Japarea̧ 2 - Biblia Pume

Tjo tjamo̧ judi ma̧na̧de

¹ Ja̧dëa ji̧ Pȩtecote quȩmȩ do chjätäpea̧ do üdë ma̧na̧ domȩ ju̧i̧iä, cja̧rȩmȩrämo̧ a̧dopea̧ oa cjiarëreji̧ri̧dirȩ quëna̧ji̧ri̧ judiro̧.

² Ado a̧dëri pio judiri ma̧na̧mȩ earea̧ üdë chjaodëri̧ birana̧ra̧rëremȩdejȩrȩ a̧doparea̧ jo̧räpȩji̧ri̧ oa. Ma̧i̧ dari̧ pupuripë tai̧mȩmi̧ ta̧rëri̧ birana̧ra̧dejȩrȩ jo̧ tjo nö̧tai̧ oa, jënȩro̧ chaji̧ri̧ oa.

³ Ja̧dëa ji̧ darëreji̧ri̧diro̧jo̧ȩ cjo̧dë gärimȩmi̧ da oa, cjitëdiämȩ oa. Ado jiro gärimȩmi̧ darë pumȩ nö̧tai̧ oa chjarapë birarëremȩdejȩrȩ pumȩ ja̧ uëmo̧.

⁴ Ado Tjo tjamo̧ judi bëpera̧pea̧de ütëbo ja̧ icjararä. Ado pio ju̧i̧ ja̧ chja̧oerä cjiaji̧ri̧rȩ tjaoëti̧ chia ni̧bäji̧ri̧pe bagarëreji̧ri̧dirȩ ado cja̧rȩmo̧ ni̧bärea̧ ma̧ȩra̧, Tjo tjamo̧ pio judi ni̧bärea̧ yürüa̧ oaiä.

⁵ Ado pio jiro japamitërä judio no̧i̧dërë cjo̧ro̧rëreji̧ri̧dirȩ Jerucharȩräpȩ ju̧ri̧, Ütë tjamo̧ pio ju̧i̧iäpȩmo̧ jo̧rȩtaji̧ri̧ pio judiro̧. Pio judiro̧ orë ado cja̧rȩmo̧ chiriräpȩ cjo̧ro̧rërea̧ ji̧, jabechji̧ pio jiro bë ma̧ri̧rä ano̧ mire cjo̧ro̧ji̧ri̧pea̧dirȩ peadëri ja̧. Ado o judiro̧ jabomo̧ cjo̧rȩ jäa̧dirȩ. Jabechji̧ Pȩtecote quȩmȩ do chjätäpea̧ do üdë ma̧na̧ oaiä oëra̧ti̧ a̧rȩmȩ chiriri pio judiri go̧düdärä chjaorëreji̧ri̧dirȩ Ütë tjamo̧ pio ju̧i̧ jo̧rȩtapea̧ oa.

⁶ Ado judiro̧ ma̧i̧ tarari̧ ea cjiamȩ pio ju̧i̧ ta̧rëa̧ oaiä, chjaodëri̧ a̧dopëno̧rëreji̧ri̧dirȩ bubarë quëna̧ji̧ri̧ pio ji̧ri̧iäpȩ. Ado ni̧bäji̧ri̧ oa ta̧rëa̧diro̧jȩrȩ tjaoëti̧ chia ni̧bäji̧ri̧ oa. Jabechji̧ jënȩro̧ cjo̧ro̧mȩ chiri nö̧tai̧ oa ni̧bärea̧ ma̧ȩ oa ni̧bäji̧ri̧ oa bapë ta̧rëa̧diro̧jȩrȩ. Tjamo̧ davä. Pio jiro pumȩ judiro̧ jibëa̧ ma̧ȩ oa ni̧bärea̧mi̧dëräbo, jabechji̧ bapë ta̧rë marëreji̧ri̧diro̧jȩrȩ.

⁷ Ado pio ju̧i̧iä a̧dë chjäte ana̧ri̧ jo̧rȩtaji̧ri̧pea̧dirȩ. Ado jibëa̧ dëbëti̧ra̧ chia ni̧bä chjaoji̧ri̧pea̧dirȩ, ja̧di ta̧rëri̧ yo̧ji̧ri̧rȩ: —Danȩrȩ, pio yodëro̧je, ni̧bäji̧ri̧ pio judiro̧, ¿jabechji̧ Garirearäpȩ cjo̧ro̧ji̧ri̧ pio judiro̧dëdirȩ? Dëdë, Garirea quȩmȩ chiriräpȩ cjo̧ro̧ji̧ri̧ pio judiro̧ maeadirȩ. A̧ro̧rȩ ni̧bärea̧ ma̧ȩ oa ni̧bärea̧mi̧dëräpȩ cjo̧ro̧dirȩ.

⁸ Jabo ni̧bärea̧mi̧dëräbo, jabechji̧ a̧ro̧rȩ ni̧bärea̧ ma̧ȩ chjö̧na̧i̧ oa ni̧bäji̧ri̧pea̧dirȩ. A̧ro̧rȩ oëra̧ti̧ oa a̧rȩmȩ chiriräpȩ cjo̧ro̧räbo, jabechji̧ ni̧bäji̧ri̧pea̧diro̧jo̧ȩ a̧ro̧rȩ cjo̧ro̧mȩ chirirä ni̧bärea̧ ma̧ȩ pio ju̧i̧. Ado a̧ro̧rȩ ütëborë bapë ta̧rë marea̧ro̧jȩrȩ ji̧dëri̧. '¿Jabo yö̧ta dari̧ ni̧bäji̧ri̧pea̧cjivadiro̧?, jënȩro̧ dabapadëa̧ ma̧ȩ oa ¿yö̧ta dari̧ ni̧bärea̧ daea̧cjivadiro̧?' quëna̧ jo̧rȩtaji̧ri̧rȩ ta̧rë marea̧ro̧jȩrȩ.

⁹ Danȩrȩ, a̧ro̧rȩ cja̧rȩmȩ ma̧ȩ maea oa ni̧bä ma ja̧didë. Cja̧rȩmȩ chiriräpȩ cjo̧ro̧ ma ja̧didë. Jabechji̧ chiri oëra̧ti̧ oa cjo̧ro̧rea̧rȩ. Ado cja̧rȩmo̧ ma̧ȩ oa, ado cja̧rȩmo̧ ma̧ȩ oa ni̧bäji̧ri̧rȩ cjo̧ro̧rea̧rȩ. Jabechji̧ a̧ro̧rȩ, o judiro̧, Patia quȩmȩ chiriräpȩ cjo̧ro̧dirȩ. Ado judiro̧ jibëa̧ ma̧ȩ oa ni̧bädirȩ. Ado o judiro̧ Media quȩmȩ chiriräpȩ cjo̧ro̧dirȩ. Ado Mediaräpȩ cjo̧ro̧ji̧ri̧ pio judiro̧ peaja̧di jibëa̧ ma̧ȩ oa ni̧bädiro̧jo̧ȩ o judiro̧ ni̧bärea̧mi̧dëri̧. Ado o judiro̧ Era̧me quȩmȩ chiriräpȩ cjo̧ro̧dirȩ. Ado ju̧ri̧pȩ cjo̧ro̧ji̧ri̧ pio judiro̧ peaja̧di jibëa̧ ma̧ȩ oa ni̧bäji̧ri̧rȩ cjo̧ro̧dirȩ, ado cja̧rȩmo̧ ma̧ȩ oa. Ado o judiro̧ Mechopotamia quȩmȩ chiriräpȩ cjo̧ro̧dirȩ. Peaja̧di tjaoë ma̧ȩ oa ni̧bädirȩ. Ado o judiro̧ Judea quȩmȩ chiriräpȩ cjo̧ro̧dirȩ. Ado o judiro̧ Capadochia quȩmȩ chiriräpȩ cjo̧ro̧dirȩ. Peaja̧di tjaoëpai̧ ta̧rëri̧ ni̧bä maeadirȩ. Ado o judiro̧ Po̧to quȩmȩ chiriräpȩ cjo̧ro̧dirȩ. Peaja̧di jibëa̧ ma̧ȩ ni̧bädirȩ. Ado o judiro̧, jabechji̧ Achia quȩmȩ chiriräpȩ cjo̧ro̧dirȩ. Peaja̧di o judiro̧ bapë ta̧rërea̧mi̧dëri̧ ni̧bädirȩ.

¹⁰ Ado o judiro̧ Pjirigia quȩmȩ chiriräpȩ cjo̧ro̧dirȩ. Peaja̧di ado cja̧rȩmo̧ ma̧ȩ oa ni̧bädirȩ. Ado o judiro̧ Pa̧pjiria quȩmȩ chiriräpȩ cjo̧ro̧dirȩ. Peaja̧di tjaoëpai̧ ta̧rëri̧ ni̧bädirȩ judiro̧. Ado o judiro̧ Ejitoräpȩ cjo̧ro̧dirȩ. Peaja̧di jibëa̧ ma̧ȩ ni̧bädirȩ. Ado o judiro̧ Iribia quȩmȩräpȩ cjo̧ro̧dirȩ Chirene quȩmȩ bë ma̧ri̧ queri̧räpȩ ju̧ri̧. Peaja̧di tjaoëpai̧ ta̧rëri̧ ni̧bädirȩ. Ado o judiro̧, jabechji̧ Doma quȩmȩ bë ma̧ri̧räpȩ cjo̧ro̧dirȩ. Aja̧, pio judiriborë jana̧dirȩ. Ado judiro̧ peaja̧di tjaoë ma̧ȩ oa ni̧bädirȩ. Jabechji̧ judio pio judiro̧mo̧rȩdë, jabo judiodë pio judiro̧borë jana̧dirȩ, judiorë quëna̧mi̧ quëna̧ji̧ri̧pea̧ji̧ri̧ pio judiro̧. Ji̧ra̧rea̧rȩ davä. Ma̧ȩ ji̧ra̧ tjamo̧ oa ni̧bärea̧rȩ.

^11-12 Ado danȩrȩ, o judiro̧, Queretaräpȩ cjo̧ro̧dirȩ. Ado o judiro̧ Arabia quȩmȩ chiriräpȩ cjo̧ro̧dirȩ. Peaja̧di jibëa̧ ma̧ȩ ni̧bädirȩ. Ado pio ju̧i̧iä jabechji̧ ji̧ra̧ tjamo̧rea̧rȩ. Ma̧ȩ ji̧ra̧ tjamo̧ oa ni̧bärea̧rȩ. Jabo a̧ro̧rȩ ma̧ȩ ji̧ra̧ tjamo̧ oa ni̧bäräbo, jabechji̧ pio yodëro̧jȩ ni̧bä maeadirȩ ibëa̧ ma̧ȩ pio ju̧i̧. Judiro̧ ma̧ȩ oa ni̧bärea̧mi̧dëräbo, a̧ro̧rȩ cjo̧ro̧mȩ chiriräpȩ ni̧bärea̧ ma̧ȩ oa ni̧bärea̧mi̧dëräbo, jabechji̧ ni̧bä maeadirȩ a̧ro̧rȩ ütëborë bapë ta̧rërea̧mi̧ dari̧. Tjamo̧ davä. Ütë tjamo̧ judi a̧dë chjäte chjadëri̧ japea̧ pio ju̧i̧ chjiari ni̧bäji̧ri̧ oa bapë ta̧rë cjia marea̧ro̧jȩrȩ —yo̧ji̧ri̧rȩ ni̧bä chjaorëreji̧ri̧dirȩ jibëa̧ dëbëti̧ra̧ chia iëno̧ iëno̧ ta̧rëji̧ri̧rȩ. Ado jibëa̧ chiriräpȩ ni̧bärea̧ ma̧ȩ oa ni̧bäji̧ri̧ oa ta̧rëa̧ oaiä, ana̧ri̧ jo̧rȩtaji̧ri̧pea̧dirȩ. —'¿Yö̧ta dari̧ japacji̧vadiro̧?, ¿yö̧ta dari̧ ja̧di dari̧ ni̧bäji̧ri̧pea̧cjivadiro̧?' quëna̧ jo̧rȩtaji̧ri̧rȩ ji̧dë ma dëbë iëno̧ iëno̧ ta̧rë cjiarëreji̧ri̧dirȩ.

¹³ Jabo o judiro̧ yu̧i̧rämi̧ cjiarëreji̧ri̧diro̧jȩrȩ. Jabechji̧ judiro̧ tjaoëpai̧ dari̧ ni̧bäji̧ri̧pea̧ pio oaiä, 'Aja, ërü oaiä yu̧i̧ tjamo̧diro̧da' quëna̧ jo̧rȩtaji̧ri̧rȩ airi̧ cjia ya̧rëreji̧ri̧diro̧jȩrȩ.

Pedro judi a̧ra̧ano̧rëremȩdejȩrȩ jachiri jana̧reji̧ri̧ judio pio ji̧ri̧

¹⁴ Ja̧dëa̧ ji̧ Pedro judi, Jechu ja̧ jadü pio ji̧ri̧ nö̧tamȩrȩ cjitërëremȩde pumȩ buba oa ni̧bä chjaopea̧ oa. Ado to̧bari̧ ni̧bämȩrȩ ja̧di ta̧rëri̧ ni̧bä chjaorëremȩdejȩrȩ: —Danȩrȩ ca̧ oti̧, ni̧bä chjaotämi̧ cjiarequededibe judio maea oa —yo̧a̧dejȩrȩ—. Oëra̧ti̧ a̧rȩmȩ chiriri pio judiri jana̧ji̧ri̧ oa, ado Jerucharȩräpȩ cjo̧ro̧ji̧ri̧bo oa ni̧bä chjaotämi̧ cjiarequededibe, mȩnȩro̧ pea daea̧ pio ju̧i̧ chjiari dabadëchea oa.

¹⁵ Danȩrȩ, 'pio jiro pumȩ judiro̧ ërü yu̧i̧ jirodiro̧da' quëna̧ jo̧rȩtarea̧mi̧dëde. Pea uëpea̧diibe do üdë. Jabë yu̧i̧därärea̧mi̧dëde —yo̧a̧dejȩrȩ—.

¹⁶ Tjamo̧ davä. Yu̧i̧dë madirȩ jabo danȩrȩ, judiro̧ japea̧ pio ju̧i̧ chjiari jabërä ni̧bärëremȩde Joel quȩmȩ judi. Tjamo̧ davä. Mȩnȩro̧ pea daea̧ pio ju̧i̧ chjiari, mȩnȩro̧ pea ta̧rëa̧ pio ju̧i̧ chjiari jabërä ni̧bärëremȩde Joel quȩmȩ pio judi, Ütërë ea jana̧ chjadüa̧ oa ni̧bämȩ pio judi. Jabechji̧ Ütë tjamo̧ judi pio jȩaiäpȩmo̧ yürüa̧ ma̧ȩ pio ju̧i̧ ni̧bärëremȩde jabërä, ja̧di ta̧rëri̧ yo̧mȩrȩ:

¹⁷ "'Aja̧, cjiadiärea̧ japamitërä ütara̧ doro, ca̧ Tjo pio ju̧i̧ yürüparequedejȩrȩ quëna̧ji̧ri̧ ütëbo oa judiro̧ ca̧ ma̧ȩ pio ju̧i̧ chjadëri̧ ni̧bäpea̧ oa', yo̧de Ütë tjamo̧ judi. 'Aja̧, na̧ea̧ri ja̧ji̧ri̧ pio ji̧ri̧, oari pio ji̧ri̧, ivi pio ji̧ri̧bo yürüparequedejȩrȩ judiro̧ ni̧bäpea̧ oa, Ütërë ea jana̧ chjadüa̧ pio ju̧i̧ ni̧bäpea̧ oa. Ado ütama̧i̧pea̧ pio ji̧ri̧ darämi̧ cjia tänȩparequedejȩrȩ ca̧ ma̧ȩ oa yürüpea̧ oa. Ado pea üi̧padäräa̧ji̧ri̧ pio ji̧ri̧iäpȩmo̧bo yürüparequedejȩrȩ canȩjäa̧ pio ju̧i̧iä.

¹⁸ Tjamo̧ davä. Pio jiro japamitërä ca̧ mu̧i̧tjoi̧ pio ji̧ri̧ yürüparequedejȩrȩ ca̧ Tjo pio ju̧i̧. Oari pio ji̧ri̧, ivi pio ji̧ri̧ yürüparequedejȩrȩ. Ca̧ ma̧ȩ pio ju̧i̧ chjadëri̧ ni̧bäpea̧ oa yürüparequedejȩrȩ ca̧ Tjo pio ju̧i̧.

¹⁹ Ado pio jiro doro jauëchja cjiari̧ na̧rȩparequedejȩrȩ yo̧de Ütë tjamo̧ judi. A̧dëri pio judiri na̧rȩparequedejȩrȩ daburi pio judiribo. Goera̧ pio ju̧ri̧ra̧ na̧rȩparequedejȩrȩ peaja̧di. Ado cjo̧dëra̧ na̧rȩparequedejȩrȩ peaja̧di, ma̧i̧ dari̧ chjära̧bo.

²⁰ Ado do üdë mo̧ërërea̧ ji̧, tatadëpe bagapade gȩnȩmi̧ dape järea̧mi̧ dari̧. Ado gupënȩ üdë chjadëri̧ tatarërea̧ ji̧, goemi̧ dari̧ ano̧ mire tatapade coëcoëa mape bagari̧. Ja̧di dari̧ na̧rȩparequedejȩrȩ pumȩ ji̧ri̧ Ano̧mȩ judi ma̧na̧pea̧ ji̧ querediä tjamo̧ro. Ado judi ma̧na̧pea̧ do üdë a̧dë chjäte ba chiade.

²¹ Ado danȩrȩ, eami̧ pumȩ üdë pio coaiä cjo̧dërä judi, pio jȩaiäpȩmo̧ cjäri̧ri̧ cjia datä eamȩrȩ cjo̧dërä judi, jabechji̧ chjätärea̧ yürüpareconȩ' yo̧de Ütë tjamo̧ judi." Aja̧ ca̧ oti̧, ja̧di ta̧rëri̧ yo̧mȩrȩ ni̧bärëremȩde Joel judi jënȩ no̧mȩ tjamo̧ri̧ ja̧ ni̧bä chjaorërea̧ ji̧.

²² Ado yaba̧ chjadëri̧ ta̧rëchji̧coe. Jabechji̧ ca̧ oti̧ ji̧ri̧, Icharai pio judiri ja̧ maea oa ni̧bä chjaorequededibe —yo̧a̧dejȩrȩ Pedro judi—. Danȩrȩ, Ütë tjamo̧ pio judi jauëchja cjiari̧ jape chjaorëremȩde Jechu pio ju̧i̧iä, Nachareräpȩ cjo̧ro̧rëremȩ pumȩ pio ju̧i̧iä. Aja̧, dibëa̧ chjarerämȩ pio ju̧i̧iä ana̧ri̧ na̧rȩmȩrȩ jauëchja cjiari̧ jape chjaorëremȩde pio dibë chjadëri̧ na̧rȩpea̧ oa, pio dibë chjadëri̧ daba tänȩpea̧ oa. 'Aja̧, Jechu pio judidida, Ütë tjamo̧ judi mitëa̧ pio judidida, Ütë tjamo̧ judi chjadüa̧ pio judi tjamo̧dida' quëna̧rea̧mi̧ dari̧ ana̧ri̧ na̧rȩa̧didibe davä ütëbo ja̧ dachoro.

²³ Jabo danȩrȩ, pio jiro Jechu pio judi yürüa̧ oa cjiarëremȩde ja̧bo tänȩa̧ oa cjiapea̧ oa. Ütë tjamo̧ pio judi pearä judirä ütarë jo̧rȩtarërea̧mi̧ yürüa̧ oa cjiarëremȩde toro cji̧de ja̧bo tänȩa̧ oa cjiapea̧ oa chjai̧dëri̧ japaji̧ri̧ pio ji̧ri̧iä. Ado pio mȩnȩro̧nȩrȩ ji̧dëri̧ judiodë pio ji̧ri̧iä toro cji̧de ja̧bo tänȩrëreji̧ri̧ judiro̧.

²⁴ Jabo danȩrȩ, Ütë tjamo̧ judi bëdü tänȩrëremȩdejȩ —yo̧a̧dejȩrȩ Pedro judi—. Jabechji̧ ja̧boa̧ chja̧oeri pio judiri go̧dü tänȩrëremȩdejȩ ado chjereno̧ ja̧borea̧mi̧dëri̧. Jabechji̧ ja̧borea̧ üdë boë jädärärea̧mi̧dëri̧ bëdü tänȩa̧dejȩ jare chjadüa̧ oa cjiami̧ dari̧ —yo̧a̧dejȩrȩ.—

²⁵ Ado Davirea̧ pio judi no̧mȩ tjamo̧ri ja̧ go̧ȩparërea̧ ji̧, Icharai pio judiri ja̧ji̧ri̧ pio ji̧ri̧ ja̧ ütërëremȩ pio judi go̧ȩparërea̧ ji̧, peaja̧di bëdüa̧mȩ pio ju̧i̧ chjiari jabërä go̧ȩparëremȩde Jechu pio ju̧i̧ chjiari. Tjamo̧ davä. Jechu judi jibëa̧ Ama̧i̧ pio ju̧i̧ chjiari yo̧bëmi̧, judi jibëa̧ Ama̧i̧ pio ju̧i̧iäpȩmo̧ yo̧bëmi̧ go̧ȩparëremȩde jabërä. Ta̧rëchji̧vä: "Aja̧, ji̧dë ma dae chjaoreconȩ ca̧ Ano̧mȩ oa, ca̧ yuroropȩmȩ oa. A̧dë baärea̧ decjiari̧ ëba cjia maeadique. Ado pio ju̧i̧iä uapadëmȩrȩ cjo̧ro̧requede.

²⁶ Pio ju̧i̧iä a̧dë chjäte ma̧ chiadëri̧ cjiari̧ jo̧rȩtarequede ca̧ chji̧ra̧. Pio ju̧i̧iä ma̧ chiadëri̧ cjiamȩrȩ ni̧bä chjaorequede. Jabechji̧ ja̧borea̧ chiamȩborë jidatarea̧ chiamȩrȩ cjo̧ro̧requede.

²⁷ Ado ja̧di ta̧rëri̧ yo̧mȩrȩ yo̧reconȩ ca̧ Ama̧i̧ Ütë pio ju̧i̧: 'Aja̧, pjatë puëräpȩmȩ oa ano̧dëparenȩque ca̧ tjo oa, ado ca̧ icjara oa peaja̧di pjatë puëräpȩ ju̧ri̧ ano̧dëparenȩque' yo̧reconȩ. 'Ado peaja̧di ca̧ icjara oa, na̧ mu̧i̧tjoi̧ tatachjamȩ ja̧ icjara oa peaja̧di tapuchjape baga tänȩdëparenȩjo̧ȩ' yo̧reconȩ ca̧ Ütë oa.

²⁸ 'Jabechji̧ cüdë goae tarari̧ cjo̧ro̧rea̧ dapea̧ oa chjadëri̧ daba tänȩa̧renȩque, cüdë bucho ana̧ cjo̧ro̧rea̧ dapea̧ oa. Jabechji̧ mȩnȩ pio coadimȩ tara, ma̧ chiadëri̧ cjiari̧ jo̧rȩtamȩrȩ cjo̧ro̧requede pio mȩnȩ tänȩa̧ oa' yo̧mȩrȩ yo̧reconȩ ca̧ Ütë oa." Aja̧, ja̧di ta̧rëri̧ go̧ȩparëremȩde Davirea̧ pio judi Jechu judi jibëa̧ Ama̧i̧ pio ju̧i̧iäpȩmo̧ yo̧bëmi̧ —yo̧mȩrȩ ni̧bä chjaorëremȩdejȩrȩ pumȩ ji̧ri̧ Pedro judi.

²⁹ Ado Pedro judi cjiadiädëmȩrȩ ja̧di ta̧rëri̧ a̧de ni̧bä chjaorëremȩdejȩrȩ: —Danȩrȩ ca̧ oti̧, tjamo̧ri̧ dabamȩrȩ yo̧requededibe ibëa̧ taru Davi pio ju̧i̧ chjiari —yo̧a̧dejȩrȩ—. Danȩrȩ, ja̧borëremȩde. Ado na̧ra̧ oa cjiarëremȩde peaja̧di. Jabechji̧ pio yaba̧mi̧rä irä darea̧ro̧jo̧ȩ pio ju̧i̧ ja̧ icjararemȩ oa na̧ra̧rërea̧ puëräpȩ —yo̧a̧dejȩrȩ—.

^30-31 Ja̧di tara tjamo̧ri̧ dabarea̧rȩ. Jabechji̧ Davi judi no̧mȩ tjamo̧ri ja̧ go̧ȩparërea̧ ji̧, pio jȩa chjiari go̧ȩpadërëremȩde. Danȩrȩ ca̧ oti̧, Davi judi Ütërë ea jana̧ chjadüa̧ oa ni̧bämȩrȩ cjo̧ro̧rërea̧ oaiä, jabërä Chjätä Tänȩmȩ pio ju̧i̧ chjiari go̧ȩparëremȩde, judiri ja̧mȩ pio ju̧i̧ chjiari. Pio ju̧i̧iä Chjätä Tänȩmȩ pio judi yo̧bëmi̧ go̧ȩparëremȩde jabërä. Ado Ütë tjamo̧ judi ma̧ȩ yürë cji̧därërea̧ oaiä, Davi pio judiri ja̧mȩ pio ju̧i̧ chjiari ano̧ mire jo̧rȩtarea̧ decjiari̧ ma̧ȩ yürë cji̧därërea̧ oaiä, jabechji̧ jabërä dabarëremȩde Chjäta tänȩmȩ pio ju̧i̧ chjiari. 'Aja̧, pio cüdë ütëmȩrȩ cjo̧ro̧rërea̧ ji̧, ca̧ea̧ri ja̧mȩ pio judi ano̧ mire ütëpadida' quëna̧ dabarëremȩde Davi judi jabërä Ütërë pio jȩaiäpȩmo̧ ea jana̧ chjadüa̧ pio ju̧i̧iä. Jabërä dabarëremȩde Chjätä Tänȩmȩ judi ja̧boa̧remȩrȩ bëdüpea̧ pio ju̧i̧ chjiari. Ado pio ju̧i̧iä jënȩ no̧mȩ go̧ȩparërea̧ ji̧, jabechji̧ pjatë puëräpȩ ju̧ri̧ ano̧dëpea̧ pio ju̧i̧ chjiari go̧ȩparëremȩde. Ju̧i̧ ja̧ icjara üdë tapuchjapadëpea̧ pio ju̧i̧ chjiari go̧ȩparëremȩde. Ado judi go̧ȩparërea̧ üdë, jabechji̧ tjamo̧ri̧ cjiari̧ go̧ȩpea̧ oa cjiade —yo̧a̧dejȩrȩ—.

³² Danȩrȩ ca̧ oti̧, pio jiro Jechu pio ju̧i̧ bëdü tänȩrëremȩdejȩ Ütë tjamo̧ judi. Ado pio a̧ro̧rȩ irä daea̧rea̧ro̧jo̧ȩ bëdüa̧mȩ pio ju̧i̧.

³³ Pio ju̧i̧iä ba chia tjamo̧parȩmi̧ dari̧ japarëremȩdejȩ Ütë tjamo̧ judi ba chiati̧ tjamo̧räpȩ cha tänȩa̧ oaiä, pio ju̧i̧ ja̧ mu̧i̧ chjuari pio judiri cha tänȩa̧ oaiä. Jabechji̧ bëdüa̧mȩ pio ju̧i̧ a̧dëräpȩ yuro cjitë tänȩrëremȩdejȩ Jäjäa pio ju̧i̧ ja̧ cotoräpȩ cha tänȩpea̧ oa. Ado ja̧dëa ji̧ Ama̧i̧ tjamo̧ judi Joja pio ju̧i̧iäpȩmo̧ yürürëremȩdejȩ Tjo tjamo̧ ju̧i̧, jënȩ yo̧ë cji̧därërea̧mi̧. Ado ja̧dëa ji̧ pio ibëiäpȩmo̧ ano̧ mire yürü chjadüa̧diibe yaba̧. Aja̧, Tjo tjamo̧ pio ju̧i̧ yürü chjadüa̧diibe, pio judirimȩ marë. Ado pio ju̧i̧iä tjaoëpai̧ dari̧ ni̧bäji̧ri̧ oa darenȩro̧ibe ca̧ oti̧. Tjamo̧ davä. Tjo tjamo̧ pio ju̧i̧iä oëra̧ti̧ a̧rȩmȩ chirirä ni̧bärea̧ ma̧ȩ oa ni̧bäji̧ri̧ oa ta̧rërenȩro̧ibe —yo̧a̧dejȩrȩ—.

³⁴ Danȩrȩ ca̧ oti̧, Davirea̧ judi a̧dëräpȩ yuro icjarabo cjitëdërëremȩde, jabo cjitërëremȩ pio ju̧i̧ chjiari, jabërä ni̧bärëremȩde. Aja̧ icjarabo cjitërëremȩ pio ju̧i̧ chjiari, Chjätä Tänȩmȩ pio ju̧i̧ chjiari jabërä ni̧bärëremȩde ja̧di ta̧rëri̧ yo̧mȩrȩ: "Aja̧, ja̧di ta̧rëri̧ yo̧rëremȩdejȩ ca̧ Ano̧mȩ ju̧i̧ Ütë tjamo̧ judi: 'Pio yi chavä. Ca̧ mu̧i̧ chjua cotoro chavä ba chia tjamo̧räpȩ' yo̧a̧dejȩ.

³⁵ 'Pio yi chavä cüdë mȩa eadëji̧ri̧ pio ji̧ri̧ boadäräa̧rä yuro' yo̧mȩrȩ yo̧a̧dejȩ." Aja̧ ca̧ oti̧, ja̧di ta̧rëri̧ yo̧mȩrȩ go̧ȩparëremȩde Ama̧i̧ tjamo̧ judi Joja oa yo̧a̧ pio ju̧i̧ chjiari —yo̧mȩrȩ yo̧a̧dejȩrȩ Pedro judi judio pio ji̧ri̧iäpȩmo̧.

³⁶ —Pio ju̧i̧iä ni̧bä chjaorequededibe ca̧ oti̧, Icharai pio judiri ja̧ji̧ri̧ pio dibëiäpȩmo̧ —yo̧a̧dejȩrȩ—. Danȩrȩ, mȩnȩro̧ ütëbodärärë coëma cjiari̧ dabapapea̧ chianȩrȩ Jechu pio ju̧i̧ chjiari. Jabechji̧ Ütë tjamo̧ judi mitëa̧ pio judide. Jabo mȩnȩro̧ ma̧i̧ dari̧ japea̧renȩrȩ jabo. Ütë tjamo̧ judi mitëa̧ pio ju̧i̧ toro cji̧de ja̧bo tänȩrëreji̧ri̧renȩro̧jo̧ȩ. Jabo danȩrȩ, mȩnȩro̧ ja̧bo tänȩa̧ pio ju̧i̧ Ano̧mȩ tjamo̧ tänȩrëremȩdejȩ Ütë tjamo̧ judi. Ado Chjätä Tänȩmȩ tänȩrëremȩdejȩ peaja̧di —yo̧mȩrȩ ni̧bä chjaorëremȩdejȩrȩ Pedro judi.

³⁷ Ado a̧dopë cjiaji̧ri̧ pio judiro̧ pio jiro ma̧ȩ oa ta̧rëa̧ oaiä, a̧dë chjäte gitoi̧ dari̧ jo̧rȩtaji̧ri̧pea̧dirȩ. Ado chachami̧ tarari̧ jo̧rȩtaji̧ri̧rȩ iëno̧ë ta̧rëa̧diro̧jo̧ȩ Pedro ju̧i̧, ju̧i̧ ja̧ jadü pio ji̧ri̧bo. —Jabo danȩrȩ ibëa̧ oti̧, chjadëri̧ yo̧ibe. ¿Tjana̧ japatäreji̧ri̧rea̧rȩ yaba̧? —yo̧ji̧ri̧rȩ iëno̧ë ta̧rëa̧diro̧jȩrȩ.

³⁸ Ado Pedro judi dëbë yo̧mȩrȩ dëbë yo̧a̧dejȩrȩ: —Tjana̧ japadë, jabechji̧ a̧no̧ mire jo̧rȩtachji̧vä mȩnȩro̧ ütëbodärärë —yo̧a̧dejȩrȩ—. Go̧e cjaeä chuda̧ oa cjiachji̧vä Jechu Quiricho pio ju̧i̧ ja̧ quȩrä. Pio ju̧i̧iämo̧i̧ duridëparȩrea̧mi̧ dade. Pio ju̧i̧iämo̧i̧ duridëparȩpai̧ dadejȩ Ütë tjamo̧ judi mȩnȩro̧ chjai̧dëri̧ japea̧ pio ju̧i̧. Ado duridëparȩa̧ oa cjiaji̧ri̧ oa yürüpadidibe Tjo tjamo̧ pio ju̧i̧ —yo̧a̧dejȩrȩ—.

³⁹ Jabechji̧ Ütë tjamo̧ judi yo̧ë cji̧därërea̧mi̧ yürüpadidibe Tjo tjamo̧ pio ju̧i̧, dibëa̧ bori̧ pio ji̧ri̧iäpȩmo̧bo. Ado chiriräpȩti̧ oa cjo̧ro̧ji̧ri̧ pumȩ pio ji̧ri̧iäpȩmo̧bo yürüpadejȩrȩ, ibëa̧ Ano̧mȩ pio judi mitëa̧ pumȩ pio ji̧ri̧iäpȩmo̧ —yo̧mȩrȩ ni̧bä chjaorëremȩdejȩrȩ Pedro judi.

⁴⁰ Pio ju̧i̧mo̧i̧ ma̧ȩ oa ni̧bä chjaodëa̧dejȩrȩ Pedro judi, jabo ma̧ȩ ji̧ra̧ tjamo̧ oa ni̧bä chjaorëremȩdejȩrȩ pio ji̧ri̧ ana̧ tjamo̧ri̧ jo̧rȩta tänȩpea̧ oa. Ja̧dëa ji̧ japamitë chjätä ëte, to̧bari̧ chi̧dëeamȩrȩ a̧de yo̧rëremȩdejȩrȩ, ja̧di ta̧rëri̧ yo̧mȩrȩ: —Danȩrȩ ca̧ pumȩ, a̧dë jo̧rȩtachji̧jȩrȩ dibëa̧ pumȩ ji̧ri̧, jabë oëra̧ quëna̧ji̧ri̧ pio ji̧ri̧. Jabechji̧ chjai̧dëri̧ jape chjaoji̧ri̧ pio ji̧ri̧ a̧dë quëna̧chji̧jȩrȩ pio mȩnȩro̧borë cjo̧dë tja ana̧räpȩ bucho ana̧ gitoi̧ dari̧ aeno̧a̧ oa cjiachea oa —yo̧a̧dejȩrȩ.

⁴¹ Ado Pedro judi pio jiro doro a̧ra̧ano̧a̧ oaiä, no̧i̧dërë quëna̧ji̧ri̧pea̧dirȩ goëje ji̧ra̧ tjamo̧pe järea̧mi̧ dari̧. Jabechji̧ 3 mil pumȩ quëna̧ji̧ri̧pea̧dirȩ quëna̧dërërea̧ ji̧. Ado judiro̧ ütëborë chjaodëri̧ go̧e cjaeä chuda̧ oa cjiadiärëreji̧ri̧dirȩ.

⁴² Ado järi tjamo̧ji̧ri̧pea̧dirȩ Jechurë chjadüa̧ pio ji̧ri̧iä chjadëri̧ dabapapea̧ oa. Ado ori̧ bagari̧ ëba cjiapea̧ oa, ji̧dë ma a̧dope chjaorëreji̧ri̧dirȩ quëna̧ji̧ri̧ pio ji̧ri̧ nö̧ta. Ado judiro̧ babui̧ra̧ chja̧pe oa mu̧i̧ quirë ëte jurarëreji̧ri̧diro̧jo̧ȩ Jechu pio ju̧i̧ jo̧rȩtaji̧ri̧rȩ. Ado ji̧dë ma ni̧bärëreji̧ri̧diro̧jo̧ȩ Ütë tjamo̧ ju̧i̧. Ja̧di dari̧ japarëreji̧ri̧dirȩ pea quëna̧ji̧ri̧ pio judiro̧.

Ja̧di dari̧ cjo̧ro̧rëreji̧ri̧dirȩ quëna̧ji̧ri̧ judiro̧

⁴³ Ado Ütë tjamo̧ judi Jechurë chjadüa̧ pio ji̧ri̧iä jauëchja cjiari̧ jape chjaorëremȩde. Ado pumȩ judiro̧ pio ju̧i̧ daea̧ oaiä, jabechji̧ ütëborë ana̧ri̧ jo̧rȩtaji̧ri̧pea̧dirȩ, ya yabë cjiaji̧ri̧rȩ, dacho bëremi̧ cjiaji̧ri̧rȩ.

⁴⁴ Ado Jechu ju̧i̧ quëna̧ji̧ri̧ judiro̧, jabechji̧ cja̧rȩmȩ coëma jo̧rȩtaji̧ri̧rȩ a̧dope chjaorëreji̧ri̧dirȩ ori̧ bagari̧ ëba cjiaji̧ri̧rȩ. Ado ji̧mo̧ ma goarëreji̧ri̧dirȩ jibëa̧ oa chjarapë yürüpea̧ oa. Ado eami̧ quëna̧mȩ judi cjäri̧ ja̧boa̧rä judi, jabechji̧ yürütämi̧ cjiaji̧ri̧ pio judiro̧ yürürëreji̧ri̧diro̧jo̧ȩ. Aja̧ ja̧di maeari̧ jape chjaorëreji̧ri̧dirȩ jibëa̧ dëbëti̧ra̧ chia.

⁴⁵ Ado o judiro̧, gatë tänȩrea̧ taraji̧ri̧ pio judiro̧, jabechji̧ jibëa̧ pio ju̧i̧ gatë tänȩrëreji̧ri̧diro̧jo̧ȩ chëre oa mitëpea̧ oa, cjäri̧ ja̧boji̧ri̧ pio ji̧ri̧ chjadëri̧ a̧dopea̧ oa. Ado chiri gatëa̧ oa goaji̧ri̧ pio judiro̧ peaja̧di gatë tänȩrëreji̧ri̧diro̧jo̧ȩ. Dami̧ti̧ oa gatë tänȩa̧diro̧jo̧ȩ. Ado pio jiro chërera̧ pio ju̧ri̧ra̧, jabechji̧ a̧dorëreji̧ri̧diro̧jȩrȩ tjamo̧ cjäri̧ ja̧boji̧ri̧ pio ji̧ri̧. Ja̧di dari̧ japarëreji̧ri̧dirȩ jibëa̧ pumȩ pio ji̧ri̧ chjadëri̧ a̧dopea̧ oa.

⁴⁶ Ado doti̧mi̧ a̧dope chjaorëreji̧ri̧dirȩ cja̧rȩmȩ codërë Ütë tjamo̧ ja̧ bëräpȩ. Peaja̧di ano̧ mire a̧dope chjaorëreji̧ri̧dirȩ ado cja̧rȩmo̧ quëna̧mȩ ja̧ bëräpȩ ji̧mo̧ ëba jurapea̧ oa. Ma̧ chiadëri̧ cjia tjamo̧ji̧ri̧rȩ ëba jurarëreji̧ri̧diro̧jȩrȩ ëba juratämi̧ cjiaji̧ri̧rȩ.

⁴⁷ Ado Ütë tjamo̧ pio ju̧i̧iäpȩmo̧ chjacjiamȩri̧ cjiari̧ jo̧rȩtariä ni̧bä chjaorëreji̧ri̧diro̧jo̧ȩ peaja̧di. Ado Jerucharȩräpȩ cjo̧ro̧ji̧ri̧ pio judiro̧, 'Aja̧, chjadë maeadiro̧da, ba chiadiro̧da' quëna̧ jo̧rȩtarëreji̧ri̧dirȩ quëna̧ji̧ri̧ pio ji̧ri̧ chjiari. Ado Ano̧mȩ judi tänȩa̧ oaiä, jabechji̧ doti̧mi̧ pumȩ no̧i̧dërë a̧de quëna̧ji̧ri̧pea̧dirȩ quëna̧dërërea̧ ji̧. Chjätärea̧ darëreji̧ri̧dirȩ. Ado judiro̧ ji̧mo̧ a̧de a̧doparëreji̧ri̧dirȩ goëje ji̧ra̧ tjamo̧pe järi̧.