¹ Ado guadia ütë judi yo̧a̧mi̧ japarëreji̧ri̧dirȩ guadia judiro̧. Pio jiro gȩnȩrä Pablo pio ju̧i̧ ëba järëreji̧ri̧diro̧jo̧ȩ A̧tipati quȩmȩräpȩ yuro.

³² Ado dopea̧rä, tara̧ tai̧ji̧ri̧ guadia judiro̧ ado chjereno̧ baäa̧dirȩ guadiarë cjo̧ro̧mȩ bë ana̧räpȩmo̧. Jabo yaera̧ tai̧ji̧ri̧ guadia pio judiro̧ ji̧dë u̧i̧ jachi oa ëba järëreji̧ri̧diro̧jo̧ȩ Pablo ju̧i̧.

³³ Ado Checharea quȩmȩ bë ma̧ri̧räpȩ go̧düdäräa̧rä, chiri ütë cjo̧ro̧mȩ pio ju̧i̧iäpȩmo̧ yürüa̧diro̧jo̧ȩ ma̧ȩ oa, guadia ütërë go̧ȩpe chjadüa̧ ma̧ȩ pio ju̧i̧. Ado Pablo pio ju̧i̧ peaja̧di yürüa̧diro̧jo̧ȩ ütë ju̧i̧iäpȩmo̧.

³⁴ Ado chiri ütë cjo̧ro̧mȩ judi ma̧ȩ oa go̧ȩ ni̧bäa̧ duri oa, Pablo pio ju̧i̧ chjiari iëno̧ë ta̧rëa̧dejȩrȩ. “Danȩrȩ, pio jiro Pablo üdë, ¿yudirimȩde?” yo̧mȩrȩ iëno̧ë ta̧rëa̧dejȩrȩ. Ado dëbë yo̧a̧ oaiä, “Aja̧, Pablo judi Chirichia quȩmȩ chiririmȩde” dëbë yo̧a̧ oa ta̧rëa̧ oaiä,

³⁵ ja̧di ta̧rëri̧ yo̧rëremȩdejȩ Pablo ju̧i̧pȩmo̧ ütë judi: —Danȩ, pio mȩa aechide yo̧ji̧ri̧ pio judiro̧ go̧düna̧ra̧rä, pio mȩaiäbo ta̧rëparequede —yo̧a̧dejȩ. Ado ja̧di ta̧rëri̧ yo̧ ëte, jibëa̧ guadia ji̧ri̧ yo̧rëremȩdejȩrȩ Pablo pio ju̧i̧ jidatä. Aja̧, Erode quȩmȩ pio judirea̧ cji̧därërea̧ bëräpȩ ju̧ri̧ chjadëri̧ jidatä yo̧rëremȩdejȩrȩ judi baärea̧ dachea oa.