Japarea̧ 21 - Biblia Pume

Pablo judi baärëremȩde Jeruchara̧räpȩ

¹ Ado a̧ro̧rȩ Epjechoräpȩ a̧doparea̧ tjamo̧ jidaji̧ri̧ pio ji̧ri̧ jea ëte a̧dë baäa̧ duri oa, bua̧rea̧ro̧jo̧ȩ uimo̧mȩ chara ana̧ oa Cocho quȩmȩ chiriräpȩ baäpea̧ oa ui ana̧ tjoro chamȩ chiri oa. Aja̧, tjamo̧i̧ baärëreji̧ri̧rea̧rȩ Cocho quȩmȩ chiriräpȩmo̧. Ado ju̧ri̧pȩ cjiadiäa̧rea̧rȩ mo̧a̧pea̧ oa. Ado ja̧dëa ji̧ dopea̧rä ado bua̧rea̧ro̧jo̧ȩ uimo̧mȩ chara ana̧ oa. Ado bua ëte Cochori pio judiri go̧düa̧rea̧rȩ Doda quȩmȩräpȩmo̧. Ado judiri ano̧ mire baärëreji̧ri̧rea̧rȩ Patara quȩmȩräpȩ.

² Ado Patararäpȩ ju̧ri̧ ado cja̧rȩmo̧ uimo̧mȩ chara ana̧ oa daea̧rea̧rȩ Pjenichia quȩmȩ chiriräpȩ ano̧ mire baäpea̧ oa. Pio ju̧i̧ ano̧ mire bua ëte baärëreji̧ri̧rea̧rȩ.

³ Ado a̧ro̧rȩ Chipire quȩmȩ chiri oa chjätärërea̧ ji̧, ui ana̧ tjoro chamȩ chiri oa chjätärërea̧ ji̧, jachidëri̧ chjätäa̧rea̧ro̧jo̧ȩ chirina̧räpȩmo̧ Chiria quȩmȩ chiriräpȩmo̧ baäpea̧ oa. Ado Chiria quȩmȩ chiriräpȩmo̧ baäji̧ri̧rȩ go̧düdärärëreji̧ri̧rea̧rȩ Tiro quȩmȩ bë ma̧ri̧räpȩ. Ado uimo̧mȩ chara ana̧ üdë chia baärërea̧ pio ju̧i̧, jabechji̧ bira tänȩrëreji̧ri̧diro̧jo̧ȩ pio jiro bë ma̧ri̧räpȩ.

⁴ Pio ju̧i̧iä a̧ro̧rȩ chara ana̧ri pio judiri bira̧rea̧rȩ. 'Jabechji̧ pio yi Tiro quȩmȩ bë ma̧ri̧räpȩ cjo̧ro̧ji̧ri̧ judiro̧ orë quëna̧ji̧ri̧pea̧ jirodiro̧da' quëna̧ jo̧rȩtaji̧ri̧rȩ pio ji̧ri̧ dadäräa̧rea̧ro̧jȩrȩ. Pio ju̧i̧iä cja̧rȩmȩ chemana codë oa cjiadiärëreji̧ri̧rea̧rȩ pio ji̧ri̧ nö̧ta. Ado Tjo tjamo̧ judi pio jiro quëna̧ji̧ri̧ pio ji̧ri̧iäpȩmo̧ dabarea̧ yürüa̧ oaiä, jabechji̧ nae chiaji̧ri̧pe baga̧dirȩ Pablo pio ju̧i̧ chjiari, judi Jerucharȩräpȩ ju̧ri̧ conȩdapea̧ pio ju̧i̧ chjiari. Ado pio ju̧i̧iä ja̧dira̧ baädëtä yo̧ji̧ri̧rȩ chi̧dëeatarëreji̧ri̧diro̧jo̧ȩ judi conȩda oa cjiachea oa. Jabo cjäri̧ madejȩrȩ, ta̧rë ja̧bodëa̧dejȩrȩ.

⁵ Ado cja̧rȩmȩ chemana chjätä ëte, baäa̧rea̧rȩ. Ado quëna̧ji̧ri̧ judiro̧ ëba järëreji̧ri̧diro̧ibe bë ma̧ri̧ dairäpȩ yuro, ui ana̧räpȩ yuro. Ütëborë, iviborë, bori̧borë ëba jäa̧diro̧ibe. Ado ui yuroi̧räpȩ go̧düdärä ëte, ju chatura̧ cjiaji̧ri̧rȩ ni̧bärëreji̧ri̧rea̧ro̧jo̧ȩ Ütë tjamo̧ ju̧i̧. Ado cjitë ëte jea̧rea̧rȩ. Ba dëbëmi̧ jea̧rea̧rȩ.

⁶ Ado ja̧di dari̧ japa ëte bua̧rea̧rȩ uimo̧mȩ chara ana̧ oa. Ado judiro̧ jibëa̧ bëräpȩ ado chjereno̧ baärëreji̧ri̧dirȩ.

Pablo judi jibëa̧ jadüborë uimo̧mȩ chara ana̧ra̧ järëreji̧ri̧dirȩ Tiro bë ma̧ri̧ri pio judiri Checharea quȩmȩräpȩ yuro

⁷ Ado Tiro quȩmȩ bë ma̧ri̧ri pio judiri go̧düji̧ri̧rȩ go̧düdärärëreji̧ri̧rea̧rȩ Toremaida quȩmȩräpȩ. Ado ju̧ri̧pȩ quëna̧ji̧ri̧ pio ji̧ri̧ daea̧rä, jabechji̧ cjäri̧ri̧ cjiaji̧ri̧rȩ jea̧rea̧ro̧jȩrȩ. Ado pio ji̧ri̧ nö̧ta cjiadiäa̧rea̧rȩ cja̧rȩmȩ do.

⁸ Ado dopea̧rä, pio judiri go̧dürëreji̧ri̧rea̧rȩ tara̧ Checharea quȩmȩ bë ma̧ri̧räpȩmo̧. Aja̧, a̧ro̧rȩ uimo̧mȩ chara ana̧ra̧ pio ju̧ri̧ra̧ ji̧dë ma tai̧ chjaorërea̧ ji̧, jabechji̧ ano̧ mire tai̧rëreji̧ri̧rea̧rȩ tara̧. Ado a̧ro̧rȩ Checharearäpȩ go̧düdäräa̧rä, jabechji̧ cjiadiäa̧rea̧rȩ Felipe ja̧ bëräpȩ. Ado Felipe judi, ¿chjiade? Chjiadëde, jabechji̧ Jechurë chjadüa̧ judiro̧ a̧doji̧ri̧ ji̧ri̧ mitëa̧ ji̧, 7 oari ji̧ri̧ mitëa̧ ji̧, Felipe pio judiborë mitëa̧ oa cjia̧rëremȩ quëna̧ji̧ri̧ ji̧ri̧ a̧dopea̧ oa, oari chiarëreji̧ri̧ ivi ji̧ri̧ chjadëri̧ jidapea̧ oa. Ado Felipe judi peaja̧di ma̧ȩ chjadëi̧ pio ju̧i̧ a̧ra̧ano̧mȩrȩ ja̧beparëremȩde. Jabechji̧ pio ju̧i̧ ja̧ bëräpȩ cjiadiärëreji̧ri̧rea̧rȩ Checharea̧räpȩ ju̧ri̧.

⁹ Ado pio judi jadüchiami̧ jabi ëbarëremȩde oari ëbadë maea oa. Ado jini̧ro̧ ütëborë Ütërë ea jana̧ chjadüa̧ oa ni̧bärea̧ chiarëreji̧ri̧ni̧rȩ.

¹⁰ Ado a̧ro̧rȩ Felipe ja̧ bëräpȩ do ji̧ra̧ri̧ jabë goadëa̧rä, jabechji̧ Ütërë ea jana̧ chjadüa̧ oa ni̧bämȩ pio judi goëdaera̧parëremȩdiibe Judea quȩmȩ chiriri pio judiri. Aja̧, Agabu quȩmȩ pio judi goëdaera̧pea̧diibe.

¹¹ Ado pio ibëiäpȩ go̧düna̧ra̧rä, mitëa̧dejȩ Pablo pio ju̧i̧ ja̧ cada abürea̧ oa. Ado ja̧dëa ji̧ jibëa̧ ma̧na̧ri̧ japamȩrȩ jibëa̧ ichi oa, jibëa̧ tabo chjuari̧ tabürëremȩdejȩ. Ado tabü ëte, yo̧a̧diibe: —Aja̧, ja̧di ta̧rëri̧ yo̧didibe Tjo tjamo̧ judi —yo̧a̧diibe—. Pio yoa cada abürea̧ ana̧mȩ pio judi peaja̧di dari̧ tabüa̧ oa cjiapade pio cüdë tabüa̧ oa cjiami̧ dari̧. Jerucharȩräpȩ cjo̧ro̧ji̧ri̧ judio pio judiro̧ japea̧ oaiä ja̧di dari̧ tabüa̧ oa cjiapade. Ado judiodë pio ji̧ri̧iäpȩmo̧ yürüpadiro̧jo̧ȩ —yo̧mȩrȩ yo̧rëremȩdiibe Agabu quȩmȩ judi.

¹² Pio ju̧i̧ ta̧rëa̧ oaiä ana̧ri̧ jo̧rȩtaji̧ri̧pe bagarëreji̧ri̧rea̧rȩ. Ado Pablo pio ju̧i̧ Jerucharȩräpȩ baädëtä yo̧tarëreji̧ri̧rea̧ro̧jo̧ȩ. Ado peaja̧di ta̧rëri̧ yo̧tarëreji̧ri̧diro̧jo̧ȩ Checharearäpȩ quëna̧ji̧ri̧ pio judiro̧.

¹³ Jabo Pablo judi dëbë yo̧mȩrȩ yo̧rëremȩdiibe: —¿Jabo tjana̧ ju̧i̧iä ea cjiaji̧ri̧rȩ odai̧ tarari̧ jo̧rȩtaji̧ri̧pe baganȩrȩ? —iëno̧ë ta̧rëa̧diibe—. Pio dibë daea̧ oaiä pio cüdëborë da ui gu̧rori̧ jo̧rȩtapai̧ darequede. Danȩrȩ ca̧ oti̧, Jerucharȩräpȩ cjo̧ro̧ji̧ri̧ pio judiro̧ coa tabü ëte chaärä judi jabechji̧de coaiä. Ado coa ja̧bo tänȩrä judi peaja̧di jabechji̧de. Ano̧mȩ Jechu judi cüdë ju̧ri̧pȩ ja̧botä earä judi chja jabechji̧de coaiä —yo̧a̧diibe.

¹⁴ Ado Pablo judi yo̧a̧ oaiä, jabechji̧ ana̧ri̧ ni̧bä chjaotarëreji̧ri̧rea̧ro̧jo̧ȩ judi Jerucharȩräpȩ baächea oa, jabo cjäri̧ madiibe, ta̧rë ja̧bodëa̧diibe. Pio ju̧i̧iä cjiadiäji̧ri̧rȩ ano̧ mire yo̧a̧rea̧ro̧jo̧ȩ, ja̧di ta̧rëri̧ yo̧ji̧ri̧rȩ: —Jabechji̧de ado ja̧di. Ütë tjamo̧ pio judi jo̧rȩta̧mi̧ japatäde —yo̧a̧rea̧ro̧jo̧ȩ.

¹⁵ Ado do ji̧ra̧dë chjätä ëte ibëa̧ goë pio ju̧i̧ jëdano̧ ëte baäa̧rea̧rȩ Jerucharȩräpȩ.

¹⁶ Ado Checharearäpȩ quëna̧ji̧ri̧ pio judiro̧ orë ëba järëreji̧ri̧diro̧ibe Jerucharȩräpȩ yuro. Ado ju̧ri̧pȩ go̧düdärä ëte, jabechji̧ chjadëri̧ a̧depea̧diro̧ibe a̧ro̧rȩ cjo̧ro̧pea̧ bëräpȩ, Ma̧na̧cho̧ quȩmȩ pio ju̧i̧ ja̧ bëräpȩ. Aja̧, Chipire quȩmȩ chiririmȩ pio ju̧i̧ ja̧ bëräpȩ, ui ana̧ tjoro chamȩ chiririmȩ pio ju̧i̧ ja̧ bëräpȩ a̧depea̧diro̧diibe, no̧mȩ tjamo̧ri ja̧ quëna̧mȩpea̧mȩ ja̧ bëräpȩ.

Pablo judi goëdepea̧dejȩ Santiago pio ju̧i̧

¹⁷ A̧ro̧rȩ Jerucharȩräpȩ go̧düdäräa̧ji̧ri̧ oa chjadëri̧ jearëreji̧ri̧diro̧ibe quëna̧ji̧ri̧ judiro̧, pio ibëiäpȩmo̧ cjäri̧ri̧ cjia daji̧ri̧rȩ.

¹⁸ Ado dopea̧rä, Pablo judi pio ibë nö̧ta järëremȩde Santiago pio ju̧i̧ goëdepea̧ oa. Ado a̧ro̧rȩ pio ju̧i̧iäpȩ go̧düdäräa̧rä, jabechji̧ Jerucharȩräpȩ a̧doparea̧ tjamo̧ jidaji̧ri̧ ütëbo oa darëreji̧ri̧rea̧ro̧jȩrȩ.

¹⁹ Ado Pablo judi ütëbo oa jea̧ duri oa ana̧ri̧ ni̧bä chjaorëremȩdejȩrȩ Ütë tjamo̧ judi pio jȩaiä japea̧ pio ju̧i̧ chjiari, pio jȩaiä judiodë chjarerä japea̧ pio ju̧i̧ chjiari.

²⁰ Ado pio ju̧i̧ ta̧rëa̧ oaiä ütëborë ma̧ chiadëri̧ cjiaji̧ri̧rȩ chjacjiamȩri̧ ni̧bäji̧ri̧pe bagarëreji̧ri̧dirȩ Ütë tjamo̧ pio ju̧i̧ chjiari. Ado ja̧dëa ji̧ Pablo pio ju̧i̧iäpȩmo̧ yo̧a̧diro̧jo̧ȩ: —Danȩ, chjadëri̧ yo̧a̧renȩibe Ütë tjamo̧ judi judiodë chjarerä japea̧ pio ju̧i̧ chjiari. Ado pio ju̧i̧iä ma̧ chiadëri̧ cjia tjamo̧rea̧rȩ. Jabo danȩ, yaba̧ ano̧ mire ni̧bä chjaotämi̧ cjiarea̧ro̧mȩ judio pio ji̧ri̧ chjiari —yo̧a̧diro̧jo̧ȩ—. Danȩ, judio judiro̧ no̧i̧dë tjamo̧rȩ quëna̧ji̧ri̧pea̧dirȩ, ütararea̧mi̧dëri̧ —yo̧a̧diro̧jo̧ȩ—. A̧dë chjäte ji̧ra̧ tjamo̧dirȩ. Jabo danȩ, pio judiro̧ quëna̧ji̧ri̧pea̧ji̧ri̧borë, jabechji̧ ba chia jo̧rȩtadiro̧jo̧ȩ Moicherë go̧ȩparërea̧ ma̧ȩ pio ju̧i̧.

²¹ Ado mȩnȩ a̧ra̧ano̧a̧ pio ju̧i̧ chjiari peadëri ja̧ goë goë ta̧rëa̧ oaiä, jabechji̧ ana̧ri̧ jo̧rȩtaji̧ri̧pe järëreji̧ri̧dirȩ. 'Aja̧ Pablo judi Moicherë go̧ȩparërea̧ ma̧ȩ pio ju̧i̧ chjiari chjadëri̧ a̧ra̧ano̧tärea̧ ji̧, chjadëri̧ a̧ra̧ano̧dëdiji̧ri̧da, judiodërë cjo̧ro̧mȩ chiriräpȩ cjo̧ro̧ji̧ri̧ judio pio ji̧ri̧ chjadëri̧ a̧ra̧ano̧tärea̧ ji̧, chjadëri̧ a̧ra̧ano̧dëdiji̧ri̧da, jabechji̧ Moicherë go̧ȩparërea̧ ma̧ȩ pio ju̧i̧ a̧dë jo̧rȩtatä yo̧diji̧ri̧da, jibëa̧ bori̧ pio ji̧ri̧ budoa̧ oa cjiadëtä yo̧diji̧ri̧da, ado a̧ro̧rȩ ibëa̧ taru pio ji̧ri̧iä dabaparërea̧ ma̧ȩ pio ju̧i̧ jiadatä yo̧diji̧ri̧da, a̧ro̧rȩ tüdüa̧mi̧ darä cjo̧ro̧rërea̧ ji̧, jabechji̧ pio ju̧i̧ a̧dë jo̧rȩtatä yo̧diji̧ri̧da' quëna̧ jo̧rȩtaji̧ri̧pea̧dirȩ pio mȩa chjiari goë goë ta̧rëa̧ oaiä.

²² Ado mȩnȩ pio jauëräpȩmo̧ ma̧na̧ pio ju̧i̧ chjiari chjaodëri̧ ta̧rëpai̧ dadirȩ peaja̧di —yo̧a̧diro̧jo̧ȩ—. Goadirea̧mi̧dëde. Ado pio judiro̧ ana̧ri̧ jo̧rȩtachea oa, ¿tjana̧ japapea̧de?

²³ Tjana̧ japapea̧dë, jabechji̧ ja̧di dari̧ japatäremȩrenȩ omȩ. Danȩ, judio judiro̧ pio mȩaiäpȩmo̧ goëdëri̧ cjia tjamo̧pe bagachea oa, jabechji̧ ja̧di dari̧ japatäremȩrenȩ —yo̧a̧diro̧jo̧ȩ—. Danȩ, pio yidirȩ jadüchiami̧ oari judiro̧. Ado Ütë tjamo̧ pio ju̧i̧ yo̧ë cji̧därea̧ ma̧ȩ yürürëreji̧ri̧diro̧jo̧ȩ. 'Aja̧ Ütë, ja̧di dari̧ japapaquëda, pio jiro doro japamitë chjätä ëte cüdë yo̧ë cji̧däa̧ pio ju̧i̧ japadäräa̧ oa goapaquëda, jabechji̧ pio mȩa yo̧ë cji̧däa̧mi̧ japajaquëda' quëna̧ jo̧rȩtaji̧ri̧rȩ yo̧ë cji̧däa̧diro̧jo̧ȩ Ütë tjamo̧ ju̧i̧, jënȩro̧ jo̧rȩta̧mi̧.

²⁴ Ado yaba̧ japadäräpea̧ do üdë ma̧na̧na̧ra̧pea̧ ji̧ querediä tjamo̧dejȩrȩ. Pio ju̧i̧iä pio ji̧ri̧ nö̧ta jätäremȩrenȩ Ütë tjamo̧ ja̧ bëräpȩ —yo̧a̧diro̧jo̧ȩ—. Ado pio ju̧ri̧pȩ go̧düdärä ëte, jabechji̧ judio judiro̧ japariärërea̧mi̧ japatäremȩrenȩ pio ji̧ri̧ nö̧ta. Mȩnȩ chjai̧dë gȩrȩ chiadëmȩmi̧ dari̧ cjiadiäpea̧ oa, jabechji̧ ütara̧mi̧ joatäremȩrenȩ na̧ icjara oa pio ji̧ri̧ nö̧ta. Ado ja̧di dari̧ japea̧ ba oa, pio mȩnȩ na̧ chërera̧ pio ju̧ri̧ra̧ tuti ba ano̧täremȩrenȩ pio jiro oari pio ji̧ri̧ chjiari. Ado judiro̧ yo̧ë cji̧däa̧ ma̧ȩ pio ju̧i̧ japadärärea̧ daea̧ oaiä, jabechji̧ jibëa̧ cö̧ chjö̧na̧i̧ oa täa̧ oa cjiadiäpadirȩ o ji̧ri̧iäpȩmo̧ chjadëri̧ na̧rȩpea̧ oa jënȩro̧ yo̧ë cji̧däa̧ ma̧ȩ pio ju̧i̧ japadäräa̧ pio ju̧i̧ chjiari. Ado judio judiro̧ pio mȩnȩ ja̧di dari̧ japadäräa̧ pio ju̧i̧ chjiari ta̧rëa̧ oaiä, jabechji̧ ano̧ mire jo̧rȩtapai̧ dadirȩ pio mȩa chjiari. Cjatäcjie jo̧rȩtarea̧ dapai̧ dadirȩ. 'Aja̧, Pablo pio ju̧i̧ chjiari tjamo̧ri̧ dabaa̧ro̧da yaba̧, pio ju̧i̧ chjiari ma̧ȩ chjádë ta̧rërërea̧ ji̧, tjamo̧ri̧ dabaa̧ro̧da yaba̧, jabechji̧ Moicherë go̧ȩparërea̧ ma̧ȩrä cjo̧ro̧dida, jabechji̧ coëma cjiari̧ cjo̧ro̧dida' quëna̧ jo̧rȩtapai̧ dadirȩ —yo̧ji̧ri̧rȩ chi̧dëearëreji̧ri̧diro̧jo̧ȩ Pablo pio ju̧i̧iäpȩmo̧ Jerucharȩräpȩ a̧doparea̧ tjamo̧ jidaji̧ri̧ judiro̧.

²⁵ Ado judiodë pio ji̧ri̧ chjiaribo ni̧bä chjaotämi̧ cjiaji̧ri̧rȩ ji̧dë u̧i̧ ni̧bä chjaorëreji̧ri̧diro̧jo̧ȩ Pablo pio ju̧i̧iäpȩmo̧, ja̧di ta̧rëri̧ yo̧ji̧ri̧rȩ: —Ado yaba̧ tocoi̧mi̧ ni̧bä chjaotämi̧ cjiarea̧ro̧mȩ judiodë quëna̧ji̧ri̧ pio ji̧ri̧ chjiari —yo̧a̧diro̧jo̧ȩ—. Danȩ, no̧mȩ tjamo̧dëri ja̧ go̧ȩpe chjadürëreji̧ri̧rea̧ro̧jȩrȩ judiro̧ tüdüa̧mi̧ darä cjo̧ro̧pea̧ oa. Aja̧, pumȩrȩ jëdano̧a̧ ütë pio ju̧i̧iäpȩmo̧ cäë yürüa̧ go̧a̧ pio ju̧i̧ juradëtä go̧ȩpe chjadüa̧rea̧ro̧jȩrȩ. Ado goe chiamȩ go̧a̧ pio ju̧i̧, ado goe pio ju̧i̧ peaja̧di juradëtä go̧ȩpe chjadüa̧rea̧ro̧jȩrȩ. Ado peaja̧di jibëa̧ iei̧dë oa, jibëa̧ üi̧dë oa baë ëba mo̧a̧dëtä go̧ȩpe chjadürëreji̧ri̧rea̧ro̧jȩrȩ peaja̧di. Aja̧, pio ju̧i̧mo̧i̧ ma̧ȩ oa yo̧rea̧ro̧mȩ mȩa jo̧rȩta tänȩpea̧ oa, mȩnȩ no̧mȩ ta̧rërërea̧ pio ju̧i̧ —yo̧ji̧ri̧rȩ ni̧bä chjaorëreji̧ri̧diro̧jo̧ȩ Pablo ju̧i̧iäpȩmo̧ judiodë pio ji̧ri̧ chjiari.

²⁶ Ja̧dëa ji̧ dopea̧rä Pablo judi japarëremȩde tjamo̧ jidaji̧ri̧ pio judiro̧ chi̧dëea̧mi̧. Pio jiro oari pio ji̧ri̧ nö̧ta japarëremȩde judio pio judiro̧ japariärërea̧mi̧. Jabechji̧ joa̧diro̧jo̧ȩ jibëa̧ icjara oa, chjai̧dë gȩrȩ chiadëmȩmi̧ dari̧ cjiadiäpea̧ oa. Ado ja̧dëa ji̧ Pablo judi järëremȩde goë tuti ja̧bepamȩ ja̧ bë yuroräpȩ, tutirea̧ra̧ tutia̧ oa cjiamȩräpȩ. Aja̧, pio ju̧ri̧pȩ jäa̧de o ji̧ri̧ chjiari goë tuti ja̧bepamȩ pio ju̧i̧iäpȩmo̧ chjadëri̧ ütarë yo̧pea̧ oa. Ado ja̧di ta̧rëri̧ yo̧mȩrȩ yo̧a̧dejȩ: —Danȩ, pio jiro doro, japadäräparea̧rȩ chjai̧dë gȩrȩ chiadëji̧ri̧mi̧ dari̧ cjiadiäpea̧ pio ju̧i̧ chjiari —yo̧a̧dejȩ—. Ado pio jiro doro, pio jauëräpȩmo̧ jana̧parea̧rȩ ütara̧mi̧ cäë yürüpea̧ oa, ibëa̧ cö̧ oa täapea̧ oa —yo̧a̧dejȩ.

Pablo ju̧i̧ acji mitërëreji̧ri̧diro̧jo̧ȩ Ütë tjamo̧ ja̧ bëräpȩmȩ oa

²⁷ Jabo 7 do üdë goarijäpea̧ querediä tjamo̧ro, chjai̧dë gȩrȩ chiadëmȩmi̧ dari̧ cjiadiäpea̧ oa japarea̧ do üdë goarijäpea̧ querediä tjamo̧ro, Achia quȩmȩ chiririji̧ri̧ judio pio judiro̧ orë darëreji̧ri̧diro̧jo̧ȩ Pablo ju̧i̧ Ütë tjamo̧ ja̧ bëräpȩmȩ oa. Ado a̧dopea̧ oa cjiaji̧ri̧ judio pio ji̧ri̧iäpȩmo̧ teracabari̧ poë aechide ni̧bäa̧ oaiä, Pablo pio ju̧i̧ chjiari poë aechide ni̧bäa̧ oaiä, chjaodëri̧ ërecjiape bagarëreji̧ri̧diro̧jo̧ȩ, cjarari̧ cjiape jäji̧ri̧rȩ. Ado acji baguraji̧ri̧rȩ mitëa̧diro̧jo̧ȩ.

²⁸ Ado Pablo ju̧i̧ mitëa̧ji̧ri̧ pio judiro̧ goae tarai̧ ëna̧diäji̧ri̧rȩ yo̧a̧diro̧jȩrȩ pumȩ buba oa: —Danȩrȩ, Icharai pio judiri ja̧ji̧ri̧ pio dibëiäpȩmo̧ yo̧tarea̧ro̧dibe. Ta̧rëchji̧ibe —yo̧a̧diro̧jȩrȩ—. Jo̧ȩra̧pe a̧doera̧chji̧ibe. Danȩrȩ, pio yodëje teracabari̧ a̧ra̧ano̧mȩ pio judide. Pio yodëje chiriräpȩti̧ oa a̧ra̧ano̧riä tai̧ chjaomȩde ütëbodärä oa teracabari̧ a̧ra̧ano̧pea̧ oa. Moicherë go̧ȩparërea̧ ma̧ȩ pio ju̧i̧ ba chia jo̧rȩtadëtä yo̧mȩde. Ado Icharai pio judiri ja̧ji̧ri̧ pio ji̧ri̧ ba chia jo̧rȩtadëtä yo̧dejȩrȩ o ji̧ri̧. Ado pio yoa bë oa, Ütë tjamo̧ ja̧ bë pio yoa peaja̧di ba chia jo̧rȩtadëtä yo̧mȩrȩ a̧ra̧ano̧ chjaomȩde, ma̧i̧ dari̧ a̧ra̧ano̧mȩrȩ. Ado yaba̧ ji̧dë u̧i̧ ma̧i̧ dari̧ japea̧de. Danȩrȩ, judiodë pio ju̧i̧ ëba yu̧a̧dejȩ Ütë tjamo̧ ja̧ bëräpȩ, china̧chja tjamo̧räpȩ. Chjai̧dë gȩrȩ chiape järea̧mi̧ dari̧ ëba yu̧a̧dejȩ —ëna̧diäji̧ri̧rȩ yo̧rëreji̧ri̧diro̧jȩrȩ o ji̧ri̧iäpȩmo̧, ana̧ri̧ jo̧rȩtaji̧ri̧rȩ.

²⁹ Jabo cjäri̧ madiro̧jo̧ȩ, judiro̧ Pablo pio ju̧i̧ chjiari ja̧di ta̧rëri̧ aechide ni̧bäa̧ ji̧, oëra̧ yo̧a̧dirȩ. Chjadëri̧ yo̧dëa̧dirȩ. Ado pio yoa ma̧ȩ oa go̧ȩ ni̧bämȩ judi oëra̧ quëna̧chea oa, jabechji̧ tocoi̧mi̧ oa a̧de go̧ȩparequede mȩnȩ tjamo̧ri̧ dabapea̧ oa. DanȩTeopjiro, pio jiro pumȩ judiro̧ yo̧a̧ ji̧, “Aja̧, Pablo judi cja̧rȩmȩ oa, judiodë pio ju̧i̧ ëba yu̧a̧dejȩ Ütë tjamo̧ ja̧ bëräpȩ” yo̧a̧ ji̧, oëra̧ yo̧a̧dirȩ. Ütë tjamo̧ ja̧ bëräpȩ ëba yu̧a̧dëa̧dejȩ. Jabo danȩ, judiro̧ ado cja̧rȩmo̧ doremȩrä Pablo pio ju̧i̧ daea̧ oaiä, järea̧ no̧ro judiodë pio ju̧i̧ nö̧ta ëba tai̧mȩ oa daea̧ oaiä, oëra̧ jo̧rȩtaji̧ri̧pea̧dirȩ chjaodëri̧. Aja̧ Toropjimo̧ quȩmȩ ju̧i̧, Epjecho bë ma̧ri̧ri pio judirimȩ pio ju̧i̧ ëba tai̧mȩ oa daea̧ oaiä, jabechji̧ judio judiro̧ 'Aja̧, Ütë tjamo̧ ja̧ bëräpȩ ëba yu̧a̧ jirodiji̧da, judiodë pio ju̧i̧ ëba yu̧a̧ jirodiji̧da,' quëna̧ jo̧rȩtaji̧ri̧pe bagarëreji̧ri̧dirȩ. Pio ju̧i̧iä oëra̧ yo̧a̧dirȩ aechide yo̧a̧ ji̧. Jabechji̧ teracabari̧ aechide yo̧a̧diro̧jo̧ȩ.

³⁰ Jabo judio judiro̧, 'oëra̧ yo̧a̧diro̧ibëda' quëna̧ dabadëa̧dirȩ, jabo tjamo̧rämi̧ cjiarëreji̧ri̧diro̧jo̧ȩ. Pio ju̧i̧iä bë nö̧tai̧ oa chjäteno̧rëremȩde ma̧ȩ üdë Jerucharȩräpȩ cjo̧ro̧ji̧ri̧ ütëborë goëje cjari̧ri̧ cjiape bagarea̧mi̧ dari̧. Ado ütëborë Ütë tjamo̧ ja̧ bëräpȩ jäji̧ri̧rȩ chjuari̧ mitërëreji̧ri̧diro̧jo̧ȩ Pablo ju̧i̧. Ado Ütë tjamo̧ ja̧ bëri pio judiri a̧rȩdäräa̧mȩ oa mu̧i̧ go̧düa̧diro̧jo̧ȩ. Ado ja̧dëa ji̧ Ütë tjamo̧ ja̧ bë oa jidaji̧ri̧ guadia judiro̧ chjaodëri̧ tuti cara̧diro̧jo̧ȩ tuti cararea̧ joë ya oa Pablo pio judi ado chjereno̧ yu̧a̧chea oa.

³¹ Ado ja̧dëa ji̧ Pablo pio ju̧i̧ bide cjaeäa̧ nö̧ta, pio ju̧i̧ ja̧bo tänȩtea̧ nö̧ta, domano guadia ütë pio judi ta̧rëmȩpea̧de. Aja̧, pumȩrȩ ma̧ȩ a̧depea̧ oaiä, jabechji̧ chjaodëri̧ ta̧rërëremȩde Jerucharȩräpȩ cjo̧ro̧ji̧ri̧ judiro̧ cjarari̧ cjiape baga̧ pio ju̧i̧ chjiari.

³² Pio ju̧i̧iä chjaodëri̧ mitëa̧dejȩrȩ domano guadia tjamo̧ yo̧ji̧ri̧ pio ji̧ri̧, guadia mu̧i̧tjoi̧ pio ji̧ri̧bo. Ado jo̧ȩra̧pe jäëno̧a̧dirȩ Ütë tjamo̧ ja̧ bëräpȩ tuti japapea̧ oa. Ado judio judiro̧ guadia ütë pio ju̧i̧ daea̧ ji̧, guadia buba oa acji jana̧ji̧ri̧ oa daea̧ ji̧, jabechji̧ bide ano̧a̧diro̧jo̧ȩ Pablo ju̧i̧.

³³ Ado guadia ütë üdë Pablo pio ju̧i̧iäpȩ tjamo̧i̧ jämȩrȩ mitëa̧dejȩ. Ado yo̧a̧ri̧ chatu chiamȩ chjipararira̧ chjuari̧ cji̧däa̧dejȩ. Ado ja̧dëa ji̧ iëno̧ë ta̧rëa̧dejȩrȩ a̧dopea̧ oa cjiaji̧ri̧ pio ji̧ri̧: —¿Chjiade pio yodëje? ¿Tjana̧ chjai̧dë oa japea̧de?

³⁴ Jabo cja̧rȩmȩ jo̧rȩtarea̧ chiaji̧ri̧rȩ dëbë yo̧tärea̧ ji̧, cjäri̧ madirȩ, ma̧i̧ dari̧ gürë earëreji̧ri̧dirȩ. Pumȩ no̧i̧dërë dëbë yo̧ chjaoa̧ oaiä, oëra̧ti̧ oa jo̧rȩtaji̧ri̧rȩ dëbë yo̧a̧ oaiä, jabechji̧ ta̧rërea̧mi̧dëri̧ gürë earëreji̧ri̧dirȩ. Pio ju̧i̧iä guadia ütë üdë chjadëri̧ ta̧rërea̧ dadëa̧ oaiä, jabechji̧ Pablo pio ju̧i̧ ëba baätä yo̧a̧dejȩrȩ guadia ji̧ri̧ guadiarë cjo̧ro̧mȩ bë ana̧räpȩ.

³⁵ Jabo cjäri̧ madiro̧jo̧ȩ, a̧dë chjäte ërecjia tjamo̧rëreji̧ri̧diro̧jo̧ȩ Pablo ju̧i̧ judio judiro̧. Ado pio ju̧i̧iä guadia judiro̧ pio ju̧i̧ ëba baäa̧räbo, jabechji̧ ma̧ cjüëtüri̧ jo̧rȩtaji̧ri̧rȩ acji cho̧rë järëreji̧ri̧diro̧jȩrȩ, Pablo pio ju̧i̧ ado chjereno̧ mitëtämi̧ cjiaji̧ri̧rȩ. Pio ju̧i̧iä guadia judiro̧ guadiarë cjo̧ro̧mȩ bëräpȩ go̧düdäräa̧rä, judiro̧ bëräpȩmo̧ buarea̧räpȩ go̧düdäräa̧rä, jabechji̧ guadia pio judiro̧ jibëa̧ ca̧toro ara buarëreji̧ri̧diro̧jo̧ȩ Pablo ju̧i̧, judio judiro̧ ma̧i̧ dari̧ japachea oa.

³⁶ Jabechji̧ “Ja̧bo tänȩchji̧jo̧ȩ, ja̧bo tänȩchji̧jo̧ȩ” yo̧ chjaoji̧ri̧rȩ ëna̧diä ëna̧diä cjiaji̧ri̧rȩ acji cho̧rë järëreji̧ri̧diro̧jo̧ȩ, jachidai̧ji̧ri̧rȩ.

Pablo judi pio jȩa chjiari ni̧bärëremȩdejȩrȩ pumȩ buba oa

³⁷ Guadia judiro̧ Pablo pio ju̧i̧ nö̧ta guadiarë cjo̧ro̧mȩ bë ana̧räpȩ yu̧a̧patea̧ ji̧, Pablo judi domano guadia ütë pio ju̧i̧iäpȩmo̧ yo̧a̧dejȩ. Giriego ma̧ȩra̧ ni̧bämȩrȩ yo̧a̧dejȩ: —Danȩ, cüdë pio mȩaiäpȩmo̧ ni̧bärä judi ¿jabechji̧dëde? Ado guadia ütë judi dëbë yo̧a̧dejȩ: —Chia chia, ¿giriego ma̧ȩ ni̧bämȩrenȩ? —yo̧ë ta̧rëa̧dejȩ—.

³⁸ Ado cja̧rȩmo̧rämi̧ cjiaremȩrequedemȩ. Ejitorimȩ pio judirämi̧ cjiaremȩrequedemȩ —yo̧a̧dejȩ—. Danȩ, no̧mȩ tjamo̧ri ja̧ pio jiro üi̧ üdë, Ejitorimȩ pio judi ma̧i̧ dari̧ japarëremȩde. Jabechji̧ pio judi ana̧ri̧ ni̧bä chjaoa̧ oaiä, judi goae tarari̧ yabëno̧a̧ oaiä, no̧i̧dërë ërecjiape bagarëreji̧ri̧diro̧jo̧ȩ chiri ütë cjo̧ro̧mȩ pio ju̧i̧iäpȩmo̧. Ado pio ju̧i̧iä 4 mil pumȩ judiro̧ goae tarari̧ dëbëpe chjaorëreji̧ri̧diro̧ibe domano ji̧ri̧. Ado ja̧dëa ji̧ pio jiro oari pio ji̧ri̧, ja̧bo tänȩpea̧ oa acji tai̧ji̧ri̧ pio ji̧ri̧ chiri maearäpȩmo̧ ëba järëremȩdejȩrȩ. Aja̧, pio jiro pumȩrämi̧ cjiaremȩrequedemȩ —yo̧a̧dejȩ guadia ütë üdë Pablo pio ju̧i̧iäpȩmo̧.

³⁹ Jabo Pablo judi dëbë yo̧a̧dejȩ: —Cjäri̧ marequede. Pio judidërequede —yo̧a̧dejȩ—. Judiorequede cüdë. Tacho quȩmȩ bë ma̧ri̧räpȩ ara̧ oa cjiarëremȩrequede Chirichia quȩmȩ chiriräpȩ. Bë ma̧ri̧ ba chia tjamo̧rimȩrequede cüdë. Ado yaba̧ cjäri̧ri̧ cjia dacoe. Jabechji̧ pumȩ buba pio ji̧ri̧iäpȩmo̧ ni̧bä chjaorea̧ yürücoe —yo̧a̧dejȩ.

⁴⁰ Ado pio ju̧i̧ ta̧rëa̧ oaiä, jabechji̧ pumȩ pio ji̧ri̧iäpȩmo̧ ni̧bä chjaorea̧ yürüa̧dejȩ. Ado Pablo judi buarea̧ uëräpȩ cjiamȩrȩ cjapi tänȩrëremȩdejȩrȩ jibëa̧ ichira̧. Ado cjapiri̧ cjiadiäa̧rä, ebereo ma̧ȩra̧ ni̧bä chjaorëremȩdejȩrȩ pio jȩaiäpȩmo̧ ërecjiaji̧ri̧ pio ji̧ri̧iäpȩmo̧.