Japarea̧ 16 - Biblia Pume

Pablo judi mitërëremȩdejȩ Timoteo ju̧i̧ pio jȩa nö̧ta ja̧bepapea̧ oa

¹ Ado Pablo judi go̧düdärärëremȩde Derebe quȩmȩ bë ma̧ri̧räpȩ. Ado judiri jämȩrȩ go̧düdäräa̧de Irichara quȩmȩ bë ma̧ri̧räpȩ. Ado ju̧ri̧pȩ dëbëdiärëremȩdejȩ Timoteo quȩmȩ ju̧i̧, Jechu ju̧i̧iäpȩmo̧ quëna̧mȩ pio ju̧i̧. Ado jea̧ nö̧riyi̧ jini̧ judiorëreyi̧nȩ, jabo nö̧rimȩ judi giriegorëremȩde. Ado jo̧ji̧ni̧ jini̧ jabechji̧ quëna̧yi̧rȩ cjo̧ro̧rëreyi̧ne.

² Ado Irichararäpȩ quëna̧ji̧ri̧ judiro̧ ütëborë, 'Aja̧, Timoteo judi pumȩ chjadë tjamo̧dida' quëna̧ jo̧rȩtaji̧ri̧rȩ chjadëri̧ ni̧bä marëreji̧ri̧dirȩ pio ju̧i̧ chjiari. Ado Iconio quȩmȩ bë ma̧ri̧räpȩ quëna̧ji̧ri̧ judiro̧ peaja̧di dari̧ jo̧rȩtarëreji̧ri̧dirȩ pio ju̧i̧ chjiari.

³ Ado Pablo judi, 'Aja̧, Timoteo judi ca̧ jadütäremȩdida' quëna̧ jo̧rȩtamȩpea̧de. Jabo chjaodëri̧ mitëtärea̧ ji̧, jo̧ȩra̧pe mitëdëa̧dejȩ. Jabechji̧ judiro̧ jäpea̧räpȩ cjo̧ro̧ji̧ri̧ judio judiro̧ ütëborë daba marëreji̧ri̧dirȩ Timoteo ja̧ jäja pio ju̧i̧ chjiari. 'Jabo Giriegodida, judiodëdida, ado pio ju̧i̧iä joja üdë budoa̧ oa cjiadëdida' quëna̧ daba marëreji̧ri̧dirȩ. Pio ju̧i̧iä Pablo judi Timoteo ju̧i̧ mitëbea yaboi̧, jabechji̧ budoa̧dejȩ judio judiro̧ ana̧ri̧ jo̧rȩtachea oa, Timoteo pio ju̧i̧ badë dachea oa. Ado ja̧di dari̧ japea̧ duri oa, dëdë, mitërëremȩdejȩ jibëa̧ jadüpe bagari̧.

⁴ Ado Pablo judi jibëa̧ jadüborë ana̧ri̧ tai̧ chjaoji̧ri̧rȩ bë ma̧ri̧ nö̧tai̧ oa go̧düdärärëreji̧ri̧dirȩ. Ado quëna̧ji̧ri̧ ütëbodärä oa ni̧bä chjaorëreji̧ri̧diro̧jȩrȩ ma̧ȩ pio ju̧i̧ chjiari, Jerucharȩräpȩ tjamo̧ yo̧ji̧ri̧ pio judiro̧ go̧ȩpe chjadüa̧ ma̧ȩ pio ju̧i̧ chjiari. Aja̧, Jechurë chjadüa̧ judiro̧, ado tjamo̧ jidaji̧ri̧ pio judiro̧borë go̧ȩpea̧ ma̧ȩ pio ju̧i̧ chjiari ni̧bä chjaoriärëreji̧ri̧diro̧jȩrȩ quëna̧ji̧ri̧ pio ji̧ri̧iäpȩmo̧, judiro̧ jäa̧rea̧räpȩ nö̧ta. Pio jiro ma̧ȩ oa chjadëri̧ ta̧rëdiätä yo̧a̧diro̧jȩrȩ.

⁵ Pio ju̧i̧iä quëna̧ji̧ri̧ judiro̧, oëra̧ti̧ oa a̧dopaji̧ri̧ pio judiro̧ ji̧dë u̧i̧ chjuari̧ quëna̧ji̧ri̧pea̧dirȩ torë cjiami̧ dari̧. Ado do nö̧ta no̧i̧dërë a̧de quëna̧ji̧ri̧pe bagarëreji̧ri̧dirȩ, goëje ji̧ra̧ tjamo̧pe järea̧mi̧ dari̧.

Toroa quȩmȩräpȩ ju̧ri̧ darämi̧ cjiarëremȩde Pablo judi

⁶ Judiro̧ Achia quȩmȩ chiriräpȩ a̧ra̧ano̧pea̧ oa jätärea̧ ji̧, jädëa̧dirȩ Tjo tjamo̧ pio judi tutimi̧ dari̧ chi̧dëea̧ oaiä. Pio ju̧i̧iä ano̧ mire jäji̧ri̧rȩ järëreji̧ri̧dirȩ Pjirigia quȩmȩ chiri oa, Garachia quȩmȩ chiri oa.

⁷ Ado judiro̧ Michia quȩmȩ chiri yuroräpȩ go̧düdäräa̧rä, Bitinia quȩmȩ chiriräpȩ jäpatea̧dirȩ, jabo cjäri̧ madejȩrȩ, Jechu ja̧ Tjo pio judi järea̧ yürüdëa̧dejȩrȩ.

⁸ Pio ju̧i̧iä ano̧ mire jäji̧ri̧rȩ Michia quȩmȩ chiri tjomo̧ oa chjätärëreji̧ri̧dirȩ Toroa quȩmȩ bë ma̧ri̧räpȩ yuro.

⁹ Ado gȩnȩpea̧rä Ütërë da tänȩa̧ oa darämi̧ cjiarëremȩde Pablo judi. Jabechji̧ Machedoniaräpȩ cjiamȩ üi̧ pio ju̧i̧ darämi̧ cjiarëremȩdejȩ. “A̧doera̧chji̧ibe. Ui ana̧ jauëräpȩmo̧ ma̧na̧ibe Machedoniaräpȩ“ ëna̧diämȩ oa ta̧rërämi̧ cjia̧dejȩ.

¹⁰ Ado Pablo judi pio jiro üi̧ pio ju̧i̧ darämi̧ cjia ëte, chjaodëri̧ cjitëno̧a̧rea̧rȩ jëdano̧pea̧ oa. Ado jëdano̧ ëte, chjaodëri̧ go̧düa̧rea̧rȩ Machedoniaräpȩ jäpea̧ oa. 'Jaebodiibëda, Ütë tjamo̧ pio judi ma̧ȩ yürüa̧diibëda, pio ju̧ri̧pȩ cjo̧ro̧ji̧ri̧ pumȩ pio ji̧ri̧iäpȩmo̧ a̧ra̧ano̧pea̧ oa ma̧ȩ yürüa̧diibëda, ma̧ȩ chjadëi̧ pio ju̧i̧ a̧ra̧ano̧pea̧ oa ma̧ȩ yürüa̧diibëda' quëna̧ jo̧rȩtaji̧ri̧rȩ chjaodëri̧ go̧dürëreji̧ri̧rea̧rȩ. Ado pio yoa ma̧ȩ oa go̧ȩpamȩ judi Uruca quȩmȩ pio judide. Ado pio judirequede cüdë. Jabechji̧ pio cüdëborë tai̧rëremȩrequede Pablo pio ju̧i̧ nö̧ta.

Iridia quȩyi̧ jini̧ quëna̧yi̧pe järëreyi̧nȩ Pjiriporäpȩ

¹¹ Toroa bë ma̧ri̧ri pio judiri jäji̧ri̧rȩ järëreji̧ri̧rea̧rȩ uimo̧mȩ chara ana̧ra̧. Chamotarachia quȩmȩ chiriräpȩmo̧ tjamo̧i̧ jäa̧rea̧rȩ ui tjoro chamȩ chiriräpȩmo̧. Ado ju̧ri̧pȩ go̧düdärä ëte dopea̧rä, chjaodëri̧ go̧düa̧rea̧rȩ Neopori quȩmȩ bë ma̧ri̧räpȩmo̧. Jabechji̧ uimo̧mȩ chara ana̧ra̧ tai̧rëreji̧ri̧rea̧rȩ.

¹² Ado jiro bë ma̧ri̧ri judiri chiri oa tai̧ji̧ri̧rȩ jäa̧rea̧rȩ Pjiripo quȩmȩ bë ma̧ri̧räpȩ, domano maearë cjo̧ro̧rërea̧räpȩ. Ado pio jiro bë ma̧ri̧ üdë, Machedonia quȩmȩ chirirä cjiamȩ bë ma̧ri̧ üdë, jabechji̧ ba chia tjamo̧rëremȩde. Ado a̧ro̧rȩ do ji̧ra̧ tjamo̧dëri̧ cjiadiärëreji̧ri̧rea̧rȩ pio ju̧ri̧pȩ.

¹³ Ado järätä chjaparea̧ doro, bë ma̧ri̧ dairäpȩ jäa̧rea̧rȩ bea yuroropȩ. 'Jabechji̧ judio judiro̧ pio ju̧ri̧pȩ a̧dopa jirodiro̧da, Ütë tjamo̧ pio ju̧i̧iäpȩmo̧ ni̧bäpea̧ oa bea yuroro a̧dopa jirodiro̧da' quëna̧ jo̧rȩtaji̧ri̧rȩ jäa̧rea̧rȩ. Ado ivi jini̧ro̧ pio ju̧ri̧pȩ a̧dopaji̧ri̧ oa ni̧bä chjaoji̧ri̧pea̧rea̧ro̧jȩrȩ.

¹⁴ Ado cja̧rȩmȩrȩ, ibë ta̧rë chayi̧ pio jini̧ Iridia quȩyi̧rëreyi̧nȩ. Tiatira quȩmȩ bë ma̧ri̧ri pio judirirëreyi̧nȩ. Chjibo coto coëcoëa oa, ba chia oa gatë tänȩyi̧rȩ cjo̧ro̧rëreyi̧nȩ. Ado jini̧ judiodëräbo, jabechji̧ Ütë tjamo̧ pio ju̧i̧iäpȩmo̧ chjacjiamȩri̧ jo̧rȩtayi̧rȩ cjo̧ro̧rëreyi̧nȩ. Ado Pablo judi a̧ra̧ano̧rërea̧ ji̧, jabechji̧ oëra̧ti̧ oa a̧dë jo̧rȩtarea̧ decjiari̧ ba chia ta̧rë charëreyi̧nȩjȩ, Ütë tjamo̧ pio judi tänȩa̧ oaiä. Ado quënayi̧pea̧nȩ.

¹⁵ Ado pio jȩa nö̧ta cjo̧ro̧ji̧ri̧ pio judiro̧borë quëna̧ji̧ri̧pea̧dirȩ. Ado judiro̧ quëna̧ji̧ri̧pea̧ oaiä, jabechji̧ go̧e cjaeä chuda̧ oa cjiadiärëreji̧ri̧dirȩ Iridia pio ji̧ nö̧ta. Ado chuda̧ oa cjia ëte, yo̧a̧ni̧ibe: —Danȩrȩ, jabechji̧ ma̧na̧chji̧vä ca̧ bëräpȩ cjo̧ro̧pea̧ oa —yo̧a̧ni̧ibe—. Mȩnȩro̧ pio coa chjiari tjamo̧ri̧ quëna̧rä judi, 'Aja̧, Ano̧mȩ Jechu pio ju̧i̧ tjamo̧ri̧ quëna̧yi̧pea̧ni̧da' quëna̧rä judi, jabechji̧ ca̧ bëräpȩ ma̧na̧chji̧vä —yo̧a̧nȩjȩrȩ. Ado pio jiro iei̧ pio jini̧ ibë ji̧dë ma yabëa̧ oaiä, jabechji̧ baäa̧rea̧rȩ pio ji̧ nö̧ta.

Pablo judi Chiraborë chaäa̧ oa cjiadiärëreji̧ri̧dirȩ Pjiriporäpȩ

¹⁶ Ado cja̧rȩmo̧ doremȩrä, a̧ro̧rȩ Ütë tjamo̧ pio ju̧i̧iäpȩmo̧ ni̧bäpea̧räpȩ järërea̧ ji̧, dëbëdiärëreji̧ri̧rea̧ro̧jȩ iei̧ ji̧, yaröca chiayi̧ ji̧. Pumȩrȩ gatëa̧ oa mu̧i̧tjoi̧yi̧rȩ cjo̧ro̧rëreyi̧nȩ. Ado yaröca üdë pio jȩaiäpȩmo̧ dabarea̧ yürüa̧ oaiä, jabechji̧ dabarea̧mi̧dë pio ju̧i̧ dabarëreyi̧nȩ. Tjamo̧ davä. Ado cja̧rȩmo̧ doro chjätapea̧ pio ju̧i̧ chjiari, ado cja̧rȩmo̧ chemanarä ma̧na̧pea̧ pio ju̧i̧ chjiari jabërä dabarëreyi̧nȩ dabarea̧mi̧dëräbo. Ado pio ju̧i̧iä pumȩ judiro̧ jädiärëreji̧ri̧diro̧jȩ pio ji̧iä ma̧ȩ ta̧rëpea̧ oa pio jibë chjiari. Aja̧, judiro̧ ado cja̧rȩmo̧ doro chjätäpea̧ pio ju̧i̧ chjiari ta̧rëpea̧ oa, ado cja̧rȩmo̧ gupënȩrä chjätäpea̧ pio ju̧i̧ chjiari dabapea̧ oa, jädiärëreji̧ri̧diro̧jȩ. Ado pio jiro iei̧ jini̧ ja̧di dari̧ japea̧ oaiä, jabechji̧ chëre ji̧ra̧ri̧ boarëreyi̧nȩ jibëa̧ ano̧ji̧ri̧ ja̧ oa.

¹⁷ Jabo cjäri̧ mani̧ibe. Pio jiro iei̧ pio jini̧ ibë nö̧ta dëbëdiäa̧ ji̧, ji̧dë ma cho̧rë järëreyi̧ni̧ibe Pablo pio ju̧i̧bo. Ji̧dë ma ëna̧diäyi̧rȩ cho̧rë järëreyi̧ni̧ibe: —Aja̧, pio jiro oari judiro̧ a̧dë chjäte Ütë pio ju̧i̧ ja̧ mu̧i̧tjoi̧dirȩ. Mȩnȩro̧ chjätärea̧mi̧ dari̧ a̧ra̧ano̧ chjaodirȩ —yo̧yi̧rȩ ëna̧ quirati̧ cjiarëreyi̧nȩ cjiadiädëri̧.

¹⁸ Tjaoërämo̧i̧dë jabo doti̧mi̧ jape chjaorëreyi̧ni̧ibe goae tjamo̧dëpe bagari̧. Pio ju̧i̧iä Pablo judi goëdëri̧ cjiapea̧de. Ado iei̧ pio ji̧iäpȩmo̧ mȩmȩrȩpë cjiadiämȩrȩ to̧bari̧ yo̧a̧dejȩ yaröca pio ju̧i̧iäpȩmo̧: —Jechu Quiricho pio ju̧i̧ ja̧ quȩrä yo̧tarequedemȩ. A̧dë go̧düje pio jiro iei̧ ji̧ —yo̧a̧dejȩ. Ado yaröca üdë chjaodëri̧ a̧dë go̧düa̧dejȩ.

¹⁹ Jabo iei̧ mu̧i̧tjoi̧ ana̧ji̧ri̧ judiro̧ pio ji̧ daea̧ oaiä, ana̧ri̧ jo̧rȩtaji̧ri̧pea̧dirȩ ma̧ cjüëtü tjamo̧pe bagari̧. 'Jabo cjäri̧ madida, yaröca üdë a̧dë baäa̧diji̧da, chëre boarea̧mi̧dëpea̧ni̧da yaba̧, badëri̧ cjiadiäpaa̧ro̧da' quëna̧ jo̧rȩtaji̧ri̧rȩ chjuari̧ mitëa̧diro̧jo̧ȩ Pablo ju̧i̧, Chira pio ju̧i̧bo. Ado chjua̧ri̧ mitë ëte mu̧i̧ järëreji̧ri̧diro̧jȩrȩ domano tjamo̧ yo̧ji̧ri̧ pio ji̧ri̧iäpȩ, gatë tänȩrea̧ bë ji̧ra̧räpȩ.

²⁰ Ado domano tjamo̧ yo̧ji̧ri̧ pio ji̧ri̧ ja̧ dëbëräpȩ cjia tänȩrërea̧ ji̧, pio ji̧ri̧iäpȩmo̧ aechide yo̧ji̧ri̧rȩ ja̧di ta̧rëri̧ yo̧rëreji̧ri̧diro̧jȩrȩ: —Danȩrȩ, pio yodëro̧je ma̧i̧ dari̧ jape chjaodiro̧ibe —yo̧a̧diro̧jȩrȩ—. Jabechji̧ a̧ro̧rȩ pio yoaiä ibëa̧ bëräpȩ chjadëri̧ cjo̧ro̧rea̧mi̧dëri̧ jape chjaodiro̧ibe. Ado judiodirȩ ji̧dëri̧.

²¹ Ado cja̧rȩmo̧ a̧ra̧ano̧rea̧ chiadirȩ. Jabechji̧ a̧ro̧rȩ dabapea̧ ma̧ȩ pio ju̧i̧ jiadatä yo̧tadiro̧ibe. China̧chja pio ju̧i̧ japatä eadiro̧ibe. Jabo cjäri̧ marea̧rȩ. Domanorea̧rȩ. Judio judiro̧ a̧ra̧ano̧a̧mi̧ ta̧rë ja̧borea̧mi̧dërea̧rȩ —yo̧ji̧ri̧rȩ aechide yo̧rëreji̧ri̧diro̧jȩrȩ.

²² Ado a̧dopea̧ oa cjiaji̧ri̧ pumȩ bubarë pio ji̧ri̧ ja̧ ma̧ȩ oa ta̧rëa̧ oaiä, taruparëreji̧ri̧dirȩ pio ji̧ri̧iäpȩmo̧ cjae cjae guapea̧ ji̧. Aja̧, Pablo ju̧i̧, Chira ju̧i̧ cjae cjae guaji̧ri̧pea̧diro̧jȩrȩ. Ado tjamo̧ yo̧ji̧ri̧ judiro̧ pio ju̧i̧ daea̧ oaiä, jabechji̧ jibëa̧ chjibo oa cjüëatä yo̧a̧diro̧jȩrȩ o ji̧ri̧. Ado ja̧di dari̧ japa ëte, bide cjaeäa̧diro̧jȩrȩ. Tjamo̧ yo̧ji̧ri̧ pio judiro̧ yo̧a̧ oaiä bide cjaeäji̧ri̧ pio judiro̧ goae tarari̧ bide cjaeärëreji̧ri̧diro̧jȩrȩ tora̧, chibo ina̧dëji̧ri̧ oa.

²³ Pumȩ taradai̧ tarari̧ bide cjaeäa̧diro̧jȩrȩ, goe chia maeari̧. Ado bide cjaeäa̧ duri oa chaätä yo̧a̧diro̧jo̧ȩ chaärea̧räpȩ tjamo̧ jidamȩ pio ju̧i̧iäpȩmo̧. Go̧dürea̧mi̧dëri̧ jidatä yo̧a̧diro̧jo̧ȩ.

²⁴ Pio ju̧i̧ ta̧rëmȩrȩ chaäa̧dejȩrȩ chaärea̧ jo̧ tjo tjamo̧räpȩ, go̧dürea̧mi̧dëräpȩ. Ado to pjatë chacha cjararä acji jui cjia tänȩa̧dejȩrȩ jibëa̧ ta oa.

²⁵ Jabo gȩnȩ tjomo̧pea̧rä, Pablo judi, Chira pio judiborë ni̧bärëreji̧ri̧diro̧jo̧ȩ Ütë tjamo̧ pio ju̧i̧iäpȩmo̧. Ado chjacjiamȩri̧ jo̧rȩtaji̧ri̧rȩ go̧a̧rëreji̧ri̧diro̧jo̧ȩ peaja̧di. Chaäa̧ oa cjiaji̧ri̧ pumȩ pio judiro̧ ta̧rëri̧ go̧a̧rëreji̧ri̧diro̧jo̧ȩ.

²⁶ Ado chjaodëri̧ jö̧nö̧jö̧nö̧ai̧ cjiari̧ cjiapea̧de dabu üdë cjiarea̧mi̧dëri̧. Chaärea̧ bërë cjiamȩ dabuborë ma̧i̧ dari̧ jö̧nö̧jö̧nö̧ai̧pea̧de tutirea̧ joë ya üdë chjö̧na̧i̧rȩ are ië baä maeari̧, chatu chiamȩ chjipararirë, acji juirea̧ üdë a̧dë cjatä maeari̧.

²⁷ Ado chaärea̧ bë tjamo̧ jidamȩ pio judi mo̧a̧remȩrȩ bëdürërea̧ ji̧, tuti cararea̧ joë yarë are ië ma cjiamȩ oa daea̧ ji̧, 'Jabo cjäri̧ madiro̧da, chaäa̧ oa cjiaji̧ri̧ judiro̧ ütëborë goadi baäa̧ maea jirodiro̧da' quëna̧ jo̧rȩtamȩrȩ arë go̧düëno̧a̧dejȩ jibëa̧ tjapënȩ oa, dëbëribo jo̧dë chiamȩ tjapënȩmi̧ da pio ju̧i̧. Jibëa̧ iräpȩmo̧ gua ëte ja̧bopea̧ oa arë go̧düëno̧a̧dejȩ.

²⁸ Jabo Pablo judi pio ju̧i̧ irä damȩrȩ to̧bari̧ ëna̧diäa̧dejȩ: —Jabo cjäri̧ marenȩ, na̧ iräpomo̧ gua ëte ja̧bodëvä. Jabechji̧ pio yi marea̧rȩ. Goadi baädë marea̧rȩ —yo̧a̧dejȩ.

²⁹ Ja̧dëa ji̧ chaärea̧ bë tjamo̧ jidamȩ judi jibëa̧ mu̧i̧tjoi̧ pio ju̧i̧iä tataparea̧ oa goa jana̧tä yo̧eno̧ ëte, jäëno̧a̧dejȩ Pablo pio ju̧i̧iäpȩ. Ado uapa tjamo̧mȩrȩ, i ma̧na̧ guramȩrȩ juchatura̧ cjiadärärëremȩde Pablo ja̧ dëbëräpȩ, Chira ja̧ dëbëräpȩ.

³⁰ Ja̧dëa ji̧ chaärea̧ bë dairäpȩ ëba go̧düa̧ duri oa, iëno̧ë ta̧rëa̧dejȩrȩ: —Danȩrȩ oari, ¿tjana̧ japapea̧ chiarequede chjätärea̧ dapea̧ oa?

³¹ Ado dëbë yo̧ji̧ri̧rȩ yo̧a̧diro̧jo̧ȩ: —Tjana̧ japapea̧dë, jabechji̧ quëna̧pea̧ chiarenȩ Ano̧mȩ Jechu pio ju̧i̧. Na̧ pumȩ judiro̧ peaja̧di quëna̧täreji̧ri̧diro̧jo̧ȩ. Jabechji̧ pio ju̧i̧iämo̧i̧ chjätärea̧mi̧ dade —yo̧a̧diro̧jo̧ȩ.

³² Ado ja̧dëa ji̧ Pablo judi, Chiraborë a̧ra̧ano̧rëreji̧ri̧diro̧jo̧ȩ Ano̧mȩ ja̧ ma̧ȩ oa chaärea̧ bë tjamo̧ jidamȩ pio ju̧i̧iäpȩmo̧. Pio ju̧i̧ ja̧ pumȩ pio ji̧ri̧iäpȩmo̧bo a̧ra̧ano̧rëreji̧ri̧diro̧jȩrȩ.

³³ Ado ja̧dëa ji̧ jabë gȩnȩ tjomo̧ro tjamo̧ jidamȩ pio judi chjadëri̧ joaë yürürëremȩdejȩrȩ bide cjaeäa̧rea̧ coremȩ oa, goeremȩ oa. Ado ju̧i̧ japea̧ duri oa go̧e cjaeä chuda̧ oa cjiaji̧ri̧pea̧dirȩ. Tjamo jidamȩ pio judi, ado jibëa̧ pumȩ pio judiro̧borë uirä go̧e cjaeä chuda̧ oa cjiaji̧ri̧pea̧dirȩ.

³⁴ Ado ëba jäa̧dejȩrȩ jibëa̧ bëräpȩ. Ado chjadëri̧ ëba jura̧dejȩrȩ. Ado tjamo̧ jidamȩ judi jibëa̧ pumȩborë ma̧ chiadëri̧ cjia tjamo̧rëreji̧ri̧dirȩ. Jabechji̧ judiro̧ Ütë tjamo̧ pio ju̧i̧iäpȩmo̧ quëna̧ji̧ri̧pea̧ oaiä, ma chiadëri̧ cjia tjamo̧rëreji̧ri̧dirȩ.

³⁵ Ja̧dëa ji̧ dopea̧rä domano tjamo̧ yo̧ji̧ri̧ judiro̧ guadia pio ji̧ri̧iä ma̧ȩ chjadürëreji̧ri̧diro̧jo̧ȩ chaärea̧ bë tjamo̧ jidamȩ pio ju̧i̧iäpȩmo̧. Aja̧, Pablo pio ju̧i̧, Chira pio ju̧i̧ baä tänȩtä yo̧ji̧ri̧rȩ ma̧ȩ chjadüa̧diro̧jo̧ȩ.

³⁶ Pio ju̧i̧iä yo̧a̧dejȩ Pablo ju̧i̧: —Danȩ, Domano tjamo̧ yo̧ji̧ri̧ pio judiro̧ pea ma̧ȩ chjadüa̧diro̧coe dibë chjadëri̧ baä tänȩtä.

³⁷ Jabo Pablo judi pio ju̧i̧ ta̧rëa̧ oaiä, ma̧ȩ yürera̧pea̧ji̧ri̧ pio ji̧ri̧iä yo̧a̧dejȩrȩ guadia pio ji̧ri̧iäpȩmo̧: —Jabo cjäri̧ madiro̧ibe. Ja̧di dari̧ japarea̧ dadëpadiro̧ibe —yo̧a̧dejȩrȩ—. Danȩrȩ, a̧ro̧rȩ domano pumȩräbo, ma̧i̧ dari̧ japea̧diro̧ibe. A̧ro̧rȩ chjai̧dëri̧ japadëji̧ri̧ oa goae tarari̧ bide cjaeäa̧diro̧ibe chjadëri̧ iëno̧ iëno̧ë ta̧rëdë ëte. Ütëborë darea̧mi̧ dari̧ bide cjaeäa̧diro̧ibe domano pumȩji̧ri̧ oa. Bide cjaeädëtärea̧ ji̧ bide cjaeäa̧diro̧ibe jibëa̧ pumȩ pio ji̧ri̧. Ado ja̧dëa ji̧ chaäa̧diro̧ibe ji̧dëri̧. Ado yaba̧ chaärea̧ bëri pio judiri cjapiri̧ goadi baätä ¿eadiro̧ibe? Cjäri̧ marea̧rȩ. Cjapiri̧ goadi baädëparea̧rȩ. Jabechji̧ tjamo̧ yo̧ji̧ri̧ pio judiro̧ jana̧tädirȩ pio ibë chjadëri̧ go̧dü tänȩpea̧ ji̧ —yo̧a̧dejȩrȩ.

³⁸ Ja̧dëa ji̧ guadia judiro̧ Pablorë yo̧a̧ pio ju̧i̧ goë yo̧a̧diro̧jȩrȩ domano tjamo̧ yo̧ji̧ri̧ pio ji̧ri̧iäpȩmo̧. Ado yo̧a̧ oa ta̧rëa̧ oaiä, "Domano pumȩdirȩ” yo̧a̧ oa ta̧rëa̧ oaiä, uapaji̧ri̧pea̧dirȩ.

³⁹ Ado chaärea̧ bëräpȩ jäji̧ri̧rȩ jäeno̧a̧diro̧jȩrȩ. Ado yo̧a̧diro̧jȩrȩ: —Danȩrȩ, chjai̧dëri̧ japea̧rea̧ro̧dibe. Ja̧di dari̧ japadëa̧täreji̧ri̧rea̧ro̧dibe. Jabechji̧ cjäri̧ri̧ cjia daibe —yo̧a̧. Ado ja̧di dari̧ yo̧ ëte, chjadëri̧ go̧dü tänȩrëreji̧ri̧diro̧jȩrȩ chaärea̧ bëri pio judiri. Yabo ëba baäji̧ri̧rȩ go̧dü tänȩrëreji̧ri̧diro̧jȩrȩ. Ja̧dëa ji̧ bë ma̧ri̧ri pio judiri a̧dë baätä yo̧rëreji̧ri̧diro̧jȩrȩ.

⁴⁰ Jabo jo̧ȩra̧pe a̧dë baädëji̧ri̧rȩ Iridia ja̧ bëräpȩ jäëno̧a̧dirȩ. Ado ju̧ri̧pȩ a̧dopaji̧ri̧pea̧dirȩ quëna̧ji̧ri̧ pio ji̧ri̧ nö̧ta. Ju to̧baparȩmi̧ dari̧ japapea̧ oa, ju chiaparȩmi̧ dari̧ japapea̧ oa a̧ra̧ano̧rëreji̧ri̧diro̧jȩrȩ. Ado ja̧di dari̧ japa ëte, baärëreji̧ri̧dirȩ.