Japarea̧ 19 - Biblia Pume

Pablo judi goëde järëremȩdejȩrȩ Epjechoräpȩ quëna̧ji̧ri̧ pio ji̧ri̧

¹ Ado Aporo judi Cori̧tioräpȩ cjiadiäa̧ nö̧ta, Pablo pio judi järëremȩde Epjechoräpȩ. Ado chiri maea oa chjätä ëte, go̧düdärärëremȩde. Ado ju̧ri̧pȩ dëbëdiäa̧dejȩrȩ quëna̧ji̧ri̧ pio ji̧ri̧.

² Ado iëno̧ë ta̧rëa̧dejȩrȩ: —Danȩrȩ, mȩnȩro̧ quëna̧ji̧ri̧pea̧rä, ¿Tjo tjamo̧ pio judi dibëa̧ icjararä bëpadëa̧de? —iëno̧ë ta̧rëa̧dejȩrȩ. Jabo dëbë yo̧ji̧ri̧rȩ yo̧a̧diro̧jo̧ȩ: —Dabadërea̧rȩ —yo̧a̧diro̧jo̧ȩ—. A̧ro̧rȩ Tjo tjamo̧ pio ju̧i̧ chjiari dabadë marea̧rȩ —dëbë yo̧a̧diro̧jo̧ȩ.

³ Ja̧dëa ji̧ Pablo judi iëno̧ë ta̧rëa̧dejȩrȩ go̧e cjaeä chudapea̧ pio ju̧i̧ chjiari: —Jabo danȩrȩ, mȩnȩro̧ uirä go̧e cjaeä chuda̧ oa cjiarërea̧ ji̧, ¿tjana̧ ju̧i̧ chjiari na̧rȩrëremȩde? Ado dëbë yo̧a̧diro̧jo̧ȩ: —Tjana̧ ju̧i̧ chjiaridë, jabechji̧ Juan judi a̧ra̧ano̧rërea̧ pio ju̧i̧ chjiari na̧rȩrëremȩde. Juan judi a̧ra̧ano̧rërea̧ pio ju̧i̧ quëna̧rëreji̧ri̧rea̧rȩ. Pio ju̧i̧ ja̧ ma̧ȩ oa ta̧rë ëte, uirä chuda̧ oa cjiadiärëreji̧ri̧rea̧rȩ —yo̧a̧diro̧jo̧ȩ.

⁴ Ja̧dëa ji̧ Pablo judi yo̧a̧dejȩrȩ: —Danȩrȩ, Juan judi go̧e cjaeä chudarërea̧ ji̧, pumȩ judiro̧ chjai̧dëri̧ japea̧ pio ju̧i̧ chjiari chjere jo̧rȩtaji̧ri̧ oa chudarëremȩdejȩrȩ. 'Aja̧, chjai̧dë oa japamȩrȩ dopaquëda, chjai̧dë oa japadëtäremȩquëda, chjai̧dë pio ju̧i̧ putu jura̧ a̧dë chami̧ dari̧ cjo̧ro̧täremȩquëda' quëna̧ji̧ri̧ oa chudarëremȩdejȩrȩ. Ado jibëa̧ duri oa ma̧na̧pamȩ pio ju̧i̧ chjiaribo ni̧bä chjaorëremȩdejȩrȩ, Jechu pio ju̧i̧ chjiari. Pio ju̧i̧iäpȩmo̧ quëna̧tä yo̧mȩrȩ ni̧bä chjaorëremȩdejȩrȩ Juan üdë —yo̧a̧dejȩrȩ.

⁵ Ado pio ju̧i̧ ta̧rërërea̧ oaiä, chjaodëri̧ go̧e cjaeä chuda̧ oa cjiadiärëreji̧ri̧dirȩ Ano̧mȩ Jechu pio ju̧i̧ ja̧ quȩrä.

⁶ Ado Pablo judi jibëa̧ ichira̧ idarërea̧ ji̧, chjaodëri̧ bëpera̧pea̧dejȩrȩ Tjo tjamo̧ judi. Ado judiro̧ dabapadëa̧ ma̧ȩ oa ni̧bäji̧ri̧pea̧dirȩ. Aja̧, Tjo tjamo̧ pio judi tjaoëpai̧ dari̧ ni̧bärea̧ yürürëremȩdejȩrȩ. Ado Ütë tjamo̧ judi pio jibëiäpȩmo̧ ea jana̧ chjadüa̧ oaiä, jabechji̧ ni̧bä chjaoji̧ri̧pea̧dirȩ Ütë ja̧ ma̧ȩ oa.

⁷ Ado pio jiro oari judiro̧, 12rëreji̧ri̧dirȩ.

⁸ Ado Pablo judi Epjechoräpȩ cjo̧ro̧mȩrȩ jädiärëremȩde judiorë a̧doparea̧ bëräpȩ pumȩ pio ji̧ri̧ dabapa tänȩpea̧ oa. Ütërë yo̧a̧ chja̧oerä cjo̧ro̧pea̧ pio ju̧i̧ chjiari ni̧bä chjaorëremȩdejȩrȩ, uapadëmȩrȩ. Judi nö̧tarä yuro ana̧ri̧ ni̧bä chjaorëremȩdejȩrȩ, pio jȩaiäpȩmo̧ dëbë ni̧bä chjaorea̧mi̧ dari̧. 'A̧ja̧, Pablo judi coëma cjiari̧ yo̧diibëda, tjamo̧ri̧ ni̧bä chjaodiibëda, jiadarea̧mi̧dëri̧ a̧ra̧ano̧diibëda' quëna̧pea̧ oa ni̧bä chjaorëremȩdejȩrȩ tjarari̧ gupënȩ nö̧ta. Ado o judiro̧, dëdë, quëna̧ji̧ri̧pea̧dirȩ.

⁹ Jabo o judiro̧ ta̧ra̧ puë chiadëti̧rȩ chjuari̧ jiadarëreji̧ri̧dirȩ. Quëna̧dëri̧ cjiarëreji̧ri̧dirȩ. Ado pio ju̧i̧iä Pablo judi a̧ra̧ano̧a̧ pio ju̧i̧ chjiari ma̧ȩ oa chjai̧dëti̧ra̧ ni̧bärëreji̧ri̧diro̧jo̧ȩ. 'Jabo cjäri̧ madida, "Jechu judi Ütë tjamo̧ ju̧i̧iäpȩmo̧ baärea̧ no̧mi̧ dade" yo̧mȩ ma̧ȩ üdë badëdida, chjai̧dëdida' quëna̧ jo̧rȩtaji̧ri̧rȩ ma̧ȩ chjai̧dëti̧ra̧ ni̧bärëreji̧ri̧diro̧jo̧ȩ. Pio ju̧i̧iä Pablo judi a̧doparea̧ bëri pio judiri go̧dürëremȩde. Quëna̧ji̧ri̧pea̧ pio ji̧ri̧ nö̧ta go̧düa̧de. Ado Tirano quȩmȩ pio ju̧i̧ ja̧ bëräpȩ ano̧ mire a̧dopaji̧ri̧pea̧dirȩ, jo̧ tjo ana̧ tjamo̧räpȩ. Ado ju̧ri̧pȩ Pablo judi doti̧mi̧ ni̧bä chjaorëremȩdejȩrȩ pio jȩaiäpȩmo̧ dëbë ni̧bä chjaorea̧mi̧ dari̧.

¹⁰ Aja̧, yo̧a̧ri̧ ui codë nö̧ta ja̧di dari̧ japariärëremȩde. Pio ju̧i̧iä Achia quȩmȩ chiriräpȩ cjo̧ro̧ji̧ri̧ judiro̧ ütëborë ta̧rëji̧ri̧pea̧ maeadirȩ Ano̧mȩ Jechu pio ju̧i̧ chjiari ma̧ȩ oa. Judio judiro̧, judiodë pio judiro̧borë goëje ta̧rëji̧ri̧pea̧ marëreji̧ri̧dirȩ.

¹¹ Ado Ütë tjamo̧ judi, ana̧ri̧ ja̧bepamȩrȩ jauëchja cjiari̧ na̧rȩ chjaorëremȩde Pablo pio ju̧i̧iä.

¹² Ado pio ju̧i̧iä pumȩ judiro̧ chjapea̧ oa cjo̧ro̧rëreji̧ri̧dirȩ. Jabechji̧ Pablo ja̧ chjibo oa gito ja̧boji̧ri̧ pio ji̧ri̧iäpȩ a̧depea̧ oaiäbo chjapea̧ oa cjo̧ro̧rëreji̧ri̧dirȩ gito ja̧boreji̧ri̧ judiro̧. Ado yaröca chiaji̧ri̧ pio judiro̧ peaja̧di chjapea̧ oa cjo̧ro̧rëreji̧ri̧dirȩ.

Yaröca judiro̧ jabomo̧ chjaocjiami̧ dari̧ japaji̧ri̧ pio ji̧ri̧ ma̧i̧ dari̧ conȩda̧ oaiä, ji̧dë u̧i̧ ba chia jo̧rȩtaji̧ri̧pea̧diro̧jo̧ȩ Jechu ja̧ quȩ oa Epjechoräpȩ cjo̧ro̧ji̧ri̧ judiro̧

^13-14 Judio judiro̧ orë chjätäti̧ cjiaji̧ri̧rȩ chjaparȩtarëreji̧ri̧diro̧jȩrȩ yaröca chiaji̧ri̧ pio ji̧ri̧. Aja̧, to̧parea̧ ma̧ȩ pio ju̧i̧iä, ma̧ȩ jauëchja pio ju̧i̧iä baä tänȩtarëreji̧ri̧diro̧jȩrȩ yaröca pio ji̧ri̧. Ado judiro̧ Epjechoräpȩ go̧düdäräa̧rä, Pablo judi Jechu pio ju̧i̧ ja̧ quȩrä japamȩ oa daea̧rä, peaja̧di baätä jape cjiatarëreji̧ri̧diro̧jȩrȩ yaröca pio ji̧ri̧ Ano̧mȩ Jechu pio ju̧i̧ ja̧ quȩrä. Aja̧, Pablo pio judi japea̧mi̧ japatarëreji̧ri̧dirȩ Equeva quȩmȩ pio ju̧i̧ ja̧ u̧ri̧ judiro̧. Ado Equeva judi, ¿chjiade? Chjiadë, jabechji̧ judiorëremȩde. Ütë tjamo̧ ja̧ bëräpȩ tjamo̧ goë tuti ja̧bepamȩrȩ cjo̧ro̧rëremȩde. Ado pio ju̧i̧ ja̧ u̧ri̧ pio judiro̧rëreji̧ri̧dirȩ Pablo pio judi japea̧mi̧ japatarëreji̧ri̧ judiro̧. Aja̧, 7rëreji̧ri̧dirȩ. Ado chjaparȩtatämi̧ cjiaji̧ri̧rȩ ja̧di ta̧rëri̧ yo̧rëreji̧ri̧diro̧jȩrȩ yaröca pio ji̧ri̧iäpȩmo̧: —Danȩrȩ, Jechu pio ju̧i̧ ja̧ quȩ oaiä, Pablo judi a̧ra̧ano̧a̧ pio jiro quȩ oaiä baätä yo̧tarea̧ro̧dibe —yo̧tea̧diro̧jȩrȩ.

¹⁵ Aja̧, Equeva ja̧ u̧ri̧ judiro̧ ja̧di dari̧ japatea̧ ji̧, yaröca üdë dëbë järimȩrȩ ira̧diä yo̧a̧dejȩrȩ: —¿Jabo chjianȩrȩ mȩnȩro̧? Jechu pio ju̧i̧ dabareconȩ. Ado Pablo pio ju̧i̧bo dabareconȩ. Jabo mȩnȩro̧, ¿chjiacjivanȩrȩ mȩnȩro̧?

¹⁶ Ado ja̧di ta̧rëri̧ iëno̧ë ta̧rë ëte, yaröca chiamȩ üdë to̧bari̧ acji bagureno̧a̧dejȩrȩ dëbëparea̧ decjiari̧. Chjaodëri̧ boadäräa̧dejȩrȩ ütëbodärä oa, goae tarari̧ bide cjaeä chjaomȩrȩ, idë cürëmȩrȩ. Jibëa̧ chjiboremȩ pio ju̧i̧ baë mu̧i̧ quira̧dejȩ. Ado yaröca chiamȩ pio ju̧i̧ ja̧ bëri pio judiri go̧dütaji̧ri̧rȩ a̧dë dureno̧a̧diro̧jo̧ȩ goe chia maearë, co chia maearë. Aja̧, i maeaji̧ri̧rȩ a̧dë bagurëno̧a̧diro̧jo̧ȩ, a a ma cjiaji̧ri̧rȩ.

¹⁷ Ado Epjechoräpȩ cjo̧ro̧ji̧ri̧ judio judiro̧ pio ju̧i̧ chjiari goë goë ta̧rëa̧ oaiä, uapa tjamo̧pe bagarëreji̧ri̧dirȩ, judiodë pio judiro̧borë. Ado ji̧dë u̧i̧ ba chia jo̧rȩtaji̧ri̧pea̧diro̧jo̧ȩ Jechu pio ju̧i̧.

¹⁸ Ado quëna̧ji̧ri̧pe bagareji̧ri̧ judiro̧ no̧i̧dërë goadirërea̧ ji̧, judiro̧ chjai̧dëri̧ japea̧ pio ju̧i̧ goadirërea̧ ji̧, jabechji̧ ütëborë ta̧rëri̧ ni̧bä chjaoji̧ri̧pea̧dirȩ goadirea̧ decjiari̧.

¹⁹ Ado goadidëji̧ri̧pea̧ pio judiro̧ orë, to̧ je go̧a̧rëreji̧ri̧ pio judiro̧ ma̧ȩ chiamȩ go̧ȩ i oa, to̧parea̧ ma̧ȩ chiamȩ go̧ȩ i oa cäarëreji̧ri̧diro̧jo̧ȩ, ütëborë dari̧. Tjamo̧ davä. Jauëchja cjiari̧ japarea̧ ma̧ȩ chiamȩ go̧ȩ i oa cäa̧diro̧jo̧ȩ jiro decjiape bagari̧. Ado daeearea̧ chiamȩ go̧ȩ i oa, chjere chjadürea̧ ma̧ȩ chiamȩ go̧ȩ i oa cäa̧diro̧jo̧ȩ peaja̧di, yo̧ to̧parea̧ chiamȩ go̧ȩ ibo. Jabechji̧ ütëborë dari̧ cäa maeadiro̧jo̧ȩ go̧ȩ i ba chia tjamo̧ oa. Jabechji̧ judiro̧ cäarërea̧ go̧ȩ i chjö̧na̧i̧ oa gatë tänȩa̧rä judi, chëre ji̧ra̧ tjamo̧ oa boa̧täreji̧ri̧dirȩ. Aja̧, 50 mil chëre mitëa̧täreji̧ri̧dirȩ judiro̧ chjö̧na̧i̧ oa gatë tänȩa̧rä judi. Jabo cjäri̧ madiro̧jo̧ȩ, gatë tänȩdëa̧diro̧jo̧ȩ jabo cäa̧ maeadiro̧jo̧ȩ. Aja̧, ba chia tjamo̧räbo cäa maeadiro̧jo̧ȩ.

²⁰ Ado pio ju̧i̧iä Ano̧mȩ ja̧ ma̧ȩ üdë ji̧dë u̧i̧ jachiti̧ oa chuchjupechä baärëremȩde oëra̧ti̧ oa. Ado no̧i̧dë tjamo̧rȩ quëna̧ji̧ri̧pea̧dirȩ tjaoëpai̧ da tjamo̧ri̧ cjo̧ro̧rea̧mi̧ dari̧.

²¹ Ja̧dëa ji̧ Pablo judi Epjechoräpȩ yo̧a̧ri̧ ui nö̧ta cjo̧ro̧ ëte, jabechji̧ Tjo tjamo̧ pio judi tara tänȩa̧mi̧ jo̧rȩtamȩpea̧de. 'Aja̧, Jerucharȩräpȩ baätäremȩquëda, jabo Machedoniaräpȩ quëna̧ji̧ri̧ pio ji̧ri̧ dariä baätäremȩquiji̧ri̧da, Acayaräpȩ quëna̧ji̧ri̧ pio ji̧ri̧bo dariä baätäremȩquiji̧ri̧da, ado Jerucharȩräpȩ go̧düdärä ëte, Domaräpȩ quëna̧ji̧ri̧ pio ji̧ri̧bo goëde jätäremȩquiji̧ri̧da' quëna̧ jo̧rȩtamȩpea̧de.

²² Pio ju̧i̧iä Machedoniaräpȩmo̧ jabërä chjadürëremȩdejȩrȩ pio jȩa a̧doji̧ri̧ pio ji̧ri̧. Aja̧, jibëa̧ yaboi̧ go̧düdäräpea̧ oa jabërä chjadüa̧dejȩrȩ yo̧a̧ri̧ oa, Timoteo pio ju̧i̧, Eratu pio ju̧i̧bo. Jabo Pablo judi pio ji̧ri̧ nö̧ta jätärea̧ ji̧, jabechji̧ japamitë boi̧chji̧ a̧dë cjiadiärëremȩdejȩrȩ Achia chiriräpȩ.

Epjechoräpȩ cjo̧ro̧ji̧ri̧ judiro̧ cjarari̧ cjiape bagarëreji̧ri̧dirȩ

²³ Ado pio jiro japamitërä Epechjoräpȩ cjo̧ro̧ji̧ri̧ pio judiro̧ orë ma̧i̧ dari̧ japarëreji̧ri̧dirȩ Pablorë a̧ra̧ano̧a̧ pio ju̧i̧iä, Ütë tjamo̧ pio ju̧i̧iäpȩmo̧ baärea̧ no̧mi̧ damȩ ma̧ȩ pio ju̧i̧ a̧ra̧ano̧a̧ pio ju̧i̧iä. Jabechji̧ pio jiro a̧ra̧ano̧rea̧ oaiä a̧dë chjäte ana̧ri̧ jo̧rȩtaji̧ri̧pea̧dirȩ, cjae cjae guami̧ dari̧.

²⁴ Aja̧, Demetirio quȩmȩ pio ju̧i̧iä taruparëremȩde davä ana̧ri̧ jo̧rȩtapea̧ üdë. Danȩrȩ, parata chjipararira̧ ja̧bepamȩrȩ cjo̧ro̧rëremȩde. Jabechji̧ paratara̧ pio ju̧ri̧ra̧ jibëa̧ ütë ja̧ bëmi̧ da oa jëdano̧rëremȩde, Diana quȩyi̧ ütë ja̧ a̧doparea̧ bëmi̧ da oa. Aja̧, pio ju̧i̧ ja̧bepamȩrȩ cjo̧ro̧rëremȩde pio jȩa nö̧ta ja̧bepaji̧ri̧ pio ji̧ri̧ nö̧ta. Ado judiro̧ ja̧di dari̧ ja̧bepea̧ oaiä, jabechji̧ chëre ji̧ra̧ tjamo̧ oa boarëreji̧ri̧dirȩ.

²⁵ Ado Demetirio pio judi ma̧ȩ chjadüa̧ oaiä, ja̧bepaji̧ri̧ pio judiro̧ ütëborë a̧dopera̧pea̧dirȩ. Aja̧, pio jȩa nö̧ta ja̧bepaji̧ri̧ judiro̧, ado paratara̧ ja̧bepaji̧ri̧ judiro̧ orë a̧dopera̧pea̧ maeadirȩ. Ado a̧dopë cjiaji̧ri̧ oa ja̧di ta̧rëri̧ yo̧mȩrȩ ni̧bä chjaorëremȩdejȩrȩ: —Danȩrȩ oari, chjadëri̧ dabanȩrȩ davä a̧ro̧rȩ chëre oa boapea̧ pio ju̧i̧ chjiari —yo̧a̧dejȩrȩ—. Jabechji̧ a̧ro̧rȩ paratara̧ ja̧bepea̧ oaiä, Diana quȩyi̧ ütë ja̧ a̧doparea̧ bëmi̧ da oa jëdano̧a̧ oaiä, jabechji̧ chjadëri̧ boarea̧ darea̧rȩ ibëa̧ chëre oa.

²⁶ Jabo pio jiro pumȩ chjadëdë üdë, Pablo quȩmȩ pio judi ma̧i̧ dari̧ japadiibe —yo̧a̧dejȩrȩ—. Judi a̧ra̧ano̧a̧ ma̧ȩ üdë oëra̧ti̧ oa jachipadäräa̧de. Jabechji̧ Epjechoräpȩ cjo̧ro̧ji̧ri̧ judiro̧ ütëborë ta̧rëa̧ maeadiro̧jo̧ȩ. Ado Achia quȩmȩ chiriräpȩ cjo̧ro̧ji̧ri̧ pio judiro̧borë ta̧rëa̧ maeadirȩ. Pio ju̧i̧iä babui̧ra̧ goë ta̧rërea̧rȩ davä judi japea̧ pio ju̧i̧ chjiari. Jabechji̧ pio jiro Pablo judi ana̧ri̧ a̧ra̧ano̧a̧ oaiä, jabechji̧ putu jura̧ a̧dë chami̧ dari̧ jo̧rȩtaji̧ri̧pea̧dirȩ orë Diana ütë pio ji̧ chjiari —yo̧a̧dejȩrȩ—. Aja̧, Pablo judi a̧ra̧ano̧a̧ oaiä, "Aja̧, pumȩrȩ jibëa̧ ichira̧ jëdano̧a̧ ütë üdë, tjamo̧ri̧ ütëdë made jabo teracabade" yo̧mȩrȩ a̧ra̧ano̧ chjaoa̧ oaiä, ja̧di dari̧ jo̧rȩtaji̧ri̧pea̧dirȩ yaba̧ —yo̧a̧dejȩrȩ—.

²⁷ Pio ju̧i̧iä chëre boarea̧mi̧dëri̧ cjiadiäpai̧ darea̧rȩ ca̧ oti̧. Ado badë dapai̧ dadiro̧ibe ji̧dëri̧. Tjamo̧ davä. Ütë pio ji̧ ja̧ a̧doparea̧ bëmi̧ da oa jëdano̧ji̧ri̧ oa badë dapai̧ dadiro̧ibe. Jabo pio ju̧i̧mo̧i̧ jo̧rȩtadërequede ca̧ oti̧. Danȩrȩ, ibëa̧ ütë Diana quȩyi̧ pio ji̧ ja̧ a̧doparea̧ bë üdë peaja̧di badëri̧ cjiadiämi̧ dari̧ cjiapai̧ dade —yo̧a̧dejȩrȩ—. Danȩrȩ, Diana jini̧ ütë chjadënȩ. Ba chia tjamo̧nȩ. Jabo danȩrȩ, Achiaräpȩ cjo̧ro̧ji̧ri̧ judiro̧ pio ji̧iäpȩmo̧ ma jo̧rȩtarërea̧ ji̧, chiriräpȩti̧ oa cjo̧ro̧ji̧ri̧ pio judiro̧borë pio ji̧iäpȩmo̧ ma ba chia jo̧rȩtarërea̧ ji̧, badëri̧ cjiadiämi̧ dari̧ cjiapai̧ danȩ. Ado ji̧ ja̧ a̧doparea̧ bë üdë peaja̧di badëri̧ cjiadiämi̧ dari̧ cjiapai̧ dade. Pio ju̧i̧iä bücjüri̧ cjia tjamo̧requede ca̧ pumȩ —yo̧mȩrȩ ni̧bä chjaorëremȩdejȩrȩ Demetirio judi paratara̧ ja̧bepaji̧ri̧ pio ji̧ri̧iäpȩmo̧.

²⁸ Ado a̧dopea̧ oa cjiaji̧ri̧ judiro̧ pio ju̧i̧ ta̧rëa̧ oaiä, ma̧ cjüëtü tjamo̧ri̧ jo̧rȩtaji̧ri̧pea̧dirȩ, ërecjia tjamo̧ji̧ri̧rȩ. Ado taruparëreji̧ri̧dirȩ ma̧i̧ dari̧ ëna̧diäpea̧ ji̧ jibëa̧ ütë pio ji̧ chjiari: —Epjechoräpȩ cjo̧ro̧ji̧ri̧ ja̧ ütë jini̧, Diana pio jini̧, a̧dë chjäte ba chia tjamo̧nȩ —ëna̧diä ëna̧diä yo̧ chjaorëreji̧ri̧dirȩ cja̧rȩmȩ codërë.

²⁹ Ado ërecjia tjamo̧ji̧ri̧rȩ chjuari̧ mitërëreji̧ri̧diro̧jȩrȩ Pablo ja̧ jadü yo̧a̧ri̧ oa. Machedonia chiririji̧ri̧ pio ji̧ri̧ mitëa̧diro̧jȩrȩ Gaio quȩmȩ oa, ado Aritaco quȩmȩ oa. Ado pio ji̧ri̧ mitë ëte, cja̧rȩmȩ codë baguraji̧ri̧rȩ acji yu̧a̧rëreji̧ri̧dirȩ pumȩrȩ a̧doparea̧ jo̧ tjo ana̧ tjamo̧räpȩ.

³⁰ Ado Pablo pio judiborë yu̧a̧tämi̧ cjiarëremȩde pumȩ pio ji̧ri̧ chjadëri̧ ni̧bä chjaopea̧ oa, jabo cjäri̧ madiro̧jo̧ȩ, jibëa̧ jadü judiro̧ tänȩdëa̧diro̧jo̧ȩ. 'Jabechji̧ ërecjiaji̧ri̧ judiro̧ Pablo pio ju̧i̧ irä darä judi, ja̧bo tänȩpai̧ dadiro̧ju̧i̧da' quëna̧ jo̧rȩta̧ oaiä, jabechji̧ tänȩdëa̧diro̧jo̧ȩ.

³¹ Ado peaja̧di yu̧a̧dëtä yo̧ chjadüa̧diro̧jo̧ȩ chiri tjamo̧ cjo̧ro̧ji̧ri̧ judiro̧ orë, Pablo pio ju̧i̧iäpȩmo̧ cjäri̧ri̧ cjia jo̧rȩtaji̧ri̧ pio judiro̧. Aja̧, judiro̧ pio ju̧i̧ chjiari bücjüri̧ cjia̧ oaiä, jabechji̧ pumȩrȩ a̧doparea̧ jo̧ tjo ana̧räpȩ peaja̧di yu̧a̧dëtä yo̧ chjadüa̧diro̧jo̧ȩ.

³² Ado a̧doparea̧ jo̧ tjo ana̧räpȩ a̧dopaji̧ri̧ judiro̧ jibëa̧ dëbëti̧ra̧ chia ëna̧diäji̧ri̧rȩ ma̧i̧ dari̧ ëna̧diä chjaorëreji̧ri̧dirȩ, cja̧rȩmȩ jo̧rȩtarea̧ chiadëji̧ri̧rȩ. Jabechji̧ chjadëri̧ ütara̧ oa japadë marëreji̧ri̧dirȩ. Ado o judiro̧ no̧i̧dërë a̧dopea̧ oa cjiaji̧ri̧ judiro̧ tjamo̧ri̧ dabadëji̧ri̧rȩ a̧dopea̧ oa cjiarëreji̧ri̧dirȩ. Jabechji̧ o judiro̧ a̧dopera̧pea̧ oaiä, peaja̧di cho̧rë a̧dopera̧pea̧dirȩ, 'pio ju̧i̧iä tjamo̧ri̧ a̧dopea̧ oa cjiaa̧roda' quëna̧ dabadëji̧ri̧rȩ.

³³ Ja̧dëa ji̧ judio judiro̧ pio ji̧bëiäpȩmo̧ aechide yo̧chea oa, chjadëri̧ daba tänȩtä eatarëreji̧ri̧diro̧jȩrȩ a̧dopea̧ oa cjiaji̧ri̧ pio ji̧ri̧. Pio ju̧i̧iä jabechji̧, jibëa̧ pumȩ cja̧rȩmȩ, Areja̧doro quȩmȩ pio ju̧i̧, pumȩ ja̧ dëbëräpȩ ju̧ri̧ cjiadärä tänȩrëreji̧ri̧diro̧jo̧ȩ chjadëri̧ daba tänȩpea̧ oa pio jibë chjiari. Ja̧dëa ji̧ Areja̧doro judi ichira̧ japarëremȩde pumȩ ütëbo oa cjapiparȩpea̧ oa.

³⁴ Jabo cjäri̧ madiro̧jo̧ȩ. Judiro̧ daea̧ oaiä, 'Aja̧, judiodida' quëna̧ daea̧ oaiä, jabechji̧ ni̧bä chjaorea̧ yürüdëa̧diro̧jo̧ȩ. Ado ja̧dëa ji̧ ado chjereno̧ cjarari̧ cjiape bagaji̧ri̧rȩ to̧bari̧ ëna̧diä ëna̧diä cjiaji̧ri̧pea̧dirȩ, ja̧di ta̧rëri̧ yo̧ji̧ri̧rȩ: —Aja̧, Epjechoräpȩ cjo̧ro̧ji̧ri̧ ja̧ ütë jini̧, Diana pio jini̧nȩ. A̧dë chjäte ba chia tjamo̧nȩ —yo̧ji̧ri̧rȩ ëna̧diä ëna̧diä chjaorëreji̧ri̧dirȩ ütëborë cja̧rȩmȩ codërë, 2 ora nö̧ta.

³⁵ Ado 2 ora chjätä ëte, Epjechoräpȩ tjamo̧ go̧ȩpamȩ pio judi go̧düdärärëremȩde a̧doparea̧ jo̧ tjo̧ ana̧räpȩ. Ado cjitëmȩrȩ cjapiri̧ cjia tänȩrëremȩdejȩrȩ pumȩ ji̧ri̧. Ado yo̧mȩrȩ yo̧a̧dejȩrȩ: —Chjadëri̧ ta̧rëchjicoe mȩnȩro̧, Epjechoräpȩ cjo̧ro̧ji̧ri̧ judiro̧. Danȩrȩ, a̧ro̧rȩ ütëborë chjadëri̧ dabarea̧rȩ Epjecho bë ma̧ri̧ pio ju̧i̧ chjiari —yo̧a̧dejȩrȩ—. Jabechji̧ Diana quȩyi̧ ütë pio ji̧ ja̧ a̧doparea̧ bë üdë pio yide. Epjecho bë ma̧ri̧räpȩde. Pio yi jidarea̧ro̧jo̧ȩ. Ado a̧dëri pio judiri cjatärërea̧ ta̧dë china̧chja pio ju̧i̧ chjiaribo dabarea̧rȩ. Danȩrȩ, pio yide peaja̧di. Ado pio ju̧i̧bo jidarea̧ro̧jo̧ȩ.

³⁶ Ado a̧ro̧rȩ ütëborë pio ju̧i̧ chjiari tjamo̧ri̧ daba tara, o judiro̧ 'tjamo̧dëdida' quëna̧rea̧mi̧dë tara, jabechji̧ cjapiri̧ cjiadiätäreji̧ri̧nȩrȩ yaba̧, chjadëri̧ ütarë jo̧rȩtadëji̧ri̧rȩ japarea̧ decjiari̧.

³⁷ Ado danȩrȩ, pio jiro oari yo̧a̧ri̧ pio ji̧ri̧ pio jauëräpȩmo̧ ëba jana̧dëa̧täreji̧ri̧renȩro̧jȩrȩ. Jabechji̧ judiro̧ ma̧i̧ dari̧ japea̧ ma ja̧didë. Judiro̧ ibëa̧ ütë pio ji̧ ja̧ bëräpȩ garüpea̧ oa acji yu̧a̧ ma ja̧didë. Ado ibëa̧ ütë Diana pio ji̧ chjiari chjai̧dëri̧ ni̧bäa̧ ma ja̧didë. Cjäri̧ manȩrȩ, oëra̧ japanȩrȩ mȩnȩro̧ —yo̧a̧dejȩrȩ—.

³⁸ Jabo dëdë, Demetirio judi pio jiro oari pio ji̧ri̧iäpȩmo̧ aechiderea̧ chiarä judi, pio jȩa nö̧ta ja̧bepaji̧ri̧ pio judiro̧borë aechide ni̧bärea̧ chiarä judi, jabechji̧ chjadëri̧ jätäreji̧ri̧dirȩ tjamo̧ ütarë yo̧ji̧ri̧ pio ji̧ri̧iäpȩ ütara̧mi̧ aechide yo̧pea̧ oa. Jabechji̧ doti̧mi̧ ja̧bepadirȩ. Pio ju̧ri̧pȩ jäpea̧de ütara̧mi̧ japapea̧ oa.

³⁹ Tjamo̧ davä. Mȩnȩro̧ jabë cjatäcjie jo̧rȩtarea̧ dadërä judi, jabo jabë ade cjiami̧ tarari̧ jo̧rȩtarä judi, jabechji̧ ji̧dë duri oa ni̧bä chjaopea̧de tjamo̧ ütarë yo̧ji̧ri̧ pio ji̧ri̧ ja̧ dëbëräpȩ ütara̧ doro judiro̧ ütëborë a̧dopea̧ oa cjiarä, jabo pio yaba̧ ni̧bä chjaodëpea̧de —yo̧a̧dejȩrȩ—.

⁴⁰ Jabo yaba̧ baäpea̧ chianȩrȩ mȩnȩro̧ pio yoaiä a̧doparea̧mi̧dë tara. Jabechji̧ domano ütëti̧ pio judiro̧ uapai̧ dari̧ aechide yo̧pai̧ dadiro̧ibe ütëbo oa pio mȩnȩro̧ pio yoaiäpȩ chjadëri̧ a̧dopadëa̧ tara, cjarari̧ cjiaji̧ri̧rȩ a̧dopea̧ tara. Ado judiro̧ pio ibë iëno̧ë ta̧rërä judi, "Aja̧, ¿tjana̧ ju̧i̧iä cjarari̧ cjiaji̧ri̧rȩ a̧dopë cjianȩrȩ" iëno̧ë ta̧rërä judi, cjäri̧ marea̧ro̧jȩrȩ, chjadëri̧ dëbë yo̧rea̧ dadëparea̧ro̧jȩrȩ —yo̧mȩrȩ ni̧bä chjaorëremȩdejȩrȩ Epjechoräpȩ tjamo̧ go̧ȩpamȩ pio judi.

⁴¹ Ado judi ja̧di ta̧rëri̧ ni̧bä chjao ëte, ütëbo oa baä tänȩrëremȩdejȩrȩ.