Japarea̧ 15 - Biblia Pume

Jechu pio ju̧i̧iämo̧i̧ chjätäpea̧ pio ju̧i̧ chjiari ni̧bä chjaopea̧ oa a̧doparëreji̧ri̧dirȩ Jerucharȩräpȩ tjamo̧ yo̧ji̧ri̧ judiro̧

¹ Ado oari judiro̧, Judea quȩmȩ chiriri pio judiriji̧ri̧ pio judiro̧ A̧tioquiaräpȩ go̧düdärärëreji̧ri̧dirȩ. Ado ju̧ri̧pȩ go̧düdärä ëte, a̧ra̧ano̧ji̧ri̧pea̧diro̧jȩrȩ quëna̧ji̧ri̧ pio ji̧ri̧. “Aja̧, Moicherë go̧ȩparërea̧ ma̧ȩrä budoa̧ oa cjiapea̧ chianȩrȩ” yo̧rëreji̧ri̧diro̧jȩrȩ. “Jabechji̧ mȩnȩro̧ budoa̧ oa cjiarämo̧ chjätärea̧ dapanȩrȩ” yo̧a̧diro̧jȩrȩ.

² Jabo cjäri̧ madiro̧jȩrȩ, judiro̧ ja̧di ta̧rëri̧ a̧ra̧ano̧a̧ oaiä, Pablo judi Bernabeborë goae tarari̧ ni̧bä chjaoji̧ri̧pea̧diro̧jȩrȩ, dëbëpe chjaomi̧ dari̧. To̧bari̧ ni̧bätaji̧ri̧pea̧dirȩ japamitë. Ado pio ju̧i̧iä a̧dopaji̧ri̧ pio judiro̧, 'Jabechji̧ Jechurë chjadüa̧ pio ji̧ri̧iä irä ta̧rëpea̧dida' quëna̧ jo̧rȩtaji̧ri̧pea̧dirȩ. 'Aja̧, tjamo̧ jidaji̧ri̧ pio ji̧ri̧iä ta̧rëpea̧dida, budopea̧ pio ju̧i̧ chjiari chjadëri̧ ta̧rëpea̧dida, Jerucharȩräpȩ tjamo̧ yo̧ji̧ri̧ pio ji̧ri̧iä ta̧rëpea̧dida, ado pio ju̧i̧iä pumȩ ji̧ri̧ pio ju̧ri̧pȩ chjadütäreji̧ri̧a̧ro̧ji̧ri̧da' quëna̧ jo̧rȩtaji̧ri̧rȩ mitërëreji̧ri̧diro̧jo̧ȩ Pablo ju̧i̧, Bernabe pio ju̧i̧bo. Aja̧, pio ji̧ri̧ mitëa̧diro̧jȩrȩ o ji̧ri̧bo Jerucharȩräpȩ chjadüpea̧ oa, judiro̧ chjadëri̧ ta̧rëpea̧ oa budopea̧ pio ju̧i̧ chjiari.

³ Ja̧dea̧ ji̧ A̧tioquiaräpȩ a̧doparea̧ üdë chjadüa̧ oa järëreji̧ri̧dirȩ. Ado jäji̧ri̧rȩ Pjenichia quȩmȩ chiri oa chjätärërea̧ ji̧, Chamaria quȩmȩ chiri oa chjätärërea̧ ji̧, ni̧bä chjaorëreji̧ri̧diro̧jȩrȩ judiodë pio ji̧ri̧ chjiari. Aja̧, Judiodë judiro̧ ano̧ mire jo̧rȩtapea̧ pio ju̧i̧ chjiari, Ütë tjamo̧ pio ju̧i̧iäpȩmo̧ ano̧ mire quëna̧pea̧ pio ju̧i̧ chjiari ni̧bä chjaoa̧diro̧jȩrȩ. Ado idëpȩ quëna̧ji̧ri̧ judiro̧ pio ju̧i̧ ta̧rëa̧ oaiä, ma̧ chiadëri̧ cjia tjamo̧rëreji̧ri̧dirȩ.

⁴ Ado japamitë chjätä ëte, Jerucharȩräpȩ go̧düdärärëreji̧ri̧dirȩ. Ado ju̧ri̧pȩ go̧düdäräa̧ji̧ri̧ oa, jabechji̧ a̧doparea̧ codërë cjäri̧ri̧ cjia jo̧rȩtaji̧ri̧rȩ darëreji̧ri̧diro̧jȩrȩ. Tjamo̧ davä. Jechurë chjadüa̧ judiro̧, ado tjamo̧ jidaji̧ri̧ pio judiro̧borë cjäri̧ri̧ cjia jo̧rȩtaji̧ri̧rȩ daea̧diro̧jȩrȩ, quëna̧ji̧ri̧ pio judiro̧borë. Ado ja̧dëa ji̧ Pablo judi Bernabeborë chjö̧na̧i̧ oa ni̧bä chjaorëreji̧ri̧diro̧jȩrȩ Ütë tjamo̧ judi pio jibëiä ana̧ri̧ japea̧ pio ju̧i̧ chjiari, judiodë ja̧ chjarerä ana̧ri̧ japea̧ pio ju̧i̧ chjiari.

⁵ Jabo quëna̧ji̧ri̧ judiro̧ orë, pjaricheo pio ji̧ri̧ nö̧ta a̧dopaji̧ri̧ pio judiro̧ pio ju̧i̧ ta̧rëa̧ oaiä cjitëno̧a̧dirȩ. Ado o ji̧ri̧iäpȩmo̧ ni̧bä chjaotämi̧ cjiaji̧ri̧rȩ ja̧di ta̧rëri̧ yo̧rëreji̧ri̧diro̧jȩrȩ: —Jabo danȩrȩ, pio jiro judiodë judiro̧, pea quëna̧ji̧ri̧pea̧ pio judiro̧ jabechji̧ budoa̧ oa cjiapea̧ chia maeadirȩ —yo̧a̧diro̧jȩrȩ—. Moicherë go̧ȩparërea̧ ma̧ȩrä cjo̧ro̧pea̧ chiadirȩ —yo̧a̧diro̧jȩrȩ a̧dopea̧ oa cjiaji̧ri̧ pio ji̧ri̧iäpȩmo̧.

⁶ Ado pio ju̧i̧ ta̧rëa̧ oaiä, Jechurë chjadüa̧ judiro̧, tjamo̧ jidaji̧ri̧ pio judiro̧borë a̧dopaji̧ri̧pea̧dirȩ pio ju̧i̧ chjiari ni̧bä chjaopea̧ oa, jibëa̧ma̧i̧ ni̧bä chjaopea̧ oa.

⁷ Ado japamitë ana̧ri̧ ni̧bä chjao ëte, ma̧ȩ go̧a̧ti̧ tjamo̧ oa ni̧bä chjao ëte, Pedro pio judi cjitëno̧a̧de. Ado yo̧a̧dejȩrȩ o ji̧ri̧iäpȩmo̧: —Danȩrȩ ca̧ oti̧, Ütë tjamo̧ judi pio coa mitëa̧ pio ju̧i̧ chjiari, judiodë pio ji̧ri̧iäpȩmo̧ a̧ra̧ano̧pea̧ oa mitëa̧ pio ju̧i̧ chjiari daba maeanȩrȩ —yo̧a̧dejȩrȩ—. Tjamo̧ davä. Dibëa̧ chjarerämȩ oa mitërëremȩdique ma̧ȩ chjadëi̧ pio ju̧i̧ a̧ra̧ano̧pea̧ oa judiodë pio ji̧ri̧iäpȩmo̧. Judiro̧ ta̧rëpea̧ oa, judiro̧ quëna̧pea̧ oa mitërëremȩdique.

⁸ Ado danȩrȩ, Ütë tjamo̧ judi, pumȩ chji̧räpȩmo̧ cjacjarë damȩ pio judi, 'Aja̧, judiodë pio judiro̧borë quëna̧rea̧mi̧ dadiro̧da, pio judiro̧borë chjätärea̧mi̧ dadiro̧da' quëna̧ jo̧rȩtamȩrȩ yürürëremȩdejȩrȩ Tjo tjamo̧ pio ju̧i̧. Pio ibëiäpȩmo̧ yürürërea̧mi̧ yürürëremȩdejȩrȩ peaja̧di.

⁹ 'Jabechji̧ Judiodë judiro̧ tjaoëdiro̧da, tjamo̧ri̧ eadëquiji̧ri̧da' quëna̧ jo̧rȩtamȩrȩ dadë madejȩrȩ. Jabechji̧ pio ibë dami̧ dadejȩrȩ —yo̧a̧dejȩrȩ—. Pio ibë japea̧mi̧ japea̧dejȩrȩ peaja̧di. Pio ju̧i̧iä quëna̧ji̧ri̧pea̧ji̧ri̧ oa duridëparȩa̧dejȩrȩ pio ibë japarërea̧mi̧. Ja̧di dari̧ japade Ütë tjamo̧ pio judi.

¹⁰ Ado judi ja̧di dari̧ japa tara, ¿tjana̧ ju̧i̧iä tjaoëpai̧ dari̧ japatämi̧ cjianȩrȩ? ¿Tjana̧ ju̧i̧iä ërecjia tänȩtämi̧ cjiarenȩro̧jo̧ȩ Ütë tjamo̧ ju̧i̧ judiodë pio ji̧ri̧ tja̧reparȩmi̧ dari̧ japea̧ pio ju̧i̧iä? Danȩrȩ, ibëa̧ ütëti̧rȩa̧ judiro̧ Moicherë go̧ȩparërea̧ ma̧ȩrä cjo̧ro̧pea̧ üdë chjao tjamo̧rëremȩdejȩrȩ —yo̧a̧dejȩrȩ—. Goae tjamo̧dërëremȩdejȩrȩ. Ado nö̧tadäräri̧ ta̧rëdiärea̧ dadë marëreji̧ri̧diro̧jo̧ȩ ji̧dëri̧. Ado pio ibëiä peaja̧di goae tjamo̧dërëremȩdiibe. Pio ju̧i̧iä iëno̧ë ta̧rërequededibe. ¿Tjana̧ ju̧i̧iä Moicherë go̧ȩparërea̧ ma̧ȩrä cjo̧ro̧tä earenȩro̧jȩrȩ judiodë pio ji̧ri̧?

¹¹ Cjäri̧ ma ca̧ oti̧, ja̧di dari̧ japarea̧mi̧dëde. Pio jiro ma̧ȩ oaiä chjätärea̧mi̧dëde. Jabechji̧ Ano̧mȩ Jechu pio ju̧i̧ quëna̧ oaiämo̧i̧ duridëparȩa̧ oa cjiade a̧ro̧rȩ chjai̧dëri̧ japea̧ üdë. Pio judirimȩ marë cjäri̧ri̧ cjia daea̧ pio ju̧i̧iämo̧i̧ chjätärea̧ yürüa̧diibe. Ado judiodë pio judiro̧ peaja̧di dari̧ chjätärea̧ dapadirȩ quëna̧ pio ju̧i̧iämo̧i̧ —yo̧mȩrȩ ni̧bä chjaorëremȩdejȩrȩ Chimo̧ Pedro judi.

¹² Ado Chimo̧ Pedro judi cjiadiäa̧ ji̧, cjapi maearë cjiadiärëreji̧ri̧dirȩ, dëbë yo̧rea̧ decjiari̧. Ado ja̧dëa ji̧ Pablo pio judi ano̧ mire ni̧bä chjaoa̧dejȩrȩ, Bernabe pio judiborë. Judiro̧ judiodë pio ji̧ri̧iäpȩmo̧ a̧ra̧ano̧rërea̧ pio ju̧i̧ chjiari, Ütë tjamo̧ judi pio jibëiä jauëchja cjiari̧ japea̧ pio ju̧i̧ chjiari, judi pio jibëiä ana̧ri̧ na̧rȩ chjaoa̧ pio ju̧i̧ chjiari, ni̧bä chjaorëreji̧ri̧diro̧jȩrȩ.

¹³ Ado judiro̧ ni̧bä chjaoa̧ duri oa, Santiago judi ütëbo oa ano̧ mire ni̧bä chjaotämi̧ cjiamȩrȩ yo̧a̧dejȩrȩ, ja̧di ta̧rëri̧ yo̧mȩrȩ: —Chjadëri̧ ta̧rëchji̧coe ca̧ oti̧ —yo̧a̧dejȩrȩ—.

¹⁴ Pea ta̧rëa̧rea̧rȩ Chimo̧ Pedro pio ju̧i̧iä judiodë pio ji̧ri̧ chjiari —yo̧a̧dejȩrȩ—. Aja̧, Ütë tjamo̧ judi pio ji̧ri̧iäpȩmo̧ pearä cjäri̧ri̧ cjia da̧ pio ju̧i̧ chjiari, jibëa̧pe bagapea̧ oa mitëa̧ pio ju̧i̧ chjiari pea ta̧rëa̧rea̧rȩ.

¹⁵ Ado peaja̧di ta̧rëri̧ go̧ȩparëreji̧ri̧dirȩ Ütërë ea jana̧ chjadüa̧ oa ni̧bäji̧ri̧ judiro̧. Tjamo̧ davä. Judiodë pio ji̧ri̧ chjiari, judiodë judiro̧ Ütë tjamo̧ ja̧ pumȩpe jäpea̧ pio ju̧i̧ chjiari jabërä go̧ȩparëreji̧ri̧dirȩ. Ta̧rëchji̧vä ma̧ȩ oa, Ano̧mȩ pio judi jabërä yo̧rërea̧ ma̧ȩ oa:

¹⁶ “'Aja̧, ütara̧ doro ado biraparequede pio dibëiäpȩ. Ütë Davi pio judiri ja̧ ji̧ri̧ pio ji̧ri̧iäpȩ biraparequede pio ji̧ri̧ chjadëri̧ a̧dopea̧ oa, judiro̧ ado chjereno̧ ju chiaji̧ri̧mi̧ dari̧ cjo̧ro̧pea̧ oa. Aja̧, pio ji̧ri̧ cjäri̧ri̧ cjiamȩrȩ ju chiaparȩparequedejȩrȩ judiro̧ ado chjereno̧ chjadëri̧ cjo̧ro̧pea̧ oa. Jabechji̧ jo̧ chjadëdëpe bagami̧ dari̧ cjiadiäa̧dirȩ, jabo chjadëri̧ jëdano̧a̧ oa cjiami̧ dari̧ cjiadiäpadirȩ cüdë pio ji̧ri̧ chjadëri̧ a̧doa̧rä.

¹⁷ Aja̧, ja̧di dari̧ japaparequede chiri nö̧tai̧ oa cjo̧ro̧ji̧ri̧ pumȩ pio judiro̧ ütëborë pio coaiäpȩmo̧ na̧tami̧ dari̧ jo̧rȩtapea̧ oa, judiro̧ pio coaiäpȩmo̧ ano̧ mire quëna̧pea̧ oa. Aja̧, judiodë pio judiro̧borë ano̧ mire quëna̧padiro̧coe. Tjamo̧ davä. Cüdë ëna̧diäa̧ pio judiro̧borë, ca̧ea̧pe bagapea̧ oa ëna̧diäa̧ pio judiro̧borë ano̧ mire quëna̧padiro̧coe.'

¹⁸ Aja̧, no̧mȩ tjamo̧ri ja̧ pio yoa ma̧ȩ oa dabarea̧ yürürëremȩde Ano̧mȩ judi."

¹⁹ —Ado pio ju̧i̧iä ca̧ oti̧ ja̧di dari̧ jo̧rȩtamȩpea̧requede cüdë —yo̧a̧dejȩrȩ Santiago judi. 'Aja̧, judiodë pio ji̧ri̧ tja̧reparȩmi̧ dari̧ japadëtäreji̧ri̧a̧ro̧ji̧ri̧da, Ütë tjamo̧ pio ju̧i̧iäpȩmo̧ ano̧ mire quëna̧ji̧ri̧pea̧ judiodë pio ji̧ri̧ tja̧reparȩdëtäreji̧ri̧a̧ro̧ji̧ri̧da, jabechji̧ Moicherë go̧ȩparërea̧ ma̧ȩrä cjo̧ro̧ tänȩdëtäreji̧ri̧a̧ro̧ji̧ri̧da' quëna̧ jo̧rȩtamȩpea̧requede chjadëri̧ ütarë jo̧rȩta ëte.

²⁰ Aja̧, tja̧reparȩdëtäreji̧ri̧rea̧ro̧jȩrȩ, jabo chjadëri̧ a̧dotäreji̧ri̧rea̧ro̧jȩrȩ —yo̧a̧dejȩrȩ—. Pio ju̧i̧iä o oamo̧i̧ oa go̧ȩpe chjadütäreji̧ri̧rea̧ro̧jȩrȩ, ji̧ra̧dë oa. Jabechji̧ pumȩrȩ jëdano̧a̧ ütë pio ju̧i̧iäpȩmo̧ cäë yürüa̧ go̧a̧ pio ju̧i̧ jurachea oa go̧ȩpe chjadütäreji̧ri̧rea̧ro̧jȩrȩ. Ado peaja̧di goe chiamȩ go̧a̧ oa jurachea oa, ado goe pio ju̧i̧ jurachea oa peaja̧di go̧ȩpe chjadütäreji̧ri̧rea̧ro̧jȩrȩ. Ado jibëa̧ iei̧dë oa baë ëba mo̧a̧chea oa, jibëa̧ üi̧dë oa baë ëba mo̧a̧chea oa peaja̧di go̧ȩpe chjadütäreji̧ri̧rea̧ro̧jȩrȩ.

²¹ Jabechji̧ judiodë pio judiro̧ pio jiro ma̧ȩrä cjo̧ro̧rä judi, chjadëtäremȩde. Aja̧, quëna̧ji̧ri̧ judio pio ji̧ri̧iäpȩmo̧ ana̧ri̧ jo̧rȩta tänȩchea oa, judiro̧ judiodë quëna̧ji̧ri̧ pio ji̧ri̧iäpȩmo̧ badë dachea oa, jabechji̧ chjadëtäremȩde davä judiro̧ pio jiro ma̧ȩrä cjo̧ro̧rä judi. Jabechji̧ Moicherë go̧ȩparërea̧ ma̧ȩ üdë no̧mȩ tjamo̧ri ja̧ bë ma̧ri̧ nö̧tai̧ oa a̧ra̧ano̧a̧ oa cjiade. Ado järätä chjaparea̧ do nö̧ta go̧ȩ ni̧bäa̧ oa cjiade. Ado pio jiro ma̧ȩ oa ta̧rë ütëpea̧ maeadirȩ judio judiro̧. Pio ju̧i̧iä judiro̧ ana̧ri̧ jo̧rȩtachea oa, jabechji̧, a̧ro̧rȩ go̧ȩpe chjadüpea̧ ma̧ȩrä chjadëri̧ cjoro̧täreji̧ri̧dirȩ judiodë pio judiro̧ —yo̧mȩrȩ ni̧bä chjaorëremȩdejȩrȩ Santiago judi a̧dopera̧pea̧ pio ji̧ri̧.

Go̧ȩpe chjadürëreji̧ri̧diro̧jȩrȩ judiodë pio ji̧ri̧iäpȩmo̧

²² Ado a̧dopaji̧ri̧ pio judiro̧ Santiago pio ju̧i̧ ja̧ ma̧ȩ oa ta̧rëa̧ oaiä, 'jabechji̧ chjadëdida' quëna̧ jo̧rȩtarëreji̧ri̧diro̧jo̧ȩ. Pio ju̧i̧iä Jechurë chjadüa̧ judiro̧, ado tjamo̧ jidaji̧ri̧ pio judiro̧borë mitërëreji̧ri̧diro̧jȩrȩ yo̧a̧ri̧ oari ji̧ri̧, a̧dopaji̧ri̧ ütëbo pio ji̧ri̧ nö̧ta. 'Jabechji̧ ibëa̧ chjareräji̧ri̧ oa mitëtäreji̧ri̧a̧ro̧da, Pablo pio ju̧i̧ nö̧ta, Bernabe pio ju̧i̧ nö̧ta jäpea̧ ji̧ mitëtäreji̧ri̧a̧ro̧da, pio yudirije A̧tioquia quȩmȩräpȩ chjadütäreji̧ri̧a̧ro̧ji̧ri̧da' quëna̧ jo̧rȩtaji̧ri̧rȩ mitërëreji̧ri̧dirȩ yo̧a̧ri̧ oari ji̧ri̧. Aja̧, Juda quȩmȩ pio ju̧i̧ mitëa̧diro̧jo̧ȩ. Ado Juda pio ju̧i̧, peaja̧di Bachaba yo̧rëreji̧ri̧diro̧jo̧ȩ. Ado pio ju̧i̧ uëri Chira quȩmȩ pio ju̧i̧bo a̧de mitëa̧diro̧jo̧ȩ. Aja̧, Jerucharȩräpȩ quëna̧ji̧ri̧ judiro̧ ba chia daea̧ pio ji̧ri̧ mitëa̧diro̧jȩrȩ.

²³ Ado pio jiro oari pio ji̧ri̧iä ma̧ȩ go̧ȩpe chjadürëreji̧ri̧diro̧jȩrȩ judiodë pio ji̧ri̧iäpȩmo̧. Ja̧di ta̧rëri̧ yo̧mȩ ma̧ȩ oa go̧ȩpe chjadüa̧diro̧jȩrȩ: “Danȩrȩ ibëa̧ oti̧, pio a̧ro̧rȩ ütëborë jearea̧ chjadürea̧ro̧dibe, pio dibë cjäri̧ri̧ cjia jo̧rȩtaji̧ri̧rȩ. Aja̧, Jechurë chjadüa̧ pio judiro̧, ado Jerucharȩräpȩ tjamo̧ jidaji̧ri̧ pio judiro̧ jearea̧ chjadürea̧ro̧dibe ibëa̧ oti̧ ji̧ri̧, judiodë pio ji̧ri̧iäpȩmo̧. Aja̧, A̧tioquia quȩmȩ bë ma̧ri̧räpȩ cjo̧ro̧ji̧ri̧ oa, Chiria quȩmȩ chiriräpȩ cjo̧ro̧ji̧ri̧ oa, Chirichia quȩmȩ chiriräpȩ cjo̧ro̧ji̧ri̧ oa jearea̧ chjadürea̧ro̧dibe.

²⁴ Danȩrȩ ibëa̧ oti̧, mȩnȩro̧ ana̧ri̧ jo̧rȩtaji̧ri̧pea̧ pio ju̧i̧ chjiari goë ta̧rëa̧rea̧rȩ. Tjamo̧ davä. Ibëa̧ chjareräji̧ri̧ judiro̧ orë pio dibëiäpȩ jäa̧ pio ju̧i̧ chjiari, judiro̧ ma̧ȩ goaedëra̧ pio dibëiäpȩmo̧ ni̧bä chjaoa̧ pio ju̧i̧ chjiari, ado dibë ana̧ri̧ jo̧rȩtaji̧ri̧pea̧ pio ju̧i̧ chjiari, dëdë, goë ta̧rëa̧rea̧rȩ. Jabo danȩrȩ, pio a̧ro̧rȩ chjadüa̧ oa goëde jädëa̧diro̧dibe, jabo jibëa̧ ma̧na̧ri̧ jo̧rȩtaji̧ri̧rȩ jäa̧diro̧dibe. Jibëa̧ ma̧na̧ri̧ jo̧rȩtaji̧ri̧rȩ ni̧bä chjaoa̧diro̧dibe.

²⁵ Pio ju̧i̧iä pio yoaiäpȩ a̧dopea̧ oa cjiarea̧rȩ yaba̧. Ado cja̧rȩmȩ chji̧ chiami̧ dari̧ mitëa̧rea̧ro̧jȩrȩ oari ji̧ri̧ pio dibëiäpȩmo̧ chjadüpea̧ oa. Ibëa̧ oti̧ pio ji̧ri̧ nö̧ta, a̧ro̧rȩ tjamo̧ri̧ ea̧ pio ji̧ri̧ nö̧ta jäpadirȩ Pablo pio ju̧i̧ nö̧ta, Bernabe pio ju̧i̧ nö̧ta.

²⁶ Aja̧, pio judiro̧ ana̧ri̧ ja̧beparëreji̧ri̧dirȩ ibëa̧ Ano̧mȩ Jechu Quiricho pio ju̧i̧ ja̧ oa. Jabechji̧ uapai̧ dari̧ ja̧beparäbo, ja̧bo tänȩa̧ oa cjiapai̧ daräbo, jabechji̧ pio ju̧i̧ ja̧ oa ja̧beparëreji̧ri̧dirȩ.

²⁷ Ado pio ji̧ri̧ nö̧ta chjadürea̧ro̧dibe Juda pio ju̧i̧, ado Chira pio ju̧i̧bo. A̧ro̧rȩ dibë go̧ȩpe chjadüa̧ pio ju̧i̧ irä ni̧bä chjaopadiro̧dibe.

²⁸ Ado Tjo tjamo̧ judi pio ibë chjadëri̧ daba tänȩa̧ oaiä, jabechji̧ ma̧i̧ da chacha oa ara tänȩmi̧ dari̧ japadëri̧ cjiarea̧ro̧dibe, jabo bücjüchjai̧ maea oa ara tänȩmi̧ dari̧ japatämi̧ cjiarea̧ro̧dibe. Pio ju̧i̧iä jabechji̧ pio yoamo̧i̧ ma̧ȩ oa go̧ȩpe chjadürea̧ro̧dibe.

²⁹ Aja̧, ütarë cji̧dëno̧parequededibe yaba̧. Danȩrȩ, pumȩrȩ jëdano̧a̧ ütë pio ju̧i̧iäpȩmo̧ cäë yürüa̧ go̧a̧ pio ju̧i̧ juradëpea̧de. Ado goe chiamȩ go̧a̧ oa, ado goe pio ju̧i̧bo juradëpea̧de. Ado dibëa̧ iei̧dë oa, dibëa̧ üi̧dë oa, jabechji̧ baë ëba mo̧a̧dëpea̧de. Aja̧, mȩnȩro̧ pio yoa ma̧ȩrä cjo̧ro̧rä judi, chjadëtäremȩde. Pio ju̧i̧mo̧i̧ ma̧ȩ oa go̧ȩpe chjadürea̧ro̧dibe. Chjadëri̧ cjo̧ro̧chji̧ibe.”

³⁰ Ado judiro̧ pio yoa ma̧ȩ oa chjadëri̧ go̧ȩpea̧ duri oa, jabechji̧ jënȩro̧ mitëa̧ oari pio ji̧ri̧ chjadürëreji̧ri̧diro̧jȩrȩ A̧tioquiaräpȩ. Aja̧, judiro̧ ma̧ȩ a̧depea̧ oa, chjadüa̧diro̧jȩrȩ. Ado ju̧ri̧pȩ go̧düdäräa̧rä, quëna̧ji̧ri̧ ütëbo oa a̧dopa tänȩrëreji̧ri̧diro̧jȩrȩ. Ja̧dëa ji̧ a̧dopea̧ oa cjiaji̧ri̧ oa, ma̧ȩ chiamȩ go̧ȩ i pio ju̧i̧ yürüa̧diro̧jȩrȩ.

³¹ Ado ma̧ȩ oa go̧ȩ ni̧bäa̧rä, ma̧ chiadëri̧ cjia tjamo̧ji̧ri̧pea̧dirȩ. Ma̧ȩ goae oa ta̧rëa̧ oaiä, järi tjamo̧ji̧ri̧pea̧dirȩ.

³² Ado Juda judi, Chira judi, judiodë pio ji̧ri̧iäpȩmo̧ ma̧ȩ oa a̧depea̧ pio judiro̧ Ütërë ea jana̧ chjadüa̧ oa ni̧bäji̧ri̧rȩ cjo̧ro̧rëreji̧ri̧dirȩ. Ado pio ju̧i̧iä japamitë ana̧ri̧ ni̧bä chjaorëreji̧ri̧diro̧jȩrȩ quëna̧ji̧ri̧ pio ji̧ri̧iäpȩmo̧. Judiro̧ oëadëji̧ri̧mi̧ dari̧ cjo̧ro̧pea̧ oa, ju chiaji̧ri̧rȩ cjo̧ro̧pea̧ oa, chjadëri̧ a̧dorëreji̧ri̧diro̧jȩrȩ.

^33-34 Ado japamitë chjätä ëte, chemana ji̧ra̧ri̧ chjätä ëte, ado chjereno̧ baäa̧dirȩ pio jibë chjadüa̧ji̧ri̧ pio ji̧ri̧iäpȩ. A̧tioquiaräpȩ quëna̧ji̧ri̧ pio judiro̧ chjadëri̧ chjadüa̧ oa baäa̧dirȩ.

³⁵ Jabo Pablo judi, Bernabe judi, jabechji̧ A̧tioquiaräpȩ cjiadiärëreji̧ri̧dirȩ Ano̧mȩ tjamo̧ ja̧ ma̧ȩ oa a̧ra̧ano̧pea̧ oa, quëna̧ji̧ri̧ pio ji̧ri̧ chjadëri̧ dabapa tänȩpea̧ oa. Ado pio ji̧ri̧ nö̧ta a̧ra̧ano̧rëreji̧ri̧ judiro̧ ji̧ra̧rëreji̧ri̧dirȩ.

Pablo judi, Bernabe judi chjarapë baärëreji̧ri̧dirȩ

³⁶ Ado do ji̧ra̧ri̧ chjätä ëte, Pablo judi yo̧rëremȩdejȩ Bernabe ju̧i̧: —Danȩ, ado chjereno̧ goëde jätäreji̧ri̧rea̧ro̧jȩrȩ ibëa̧ oti̧ ji̧ri̧. A̧ro̧rȩ Ütë tjamo̧ ja̧ ma̧ȩ oa a̧ra̧ano̧rërea̧räpȩ jätäreji̧ri̧rea̧rȩ bë ma̧ri̧ nö̧tai̧ oa. Jabechji̧ pio ibëiä ta̧rë ëte quëna̧ji̧ri̧pea̧ pio ji̧ri̧ goëde jätäreji̧ri̧rea̧ro̧jȩrȩ pio ji̧ri̧ chjiari dabapea̧ oa. 'Aja̧, ja̧di dari̧ cjo̧ro̧diro̧da, järiji̧ri̧rȩ cjo̧ro̧diro̧da, jibëa̧ tjoro ji̧dë u̧i̧ ütëchjai̧pe jämi̧ dari̧ cjo̧ro̧diro̧da' quëna̧ dabapea̧ oa, goëde jätäreji̧ri̧rea̧ro̧jȩrȩ. Jaeibe —yo̧a̧dejȩ Bernabe ju̧i̧i Pablo judi.

³⁷ Ado Bernabe judi pio ji̧ro ma̧ȩ oa ta̧rëa̧ oaiä, jabechji̧ chjadërëremȩde pio ju̧i̧iä. Ado Juan Marco quȩmȩ pio ju̧i̧ ëba jätämi̧ cjiarëremȩdejȩ.

³⁸ Jabo Pablo judi ëba jätä ea tjamo̧dëa̧dejȩ. Jabechji̧ Juan Marco judi chjadëri̧ ëba ja̧bepadärädëa̧ oaiä, Pja̧pjiria quȩmȩ chiriri pio judiri jabërä a̧dë ma̧na̧rërea̧ oaiä, ja̧bepadäräa̧rä yuro chjadëri̧ ëba tai̧dëa̧ oaiä, jabechji̧ pio jibë nö̧ta ado chjereno̧ ëba jätä ea tjamo̧dëa̧dejȩ.

³⁹ Ado pio ju̧i̧iä yui chiami̧ dari̧ jo̧rȩtaji̧ri̧pea̧dirȩ cja̧rȩmȩ codë jo̧rȩtadëji̧ri̧rȩ. Ado goae tarari̧ ni̧bätaji̧ri̧pea̧dirȩ. Ado pio ju̧i̧iä chjarapë baärëreji̧ri̧dirȩ. Bernabe judi Juan Marco pio ju̧i̧ mitë ëte, uimo̧mȩ chara oa buaji̧ri̧rȩ baärëreji̧ri̧dirȩ Chipire quȩmȩ chiriräpȩ.

⁴⁰ Jabo Pablo judi ano̧ mire mitëa̧dejȩ Chira quȩmȩ pio ju̧i̧. Ado quëna̧ji̧ri̧ judiro̧ pio ji̧ri̧ chjiari goë cjo̧dë ëte, Ütërë chjadëri̧ jida̧ chja̧oerä baätä goë cjo̧dë ëte, jabechji̧ chjadüa̧diro̧jȩrȩ.

⁴¹ Ado Chiria quȩmȩ chiri oa, Chirichia quȩmȩ chiri oa chjätäji̧ri̧rȩ a̧ra̧ano̧ chjaoriärëreji̧ri̧diro̧jȩrȩ quëna̧ji̧ri̧ pio ji̧ri̧. A̧doparea̧ nö̧tai̧ oa chjadëri̧ a̧doriärëreji̧ri̧diro̧jo̧ȩ to̧bari̧ cjiapea̧ oa, ju chiaparȩa̧ oa cjiapea̧ oa.