Japarea̧ 14 - Biblia Pume

A̧ra̧ano̧rëreji̧ri̧diro̧jo̧ȩ Ütë tjamo̧ ja̧ ma̧ȩ oa Iconioräpȩ

¹ Ado Pablo judi, Bernabe judi Iconio quȩmȩ bë ma̧ri̧räpȩ go̧düdäräa̧rä, judiro̧ A̧tioquiaräpȩ japea̧mi̧ japarëreji̧ri̧dirȩ. Peaja̧di järëreji̧ri̧dirȩ Judiorë a̧doparea̧ bëräpȩ a̧dopapea̧ oa. Ado judiro̧ ju̧ri̧pȩ goae tarari̧ a̧ra̧ano̧a̧ oaiä, judio no̧i̧dërë quëna̧ji̧ri̧pea̧dirȩ, judiodë pio judiro̧borë.

² Jabo quëna̧dëri̧ cjiaji̧ri̧ judio judiro̧ ma̧ȩ chjádë yürürëreji̧ri̧dirȩ judiodë pio ji̧ri̧iäpȩmo̧. "Aja̧, Jechu pio ju̧i̧ chjiari ma̧ȩ üdë tjamo̧i̧ cjiari̧ baädëde" yo̧a̧dirȩ. "Pio jiro ma̧ȩ üdë quëna̧dëpea̧de" yo̧a̧dirȩ. Ado pio ju̧i̧iä judiodë judiro̧ orë ërecjiape bagarëreji̧ri̧diro̧jȩrȩ quëna̧ji̧ri̧ pio ji̧ri̧iäpȩmo̧.

³ Jabo pio jibëiäpȩmo̧ ma̧ cjüëtüri̧ jo̧rȩta̧räbo, jabechji̧ japamitë ana̧ri̧ cjiadiärëreji̧ri̧dirȩ Ano̧mȩ Jechu pio ju̧i̧ chjiari ma̧ȩ oa a̧ra̧ano̧pea̧ oa, uapadëji̧ri̧rȩ a̧ra̧ano̧pea̧ oa. Ado ana̧ri̧ na̧rȩrea̧mi̧ dari̧ yürürëremȩdejȩrȩ Jechu judi pio ji̧ri̧iä jauëchja cjiari̧ japarea̧mi̧ dari̧. 'Aja̧, tjamo̧i̧ cjiari̧ a̧ra̧ano̧diro̧ibëda, Ütërë cjäri̧ri̧ cjia yürüa̧ pio ju̧i̧ chjiari ma̧ȩ oa a̧ra̧ano̧diro̧ibëda' quëna̧rea̧mi̧ dari̧ japarea̧ yürürëremȩdejȩrȩ.

⁴ Jabo Iconio quȩmȩ bë ma̧ri̧räpȩ cjo̧ro̧ji̧ri̧ judiro̧ yo̧a̧ri̧ jo̧rȩtarea̧ chiaji̧ri̧rȩ cjo̧ro̧rëreji̧ri̧dirȩ. Chji̧ chjara chia jo̧rȩtarëreji̧ri̧dirȩ. O judiro̧ ta̧rë ja̧borëreji̧ri̧diro̧jo̧ȩ Pablo ju̧i̧, Bernabe pio ju̧i̧bo. Jabo o judiro̧, cjäri̧ madirȩ, quëna̧dëji̧ri̧ judio pio ji̧ri̧mo̧i̧ ta̧rë ja̧borëreji̧ri̧diro̧jȩrȩ.

⁵ Ado pio ju̧i̧iä pumȩ bubarë järiji̧ri̧pea̧dirȩ Jechurë chjadüa̧ pio ji̧ri̧ ana̧ri̧ conȩdapea̧ ji̧. Tjamo̧ davä. Judio judiro̧ orë jibëa̧ ütëti̧ pio ji̧ri̧ nö̧ta järiji̧ri̧pea̧dirȩ judiodë pio ji̧ri̧ nö̧ta, jibëa̧ ütëti̧ pio ji̧ri̧ nö̧ta. Ado järiji̧ri̧rȩ, 'Aja̧, goae tarari̧ acji jätäreji̧ri̧a̧ro̧ji̧ri̧da, ta̧dëra̧ ae ja̧bo tänȩtäreji̧ri̧a̧ro̧ji̧ri̧da' quëna̧ jo̧rȩtarëreji̧ri̧dirȩ.

⁶ Jabo ja̧dëa ji̧ Jechurë chjadüa̧ judiro̧ pio ju̧i̧ chjiari goë ta̧rëa̧ oaiä, chjaodëri̧ goadi baäeno̧a̧dirȩ. Aja̧, Iricaonia quȩmȩ chiriräpȩ baäeno̧a̧dirȩ Irichara quȩmȩ bë ma̧ri̧räpȩ, Derebe bë ma̧ri̧räpȩ,

⁷ Ado ju̧ri̧pȩ ano̧ mire a̧ra̧ano̧ji̧ri̧pea̧dirȩ ma̧ȩ chjadëi̧ pio ju̧i̧.

Ütë tjamo̧ judi japarea̧ yürüa̧ oaiä, Pablo judi chjaparȩa̧dejȩ ta chjadëdëmȩ pio ju̧i̧

⁸ Ado Irichararäpȩ ju̧ri̧ cjo̧ro̧rëremȩde ta chjadëdëmȩ judi. Jojini̧rȩ arari ja̧ tai̧dëmȩrȩ cjo̧ro̧rëremȩde. Ado pio ju̧i̧iä chamȩrȩ cjo̧ro̧rëremȩde.

⁹ Ado Pablo judi a̧ra̧ano̧rërea̧ ji̧, ta̧rë ja̧borëremȩdejȩ. Ado Pablo judi ta̧rë ja̧bomȩ oa daea̧ oaiä, 'Aja̧, quëna̧mȩdida, "Ütë tjamo̧ judi chjaparȩpai̧ dadicoada" quëna̧mȩdida' quëna̧ jo̧rȩtamȩpea̧ oaiä, jabechji̧ pio ju̧i̧iäpȩmo̧ dëbë damȩrȩ

¹⁰ to̧bari̧ yo̧a̧dejȩ: —Danȩ, cjitëvä. Na̧ tara̧ cjitëvä. Ado üi̧ judi chjaodëri̧ cjitëno̧rëremȩde, yo̧dümȩrȩ. Ado tai̧mȩpea̧de tai̧dërëremȩrȩ.

¹¹ Ado pumȩ bubarë pio ju̧i̧ daea̧ oaiä, Pablo judi jauëchja cjiari̧ japea̧ pio ju̧i̧ irä daea̧ oaiä, jabechji̧ ütërämi̧ cjiaji̧ri̧pea̧diro̧jo̧ȩ, Bernabe pio ju̧i̧bo. Ado ana̧ri̧ jo̧rȩtaji̧ri̧rȩ, jibëa̧ ma̧ȩra̧ pio ju̧ri̧ra̧ to̧bari̧ ëna̧diäji̧ri̧rȩ, ja̧di ta̧rëri̧ ëna̧diäji̧ri̧pea̧dirȩ dacho bëremi̧ cjiaji̧ri̧rȩ: —Pio jiro oari judiro̧ ütë jauëchja maearë cjiarërea̧ ji̧, tjo maearë cjiarërea̧ ji̧, jabechji̧ icjarabope jäa̧dirȩ ibëa̧ chjarerä cjiapea̧ oa —yo̧ji̧ri̧rȩ ëna̧diäa̧dirȩ—. Aja̧, pio jiro ütë jauëchja pio yodëro̧je a̧dëri pio judiri biraji̧ri̧rȩ goë daera̧pea̧diro̧ibe —yo̧ji̧ri̧rȩ ëna̧diäji̧ri̧pea̧dirȩ Jechurë chjadüa̧ pio ji̧ri̧ chjiari.

¹² Ado jibëa̧ ütërämi̧ cjia̧ oaiä, jënȩro̧ quëna̧rërea̧ ütë ja̧ quȩra̧ quȩ yo̧a̧diro̧jȩrȩ. Bernabe judi 'Cheu quȩmȩ ütë pio judi jirodiibëda' quëna̧ jo̧rȩtaji̧ri̧rȩ Cheu quȩ yo̧a̧diro̧jo̧ȩ. Ado Pablo judi, 'Aja̧, Ereme quȩmȩ ütë pio judipamȩ jirodida, judi tjamo̧ ni̧bämȩ tara Ereme pio judi jirodida' quëna̧ jo̧rȩtaji̧ri̧rȩ Ereme quȩ yo̧a̧diro̧jo̧ȩ.

¹³ Ado jibëa̧ ütë ja̧ bëräpȩ tjamo̧ ja̧bepamȩ pio judi jëdano̧rëremȩde Jechurë chjadüa̧ pio ji̧ri̧iäpȩmo̧ chjacjiamȩri̧ jo̧rȩtapea̧ oa. Danȩrȩ, jibëa̧ ütë ja̧ bë üdë, Cheu quȩmȩ ütë pio ju̧i̧iäpȩmo̧ chjacjiamȩri̧ jo̧rȩtapea̧ bë üdë, jabechji̧ bë ma̧ri̧ dairäpȩ cjiarëremȩde. Ado jiro bëräpȩ tjamo̧ ja̧bepamȩ judi, o ji̧ri̧ chjiari goë tuti ja̧bepamȩ pio judi bë ma̧ri̧ yu̧a̧rea̧ yaräpȩ ju̧ri̧ go̧düdärärëremȩde baca oari pio ji̧ri̧ mu̧i̧ jämȩrȩ, to boi̧chji̧ chjuchju oa goamȩrȩ. Jabechji̧ Jechurë chjadüa̧ pio ji̧ri̧iäpȩmo̧ cäë yürüpea̧ oa, pio ji̧ri̧iäpȩmo̧ chjacjiamȩri̧ jo̧rȩtaji̧ri̧rȩ japapea̧ oa, gu̧na̧tämi̧ cjiarëremȩdejȩrȩ baca oari ji̧ri̧ jibëa̧ pumȩ pio ji̧ri̧ nö̧ta. Jabechji̧ ütërämi̧ cjiaji̧ri̧rȩ ja̧di dari̧ japatämi̧ cjiarëreji̧ri̧diro̧jȩrȩ.

¹⁴ Jabo Bernabe judi, Pablo judi pumȩ judiro̧ japapea̧ pio ju̧i̧ chjiari ta̧rëa̧ oaiä, gito ana̧ri̧ jo̧rȩtaji̧ri̧rȩ mu̧i̧ quira̧diro̧jo̧ȩ jibëa̧ chjibo oa. Ado pumȩ ji̧ri̧iäpȩmo̧ baguraeno̧ ëte to̧bari̧ yo̧a̧diro̧jȩrȩ:

¹⁵ —¿Jabo tjana̧pea̧ ji̧ cäë yürürea̧ jo̧rȩtanȩro̧ibe? —iëno̧ë ta̧rëa̧diro̧jȩrȩ—. Ja̧di dari̧ japarea̧mi̧dëde. Jabomo̧ pumȩrea̧rȩ. Pio mȩnȩro̧mi̧ pumȩrea̧rȩ. Pio dibëa̧ i chiarea̧rȩ. Ütëdë marea̧rȩ. Jauëchjadë marea̧rȩ. Jabomo̧ ma̧ȩ chjadëi̧ pio ju̧i̧ yürera̧pea̧rea̧ro̧dibe mȩnȩro̧ teracaba ütë pio ju̧i̧ putu jura̧ a̧dë chami̧ dari̧ japapea̧ oa. Tjamo̧ davä. Pio dibë a̧dodëmȩ ütë pio ju̧i̧ jo̧rȩtachea oa, jabo tjamo̧ri̧ cjiamȩ Ütë pio ju̧i̧iäpȩmo̧ ano̧ mire jo̧rȩtapea̧ oa, jabechji̧ ma̧ȩ chjadëi̧ pio ju̧i̧ yürera̧pea̧rea̧ro̧dibe —yo̧a̧diro̧jȩrȩ—. Jabo ütëdë marea̧rȩ. Jabechji̧ pio a̧ro̧rȩmi̧ dadëde Ütë tjamo̧ judi. Danȩrȩ, Ütë tjamo̧ judi chjö̧na̧i̧ oa pareapamȩde. A̧dë oa, dabu oa pareapamȩ pio judide. Ui ana̧ oa pareapamȩ pio judide peaja̧di. Ado cho̧ Ano̧mȩ pio judide. Pua Ano̧mȩ pio judide. Chirirä cjo̧ro̧ji̧ri̧ ji̧ri̧ pio ji̧ri̧ ja̧ Ano̧mȩ pio judide. Ado danȩrȩ, mȩnȩro̧ pio ju̧i̧iäpȩmo̧ ano̧ mi̧re jo̧rȩtatä eaji̧ri̧rȩ ma̧ȩ chjadëi̧ pio ju̧i̧ yürera̧pea̧rea̧ro̧dibe —yo̧a̧diro̧jȩrȩ—.

¹⁶ Pearä judi judiodë ütëborë jibëa̧ ma̧na̧ri̧ jo̧rȩtaji̧ri̧rȩ cjo̧ro̧rërea̧ ji̧, Ütë tjamo̧ judi tja̧reparȩmi̧ dari̧ japadërëremȩdejȩrȩ. Jabechji̧ jënȩro̧ quëna̧tämi̧ cjia̧mi̧ quëna̧rea̧ yürürëremȩdejȩrȩ. Judiro̧ teracaba ütë oa quëna̧tämi̧ cjiaji̧ri̧ oa peaja̧di teracaba ütë oa quëna̧rea̧ yürürëremȩdejȩrȩ.

¹⁷ Ado mȩnȩro̧ Ütë tjamo̧ pio ju̧i̧ chjiari dabadëa̧räbo, jabechji̧ ji̧dë ma na̧rȩ chjaorëremȩdidibe davä pio jȩa chjiari. Tjamo̧ davä. Mȩnȩro̧ quëna̧pea̧ oa, 'Aja̧, Ütë tjamo̧ pio judidida, ibë chjadëri̧ yürümȩ pio judi tjamo̧dida' quëna̧pea̧ oa, jabechji̧ ji̧dë ma na̧rȩ chjaorëremȩdidibe jënȩ pio dibëiäpȩmo̧ chjadëri̧ yürü chjaorërea̧ oaiä. Aja̧, judi cjü tänȩa̧ oaiä, mȩnȩro̧ ponȩa̧ pio ju̧i̧ chjadëri̧ buiu baä tänȩa̧ oaiä, jurarea̧ to chiamȩ jurarea̧ pio ju̧i̧ ütara̧mi̧ yürüa̧ oaiä, dami̧ti̧ jurarea̧ oa yürüa̧ oaiä, jabechji̧ chjamȩrȩ yürürëremȩdidibe davä, na̧rȩ chjaomȩrȩ —yo̧a̧diro̧jȩrȩ—. Tjamo̧ davä. Mȩnȩro̧ dibëa̧ chji̧ra̧ ma̧ chiadëri̧ cjiari̧ jo̧rȩtapea̧ oa yürü chjaorëremȩdidibe. Aja̧, pio dibëiäpȩmo̧ ji̧dë ma yürümȩ pio judide Ütë tjamo̧ judi. Pio ju̧i̧iäpȩmo̧ ma chjacjiamȩri̧ jo̧rȩtapea̧de, pio ibëiäpȩmo̧dë. Ado pio ju̧i̧iä jabechji̧ pio ibëiäpȩmo̧ cäë yürürea̧mi̧dëde —yo̧ji̧ri̧rȩ ni̧bä chjaorëreji̧ri̧diro̧jȩrȩ Pablo judi, Bernabe judi.

¹⁸ Jabo Jechurë chjadüa̧ judiro̧ ja̧di ta̧rëri̧ yo̧a̧räbo, jabechji̧ tjamo̧ri̧ cäë yürütämi̧ cjiarëreji̧ri̧diro̧jȩrȩ. Aja̧, pio ji̧ri̧iä eami̧ oa yürüdëpea̧ üdë goae tjamo̧dëräbo, yürürea̧ dadärädëa̧dirȩ. Jabechji̧ cjiadiäa̧dirȩ.

Ta̧dëra̧ pio ju̧ri̧ra̧ ae ja̧bo tänȩtarëreji̧ri̧diro̧jo̧ȩ Pablo ju̧i̧ Irichararäpȩ

¹⁹ Jabo japamitë chjätä ëte judio judiro̧ orë A̧tioquia quȩmȩ bë ma̧ri̧ri pio judiri acji go̧düdärärëreji̧ri̧dirȩ, Iconio quȩmȩ bë ma̧ri̧ri pio judiribo. Ado judiro̧ go̧düdärä ëte, 'Aja̧, Pablo pio ju̧i̧ goae tarari̧ conȩdatäreji̧ri̧a̧ro̧ju̧i̧da' quëna̧ jo̧rȩtaji̧ri̧rȩ ana̧ri̧ ni̧bä chjaorëreji̧ri̧diro̧jȩrȩ pumȩ ji̧ri̧, pio jibëiäpȩmo̧ cho̧rë jo̧rȩtapea̧ oa. Ado pumȩ judiro̧ pio ji̧ri̧ ta̧rë ja̧boa̧ oaiä, mitëa̧diro̧jo̧ȩ Pablo ju̧i̧. Ado ta̧dëra̧ pio ju̧ri̧ra̧ to̧bari̧ ae ja̧bo tänȩtarëreji̧ri̧diro̧jo̧ȩ. Ado ja̧di dari̧ japa ëte, bë ma̧ri̧ dairäpȩ mu̧i̧ a̧ra̧diro̧jo̧ȩ, coë a̧rȩriäri̧. Ja̧boa̧rämi̧ cjiaji̧ri̧rȩ dairäpȩ mu̧i̧ a̧ra̧diro̧jo̧ȩ.

²⁰ Jabo quëna̧ji̧ri̧ pio judiro̧ Pablo pio ju̧i̧ tjoro tänȩrërea̧ ji̧, jabechji̧ chjaodëri̧ cjitëno̧a̧de. Ado chjereno̧ yu̧a̧rëremȩde bë ma̧ri̧räpȩmo̧. Ado dopea̧rä Pablo judi, Bernabeborë baärëreji̧ri̧dirȩ Derebe quȩmȩ bë ma̧ri̧räpȩ.

Jechurë chjadüa̧ judiro̧, jënȩro̧ jana̧rea̧ durimo̧ ado chjereno̧ carupë baädirȩ quëna̧ji̧ri̧ pio ji̧ri̧ ju chiaparȩpea̧ oa

^21-22 Ado ju̧ri̧pȩ go̧düdärä ëte, ma̧ȩ chjadëi̧ pio ju̧i̧ a̧ra̧ano̧rëreji̧ri̧diro̧jȩrȩ. Ado no̧i̧dërë quëna̧ji̧ri̧pea̧dirȩ. Ja̧dëa ji̧ ado chjereno̧ carupë baärëreji̧ri̧dirȩ jënȩro̧ jana̧rea̧ durimo̧. Quëna̧ji̧ri̧ pio ji̧ri̧ ado chjereno̧ dapea̧ oa, pio ji̧ri̧ nö̧ta a̧dopapea̧ oa, jabechji̧ ado chjereno̧ carupë baärëreji̧ri̧dirȩ, jaerira̧ baäji̧ri̧rȩ. Derebe quȩmȩ bë ma̧ri̧ri pio judiri go̧düji̧ri̧rȩ baäa̧dirȩ Irichara bë ma̧ri̧räpȩ. Ado ju̧ri̧pȩ japamitë cjiadiä ëte, ano̧ mire baäa̧dirȩ Iconio quȩmȩ bë ma̧ri̧räpȩ. Ado ju̧ri̧pȩ japamitë cjiadiä ëte, ano̧ mire baäa̧dirȩ A̧tioquiaräpȩ, Pichiria quȩmȩ chiriräpȩ. Quëna̧ji̧ri̧ pio ji̧ri̧ ju chiaparȩpea̧ oa, järi tjamo̧parȩpea̧ oa, a̧ra̧ano̧riä baärëreji̧ri̧dirȩ, judiro̧ Jechu pio ju̧i̧ chjiari dabapea̧ pio ju̧i̧ ji̧dë u̧i̧ chjuari̧ quëna̧pea̧ oa. Ado yo̧a̧diro̧jȩrȩ: —Danȩrȩ, a̧ro̧rȩ Jechu pio ju̧i̧iäpȩmo̧ quëna̧ji̧ri̧ pio judiro̧ gitori̧ tarapai̧ darea̧rȩ pio yoa chirirä —yo̧a̧diro̧jȩrȩ. —Aja̧, o judiro̧ ibë ma̧i̧ dari̧ conȩdae chjaoa̧ oaiä, dëdë, ana̧ri̧ tarapai̧ darea̧rȩ. Jabo ana̧ri̧ tara ëte, jabechji̧ yu̧a̧rea̧ daparea̧rȩ Ütërë yo̧a̧ chja̧oeräpȩ —yo̧ji̧ri̧rȩ ni̧bä chjaorëreji̧ri̧diro̧jȩrȩ.

²³ Ado judiro̧ bë ma̧ri̧ nö̧ta oa tai̧rërea̧ ji̧, jabechji̧ a̧doparea̧ nö̧ta oa tjamo̧ jidaji̧ri̧ pio ji̧ri̧ mitërëreji̧ri̧diro̧jȩrȩ quëna̧ji̧ri̧ pio ji̧ri̧ chjadëri̧ jidapea̧ oa. Ado baäbea yaboi̧, quëna̧ji̧ri̧ pio ji̧ri̧ nö̧ta a̧dopaji̧ri̧rȩ goë cjo̧dë chjaorëreji̧ri̧dirȩ Ano̧mȩ pio ju̧i̧iä. Aja̧, japamitë ana̧ri̧ goë cjo̧dërëreji̧ri̧dirȩ jurarea̧ oa a̧dë jo̧rȩtaji̧ri̧rȩ. Jabechji̧ Ütë tjamo̧ judi tjamo̧ jidaji̧ri̧ pio ji̧ri̧ chjadëri̧ a̧dopea̧ oa, judiro̧ chjuari̧ quëna̧ji̧ri̧rȩ cjo̧ro̧pea̧ oa, judiro̧ quëna̧ji̧ri̧ ji̧ri̧ chjadëri̧ jidaji̧ri̧rȩ cjo̧ro̧pea̧ oa, goë cjo̧dë chjaorëreji̧ri̧dirȩ Ütë tjamo̧ pio ju̧i̧iä.

Pablo judi Bernabe judi ado chjereno̧ baärëreji̧ri̧dirȩ A̧tioquiaräpȩ, jënȩro̧ pearä go̧dürërea̧ bë ma̧ri̧räpȩ

²⁴ Ado Pichiria quȩmȩ chiriräpȩ chjätäji̧ri̧rȩ Jechurë chjadüa̧ judiro̧ yo̧a̧ri̧rȩ go̧düdärärëreji̧ri̧dirȩ Pja̧pjiria quȩmȩ chiriräpȩ.

²⁵ Ado Perege quȩmȩ bë ma̧ri̧räpȩ cjo̧ro̧ji̧ri̧ pumȩ pio ji̧ri̧ a̧ra̧ano̧a̧diro̧jȩrȩ Jechu pio ju̧i̧ chjiari ma̧ȩ oa. Ado pio ji̧ri̧ a̧ra̧ano̧ ëte baäa̧dirȩ Ataria quȩmȩ bë ma̧ri̧räpȩ.

²⁶ Ado pio ju̧ri̧pȩ bua̧dirȩ uimo̧mȩ chara ana̧ oa. Jabechji̧ ui ana̧ oa chjätäpea̧ oa, jibëa̧ bëräpȩ baäpea̧ oa, A̧tioquiaräpȩ baäpea̧ oa, bua̧diro̧jo̧ȩ. Pio judiri baäji̧ri̧rȩ go̧düdärärëreji̧ri̧dirȩ judiro̧ pearä tarupë go̧dürërea̧ bë ma̧ri̧räpȩ. Ado judiro̧ pearä tarupë go̧dübea yaboi̧, jabechji̧ pio ju̧ri̧pȩ quëna̧ji̧ri̧ pio judiro̧ Ütë tjamo̧ pio ju̧i̧iä goë cjo̧dë chjaorëreji̧ri̧dirȩ pio ji̧ri̧ chjiari jabërä. Aja̧, judiro̧ Ütërë chjadëri̧ jida̧ chja̧oerä ja̧bepapea̧ oa, judiro̧ Ütërë cjäri̧ri̧ cjia yürüa̧ ju chiarea̧ra̧ ja̧bepapea̧ oa, jibëa̧ ja̧beparea̧ pio ju̧i̧ chjadëri̧ ja̧bepadärärea̧ dapea̧ oa, goë cjo̧dë chjaorëreji̧ri̧dirȩ pio ji̧ri̧ chjiari jabërä, judiro̧ jabë go̧düdëa̧rä. Ado judiro̧ pearä judi ja̧bepaepea̧ üdë, jabechji̧ chjadëri̧ ja̧bepadäräa̧ oa cjia̧ oaiä, jabechji̧ baärëreji̧ri̧dirȩ.

²⁷ Ado A̧tioquiaräpȩ go̧düdäräa̧rä, jabechji̧ quëna̧ji̧ri̧ pio ji̧ri̧ a̧dopa tänȩrëreji̧ri̧diro̧jȩrȩ ni̧bä chjaopea̧ oa. Ado ja̧dëa ji̧ a̧dopea̧ oa cjiarä, ni̧bä chjaorëreji̧ri̧diro̧jȩrȩ Ütë tjamo̧ judi pio ji̧ri̧iä ana̧ri̧ japea̧ pio ju̧i̧ chjiari. Aja̧, jënȩro̧ japea̧ pio ju̧i̧ chjiari, Ütërë a̧doa̧ oaiä japea̧ pio ju̧i̧ chjiari, ado judiodë no̧i̧dërë quëna̧ji̧ri̧pea̧ pio ju̧i̧ chjiaribo ni̧bä chjaoa̧diro̧jȩrȩ.

²⁸ Ado judiro̧, jabechji̧ A̧tioquiaräpȩ quëna̧ji̧ri̧ pio ji̧ri̧ nö̧ta japamitë ana̧ri̧ cjiadiärëreji̧ri̧dirȩ.