Japarea̧ 22 - Biblia Pume

Pablo judi ni̧bä chjaorëremȩdejȩrȩ judio ji̧ri̧, jënȩ Jechu pio ju̧i̧ quëna̧ pio ju̧i̧ chjiari, jabo cjäri̧ madiro̧jo̧ȩ, ja̧bo tänȩtämi̧ cjiarëreji̧ri̧diro̧jo̧ȩ

¹ —Danȩrȩ ca̧ oti̧, ni̧bä chjaotämi̧ cjiarequededibe. Coa aechide yo̧ji̧ri̧ ji̧ri̧iäpȩmo̧ dëbë yo̧tämi̧ cjiarequededibe. Menȩro̧ pio coa chjiari, 'Aja̧, ma̧i̧ da chjai̧dëri̧ japea̧dida' quëna̧chea oa chjadëri̧ ni̧bä chjaotämi̧ cjiarequededibe —yo̧a̧dejȩrȩ—. Danȩrȩ, chjadëri̧ ta̧rëchji̧coe.

² Ado Pablo judi Ebereo ma̧ȩra̧ pio ju̧ri̧ra̧ ni̧bämȩ oa ta̧rëa̧ oaiä, jabechji̧ ji̧dë u̧i̧ cjapiri̧ cjiadiärëreji̧ri̧dirȩ judio judiro̧ chjadëri̧ ta̧rëpea̧ oa. Ado Pablo judi ji̧dë u̧i̧ yo̧mȩrȩ ja̧di ta̧rëri̧ ni̧bä chjaorëremȩdejȩrȩ.

³ —Danȩrȩ ca̧ oti̧, judiorequede cüdë —yo̧a̧dejȩrȩ—. Tacho quȩmȩ bë ma̧ri̧räpȩ ara̧ oa cjiarëremȩrequede, Chirichia quȩmȩ chiriräpȩ. Jabo ju̧ri̧pȩ ütëpadëa̧requede, jabo Jerucharȩräpȩ ütëpea̧requede. Ado Gamariera quȩmȩ pio judi a̧ra̧ano̧a̧ oa dabamȩrȩ ütëpea̧requede. Pio ju̧i̧iä chjadëri̧ dabapea̧requede davä Moicherë go̧ȩparërea̧ ma̧ȩrä cjo̧ro̧pea̧ ji̧, ibëa̧ ütëti̧rea̧ judiro̧ a̧ra̧ano̧rërea̧ ma̧ȩrä cjo̧ro̧pea̧ ji̧. Tjamo̧ davä. Pio mȩnȩro̧ yaba̧ domȩ oa pio jiro ma̧ȩrä cjo̧ro̧pea̧ ji̧ järi tjamo̧mi̧ dari̧ järi tjamo̧rëremȩrequede peaja̧di.

⁴ Ado pio ju̧i̧iä conȩdarëremȩrequedejȩrȩ Jechu ju̧i̧ quëna̧ji̧ri̧ pio ji̧ri̧ —yo̧a̧dejȩrȩ—. Tjamo̧ dava. 'Jechu judi no̧mi̧ dadida, Ütë tjamo̧ pio ju̧i̧iäpȩ baärea̧ no̧mi̧ dadida' quëna̧ji̧ri̧ pio ji̧ri̧iäpȩmo̧ ërecjia tjamo̧mȩrȩ goae tarari̧ conȩdarëremȩrequedejȩrȩ. Oari pio ji̧ri̧, ivi pio ji̧ri̧bo mitërëremȩrequedejȩrȩ chaäpea̧ oa. Ado cüdë ja̧bo tänȩrea̧ daea̧rä, peaja̧di ja̧bo tänȩrëremȩrequedejȩrȩ.

⁵ Ado cüdë ni̧bä chjaoa̧ ju̧i̧ chjiari tjamo̧ri̧ dabade tjamo̧ goë tuti ja̧bepamȩ judi, judio tjamo̧ yo̧ji̧ri̧ pio judiro̧borë. 'Aja̧, Pablo judi tjamo̧ri̧ ni̧bä chjaodida' quëna̧ dabaji̧ri̧rȩ yo̧pai̧ dadirȩ davä pio coa chjiari. Tjamo̧ davä ca̧ oti̧, teracabari̧ ni̧bä chjaodërequededibe. Pio judiro̧ chaä tänȩrea̧ go̧ȩ i pio ju̧i̧ go̧ȩpe yürüa̧diro̧coe ibëa̧ oti̧ pio ji̧ri̧iäpȩmo̧ yürüpea̧ oa Damaco bë ma̧ri̧räpȩ ju̧ri̧. Tjamo̧ davä. "Jechu pio ju̧i̧ quëna̧ji̧ri̧ ütëbo oa Chauro pio ju̧i̧iäpȩmo̧ yürüpea̧de" yo̧mȩ go̧ȩ i pio ju̧i̧ yürüa̧diro̧coe. Pio ju̧i̧iä järëremȩrequede Damacoräpȩ. Quëna̧ji̧ri̧ pio ji̧ri̧ mitëpea̧ oa, tabüa̧ oa cjiaji̧ri̧ oa Jerucharȩräpȩ ëba ma̧na̧pea̧ oa, järëremȩrequede pio ji̧ri̧ bape chjaopea̧ oa.

⁶ Jabo ja̧dëa ji̧ cüdë Damaco bë ma̧ri̧ queri̧räpȩ go̧düdäräa̧rä, dorë tjomo̧ro a̧dëri pio judiri chjaodëri̧ tatarëremȩdique bërëpe chjaomi̧ dari̧. Ma̧i̧ dari̧ tatarëremȩdique ca̧ yuroti̧ oa.

⁷ Ado pio ju̧i̧ daea̧ oaiä daburäpȩmo̧ chi̧na̧däräeno̧a̧requede. Ado coa ni̧bämȩ pio ju̧i̧ ta̧rëa̧reconȩ ja̧di ta̧rëri̧ yo̧mȩ oa: "Chauro, Chauro ¿tjana̧ ju̧i̧iä conȩdarenȩque?" iëno̧ë ta̧rëa̧dique.

⁸ Ado ja̧dëa ji̧ dëbë iëno̧ë yo̧a̧reconȩ: "¿Jabo chjianȩ Ano̧mȩ?" iëno̧ë ta̧rëa̧reconȩ. Ado ja̧dëa ji̧ dëbë yo̧a̧dique: "Chjiadërequede, Jechu pio judirequede" yo̧a̧dique. "Nacharerimȩ pio judirequede. Mȩnȩ ma̧i̧ dari̧ conȩda̧ pio judirequede" yo̧a̧dique.

⁹ —Ado pio coa nö̧ta tai̧reji̧ri̧ pio judiro̧ ma̧i̧ dari̧ tatarërea̧ pio ju̧i̧ daea̧dirȩ. Aja̧, pio ju̧i̧ irä daea̧diro̧jo̧ȩ jabo pio coa ni̧bämȩ ma̧ȩ oa ta̧rëdëa̧dirȩ.

¹⁰ Ja̧dëa ji̧ iëno̧ë ta̧rëa̧reconȩ, “Ca̧ Ano̧mȩ, ¿tjana̧ japatäremȩrequede?” Ado Ano̧mȩ pio judi dëbë yo̧a̧dique: “Cjitëvä. Damacoräpȩ jävä. Ado idëpȩ go̧düdäräa̧rä, pumȩ oaiä ta̧rë ëte, “Aja̧, ja̧di dari̧ ja̧bepapea̧dida, Ütë tjamo̧ judi ja̧di dari̧ japatä eadicoada, judi ütarë jo̧rȩta̧mi̧ ja̧bepatä eadicoada” quëna̧rea̧ daparenȩ pio jiro pumȩ pio ju̧i̧iä. Ja̧di tara jabechji̧ jävä yaba̧.” Aja̧, ja̧di ta̧rëri̧ yo̧mȩrȩ yo̧a̧dique Jechu judi.

¹¹ Jabo cjäri̧ marequede jabo, cüdë cjitëa̧ ji̧ eami̧ oa dadëa̧requede. Jabechji̧ ma̧i̧ dari̧ tatarërea̧ pio ju̧i̧iä da cotomȩrȩ cjiadiäa̧requede. Pio ju̧i̧iä coa nö̧ta jäa̧ji̧ri̧ pio judiro̧ ca̧ ichi oa mitë ëte, ëba mu̧i̧ jäa̧diro̧coe Damacoräpȩ yuro.

¹² —Ado danȩrȩ ca̧ oti̧, Damacoräpȩ ju̧ri̧ cja̧rȩmȩrȩ cjo̧ro̧rëremȩde Anania quȩmȩ judi —yo̧a̧dejȩrȩ Pablo judi—. Moicherë go̧ȩparërea̧ ma̧ȩ pio ju̧i̧ ta̧rëdiäpea̧ ji̧ järi tjamo̧mȩrȩ cjo̧ro̧rëremȩde tocoi̧mi̧ oa jiadadëri̧ cjiamȩrȩ. Ado ju̧ri̧pȩ cjo̧ro̧ji̧ri̧ judio judiro̧ ütëborë ba chia tjamo̧ darëreji̧ri̧diro̧jo̧ȩ.

¹³ Pio judi goë daera̧pea̧dique. Ado ca̧ yuroro cjiamȩrȩ yo̧a̧dique, “Danȩ omȩ Chauro, ado chjereno̧ davä." Ado judi yo̧a̧ oaiä, chjaodëri̧ damȩpea̧requede ado chjereno̧. Ado Anania pio ju̧i̧ dadërërea̧ ji̧, daea̧reconȩ.

¹⁴ Ado ja̧dëa ji̧ ji̧dë u̧i̧ yo̧mȩrȩ yo̧a̧dique. “Danȩ, ibëa̧ ütëti̧rea̧ pio ji̧ri̧ ja̧ Ütë pio judi mitëa̧dimȩ,” yo̧a̧dique. “Ado mȩnȩ, 'Aja̧, Ütë tjamo̧ judi ja̧di dari̧ japapea̧ ji̧ jo̧rȩtadida, Ütë tjamo̧ judi ja̧di dari̧ japatä eadicoada' quëna̧pea̧ oa mitëa̧dimȩ. Ado peaja̧di mitëa̧dimȩ coëma cjiari̧ cjo̧ro̧mȩ Mu̧i̧tjoi̧ pio ju̧i̧ irä dapea̧ oa, pio ju̧i̧ ja̧ ma̧ȩ oa irä ta̧rëpea̧ oa.

¹⁵ Ado mȩnȩ daea̧ pio ju̧i̧ chjiari, mȩnȩ ta̧rëa̧ pio ju̧i̧ chjiari ni̧bä chjaoparenȩ ütëbodärä oa.” Aja̧, ja̧di ta̧rëri̧ yo̧mȩrȩ ni̧bä chjaoa̧dique Anania judi.

¹⁶ Ado ja̧dëa ji̧ a̧de yo̧a̧dique, “¿Tjana̧ ju̧i̧iä jabomo̧ dae charenȩ? ¿Tjana̧ ju̧i̧iä cjiadiä cjiadiä cjiarenȩ? Jabechji̧ cjitëvä. Uirä go̧e cjaeä chuda̧ oa cjiavä. Ado Ütë tjamo̧ pio ju̧i̧iä goëcjo̧dëvä mȩnȩ chjai̧dëri̧ japea̧ üdë duridëparȩa̧ oa cjiapea̧ oa.” Aja̧, ja̧di ta̧rëri̧ yo̧mȩrȩ ni̧bä chjaorëremȩdique Anania judi.

¹⁷ —Ado danȩrȩ ca̧ pumȩ, japamitë chjätä ëte, Damaco quȩmȩ bë ma̧ri̧ri pio judiri baäa̧requede Jerucharȩräpȩ —yo̧a̧dejȩrȩ Pablo judi—. Ado ja̧dëa ji ado cja̧rȩmo̧ doremȩrä, jäa̧requede Ütë tjamo̧ ja̧ bëräpȩ Ütë tjamo̧ pio ju̧i̧iäpȩmo̧ ni̧bäpea̧ oa. Ado Ütë tjamo̧ pio judi tänȩa̧ oa, darämi̧ cjiaremȩrequede.

¹⁸ Ibëa̧ Ano̧mȩ Jechu pio ju̧i̧ darämi̧ cjiaremȩreconȩ. Ado yo̧a̧dique: “Jerucharȩri pio judiri jo̧ȩra̧pe go̧düvä. Pio yi cjo̧ro̧ji̧ri̧ judio judiro̧ mȩnȩ pio coa chjiari ni̧bä chjaorä judi, ta̧rë ja̧bodëpadiro̧mȩ. Pio ju̧i̧iä jo̧ȩra̧pe go̧dütä earequedemȩ” yo̧a̧dique.

¹⁹ Jabo tuti yo̧mȩrȩ dëbë yo̧tea̧reconȩ, “Danȩ ca̧ Ano̧mȩ, pio coa chjiari daba maeadirȩ judio judiro̧” yo̧a̧reconȩ. “Ado pio coa chjiari daba oaiä, peaja̧di ano̧ mire jo̧rȩtapai̧ dadirȩ. Cüdë quëna̧ji̧ri̧ pio ji̧ri̧ ma̧i̧ dari̧ conȩdarërea̧ ji̧, judiorë a̧doparea̧ bëräpȩ quëna̧ji̧ri̧ pio ji̧ri̧ chaärërea̧ ji̧, pio ji̧ri̧ goae tarari̧ bide cjaeärërea̧ ji̧, daba maeadirȩ.

²⁰ Ado Eteba judi mȩa chjiari ni̧bäremȩ pio ju̧i̧ goe gu̧rori̧ ja̧bo tänȩrërea̧ pio ju̧i̧bo daba maeadirȩ. Cüdë ae ja̧bo tänȩji̧ri̧ pio ji̧ri̧ ja̧ chjibo oa boeamȩrȩ dae cjiarërea̧ ji̧, ‘Aja̧, Eteba pio ju̧i̧ ja̧bo tänȩpea̧ üdë, jabechji̧ chjadëdida’ quëna̧rërea̧ ji̧ peaja̧di daba maeadirȩ. Ado pio coa daea̧ oaiä, pio cüdë ano̧ mire pumȩpea̧ pio ju̧i̧ chjiari jo̧rȩta̧ oaiä, peaja̧di ‘quëna̧ji̧ri̧pe bagapai̧ dadiro̧da’ quëna̧ jo̧rȩtarequedejȩrȩ” yo̧tea̧reconȩ.

²¹ Jabo Ano̧mȩ Jechu judi coa ta̧rë ja̧bodëmȩrȩ dëbë yo̧a̧dique. “Jabechji̧ baävä. Jachiti̧ oa chjadüparequedemȩ judiodë pio ji̧ri̧iäpȩmo̧ a̧ra̧ano̧pea̧ oa" yo̧mȩrȩ yo̧a̧dique. Ja̧di ta̧rëri̧ yo̧mȩrȩ ni̧bä chjaorëremȩdejȩrȩ judio ji̧ri̧ Pablo judi.

²² Ado judio judiro̧, jabechji̧ chjadëri̧ ta̧rë cjiarëreji̧ri̧diro̧jo̧ȩ Pablo ju̧i̧. Jabo ja̧dëa ji̧ judiodë pio ji̧ri̧ chjiari yo̧a̧ oaiä, judiodë pio ji̧ri̧iäpȩmo̧ ano̧ mire a̧ra̧ano̧pea̧ pio ju̧i̧ chjiari ta̧rëa̧ oaiä, cjäri̧ madirȩ, ado chjereno̧ ma̧i̧ dari̧ ëna̧diäpea̧ ji̧ taruparëreji̧ri̧dirȩ. Ado jaepe yoaji̧ri̧rȩ ëna̧diärëreji̧ri̧dirȩ: "Ja̧bo tänȩpea̧de. Pio yodëje pio yoa chirirä cjo̧ro̧rea̧mi̧dëde. Jabechji̧ ja̧bo tänȩpea̧de" ëna̧diäa̧dirȩ.

²³ Ado cjarari̧ cjia tjamo̧pe bagami̧ dari̧ cjiaji̧ri̧rȩ jibëa̧ chjibo oa uëräpȩmo̧ mu̧i̧ mu̧i̧ bide chjaorëreji̧ri̧dirȩ jibëa̧ tjübë uëmo̧. Ado dabu pjo̧no̧i̧ oa mitë ëte, uëräpȩmo̧ quibë arëreji̧ri̧diro̧jo̧ȩ, ërecjia tjamo̧ji̧ri̧rȩ.

²⁴ Ado guadia ütë judi pio ju̧i̧ daea̧ oaiä, yo̧a̧dejȩrȩ jibëa̧ guadia ji̧ri̧ Pablo pio ju̧i̧ ëba yu̧a̧tä guadiarë cjo̧ro̧mȩ bë ana̧räpȩ. Ado bide cjaeätä yo̧a̧dejȩrȩ peaja̧di judi chjadëri̧ dëbë yo̧pea̧ oa iëno̧ë ta̧rëmȩ pio ju̧i̧iäpȩmo̧. Aja̧, judi ma̧ȩ chjádë yürüchea oa, judi yo̧a̧ri̧ ya chiami̧ dari̧ ni̧bächea oa, judio judiro̧ pio jȩaiäpȩmo̧ ërecjia tjamo̧pe baga̧ pio ju̧i̧ chjiari teracabari̧ yo̧chea oa, jabechji̧ bide cjaeätä yo̧rëremȩdejȩrȩ guadia ji̧ri̧.

²⁵ Jabo bide cjaeäpea̧ oa yura̧ oa cjiarä, Pablo pio judi iëno̧ë ta̧rëa̧dejȩ tjamo̧ yo̧mȩ guadia pio ju̧i̧iä: —Danȩ, domano chja pio ju̧i̧, domano go̧ȩ i goamȩ pio ju̧i̧, ja̧di dari̧ bide cjaeäpea̧ üdë, ¿jabechji̧de? Danȩ, jabë ütaradëa̧renȩro̧coe. Jabë iëno̧ iëno̧ ta̧rëdëa̧renȩro̧coe. Ado pio ju̧i̧iä iëno̧ë ta̧rërequedemȩ. ¿Ja̧di dari̧ japapea̧ üdë jabechji̧de domano pio ji̧ri̧iä?

²⁶ Ado tjamo̧ yo̧mȩ guadia üdë pio ju̧i̧iä ta̧rëa̧ oaiä, chjaodëri̧ jäëno̧a̧de guadia ütë pio ju̧i̧iäpȩ. Ado yo̧a̧dejȩ: —Oëra̧ japami̧ dari̧ japarenȩ ütë —yo̧a̧dejȩ—. Danȩ, pio jiro üi̧ üdë domano chjade. Domano go̧ȩ i goade.

²⁷ Ado guadia ütë pio ju̧i̧ ta̧rëa̧ oaiä, chjaodëri̧ jäeno̧a̧dejȩ Pablo pio ju̧i̧iäpȩ. Ado iëno̧ë ta̧rëa̧dejȩ: —Chjadëri̧ yo̧coe. ¿Chjianȩ mȩnȩ? ¿Domano chja tjamo̧nȩ? ¿Domano̧ go̧ȩ i tjamo̧ri̧ goanȩ? Ado Pablo judi dëbë yo̧a̧dejȩ: —Tjamo̧ri̧ goarequede. Domano chja tjamo̧requede.

²⁸ Ja̧dëa ji̧ guadia ütë judi yo̧a̧dejȩ: —Peaja̧di domano go̧ȩ i goarequede cüdë, jabo gatëa̧reconȩ chëre ji̧ra̧ tjamo̧ra̧. Ado Pablo judi dëbë yo̧a̧dejȩ: —Chërera̧ pio ju̧ri̧ra̧ gatëa̧ oa goadërequede, jabo jabechji̧, domano chja oa ararëreyi̧ni̧que coa arayi̧ jini̧. Jabechji̧ boi̧chji̧ri ja̧ domano go̧ȩ i goamȩrȩ doparequede.

²⁹ Ado pio ju̧i̧ ta̧rëa̧ oaiä Pablo pio ju̧i̧ bide cjaeäpareji̧ri̧ pio judiro̧ chjaodëri̧ a̧dë baäeno̧a̧diro̧jo̧ȩ. Ado guadia ütë pio judiborë a̧dë baäeno̧a̧dejȩ, uapa tjamo̧pea̧mȩrȩ. 'Chia chia, oëra̧ japea̧quëda, domano chjadida, domano go̧ȩ i pio ju̧i̧ goamȩrȩ dopadida, chatu chiamȩ chjipararira̧ pio ju̧ri̧ra̧ yuradëa̧täremȩcuni̧da, oëra̧ japea̧quëda' quëna̧ jo̧rȩtamȩpea̧de guadia ütë üdë, bücjüri̧ cjia tjamo̧mȩrȩ.

Tjamo̧ yo̧ji̧ri̧ judio pio ji̧ri̧ ja̧ dëbëräpȩ cjiamȩ oa aechide yo̧rëreji̧ri̧diro̧jo̧ȩ Pablo ju̧i̧

³⁰ Guadia ütë judi judio judiro̧ Pablo pio ju̧i̧iäpȩmo̧ aeno̧a̧ pio ju̧i̧ chjiari chjadëri̧ dabatämi̧ cjiarëremȩde. '¿Jabo tjana̧ ju̧i̧iä aeno̧diro̧ju̧i̧da?' quëna̧ jo̧rȩtamȩrȩ chjadëri̧ dabatämi̧ cjiarëremȩde. Pio ju̧i̧iä Pablo pio ju̧i̧ jareno̧tä yo̧a̧dejȩ guadia oa. Ado peaja̧di ma̧ȩ chjadürëremȩdejȩrȩ tjamo̧ yo̧ji̧ri̧ judio pio ji̧ri̧iäpȩmo̧ a̧dopera̧tä. Pio ju̧i̧iä ütëborë a̧dopera̧parëreji̧ri̧dirȩ, tjamo̧ goë tuti ja̧bepaji̧ri̧ pio judiro̧borë. Ja̧dëa ji̧ ütëborë a̧dopea̧ oa cjiarä, pio ji̧ri̧ ja̧ dëbëräpȩ cjiadärä tänȩrëremȩdejȩ Pablo ju̧i̧ guadia ütë judi.