Go̧dürea̧ Ma̧ȩ 9 - Biblia PumeEjichio ja̧ baca oa, ado ji̧ri̧ ja̧ yae oa ja̧bo tänȩrëremȩdejȩrȩ Jeova judi 1 Ja̧dëa ji̧ Jeova judi yo̧rëremȩdejȩ Moiche ju̧i̧: —Goëdejo̧ȩ pjarao̧ ju̧i̧. Ado ja̧di ta̧rëri̧ yo̧tä earequedemȩ pio ju̧i̧iäpȩmo̧. "Aja̧, ja̧di ta̧rëri̧ yo̧dimȩ Jeova judi, ebereo ja̧ Ütë pio judi. Jabechji̧ go̧dürea̧ yürüjȩrȩ ca̧ pumȩ ji̧ri̧ judiro̧ pio coaiäpȩmo̧ chjacjiamȩri̧ jo̧rȩtapea̧ oa. 2 Pio ji̧ri̧ go̧dürea̧ yürüdërä judi, pio ji̧ri̧ ji̧dë ma cjiadiä tänȩrä judi, 3 jabechji̧ uapai̧ dari̧ bape chjaoparequedemȩ. Danȩ, Jeova pio judirequede cüdë. Ado gito ana̧ri̧ chjadüparequedejȩrȩ mȩnȩro̧ goa̧ pio ju̧i̧. Na̧ baca oa, na̧ yae oa, na̧ oveja oa, na̧ chivo oa, na̧ cameyo oa, gito ana̧ri̧ chjadüparequedejȩrȩ. 4 Jabo tjaoëpai̧ dari̧ cjiaji̧ri̧ oa daparequedejȩrȩ icharaita ji̧ri̧ ja̧ oa. Tutia̧ oa cjiami̧ dari̧ cjiaji̧ri̧ oa daparequedejȩrȩ. Jabechji̧ pio ji̧ri̧ ja̧ üdë ja̧bodëpade jabo ejichio pio ji̧ri̧ ja̧ maearë ja̧bopade". Aja̧ Moiche, ja̧di ta̧rëri̧ yo̧tä earequedemȩ pjarao̧ pio ju̧i̧iäpȩmo̧. 5 Ado ju̧i̧ uëri̧ pio yoa ma̧ȩbo a̧de yo̧tä earequedemȩ pio ju̧i̧iäpȩmo̧: "Aja̧, Jeova pio judirequede cüdë. Ado pio yaba̧ dopea̧rä ja̧di dari̧ japaparequede cüdë ütara̧ doro." Aja̧ Moiche, ja̧di dari̧ a̧de yo̧tä earequedemȩ pjarao̧ ju̧i̧iäpȩmo̧ —yo̧mȩrȩ yo̧rëremȩdejȩ Moiche ju̧i̧ Ütë tjamo̧ judi. 6 Ado dopea̧rä Jeova judi yo̧a̧mi̧ japarëremȩde. Gito ana̧ oa chjadürëremȩdejȩrȩ ejichio ja̧ oa. Jibëa̧ baca oa, jibëa̧ yae oa, jibëa̧ buro oa, jibëa̧ cameyo oa, jibëa̧ oveja oa, jibëa̧ chivo oa, gito ana̧ oa chjadüa̧dejȩrȩ. Ado ejichio judiro̧ goa̧ pio judiro̧, chiriräreji̧ri̧ judiro̧ chjö̧na̧i̧rȩ ja̧borëreji̧ri̧dirȩ. Jabo icharaita ja̧ üdë ja̧bodëa̧de. Cja̧rȩmȩrȩ ja̧bodëa̧de. 7 Ado pjarao̧ judi chjadüa̧ oa goëdepea̧diro̧jo̧ȩ icharaita ja̧ oa, jibëa̧ baca oa, jibëa̧ oveja oa, jibëa̧ oa chjö̧na̧i̧ oa. Jabo cjäri̧ made, cja̧rȩmȩrȩ ja̧bodëa̧de. Ado pjarao̧ judi pio ju̧i̧ ta̧rëa̧ oaiä, ano̧ mire jo̧rȩtatärea̧ ji̧, ano̧ mire jo̧rȩtadëri̧ cjiamȩrȩ chjuari̧ jiadarëremȩde. Ado pio ju̧i̧iä go̧dürea̧ yürüdëa̧dejȩrȩ icharaita ji̧ri̧. Ütë tjamo̧ judi chuma̧ chjadürëremȩdejȩrȩ 8 Ja̧dëa ji̧ Jeova judi ado yo̧rëremȩdejȩrȩ Moiche ju̧i̧, Aro̧ ju̧i̧: —Danȩrȩ, cjo̧dë tja oa mitëchji̧vä, tja̧rerea̧ joëri judiri mitëchji̧vä dibëa̧ ichirä. Ado pjarao̧ ja̧ dëbëräpȩ cjiamȩrȩ uëräpȩmo̧ quibë atä earequededibe cjo̧dë tja oa. 9 Ado cjo̧dë tja ponoi̧ üdë, jabechji̧ chiri nötai̧ oa boadäräpade pumȩ ütëbodärärë chuma̧ ana̧ri̧ tararea̧mi̧ dari̧. Pumȩ judiro̧, jënȩro̧ goa̧ pio judiro̧borë tara mapadirȩ a̧dë chiquirea̧ decjiari̧ —yo̧mȩrȩ yo̧rëremȩdejȩrȩ Ütë tjamo̧ judi. 10 Ja̧dëa ji̧ Moiche judi, Aro̧borë cjo̧dë tja oa mitë ëte goëdepea̧diro̧jo̧ȩ pjarao̧ ju̧i̧. Ado ju̧i̧ ja̧ dëbëräpȩ cjiamȩrȩ Moiche judi uëräpȩmo̧ quibë aea̧dejȩ cjo̧dë tja oa. Ado chuma̧ üdë chjaodëri̧ idëpea̧de ütëbo ja̧ icjararä. Icjara nötai̧ oa tara marëreji̧ri̧dirȩ. Ado jënȩro̧ goa̧ pio judiro̧borë tararëreji̧ri̧dirȩ. 11 Ado jauëchja cjiari̧ japaji̧ri̧ judiro̧ Moiche ja̧ dëbëräpȩ cjiatärea̧ ji̧, järea̧ dadëa̧dirȩ chuma̧ pio ju̧i̧ ana̧ri̧ tara̧ oaiä. Pio ji̧ri̧ ja̧ icjararäbo chjaodëri̧ idëpea̧de. 12 Jabo Jeova pio judi tänȩa̧ oa chjuari̧ jiadarëremȩde pjarao̧ judi. Ta̧rëdiädëa̧dejȩrȩ Moiche ju̧i̧, Aro̧ ju̧i̧. Ano̧ mire jo̧rȩtadëri̧ cjiamȩrȩ jiadarëremȩdejȩrȩ. Jeova judi Moiche ju̧i̧ yo̧a̧rea̧mi̧ ta̧rëdiädëa̧dejȩrȩ. Ütë tjamo̧ judi chjadürëremȩdejȩrȩ ui choco chacha oa 13 Ja̧dëa ji̧ Jeova judi yo̧rëremȩdejȩ Moiche ju̧i̧: —Jaco peadai̧rä bëdütä earequedemȩ. Ado goëde jävä pjarao̧ ju̧i̧. Ado pio ju̧i̧ ja̧ dëbëräpȩ cjiamȩrȩ ja̧di ta̧rëri̧ yo̧tä earequedemȩ pjarao̧ ju̧i̧iäpȩmo̧: "Ja̧di ta̧rëri̧ yo̧mȩrȩ yo̧dimȩ Jeova judi, ebereo pio ji̧ri̧ ja̧ Ütë pio judi. Jabechji̧ go̧dürea̧ yürüjȩrȩ ca̧ pumȩ ji̧ri̧ judiro̧ pio coaiäpȩmo̧ chjacjiamȩri̧ jo̧rȩtapea̧ oa. 14 Jabo mȩnȩ go̧dürea̧ yürüdërä judi, danȩ, ado cja̧rȩmo̧ conȩdarea̧ oa chjadüparequedemȩ. Pio mȩaiäpȩmo̧, mȩa a̧doji̧ri̧ pio ji̧ri̧iäpȩmo̧, na̧ pumȩ pio ji̧ri̧iäpȩmo̧ ma̧i̧ dari̧ bape chjaoparequededibe conȩda̧rea̧ ji̧ra̧ra̧. 'Aja̧, Ano̧mȩ pio judidida, ado cja̧rȩmo̧rȩ nötadë madiji̧da, dabu Ano̧mȩ pio judi tjamo̧da, teracaba ütëdëdida' quëna̧ dabarea̧mi̧ dari̧ bape chjaoparequededibe. 15 Danȩ, cüdë mȩa tjamo̧ri̧ ja̧bo tänȩrea̧ jo̧rȩtarä judi chjaodëri̧ ja̧bo tänȩa̧täremȩrequedemȩ. Ado na̧ pumȩ pio ji̧ri̧ tjamo̧ri̧ ja̧bo tänȩrea̧ jo̧rȩtarä judi, peaja̧di chjaodëri̧ goari jä tänȩa̧täremȩrequedejȩrȩ. Jabechji̧ chjaodëri̧ chjadüa̧täremȩrequededibe davä, gito ana̧ oa mȩnȩro̧ cjatä cjiarea̧mi̧dëri̧. Tjamo̧ davä. Dibë tjamo̧ri̧ ja̧bo tänȩrea̧ jo̧rȩtarä judi chjaodëri̧ ja̧boa̧täreji̧ri̧nȩrȩ peadë. 16 Jabo danȩ pjarao̧, cüdë mȩa chjaodëri̧ ja̧bo tänȩtärea̧ ji̧, jabechji̧ jabë cjo̧ro̧rea̧ yürürequedemȩ ca̧ ju chiarea̧ pio ju̧i̧ ana̧ri̧ na̧rȩ chjaopea̧ oa. Ado pio mȩa ana̧ri̧ na̧rȩa̧ pio ju̧i̧iä, 'Aja̧, pio judimo̧dida, a̧dë chjäte ju chiamȩ pio judidida' quëna̧ daba mapadiro̧coe chiri nötai̧ oa cjo̧ro̧ji̧ri̧ pumȩ judiro̧. 17 Jabo cjäri̧ marenȩ, cüdë mȩa cjo̧ro̧rea̧ yürüa̧räbo, ji̧dë ma jiade chjaorenȩque. Na̧ chji̧rämo̧ jo̧rȩtatamȩrȩ jiade chjaorenȩque. Ado pio ju̧i̧iä icharaita pio ji̧ri̧ go̧dü tänȩdë marenȩ. 18 Ja̧di tara jaco pio yaba̧mi̧rä cjümȩ cho oa, ui choco chacha tjamo̧ oa gu̧ro tänȩparequededibe chjua tjamo̧ oa. Ejitoräpȩ cja̧rȩmȩ co ja̧di darë gu̧rodërërea̧ ji̧ gu̧ropade. 19 Ado mȩnȩ goa̧ cjiadiäa̧mȩ pio judi ja̧bochea oa, ejichio judiro̧ goa̧ cjiadiäa̧mȩ pio judi ja̧bochea oa, dibëa̧ baca üdë, dibëa̧ yae üdë, dibëa̧ cameyo üdë ja̧bochea oa, jabechji̧ bacarë cjo̧ro̧rea̧ jo̧ tjoräpȩ boea̧ oa goatäreji̧ri̧renȩro̧jȩrȩ. Ja̧di tara ma̧ȩ chjadütäremȩrenȩjȩrȩ na̧ pumȩ ji̧ri̧ jibëa̧ pio ju̧i̧ chjadëri̧ boeapea̧ oa. Jabechji̧ cjümȩ cho chjua üdë uapai̧ da tjamo̧ oaiä dairäpȩ cjiadiäa̧mȩ chjö̧na̧i̧rȩ ja̧bo mapadirȩ. Pumȩ judiro̧borë ja̧bopadirȩ dairäpȩ cjiadiäa̧rä judi." Aja̧ Moiche, ja̧di ta̧rëri̧ yo̧tä earequedemȩ pjarao̧ ju̧i̧iäpȩmo̧ —yo̧mȩrȩ yo̧rëremȩdejȩ Moiche ju̧i̧ Ütë tjamo̧ judi. 20 Ja̧dëa ji̧ Moiche judi, Aro̧borë jäa̧dirȩ pjarao̧ ju̧i̧iäpȩ. Ado Ütë tjamo̧ judi yo̧a̧mi̧ yo̧rëreji̧ri̧diro̧jo̧ȩ. Ado Jeova ja̧ maȩ oa ta̧rëa̧ oaiä pjarao̧ ju̧i̧ a̧doji̧ri̧ judiro̧ uapaji̧ri̧pea̧dirȩ, jabo orëmo̧rȩ. Ado jënȩro̧ goa̧ pio ju̧i̧ bacarë cjo̧ro̧rea̧ jo̧ tjoräpȩ yu̧a̧ tänȩa̧diro̧jo̧ȩ. Ado jibëa̧ mu̧i̧tjoi̧ ji̧ri̧ peaja̧di yu̧a̧ tänȩa̧diro̧jȩrȩ dairäpȩ cjiadiächea oa. 21 Jabo o judiro̧ ta̧rë ja̧bodëa̧diro̧jȩrȩ. 'Tjamo̧ri̧ yo̧dë jirodiro̧ibëda' quëna̧ jo̧rȩtaji̧ri̧rȩ ta̧rë ja̧bodëa̧diro̧jȩrȩ. Ado pio ju̧i̧iä jabechji̧, chiriräpȩ ano̧a̧diro̧jo̧ȩ jënȩro̧ goa̧ pio ju̧i̧, jibëa̧ mu̧i̧tjoi̧ pio ji̧ri̧. 22 Ja̧dëa ji̧ Jeova judi yo̧rëremȩdejȩ Moiche ju̧i̧: —Arë gatëvä na̧ tai̧rea̧ to oa a̧dë iräpȩmo̧. Ado cüdë japea̧ oa, acji gu̧ropade ui choco chacharë, ui choco chjuarë. Aja̧, Ejito chiri nötai̧därä oa acji gu̧ropade. Pumȩ pio ji̧ri̧iäpȩmo̧ acji gu̧ropea̧ oa, pumȩrȩ goa̧ pio ju̧i̧iäpȩmo̧ acji gu̧ropea̧ oa, jibëa̧ tjadoräpȩmo̧ acji gu̧ropea̧ oa japaparequede —yo̧mȩrȩ yo̧a̧dejȩ Moiche ju̧i̧ Jeova judi. 23 Ado Ütë judi yo̧a̧mi̧ japarëremȩde Moiche judi. A̧dë iräpȩmo̧ arë gatëa̧dejȩ. Ado Jeova pio judi tänȩa̧ oa ti̧ma baärëremȩde. Ma̧i̧ dari̧ bërepe chjaorëremȩde. Ado ui choco chacha tjamo̧rȩ Ejito chiri nötai̧därä oa acji gu̧rorëremȩde uapai̧ da tjamo̧ri̧. 24 Ma̧i̧ dari̧ bërepe chjaorëremȩde chjadëpe bagarea̧ decjiari̧. Oëra̧ti̧ oa no̧ a̧rȩdiä chjaori̧ cjiadärä chjaorëremȩde ma̧i̧ dari̧ dörö eamȩrȩ. Ado ui choco chacha tjamo̧rȩ acji gu̧ro chjaorëremȩde uapai̧ da tjamo̧ri̧. Ejitoräpȩ cjo̧ro̧ji̧ri̧ judiro̧ cja̧rȩmȩ co dadërëreji̧ri̧rȩ daea̧diro̧jo̧ȩ gu̧ro chjaomȩ oa, a̧dë chjäte ma̧i̧ da oa. 25 Ado Ejito chiri üdë, cjäri̧ made, conȩda̧ oa cjiami̧ dari̧ cjiadiärëremȩde ui choco chacha pio oaiä. Chiriräpȩ cjiadiäa̧ji̧ri̧ pumȩ judiro̧ ütëborë ja̧boa̧ maeadirȩ. Chiriräpȩ cjiadiäa̧ baca üdë, yae üdë, oveja üdë, ja̧boa̧ maeade. Ado tjadoremȩ jurarea̧ üdë, cjäri̧ made, jiro decjiapea̧de. Tjadomi̧ dadëpea̧de. Pjatë ma cjiadiäa̧de. Ado chirirä cjiaremȩ to chjö̧na̧i̧rȩ pjö̧da coto maearë cjiadiäa̧de. To a̧ chjiaremȩ üdë yarëa̧ maeade. 26 Jabo icharaitarë cjo̧ro̧mȩ chirirämo̧ acji gu̧rodëa̧de ui choco chacha üdë. Goche quȩmȩ chirirämo̧ gu̧rodëa̧de. 27 Ja̧dëa ji̧ pjarao̧ judi yo̧ chjadürëremȩdejȩrȩ Moiche ju̧i̧, Aro̧ ju̧i̧ pio jȩaiäpȩ jana̧tä. Ado jana̧na̧ra̧ji̧ri̧ oa yo̧a̧dejȩrȩ: —Danȩrȩ, ‘pio cüdë chjai̧dëri̧ japea̧quëda’ quëna̧ dabarequede. Jeova judi chjai̧dëri̧ japadëa̧de, jabo pio cüdë chjai̧dëri̧ japea̧requede, ca̧ pumȩborë. 28 Danȩrȩ, ui choco chacha üdë a̧dë chjäte ma̧i̧ dadiibe. Goë tuti cjo̧dë yürüchji̧ibe Jeova pio ju̧i̧iä acji gu̧rochea oa, bërepe chjaochea oa. Ado ja̧di dari̧ japea̧ oaiä, jabechji̧ go̧dürea̧ yürüparequedejȩrȩ icharaita ji̧ri̧ —yo̧mȩrȩ yo̧rëremȩdejȩrȩ pjarao̧ judi. 29 Ado Moiche judi dëbë yo̧a̧dejȩ: —Danȩ, cüdë bë ma̧ri̧ri pio judiri go̧dürä, jabechji̧ uëräpȩmo̧ dëbë ichipë cjiamȩrȩ goë tuti cjo̧dëparequede Jeova pio ju̧i̧iä pio dibë chjiari. Ado cüdë pio ju̧i̧iä cjo̧dërä, jabechji̧ chjaodëri̧ chjadëpapade. Acji gu̧re ano̧padidibe. Bërepe chjao ano̧padidibe. Ado pio ju̧i̧ da̧ oaiä, 'A̧ja̧, Jeova pio judimo̧dida, chiri Ano̧mȩ pio judimo̧dida' quëna̧ dabaparenȩ. 30 Jabo pio dibë chjiari chjadëri̧ dabarequede jabo. Pio mȩa chjiari, mȩa a̧doji̧ri̧ pio ji̧ri̧ chjiari chjadëri̧ dabarequede. Jabechji̧ mȩnȩro̧ Jeova quȩmȩ Ütë pio ju̧i̧ ba chia jo̧rȩtatärea̧ ji̧, jabë uape uape jo̧rȩtadërenȩro̧jo̧ȩ. Aja̧, chjadëri̧ dabarequede pio dibë chjiari —yo̧mȩrȩ dëbë yo̧rëremȩdejȩ pjarao̧ ju̧i̧ Moiche judi. 31 Ado Ejichio judiro̧ jibëa̧ tjadoro ponȩa̧ pio judi ja̧boa̧ maeade. Chjiboto cara japarea̧ to üdë, dino quȩmȩ to üdë ja̧boa̧ maeade. Cho üdë, jabë joërämȩ oa acji gu̧roa̧dejȩ ui choco chacha üdë. Ado chebada quȩmȩ cho üdë, chjuchjupamȩ oa acji gu̧roa̧dejȩ peaja̧di. Ja̧boa̧ maeade. 32 Jabo tirigo cho üdë chjadërëremȩde jabo, jabë buiudëa̧ tara. 33 Ja̧dëa ji̧ Moiche judi go̧düa̧ ji̧, pjarao̧ pio ju̧i̧ nöta ni̧bä chjaoa̧ duri oa bë ma̧ri̧ri pio judiri go̧düa̧ ji̧, jabechji̧ uëräpȩmo̧ dëbë ichipë cjiamȩrȩ goë tuti cjo̧dërëremȩde Jeova pio ju̧i̧iä. Ado chjaodëri̧ chjadëpea̧de. Dörö eadëpe baga̧de. Ado acji gu̧rodëpea̧de. Ado ituri̧ cjürërea̧ ji̧, jabechji̧ cjüdë mapea̧de. 34 Jabo chjapea̧rä, chjadë mapea̧rä, ado chjai̧dëri̧ japarëremȩde pjarao̧ judi. Ado chjuari̧ jiadarëremȩde. Jȩa a̧doji̧ri̧ pio judiro̧borë chjuari̧ jiada̧dirȩ. 35 Aja̧, ano̧ mire jo̧rȩtadëri̧ cjiamȩrȩ chjuari̧ jiadamȩpea̧de pjarao̧ judi. Jabechji̧ icharaita pio ji̧ri̧ chjadëri̧ go̧dürea̧ yürütärea̧ ji̧, go̧dürea̧ yürüdëa̧dejȩrȩ. Jeova judi Moiche ju̧i̧ yo̧a̧rea̧mi̧ chjuari̧ jiadarëremȩde. |
©2021 Global Partners, All Rights Reserved
Global Partners