Go̧dürea̧ Ma̧ȩ 8 - Biblia Pume

Jeova judi chjadürëremȩdejȩrȩ goaegoae bubati̧ oa

¹ Ado 7 do chjätä ëte Jeova judi ado yo̧rëremȩdejȩ Moiche ju̧i̧: —Danȩ, ado goëde jävä pjarao̧ ju̧i̧. Ado ja̧di ta̧rëri̧ yo̧jo̧ȩ: "Aja̧, ja̧di ta̧rëri̧ yo̧dimȩ Jeova judi: Jabechji̧ go̧dü tänȩjȩrȩ ca̧ pumȩ ji̧ri̧ judiro̧ pio coaiäpȩmo̧ chjacjiamȩri̧ jo̧rȩtapea̧ oa.

² Jabo mȩnȩ jiadarä judi, bape chjaoparequededibe goaegoae ji̧ra̧ tjamo̧ra̧. Jabechji̧ Ejito chiri nötai̧ oa boapade.

³ Danȩ, bea üdë ö̧da baämi̧ dari̧ cjiadiäpade davä, goaegoae ji̧ra̧ tjamo̧pe baga̧ oaiä. Ado judiri chiqui baäpadirȩ na̧ bëräpȩmo̧. Aja̧, mȩnȩ mo̧a̧mȩ jo̧ tjoräpȩ acji yu̧a̧padiro̧mȩ. Mȩnȩ mo̧a̧rea̧räpȩ china̧padirȩ. Ütararea̧mi̧dëri̧ chiqui baäpadirȩ beari pio judiri. Ado mȩa a̧doji̧ri̧ mu̧i̧tjoi̧ pio ji̧ri̧ ja̧ bëräpȩ acji yu̧a̧padirȩ peaja̧di. Na̧ pumȩ ütëbo ja̧ bëräpȩ acji yu̧a̧padirȩ. Canarirä, tachjarä, mauro acji yu̧a̧padirȩ peaja̧di. Dibëa̧ chja̧pe cjae mitërea̧ tachjarä, chja̧pe oa tja̧rerea̧ joëräbo acji yu̧a̧padirȩ.

⁴ Jabechji̧ na̧ iräpȩmo̧ chiquipadirȩ peaja̧di. Mȩa a̧doji̧ri̧ pio ji̧ri̧ ja̧ iräpȩmo̧, ejichio pio ji̧ri̧ ja̧ iräpȩmo̧ chiquipadirȩ. Aja̧, ja̧di dari̧ japaparequede mȩnȩ ca̧ pumȩ ji̧ri̧ go̧dürea̧ yürüdërä judi" yo̧mȩrȩ yo̧parenȩ pjarao̧ pio ju̧i̧iäpȩmo̧ —yo̧mȩrȩ yo̧rëremȩdejȩ Moiche ju̧i̧ Jeova judi.

⁵ Ja̧dëa ji̧ Jeova judi ji̧dë u̧i̧ yo̧mȩrȩ a̧de yo̧rëremȩdejȩ Moiche ju̧i̧: —Yo̧jo̧ȩ Aro̧ ju̧i̧ jibëa̧ tai̧rea̧ to oa arë gatëtä uiräpȩmo̧. Ado ja̧di dari̧ japea̧ oaiä goaegoae bubati̧rȩ go̧düpadirȩ uiri pio judiri. Tjamo̧ davä. Beari pio judiri, dürüri pio judiri, tjari pio judiri, ma̧ uiri pio judiri go̧dücha go̧dücha baäpade Ejito chiri nötai̧ oa acji yu̧a̧därärea̧mi̧ dari̧ —yo̧a̧dejȩ. Ado peaja̧di ta̧rëri̧ yo̧mȩrȩ yo̧a̧dejȩ jibëa̧ ayima̧i̧ ju̧i̧ Moiche judi.

⁶ Pio ju̧i̧iä Aro̧ judi arë gatëa̧dejȩ jibëa̧ tai̧rea̧ to oa uiräpȩmo̧. Ado chjaodëri̧ goaegoae mape bagarëremȩde chiri nötai̧ oa. Jabechji̧ dabu üdë ina̧ oa cjiami̧ dari̧ cjiarëremȩde goaegoae pio oaiä.

⁷ Jabo pjarao̧ ja̧ dabaji̧ri̧ judiro̧, jauëchja cjiari̧ japaji̧ri̧ pio judiro̧ peaja̧di dari̧ japarëreji̧ri̧dirȩ. Jënȩro̧ daba̧ jauëchjara̧ pio ju̧ri̧ra̧ peaja̧di goaegoae oa go̧dü tänȩa̧diro̧jo̧ȩ uiri pio judiri.

⁸ Ja̧dëa ji̧ pjarao̧ judi ma̧ȩ chjadüa̧dejȩrȩ Moiche ju̧i̧, Aro̧ ju̧i̧, pio jȩaiäpȩ jana̧tä. Ado ja̧dëa ji̧ judiro̧ pjarao̧ pio ju̧i̧iäpȩ go̧düdäräji̧ri̧ oa yo̧a̧dejȩrȩ: —Danȩrȩ, goë tuti cjo̧dëchji̧vä Jeova pio ju̧i̧iä. Aja̧, a̧ro̧rȩ cjatäcjiarea̧mi̧ dari̧, goaegoaedë mape bagari̧ goë tuti cjo̧dëchji̧vä a̧ro̧rȩ conȩda̧ oa cjo̧ro̧chea oa. Ado mȩnȩro̧ ja̧di dari̧ japarä judi, jabechji̧ go̧dürea̧ yürüparequedejȩrȩ icharaita ji̧ri̧ Jeova pio ju̧i̧ goe gu̧rori̧ cäë yürüpea̧ oa —yo̧mȩrȩ yo̧a̧dejȩrȩ pjarao̧ judi.

⁹ Ado Moiche judi dëbë yo̧a̧dejȩ pjarao̧ ju̧i̧iäpȩmo̧: —Chjadëri̧ ütarë yo̧coe. ¿Na̧parä goë tuti cjo̧dëtä earenȩque Jeova pio ju̧i̧iä? Pio mȩa chjiari, mȩa a̧doji̧ri̧ pio ji̧ri̧ chjiari, na̧ pumȩ pio ji̧ri̧ chjiari, ¿na̧parä goë tuti cjo̧dëtä earenȩque? Goaegoae üdë dibë a̧dë baäpea̧ oa, dibëa̧ bëri pio judiri baäpea̧ oa, bearämo̧ ma cjiapea̧ oa ¿na̧parä goë tuti cjo̧dëtä earenȩque? Chjadëri̧ yo̧coe.

¹⁰ Ja̧dëa ji̧ pjarao̧ judi dëbë yo̧a̧dejȩ: —Na̧parädë, danȩ, jaco goë tuti cjo̧dëvä pio ibë chjiari. Ado Moiche judi yo̧a̧dejȩ: —Jabechji̧de ado ja̧di. Mȩnȩ yo̧a̧mi̧ goë tuti cjo̧dëparequede mȩnȩ chjadëri̧ dabapea̧ oa. 'Aja̧, Jeova pio judimo̧dida, ado cja̧rȩmo̧ ütërë nötadë madiji̧da, icharaita ja̧ Ütë pio judimo̧dida' quëna̧ dabapea̧ oa goë tuti cjo̧dëparequede mȩnȩ yo̧a̧mi̧.

¹¹ Ado cüdë goë tuti cjo̧dëa̧ oaiä, jabechji̧ goaegoae üdë a̧dë baäpadiro̧mȩ. Dibëa̧ bëri pio judiri baäpadirȩ. Dibë ütëbo oa conȩdarërea̧ ji̧, pio mȩa, mȩa a̧doji̧ri̧ pio ji̧ri̧, na̧ pumȩ pio ji̧ri̧ conȩda marërea̧ ji̧, conȩdadëpadiro̧dibe. Jabechji̧ bearämo̧ cjiadiäpadirȩ —yo̧mȩrȩ yo̧a̧dejȩ pjarao̧ ju̧i̧ Moiche judi.

¹² Ado Moiche judi, Aro̧borë go̧düa̧dirȩ pjarao̧ ja̧ bëri judiri. Ado Moiche judi goë tuti cjo̧dëmȩrȩ cjo̧dëa̧de Jeova ju̧i̧iä goaegoae pio ju̧i̧ chjiari. Pjarao̧ pio judi ütarë yo̧a̧mi̧ goë tuti cjo̧dëa̧de.

¹³ Ado judi goë tuti cjo̧dëa̧mi̧ japarëremȩde Jeova judi. Jabechji̧ goaegoae üdë ja̧boa̧ maeade. Jo̧ tjororemȩ üdë, bëräremȩ üdë, chiriräremȩ üdë ja̧boa̧ maeade.

¹⁴ Ado a̧dopea̧diro̧jo̧ȩ. Cja̧rȩmȩrämo̧dë jabo oëra̧ti̧ oa uë tjamo̧ china̧ri̧ a̧doparëreji̧ri̧diro̧jo̧ȩ. Ado goaegoae pio oaiä, jabechji̧ ma̧i̧ da pjȩa̧ tjamo̧rëremȩde chiri üdë.

¹⁵ Jabo pjarao̧ judi ja̧boa̧ maea oa da̧ oaiä ano̧ mire jo̧rȩtamȩpea̧de ado chjereno̧. 'Cjäri̧ maquiji̧ri̧da, icharaita ji̧ri̧ go̧dü tänȩdëpaquiji̧ri̧da, Moiche ju̧i̧, Aro̧ ju̧i̧ ta̧rë ja̧bodëpaquiji̧ri̧da' quëna̧ jo̧rȩtamȩpea̧de, chjuari̧ jiadamȩrȩ. Jeova judi yo̧a̧mi̧ chjuari̧ jiada̧dejȩrȩ.

Jeova judi chjadürëremȩdejȩrȩ mȩ ji̧ra̧ oa

¹⁶ Ja̧dëa ji̧ Jeova judi yo̧rëremȩdejȩ Moiche ju̧i̧: —Yo̧jo̧ȩ Aro̧ ju̧i̧ jibëa̧ tai̧rea̧ tora̧ gu̧na̧tädejȩ dabu oa. Dabu pjo̧no̧i̧ üdë Ejito chiri nötai̧ oa mȩ mape järea̧mi̧ dari̧ gu̧na̧tädejȩ dabu oa.

¹⁷ Ado Ütë tjamo̧ judi yo̧a̧mi̧ japarëreji̧ri̧dirȩ. Aro̧ judi jibëa̧ tai̧rea̧ tora̧ pio ju̧ri̧ra̧ gu̧na̧dejȩ dabu oa. Ado Ejito chiri nötai̧ oa dabu pjo̧no̧remȩ üdë mȩ mape bagarëremȩde. Ado jura̧diro̧jȩrȩ ejichio ji̧ri̧. Jënȩro̧ goa̧ pio ji̧ri̧bo jura̧diro̧jȩrȩ. Jibëa̧ baca oa, jibëa̧ aboea oa, jibëa̧ yae oa, jibëa̧ buro oa jura̧ madiro̧jȩrȩ.

¹⁸ Ado jauëchja cjiari̧ japapea̧ ji̧ dabaji̧ri̧ judiro̧ peaja̧di japatarëreji̧ri̧dirȩ. Aja̧, jënȩro̧ daba̧ jauëchjara̧ pio ju̧ri̧ra̧ mȩ mape bagari̧ japatarëreji̧ri̧dirȩ jabo cjäri̧ madirȩ, cho̧rë japarea̧ dadëa̧dirȩ. Ado mȩ üdë, jabechji̧ no̧i̧dë tjamo̧pe bagarëremȩde goadirea̧mi̧dëri̧.

¹⁹ Ja̧dëa ji̧ jauëchja cjiari̧ japaji̧ri̧ judiro̧ yo̧a̧diro̧jo̧ȩ pjarao̧ ju̧i̧: —Danȩ ütë, Ütë tjamo̧ pio judi tjamo̧ri̧ japea̧ oaiä, mȩ ji̧ra̧pe baga̧diibe —yo̧a̧diro̧jo̧ȩ. Jabo pjarao̧ judi ta̧rë ja̧bodëa̧dejȩrȩ. Jabechji̧ mȩ ji̧ra̧ tjamo̧ oa daea̧mȩborë chjuari̧ jiadarëremȩdejȩrȩ Moiche ju̧i̧, Aro̧ ju̧i̧. Jeova pio judi yo̧a̧rea̧mi̧ chjuari̧ jiadarëremȩdejȩrȩ.

Ütë tjamo̧ judi chjadürëremȩdejȩrȩ po̧ȩ ji̧ra̧ oa

²⁰ Ja̧dëa ji̧ Jeova judi yo̧a̧dejȩ Moiche ju̧i̧: —Danȩ, pio yaba̧ dopea̧rä, peadai̧rä, pjarao̧ judi bearäpȩ jäpade. Jabë gȩnȩrä bëdütä earequedemȩ pio ju̧ri̧pȩ jäpea̧ oa, pio ju̧i̧ dëbëdiäpea̧ oa. Ado ja̧di ta̧rëri̧ yo̧tä earequedemȩ pio ju̧i̧iäpȩmo̧: "Aja̧ ütë, ja̧di ta̧rëri̧ yo̧dimȩ Jeova judi. Go̧dü tänȩjȩrȩ ca̧ pumȩ ji̧ri̧ judiro̧ pio coaiäpȩmo̧ chjacjiamȩri̧ jo̧rȩtapea̧ oa.

²¹ Mȩnȩ ji̧ri̧ go̧dü tänȩdërä judi, jabechji̧ bape chjaoparequedemȩ. Po̧ȩ no̧i̧dë tjamo̧ oa chjadüparequedemȩ. Pio mȩa jurapadiro̧mȩ, na̧ pumȩ pio ji̧ri̧bo. Mȩa a̧doji̧ri̧ pio ji̧ri̧bo jurapadiro̧jo̧ȩ, ejichio ütëbo oa. Ji̧ri̧ ja̧ jo̧ tjoräpȩbo acji yu̧a̧padirȩ bubati̧rȩ. Ji̧ra̧ tjamo̧ oaiä, po̧ȩ maearë china̧ oaiä, jabechji̧ ina̧ oa cjiami̧ dari̧ cjiapade dabu üdë.

²² Jabo icharaitarë cjo̧ro̧mȩ chiriräpȩ china̧chjari̧ tutipareconȩ. Tjamo̧ davä. Goche quȩmȩräpȩ ju̧ri̧, ca̧ pumȩrȩ cjo̧ro̧mȩräpȩ ju̧ri̧, jabechji̧ china̧chjari̧ tutipareconȩ. Jabechji̧ po̧ȩdë mapade pio ju̧ri̧pȩ. Po̧ȩrȩ jura̧ oa cjo̧ro̧dëpadirȩ. Ja̧di dari̧ japamȩrȩ japaparequede mȩnȩ pio coa chjiari chjadëri̧ dabatä. 'Aja̧, Jeova pio judidida, Ejito chiri Ano̧mȩ tjamo̧ pio judida, jënȩ jo̧rȩta̧mi̧ japamȩdida' quëna̧ dabapea̧ oa japaparequede.

²³ Jabechji̧ ca̧ pumȩ pio ji̧ri̧ dami̧ dadërequedejȩrȩ na̧ pumȩ ji̧ri̧. Tjaoëpai̧ dari̧ cjiaji̧ri̧ oa darequedejȩrȩ icharaita ji̧ri̧. Tutia̧ oa cjiami̧ dari̧ cjiaji̧ri̧ oa darequedejȩrȩ. Danȩ, jaco jauëchjari̧ na̧rȩparequedemȩ po̧ȩ pio oaiä. Aja̧, ja̧di dari̧ japaparequede mȩnȩ ca̧ pumȩ pio ji̧ri̧ go̧dürea̧ yürüdërä judi —yo̧mȩrȩ ma̧ȩ yürüa̧dejȩ Ütë tjamo̧ judi pjarao̧ pio ju̧i̧iäpȩmo̧ Moiche pio ju̧i̧ ja̧ ya pio oaiä.

²⁴ Ja̧dëa ji̧ dopea̧rä, Jeova judi yo̧a̧mi̧ japarëremȩde. Po̧ȩ no̧i̧dë tjamo̧ oa, go̧a̧ra̧mi̧ dari̧ pjo̧a̧ji̧ri̧ oa chjadürëremȩdejȩrȩ Ejito chiri nötai̧ oa. Pjarao̧ ja̧ bërä, ju̧i̧ a̧doji̧ri̧ ja̧ bërä acji yu̧a̧diro̧jȩrȩ po̧ȩ no̧i̧dërë. Ado jura̧diro̧jȩrȩ pumȩ ji̧ri̧. Ado Ejito chiri üdë po̧ȩ ji̧ra̧ tjamo̧ oaiä, jabechji̧ chjadëdëpe bagarëremȩde.

²⁵ Ja̧dëa ji̧ pjarao̧ judi yo̧ chjadüa̧dejȩrȩ Moiche ju̧i̧, Aro̧ ju̧i̧, pio jȩaiäpȩ jana̧tä. Ja̧dëa ji̧ go̧düdäräji̧ri̧ oa yo̧a̧dejȩrȩ: —Jaechji̧vä. Jächji̧vä dibëa̧ Ütë pio ju̧i̧ goe gu̧rori̧ cäë yürüpea̧ oa. Jächji̧vä, jabo pio yoaiäpȩ japatä earequededibe pio yoa chirirä, jachidëräpȩ.

²⁶ Jabo Moiche judi dëbë yo̧a̧dejȩ: —Cjäri̧ marea̧rȩ. Jadi dari̧ japarea̧mi̧dëde. Danȩ, i̧bëa̧ Ano̧mȩ Ütë pio ju̧i̧ chjacjiamȩri̧ jo̧rȩtaji̧ri̧rȩ cäë yürüparea̧ro̧jo̧ȩ goe gu̧rori̧. Pio jiro cäë yürürea̧ üde chjadëdëdejȩrȩ na̧ pumȩ pio ji̧ri̧iä. Goae tjamo̧dëdejȩrȩ. Ado judiro̧ ja̧di dari̧ japaji̧ri̧ oa irä dae chjaoa̧ oaiä cjarari̧ cjiape bagapai̧ dadiro̧ibe ta̧dëra̧ pio ju̧ri̧ra̧ ae ja̧bo tänȩrea̧mi̧ dari̧.

²⁷ Danȩ, tjarari̧ do nöta järea̧ jachi oa jäpea̧ chiarea̧rȩ chiri maearäpȩ, pumȩ decjiaräpȩ. Ado pio ju̧ri̧pȩ goe gu̧rori̧ cäë yürüpea̧ chiarea̧ro̧jo̧ȩ ibëa̧ Ano̧mȩ Ütë pio ju̧i̧, jënȩ ibë yo̧a̧mi̧ —yo̧mȩrȩ dëbë yo̧a̧dejȩ Moiche judi pjarao̧ ju̧i̧iäpȩmo̧.

²⁸ Pio ju̧i̧ ta̧rëa̧ oaiä pjarao̧ judi yo̧a̧dejȩ: —Aja̧, jabechji̧de ado ja̧di. Jächji̧vä chiri maearäpȩ. Dibëa̧ Ano̧mȩ Ütë pio ju̧i̧ goe gu̧rori̧ cäë yürüpea̧ oa jächji̧vä, jabo jachi tjamo̧ oa jädëchji̧vä jabo. Ado danȩ, pio coa chjiaribo goë tuti cjo̧dëvä po̧ȩ üdë baärea̧mi̧ dari̧.

²⁹ Ado Moiche judi dëbë yo̧a̧dejȩ: —Danȩ, cüdë pio yudiri go̧dürä Jeova pio ju̧i̧iä goë tuti cjo̧dëparequede po̧ȩ üdë baätä. Pio mȩa jurachea oa, na̧ pumȩ ji̧ri̧, mȩa a̧doji̧ri̧ pio ji̧ri̧ jurachea oa goë tuti cjo̧dëparequede. Jabo danȩ, ado ma̧diä cjia tänȩdëtäremȩrenȩibe. Ma̧ȩ chjádë yürümȩmi̧ dari̧ japadëibe. A̧ro̧rȩ järä, jabechji̧ chjadëri̧ go̧dü tänȩibe tuti yo̧rea̧ decjiari̧. Chjadëri̧ go̧dürea̧ yürüibe Jeova pio ju̧i̧ goe gu̧rori̧ cäë yürüpea̧ oa —yo̧mȩrȩ yo̧a̧dejȩ pjarao̧ ju̧i̧ Moiche judi.

³⁰ Ado Moiche judi pjarao̧ ju̧i̧ a̧dë baäa̧rä goë tuti cjo̧dërëremȩde Jeova pio ju̧i̧iä.

³¹ Ado judi cjo̧dëa̧mi̧ japarëremȩde Jeova judi. Baä tänȩa̧dejȩrȩ po̧ȩ oa cja̧rȩmȩrȩ cjiadiädëri̧. Aja̧, pjarao̧ pio ju̧i̧ jurachea oa, jibëa̧ pumȩ pio ji̧ri̧ jurachea oa, jȩa a̧doji̧ri̧ pio ji̧ri̧ jurachea oa baä tänȩ marëremȩdejȩrȩ chjö̧na̧i̧ oa.

³² Jabo po̧ȩ decjiape bagarërea̧ oaiä ado chjereno̧ chjuari̧ jiadamȩpea̧de pjarao̧ judi. Icharaita ji̧ri̧ go̧dü tänȩdëa̧dejȩrȩ.