Japarea̧ 20 - Biblia Pume

Pablo judi baärëremȩde Machedoniaräpȩ, Gerechiaräpȩ

¹ Ado cjarari̧ cjiareji̧ri̧ pio judiro̧ ütëborë baäa̧ duri oa, Epjechoräpȩ a̧doparëreji̧ri̧ pumȩ judiro̧ cjatäcjie jo̧rȩtaji̧ri̧rȩ baäa̧ duri oa, Pablo pio judi yo̧ chjadürëremȩdejȩrȩ quëna̧ji̧ri̧ pio ji̧ri̧ pio jȩa nö̧ta a̧dopera̧tä. Ado ja̧dëa ji̧ a̧dopera̧pea̧ji̧ri̧ oa järiparȩrëremȩdejȩrȩ. Ado pio ji̧ri̧ järiparȩ ëte, jearëremȩdejȩrȩ. Ado pio ji̧ri̧ jea ëte, Epjecho bë ma̧ri̧ri pio judiri go̧dürëremȩde Machedonia quȩmȩ chiriräpȩ baäpamȩrȩ.

² Ado ju̧ri̧pȩ bë ma̧ri̧ ji̧ra̧räpȩ järëremȩde. Ado jënȩ jäa̧mi̧ nö̧ta a̧dope chjaorëremȩde quëna̧ji̧ri̧ pio ji̧ri̧ nö̧ta, pio ji̧ri̧ chjadëri̧ a̧dopea̧ oa, pio ji̧ri̧ ju chiaparȩpea̧ oa. Ado japamitë chjätä ëte, go̧düdärärëremȩde Gerechia quȩmȩ chiriräpȩ.

³ Ado ju̧ri̧pȩ cjiadiärëremȩde tjarari̧ gupënȩ nö̧ta. Ado pio jiro japamitë chjätä ëte baäparemȩde jibëa̧ chiriräpȩ, Chiria quȩmȩ chiriräpȩ. Jabo Pablo judi baäpea̧ ji̧ jëdano̧a̧rä, cjäri̧ made, baärea̧ dadëa̧de. Jabechji̧ judi goë ta̧rëa̧ oaiä, judio judiro̧ pio jȩa ja̧bo tänȩpea̧ pio ju̧i̧ chjiari goë ta̧rëa̧ oaiä, ano̧ mire jo̧rȩtamȩrȩ ado chjereno̧ cuchupë baärëremȩde jënȩ baätea̧rea̧ durimo̧, Machedonia quȩmȩ chiriräpȩmo̧.

⁴ Jabo jadü chiamȩrȩ baärëremȩde. Aja̧, Chopatoro quȩmȩ judi, Piro joja pio judi, Berea quȩmȩ bë ma̧ri̧rimȩ pio judi ëba baärëremȩdejȩ. Ado Aritaraco judi, ado Checu̧do judi, Techaronica pio judiriji̧ri̧ pio judiro̧ peaja̧di ëba baärëreji̧ri̧diro̧jo̧ȩ. Ado Gayo judi, Derebe quȩmȩ bë ma̧ri̧rimȩ pio judi, ado Timoteo judi, Tiquico judi, ado Toropjimo̧ judi peaja̧di ëba baärëreji̧ri̧diro̧jo̧ȩ.

⁵ Ado cüdëborë, Uruca pio judi ëba baärëremȩrecone Pablo ju̧i̧. Jabo pio jiro oari judiro̧, 7rë ibëa̧ yaboi̧ go̧dürëreji̧ri̧dirȩ Toroade quȩmȩ bë ma̧ri̧räpȩmo̧. Aja̧, pio ju̧ri̧pȩ jabërä baäeno̧rëreji̧ri̧dirȩ pio ibë chjadëri̧ jidapea̧ oa.

⁶ Ado chjätäpea̧ do üdë chjätäa̧ duri oa, pjuru chiadëmȩ chja̧pe oa jurapea̧ quȩmȩ do chjätäpea̧ do üdë chjätäa̧ duri oa, Pablo ado cüdë uimo̧mȩ chara ana̧ oa bua ëte, Pjiripo quȩmȩ bë ma̧ri̧ri pio judiri go̧dürëreji̧ri̧rea̧rȩ. Ado 5 do chjätä ëte, go̧düdärärëreji̧ri̧rea̧rȩ Toroade quȩmȩräpȩ, ibëa̧ jadü ji̧ri̧ dëbëdiäpea̧räpȩ. Ado ju̧ri̧pȩ cjiadiäa̧rea̧rȩ cja̧rȩmȩ chemana nö̧ta.

Toroaderäpȩ ju̧ri̧ Pablo judi ana̧ri̧ järiparȩrëremȩdejȩrȩ quëna̧ji̧ri̧ ji̧ri̧ ja̧boa̧remȩ pio ju̧i̧ bëdü tänȩa̧ oaiä

⁷ Ado Domi̧go domȩ ju̧i̧iä a̧doparëreji̧ri̧rea̧rȩ Ano̧mȩ ja̧ icjara pio ju̧i̧ jo̧rȩtapea̧ oa, chja̧pe oa mu̧i̧ quirë ëte jurapea̧ oa. Ado ja̧dëa ji̧ Pablo judi taruparëremȩde a̧ra̧ano̧pea̧ ji̧. Dopea̧rä baätä järirëremȩrȩ japamitë ana̧ tjamo̧ri̧ a̧ra̧ano̧rëremȩdiibe gȩnȩrȩ tjomo̧pea̧rä yuro.

⁸ Tatari̧ cjiamȩ tataparea̧ ji̧ra̧räpȩ a̧dopea̧ oa cjiaji̧ri̧ oa a̧ra̧ano̧rëremȩdiibe, jo̧ tjo uë tjamo̧räpȩ ju̧ri̧.

⁹ Ado üi̧ pëi̧ chja üdë, Eutico quȩmȩ pio judi darea̧ joë yari pio judiri ta̧rë charëremȩde, uë tjamo̧räpȩ ju̧ri. Ado Pablo judi ji̧dë ma a̧ra̧ano̧ chjaoa̧ oaiä, jabechji̧ canȩ üdë boadäräa̧dejȩ. Ado mo̧a̧ mo̧a̧ cha oaiä uë tjamo̧ri judiri cjatärëremȩde daburäpȩmo̧. Ado ja̧boa̧mȩ oa dadäräa̧diro̧jo̧ȩ pumȩbodëmȩ oa.

¹⁰ Jabo Pablo judi uëri pio judiri bira ëte, jäeno̧rëremȩde üi̧rȩ a̧rȩmȩräpȩ. Ado ju̧i̧ ja̧ icjara oa boë cjaeä toboe china̧därämȩrȩ ida̧dejȩ. Ja̧dëa ji̧ yo̧a̧dejȩrȩ o ji̧ri̧iäpȩmo̧: —Jabechji̧ bücjüri̧ cjiadëchji̧vä. Pumȩbode —yo̧a̧dejȩrȩ.

¹¹ Ado ja̧di ta̧rëri̧ yo̧ ëte, ado chjereno̧ bua̧de jo̧ tjo uëräpȩ. Ado chja̧pe oa ado mu̧i̧ quirë ëte, chjacjiamȩri̧ jo̧rȩtarëreji̧ri̧dirȩ Jechu pio ju̧i̧. Ado ja̧di dari̧ japa ëte, jura̧dirȩ. Ado jura ëte, ado taruparëremȩde Pablo judi pumȩ ji̧ri̧ a̧ra̧ano̧pea̧ ji̧. Dopea̧rä yuro a̧ra̧ano̧rëremȩdejȩrȩ. Ado ja̧dëa ji̧ baäa̧de.

¹² Ado uë tjamo̧ri pio judiri cjatäremȩ üi̧ pëi̧ chja pio ju̧i̧, jabechji̧ ma̧ chiadëri̧ cjia tjamo̧ji̧ri̧rȩ ëba baärëreji̧ri̧diro̧jo̧ȩ pumȩbomȩ oa.

Pablo judi, jibëa̧ jadüborë Toroade quȩmȩ bë ma̧ri̧ri pio judiri järëreji̧ri̧dirȩ Miretoräpȩ

¹³ Ado Pablo judi tara̧ jätämi̧ cjiamȩrȩ jibëa̧ yaboi̧ jätä yo̧rëremȩdiibe. Ado pio ju̧i̧iä a̧dë jäa̧rea̧ro̧jo̧ȩ. Ado uimo̧mȩ chara ana̧ oa buaji̧ri̧rȩ järëreji̧ri̧rea̧rȩ Acho quȩmȩräpȩ, Pablo pio ju̧i̧ dëbëdiäpea̧räpȩ.

¹⁴ Ado pio ju̧i̧ Achoräpȩ dëbëdiäa̧ ji̧, pio ibë nö̧ta buarëremȩde uimo̧mȩ chara ana̧rä. Ja̧dëa ji̧ a̧ro̧rȩ ütëborë järëreji̧ri̧rea̧rȩ Mitirena quȩmȩ bë ma̧ri̧räpȩ.

¹⁵ Ado dopea̧rä, uimo̧mȩ chara oa bua ëte, Mitirena pio judiri go̧düji̧ri̧rȩ go̧düdärärëreji̧ri̧rea̧rȩ Quio quȩmȩ dëbëräpȩ. Ado cja̧rȩmȩ do chjätä ëte, go̧düdärärëreji̧ri̧rea̧rȩ Chamo̧ quȩmȩräpȩ. Ado dopea̧rä, go̧düdärärëreji̧ri̧rea̧rȩ Miretoräpȩ.

¹⁶ Ja̧di dari̧ tai̧rëreji̧ri̧rea̧rȩ Pablo judi Achiaräpȩ a̧dë chjäte cjiadiächea oa. Jabechji̧ ado chjereno̧ jädëri̧ cjiarëremȩde Epjechoräpȩ jabo Jerucharȩräpȩ tjamo̧ri̧ go̧düdärätämi̧ cjiarëremȩde. Tjamo̧ davä. Pȩtecote quȩmȩ do üdë jabë querediäbea yaboi̧ go̧düdärätämi̧ cjiarëremȩde.

Pablo judi ni̧bä chjaorëremȩdejȩrȩ Epjechoräpȩ tjamo̧ jidaji̧ri̧ pio ji̧ri̧ Mireto quȩmȩ bë ma̧ri̧räpȩ

¹⁷ Ado Pablo judi Miretoräpȩ jabë cjiamȩrȩ ma̧ȩ chjadürëremȩdejȩrȩ Epjechoräpȩ tjamo̧ jidaji̧ri̧ pio ji̧ri̧iäpȩmo̧. Pio ju̧ri̧pȩ a̧doparea̧ pio ju̧i̧ tjamo̧ jidaji̧ri̧ pio ji̧ri̧iäpȩmo̧ ma̧ȩ chjadürëremȩdejȩrȩ pio jȩaiäpȩ jätä.

¹⁸ Ado pio ju̧i̧ ta̧rëa̧ oaiä, jäa̧diro̧jo̧ȩ. Ado jädäräa̧ji̧ri̧ oa Pablo judi ni̧bä chjaorëremȩdejȩrȩ, ja̧di ta̧rëri̧ yo̧mȩrȩ: —Danȩrȩ ca̧ oti̧, pio coa chjiari chjadëri̧ dabanȩrȩ —yo̧a̧dejȩrȩ—. Cüdë Achia quȩmȩ chiriräpȩ go̧düdäräa̧ domȩri ja̧, jabechji̧ dibëa̧ dachoro cjo̧ro̧rëremȩrequede. Dibëa̧ dachoro ja̧bepe cjiarëremȩrequede.

¹⁹ Ado dibëa̧ chjarerä ja̧beparërea̧ ji̧, jabechji̧ oëra̧ jo̧rȩtadëa̧requede pio coa chjiari. 'Jabechji̧ pio cüdë o ji̧ri̧ u̧i̧ ba chiaquëda, o judiro̧ ba chia tjamo̧dëdiro̧da' quëna̧ jo̧rȩtadëa̧requede jabo jabechji̧, 'pio coa u̧i̧ ba chia maeadiro̧da' quëna̧ jo̧rȩtamȩrȩ a̧dorëremȩrequededibe, Ütë tjamo̧ pio ju̧i̧ ja̧ mu̧i̧tjoi̧mȩrȩ. Tjamo̧ davä. Ji̧dë ma a̧dorëremȩrequededibe judio judiro̧ coa conȩda̧räbo, ji̧dë ma dëbëpe chjaoa̧räbo. Aja̧, cüdë gito ana̧ri̧ tararäbo ji̧dë ma ja̧bepe cjiarëremȩrequede dibë a̧dopea̧ oa, da ui gu̧rori̧ cjo̧ro̧a̧räbo.

²⁰ Jabechji̧ ma̧i̧ dari̧ chjätäa̧räbo, nȩmȩpadëa̧requededibe Ütë tjamo̧ ja̧ ma̧ȩ oa —yo̧a̧dejȩrȩ—. Aja̧, goadia̧ oa boeami̧ dari̧ goadëa̧reconȩ jabo jabechji̧ ütëbo ma̧ȩ oa a̧ra̧ano̧ chjaorëremȩrequededibe, dibë a̧domȩ ma̧ȩ pio ju̧i̧. Aja̧, bë nö̧tai̧ oa a̧ra̧ano̧rëremȩrequededibe davä, mȩnȩro̧ a̧dopamȩräpȩbo.

²¹ Ado judio pio ji̧ri̧mo̧dë, jabo judiodë pio ji̧ri̧bo ni̧bä chjaorëremȩrequede pumȩ judiro̧ ütëborë chjere jo̧rȩtapea̧ oa, judiro̧ chjai̧dë pio ju̧i̧ putu jura̧ a̧dë chami̧ dari̧ chjere jo̧rȩtapea̧ oa. Tjamo̧ davä. Judiro̧ Ütë tjamo̧ pio ju̧i̧iäpȩmo̧ ano̧ mire jo̧rȩtapea̧ oa, judiro̧ ibëa̧ Ano̧mȩ Jechu pio ju̧i̧iäpȩmo̧ quëna̧pea̧ oa, ni̧bä chjaorëremȩrequedejȩrȩ.

²² Ado yaba̧ Tjo tjamo̧ pio judi tara tänȩa̧mi̧ baärequede Jerucharȩräpȩ —yo̧a̧dejȩrȩ—. Ado cüdë pio ju̧ri̧pȩ go̧düdäräa̧rä, 'Aja̧, ja̧di dari̧ conȩdapadiro̧coada' tjamo̧ri̧ quëna̧ dabadërequede.

²³ Jabo dëdë, Tjo tjamo̧ pio judi daba tänȩa̧mi̧ dabarequede jabo. Jabechji̧ cüdë eami̧ bë ma̧ri̧räpȩ go̧düdäräa̧rä, 'conȩdapai̧ dadiro̧coada, chaäpai̧ dadiro̧coada' quëna̧ dabarequede.

²⁴ Jabo pio coa conȩdarä judi jabechji̧de coaiä. Jabechji̧ pio yoa chiri oa cjo̧ro̧pea̧ ji̧ tjamo̧ri̧ ba chia jo̧rȩtadërequede jabo Ano̧mȩ Jechu judi coa yürüa̧ ja̧beparea̧ pio ju̧i̧ ja̧bepadäräpea̧ pio ju̧i̧, dëdë, ba chia tjamo̧ri̧ jo̧rȩtarequede. Jabechji̧ Jechu pio ju̧i̧ nö̧tadäräri̧ ta̧rëdiätämi̧ cjiareconȩ nȩmo̧diämȩmi̧ dari̧ japarea̧ decjiari̧. Jabechji̧ Ütë tjamo̧ judi tuti yürürërea̧ pio ju̧i̧ chjiari, pio judirimȩ marë cjäri̧ri̧ cjiamȩrȩ tuti yürüa̧ pio ju̧i̧ chjiari chjadëri̧ a̧ra̧ano̧tämi̧ cjiarequede ma̧ȩ chjadëi̧ pio ju̧i̧ —yo̧a̧dejȩrȩ.

²⁵ —Danȩrȩ ca̧ oti̧, dibëa̧ chjarerä cjo̧ro̧rërea̧ ji̧, jabechji̧ pio dibë ütëbodärä oa a̧ra̧ano̧ chjaorëremȩrequededibe Ütërë yo̧a̧ chja̧oerä cjo̧ro̧pea̧ pio ju̧i̧ chjiari —yo̧a̧dejȩrȩ—. Aja̧, pio coaiä irä ta̧rë chjaorëreji̧ri̧renȩro̧coe, jabo pio yaba̧ domȩri ja̧ dadëparenȩro̧coe. Jabechji̧ baäa̧mi̧ baärequede yaba̧. Ado judiri ca̧ chamacho oa dadëparenȩro̧coe.

²⁶ Ja̧di tara yo̧requededibe ca̧ oti̧. Mȩnȩro̧ eami̧rȩ cjo̧dë tja ana̧räpȩ aeno̧a̧ oa cjiarä judi, pio coaiäpȩmo̧ aechide yo̧rea̧ dadëparenȩro̧coe —yo̧a̧dejȩrȩ—. 'Aja̧, Pablo judi coa chjadëri̧ a̧ra̧ano̧dëa̧ oaiä, Jechu pio ju̧i̧ chjiari ni̧bädëa̧ oaiä, aenoa̧ oa cjiaquëda yaba̧' quëna̧rea̧mi̧dëri̧ a̧ra̧ano̧rëremȩrequededibe ütëbodärä oa.

²⁷ Jabechji̧ nȩmȩpadëa̧requededibe Ütë tjamo̧ ja̧ ma̧ȩ oa. 'O oamo̧i̧ oa a̧ra̧ano̧täremȩquiji̧ri̧da' quëna̧dëa̧requede. Jabechji̧ Ütërë ea jana̧ chjadüa̧ ma̧ȩ ütëbo oa a̧ra̧ano̧a̧requededibe goadirea̧ decjiari̧. Yürüa̧requededibe davä, Ütë tjamo̧ ja̧ ma̧ȩ codë oa china̧chjapadëmȩrȩ —yo̧a̧dejȩrȩ—.

²⁸ Ado pio ju̧i̧iä yo̧requededibe yaba̧ ca̧ oti̧. Jabechji̧ mȩnȩro̧ pio coaiä dabapea̧ pio ju̧i̧ jo̧rȩtaji̧ri̧rȩ cjo̧ro̧chji̧vä. Na̧e chiachji̧vä. Chjadëri̧ jidachji̧vä dibëa̧ chji̧ oa mȩnȩro̧ u̧i̧pea̧ oa cjiadiächea oa, oëra̧diächea oa. Peaja̧di chjadëri̧ jidatäreji̧ri̧nȩrȩ ovejami̧ da pio ji̧ri̧, oveja oa jidamȩrȩ japarëmi̧ cjiari̧. Jabechji̧ Tjo tjamo̧ pio judi mitëa̧ oa tjamo̧ jidaji̧ri̧pea̧nȩrȩ. Ja̧di tara chjadëri̧ jidatäreji̧ri̧nȩrȩ Ütë tjamo̧ ja̧ a̧doparea̧ pio ju̧i̧, Joja ja̧ goera̧ gatërërea̧ pio ju̧i̧, jibëa̧pe baga̧ pio ju̧i̧ —yo̧a̧dejȩrȩ—.

²⁹ Ado danȩrȩ ca̧ pumȩ, ca̧ duri oa japamitë chjätä ëte oëra̧ a̧ra̧ano̧ji̧ri̧ pio judiro̧ chjare yu̧ë a̧dopapadiro̧dibe ovejami̧ da pio ji̧ri̧iäpȩmo̧ chjai̧dëri̧ japapea̧ oa. Aja̧, pio ju̧i̧ tjamo̧ri̧ dabarequede. Ca̧ duri oa chjare yu̧ë a̧dopapadiro̧dibe. Ado u̧i̧pe u̧i̧pe a̧ra̧ano̧padiro̧dibe tjamo̧i̧ cjiari̧ baädëmȩ ma̧ȩ pio ju̧i̧. Aure chjuamȩmi̧ darë japapadiro̧dibe, conȩdami̧ dari̧ japaji̧ri̧rȩ. Jabechji̧ ovejami̧ da pio ji̧ri̧ cjäri̧ri̧ cjia dadëpadiro̧dibe.

³⁰ Jachiriji̧ri̧ pio judiro̧mo̧rȩdë jabo dibëa̧ chjareräji̧ri̧ pio judiro̧borë orë oëra̧ a̧ra̧ano̧padiro̧dibe mȩnȩro̧ oëra̧ quëna̧pea̧ oa, pio ji̧ri̧ cho̧rë quëna̧pea̧ oa, quëna̧ji̧ri̧ pio judiro̧ u̧i̧pea̧ oa cjiapea̧ oa.

³¹ Ja̧di tara na̧e chia tjamo̧chji̧vä uapai̧ da oaiä. Ado a̧dë jo̧rȩtadëchji̧vä cüdë dibëa̧ charerä japarërea̧ ji̧. Jabechji̧ tjarari̧ ui nö̧ta ji̧dë ma a̧ra̧ano̧ chjaorëremȩrequededibe pumȩ nö̧tai̧ oa. Doromo̧dë jabo gȩnȩräbo chi̧dëea̧requededibe, pio dibë tjamo̧ri̧ a̧dotämi̧ cjiamȩrȩ. Ado tjaoërä, dëdë, da ui gu̧rori̧ chi̧dëearëremȩrequededibe, pio dibë chjiari bücjüri̧ cjiamȩrȩ. Aja̧ ca̧ oti̧, a̧dë jo̧rȩtadëchji̧vä cüdë dibëa̧ chjarerä japarërea̧ pio ju̧i̧ —yo̧a̧dejȩrȩ.

³² —Ado yaba̧ ca̧ oti̧, jabechji̧ chjadëri̧ jidatädidibe Ütë tjamo̧ judi —yo̧a̧dejȩrȩ—. Chjadëri̧ cjo̧ro̧rea̧ yürütädidibe judi yürürërea̧ ma̧ȩrä, dibë a̧domȩ ma̧ȩrä. Jabechji̧ pio jiro ma̧ȩ oaiä üi̧padärärea̧ dapanȩrȩ. Ji̧dë u̧i̧ ju chiarea̧ dapanȩrȩ. Pio jiro ma̧ȩ oaiä dami̧ti̧ oa yürüpadidibe jibëa̧ pumȩ pio ji̧ri̧. Ado jënȩ goë boea̧ pio ju̧i̧ a̧de yürüpadidibe o ji̧ri̧ nö̧ta, pio ju̧i̧ ja̧ oa china̧chjari̧ tutia̧ oa cjiaji̧ri̧ pio ji̧ri̧ nö̧ta.

³³ Danȩrȩ ca̧ oti̧, cüdë dibëa̧ chjarerä cjo̧ro̧rërea̧ ji̧, jabechji̧ dibëa̧ pio ju̧i̧ dae ja̧bo dae ja̧bo dadërëremȩrequede —yo̧a̧dejȩrȩ—. Dibëa̧ chëre oa, dibëa̧ oro oa, dibëa̧ chjibo oa dae ja̧bo dadëa̧reconȩ.

³⁴ Jabechji̧ ca̧ ichira̧ pio ju̧ri̧ra̧ ja̧bepea̧ oaiä, chëre oa boarea̧ darëremȩrequede. Aja̧, dami̧ti̧ oa gatëpea̧ oa, ca̧ jadü pio judiro̧borë jurapea̧ oa, a̧ro̧rȩ eami̧ oa cjäri̧ ja̧bochea oa gatërëremȩreconȩ cüdë boa̧ chërera̧ pio ju̧ri̧ra̧. Ado pio ju̧i̧ chjiari tjamo̧ri̧ dabanȩrȩ ca̧ oti̧.

³⁵ Ado danȩrȩ, cüdë ja̧di dari̧ ja̧bepea̧ oaiä, jabechji̧ chjadëri̧ na̧rȩrëremȩrequededibe cjäri̧ ja̧bomȩ pio ju̧i̧ ëba jurapea̧ pio ju̧i̧ chjiari. Jabechji̧ Jechurë yo̧rërea̧ ma̧ȩ pio ju̧i̧ chjadëri̧ jo̧rȩtatäreji̧ri̧rea̧ro̧jo̧ȩ, ja̧di ta̧rëri̧ baämȩ ma̧ȩ oa: “Aja̧, o ji̧ri̧iäpȩmo̧ badëri̧ yürüa̧ üdë goae tjamo̧de. Jabechji̧ o ji̧ri̧iä badëri̧ mitëa̧ pio ju̧i̧ u̧i̧ goaede." Aja̧, ja̧di ta̧rëri̧ yo̧rëremȩde Ano̧mȩ Jechu judi o ji̧ri̧iäpȩmo̧ yürüpea̧ pio ju̧i̧ chjiari. Peaja̧di dari̧ na̧rȩrëremȩrequededibe ca̧ oti̧ —yo̧mȩrȩ ni̧bä chjaorëremȩdejȩrȩ Pablo judi Epjechoräpȩ tjamo̧ jidaji̧ri̧ pio ji̧ri̧iäpȩmo̧.

³⁶ Ado Pablo judi ni̧bä chjaoë cjiadiäa̧rä, juchatura̧ cjiaji̧ri̧rȩ ji̧mo̧ ni̧bärëreji̧ri̧diro̧jo̧ȩ Ütë tjamo̧ ju̧i̧.

³⁷ Ado cjitë ëte ea cjiaji̧ri̧rȩ ida̧diro̧jo̧ȩ. Chamachoro ya i̧bua̧diro̧jo̧ȩ.

³⁸ Ado ana̧ri̧ jo̧rȩtaji̧ri̧pea̧dirȩ Pablo judi yo̧a̧ pio oaiä. Aja̧, judi yo̧a̧ oaiä, "Aja̧, ado judiri ca̧ chamacho oa dadëparenȩro̧coe" yo̧mȩ ma̧ȩ pio ju̧i̧ yo̧a̧ oaiä, jabechji̧ ana̧ri̧ jo̧rȩtape bagarëreji̧ri̧dirȩ, odëri̧ cjia tjamo̧pe jäji̧ri̧rȩ. Ja̧dëa ji̧ ëba bira̧diro̧jo̧ȩ uimo̧mȩ chara ana̧rȩ pjurëmȩräpȩ judi baäpea̧ oa.