Go̧dürea̧ Ma̧ȩ 6 - Biblia Pume

Jeova judi ni̧bä chjaorëremȩdejȩ Moiche ju̧i̧ icharaita pio ji̧ri̧ go̧dü tänȩpea̧ pio ju̧i̧ chjiari

¹ Ado Jeova judi dëbë yo̧mȩrȩ yo̧rëremȩdejȩ Moiche ju̧i̧: —Danȩ Moiche, yaba̧ daparenȩ cüdë pjarao̧ pio ju̧i̧ japapea̧ ji̧. Ca̧ ju chiarea̧ra̧ pio ju̧ri̧ra̧ goae tarari̧ dëbëpe chjaopareconȩ. Ado pio ju̧i̧iä baä tänȩpadejȩrȩ icharaita ji̧ri̧. Cüdë ana̧ri̧ na̧rȩa̧ oaiä, jo̧ȩra̧pe baä tänȩpadejȩrȩ —yo̧mȩrȩ dëbë yo̧a̧dejȩ Moiche ju̧i̧ Ütë tjamo̧ judi pio jȩa iëno̧ë ta̧rëa̧mȩ oa.

² Ado Ütë tjamo̧ judi ji̧dë u̧i̧ yo̧mȩrȩ a̧de yo̧rëremȩdejȩ Moiche ju̧i̧, ja̧di ta̧rëri̧ yo̧mȩrȩ: —Danȩ, Jeova pio judirequede.

³ Ado Abaraa̧ pio ju̧i̧ na̧rȩmȩrȩ ma̧ȩ yürürëremȩreconȩ. Ado peaja̧di dari̧ ma̧ȩ yürüa̧reconȩ Icha ju̧i̧, Jacobo pio ju̧i̧bo. Ado ja̧di ta̧rëri̧ yo̧a̧requedejȩrȩ: "Aja̧, a̧dë chjäte ju chiamȩ Ütë pio judirequede" yo̧a̧requedejȩrȩ. Jabo ca̧ quȩ tjamo̧ oa yo̧dëa̧requedejȩrȩ. "Jeova pio judirequede" yo̧mȩrȩ yo̧dëa̧requedejȩrȩ.

⁴ Jabo chiri pio ju̧i̧ chjiari yo̧ë cji̧däa̧requedejȩrȩ jabo. "Aja̧, dibëa̧ chiri oa yürüparequededibe Canaa̧ quȩmȩ chiri oa" yo̧mȩrȩ yo̧ë cji̧däa̧requedejȩrȩ ano̧ mire jo̧rȩtarea̧ decjiari̧. Pio jiro chirirä, dëdë, cjo̧ro̧rëreji̧ri̧dirȩ jabo jibëa̧dërëremȩde. Tjaoëriji̧ri̧rȩ cjo̧ro̧rëreji̧ri̧dirȩ.

⁵ Ado danȩ, tjamo̧ri̧ ta̧rëa̧requedejȩrȩ davä icharaita pio ji̧ri̧, a a ma cjiaji̧ri̧ oa, conȩda̧ oa cjo̧ro̧ji̧ri̧ oa. Aja̧, ejichiorë tänȩa̧ oa mu̧i̧tjoi̧ mape baga̧ji̧ri̧ oa daea̧requedejȩrȩ peaja̧di. Ado pio ju̧i̧iämȩrȩ jo̧rȩtarequede davä, cüdë yo̧ë cji̧däa̧ pio ju̧i̧.

⁶ Ja̧di tara yo̧tä earequedemȩ icharaita pio ji̧ri̧iäpȩmo̧. Ja̧di ta̧rëri̧ yo̧tä earequedemȩ pio ji̧ri̧iäpȩmo̧: "Danȩrȩ, Jeova pio judirequede cüdë. Ca̧ ju chiarea̧ra̧ pio ju̧ri̧ra̧ ana̧ri̧ bape chjaoparequedejȩrȩ ejichio pio ji̧ri̧. Jabo pio dibë chjätärea̧ yürüparequededibe. Danȩrȩ, Ejichio judiro̧ gitoi̧ dari̧ ja̧bepa tänȩa̧ chja̧oeri judiri go̧dü tänȩparequededibe. Jabechji̧ ejichio ja̧ mu̧i̧tjoi̧dë mape bagari̧ go̧dü tänȩparequededibe.

⁷ Ado danȩrȩ, pio dibë mitëparequededibe ca̧ pumȩ mape bagari̧. Ado mȩnȩro̧, 'Aja̧, pio judimo̧rȩ ibëa̧ Ütëdida' quëna̧ jo̧rȩtaparenȩro̧coe. 'Aja̧, Jeova pio judidida, ibëa̧ Ütë pio judida, Ejito chiriri pio judiri go̧dü tänȩa̧diibëda, mu̧i̧tjoi̧dë mape bagari̧ go̧dü tänȩa̧diibëda' quëna̧ daba mapanȩrȩ pio coa chjiari.

⁸ Aja̧, chjadëri̧ ëba baäparequededibe dibëa̧ chiriräpȩ yuro. Tjamo̧ davä. Cüdë Abaraa̧ ju̧i̧, Icha ju̧i̧, Jacobo ju̧i̧ yo̧ë cji̧därërea̧ chiri pio ju̧i̧ yürüparequededibe, ano̧ mire jo̧rȩtarea̧ decjiari̧. Aja̧, dibëa̧ chiripe bagari̧ yürüparequededibe pio dibëiäpȩmo̧. Jabechji̧ Jeova pio judirequede —yo̧mȩrȩ yo̧rëremȩdejȩ Moiche ju̧i̧ Ütë tjamo̧ judi.

Pjarao̧ pio ju̧i̧ ado goëde jätä yo̧rëremȩdejȩ Moiche ju̧i̧ Jeova judi

⁹ Ado Ütë tjamo̧ judi Moiche pio ju̧i̧ yo̧a̧mi̧ yo̧rëremȩdejȩrȩ icharaita ji̧ri̧, jabo ta̧rë ja̧bodëa̧diro̧jo̧ȩ. Jabechji̧ judiro̧ mu̧i̧tjoi̧ maearë to̧bari̧ ja̧bepe chjaoa̧ oaiä, ma̧i̧ dari̧ conȩda̧ oa cjo̧ro̧a̧ oaiä, jabechji̧ järi tjamo̧dëpe baga̧ maeadirȩ. Pio ju̧i̧iä ta̧rë ja̧bodëa̧diro̧jo̧ȩ.

¹⁰ Ja̧dëa ji̧ Jeova judi yo̧a̧dejȩ Moiche ju̧i̧:

¹¹ —Danȩ, goëde jävä pjarao̧ pio ju̧i̧. Icharaita pio ji̧ri̧ Ejito chiriri judiri go̧dürea̧ yürütä yo̧jo̧ȩ —yo̧a̧dejȩ.

¹² Jabo Moiche judi dëbë yo̧a̧dejȩ Jeova ju̧i̧: —Jabo cjäri̧ marequede. Japarea̧mi̧dërequede. Icharaita pio judiro̧ ta̧rë ja̧bodëa̧mi̧ ta̧rë ja̧bodëpadique pjarao̧ judi. Jabechji̧ japarea̧ decjiade. Ni̧bä chjaodëmȩrequede cüdë. Tjopono̧ chacha tjamo̧requede —yo̧mȩrȩ dëbë yo̧a̧dejȩ Moiche judi Ütë tjamo̧ pio ju̧i̧iäpȩmo̧.

¹³ Jabo Jeova judi cjiadiädëmȩrȩ ja̧di ta̧rëri̧ yo̧rëremȩdejȩ Moiche ju̧i̧, Aro̧ pio ju̧i̧bo: "Danȩrȩ, chjadëri̧ yo̧chji̧jo̧ȩ Ejitoräpȩ tjamo̧ cjo̧ro̧mȩ ütë pio ju̧i̧iäpȩmo̧. Ado icharaita pio ji̧ri̧iäpȩmo̧bo chjadëri̧ yo̧chji̧jȩrȩ. 'Danȩrȩ, Jeova pio judi mitë chjadüa̧diibe icharaita pio ji̧ri̧ chjadëri̧ ëba go̧düpea̧ oa, Ejito chiriri pio judiri chjadëri̧ ëba go̧düpea̧ oa.'" Aja̧, pio jiro ma̧ȩ oa yo̧chji̧jȩrȩ" yo̧mȩrȩ yo̧rëremȩdejȩrȩ Jeova judi pio ji̧ri̧iäpȩmo̧.