Japarea̧ 12 - Biblia Pume

Ja̧bo tänȩrëreji̧ri̧diro̧jo̧ȩ Santiago ju̧i̧. Ado Pedro pio ju̧i̧ chaärea̧ bëräpȩ chaärëreji̧ri̧diro̧jo̧ȩ.

¹ Ado pio jiro japamitërä Erode quȩmȩ ütë pio judi chjadürëremȩdejȩrȩ jibëa̧ guadia oa quëna̧ji̧ri̧ pio ji̧ri̧ conȩdapea̧ oa. Aja̧, o oa, a̧dopaji̧ri̧ pio ji̧ri̧ o oa conȩdapea̧ oa chjadürëremȩdejȩrȩ.

² Ado Santiago pio ju̧i̧, Juan ja̧ omȩ pio ju̧i̧ ja̧bo tänȩtä yo̧ chjadüa̧ oaiä, ja̧bo tänȩrëreji̧ri̧diro̧jo̧ȩ. Dëbëribo jo̧dë chiamȩ tjapënȩmi̧ dara̧ pio ju̧ri̧ra̧ ja̧bo tänȩa̧diro̧jo̧ȩ.

³ Ado pio ju̧i̧ chjiari ta̧rëa̧ oaiä ma̧ chiadëri̧ cjiapea̧dirȩ judio tjamo̧ yo̧ji̧ri̧ judiro̧. Ado Erode judi quëna̧mȩpea̧ oaiä, 'Aja̧ cüdë japea̧ oaiä ma̧ chiadëri̧ cjiapea̧diro̧da' quëna̧ dabapea̧ oaiä, 'jabechji̧ ado cja̧rȩmo̧ oa ja̧bo tänȩtäremȩquëda' quëna̧ jo̧rȩtamȩrȩ yo̧ chjadürëremȩdejȩrȩ jibëa̧ guadia oa Pedro pio ju̧i̧bo mitëpea̧ oa. Aja̧, do chjätäpea̧ doro mitërëreji̧ri̧diro̧jo̧ȩ Pedro ju̧i̧. Judio judiro̧ pjuru chiadëmȩ chja̧pe oa jurapea̧ quȩmȩ do chjätäpea̧ doro mitëa̧diro̧jo̧ȩ.

⁴ Ado Pedro pio ju̧i̧ mitë ëte, chaäa̧diro̧jo̧ȩ chaärea̧ bëräpȩ. Ado judi goadi baärea̧ dachea oa, jadüchiami̧ bubarë, jadüchiami̧ guadia chia maearë chjarapë jidarëreji̧ri̧diro̧jo̧ȩ. Ado Erode judi, 'Aja̧, uëmo̧ a̧dë chjätärea̧ do üdë chjätäa̧rä, ütarë dapacuni̧da, chjai̧dë oa japea̧ ba oa bape chjaopacuni̧da, ütëborë ta̧rëri̧ ütarë bapȩ chjaopacuni̧da' quëna̧ jo̧rȩtarëremȩde.

⁵ Pio ju̧i̧iä chaäa̧diro̧jo̧ȩ Pedro ju̧i̧. Jabo quëna̧ji̧ri̧ judiro̧ cjarȩmȩ coëma jo̧rȩtaji̧ri̧rȩ goë tuti cjo̧dë chjaorëreji̧ri̧dirȩ Ütë tjamo̧ pio ju̧i̧iä Pedro pio ju̧i̧ chjiari. Järi tjamo̧ji̧ri̧rȩ goë tuti cjo̧dë chjaorëreji̧ri̧dirȩ.

Ütë tjamo̧ judi tuti japamȩrȩ go̧dü tänȩa̧dejȩ Pedro ju̧i̧

⁶ Erode judi Pedro ju̧i̧ bape chjaopea̧ do üdë jabë dopadëa̧rä jabë gȩnȩrä, mo̧a̧ cjiarëremȩde Pedro judi yo̧a̧ri̧ guadia tjoro. Yo̧a̧ri̧ra̧ yurë cji̧däa̧ oa cjiamȩrȩ cjiarëremȩde chatu chiamȩ chjipararira̧. Ado guadia orë jidarëreji̧ri̧diro̧jo̧ȩ joë ya oa go̧dürea̧mi̧dëri̧.

⁷ Ado chjaodëri̧ idëpea̧de a̧dërimȩ mu̧i̧tjoi̧ pio judi. Ado chaärea̧ jo̧ tjoro bagönȩ marërea̧ ji̧, ma̧i̧ dari̧ tatapea̧de chjadëri̧ da mirerea̧mi̧ dari̧. Ado Pedro pio ju̧i̧ ja̧ ca̧to oa mu̧i̧ mu̧i̧ guamȩrȩ na̧rȩno̧a̧dejȩ. Ado yo̧a̧dejȩ: —Jo̧ȩra̧pe cjitëno̧vä. Ado chatu chiamȩ chjiparari üdë Pedro ja̧ ichi ju cararäremȩrȩ chjaodëri̧ a̧dë cjatëno̧a̧dejȩ.

⁸ Ja̧dëa ji̧ yo̧a̧dejȩ a̧dërimȩ mu̧i̧tjoi̧ üdë: —Chjuari̧ cjiari̧ jëdano̧vä na̧ cada abürea̧ oa. Ado na̧ ta joë oa go̧ioeno̧vä —yo̧a̧dejȩ. Ado mu̧i̧tjoi̧rȩ yo̧a̧mi̧ japëno̧a̧de Pedro judi. Ado ji̧dë u̧i̧ yo̧mȩrȩ a̧de yo̧a̧dejȩ: —Chjibo cotoi̧ra̧ inëno̧vä. Ado yaba̧ cho̧rë jana̧coe.

⁹ Ado Pedro judi cho̧rë järëremȩdejȩ. Tjamo̧ri̧ dabadëmȩrȩ cho̧rë jäa̧dejȩ. 'Dabadëquëda jabomo̧ darämi̧ cjia jiroquëda, tjamo̧ri̧ dadë jiroquëda' quëna̧ jo̧rȩtamȩrȩ cho̧rë jäa̧dejȩ tjamo̧rämi̧ cjiadëmȩrȩ.

¹⁰ Ado jäji̧ri̧rȩ chjadëri̧ dae chjätäa̧diro̧jo̧ȩ jibëa̧ queri̧ cjiamȩ guardia buba oa. Ado ji̧dë u̧i̧ jachi chja cjiamȩ guardia buba oa peaja̧di chjadëri̧ dae chjätäa̧diro̧jo̧ȩ. Ja̧dëa ji̧ go̧düdäräa̧dirȩ tuti cararea̧ joë yaräpȩ. Ado pio jiro joë ya üdë chjiparari chacha tjamo̧ra̧ japea̧ oa cjiarëremȩde. Jabo jibëa̧ ma̧na̧ri̧ are ië cjiamȩ oa chjaodëri̧ go̧düa̧dirȩ tutia̧ dairäpȩmo̧, bë ma̧ri̧räpȩmo̧ a̧rȩmȩ no̧ropȩ. Ado järea̧ no̧ro tai̧mȩ oa cho̧rë jäa̧dejȩ mu̧i̧tjoi̧ ju̧i̧ Pedro judi. Jabo mu̧i̧tjoi̧ judi chjaodëri̧ a̧dë cjarapea̧ oaiä jibëa̧ma̧i̧ cjiadiärëremȩde.

¹¹ Ado chjaodëri̧ daba quëna̧ jo̧rȩtamȩpea̧de Pedro judi chjadëri̧ dabadërërea̧ ji̧. 'Chia chia, jabomo̧ darämi̧ cjiadëremȩquëda jabo tjamo̧ri̧ daremȩquëda, a̧dërimȩ mu̧i̧tjoi̧ pio judi chjadëri̧ a̧doera̧pea̧dicoada, Ano̧mȩ pio judi chjadüa̧ oa a̧doera̧pea̧dicoada, Erode üdë pio coaiäpȩmo̧ gitoi̧ dari̧ japachea oa a̧doera̧pea̧dicoada, ado judio pio judiro̧ ma̧i̧ dari̧ conȩda̧ oa cjiamȩ oa datärea̧ ji̧, dadëpadiro̧coada, jabechji̧ judiro̧ jidatatea̧ pio ju̧i̧ dadëpadiro̧da' quëna̧ jo̧rȩtamȩpea̧de.

¹² Ado Pedro judi ja̧di dari̧ quëna̧ jo̧rȩtamȩpea̧rä, järëremȩde Maria ja̧ bëräpȩ, Juan Marco jojini̧rȩ cjo̧ro̧mȩräpȩ. Ado pio ju̧ri̧pȩ a̧dopea̧ oa cjiarëreji̧ri̧dirȩ quëna̧ji̧ri̧ judiro̧ no̧i̧dërë. Pedro pio ju̧i̧ chjiari goë tuti cjo̧dëji̧ri̧rȩ a̧dopea̧ oa cjiarëreji̧ri̧dirȩ.

¹³ Ado Pedro judi bëräpȩ go̧düdäräa̧mȩrȩ taö taö eari̧ gu̧na̧ gu̧na̧ cjia̧dejȩ yu̧a̧rea̧ joë ya oa, yu̧a̧tämi̧ cjiamȩrȩ. Ado mu̧i̧tjoi̧ pio jini̧, Dode quȩyi̧ jini̧, iei̧ pëi̧ chjarë ta̧rëa̧ oaiä, goëdepea̧nȩjȩ.

¹⁴ Ado Pedro ja̧ ma̧ȩ oa ta̧rëa̧ oaiä ma̧ chiadëri̧ cjia tjamo̧pea̧nȩ. Jabo joë ya pio ju̧i̧ chjaodëri̧ are iëtärea̧ ji̧, jäeno̧rëreyi̧nȩ o ji̧ri̧iäpȩmo̧ yo̧pea̧ oa. —Pedro pio judi jo̧ dairäpȩ cjiade —yo̧a̧nȩjȩrȩ.

¹⁵ Jabo dëbë yo̧a̧diro̧jȩ: —Cjäri̧ mamȩ, teracabari̧ yo̧mȩ. Jabo Dode jini̧ cjiadiädëa̧nȩ. —Cjäri̧ maquë, teracabari̧ yo̧dërequededibe. Tjamo̧i̧ cjiari̧ yo̧requededibe. Pedro pio judi jo̧ dairäpȩde —yo̧a̧nȩjȩrȩ. Pio ju̧i̧ ta̧rëa̧ oaiä, yo̧a̧dirȩ: —Pedro pio judidë jirode jabo a̧dërimȩ mu̧i̧tjoi̧ jirode. Pedro pio ju̧i̧ jidamȩ mu̧i̧tjoi̧ pio judi jirode —yo̧a̧dirȩ.

¹⁶ Jabo judiro̧ ni̧bä chjaoa̧ nö̧ta, Pedro judi ji̧dë ma taö taö eari̧ gu̧na̧ gu̧na̧ cjiarëremȩdejȩ tuti cararea̧ joë ya oa, jȩa chjadëri̧ yu̧a̧ tänȩpea̧ oa. Pio ju̧i̧iä jäëno̧a̧dirȩ tuti cararea̧ joë ya pio ju̧i̧ are ië yürüpea̧ oa. Ado Pedro pio ju̧i̧ daea̧ oaiä ana̧ri̧ jo̧rȩtaji̧ri̧pea̧dirȩ, ya yabë cjiaji̧ri̧rȩ.

¹⁷ Ado Pedro judi, jibëa̧ ichira̧ ichipë cjiamȩrȩ cjapi tänȩa̧dejȩrȩ. Ado ja̧dëa ji̧ ni̧bä chjaoa̧dejȩrȩ Ano̧mȩ judi pio jȩa chjiari tuti japea̧ pio ju̧i̧ chjiari, chaärea̧ jo̧ tjori pio judiri chjadëri̧ go̧dü tänȩa̧ pio ju̧i̧ chjiari. Ado a̧de yo̧mȩrȩ yo̧a̧dejȩrȩ: —Danȩrȩ, cüdë dibë ni̧bä chjaoa̧ pio ju̧i̧ chjadëri̧ ni̧bä chjaochji̧jo̧ȩ Santiago pio ju̧i̧iäpȩmo̧, ibëa̧ a̧doparea̧ tjamo̧ jidamȩ pio ju̧i̧iäpȩmo̧. Jabechji̧ judi dabadëchea oa chjadëri̧ ni̧bä chjaochji̧jo̧ȩ Ütë tjamo̧ judi pio coa chjiari tuti japea̧ pio ju̧i̧. Ado ibëa̧ oti̧ pio ji̧ri̧iäpȩmo̧bo chjadëri̧ ni̧bä chjaochji̧jȩrȩ peaja̧di. Ado ja̧di ja̧di ta̧rëri̧ ni̧bä chjao ëte, Pedro judi go̧dürëremȩde ado cja̧rȩmo̧räpȩ ano̧ mire jäpea̧ oa.

¹⁸ Ado dopea̧rä guadia judiro̧ ana̧ tjamo̧ri̧ jo̧rȩtaji̧ri̧pea̧dirȩ Pedro pio ju̧i̧ dadëa̧ oaiä. '¿Tjana̧räpȩcjivadi? pio yoaiäpȩremȩ üdë ¿tjana̧räpȩcjivadi' quëna̧ jo̧rȩtaji̧ri̧pea̧dirȩ, bücjüri̧ cjia tjamo̧ji̧ri̧rȩ.

¹⁹ Ado Erode judi Pedro pio ju̧i̧ jätä yo̧a̧ oaiä, na̧tatareji̧ri̧diro̧jo̧ȩ jabo cjäri̧ madiro̧jo̧ȩ, dadärädëa̧diro̧jo̧ȩ. Pio ju̧i̧iä Erode pio judi iëno̧ iëno̧ ta̧rëa̧dejȩrȩ guadia pio ji̧ri̧ chjadëri̧ ütarë ta̧rëpea̧ oa. Ado ja̧di dari̧ japa ëte, 'Jabo cjäri̧ madiro̧da, chjadëri̧ jidadëa̧diro̧ju̧i̧da, Pedro pio ju̧i̧ chjadëri̧ jidatärea̧ ji̧, chjadëri̧ jidadëa̧diro̧ju̧i̧da, ado pio ju̧i̧iä goadi baärea̧ daea̧ jirodida, pio ju̧i̧iä ja̧bopea̧ chiadiro̧da, chjadëri̧ jidadëa̧ ba oa ja̧bopea̧ chiadiro̧da' quëna̧ jo̧rȩtamȩrȩ ja̧bo tänȩtä yo̧ chjadürëremȩde. Ja̧di dari̧ japa ëte, Erode judi Judea quȩmȩ chiriri pio judiri go̧dürëremȩde. Aja̧, Checharea quȩmȩ bë ma̧ri̧räpȩ japamitë ano̧ mire cjiadiäpea̧ oa, jabechji̧ go̧dürëremȩde.

Erode judi ja̧borëremȩde.

²⁰ Ado Erode judi Checharearäpȩ cjo̧ro̧a̧ nö̧ta, pumȩ judiro̧ goëdaera̧pea̧diro̧jo̧ȩ. Aja̧, Tiro quȩmȩ bë ma̧ri̧ri pio judiri goëdaera̧pea̧diro̧jo̧ȩ, Chido̧ quȩmȩ bë ma̧ri̧ri pio judiribo. Jabechji̧ Erode judi pio jiro pumȩ pio ji̧ri̧iäpȩmo̧ a̧dë chjäte ërecjiape baga̧ oaiä, goëdaera̧pea̧diro̧jo̧ȩ. Jabechji̧ judiro̧ Erode ja̧ chiriräpȩ cjo̧ro̧ji̧ri̧ pio ji̧ri̧iä jurarea̧ oa gatë chjaoa̧ oaiä, judiro̧ pio ji̧ri̧iä ja̧ȩ cjiami̧ dari̧ cjo̧ro̧a̧ oaiä, jabechji̧ goëdaera̧pea̧diro̧jo̧ȩ chjadëri̧ jëdano̧pea̧ oa, judiro ütëborë cjatäcjie jo̧rȩtarea̧ dapea̧ oa, judi pio jibëiäpȩmo̧ ji̧dë ma chjadëri̧ gatë tänȩpea̧ oa. Ado judiro̧ Erode ja̧ bëräpȩ go̧düdäräa̧rä, dëbëdiärëreji̧ri̧diro̧jo̧ȩ Bato quȩmȩ ju̧i̧, Erode ja̧ bë tjamo̧ jidamȩ pio ju̧i̧. Ado pio ju̧i̧ nö̧ta chjadëri̧ ni̧bä chjaorea̧ daea̧ oaiä, judi pio jibëiäpȩmo̧ chjadëri̧ a̧dorea̧ taramȩpea̧ oaiä, jabechji̧ goë tuti ni̧bärëremȩdejȩ ütë oa pio ji̧ri̧ chjiari, judiro̧ chjadëri̧ jëdano̧rea̧ dapea̧ oa, chiri ütë cjo̧ro̧mȩ pio judi pio jibëiäpȩmo̧ cjäri̧ri̧ cjia dapea̧ oa, pio judi cjatäcjie jo̧rȩtarea̧ dapea̧ oa.

²¹ Ja̧dëa ji̧ ütara̧ doro Erode judi jibëa̧ chjibo chacjiamȩ tjamo̧ oa ina̧ ëte järëremȩde ütërë charea̧räpȩ chapea̧ oa, ba chia tjamo̧räpȩ chapea̧ oa. Ado chamȩrȩ ni̧bä chjaorëremȩdejȩrȩ pumȩ ji̧ri̧iäpȩmo̧ pio ju̧i̧ ja̧ dëbëräpȩ a̧dopë cjiaji̧ri̧ oa. Jibëa̧ pumȩ pio ji̧ri̧iäpȩmo̧, jachiri jana̧ji̧ri̧ pio ji̧ri̧iäpȩmo̧bo ma̧ȩ go̧a̧ti̧ oa yürüpea̧ oa.

²² Aja̧, goaeri̧ yo̧mȩrȩ ma̧ȩ yürüa̧dejȩrȩ. Ado pumȩ judiro̧ pio ju̧i̧ ta̧rëa̧ oaiä, ana̧ri̧ jo̧rȩtaji̧ri̧pea̧dirȩ. 'Chia chia, pio ibëiäpȩmo̧ ni̧bämȩ judi pumȩdëdida jabo ütëdida, jauëchjamȩ ütëdida, daburimȩdëdida jabo a̧dërimȩ jirodida' quëna̧ jo̧rȩtaji̧ri̧rȩ taruparëreji̧ri̧dirȩ ja̧di ta̧rëri̧ ëna̧diäpea̧ ji̧: —Aja̧, ni̧bämȩ judi pumȩdëde jabo ütëde. Jauëchjamȩ ütëde —yo̧ji̧ri̧rȩ ëna̧diä ëna̧diä yo̧rëreji̧ri̧diro̧jo̧ȩ ba chia jo̧rȩtaji̧ri̧rȩ, chjacjiamȩri̧ jo̧rȩtaji̧ri̧rȩ.

²³ Ado Ano̧mȩ judi chjadüa̧ mu̧i̧tjoi̧ pio judi chjaodëri̧ bape chjaorëremȩdejȩ Erode ju̧i̧. Jabechji̧ judi coëma cjiari̧ jo̧rȩtadëa̧ oaiä, pio jȩa chjiari oëra̧ jo̧rȩta̧ oaiä, ja̧di dari̧ bape chjaoa̧dejȩ chjaodëri̧. Jabechji̧ Erode judi chjadëri̧ jo̧rȩtärea̧ ji̧, 'jabo cjäri̧ maquëda, pio coaiäpȩmo̧ ja̧di ta̧rëri̧ yo̧rea̧mi̧dëdida, jabomo̧ pumȩquëda, jauëchjadëquëda, jabo Ütë tjamo̧ pio ju̧i̧iäpȩmo̧ ma chjacjiamȩri̧ jo̧rȩtapea̧dida, jabechji̧ pio coaiäpȩmo̧ chjacjiamȩri̧ ni̧bärea̧mi̧dëdida, pio coa chjiari ütë "jauëchjadida" quëna̧rea̧mi̧dëdida' quëna̧ jo̧rȩtatärea̧ ji̧, cjäri̧ made, ta̧rë ja̧borëremȩdejȩrȩ pumȩ ji̧ri̧, pio jȩaiäpȩmo̧ chjacjiamȩri̧ ni̧bäji̧ri̧ oa. Pio ju̧i̧iä gito ana̧ra̧ pio ju̧ri̧ra̧ bape chjaorëremȩdejȩ a̧dërimȩ mu̧i̧tjoi̧ judi. Ado chjaodëri̧ ja̧boa̧de Erode judi acä po pio ju̧i̧iä.

²⁴ Jabo Ütë tjamo̧ ja̧ ma̧ȩ üdë ji̧dë u̧i̧ jachiti̧ oa baärëremȩde quëna̧ji̧ri̧ pio ji̧ri̧iä. Ado quëna̧ji̧ri̧ pio judiro̧ ji̧dë u̧i̧ ji̧ra̧pe bagarëreji̧ri̧dirȩ.

²⁵ Ado Bernabe judi, Chauro pio judiborë ado chjereno̧ baärëreji̧ri̧dirȩ A̧tioquiaräpȩmo̧. Aja̧, Jerucharȩräpȩ järëreji̧ri̧rȩ ado chjereno̧ baäa̧dirȩ jibëa̧ ja̧beparea̧ pio ju̧i̧ ja̧bepadäräa̧ oaiä. Ado Juan Marco quȩmȩ pio ju̧i̧ ëba baäa̧diro̧jo̧ȩ.