Japarea̧ 13 - Biblia Pume

Bernabe pio ju̧i̧, Chauro pio ju̧i̧bo mitë ëte chjadürëreji̧ri̧diro̧jȩrȩ

¹ Ado noi̧dë tjamo̧rëreji̧ri̧dirȩ ëna̧diäa̧ oa a̧dopaji̧ri̧ judiro̧ A̧tioquia quȩmȩ bë ma̧ri̧räpȩ. Aja̧, ji̧ra̧ tjamo̧rëreji̧ri̧dirȩ quëna̧ji̧ri̧ judiro̧. Ado judiro̧ orë a̧ra̧ano̧ji̧ri̧rȩ ja̧beparëreji̧ri̧dirȩ. Ado o judiro̧ Ütërë ea jana̧ chjadüa̧ oa ni̧bäji̧ri̧rȩ ja̧beparëreji̧ri̧dirȩ. ¿Ado chjiadirȩ pio jiro pumȩ judiro̧? Chjiadëdirȩ, jabechji̧ cja̧rȩmȩ üdë Bernabe pio judide, ado cja̧rȩmo̧ üdë Uruchio pio judide. Aja̧, Chirene quȩmȩ bë ma̧ri̧ri pio judirimȩde judi. Ado cja̧rȩmo̧ üdë Menae quȩmȩ pio judide. Erode quȩmȩrea̧ ütë pio ju̧i̧ nö̧ta ütëparȩa̧ oa cjiarëremȩ pio judide. Ado Chauro judi, ado Chimo̧ pio judi peaja̧di Ütërë ea jana̧ chjadüa̧ oa ni̧bärëreji̧ri̧dirȩ. Ado Chimo̧ pio ju̧i̧, jabechji̧ 'i ca̧ra̧mȩ' yo̧rëreji̧ri̧diro̧jo̧ȩ. Aja̧, pio judiro̧rëreji̧ri̧dirȩ A̧tioquiaräpȩ ja̧bepaji̧ri̧ judiro̧.

² Ado pio jiro oari judiro̧ a̧dopea̧ oa cjiarä, Tjo tjamo̧ pio judi yo̧mȩrȩ jo̧rȩta tänȩrëremȩdejȩrȩ. Tjamo̧ davä. Judiro̧ Ano̧mȩ pio ju̧i̧iäpȩmo̧ chjacjiamȩri̧ ni̧bäji̧ri̧rȩ a̧dopea̧ oa cjiarä, ba chia maea oa jo̧rȩtapea̧ oa jurarea̧ pio ju̧i̧ a̧dë jo̧rȩtaji̧ri̧rȩ a̧dopea̧ oa cjiarä, jabechji̧ Tjo tjamo̧ pio judi yo̧rëremȩdejȩrȩ, ja̧di ta̧rëri̧ yo̧mȩrȩ: —Danȩrȩ, china̧chjari̧ tutitä earequededibe Bernabe pio ju̧i̧, Chauro pio ju̧i̧bo —yo̧a̧dejȩrȩ—. Ca̧ea̧ pio ju̧i̧ ja̧bepapea̧ oa mitëa̧requedejȩrȩ. China̧chjari̧ tutichji̧jȩrȩ —yo̧a̧dejȩrȩ.

³ Ado Ütë tjamo̧ pio ju̧i̧iäpȩmo̧ ji̧dë u̧i̧ ni̧bäa̧ duri oa, juradëji̧ri̧rȩ ji̧dë u̧i̧ ni̧bäa̧ duri oa, pio jiro oari yo̧a̧ri̧ oa mitërëreji̧ri̧diro̧jȩrȩ. Jibëa̧ ichira̧ pio ju̧ri̧ra̧ ida̧diro̧jȩrȩ. Ado ja̧di dari̧ japa ëte, chjadürëreji̧ri̧diro̧jȩrȩ Ütë tjamo̧ ja̧ ma̧ȩ oa a̧ra̧ano̧pea̧ oa.

Chipire quȩmȩräpȩ järëreji̧ri̧dirȩ a̧ra̧ano̧pea̧ oa

⁴ Pio ju̧i̧iä, Tjo tjamo̧ judi chjadüa̧ pio ju̧i̧iä, jabechji̧ go̧dürëreji̧ri̧dirȩ Bernabe judi, Chauro pio judiborë. Tjo tjamo̧ pio judi jibëa̧ yabo oa ëba jämi̧ dari̧ go̧dürëreji̧ri̧dirȩ. Ado Cheruchiaräpȩ tjamo̧i̧ järëreji̧ri̧dirȩ. Ado ju̧ri̧pȩ go̧düdärä ëte, uirä pjurëmȩ chara ana̧ oa buaji̧ri̧rȩ järëreji̧ri̧dirȩ Chipire quȩmȩ chiriräpȩmo̧, ui ana̧ tjoro chamȩ chiriräpȩmo̧. Jachi tjamo̧räpȩ jäa̧dirȩ.

⁵ Ado Charamina quȩmȩ bë mari̧räpȩ go̧düdäräa̧rä, charari pio judiri bira̧dirȩ. Ado chjaodëri̧ taruparëreji̧ri̧dirȩ Ütë tjamo̧ ja̧ ma̧ȩ oa a̧ra̧ano̧pea̧ ji̧. Judiorë a̧doparea̧ bëräpȩ ju̧ri̧ tarupë a̧ra̧ano̧rëreji̧ri̧dirȩ. Ado Juan Marco judi pio ji̧ri̧ nö̧ta tai̧rëremȩde pio ji̧ri̧ chjadëri̧ a̧dopea̧ oa.

⁶ Ado judiro̧ bë ma̧ri̧ nö̧tai̧ oa jäji̧ri̧rȩ tai̧rëreji̧ri̧dirȩ Chipire quȩmȩ chiriräpȩ. Ado judiro̧ pio jiro chiri oëräpȩ yuro go̧düdäräa̧rä, go̧düdärärëreji̧ri̧dirȩ Pjapjo quȩmȩ bë ma̧ri̧räpȩ. Ado ju̧ri̧pȩ daea̧diro̧jo̧ȩ jauëchja cjiari̧ japamȩ ju̧i̧, Bajechu quȩmȩ pio ju̧i̧. Judiorëremȩde. Ado Ütërë ea jana̧ chjadüa̧ oa ni̧bämȩcji̧ quëna̧ japamȩrȩ u̧i̧pe chjaorëremȩdejȩrȩ pumȩ ji̧ri̧.

⁷ Ado pio jiro üi̧ judi tjaoërä ëba tai̧rëremȩdejȩ Chejo Pablo quȩmȩ ju̧i̧, Chipire chiri tjamo̧ cjo̧ro̧mȩ pio ju̧i̧. Ado Chejo Pablo pio judi ji̧ra̧ri̧ dabamȩrȩ cjo̧ro̧rëremȩde. Ado Ütë tjamo̧ ja̧ ma̧ȩ oa tjamo̧ri̧ ta̧rëtämi̧ cjiamȩrȩ yo̧ chjadürëremȩdejȩrȩ Bernabe ju̧i̧, Chauro ju̧i̧. Aja̧, pio jȩaiäpȩ a̧ra̧ano̧era̧tä yo̧ chjadüa̧dejȩrȩ.

⁸ Jabo cjäri̧ madejȩ, chiri tjamo̧ cjo̧ro̧mȩ ju̧i̧ quëna̧tä eadërëremȩdejȩ cja̧rȩmȩrȩ Erima quȩmȩ judi, jauëchja cjiari̧ japamȩ judi. Tjamo̧ davä. Pio jiro üi̧ üdë a̧ra̧ano̧ji̧ri̧ pio ji̧ri̧iä Ütë tjamo̧ ja̧ ma̧ȩ oa ta̧rë ja̧botä eadërëremȩdejȩ. Ado pio ju̧i̧iä ji̧dë ma dëbëpe chjaomi̧ dari̧ jape chjaorëremȩdejȩrȩ, ana̧ri̧ tja̧reparemȩrȩ. Ado danȩ, pio jiro üi̧ judi judio pio ji̧ri̧iä Bajechu quȩmȩrëremȩde, jabo giriego pio ji̧ri̧iä Erima quȩmȩrëremȩde. Pio ju̧i̧iä chjara quȩ chiarëremȩde.

⁹ Jabo pio jiro üi̧ judi dëbe chjaomi̧ dari̧ japea̧ oaiä jabechji̧ Chauro judi, peaja̧di Pablo quȩmȩ pio judi coai̧tä darëremȩdejȩ. Tjamo̧ davä. Tjo tjamo̧ ja̧ chja̧oerä cjiamȩrȩ coai̧tä daea̧dejȩ.

¹⁰ Ado yo̧a̧dejȩ: —Danȩ, Ichiae pio judimi̧ darenȩ. A̧dë chjäte ma̧i̧ dari̧ japamȩrenȩ. Jabechji̧ chjai̧dë tjamo̧renȩ. U̧i̧pe chjaomȩrenȩ. Mȩnȩ chjadëri̧ jo̧rȩtatärea̧ ji̧, chjadëri̧ jo̧rȩtadëmȩrenȩ jabo Ano̧mȩ pio ju̧i̧ ja̧ jo̧rȩtarea̧ oa ji̧dë ma miremi̧ dari̧ japamȩrenȩ chjai̧dëra̧ pio ju̧ri̧ra̧. Jabechji̧ coëma cjiari̧ jo̧rȩtarea̧ pio ju̧i̧ ji̧dë ma dëbëpe chjaomi̧ dari̧ japamȩrenȩ.

¹¹ Ado yaba̧ mȩnȩ chjai̧dëri̧ japea̧ ba oa, jabechji̧ Ano̧mȩ pio judi bape chjaopadimȩ davä. Da cotomȩrȩ cjiadiäparenȩ do ji̧ra̧ nö̧ta. Do oa darërea̧ ji̧, jabechji̧ dadëmȩrȩ cjo̧ro̧parenȩ —yo̧a̧dejȩ Pablo judi. Ado Erima judi chjaodëri̧ da cotopea̧de. Ma̧i̧ da bagönȩ üdë jurucjürë cjätämi̧ dari̧ cjatärëremȩdejȩ jibëa̧ dacho oa. Ado jënȩ dadëmȩpea̧ oaiä, jȩa a̧dopamȩ pio ju̧i̧ ji̧dë ma ga̧re ga̧re taramȩpea̧de jibëa̧ ichira̧, jȩa ëba jäpamȩ ju̧i̧.

¹² Ado chiri tjamo̧ cjo̧ro̧mȩ judi pio ju̧i̧ daea̧ oaiä, chjaodëri̧ quëna̧mȩpea̧de Ano̧mȩ Jechu pio ju̧i̧iäpȩmo̧. Tjamo̧ davä. Pablo pio ju̧i̧iä ta̧rëa̧ oaiä, Bernabe pio ju̧i̧iä ta̧rëa̧ oaiä, jabechji̧ chjaodëri̧ quëna̧mȩpea̧de. 'Aja̧, Ano̧mȩ Jechu pio ju̧i̧ ja̧ ma̧ȩ üdë goae tjamo̧dicoada' quëna̧ jo̧rȩtamȩrȩ quëna̧mȩpea̧de.

Pablo judi a̧ra̧ano̧rëremȩdejȩrȩ judio ji̧ri̧, ado cja̧rȩmo̧ A̧tioquia quȩmȩ bë ma̧ri̧räpȩ a̧dopaji̧ri̧ oa

¹³ Ja̧dëa ji̧ Pablo judi, jibëa̧ jadüborë uimo̧mȩ chara ana̧ oa buaji̧ri̧rȩ Pjapjori pio judiri go̧dürëreji̧ri̧dirȩ Perege quȩmȩ bë ma̧ri̧räpȩmo̧ jäpea̧ oa. Ado Perege bë ma̧ri̧ üde Pa̧pjiria quȩmȩ chiriräpȩ a̧rȩde. Ado ju̧ri̧pȩ go̧düdärä ëte a̧dë baärëremȩdejȩrȩ Juan Marco judi. Jabechji̧, ibëa̧ bëräpȩ baätämi̧ cjiamȩrȩ a̧dë baäa̧dejȩrȩ Jerucharȩräpȩ baäpamȩrȩ.

¹⁴ Ja̧dëa̧ ji̧ Pablo judi Bernabe pio ju̧i̧ nö̧ta Perege bë ma̧ri̧ri pio judiri järëreji̧ri̧dirȩ Pichiria quȩmȩ chiriräpȩmo̧. Ado Pichiria chiriräpȩ go̧düdärä ëte, järëreji̧ri̧dirȩ A̧tioquia quȩmȩ bë ma̧ri̧räpȩ. Ado järätä chjaparea̧ doro jäa̧dirȩ judiorë a̧doparea̧ bëräpȩ. Ado chadäräa̧dirȩ.

¹⁵ Ja̧dëa ji̧ cja̧rȩmȩrȩ go̧ȩ ni̧bärëremȩdejȩ Moicherë go̧ȩparërea̧ ma̧ȩ duri pio ju̧i̧. Ütëbodärärë ta̧rërea̧mi̧ dari̧ go̧ȩ ni̧bäa̧dejȩ. Ado Ütërë ea jana̧ chjadüa̧ oa ni̧bäji̧ri̧ pio judiro̧ go̧ȩparërea̧ ma̧ȩ pio ju̧i̧bo a̧de go̧ȩ ni̧bäa̧dejȩ. Ja̧dëa ji̧ judiorë a̧doparea̧ bë tjamo̧ yo̧ji̧ri̧ pio judiro̧ pumȩ oaiä goë yo̧a̧diro̧jȩrȩ Pablo ju̧i̧, Bernabe ju̧i̧. Aja̧, ja̧di ta̧rëri̧ yo̧a̧diro̧jȩrȩ: —Danȩrȩ ca̧ oti̧, mȩnȩro̧ järiparȩrea̧ ma̧ȩ oa a̧ra̧ano̧rea̧ tararä judi, goë jaeibe. A̧ra̧ano̧chji̧ibe —yo̧a̧.

¹⁶ Ado pio ju̧i̧ ta̧rëa̧ oaiä Pablo judi cjitëno̧a̧de. Ado ichipë cjiamȩrȩ cjapi tänȩrëremȩdejȩrȩ pumȩ ji̧ri̧. Ado ja̧dëa ji̧ yo̧a̧dejȩrȩ: —Danȩrȩ ca̧ pumȩ, ta̧rëchji̧coe. Pio dibë ni̧bä chjaotämi̧ cjiarequededibe Icharai pio judiri ja̧ji̧ri̧ pio dibëiäpȩmo̧ —yo̧a̧dejȩrȩ—. Ado judiodë pio dibëiäpȩmo̧bo ni̧bä chjaotämi̧ cjiarequededibe, Ütë tjamo̧ ju̧i̧ ba chia daji̧ri̧ pio dibëiäpȩmo̧.

¹⁷ Danȩrȩ, Icharai pio judiri ja̧ji̧ri̧ ja̧ Ütë pio judi mitërëremȩdejȩrȩ davä ibëa̧ ütëti̧rea̧ pio ji̧ri̧ jibëa̧ pumȩpe bagapea̧ oa. Ado Ejito quȩmȩ chiriräpȩ cjo̧ro̧rërea̧ ji̧, no̧i̧dë tjamo̧ri̧ cjo̧ro̧ tänȩrëremȩdejȩrȩ jibëa̧ chiridërä cjo̧ro̧rëreji̧ri̧ oa. Ado japamitë chjätä ëte pio jiro chiriri pio judiri go̧dü tänȩrëremȩdejȩrȩ. Aja̧, jibëa̧ jauëchjara̧ pio ju̧ri̧ra̧ ana̧ri̧ tuti japamȩrȩ go̧dü tänȩrëremȩdejȩrȩ.

¹⁸ Ado ibëa̧ ütëti̧rea̧ ji̧ri̧ chiri maearäpȩ chjätäti̧ cjiaji̧ri̧ oa chjadëri̧ jidarëremȩdejȩrȩ 40 ui nö̧ta. Pio jȩaiäpȩmo̧ chjai̧dëri̧ jape chjaoa̧räbo, jabechji̧ chjadëri̧ jidarëremȩdejȩrȩ.

¹⁹ Ado ja̧dëa ji̧ Ütë tjamo̧ pio judi yürüa̧ oa, goae tarari̧ boadärärea̧ darëreji̧ri̧diro̧jȩrȩ Canaa̧ quȩmȩ chiriräpȩ cjo̧ro̧rëreji̧ri̧ pumȩ pio ji̧ri̧. Aja̧, ado cja̧rȩmo̧ pumȩ oa, ado cja̧rȩmo̧ pumȩ oa boadärärea̧ darëreji̧ri̧diro̧jȩrȩ, 7 pumȩ buba oa, 7 chiri oa. Jabechji̧ jibëa̧ chiripe bagarea̧mi̧ dari̧ mitërea̧ yürürëremȩdejȩrȩ Ütë tjamo̧ judi.

²⁰ Jabo ¿napai̧ japami̧te chjätä ëte mitërea̧ darëreji̧ri̧diro̧jo̧ȩ pio jiro chiri oa ibëa̧ ütëti̧rea̧ judiro̧? Napai̧ japamitëdë, jabechji̧ ui ji̧ra̧ri̧ chjätä ëte mitërea̧ darëreji̧ri̧diro̧jo̧ȩ. Aja̧, 450 ui chjätä ëte mitërea̧ darëreji̧ri̧diro̧jo̧ȩ. Jabechji̧ Icharai judi jibëa̧ pumȩ pio ji̧ri̧ nö̧ta Joche ja̧ ma̧ȩrä Ejitoräpȩ pearä baädärärërea̧ pio judiri yurori 450 ui chjätärëremȩde judiro̧ jibëa̧ chiri oa mitërea̧ dabea yaboi̧. Jabechji̧ 450 ui chjätä ëte mitërea̧ darëreji̧ri̧diro̧jo̧ȩ —yo̧mȩrȩ yo̧rëremȩdejȩrȩ Pablo judi. Ado Pablo judi cjiadiädëmȩrȩ ji̧dë u̧i̧ a̧de ni̧bä chjaorëremȩdejȩrȩ, ja̧di ta̧rëri̧ yo̧mȩrȩ: —Ado danȩrȩ, ibëa̧ ütëti̧rea̧ pio judiro̧ Canaa̧räpȩ cjo̧ro̧ji̧ri̧pea̧rä, jabechji̧ go̧dü tänȩji̧ri̧ pio ji̧ri̧ ja̧ chja̧oerä cjo̧ro̧rëreji̧ri̧dirȩ Ütë tjamo̧ pio judi tänȩa̧ oa. Ado ji̧ra̧rëreji̧ri̧dirȩ pio jiro go̧dü tänȩji̧ri̧ judiro̧. Jabechji̧ cja̧rȩmȩrȩ ja̧boa̧ ji̧, ado cja̧rȩmo̧rȩ ano̧ mire tjamo̧ cjo̧ro̧mȩpe bagarëremȩde yabo ëba baämi̧ dari̧ ëba cjo̧ro̧pea̧ oa. Aja̧, ja̧di maeari̧ japarëreji̧ri̧dirȩ. Ado pio ji̧ri̧ ja̧ chja̧oerä ano̧ mire cjo̧ro̧rëreji̧ri̧dirȩ ibëa̧ ütëti̧rea̧ judiro̧ japamitë ana̧ —yo̧a̧dejȩrȩ—. Ado ja̧dëa ji̧ japamitë chjätä ëte, Ütërë ea jana̧ chjadüa̧ oa ni̧bämȩ pio ju̧i̧ ja̧ chja̧oerä ano̧ mire cjo̧ro̧ji̧ri̧pea̧dirȩ. Aja̧, Chamue quȩmȩ pio ju̧i̧ ja̧ chja̧oerä cjo̧ro̧dërërea̧ ji̧, jabechji̧ pio ju̧i̧ ja̧ chja̧oerä ano̧ mire cjo̧ro̧rëreji̧ri̧dirȩ.

²¹ Ja̧dëa ji̧ japamitë chjätä ëte ibëa̧ ütëti̧rea̧ judiro̧ dai chirirä cjo̧ro̧mȩ ütë pio ju̧i̧ eaji̧ri̧pea̧diro̧jo̧ȩ. Pio ju̧i̧ ja̧ chja̧oerä ano̧ mire cjo̧ro̧tämi̧ cjiaji̧ri̧pea̧dirȩ. Aja̧, tjaoëpai̧ dari̧ cjo̧ro̧tämi̧ cjiaji̧ri̧pea̧dirȩ. Jabechji̧ ado cja̧rȩmo̧ ma̧ȩ oa ni̧bäji̧ri̧ pumȩ pio judiro̧ jibëa̧ ütë oa goami̧ dari̧ goatämi̧ cjiaji̧ri̧pea̧dirȩ peaja̧di —yo̧a̧dejȩrȩ—. Jabechji̧ judiro̧ Chamue pio ju̧i̧ ja̧ chja̧oerä chjadëri̧ cjo̧ro̧tärea̧ ji̧, dai chiri cjo̧ro̧mȩ ütë pio ju̧i̧ ja̧ chja̧oerä ano̧ mire cjo̧ro̧tämi̧ cjiaji̧ri̧pea̧dirȩ. Ado pio ju̧i̧iä Ütë tjamo̧ pio judi ütë tänȩrëremȩdejȩ Chau quȩmȩ pio ju̧i̧, Quiche quȩmȩ joja pio ju̧i̧. Aja̧, Bejami̧ ja̧ buba pio judiri ja̧mȩ oa ütë tänȩa̧dejȩ. Ado judi chiri ütë cjo̧ro̧mȩpea̧rä, jabechji̧ 40 ui nö̧ta ütëmȩrȩ cjo̧ro̧rëremȩde.

²² Jabo cjäri̧ madejȩ. Chau judi Ütë tjamo̧ ja̧ ma̧ȩrä cjo̧ro̧dëa̧ oaiä, jiadarëremȩdejȩ. Ado jiadamȩrȩ ütë cjatä tänȩrëremȩdejȩ. Ado ja̧di dari̧ japea̧ duri oa, Davi pio ju̧i̧ ano̧ mire ütë tänȩrëremȩdejȩ. Ado pio ju̧i̧ mitëa̧ duri oa, ja̧di ta̧rëri̧ yo̧rëremȩde Ütë tjamo̧ judi Davi pio ju̧i̧ chjiari: "Aja̧, Jeche quȩmȩ pio ju̧i̧ ja̧ joja oa mitëa̧reconȩ, pio coa tjamo̧ri̧ ma̧ chiadëri̧ cjiaparȩmȩ pio ju̧i̧. Aja̧, pio coa ta̧rëdiä goaramȩ pio ju̧i̧ mitëa̧reconȩ, cüdë yo̧a̧mi̧ nö̧tadäräri̧ ta̧rëdiätämi̧ cjiamȩ pio ju̧i̧" yo̧mȩrȩ yo̧rëremȩde Ütë tjamo̧ judi Davi pio ju̧i̧ chjiari —yo̧a̧dejȩrȩ pumȩ ji̧ri̧.

²³ Ado Pablo judi ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaorëremȩdejȩrȩ: —Ado danȩrȩ, Ütë tjamo̧ judi pearä judi yo̧ë cji̧därërea̧mi̧ ma̧na̧ tänȩrëremȩdiibe Davi pio judiri ja̧mȩ pio ju̧i̧. Aja̧, Icharai pio judiri ja̧ji̧ri̧ pio ji̧ri̧ chjadëri̧ chjätä tänȩpea̧ oa, ma̧na̧ tänȩrëremȩdiibe Chjätä Tänȩmȩ Jechu pio ju̧i̧ —yo̧a̧dejȩrȩ—.

²⁴ Jabo Jechu judi jabë ma̧na̧dëa̧rä, go̧e cjaeä chudamȩ Juan pio judi a̧ra̧ano̧rëremȩdejȩrȩ pumȩ ütëbo oa, Icharai pio judiri ja̧ji̧ri̧ ütëbo oa. Aja̧, judiro̧ chjai̧dëri̧ japea̧ pio ju̧i̧ chjiari ano̧ mire jo̧rȩtapea̧ oa, judiro̧ uirä go̧e cjaeä chuda̧ oa cjiapea̧ oa a̧ra̧ano̧rëremȩdejȩrȩ —yo̧a̧dejȩrȩ—.

²⁵ Ado Juan judi, Ütërë pio jȩaiäpȩmo̧ yürüa̧ ja̧beparea̧ pio ju̧i̧ ja̧bepadäräpea̧ ji̧ querediäa̧rä, yo̧ë ta̧rërëremȩdejȩrȩ pumȩ ji̧ri̧: "¿Jabo chjiarämi̧ cjiarenȩro̧coe?“ iëno̧ë ta̧rëa̧dejȩrȩ. Jabo dëbë yo̧rea̧ yürüdëmȩrȩ ja̧di ta̧rëri̧ a̧de yo̧a̧dejȩrȩ: “Danȩrȩ, oëra̧ jo̧rȩtadëchji̧vä pio coa chjiari" yo̧a̧dejȩrȩ. "Mȩnȩro̧ jidata̧ pio judidërequede. Ütë tjamo̧ judi chjadüpea̧ pio judidërequede. Ado cja̧rȩmo̧de. Jabo danȩrȩ, ma̧na̧pea̧ ji̧ querediä tjamo̧de“ yo̧a̧dejȩrȩ. “Ca̧ duri oa ma̧na̧pade. Ado a̧dë chjäte ba chiade. Pio ju̧i̧ ja̧ ta joë cä oa jareno̧pea̧ ji̧ nö̧tadërequede judi ba chia tjamo̧ tara. Jabechji̧ pio ju̧i̧ ja̧ mu̧i̧tjoi̧rȩ japarea̧ nö̧tadërequede” yo̧mȩrȩ yo̧rëremȩdejȩrȩ Juan judi —yo̧a̧dejȩrȩ pumȩ ji̧ri̧ Pablo judi.

²⁶ —Ado danȩrȩ ca̧ oti̧, ni̧bärequededibe Abaraa̧ pio judiri ja̧ji̧ri̧ pio ji̧ri̧iäpȩmo̧. Ado Ütë tjamo̧ pio ju̧i̧ uapami̧ dari̧ ba chia jo̧rȩtaji̧ri̧ pio ji̧ri̧iäpȩmo̧bo ni̧bärequededibe —yo̧a̧dejȩrȩ—. Danȩrȩ, pio jiro ma̧ȩ üdë chjätärea̧ yürümȩ ma̧ȩde. Ado pio ibëiäpȩmo̧ chjadüa̧ oa cjiade. Ibëa̧de. Abaraa̧ pio judiri ja̧ ji̧ri̧ pio ji̧ri̧ ja̧de. Ado judiodë pio ji̧ri̧ ja̧bode.

²⁷ Jabo cja̧ri madiro̧jo̧ȩ, Jerucharȩräpȩ cjo̧ro̧ji̧ri̧ judiro̧, ado tjamo̧ cjo̧ro̧ji̧ri̧ pio judiro̧borë chjadëri̧ dabadërëreji̧ri̧dirȩ Jechu pio ju̧i̧ chjiari. 'Jechu judi Chjätä Tänȩmȩ pio judidida' quëna̧ dabadërëreji̧ri̧dirȩ. Ado pio ju̧i̧iä ja̧bo tänȩpea̧ oa yürürëreji̧ri̧diro̧jo̧ȩ domano pio ji̧ri̧iäpȩmo̧. Ütërë ea jana̧ chjadüa̧ oa ni̧bäji̧ri̧ pio judiro̧ jabërä go̧ȩparërea̧mi̧ yürürëreji̧ri̧diro̧jo̧ȩ ja̧bo tänȩpea̧ oa. Aja̧, pio jiro ma̧ȩ oa dabaji̧ri̧borë, pio jiro ma̧ȩ oa järätä chjaparea̧ do nö̧ta ta̧rë chaji̧ri̧borë tjamo̧ri̧ dabadërëreji̧ri̧dirȩ. Ado pio ju̧i̧iä Chjätä Tänȩmȩdërämi̧ cjiaji̧ri̧rȩ ja̧bo tänȩpea̧ oa yürürëreji̧ri̧diro̧jo̧ȩ.

²⁸ Cja̧rȩmȩ co chjai̧dëri̧ japadëa̧räbo, judi chjai̧dëri̧ japea̧ ba oa ja̧bo tänȩrea̧mi̧dëräbo, jabechji̧ ja̧bo tänȩtä ea tjamo̧ji̧ri̧rȩ yo̧tarëreji̧ri̧dirȩ Pirato pio ju̧i̧iäpȩmo̧ —yo̧a̧dejȩrȩ—.

²⁹ Aja̧, Ütërë ea jana̧ chjadüa̧ oa ni̧bäji̧ri̧ pio judiro̧ jabërä go̧ȩparërea̧mi̧ japarëreji̧ri̧dirȩ chjö̧na̧i̧ oa. Ado ja̧dëa ji̧ judi ja̧boa̧ duri oa, o judiro̧ tori pio judiri bira tänȩrëreji̧ri̧diro̧jo̧ȩ ta̧dë cjararäpȩ ju̧ri̧ idë a̧ra̧pea̧ oa.

³⁰ Jabo Ütë tjamo̧ judi bëdü tänȩrëremȩdejȩ —yo̧a̧dejȩrȩ—.

³¹ Ado bëdüa̧rä, pio jȩaiäpȩmo̧ da tänȩrëremȩdejȩrȩ jibëa̧ jadü ji̧ri̧, o ji̧ri̧bo. Tjamo̧ davä. Pio jȩa nö̧ta tai̧rëreji̧ri̧ pio ji̧ri̧, Garirea quȩmȩ chiriri pio judiri Jerucharȩräpȩ yuro ëba tai̧rëreji̧ri̧ pio ji̧ri̧ da tänȩa̧dejȩrȩ do ji̧ra̧ nö̧ta. Ado danȩrȩ, pio jiro pumȩ pio judiro̧dirȩ pio yaba̧mi̧rä Jechu pio ju̧i̧ chjiari a̧ra̧ano̧ chjaoji̧ri̧ judiro̧ Jerucharȩräpȩ ju̧ri̧.

^32-33 Ado pio jiro ma̧ȩ chjadëi̧ pio ju̧i̧ a̧ra̧ano̧era̧pea̧rea̧ro̧dibe peaja̧di. Jabechji̧ Ütë tjamo̧ judi ibëa̧ ütëti̧rea̧ pio ji̧ri̧ pearä yo̧ë cji̧därërea̧ ma̧ȩ pio judi tjamo̧i̧padäräa̧ oa cjiadiäa̧de yaba̧. Tjamo̧ davä. Ibëa̧ ütëti̧rea̧ pio judiri ja̧ji̧ri̧ pio ji̧ri̧ ja̧ oa tjamo̧i̧ cjiari̧ cjiadiäa̧de Ütë tjamo̧ judi Jechu pio ju̧i̧ bëdü tänȩa̧ oaiä. Aja̧, Ütë tjamo̧ judi ibëa̧ ütëti̧rea̧ pio ji̧ri̧iäpȩmo̧ yo̧ë cji̧därërea̧ ma̧ȩ pio judi ibëa̧pea̧de yaba̧ Jechu pio judi bëdü tänȩa̧ oa cjia̧ oaiä. Ado Jechu pio ju̧i̧ bëdü tänȩa̧ oaiä, 'jabechji̧ pio judi tjamo̧dida, ca̧ Ja tjamo̧ pio judimo̧dida' quëna̧rea̧mi̧ dari̧ na̧rȩrëremȩde Ütë tjamo̧ judi. Ado peaja̧di ta̧rëri̧ go̧ȩparëremȩde Davirea̧ judi jabërä Go̧a̧rea̧ Ma̧ȩ quȩmȩ joërä, ütararea̧ 2ro. Aja̧, ta̧rëchji̧vä judi go̧ȩparërea̧ ji̧, Ütë tjamo̧ judi Joja pio ju̧i̧iäpȩmo̧ bëdü tänȩa̧ duri oa yo̧a̧ pio ju̧i̧: “Aja̧, ca̧ Jarenȩ mȩnȩ. Ado cüdë na̧ Ama̧i̧requede. Ado pio ju̧i̧ chjiari chjadëri̧ na̧rȩa̧requedejȩrȩ pumȩ ji̧ri̧ pio yaba̧ domȩ oa. 'Aja̧, Jäja pio judi tjamo̧dida, Joja pio ju̧i̧ ja̧ Ama̧i̧ pio judi tjamo̧dida' quëna̧rea̧mi̧ dari̧ chjadëri̧ na̧rȩa̧requedejȩrȩ, ütëborë chjadëri̧ dabarea̧mi̧ dari̧.” Aja̧, ja̧di ta̧rëri̧ yo̧rëremȩde Ütë tjamo̧ judi Jechu pio ju̧i̧iäpȩmo̧ —yo̧a̧dejȩrȩ—.

³⁴ Ado Pablo judi cjiadiädëmȩrȩ ja̧di ta̧rëri̧ a̧de ni̧bä chjaorëremȩdejȩrȩ: —Jabechji̧ Ütë tjamo̧ judi ja̧borëremȩ pio ju̧i̧ bëdü tänȩpea̧ pio ju̧i̧ chjiari jabërä yo̧ë cji̧därëremȩde. Tjamo̧ davä. Jibëa̧ icjara üdë ta̧dë cjararä ju̧ri̧ tapuchjape järea̧ decjiari̧ bëdü tänȩpea̧ pio ju̧i̧ chjiari jabërä yo̧ë cji̧därëremȩde. Ado danȩrȩ ca̧ oti̧, Ütë tjamo̧ judi ja̧borëremȩ pio ju̧i̧ bëdü tänȩrëremȩdejȩ Jechu pio ju̧i̧. Aja̧, ado chjereno̧ ja̧borea̧mi̧dëri̧ bëdü tänȩa̧dejȩ. Jibëa̧ icjara üdë ta̧dë cjararä ju̧ri̧ tapuchjape järea̧ decjiari̧ bëdü tänȩa̧dejȩ bucho ana̧. Pio ju̧i̧ chjiari jabërä go̧ȩpea̧ oa cjiarëremȩde ma̧ȩ üdë. Danȩrȩ, ja̧di ta̧rëri̧ yo̧rëremȩde Ütë tjamo̧ judi Joja pio ju̧i̧iäpȩmo̧ jabërä. Ta̧rëchji̧vä: “Cüdë Davi pio ju̧i̧ a̧dorërea̧mi̧ a̧doparequedemȩ peaja̧di.” Aja̧ ca̧ oti̧, ja̧di ta̧rëri̧ yo̧rëremȩdejȩ Ütë tjamo̧ judi Joja pio ju̧i̧iäpȩmo̧. Ado danȩrȩ, judi Davirea̧ pio ju̧i̧ chjadëri̧ a̧dorërea̧mi̧ a̧dorëremȩdejȩ Jechu pio ju̧i̧ peaja̧di.

³⁵ Ado Davirea̧ judi Go̧a̧rea̧ ma̧ȩrä go̧ȩparërea̧ ma̧ȩ pio ju̧i̧bo ta̧rëchji̧vä, Jechu judi Jäja pio ju̧i̧iäpȩmo̧ yo̧a̧ ma̧ȩ pio ju̧i̧ —yo̧a̧dejȩrȩ Pablo judi—. Aja̧, ta̧rëchji̧vä pio yoa ma̧ȩ oa: “Aja̧, cüdë na̧ mu̧i̧tjoi̧ tara, mȩnȩ mitë chjadüa̧ mu̧i̧tjoi̧ tara, jabechji̧ ca̧ icjara oa tapuchjape bagarea̧ yürüdëparenȩque.”

³⁶ Aja̧, ja̧di ta̧rëri̧ go̧ȩparëremȩde Davirea̧ judi jabërä, jabo pio jȩa chjiari go̧ȩpadërëremȩde jabo Jechu judi jibëa̧ Ama̧i̧ ju̧i̧iäpȩmo̧ yo̧bëmi̧ go̧ȩparëremȩde. Jabechji̧ Davirea̧ pio judi ja̧borëremȩde. Ado na̧ra̧ oa cjiarëremȩde. Jabo judi jabë cjo̧ro̧a̧ nö̧ta, dëdë, Ütë tjamo̧ pio ju̧i̧ ta̧rëdiämȩrȩ cjo̧ro̧rëremȩde. Jabo ja̧dëa ji̧ judi ja̧boa̧ ji̧, jabechji̧ jibëa̧ pumȩ judiro̧ na̧ra̧diro̧jo̧ȩ. Ado jibëa̧ icjararemȩ üdë tapuchjape bagarëremȩde.

³⁷ Jabo Jechu ja̧ icjara üdë tapuchjape bagadëa̧de. Jabechji̧ Ütë tjamo̧ judi pio ju̧i̧ bëdü tänȩrërea̧ ji̧, jabechji̧ tapuchjape bagadëmȩ oa bëdü tänȩrëremȩdejȩ.

³⁸ Pio ju̧i̧iä chjadëri̧ dabatä ea tjamo̧requededibe ca̧ oti̧ bëdüa̧mȩ pio ju̧i̧ chjiari. Jabechji̧ pio jiro pumȩ pio ju̧i̧iämo̧i̧ duridëparȩrea̧mi̧ dade. Mȩnȩro̧ chjai̧dëri̧ japea̧ üdë Jechu pio ju̧i̧iämo̧i̧ duridëparȩrea̧mi̧ dade.

³⁹ Jabechji̧ Moicherë go̧ȩparërea̧ ma̧ȩ pio ju̧i̧iä duridëparȩrea̧ dadërëreji̧ri̧rea̧rȩ. Pio jiro ma̧ȩ oaiä jare chjadüa̧ oa cjiami̧ dari̧ cjiarea̧ dadërëreji̧ri̧rea̧rȩ. Jabo eami̧ pumȩ üdë Jechu pio ju̧i̧iä quëna̧rä judi, jabechji̧ chjätärea̧ dapade, jare chjadürea̧mi̧ dari̧. Aja̧, ërecjiarea̧ decjiaräpȩ cjo̧ro̧rea̧ dapade.

⁴⁰ Ja̧di tara na̧e chia tjamo̧täreji̧ri̧nȩrȩ ca̧ oti̧ pio yoa ma̧ȩ oa jiadachea oa, Ütë tjamo̧ judi bape chjaochea oa. Danȩrȩ, peaja̧di ta̧rëri̧ go̧ȩparëreji̧ri̧dirȩ Ütërë ea jana̧ chjadüa̧ oa ni̧bäji̧ri̧ judiro̧ jabërä jiadaji̧ri̧ pio ji̧ri̧ chjiari. Ta̧rëchji̧vä:

⁴¹ "Danȩrȩ, goaeri̧ ya̧ji̧ri̧renȩro̧coe. 'Aja̧, Ütëdëde. Ado judi yo̧a̧mi̧ japadëmȩde’ yo̧ji̧ri̧nȩrȩ pio coa chjiari. Jabo danȩrȩ mȩnȩro̧, ana̧ tjamo̧ri̧ jo̧rȩtapanȩrȩ davä cüdë japapea̧ pio ju̧i̧ chjiari. Ado ja̧dëa ji̧ mȩnȩro̧ pio ju̧i̧ daea̧ duri oa, jabechji̧ goari jä tänȩa̧ oa cjiapanȩrȩ. Jabo mȩnȩro̧ jabë cjo̧ro̧ro, jabechji̧ dacho bërëmi̧ cjiari̧ jo̧rȩtaji̧ri̧rȩ dapanȩrȩ ma̧i̧ da oa. Jabechji̧ a̧dë chjäte uapai̧ da oa japaparequededibe mȩnȩro̧ quëna̧rea̧mi̧dë pio ju̧i̧. Aja̧, mȩnȩro̧ o ji̧ri̧iä cüdë japapea̧ pio ju̧i̧ chjiari irä ta̧rëa̧räbo, jabechji̧ quëna̧dëtäreji̧ri̧nȩrȩ.” Aja̧ ca̧ oti̧, ja̧di ta̧rëri̧ yo̧rëremȩde Ütë tjamo̧ judi pio jȩa jiadapaji̧ri̧ pio ji̧ri̧ chjiari. Peadëri ja̧ go̧ȩpea̧ oa cjiarëremȩde ma̧ȩ üdë. Pio ju̧i̧iä chjadëri̧ ta̧rë ja̧botäreji̧ri̧nȩrȩ ma̧ȩ oa, cüdë dibë ni̧bä chjaoa̧ ma̧ȩ oa. Aja̧, ja̧di ta̧rëri̧ yo̧mȩrȩ ni̧bä chjaorëremȩdejȩrȩ Pablo judi. Ado judiri cjiadiäa̧de.

⁴² Ado Pablo judi, Bernabe judi a̧doparea̧ bëri pio judiri go̧dürërea̧ ji̧, ta̧rë chareji̧ri̧ pio judiro̧ ji̧dë ma yo̧tarëreji̧ri̧diro̧jȩrȩ pio jibëiäpȩmo̧ ado chjereno̧ a̧ra̧ano̧era̧tä. Aja̧, ado cja̧rȩmo̧ chemanarä, järätä chjaparea̧ doro ado chjereno̧ a̧ra̧ano̧era̧tä yo̧a̧diro̧jȩrȩ.

⁴³ Ado ta̧rë chareji̧ri̧ pio judiro̧ a̧doparea̧ bëri pio judiri go̧düa̧rä, o judiro̧ cho̧rë järëreji̧ri̧diro̧jo̧ȩ Pablo ju̧i̧, jibëa̧ jadübo oa. Judio pio judiro̧, ado judiodë pio judiro̧borë cho̧rë jäa̧diro̧jo̧ȩ, judiorë quëna̧mi̧ quëna̧ji̧ri̧pe jäa̧ji̧ri̧ judiodë pio judiro̧. Ado Jechurë chjadüa̧ pio judiro̧ chjadëri̧ a̧doa̧diro̧jȩrȩ pio jibë cho̧rë järeji̧ri̧ pio ji̧ri̧. 'Aja̧, Ütë tjamo̧ judi chjadëri̧ a̧dodiibëda, judi chjadëri̧ a̧doa̧ chja̧oerämo̧ cjo̧ro̧täreji̧ri̧a̧ro̧da' quëna̧rea̧mi̧ dari̧ chjadëri̧ chi̧dëearëreji̧ri̧diro̧jȩrȩ.

⁴⁴ Ado järätä chjaparea̧ doro, cja̧rȩmȩ chemana chjätä ëte, bë nö̧tai̧ oa cjo̧ro̧ji̧ri̧ judiro̧ a̧dopera̧parëreji̧ri̧dirȩ Ano̧mȩ ja̧ ma̧ȩ pio ju̧i̧ ta̧rëpea̧ oa.

⁴⁵ Jabo judio tjamo̧ yo̧ji̧ri̧ pio judiro̧ pumȩ buba oa daea̧ oaiä, ma̧ cjüëtjori̧ jo̧rȩtaji̧ri̧pea̧dirȩ quëbaji̧ri̧rȩ. Ado pio ju̧i̧iä ma̧ȩ goaedëra̧ yo̧rëreji̧ri̧diro̧jo̧ȩ Pablo ju̧i̧. Ya̧ea̧diro̧jo̧ȩ. Tja̧reparȩji̧ri̧rȩ dëbëpe chjaomi̧ dari̧ yo̧a̧diro̧jo̧ȩ.

⁴⁶ Jabo Pablo judi, Bernabeborë järidëpe bagadëji̧ri̧rȩ ji̧dë u̧i̧ to̧bari̧ a̧ra̧ano̧rëreji̧ri̧dirȩ. Ado Pablo judi, uapadëmȩrȩ, dëbë yo̧a̧dejȩrȩ, ja̧di ta̧rëri̧ yo̧mȩrȩ: —Danȩrȩ, mȩnȩro̧ judio tara, jabechji̧ o ji̧ri̧ yabo chja a̧ra̧ano̧era̧pea̧rea̧ro̧dibe Jechu pio ju̧i̧ chjiari ma̧ȩ oa. Jabo mȩnȩro̧ jiada̧ tara, ’Jechu pio ju̧i̧iä chjätärea̧mi̧dëdida’ quëna̧ pio oaiä, jabechji̧ pio dibë a̧ra̧ano̧tärea̧ ji̧, judiodë pio ji̧ri̧iäpȩmo̧ ano̧ mire a̧ra̧ano̧parea̧ro̧jȩrȩ, pio dibë a̧ra̧ano̧tärea̧ ji̧.

⁴⁷ Peaja̧di dari̧ japatä yo̧diibe ibëa̧ Ano̧mȩ ja̧ ma̧ȩ üdë. Ta̧rëchji̧vä: “Pio dibë mitëa̧requededibe arë dami̧ dari̧ a̧ra̧ano̧pea̧ oa judiodë pio ji̧ri̧iäpȩmo̧. Jachiti̧ oa cjo̧ro̧ji̧ri̧ pio ji̧ri̧iäpȩmo̧, oëra̧ti̧ a̧rȩmȩ chiriräpȩ cjo̧ro̧ji̧ri̧ pio ji̧ri̧iäpȩmo̧ chjadëri̧ dabapa tänȩpea̧ oa mitëa̧requededibe judiro̧ chjätärea̧ dapea̧ oa.” Aja̧, ja̧di ta̧rëri̧ yo̧mȩrȩ ma̧ȩ yürürëremȩdiibe ibëa̧ Ano̧mȩ judi jabërä, judiodë pio ji̧ri̧iäpȩmo̧ ano̧ mire a̧ra̧ano̧pea̧ pio ju̧i̧ chjiari. Pio ju̧i̧iä jabechji̧ yo̧requededibe —yo̧mȩrȩ dëbë yo̧rëremȩdejȩrȩ Pablo judi.

⁴⁸ Ado judiodë pio judiro̧ pio ju̧i̧ ta̧rëa̧ oaiä, ma̧ chiadëri̧ cjiari̧ jo̧rȩtaji̧ri̧pea̧dirȩ. 'Aja̧, Ütë tjamo̧ ja̧ ma̧ȩ üdë chjadëdibëda, ba chia tjamo̧dida, pio a̧ro̧rȩborë quëna̧pea̧dida' quëna̧ jo̧rȩtaji̧ri̧pea̧dirȩ. Ado Ütë tjamo̧ judi pearä mitërërea̧ pumȩ pio judiro̧ quëna̧ji̧ri̧pea̧dirȩ, a̧dëräpȩ bucho ana̧ cjo̧ro̧paji̧ri̧rȩ.

⁴⁹ Ado pio ju̧i̧iä Ütë tjamo̧ ja̧ ma̧ȩ üdë pio jiro chiriräpȩ oëra̧ti̧ oa chjuchjupechärëremȩde pumȩ no̧i̧dërë ta̧rërea̧mi̧ dari̧.

⁵⁰ Jabo judio tjamo̧ yo̧ji̧ri̧ judiro̧ Ütë tjamo̧ ja̧ ma̧ȩ oa ta̧rë ja̧bodë marëreji̧ri̧diro̧jo̧ȩ. Ado pio ju̧i̧iä ma̧ȩ chjádë yürü chjaorëreji̧ri̧dirȩ a̧ra̧ano̧ji̧ri̧ pio ji̧ri̧ chjiari. Ado bë ma̧ri̧ tjamo̧ cjo̧ro̧ji̧ri̧ judiro̧ pio ju̧i̧ ta̧rëa̧ oaiä, goëdëri̧ cjia tjamo̧pe bagarëreji̧ri̧dirȩ. Ado chëre ji̧ra̧ri̧ goaji̧ri̧ ivi jini̧ro̧, judiodë ivi pio jini̧ro̧, Ütë tjamo̧ ju̧i̧ jo̧rȩtaji̧ri̧ ivi pio jini̧ro̧ peaja̧di goëdëri̧ cjiapea̧ni̧rȩ. Jabechji̧ a̧ra̧ano̧ji̧ri̧ pio ji̧ri̧ chjiari teracaba ma̧ȩ oa ta̧rëa̧ oaiä, peaja̧di goëdëri̧ cjiapea̧ni̧rȩ. Ado goëdëri̧ cjiaji̧ri̧rȩ a̧ra̧ a̧ra̧ jiärëreji̧ri̧diro̧jȩrȩ jibëa̧ pumȩ ji̧ri̧. Aja̧, a̧ra̧ano̧ji̧ri̧ pio ji̧ri̧ conȩdatä, pio ji̧ri̧ jaepe ma̧ȩtä yo̧ji̧ri̧rȩ a̧ra̧ a̧ra̧ jiäa̧diro̧jȩrȩ. Pio ju̧i̧iä jaepe ma̧ȩa̧diro̧jo̧ȩ Pablo ju̧i̧, Bernabe pio ju̧i̧bo. Jibëa̧ chiriri pio judiri baä tänȩrëreji̧ri̧diro̧jȩrȩ.

⁵¹ Pio ju̧i̧iä Pablo judi, Bernabe judi na̧rȩrëreji̧ri̧diro̧jȩrȩ. Jibëa̧ taräremȩ oa pjo̧de ano̧a̧diro̧jo̧ȩ dabu decjiari̧. Ja̧di dari̧ japaji̧ri̧rȩ na̧rȩrëreji̧ri̧diro̧jȩrȩ. 'Aja̧, aeno̧a̧ oa cjiami̧ dari̧ cjiaa̧ro̧da yaba̧' quëna̧pea̧ oa na̧rȩa̧diro̧jȩrȩ. Ado ja̧di dari̧ japa ëte baäa̧dirȩ Iconio quȩmȩ bë ma̧ri̧räpȩ.

⁵² Jabo pio jiro pumȩ judiro̧ Jechurë chjadüa̧ pio ji̧ri̧ baä tänȩa̧räbo, jabechji̧ A̧tioquiaräpȩ cjiadiäa̧ji̧ri̧ quëna̧ji̧ri̧ pio judiro̧ ma̧ chiadëri̧ cjia tjamo̧ji̧ri̧rȩ cjo̧ro̧rëreji̧ri̧dirȩ. Jabechji̧ Tjo tjamo̧ judi chi̧dëea̧ chja̧oerä cjo̧ro̧a̧ oaiä, ma̧ chiadëri̧ cjiari̧ cjo̧ro̧rëreji̧ri̧dirȩ.