Go̧dürea̧ Ma̧ȩ 7 - Biblia Pume

Jeova judi judi yabo ëba baämi̧ dari̧ chjadëri̧ ni̧bä chjaorëremȩdejȩ Moiche ju̧i̧

¹ Ado Jeova judi yo̧rëremȩdejȩ Moiche ju̧i̧: —Danȩ Moiche, pjarao̧ judi Ütë tjamo̧mi̧ da oa dapadimȩ mȩa, pio cüdë tänȩa̧ oaiä. Ado Aro̧ judi, na̧ ayima̧i̧ pio judi, pio mȩa chjiari goë ni̧bäpadejȩ. Mȩnȩ ju̧i̧ yo̧a̧ pio ju̧i̧ goë yo̧pade.

² Aja̧, cüdë mȩa yo̧a̧ chjö̧na̧i̧ oa yo̧parenȩjo̧ȩ na̧ ayima̧i̧ pio ju̧i̧. Ja̧dëa ji̧ to̧bari̧ goë yo̧padejȩ pjarao̧ pio ju̧i̧iäpȩmo̧. "Aja̧, Ejito chiriri judiri go̧dürea̧ yürüjȩrȩ icharaita ji̧ri̧" yo̧padejȩ, to̧bari̧ yo̧mȩrȩ.

³ Jabo danȩ, jiada tänȩpareconȩ pjarao̧ ju̧i̧. Pio cüdë tänȩa̧ oa ta̧rë ja̧bodëpadidibe. Ado jiade chjaoa̧ oaiä ca̧ jauëchja pio ju̧i̧ ana̧ri̧ na̧rȩparequedejȩrȩ Ejitoräpȩ cjo̧ro̧ji̧ri̧ pio ji̧ri̧.

⁴ Tjamo̧ davä, ta̧rë ja̧bodëpadidibe pjarao̧ judi. Ja̧di tara uapai̧ da tjamo̧ri̧ na̧rȩ chjaoparequedejȩrȩ Ejitoräpȩ cjo̧ro̧ji̧ri̧ pio ji̧ri̧. Ca̧ ju chiarea̧ra̧ pio ju̧ri̧ra̧ ana̧ri̧ bape chjaoparequedejȩrȩ. Ado ja̧di dari̧ japea̧ duri oa, jabechji̧ chjadëri̧ go̧dü tänȩparequedejȩrȩ Icharai ja̧ u̧ri̧ pio judiri ja̧ji̧ri̧ pio ji̧ri̧, ca̧ pumȩ pio ji̧ri̧.

⁵ Ado cüdë ejichio pio ji̧ri̧ ca̧ jauëchara̧ ana̧ri̧ na̧rȩa̧ oaiä, icharaita pio ji̧ri̧ Ejito chiriri pio judiri go̧dü tänȩa̧ oaiä, 'Aja̧, Jeova pio judidida, teracaba ütëdë madida' quëna̧ dabapadiro̧coe ejichio judiro̧ —yo̧mȩrȩ yo̧rëremȩdejȩ Ütë tjamo̧ judi.

⁶ Ado Jeova judi yo̧a̧mi̧ nötadäräri̧ japarëreji̧ri̧dirȩ Moiche judi, Aro̧ judi.

⁷ Ado Moiche judi pjarao̧ pio ju̧i̧ ni̧bäa̧rä judirä, jabechji̧ 80 ui goamȩrȩ ni̧bärëremȩdejȩ. Ado Aro̧ judi 83 ui goarëremȩde.

Aro̧ ja̧ tai̧rea̧ to üdë pope bagarëremȩde

⁸ Ja̧dëa ji̧ Jeova judi yo̧a̧dejȩrȩ Moiche ju̧i̧, Aro̧ ju̧i̧:

⁹ —Danȩrȩ, mȩnȩro̧ pjarao̧ pio ju̧i̧iäpȩ järä, na̧rȩtä yo̧rä judi, jauëchja cjiari̧ na̧rȩtä yo̧rä judi, jabechji̧ yo̧jo̧ȩ Aro̧ pio ju̧i̧ jibëa̧ tai̧rea̧ to oa daburäpȩmo̧ arë cürëtä. Jabechji̧ pjarao̧ ja̧ dëbëräpȩ ju̧ri̧ arë cürëtädejȩ pope bagarea̧mi̧ dari̧ —yo̧a̧dejȩrȩ Ütë tjamo̧ judi.

¹⁰ Pio ju̧i̧iä goëdepea̧diro̧jo̧ȩ pjarao̧ ju̧i̧. Ütë tjamo̧ pio ju̧i̧iä ma̧ȩ ta̧rë ëte, jabechji̧ Moiche judi, Aro̧borë goëdepea̧diro̧jo̧ȩ. Ado jauëchja cjiari̧ na̧rȩrëreji̧ri̧diro̧jo̧ȩ Jeova pio judi yo̧a̧mi̧. Aro̧ judi daburäpȩmo̧ arë cürëa̧dejȩ jibëa̧ tai̧rea̧ to oa pjarao̧ ja̧ dëbëräpȩ, pio ju̧i̧ a̧doji̧ri̧borë darea̧mi̧ dari̧. Ado chjaodëri̧ pope bagarëremȩde toremȩ üdë.

¹¹ Ado pio ju̧i̧ daea̧ oaiä, pjarao̧ judi ëna̧diäa̧dejȩrȩ dabaji̧ri̧ pio ji̧ri̧, jauëchja cjiari̧ japaji̧ri̧ pio ji̧ri̧. Peaja̧di dari̧ japatä yo̧a̧dejȩrȩ. Ado jënȩro̧ daba̧ jauëchjara̧ pio ju̧ri̧ra̧ peaja̧di dari̧ japea̧dirȩ.

¹² Judiro̧ ütëborë arë cürëa̧diro̧jo̧ȩ jibëa̧ tai̧rea̧ to oa po ji̧ra̧pe bagari̧. Jabo Aro̧ ja̧ tai̧rea̧ toremȩ üdë codë oa tjürüa̧dejȩrȩ ji̧ri̧ ja̧ toremȩ oa.

¹³ Jabo damȩborë chjuari̧ jiadarëremȩdejȩrȩ pjarao̧ judi. Ta̧rë ja̧bodëa̧dejȩrȩ. Jeova judi yo̧a̧rea̧mi̧ ta̧rë ja̧bodëa̧dejȩrȩ.

Jeova pio judi tänȩa̧ oaiä, bea uiremȩ üdë goe mape bagrëremȩde

¹⁴ Ja̧dëa ji̧ Jeova judi yo̧rëremȩdejȩ Moiche ju̧i̧: —Danȩ, pjarao̧ judi chjuari̧ jiadamȩde. Jabechji̧ go̧dü tänȩdëri̧ cjiadejȩrȩ icharaita ji̧ri̧.

¹⁵ Ja̧di tara yo̧requedemȩ. Pio yaba̧ dopea̧rä pjarao̧ ju̧i̧ goëde jävä jȩnȩ bearäpȩ jäpamȩ. Bea yuroro cjiamȩrȩ jidaemȩrenȩjo̧ȩ. Ado na̧ tai̧rea̧ to oa peaja̧di ara jävä, pope bagaremȩ to oa.

¹⁶ Ado ja̧di ta̧rëri̧ yo̧emȩrenȩjo̧ȩ pjarao̧ ju̧i̧iäpȩmo̧: "Danȩ pjarao̧, Jeova pio judi, ebereo ja̧ Ütë pio judi chjadüa̧ oa ma̧ȩ yürera̧pea̧requedemȩ. Ja̧di ta̧rëri̧ yo̧ chjadüa̧dimȩ: 'Danȩ pjarao̧, go̧dürea̧ yürüjȩrȩ ca̧ pumȩ ji̧ri̧. Go̧dürea̧ yürüjȩrȩ judiro̧ chiri maearäpȩ jäpea̧ oa, judiro̧ pio coaiäpȩmo̧ chjacjiamȩri̧ jo̧rȩtapea̧ oa. Pio ju̧i̧ yo̧ chjadütea̧requedemȩ jabo cjäri̧ marenȩque, jabë ta̧rëdiädëmȩrenȩque.

¹⁷ Ja̧di tara yo̧requedemȩ. Pio coa chjiari chjadëri̧ dabaparenȩ yaba̧. Jabechji̧ ca ju chiarea̧ pio ju̧i̧ daparenȩ. 'Aja̧, Jeova pio judidida, ja̧di dari̧ japamȩdida, ju chia tjamo̧dida' quëna̧ dabaparenȩ. Jabechji̧ cüdë ca̧ ichirä cjiamȩ tai̧rea̧ tora̧ pio ju̧ri̧ra̧ bidepareconȩ ui oa, Niro quȩmȩ bea ui oa. Aja̧, goe mape bagari̧ bidepareconȩ.

¹⁸ Ado goe mape baga̧ oaiä, jabechji̧ ja̧bopade cho̧ üdë. Ma̧i̧ da pjȩa̧ cjiapade. Pio ju̧i̧iä ejichio judiro̧ pio jiro ui oa jararërea̧ ji̧, jararea̧ dadëpadiro̧jo̧ȩ. Goe mapea̧ oaiä, jabechji̧ jararea̧ dadëpadiro̧jo̧ȩ. Ja̧di dari̧ japaparequede mȩnȩ ca̧ pumȩ ji̧ri̧ go̧dürea̧ yürüdërä judi." Aja̧ Moiche, ja̧di ta̧rëri̧ yo̧mȩrȩ yo̧emȩrenȩjo̧ȩ pjararo̧ pio ju̧i̧iäpȩmo̧ —yo̧mȩrȩ yo̧rëremȩdejȩ Moiche ju̧i̧ Jeova judi.

¹⁹ Ja̧dëa ji̧ Jeova judi ji̧dë uëri yo̧mȩrȩ a̧de yo̧a̧dejȩ Moiche ju̧i̧: —Danȩ, yo̧jo̧ȩ Aro̧ pio ju̧i̧ jibëa̧ tai̧rea̧ to oa uiräpȩmo̧ arë gatëtädejȩ. Ejito chiriräpȩ a̧rȩmȩ uiräpȩmo̧ arë gatëtädejȩ. Bearäpȩmo̧, dürüräpȩmo̧, tjaräpȩmo̧, ma̧ uiräpȩmo̧ arë gatëtädejȩ goe mape bagari̧. Jabechji̧ boea̧ oa cjiaremȩ uiborë goe mape jäpade. Yocodëräremȩ ui üdë, canariräremȩ uiborë goe mape jäpade. Ja̧di maeari̧ cjiadiäpade Ejito chiri nötai̧ oa —yo̧mȩrȩ yo̧rëremȩdejȩ Moiche ju̧i̧ Ütë tjamo̧ judi.

²⁰ Ado Moiche judi, Aro̧borë ta̧rëdiäa̧dirȩ Jeova judi yo̧a̧mi̧. Aro̧ judi ara jäa̧dejȩ jibëa̧ tai̧rea̧ to oa. Ado bea yuroro cjiamȩrȩ bidea̧dejȩ ui oa pjarao̧ judi dari̧, jȩa a̧doji̧ri̧borë dari̧. Ado chjaodëri̧ goe mape bagarëremȩde bea uiremȩ üdë.

²¹ Ado bearäremȩ cho̧ chjö̧na̧i̧rȩ ja̧borëreji̧ri̧dirȩ. Ado bea üdë pjȩa̧ mapea̧de. Ado ejichio judiro̧ bea ui oa jararërea̧ ji̧, jara ano̧a̧diro̧jo̧ȩ goe mape baga̧ oaiä, pjȩa̧ mapea̧ oaiä. Ado Ejito chiri nötai̧ oa, jabechji̧ goe mapea̧de.

²² Jabo Ejitoräpȩ jauëchja cjiari̧ japaji̧ri̧ pio judiro̧borë japarëreji̧ri̧dirȩ. Jënȩro̧ daba̧ jauëchjara̧ pio ju̧ri̧ra̧ peaja̧di goe mape bagari̧ japea̧dirȩ. Ado pjarao̧ judi pio ju̧i̧ daea̧ oaiä, jabechji̧ chjuari̧ jiada̧dejȩrȩ Moiche ju̧i̧, Aro̧ ju̧i̧. Jeova judi yo̧a̧mi̧ ta̧rë ja̧bodëa̧dejȩrȩ.

²³ Ta̧rë ja̧botärea̧ ji̧, ta̧rë ja̧bodëmȩrȩ baäa̧de jibëa̧ bëräpȩ. Ado jënȩ da̧ pio ju̧i̧ chjiari ana̧ri̧ jo̧rȩtadëa̧de. Jabechji̧ jo̧rȩtadëmȩrȩ baäa̧de.

²⁴ Ado ejichio ütëborë bea ui oa jaradëji̧ri̧pea̧ oaiä, tade puë ji̧ra̧ oa joeno̧a̧dirȩ bea yuroro ui ja̧bochea oa.

²⁵ Jeova judi goera̧ na̧rȩ ëte chjätärëremȩde 7 do üdë.