Japarea̧ 18 - Biblia Pume

Pablo judi Cori̧tioräpȩ a̧ra̧ano̧rëremȩde pumȩ noi̧dërë quënaji̧ri̧pe bagarea̧mi̧ dari̧

¹ Ado Pablo judi Atenaräpȩ ja̧di ta̧rëri̧ ni̧bä chjaoa̧ duri oa, pio jiro bë ma̧ri̧ri pio judiri go̧dümȩrȩ järëremȩde Cori̧tio quȩmȩ bë ma̧ri̧räpȩ.

² Ado ju̧ri̧pȩ go̧düdäräa̧rä, Aquira quȩmȩ pio ju̧i̧ dëbëdiärëremȩdejȩ, Po̧to quȩmȩ chiriräpȩ ara̧ oa cjiamȩ pio ju̧i̧, judio oa. Japamitë ana̧ri̧ cjo̧ro̧dëmȩ oa jabo Cori̧tioräpȩ pea cjo̧rera̧pea̧mȩ oa dëbëdiäa̧dejȩ, jibëa̧ iei̧ pio ji̧bo, Pirichira quȩyi̧ ji̧. Aja̧, Domaräpȩ cjo̧ro̧mȩ ütë pio judi judio ütëborë pio jiro bë ma̧ri̧ri judiri baätä yo̧ chjadürërea̧ oaiä, Caraudio quȩmȩ ütë pio judi Doma bë ma̧ri̧ri pio judiri baätä yo̧ chjadüa̧ oaiä, jabechji̧ baärëreji̧ri̧dirȩ Cori̧tio quȩmȩ bë ma̧ri̧räpȩ. Ado pio ju̧ri̧pȩ ano̧ mire cjo̧ro̧ji̧ri̧pea̧dirȩ, judiro̧ doma bë ma̧ri̧räpȩ cjo̧ro̧rërea̧ ji̧. Ado Pablo judi goëdepea̧dejȩrȩ jibëa̧ bëräpȩji̧ri̧ oa.

³ Ado judiro̧ Pablorë ja̧bepea̧mi̧ ja̧beparëreji̧ri̧ tara, ira̧ japea̧ oa cjiamȩ jo̧ pio ju̧i̧ ja̧bepaji̧ri̧rȩ cjo̧ro̧a̧ tara, jabechji̧ pio ji̧ri̧ nö̧ta cjiadiärëremȩde, ji̧ri̧ nö̧ta ëba ja̧bepapea̧ oa, ji̧ri̧ nö̧ta chëre oa boapea̧ oa.

⁴ Ado järätä chjaparea̧ do nö̧ta Pablo judi jädiärëremȩde judiorë a̧doparea̧ bëräpȩ judio pio ji̧ri̧iäpȩmo̧ ni̧bä chjaopea̧ oa, judiodë pio ji̧ri̧iäpȩmo̧bo. Ado judi goae tarari̧ a̧ra̧ano̧a̧ oaiä, 'Aja̧, Pablo judi coëma cjiari̧ a̧ra̧ano̧diibëda, ba chia maea oa a̧ra̧ano̧diibëda' quëna̧ji̧ni̧pea̧dirȩ.

⁵ Jabo Chira judi, Timoteo pio judiborë, Machedonia quȩmȩ chiriri pio judiri go̧düdäräa̧rä, Pablo judi ira̧ japea̧ cjiamȩ jo̧ oa chjarapë ja̧beparërea̧ ji̧, jabechji̧ oëra̧diärea̧ decjiari̧ ano̧ mire ja̧bepamȩpea̧de Ütë tjamo̧ ja̧ ma̧ȩ maea oa a̧ra̧ano̧pea̧ oa. Aja̧, judio judiro̧ chjadëri̧ quëna̧pea̧ oa, 'Aja̧, Jechu judi Ütërë mitëa̧ pio judidida, Ütërë mitëa̧ Chjätä Tänȩmȩ pio judidida' quëna̧pea̧ oa goae tarari̧ a̧ra̧ano̧tarëremȩdejȩrȩ.

⁶ Jabo cjäri̧ madiro̧jo̧ȩ, ta̧rë ja̧bodëa̧diro̧jo̧ȩ. Pio ju̧i̧iä ërecjiaji̧ri̧rȩ to̧bari̧ dëbë yo̧a̧diro̧jo̧ȩ dëbëpe chjaomi̧ dari̧. Goaedëri̧ ya̧ea̧diro̧jo̧ȩ peaja̧di. Pio ju̧i̧iä na̧rȩrëremȩdejȩrȩ Pablo judi jibëa̧ chjibo oa mu̧i̧ mu̧i̧ pjo̧dea̧ oaiä, dabu pjo̧no̧i̧ decjiape bagari̧ mu̧i̧ mu̧i̧ pjo̧dea̧ oaiä. Ado judi ja̧di dari̧ na̧rȩa̧ oaiä, 'Aja̧, na̧rȩdiibëda, a̧ro̧rȩ pio ju̧i̧iäpȩmo̧ japea̧ üdë goae tjamo̧dëdiji̧da' quëna̧pea̧ oa na̧rȩrëremȩdejȩrȩ. Ado yo̧a̧dejȩrȩ: —Danȩrȩ, mȩnȩro̧ cjo̧dë tja ana̧räpȩ aeno̧a̧ oa cjiarä judi, pio coaiäpȩmo̧ aechide yo̧rea̧ dadëparenȩro̧coe. Jabechji̧ cüdë dibë a̧dotaräbo, chjuari̧ jiadarenȩro̧coe. Pio ju̧i̧iä jabechji̧, pio yaba̧ domȩri ja̧ ano̧ mire a̧ra̧ano̧parequedejȩrȩ judiodë pio ji̧ri̧iäpȩmo̧ —yo̧a̧dejȩrȩ.

⁷ Pio ju̧i̧iä Pablo judi judiorë a̧doparea̧ bëri pio judiri go̧dürëremȩde judio pio ji̧ri̧ a̧dë go̧dümȩrȩ. Ado Tichio Juto quȩmȩ pio ju̧i̧ ja̧ bëräpȩ ano̧ mire baärëremȩde, judiorë a̧doparea̧ bë yuroi̧räpȩ. Ado Tichio Juto judi judiodëräbo, jabechji̧ Ütë tjamo̧ pio ju̧i̧iäpȩmo̧ jo̧rȩtamȩrȩ cjo̧ro̧rëremȩde.

⁸ Ado ji̧dë duri oa, judiorë a̧doparea̧ bëräpȩ tjamo̧ yo̧mȩ judi, Quiripo quȩmȩ pio judi quëna̧mȩpea̧de jibëa̧ pumȩborë. Ado o judiro̧, Cori̧tioräpȩ cjo̧ro̧ji̧ri̧ judiro̧ noi̧dërë peaja̧di quëna̧ji̧ri̧pea̧dirȩ ma̧ȩ oa ta̧rë ëte. Ado uirä go̧e cjaeä chuda̧ oa cjiarëreji̧ri̧dirȩ.

⁹ Ja̧dëa ji̧ ado cja̧rȩmo̧ doremȩrä gȩnȩpea̧rä, Ano̧mȩ Jechu pio judi ma̧ȩ yürürëremȩdejȩ Pablo ju̧i̧. Darämi̧ cjia tänȩa̧ oaiä ja̧di ta̧rëri̧ yo̧rëremȩdejȩ: —Danȩ Pablo, uapadëvä cä ma̧ȩ oa a̧ra̧ano̧pea̧ ji̧ —yo̧a̧dejȩ—. Duriräpȩmo̧ a̧dë bagurami̧ dari̧ cjiadiädëvä, jabo jabechji̧ ji̧dë ma a̧ra̧ano̧vä cjapiri̧ cjiarea̧ decjiari̧. Jabechji̧ järidëpe bagadëvä —yo̧a̧dejȩ—.

¹⁰ Danȩ, pio mȩadirequede, a̧dë baärea̧ decjiari̧. Chjadëri̧ jidaparequedemȩ eami̧rȩ pio mȩaiäpȩmo̧ acji jana̧rea̧ decjiari̧. Jabechji̧ ca̧ pumȩ no̧i̧dë oa ëbarequede pio yoa bë ma̧ri̧rä. Pio ju̧i̧iä chjadëri̧ a̧ra̧ano̧rea̧ daparenȩ —yo̧mȩrȩ ma̧ȩ yürürëremȩdejȩ Pablo ju̧i̧iäpȩmo̧ Ano̧mȩ Jechu judi darämi̧ cjia tänȩa̧ oaiä.

¹¹ Ado pio ju̧i̧iä jabechji̧, Pablo judi Cori̧tioräpȩ ju̧ri̧ cjiadiärëremȩde japamitë ana̧ Ütë tjamo̧ ja̧ ma̧ȩ oa a̧ra̧ano̧pea̧ oa. Cja̧rȩmȩ ui codë oa cjiadiärëremȩde ado cja̧rȩmo̧ ui tjomo̧mi̧.

¹² Jabo Gario̧ quȩmȩ pio judi Acaya quȩmȩ chiriräpȩ chiri ütëmȩrȩ cjo̧ro̧mȩpea̧rä, judio judiro̧ cja̧rȩmȩ jo̧rȩtarea̧ chiaji̧ri̧rȩ a̧dopa ëte acji järëreji̧ri̧diro̧jo̧ȩ Pablo pio ju̧i̧ mitëpea̧ oa. Ado pio ju̧i̧ mitë ëte ëba järëreji̧ri̧diro̧jo̧ȩ chiri ütë cjo̧ro̧mȩ pio ju̧i̧iäpȩ aechide yo̧pea̧ oa, judi ütarë bape chjaoa̧ oa cjiapea̧ oa.

¹³ Ado ja̧di ta̧rëri̧ yo̧ji̧ri̧rȩ aeno̧a̧diro̧jo̧ȩ: —Danȩrȩ, pio yodëje chjadëri̧ a̧ra̧ano̧dëde Ütë tjamo̧ pio ju̧i̧ chjiari —yo̧a̧dirȩ—. Oëra̧ a̧ra̧ano̧de. A̧ro̧rȩ dabapadëa̧ ma̧ȩ pio ju̧i̧ japatä yo̧diibe Moicherë go̧ȩpadërërea̧ ma̧ȩ pio ju̧i̧. A̧ro̧rȩ Ütë tjamo̧ pio ju̧i̧iäpȩmo̧ chjacjiamȩri̧ jo̧rȩtarërea̧ ji̧, tjaoëpai̧ dari̧ japatä eamȩrȩ goae tarari̧ ni̧bä chjaodiibe. Jabo cjäri̧ madiibe, chjai̧dëri̧ japadiibe —yo̧ji̧ri̧rȩ aeno̧a̧diro̧jo̧ȩ.

¹⁴ Ado Pablo judi pio jȩaiäpȩmo̧ aeno̧a̧ pio ju̧i̧ chjiari dëbë yo̧patea̧ ji̧, chjaodëri̧ tarupë ni̧bämȩpea̧de chiri ütë cjo̧ro̧mȩ pio judi judio pio ji̧ri̧iäpȩmo̧, ja̧di ta̧rëri̧ yo̧mȩrȩ: —Danȩrȩ, pio yodëje ma̧i̧ da chjai̧dë oa tjamo̧ri̧ japea̧rä judi, dëdë, chjadëri̧ ta̧rë chatäremȩrequededibe pio dibë, judio pio ji̧ri̧ —yo̧a̧dejȩrȩ—. Aja̧, judi tjamo̧ri̧ chjai̧dëri̧ japea̧rä judi, dëdë, bape chjaotäremȩreconȩ.

¹⁵ Jabo cjäri̧ manȩrȩ, jabomo̧ chjaocjiami̧ dari̧ ni̧bänȩrȩ. Ja̧di tara, mȩnȩro̧ jabomo̧ ma̧ȩ pio ju̧i̧ chjiari aechide tara, jabomo̧ pumȩrea̧ ja̧ quȩ pio ju̧i̧ chjiari aeno̧ tara, ado mȩnȩro̧ tüdüa̧mi̧ darä cjo̧ro̧pea̧ ma̧ȩ pio ju̧i̧ chjiari bape chjaotä ea tara, jabechji̧ dibëa̧ ma̧na̧ri̧ ütara ëte bape chjaotäreji̧ri̧renȩro̧jo̧ȩ. Jabechji̧ cüdë dibëa̧ pio ju̧i̧ chjiari dabadë tara, ütarë bape chjaodëpareconȩ —yo̧a̧dejȩrȩ.

¹⁶ Ado ja̧dëa ji̧ jibëa̧ guadia pio ji̧ri̧ tänȩa̧ oa, a̧doparea̧ jo̧ tjori pio judiri chjaodëri̧ go̧dü tänȩrëreji̧ri̧diro̧jȩrȩ judio ji̧ri̧.

¹⁷ Ado go̧dü ëte, judiodë judiro̧ orë chjaodëri̧ mitëa̧diro̧jo̧ȩ ado cja̧rȩmo̧ oa, Chotone quȩmȩ pio ju̧i̧, judiorë a̧doparea̧ bëräpȩ tjamo̧ yo̧mȩ pio ju̧i̧. Ado goae tarari̧ bide cjaeärëreji̧ri̧diro̧jo̧ȩ chiri ütë cjo̧ro̧mȩ pio ju̧i̧ ja̧ dëbëräpȩ. Jabo chiri ütë cjo̧ro̧mȩ judi, Gario̧ judi pio ju̧i̧ daea̧räbo, jabechji̧ ana̧ri̧ jo̧rȩtadëa̧de. Tocoi̧mi̧ bücjüri̧ cjiari̧ jo̧rȩtadëa̧de.

Pablo judi ado chjereno̧ baärëremȩde A̧tioquiaräpȩ, jibëa̧ bëräpȩ

¹⁸ Pablo judi do ji̧ra̧ri̧ cjiadiärëremȩde Cori̧tioräpȩ quëna̧ji̧ri̧ pio ji̧ri̧ nö̧ta. Jabo japamitë chjätä ëte, a̧dë baärëremȩdejȩrȩ uimo̧mȩ chara ana̧ oa buamȩrȩ. Aquira pio ju̧i̧ nö̧ta, Pirichira pio ji̧ nö̧ta baäa̧de Chiria quȩmȩ chiriräpȩmo̧. Ado Chequerea quȩmȩräpȩ go̧düdäräa̧rä, jibëa̧ cö̧ oa täa tänȩrëremȩde. Jabechji̧ judi Ütë tjamo̧ pio ju̧i̧iäpȩmo̧ jabërä yo̧ë cji̧därërea̧ pio ju̧i̧ japadäräa̧ oaiä, jabechji̧ jibëa̧ cö̧ oa täa tänȩrëremȩde, judio pio judiro̧ japariärërea̧mi̧.

¹⁹ Ado judiro̧ Epjecho quȩmȩ bë ma̧ri̧räpȩ go̧düdäräa̧rä, Pablo judi, jibëa̧ jadü pio ji̧ri̧ a̧dë jämȩrȩ järëremȩde judiorë a̧doparea̧ bëräpȩ judio pio ji̧ri̧ nö̧ta dëbë ni̧bä chjaopea̧ oa.

²⁰ Ado judiro̧ Pablo üdë ji̧dë u̧i̧ japamitë cjiadiätä yo̧taräbo, jabechji̧ cjiadiädërëremȩde.

²¹ Jabo pio ji̧ri̧ a̧dë baä ji̧, yo̧a̧dejȩrȩ: —Baärequede —yo̧a̧dejȩrȩ—. Jabo danȩrȩ, Ütë tjamo̧ judi pio coa ado chjereno̧ jauëräpȩmo̧ jana̧rea̧ yürürä judi, dëdë, ado jana̧parequededibe —yo̧a̧dejȩrȩ. Ado Pablo judi ja̧di ta̧rëri̧ yo̧ ëte, uimo̧mȩ chara ana̧ oa buamȩrȩ go̧dürëremȩde Epjecho bë ma̧ri̧ri pio judiri. Aquira pio ju̧i̧, Pirichira pio ji̧ a̧dë baämȩrȩ go̧dürëremȩde jibëa̧ bëräpȩmo̧ baäpea̧ oa.

Pablo judi yo̧a̧ri̧ co a̧ra̧ano̧riä tai̧rëremȩrȩ ado chjereno̧ a̧ra̧ano̧riä järëremȩde

²² Ado uimo̧mȩ chara ana̧ üdë Checharea̧ quȩmȩ bë ma̧ri̧räpȩ pjurëdäräa̧rä, Jerucharȩräpȩ jäëno̧a̧de quëna̧ji̧ri̧ pio ji̧ri̧ jeapea̧ oa. Ado ja̧di dari̧ japa ëte, tjamo̧i̧ baärëremȩde A̧tioquia quȩmȩ bë ma̧ri̧räpȩ, Chiria quȩmȩ chirirä cjiamȩ bë ma̧ri̧räpȩ.

²³ Jabechji̧ A̧tioquiaräpȩ üdë, Pablo ja̧ bërëremȩde. Jabo jibëa̧ bëräpȩbo, jabechji̧ japamitë ana̧ri̧ cjiadiädëa̧de. Jabechji̧ do ji̧ra̧ tjamo̧dë chjätä ëte ado chjereno̧ go̧dürëremȩde. 'Aja̧, quëna̧ji̧ri̧ pio ji̧ri̧ ado chjereno̧ goëde jätäremȩquiji̧ri̧da, ji̧dë u̧i̧ to̧bape jäpea̧ oa ado a̧ra̧ano̧täremȩquiji̧ri̧da' quëna̧ jorȩtamȩrȩ go̧dürëremȩde Garachia quȩmȩ chiriräpȩ jäpea̧ oa, Pjirigia quȩmȩ chiriräpȩ jäpea̧ oa.

Aporo quȩmȩ judio judi ja̧beparëremȩde Epjechoräpȩ

²⁴ Ado Pablo judi Garachiaräpȩ tai̧a̧ nö̧ta, judi Pjirigiaräpȩ tai̧a̧ nö̧ta, Aporo quȩmȩ judio pio judi go̧düdärärëremȩde Epjechoräpȩ. Aja̧, Areja̧doro quȩmȩ bë ma̧ri̧räpȩ ara̧ oa cjiarëremȩ pio judi pio ju̧ri̧pȩ go̧düdärärëremȩde. Ado Aporo judi, jabechji̧ urëdi tjamo̧ oa jo̧rȩtamȩrȩ cjo̧ro̧rëremȩde. Ado Ütërë go̧ȩpa tänȩrërea̧ ma̧ȩ pio ju̧i̧ tjamo̧ri̧ dabarëremȩdejȩ, a̧dë chjäte chjadëri̧ dabamȩrȩ. Ado ma̧ȩ oa a̧ra̧ano̧a̧ ji̧, a̧dë chjäte goae tarari̧ a̧ra̧ano̧rëremȩde, eami̧ pumȩ üdë oëra̧ti̧ oa a̧dë jo̧rȩtarea̧mi̧dëri̧.

²⁵ Jabechji̧ Aporo judi jabërä Ano̧mȩ Jechu pio ju̧i̧ chjiari chjadëri̧ a̧ra̧ano̧a̧ oa cjiarërea̧ oaiä, jabechji̧ goae tarari̧ a̧ra̧ano̧mȩrȩ cjo̧ro̧rëremȩde, järi tjamo̧mȩrȩ. Jabo ji̧ra̧ri̧ dabamȩborë, o oa dabadërëremȩde. Juan judi go̧e cjaeä chudapea̧ pio ju̧i̧ chjiari dabaräbo, jabechji̧ Tjo tjamo̧ judi quëna̧ji̧ri̧ pio ji̧ri̧ go̧e cjaeä chudapea̧ pio ju̧i̧ chjiari dabadërëremȩde. Pio ju̧i̧ chjiari jabë ta̧rëdëa̧de.

²⁶ Ado Aporo judi judiorë a̧doparea̧ bëräpȩ a̧ra̧ano̧pea̧ ji̧ tarupea̧rä, Aquira pio judi ütarë ta̧rërëremȩdejȩ, Pirichira pio jini̧borë. Ado pio ju̧i̧ ta̧rëa̧rä, 'Jabë pjärämȩdida, jabë o oa dabapadëa̧dida, chjadëri̧ dabaparea̧mi̧ dari̧ a̧dotäreji̧ri̧a̧ro̧ju̧i̧da' quëna̧ jo̧rȩtaji̧ri̧rȩ chjadëri̧ a̧ra̧ano̧rëreji̧ri̧diro̧jo̧ȩ areiami̧ dari̧. Tjamo̧ davä. Ütë tjamo̧ ja̧ ma̧ȩ pio ju̧i̧ ji̧dë u̧i̧ coëma cjiari̧ quëna̧pea̧ oa, chjadëri̧ a̧ra̧ano̧a̧diro̧jo̧ȩ, judi jabë dabapadëa̧ pio ju̧i̧.

'Ütë tjamo̧ ja̧ ma̧ȩ oa a̧ra̧ano̧e jätäremȩquëda' quëna̧ jo̧rȩtamȩrȩ baärëremȩde Aporo judi Acayaräpȩ

²⁷ Ado Aporo judi, 'Aja̧, Acaya quȩmȩ chiriräpȩ jätäremȩquëda' quëna̧ jo̧rȩtamȩpea̧rä, Epjechoräpȩ quëna̧ji̧ri̧ pio judiro̧ jabechji̧, jätä chi̧dëea̧diro̧jo̧ȩ. Ja̧dëa ji̧ chjadëri̧ a̧dorëreji̧ri̧diro̧jo̧ȩ. Go̧ȩpe chjadürëreji̧ri̧diro̧jȩrȩ Acayaräpȩ quëna̧ji̧ri̧ pio ji̧ri̧iäpȩmo̧. Jabechji̧ judiro̧ Aporo pio ju̧i̧ chjadëri̧ jeatä, pio ju̧i̧ ma̧ chiadëri̧ cjiaji̧ri̧rȩ datä eaji̧ri̧rȩ go̧ȩpe chjadüa̧diro̧jȩrȩ. Ado ja̧dëa ji̧ Aporo judi pio ju̧ri̧pȩ go̧düdäräa̧rä, jabechji̧ chjadëri̧ jea̧diro̧jo̧ȩ. Ado Aporo judi pio ju̧ri̧pȩ cjo̧ro̧a̧ nö̧ta, jabechji̧ ana̧ri̧ a̧dorëremȩdejȩrȩ quëna̧ji̧ri̧ pio ji̧ri̧. Tjamo̧ davä. Ütërë cjäri̧ri̧ cjia da̧ pio ju̧i̧iä quëna̧rea̧ darëreji̧ri̧ pio ji̧ri̧ ana̧ri̧ a̧dorëremȩdejȩrȩ.

²⁸ Jabechji̧ goae tarari̧ boadärärea̧mi̧ dari̧ ni̧bätarëremȩde judio pio ji̧ri̧ nö̧ta, ütëborë ta̧rëri̧. 'Aja̧, Aporo judi oëra̧ yo̧dida, judi yo̧a̧ üdë coëma cjiari̧ baädëdida' quëna̧rea̧mi̧dëri̧ daba tänȩrëremȩdejȩrȩ Jechu pio ju̧i̧ chjiari Ütërë go̧ȩpa tänȩrërea̧ ma̧ȩra̧ pio ju̧ri̧ra̧. 'Aja̧, Jechu judi Ütërë mitëa̧ pio judi tjamo̧dida, Chjätä Tänȩmȩ pio judi tjamo̧dida' quëna̧rea̧mi̧ dari̧ a̧ra̧ano̧tarëremȩdejȩrȩ, dëbë yo̧rea̧mi̧dëri̧.