Japarea̧ 11 - Biblia Pume

Pedro judi Jerucharȩräpȩ quëna̧ji̧ri̧ pio ji̧ri̧ ni̧bä chjaorëremȩdejȩrȩ judiodë pio ji̧ri̧ chjiari

¹ Ado judiodë judiro̧ Ütë tjamo̧ ja̧ ma̧ȩ oa quëna̧ji̧ri̧pea̧ ji̧, chjaodëri̧ baärëremȩde ma̧ȩ üdë pio ji̧ri̧ chjiari. Jechurë chjadüa̧ judiro̧ chjaodëri̧ goë ta̧rëji̧ri̧pea̧dirȩ, Judearäpȩ quëna̧ji̧ri̧borë.

² Pio ju̧i̧iä Pedro judi Jerucharȩräpȩ go̧düdäräa̧ ji̧, o judiro̧ to̧bari̧ yo̧a̧diro̧jo̧ȩ. 'Aja̧, Judiodë pio judiro̧ budoa̧ oa cjiapea̧ chiadiro̧da, Pedro üdë oëra̧ japea̧dida' quëna̧ jo̧rȩtaji̧ri̧ pio judiro̧ to̧bari̧ yo̧a̧diro̧jo̧ȩ, ja̧di ta̧rëri̧ yo̧ji̧ri̧rȩ:

³ —Jabo cjäri̧ marenȩ, mȩnȩ judiodë ja̧ bëräpȩ yu̧a̧bea ji̧, mȩnȩ pio ji̧ri̧ nö̧ta jura̧bea ji̧, jabechji̧ chjai̧dëri̧ japea̧renȩ —yo̧a̧diro̧jo̧ȩ. ¿Tjana̧ ju̧i̧iä budoa̧ oa cjiadëji̧ri̧ ja̧ bëräpȩ yu̧a̧däräa̧renȩ? —yo̧ji̧ri̧rȩ iëno̧ë ta̧rëa̧diro̧jo̧ȩ.

⁴ Jabo Pedro judi pio ju̧i̧ ta̧rëa̧ oaiä, ana̧ri̧ ni̧bä chjaorëremȩdejȩrȩ taruparea̧ cotori pio judiri. Judiro̧ dabadëchea oa ja̧di ta̧rëri̧ dëbë ni̧bä chjaoa̧dejȩrȩ:

⁵ —Danȩrȩ, cüdë Joperäpȩ cjo̧ro̧a̧ nö̧ta, cüdë Ütë tjamo̧ pio ju̧i̧iäpȩmo̧ ni̧bäa̧ ji̧, jabechji̧ darämi̧ cjia tänȩa̧dique —yo̧a̧dejȩrȩ—. Ado a̧dë cjürëri pio judiri biramȩ oa darämi̧ cjiaremȩreconȩ chjabana ana̧mi̧ da oa, pio coaiäpȩmo̧ biramȩ oa. Jadüchiami̧ buri pio judiri mu̧i̧ gatë bira tänȩmi̧ dari̧ biramȩ oa darämi̧ cjiaremȩreconȩ.

⁶ Ado chjadëri̧ ütarë damȩrȩ daea̧requede chjabanarämȩ oa. Chirirä cjo̧ro̧ji̧ri̧ pio ji̧ri̧, jadüchiami̧ ta chiaji̧ri̧ pio ji̧ri̧ daea̧requede. Ado coë jäji̧ri̧ pio ji̧ri̧bo daea̧requede, dami̧ti̧ pua oa. Tjamo̧ davä. No̧i̧dë tjamo̧ oa darämi̧ cjiamȩrȩ daea̧requede. Ado pumȩrȩ goa̧ pio ji̧ri̧bo darämi̧ cjiamȩrȩ daea̧requedejȩrȩ.

⁷ Ja̧dëa ji̧ pio coaiäpȩmo̧ ni̧bämȩ oa ta̧rërämi̧ cjiamȩrȩ ta̧rëa̧reconȩ. “Pedro cjitëvä. Guna̧ ëte juravä,” ni̧bämȩ oa ta̧rëa̧reconȩ.

⁸ Jabo dëbë yo̧mȩrȩ yo̧a̧reconȩ: “Cjäri̧ marequede ca̧ Ano̧mȩ. Moicherë go̧ȩparërea̧ ma̧ȩ pio ju̧i̧iä, jabechji̧ cja̧rȩmȩ co jurarea̧ china̧chja oa juradëa̧requede cüdë. Jurarea̧mi̧dëde.“

⁹ Jabo pio coaiäpȩmo̧ ni̧bämȩ pio ju̧i̧ ado ta̧rëa̧reconȩ a̧dëräpȩ ni̧bämȩ oa. "Danȩ, Ütë tjamo̧ judi pio jiro jurarea̧ oa jabechji̧parȩa̧dejȩ. China̧chjadëparȩa̧dejȩ. Pio ju̧i̧iä, ‘Cjäri̧ madida, juradëpea̧dida, pio jiro jurarea̧ üdë china̧chjadida’ quëna̧ jo̧rȩtadëtäremȩrenȩ" yo̧mȩrȩ dëbë yo̧a̧dique.

¹⁰ Aja̧, tjarari̧ co ja̧di ta̧rëri̧ ni̧bämȩ oa ta̧rërämi̧ cjiaremȩreconȩ. Ado ja̧dëa ji̧ chjabana üdë ado chjereno̧ buarëremȩde a̧dëräpȩmo̧.

¹¹ Ado ja̧dëa ji̧ chjaodëri̧ go̧düdäräa̧dirȩ tjarari̧ oari judiro̧ cüdë cjiadiäa̧mȩ jo̧räpȩ. Checharea quȩmȩ bë ma̧ri̧ri pio judiri chjadüa̧ oa jana̧diro̧coe.

¹² Ado pio ji̧ri̧ nö̧ta jätä tara tänȩa̧dique Tjo tjamo̧ judi. 'Aja̧, pio ji̧ri̧ nö̧ta ëba järea̧mi̧dëquiji̧ri̧da, judiro̧ tjaoë tara, ëba järea̧mi̧dëquiji̧ri̧da' quëna̧ jo̧rȩtarea̧ decjiari̧ jätä tara tänȩa̧dique. Pio ju̧i̧iä jäa̧requede pio ji̧ri̧ nö̧ta. Ado pio yodëro̧je, 6 pumȩrȩ, Joperäpȩ quëna̧ji̧ri̧ pio judiro̧borë ëba jäa̧diro̧coe. Aja̧, Checharearäpȩ yuro ëba jäa̧diro̧coe. Ado a̧ro̧rȩ Corenerio ja̧ bëräpȩ go̧düdäräa̧rä, jabechji̧ yu̧a̧rea̧rȩ.

¹³ Ado Corenerio judi ni̧bä chjaoa̧diibe. Jënȩ daea̧ pio ju̧i̧ chjiari, jibëa̧ bëräpȩ cjiadäräa̧mȩ pio ju̧i̧ chjiari ni̧bä chjaoa̧diibe, a̧dërimȩ mu̧i̧tjoi̧ pio ju̧i̧ chjiari. Ado mu̧i̧tjoi̧ üdë pio jȩaiäpȩmo̧ yo̧a̧ pio ju̧i̧ ni̧bä chjaoa̧diibe peaja̧di. “'Aja̧, chjadüjȩrȩ oari ji̧ri̧ Jope quȩmȩ bë ma̧ri̧räpȩmo̧’ yo̧a̧dique mu̧i̧tjoi̧ üdë” yo̧a̧diibe. “’Chimo̧ Pedro quȩmȩ pio ju̧i̧ ëba ma̧na̧pea̧ oa chjadüjȩrȩ.

¹⁴ Jabechji̧ ma̧ȩ ba chiati̧ oa ni̧bä chjaopadimȩ mȩnȩ chjätärea̧mi̧ dari̧, na̧ pumȩborë chjätärea̧mi̧ dari̧. Pio ju̧i̧iä chjadüjȩrȩ pio ju̧i̧ ëba ma̧na̧pea̧ oa’ yo̧mȩrȩ yo̧a̧dique mu̧i̧tjoi̧ üdë” yo̧a̧diibe.

¹⁵ Ado Corenerio pio ju̧i̧iä ta̧rë ëte, tarupea̧requede pio ji̧ri̧iäpȩmo̧ ni̧bä chjaopea̧ ji̧ Ütë tjamo̧ ja̧ ma̧ȩ oa. Ado ja̧dëa ji̧ Tjo tjamo̧ judi chjaodëri̧ bëpera̧pea̧dejȩrȩ. Tjamo̧ davä. Pio ibë pearä judi bëparërea̧mi̧ bëpera̧pea̧dejȩrȩ peaja̧di.

¹⁶ Ado pio ju̧i̧ daea̧ oaiä, chjaodëri̧ jo̧rȩtamȩpea̧requede ibëa̧ Ano̧mȩ judi yo̧rërea̧ ma̧ȩ oa Tjo tjamo̧ pio ju̧i̧ chjiari. “Aja̧, Juan judi uira̧ go̧e cjaeä chudarëremȩde jabo mȩnȩro̧ Tjo tjamo̧ra̧ pio ju̧ri̧ra̧ go̧e cjaeä chuda̧ oa cjiapanȩrȩ” yo̧rëremȩdibe.

¹⁷ Ado pio jiro ma̧ȩ oa jo̧rȩta̧ oaiä, jabechji̧ ji̧dë u̧i̧ jo̧rȩtamȩpea̧requede. ‘Aja̧, Ütë tjamo̧ judi pio ibëiäpȩmo̧ yürürërea̧mi̧ yürüa̧diji̧ri̧da, judiodë pio ji̧ri̧iäpȩmo̧bo yürüa̧diji̧ri̧da, a̧ro̧rȩ Jechu Quiricho pio ju̧i̧ quëna̧mi̧ quëna̧ji̧ri̧pea̧diro̧da, pio ju̧i̧iä Tjo tjamo̧ pio ju̧i̧ yürüa̧diji̧ri̧da, Ütë tjamo̧ judi jo̧rȩta̧mi̧ japamȩdida, dëbëparea̧mi̧dëri̧ japamȩdida’ quëna̧ jo̧rȩtamȩpea̧requede davä. Pio ju̧i̧iä, ‘Aja̧ Ütë tjamo̧ judi chjadëri̧ japea̧dida, judiodë pio ji̧ri̧iäpȩmo̧bo yürüa̧ oaiä chjadëri̧ japea̧dida’ quëna̧ jo̧rȩtamȩpea̧requede ca̧ oti̧ —yo̧mȩrȩ ni̧bä chjaorëremȩdejȩrȩ judio pio ji̧ri̧iäpȩmo̧ Pedro judi.

¹⁸ Ado judio judiro̧ Pedro pio ju̧i̧iä ta̧rëa̧ oaiä, jabechji̧ cjapi mari̧ cjiarëreji̧ri̧dirȩ. Ado ano̧ mire jo̧rȩtaji̧ri̧rȩ Ütë tjamo̧ pio ju̧i̧iäpȩmo̧ chjacjiamȩri̧ ni̧bäji̧ri̧pea̧diro̧jo̧ȩ. 'Aja̧, judiodë pio ji̧ri̧iäpȩmo̧bo chjere jo̧rȩtarea̧ yürüa̧diji̧ri̧da, pio ji̧ri̧iäpȩmo̧bo bucho ana̧ cjo̧ro̧rea̧ oa yürüa̧diji̧ri̧da' quëna̧ jo̧rȩtaji̧ri̧rȩ chjacjiamȩri̧ ni̧bäji̧ri̧pea̧diro̧jo̧ȩ.

Pumȩ judiro̧ quëna̧ji̧ri̧pe järëreji̧ri̧dirȩ A̧tioquiaräpȩ.

¹⁹ Judio judiro̧ Eteba ju̧i̧ ja̧bo tänȩrërea̧ ji̧, quëna̧ji̧ri̧ pio ji̧ri̧ ana̧ri̧ conȩdarea̧ oa taruparëremȩde. Pio ju̧i̧iä jabechji̧ oëra̧ti̧ oa chjuchjupechärëreji̧ri̧dirȩ quëna̧ji̧ri̧ judiro̧. O judiro̧ jachi tjamo̧ oa baärëreji̧ri̧dirȩ Pjirichia quȩmȩ chiriräpȩ yuro. Ado o judiro̧ Chipire quȩmȩ chiriräpȩ baärëreji̧ri̧dirȩ. Ado o judiro̧ A̧tioquia quȩmȩ bë ma̧ri̧räpȩ baärëreji̧ri̧dirȩ. Ado pio jiro quëna̧ji̧ri̧ pio judiro̧ baärërea̧ ji̧, jabechji̧ Jechu pio ju̧i̧ chjiari ma̧ȩ oa a̧ra̧ano̧riä baärëreji̧ri̧dirȩ. Jabo judiro̧ judiodë pio ji̧ri̧iäpȩmo̧bo ni̧bä chjaoriä baätärea̧ ji̧, cjäri̧ madiro̧jȩrȩ, judio pio ji̧ri̧iäpȩmo̧ ma ni̧bä chjaoriärëreji̧ri̧diro̧jȩrȩ.

²⁰ Jabo quëna̧ji̧ri̧ judiro̧ orë, dëdë, judiodë pio ji̧ri̧iäpȩmo̧bo ni̧bä chjaoa̧diro̧jȩrȩ. Tjamo̧ davä. Chipire chiriri quëna̧ji̧ri̧ judiro̧, ado Chirene quȩmȩ chiriri quëna̧ji̧ri̧ pio judiro̧ A̧tioquiaräpȩ baärërea̧ ji̧, jabechji̧ judiodë pio ji̧ri̧iäpȩmo̧bo a̧ra̧ano̧riä baärëreji̧ri̧dirȩ. Aja̧, Ütë tjamo̧ ja̧ ma̧ȩ oa a̧ra̧ano̧rëreji̧ri̧diro̧jȩrȩ Ano̧mȩ Jechu pio ju̧i̧ chjiari ma̧ȩ oa.

²¹ Jibëa̧ ju chjiarea̧ra̧ a̧ra̧ano̧dërëreji̧ri̧dirȩ jabo Ano̧mȩ pio judi ju chiarea̧ yürüa̧ oa a̧ra̧ano̧rëreji̧ri̧diro̧jȩrȩ. Ado pio ju̧i̧iä no̧i̧dërë quëna̧ji̧ri̧pea̧diro̧jo̧ȩ Ano̧mȩ Jechu pio ju̧i̧iäpȩmo̧. Judiodërë quëna̧ji̧ri̧pea̧diro̧jo̧ȩ. Chjere jo̧rȩtaji̧ri̧rȩ quëna̧ji̧ri̧pea̧diro̧jo̧ȩ.

²² Ado Jerucharȩräpȩ quëna̧ji̧ri̧ judiro̧ chjaodëri̧ goë ta̧rëji̧ri̧pea̧dirȩ A̧tioquiaräpȩ quëna̧ji̧ri̧ pio ji̧ri̧ chjiari. Pio ju̧i̧iä chjadürëreji̧ri̧diro̧jo̧ȩ Bernabe pio ju̧i̧.

^23-24 Ado Bernabe judi, jabechji̧ pumȩ chjadëmȩrȩ cjo̧ro̧rëremȩde. Ütë tjamo̧ pio ju̧i̧ chjuari̧ quëna̧mȩrȩ cjo̧ro̧rëremȩde ji̧dë ma chjadëri̧ jape chjaomȩrȩ. Jabechji̧ Tjo tjamo̧ judi chi̧dëea̧ chja̧oerä cjo̧ro̧rëremȩde. Ado pio judi A̧tioquiaräpȩ go̧düdäräa̧rä, jabechji̧ irä darëremȩdejȩrȩ quëna̧ji̧ri̧ pio ji̧ri̧. Ütë tjamo̧ judi ana̧ri̧ a̧doa̧ oa cjiaji̧ri̧ oa daea̧dejȩrȩ coëma cjiari̧ cjo̧ro̧ji̧ri̧ oa. Pio ju̧i̧iä ma̧ chiadëri̧ cjia tjamo̧pea̧de. Ado chjadëri̧ a̧dorëremȩdejȩrȩ. Ma̧ chjua jo̧rȩtariä cjo̧ro̧pea̧ oa, no̧dë oa jämi̧ dari̧ cjo̧ro̧chea oa, chjadëri̧ chi̧dëearëremȩdejȩrȩ, Ano̧mȩ pio ju̧i̧ ja̧ ma̧ȩrämo̧ chjadëri̧ cjo̧ro̧pea̧ oa. Ado Bernabe judi ja̧bepea̧ oaiä, ji̧dë u̧i̧ ji̧ra̧rȩ quëna̧ji̧ri̧pea̧diro̧jo̧ȩ Ano̧mȩ Jechu pio ju̧i̧iäpȩmo̧.

²⁵ Ja̧dëa ji̧ Bernabe judi järëremȩde Tacho quȩmȩräpȩ Chauro pio ju̧i̧ dadäräpea̧ oa.

²⁶ Ado pio ju̧i̧ daräräa̧rä, ëba baärëremȩdejȩ A̧tioquiaräpȩ pio jȩa nö̧ta ja̧bepapea̧ oa. Ado cja̧rȩmȩ ui codë oa a̧dope chjaorëreji̧ri̧dirȩ quëna̧ji̧ri̧ pio ji̧ri̧ nö̧ta pio ji̧ri̧ chjadëri̧ a̧ra̧ano̧pea̧ oa. No̧i̧dë tjamo̧ oa a̧ra̧ano̧rëreji̧ri̧diro̧jȩrȩ. Ado quëna̧dëji̧ri̧ judiro̧ quëna̧ji̧ri̧ pio ji̧ri̧ chjiari yo̧dërërea̧ ji̧, “Quiricho ja̧ pumȩ” yo̧mȩ ma̧ȩ yo̧dërërea̧ ji̧, jabechji̧ ja̧di ta̧rëri̧ yo̧ji̧ri̧pea̧dirȩ pio ji̧ri̧ chjiari. Aja̧, ja̧di ta̧rëri̧ yo̧ji̧ri̧pea̧dirȩ quëna̧ji̧ri̧ pio ji̧ri̧ chjiari A̧tioquiaräpȩ ju̧ri̧ ja̧di ta̧rëri̧ yo̧dërërea̧ ji̧.

²⁷ Ado pio jiro japamitërä Ütërë ea jana̧ chjadüa̧ oa ni̧bäji̧ri̧ judiro̧ go̧düdärärëreji̧ri̧dirȩ A̧tioquiaräpȩ Jerucharȩ bë ma̧ri̧ri pio judiri jana̧ji̧ri̧rȩ.

²⁸ Ado quëna̧ji̧ri̧ pio judiro̧ a̧dopea̧ oa cjia̧rä, cja̧rȩmȩrȩ, Agabo quȩmȩ pio judi cjitërëremȩde pio ji̧ri̧iäpȩmo̧ ni̧bä chjaopea̧ oa. Tjo tjamo̧ pio judi dabarea̧ yürüa̧ oa ni̧bä chjaoa̧dejȩrȩ chiri pio ju̧i̧ chjiari, chiri üdë jurarea̧ oa yürüdëpe bagapea̧ pio ju̧i̧ chjiari. Aja̧, chiri nö̧ta oa a̧rȩmȩ chiri üdë jurarea̧ oa yürüdëpe bagapea̧ pio ju̧i̧ chjiari ni̧bä chjaorëremȩdejȩrȩ jabërä. Ado teracabari̧ yo̧dëa̧dejȩrȩ jabo coëma cjiari̧ yo̧a̧dejȩrȩ. Jabechji̧ ji̧dë duri oa japamitë chjätä ëte, tjamo̧i̧ cjiari̧ cjiadiäa̧de judi yo̧rërea̧ ma̧ȩ üdë. Jabechji̧ Caraudio quȩmȩ pio judi Domaräpȩ ütëmȩrȩ cjo̧ro̧mȩpea̧rä, pio judi a̧dë chjäte ütëmȩrȩ cjo̧ro̧mȩpea̧rä, jurarea̧ decjiapea̧de Agabo pio judi jabërä yo̧rërea̧mi̧.

²⁹ Ado quëna̧ji̧ri̧ judiro̧ pio ju̧i̧ ta̧rëa̧ oaiä, ’Aja̧, a̧dotäreji̧ri̧a̧ro̧ji̧ri̧da, a̧ro̧rȩ ütëbodärärë tara̧mi̧ yürü chjadütäreji̧ri̧a̧ro̧ji̧ri̧da, Judearäpȩ quëna̧ji̧ri̧ pio ji̧ri̧ a̧dopea̧ oa yürü chjadütäreji̧ri̧a̧ro̧ji̧ri̧da’ quëna̧ jo̧rȩtarëreji̧ri̧dirȩ.

³⁰ Ado judiro̧ jo̧rȩta̧mi̧ yürürëreji̧ri̧dirȩ chëre oa. Ado yürü ëte, chjadüa̧diro̧jo̧ȩ a̧doparea̧ tjamo̧ jidaji̧ri̧ pio ji̧ri̧iäpȩmo̧. Bernabe pio ju̧i̧iä, Chauro pio ju̧i̧iä chjadüa̧diro̧jȩrȩ chëre pio ju̧i̧.