Japarea̧ 17 - Biblia Pume

Pablo judi jibëa̧ jadüborë järëreji̧ri̧dirȩ Techaronica quȩmȩ bë ma̧ri̧räpȩ

¹ Ado Pablo judi, Chira judi ji̧dë u̧i̧ jachi oa jäji̧ri̧rȩ chjätärëreji̧ri̧diro̧jo̧ȩ A̧pjipori quȩmȩ bë ma̧ri̧ oa. Ado Aporonia quȩmȩ bë ma̧ri̧ oa peaja̧di chjätäji̧ri̧rȩ go̧düdärärëreji̧ri̧dirȩ Techaronica quȩmȩ bë ma̧ri̧räpȩ. Ado ju̧ri̧pȩ judio judiro̧ jibëa̧ a̧doparea̧ bë oa goarëreji̧ri̧dirȩ.

² Ado Pablo judi, jënȩ ji̧dë ma japariärërea̧mi̧ järëremȩde judiorë a̧doparea̧ bëräpȩ järätä chjaparea̧ doro. Aja̧, tjarari̧ chemana nö̧ta järëremȩde järätä chjaparea̧ doro. Ado jënȩ jäa̧mi̧ nö̧ta, jabechji̧ Ütë tjamo̧ ja̧ ma̧ȩ oa go̧ȩ ni̧bä ëte a̧ra̧ano̧rëremȩdejȩrȩ adopaji̧ri̧ pio ji̧ri̧. Ado pio jȩaiäpȩmo̧ dëbë ni̧bä chjaoa̧ oaiä, jabechji̧ goae tarari̧ ba dëbë ni̧bä chjaorëremȩdejȩrȩ Ütërë go̧ȩpa tänȩrërea̧ ma̧ȩ pio ju̧i̧ chjiari.

³ Jabechji̧ judiro̧ Chjätä Tänȩmȩ pio ju̧i̧ chjiari chjadëri̧ dabapea̧ oa, areiami̧ dari̧ a̧ra̧ano̧ chjaorëremȩdejȩrȩ ana̧ri̧ carupë ni̧bä chjaomȩrȩ. 'Jabechji̧ Chjätä Tänȩmȩ pio judi ma̧i̧ da chjai̧dë oa chjätäpea̧ chiarëremȩdida, ja̧boa̧rëremȩrȩ tjamo̧ri̧ bëdüpea̧ chiarëremȩdida' quëna̧rea̧mi̧ dari̧ a̧ra̧ano̧rëremȩdejȩrȩ. Aja̧, quëna̧rea̧mi̧ dari̧, 'tjamo̧ri̧ ni̧bä chjaodiibëda' quëna̧rea̧mi̧ dari̧ a̧ra̧ano̧a̧dejȩrȩ. Ado ja̧dëa ji̧ pio ju̧i̧ uëri yo̧mȩrȩ ja̧di ta̧rëri̧ a̧de yo̧a̧dejȩrȩ: —Danȩrȩ, Jechu pio ju̧i̧ chjiari ni̧bä chjaorequededibe. Ado Ütërë mitëa̧ Chjätä Tänȩmȩ pio judi tjamo̧de. Ado cja̧rȩmo̧ decjiade —yo̧a̧dejȩrȩ.

⁴ Ado judio judiro̧ orë Pablo pio ju̧i̧ ta̧rëa̧ oaiä quëna̧ji̧ri̧pea̧dirȩ. Ado ivi jini̧ro̧, chëre ji̧ra̧ri̧ goaji̧ri̧ ivi pio ji̧ni̧ro̧borë quëna̧ji̧ri̧pea̧ni̧rȩ no̧i̧dërë. Ado ji̧ri̧ uëri giriego noi̧dërë peaja̧di quëna̧ji̧ri̧pea̧dirȩ. Tjamo̧ davä. Ütë tjamo̧ pio ju̧i̧iäpȩmo̧ chjacjiamȩri̧ jo̧rȩtaji̧ri̧ giriego pio judiro̧borë quëna̧ji̧ri̧pea̧dirȩ. Ado judiro̧ ütëborë ëba cjiaji̧ri̧pea̧dirȩ Pablo pio ju̧i̧ nö̧ta, Chira pio ju̧i̧ nö̧ta.

⁵ Jabo judio judiro̧ orë ma̧ cjüëtüri̧ jo̧rȩtaji̧ri̧pea̧dirȩ quëbaji̧ri̧rȩ. Jabechji̧ pumȩ judiro̧ yo̧a̧ oaiä, "Aja̧, no̧i̧dërë quëna̧ji̧ri̧pea̧dirȩ" yo̧a̧ oa ta̧rëa̧ oaiä, quëbaji̧ri̧pea̧dirȩ, ërecjia tjamo̧ji̧ri̧rȩ. Pio ju̧i̧iä oari chjai̧dë pio ji̧ri̧ mitërëreji̧ri̧diro̧jȩrȩ gatë tänȩrea̧ bë ji̧ra̧räpȩ ju̧ri̧. Jabechji̧ Pablo ju̧i̧ ado Chira ju̧i̧ dëbepe chjaopea̧ no̧i̧dë oa mitërëreji̧ri̧diro̧jȩrȩ chumi̧dëri̧ cjiaji̧ri̧ pio ji̧ri̧, o judiro̧ ba chia dadëa̧ oari pio ji̧ri̧. Ado pio jiro oari judiro̧ ji̧ra̧ tjamo̧rȩ a̧dopea̧rä, jabechji̧ bë ma̧ri̧räpȩ järea̧ no̧ro tai̧ji̧ri̧rȩ ma̧i̧ dari̧ jaepe yoa chjaorëreji̧ri̧dirȩ ërecjia tjamo̧ji̧ri̧rȩ, no̧i̧dërë cjarari̧ cjiape jäji̧ri̧rȩ. Ado Jacho̧ quȩmȩ ja̧ bëräpȩ ju̧ri̧ acji jäji̧ri̧rȩ yarëno̧a̧diro̧jo̧ȩ yu̧a̧rea̧ joë ya oa. 'Aja̧, pio yoaiä jirodiro̧da Pablo judi, Chira judi pio yi jirodida, Jacho̧ pio ju̧i̧ ja̧ bëräpȩ jirodiro̧da' quëna̧ jo̧rȩtaji̧ri̧rȩ yarëno̧a̧dirojo̧ȩ.

⁶ Jabo ji̧ri̧ dadärädëa̧ oaiä, ano mire mitërëreji̧ri̧diro̧jo̧ȩ bë ana̧mȩ pio ju̧i̧, Jacho̧ quȩmȩ pio ju̧i̧. Ado quëna̧ji̧ri̧ pio ji̧ri̧bo chjuari̧ mitëa̧diro̧jȩrȩ o oa. Ado pio ji̧ri̧ daburo a̧rȩri̧ mu̧i̧ järëreji̧ri̧diro̧jȩrȩ bë ma̧ri̧ tjamo̧ cjo̧ro̧ji̧ri̧ pio ji̧ri̧iäpȩmo̧. Ado ju̧ri̧pȩ go̧düdärä ëte, ërecjiaji̧ri̧rȩ to̧bari̧ yo̧rëreji̧ri̧diro̧jȩrȩ tjamo̧ yo̧ji̧ri̧ pio ji̧ri̧iäpȩmo̧: —Danȩrȩ, pio jiro oari judiro̧ ji̧dë ma ma̧i̧ dari̧ jape chjaodirȩ oëra̧ti̧ oa —yo̧a̧diro̧jȩrȩ—. Pumȩ judiro̧ chjadëri̧ cjo̧ro̧rea̧mi̧dëri̧ ma̧i̧ dari̧ jape chjaodirȩ. Ado pio yoaiäpȩ ma̧na̧dërërea̧ ji̧, ma̧na̧dirȩ yaba̧ ibëa̧ bë ma̧ri̧räpȩ.

⁷ Ado Jacho̧ judi pio ji̧ri̧iäpȩmo̧ cjo̧ro̧rea̧ yürüdëtärea̧ ji̧, jabechji̧ cjo̧ro̧rea̧ yürüa̧dejȩrȩ. Jabechji̧ judiro̧ ütëborë chiri ütë cjo̧ro̧mȩ ja̧ ma̧ȩrä chjadëri̧ cjo̧ro̧tärea̧ ji̧, Domaräpȩ cjo̧ro̧mȩ ütë pio ju̧i̧ ja̧ ma̧ȩrämo̧ cjo̧ro̧tärea̧ ji̧, cjäri̧ madirȩ, jiada maeadirȩ. Tjamo̧ davä. Judiro̧ domaräpȩ cjo̧ro̧mȩ ütë pio ju̧i̧ jo̧rȩtatärea̧ ji̧, ado cja̧rȩmo̧ ütëbea pio ju̧i̧ chjiari ni̧bä chjaodirȩ, Jechu quȩmȩbea pio ju̧i̧ chjiari —yo̧ji̧ri̧rȩ aechide yo̧rëreji̧ri̧diro̧jȩrȩ.

⁸ Ado a̧dopera̧pea̧ji̧ri̧ pio judiro̧ pio jiro ma̧ȩ oa ta̧rëa̧ oaiä, ana̧ri̧ jo̧rȩtaji̧ri̧pea̧dirȩ, bë ma̧ri̧ tjamo̧ yo̧ji̧ri̧ pio judiro̧borë. Goae tjamo̧dëri̧ ta̧rërëreji̧ri̧diro̧jȩrȩ bücjüri̧ cjia tjamo̧ji̧ri̧rȩ.

⁹ Pio ju̧i̧iä tjamo̧ yo̧ji̧ri̧ pio judiro̧ chëre oa ba ano̧ tänȩrëreji̧ri̧diro̧jo̧ȩ Jacho̧ ju̧i̧, quëna̧ji̧ri̧ pio ji̧ri̧bo. Ado judiro̧ ba ano̧a̧rä, jabechji̧ baä tänȩrëreji̧ri̧diro̧jȩrȩ.

Pablo judi Berearäpȩ a̧ra̧ano̧a̧ oaiä, judio noi̧dërë quëna̧pe järëreji̧ri̧dirȩ, judiodë pio judiro̧borë

¹⁰ Ado pea gȩnȩpea̧rä quëna̧ji̧ri̧ pio judiro̧ Pablo pio ju̧i̧, Chira pio ju̧i̧ chjaodëri̧ baä tänȩrëreji̧ri̧diro̧jȩrȩ pumȩ ji̧ri̧ ado cja̧rȩmo̧ bë ma̧ri̧räpȩmo̧, Berea quȩmȩ bë ma̧ri̧räpȩmo̧ goadi baäpea̧ oa. Ado ju̧ri̧pȩ go̧düdäräji̧ri̧rȩ jäeno̧a̧dirȩ judiorë a̧doparea̧ bëräpȩ.

¹¹ Ado Berearäpȩ cjo̧ro̧ji̧ri̧ judio judiro̧ Techaronicaräpȩ cjo̧ro̧ji̧ri̧ pio judiromi̧ dadërëreji̧ri̧dirȩ. Jabechji̧ ji̧dë u̧i̧ järirëreji̧ri̧dirȩ Ütë tjamo̧ ja̧ ma̧ȩ oa dabapapea̧ ji̧. Ta̧ra̧ puë chia maearë ta̧rë ja̧borëreji̧ri̧diro̧jo̧ȩ ma̧ȩ oa, tjamo̧ri̧ dabapatämi̧ cjiaji̧ri̧rȩ. Ji̧dë ma go̧ȩ ni̧bä chjaorëreji̧ri̧diro̧jo̧ȩ Ütë tjamo̧ ja̧ ma̧ȩ oa chjadëri̧ ütarapea̧ ji̧ Pablorë a̧ra̧ano̧a̧ pio ju̧i̧. 'Aja̧, ja̧di dari̧ a̧ra̧ano̧diibëda, ado judi a̧ra̧ano̧a̧ ma̧ȩ üdë coëma cjiadida, jabechji̧ Ütë ja̧ ma̧ȩ pio ju̧i̧ nö̧ta ji̧mo̧ baädida, Ütë tjamo̧ ja̧ ma̧ȩ pio ju̧i̧ tjamo̧ri̧ a̧ra̧ano̧diibëda' quëna̧ jo̧rȩtaji̧ri̧rȩ ji̧dë ma ütarë ta̧rë chjaorëreji̧ri̧diro̧jo̧ȩ Pablorë a̧ra̧ano̧a̧ pio ju̧i̧, tjamo̧ri̧ dabapatämi̧ cjiaji̧ri̧rȩ.

¹² Ado pio jiro judio judiro̧ no̧i̧dërë quëna̧ji̧ri̧pea̧dirȩ, judiodë pio judiro̧borë. Ado chëre ji̧ra̧ri̧ goaji̧ri̧ ivi pio jini̧ro̧, ado giriego oari judiro̧ bubarë peaja̧di quëna̧ji̧ri̧pea̧dirȩ.

¹³ Jabo Techaronicaräpȩ cjo̧ro̧ji̧ri̧ judio judiro̧ Pablorë Berearäpȩ cjo̧ro̧ji̧ri̧ pio ji̧ri̧iäpȩmo̧ a̧ra̧ano̧a̧ pio ju̧i̧ chjiari goë ta̧rëa̧ oaiä, chjaodëri̧ acji järëreji̧ri̧dirȩ. Ado Berearäpȩ go̧düdärä ëte, Pablo pio ju̧i̧iäpȩmo̧ poë aechide ni̧bäji̧ri̧rȩ ana̧ri jo̧rȩta tänȩrëreji̧ri̧diro̧jȩrȩ pio ju̧ri̧pȩ cjo̧ro̧ji̧ri̧ pio ji̧ri̧. Pio ju̧i̧iä no̧i̧dërë a̧dopaji̧ri̧pea̧dirȩ cjarari̧ cjiape jäji̧ri̧rȩ, Pablo pio ju̧i̧iäpȩmo̧ ërecjiape jäji̧ri̧rȩ.

¹⁴ Ado pio ju̧i̧iä quëna̧ji̧ri̧ judiro̧ orë jëreea tjamo̧ji̧ri̧rȩ ëba järëreji̧ri̧diro̧jo̧ȩ Pablo ju̧i̧ ui ana̧ yuroräpȩ. Jabo Chira judi, Timoteo judi, jabechji̧ a̧dë cjiadiärëreji̧ri̧diro̧jo̧ȩ.

¹⁵ Ado Pablo judi, ado pio ju̧i̧ a̧depea̧ji̧ri̧ pio judiro̧borë ui ana̧räpȩ go̧düdäräa̧rä, jabechji̧ bua̧diro̧jo̧ȩ uimo̧mȩ chara ana̧ oa Atena quȩmȩ bë ma̧ri̧räpȩ jäpea̧ oa. Ado ju̧ri̧pȩ go̧düdäräa̧rä, Pablo pio ju̧i̧ a̧depea̧ji̧ri̧ pio judiro̧ ado chjereno̧ baäa̧dirȩ. Jabo baäbea yaboi̧ Pablo judi jibëa̧ jadü pio ji̧ri̧iäpȩmo̧ ma̧ȩ chjadüa̧dejȩrȩ, Chira pio ju̧i̧, ado Timoteo pio ju̧i̧bo. Aja̧, pio jȩaiäpȩ jo̧ȩra̧pe jana̧tä eamȩrȩ ma̧ȩ chjadürëremȩdejȩrȩ pio jȩa a̧dera̧pea̧ji̧ri̧ pio ji̧ri̧iä.

Atenaräpȩ ju̧ri̧ teracaba ütë ji̧ra̧ tjamo̧ oa damȩrȩ ana̧ri̧ ni̧bä chjaorëremȩdejȩrȩ Pablo judi Jechu pio ju̧i̧ chjiari

¹⁶ Ado Pablo judi Atenaräpȩ jibëa̧ jadü pio ji̧ri̧ jidata nö̧ta, Chira pio ju̧i̧, Timoteo pio ju̧i̧ jidata nö̧ta, gito ana̧ri̧ jo̧rȩtarëremȩde teracaba ütë buba oa dae chjaoa̧ oaiä. Jabechji̧ pumȩrȩ jëdano̧a̧ ütë üdë no̧i̧dë tjamo̧rëremȩde pio jiro bë ma̧ri̧räpȩ.

¹⁷ Pio ju̧i̧iä judiorë a̧doparea̧ bëräpȩ jädiärërëremȩde pumȩ pio ji̧ri̧ nö̧ta ni̧bä chjaopea̧ oa. Aja̧, judio pio ji̧ri̧ nö̧ta ni̧bä chjaopea̧ oa, ado peaja̧di Ütë pio ju̧i̧iäpȩmo̧ jo̧rȩtaji̧ri̧ judiodë pio ji̧ri̧ nö̧ta ni̧bä chjaopea̧ oa jädiärëremȩde. Ado pio jȩaiäpȩmo̧ ba dëbë ni̧bä chjaorea̧mi̧ dari̧ ni̧bä chjaorëremȩdejȩrȩ. Ado peaja̧di jädiärëremȩde gatë tänȩrea̧räpȩ pumȩ ji̧ri̧ ni̧bä chjaopea̧ oa. Ado eami̧ pumȩ üdë pio ju̧ri̧pȩ go̧düdäräa̧mȩ pio ju̧i̧, jabechji̧ ni̧bä chjaorëremȩdejȩ Ütë tjamo̧ ja̧ ma̧ȩ pio ju̧i̧ chjiari. Aja̧, do nö̧ta ja̧di dari̧ japamȩrȩ japarëremȩde jibëa̧ jadü pio ji̧ri̧ jidata nö̧ta.

¹⁸ Ado cja̧rȩmo̧ a̧ra̧ano̧rea̧ chiaji̧ri̧ pio judiro̧borë a̧dope chjaorëreji̧ri̧dirȩ Pablo pio ju̧i̧ ta̧rëpea̧ oa. Epicureo quȩmȩ judi a̧ra̧ano̧rërea̧ duri pio ju̧i̧ quëna̧ji̧ri̧ judiro̧, ado Cheno̧ quȩmȩ judi a̧ra̧ano̧rërea̧ duri pio ju̧i̧ quëna̧ji̧ri̧ pio judiro̧borë a̧dope chjaorëreji̧ri̧dirȩ. Ado judiro̧ orë: —Jabo cjäri̧ madiibe, ¿tjana̧ ma̧ȩ oa a̧ra̧ano̧täremȩcjivadiibe pio yodëje? Cjäri̧ madibe, ibë a̧ra̧ano̧rea̧mi̧dëde, jabomo̧ teracabari̧ ni̧bä chjaomȩde —yo̧a̧dirȩ. Jabo o judiro̧ yo̧a̧dirȩ: —Aja̧, ado cja̧rȩmo̧ pumȩ ja̧ ütë pio ju̧i̧ chjiari a̧ra̧ano̧ jirodiibe —yo̧a̧dirȩ. Aja̧, ja̧di ta̧rëri̧ yo̧rëreji̧ri̧dirȩ Pablo judi Jechu pio ju̧i̧ chjiari a̧ra̧ano̧a̧ oaiä, Jechu judi bëdüa̧ pio ju̧i̧ chjiari yo̧a̧ oaiä.

¹⁹ Pio ju̧i̧iä ëba jäa̧diro̧jo̧ȩ bë ma̧ri̧ tjamo̧ yo̧ji̧ri̧ judiro̧ a̧doparea̧räpȩ, Areopago quȩmȩ a̧doparea̧räpȩ. Ado ju̧ri̧pȩ go̧düdärä ëte, yo̧a̧diro̧jo̧ȩ Pablo ju̧i̧: —Danȩ, mȩnȩ a̧ra̧ano̧a̧ pio ju̧i̧ chjiari, pio jiro a̧ra̧ano̧rea̧ peaja̧ pio ju̧i̧ chjiari ta̧rëtämi̧ cjiarea̧rȩ. Jabechji̧ ni̧bä chjaoibe.

²⁰ Mȩnȩ pio yabo ni̧bä chjaoa̧ ji̧, 'Aja̧, ¿tjana̧ ni̧bä chjaocjivadiibë, a̧ro̧rȩ cja̧rȩmȩ co ta̧rëdërërea̧ ma̧ȩ pio ju̧i̧ ni̧bä chjaodida, pio ju̧i̧ chjiari chjadëri̧ ta̧rëpea̧ chiaa̧ro̧da' quëna̧ jo̧rȩtaji̧ri̧pea̧rea̧rȩ. Pio ju̧i̧iä chjadëri̧ ta̧rëtämi̧ cjiarea̧ro̧mȩ. Ni̧bä chjaoibe —yo̧rëreji̧ri̧diro̧jo̧ȩ Pablo ju̧i̧.

²¹ Ado Atenaräpȩ ara̧ oa cjo̧ro̧ji̧ri̧ judiro̧, ado dairi pio judiri Atenaräpȩ cjo̧rera̧pea̧ji̧ri̧ pio judiro̧borë, jabechji̧ ta̧rë goara marëreji̧ri̧dirȩ eami̧ a̧ra̧ano̧rea̧ peaja̧ oa ta̧rëpea̧ ji̧. Tjamo̧ davä. Eami̧ a̧ra̧ano̧rea̧ peaja̧ üdë, jënȩro̧ cja̧rȩmȩ co ta̧rëdëa̧ a̧ra̧ano̧rea̧ üdë goae tjamo̧rëremȩde pio ji̧ri̧iä. Ado jënȩro̧ pea ta̧rëa̧ pio ju̧i̧ chjiari o ji̧ri̧iäpȩmo̧ ni̧bä chjaopea̧ üdë peaja̧di goae tjamo̧rëremȩdejȩrȩ. Ado pio ju̧i̧iä ta̧rëtämi̧ cjiarëreji̧ri̧diro̧jo̧ȩ Pablo pio ju̧i̧.

²² Ado pio jȩaiäpȩmo̧ ni̧bä chjaotä yo̧a̧ oaiä, cjitërëremȩde Pablo judi. Ado bë ma̧ri̧ tjamo̧ yo̧ji̧ri̧ pio ji̧ri̧ ja̧ dëbëräpȩ cjiamȩrȩ ni̧bä chjaorëremȩdejȩrȩ, ja̧di ta̧rëri̧ yo̧mȩrȩ: —Danȩrȩ, Atenaräpȩ cjo̧ro̧ji̧ri̧ pio ji̧ri̧ ni̧bä chjaorequededibe oari pio ji̧ri̧ —yo̧a̧dejȩrȩ—. Danȩrȩ, irä darequede davä dibëa̧ ütë ji̧ra̧ oa, pumȩrȩ jëdano̧a̧ ütë ji̧ra̧ oa. 'Jabechji̧ ütë ji̧ra̧ oa goapea̧ üdë ba chia tjamo̧dida, ütë ji̧ra̧ pio ji̧ri̧iäpȩmo̧ chjacjiamȩri̧ jo̧rȩtapea̧ üdë ba chia tjamo̧dida' quëna̧ jo̧rȩta jironȩrȩ —yo̧a̧dejȩrȩ—.

²³ Jabechji̧ dibëa̧ bë ma̧ri̧ oa dae tai̧a̧ ji̧, daea̧requede davä mȩnȩro̧ chjacjiamȩri̧ jo̧rȩta̧ pio ji̧ri̧, dibëa̧ ütë pio ji̧ri̧. Ado peaja̧di daea̧requede yürürea̧ mechja oa. Ado yürürea̧ mechja chirirä go̧ȩpea̧ oa cjiamȩ ma̧ȩ oa peaja̧di daea̧rerequede. “Aja̧, a̧ro̧rȩ dabadë ütë pio ju̧i̧iäpȩmo̧ chjacjiamȩri̧ jo̧rȩtamȩrȩ yürüpea̧de” yo̧mȩ ma̧ȩ pio ju̧i̧ go̧ȩ ni̧bäa̧requede. Ado danȩrȩ ca̧ pumȩ, mȩnȩro̧ dabadë Ütë pio ju̧i̧ chjiari a̧ra̧ano̧era̧pea̧requededibe yaba̧ —yo̧a̧dejȩrȩ—.

²⁴ Danȩrȩ, mȩnȩro̧ dabadë Ütë üdë, Ütë tjamo̧ pio judide. Dabu oa Pareapamȩ pio judide. Dabu oa cjaeäji̧ri̧ chjö̧na̧i̧däräti̧ oa Pareapamȩ pio judide. Aja̧, pio ju̧i̧ chjiari ni̧bä chjaorequededibe —yo̧a̧dejȩrȩ—. Danȩrȩ, chiri Ano̧mȩ pio judide. A̧dë Ano̧mȩ pio judide. Ado mȩnȩro̧ dibëa̧ ichira̧ japea̧ bërä, chjacjiamȩri̧ jo̧rȩtapea̧ bërä bëparea̧mi̧dëde. Jabechji̧ oëra̧ti̧mȩde. Cja̧rȩmȩrämo̧dëmȩde. Pio a̧ro̧rȩ japë yürüa̧ oa bëparea̧mi̧dëde.

²⁵ Pio a̧ro̧rȩ yürüa̧ oaiä 'Aja̧, quirë baä quirë baä cjiarea̧ da jirodida' quëna̧rea̧mi̧dëde. Jabechji̧ jibëa̧ma̧i̧mȩti̧de. Pio a̧ro̧rȩ ju̧i̧iäpȩmo̧ yürürea̧mi̧dërea̧rȩ. Jabo pio judide pio ibëiäpȩmo̧ yürümȩ judi —yo̧a̧dejȩrȩ—. Pio judirimȩ marë quirë baä quirë baä cjiarea̧ darea̧rȩ pio a̧ro̧rȩ. Danȩrȩ, pio judimo̧rȩ yürüa̧ oa cjo̧ro̧rea̧ darea̧rȩ. Pio judimo̧rȩ yürüa̧ oa jȩoarea̧ darea̧rȩ. Pio judimo̧rȩ yürüa̧ oa pumȩdieno̧rea̧ darea̧rȩ. Jabechji̧ a̧ro̧rȩ pio ju̧i̧iäpȩmo̧ ba dëbë yürürea̧mi̧dëde —yo̧a̧dejȩrȩ—.

²⁶ Danȩrȩ, cja̧rȩmȩ pumȩrëremȩ pio ju̧i̧iä goëde je ji̧ra̧pe jä tänȩrëremȩdejȩrȩ pumȩ ütëbodärä oa, ado cja̧rȩmo̧ pumȩpe bagari̧, ado cja̧rȩmo̧ ma̧ȩ ni̧bäpe bagari̧. Pio judi tänȩrërea̧ oaiä, pearämȩ üi̧ pio judiri ja̧ maearë chiri oëra̧ti̧ oa chjuchjupechä cjo̧ro̧ji̧ri̧pe bagarëreji̧ri̧dirȩ Ütërë pearä ütararërea̧ chiriräpȩ pio ju̧ri̧. 'Aja̧, pio jiro japamitërä cjo̧ro̧padiro̧da, pio jiro chirirä cjo̧ro̧padiro̧da' quëna̧ jo̧rȩtamȩrȩ cjo̧ro̧ tänȩrëremȩdejȩrȩ —yo̧a̧dejȩrȩ.

²⁷ Jabo yo̧chji̧coe —yo̧a̧dejȩrȩ Pablo judi—. ¿Tjana̧ ju̧i̧iä pumȩ no̧i̧dë tjamo̧ oa cjo̧ro̧rea̧ yürürëremȩdejȩrȩ Ütë tjamo̧ judi? Tjana̧ ju̧i̧iädë, jabechji̧ pumȩ judiro̧ ütëborë pio jȩaiäpȩmo̧ ma quëna̧tä eamȩrȩ cjo̧ro̧rea̧ yürürëremȩdejȩrȩ. Tjamo̧ davä. Pio jȩaiäpȩmo̧ na̧mi̧ dari̧ japatä, pio jȩaiäpȩmo̧ ga̧re ga̧re tarariä baämi̧ dari̧ quëna̧tä earëremȩdejȩrȩ, taradärärea̧mi̧ dari̧. Ado Ütë tjamo̧ judi, ¿tjana̧räpȩcjivadi? quëna̧rea̧mi̧dëde —yo̧a̧dejȩrȩ—. Jabechji̧ pio yide Ütë tjamo̧ judi. 'Pio a̧ro̧rȩ cjiamȩräpȩ cjiadë jirodida' quëna̧rea̧mi̧dëde. Pio yide. Ibëa̧ chjarerämȩde.

²⁸ Ado pio judi yürüa̧ oa ibëa̧ tjo chiarea̧rȩ. Pio judi tänȩa̧ oa odoriä baäde ibëa̧ chji̧ üdë. Pio judi jida̧ oa cjo̧ro̧rea̧rȩ. Ado pio ju̧i̧ ja̧ ma̧ȩrämo̧ jabëti̧ cjiarea̧rȩ —yo̧a̧dejȩrȩ—. Danȩrȩ, peaja̧di ta̧rëri̧ go̧ȩparëremȩde dibëa̧ pumȩ judi. “Aja̧, Ütë tjamo̧ judi pareapea̧ oa cjo̧ro̧ marea̧rȩ pio judiri ja̧ maearë” yo̧mȩ ma̧ȩ oa go̧ȩparëremȩdidibe.

²⁹ Ja̧di tara a̧ro̧rȩ Ütërë pareapea̧ oa cjo̧ro̧ ma tara, jabechji̧ oëra̧ jo̧rȩtadëtäreji̧ri̧rea̧rȩ pio ju̧i̧ chjiari —yo̧a̧dejȩrȩ—. 'Aja̧, oro chjipararira̧ chjuroa̧ oa cjiamȩ pio judimi̧ da jirodida, cüdë jëdano̧a̧ ütë üdë Ütë tjamo̧ pio judimi̧ da jirodida' quëna̧ jo̧rȩtadëtäreji̧ri̧rea̧rȩ. Tjamo̧ davä. 'Parata chjipararira̧ cji̧däa̧ oa cjiamȩ pio judimi̧ da jirodida, ta̧dëra̧ jëdano̧a̧ oa cjiamȩ pio judimi̧ da jirodida, ja̧di da cjia jirodida' quëna̧ jo̧rȩtadëtäreji̧ri̧rea̧rȩ. Jabechji̧ pumȩ marea̧rȩ. 'Ütë tjamo̧ judi ja̧di da cjia jirodida' quëna̧rea̧mi̧dërea̧rȩ —yo̧a̧dejȩrȩ—. Jabechji̧ ibëa̧ chji̧ri pio judiri cjitëmȩ jo̧rȩtarea̧ra̧ pio ju̧ri̧ra̧, 'Aja̧, Ütë tjamo̧ judi ja̧di dari̧ cjia jirodida' quëna̧rea̧mi̧dëde —yo̧a̧dejȩrȩ.

³⁰ Danȩrȩ —yo̧a̧dejȩrȩ Pablo judi—. Pearä judi pumȩ judiro̧ chjai̧dëri̧ japea̧ ba oa chjaodëri̧ bape chjaotärea̧ ji̧, ma̧ chjua jo̧rȩtamȩrȩ darëremȩdejȩrȩ Ütë tjamo̧ judi, chjai̧dë pio ju̧i̧ dae ano̧mi̧ dari̧. Pio jȩa chjiari dabadëa̧ oaiä, jabechji̧ chjaodëri̧ bape chjaodërëremȩdejȩrȩ. Jabo ja̧didëde pio yaba̧mȩ oa —yo̧a̧dejȩrȩ—. Jabechji̧ ütëbodärä oa ano̧ mire jo̧rȩtatä chi̧dëeatadiibe yaba̧. Pumȩ judiro̧ chjai̧dëri̧ japarërea̧ pio ju̧i̧ putu jura̧ a̧dë chami̧ dari̧ chjere jo̧rȩtatä eamȩrȩ chi̧dëeatadiibe yaba̧ to̧bari̧.

³¹ Jabo yo̧chji̧coe. ¿Tjana̧ ju̧i̧iä ano̧ mire jo̧rȩtatä eadiibe Ütë tjamo̧ judi? Tjana̧ ju̧i̧iädë, jabechji̧ pumȩ ütëbodärä oa ütarë bape chjaopea̧ do üdë ütara̧ oa cjiade yaba̧. Aja̧, pio jiro do üdë china̧chjari̧ tutia̧ oa cjiade. Ado pio jiro doro Ütë tjamo̧ judi pumȩ ütëbodärä oa, chiri nö̧ta oa cjo̧ro̧ji̧ri̧ pumȩ pio ji̧ri̧ ütëbodärä oa ütarë bape chjaopadejȩrȩ, jënȩ mitëa̧ üi̧ pio ju̧i̧iä. Aja̧, jënȩ mitëa̧ üi̧ pio ju̧i̧iä ütarë bape chjaopadejȩrȩ coëma cjiari̧ japamȩrȩ, cja̧rȩmȩ ba chiara̧ damȩrȩ, oëra̧ ütararea̧ decjiari̧. Ado mȩnȩro̧ pio jiro üi̧ üdë, ¿chjiacjivadi? quëna̧chea oa, jabechji̧ ja̧boa̧rëremȩ pio ju̧i̧ bëdü tänȩrëremȩdejȩ Ütë tjamo̧ judi. Ado danȩrȩ, judi ja̧di dari̧ japea̧ oaiä, 'Aja̧, pio judi tjamo̧dida, ibë ütarë bape chjaopamȩ pio judidida' quëna̧rea̧mi̧ dari̧ na̧rȩrëremȩdejȩrȩ pumȩ ji̧ri̧ pio jiro üi̧ pio ju̧i̧ chjiari. Aja̧ ca̧ pumȩ, pio ju̧i̧iä chjadëri̧ ano̧ mire jo̧rȩtatä eadiibe Ütë tjamo̧ judi —yo̧mȩrȩ ni̧bä chjaorëremȩdejȩrȩ Pablo judi Atenaräpȩ cjo̧ro̧ji̧ri̧ pio ji̧ri̧.

³² Ado judi ja̧di ta̧rëri̧ ni̧bä chjaomȩ oa ta̧rëa̧ oaiä, ja̧boa̧mȩ judi bëdüa̧ pio ju̧i̧ chjiari yo̧a̧ oa ta̧rëa̧ oaiä, o judiro̧ airi̧ cjia airi cjia chjaocjiaji̧ri̧pea̧diro̧jo̧ȩ. Jabo o judiro̧ yo̧a̧diro̧jo̧ȩ: —Danȩ, ado chjereno̧ ta̧rëtämi̧ cjiarea̧ro̧mȩ ado cja̧rȩmo̧ doro —yo̧a̧diro̧jo̧ȩ.

³³ Ado ja̧dëa ji̧ Pablo judi a̧doparea̧ bëri pio judiri go̧düa̧de.

³⁴ Ado oari judiro̧ orë cho̧rë jäa̧diro̧jo̧ȩ. Ado quëna̧ji̧ri̧pea̧dirȩ. Cja̧rȩmȩrȩ cjo̧ro̧rëremȩde Dionichio quȩmȩ judi. Areopago quȩmȩ a̧doparea̧räpȩ tjamo̧ yo̧mȩrȩ a̧dope chjaorëremȩde. Aja̧, pio judi quëna̧mȩpea̧de. Ado cja̧rȩmo̧rȩ peaja̧di quëna̧yi̧pea̧nȩ. Damari quȩyi̧ pio jini̧borë quëna̧yi̧pea̧nȩ. Ado o judiro̧ peaja̧di quëna̧ji̧ri̧pea̧dirȩ, jabo orëmo̧rȩ.