Biblia Todo Logo
Bìoball air-loidhne

- Sanasan -

Go̧dürea̧ Ma̧ȩ 5 - Biblia Pume


Moiche judi, Aro̧borë ni̧bä chjaorëreji̧ri̧dirȩ pjarao̧ pio ju̧i̧ nöta

1 Icharaita tjamo̧ cjo̧ro̧ji̧ri̧ pio ji̧ri̧ nöta a̧dopea̧ duri oa, Moiche judi, Aro̧borë goëdepea̧diro̧jo̧ȩ pjarao̧ ju̧i̧. Ado pio ju̧i̧iäpȩ go̧düdärä ëte ja̧di ta̧rëri̧ yo̧rëreji̧ri̧diro̧jo̧ȩ: —Danȩ ütë, Jeova judi, icharaita ja̧ Ütë pio judi ja̧di ta̧rëri̧ yo̧mȩrȩ yo̧dimȩ: "Danȩ, chiri maearäpȩ go̧dürea̧ yürütä earequedemȩ ca̧ pumȩ pio ji̧ri̧. Pio ju̧ri̧pȩ juraji̧ri̧rȩ a̧dopapadirȩ pio coa chjacjiamȩri̧ jo̧rȩtaji̧ri̧rȩ." Aja̧, ja̧di ta̧rëri̧ yo̧dimȩ Jeova judi —yo̧a̧diro̧jo̧ȩ.

2 Jabo pjararo̧ judi dëbë yo̧mȩrȩ yo̧a̧dejȩrȩ: —¿Chjiacjivade Jeova judi? 'Pio judidida' quëna̧ dabadëreconȩ. Ja̧di tara ta̧rë ja̧bodëpareconȩ. Ado jabechji̧, icharaita pio ji̧ri̧ go̧dü tänȩdëparequedejȩrȩ.

3 Ja̧dëa ji̧ dëbë yo̧a̧diro̧jo̧ȩ: —Danȩ, ebereo ja̧ Ütë pio judi dëbëdiäa̧diibe. Jabechji̧ go̧dürea̧ yürüibe chiri maearäpȩ. Tjarari̧ do nöta järea̧ jachi oa go̧dü tänȩibe ibëa̧ Ano̧mȩ Ütë pio ju̧i̧iäpȩmo̧ goe gu̧rori̧ yürüpea̧ oa. A̧ro̧rȩ jädërä judi ja̧bo tänȩpai̧ dadiibe. Ibë eadëji̧ri̧ pio judiro̧ acji jana̧ oaiä ja̧bo tänȩpai̧ dadiibe. Gito oaiä ja̧bo tänȩpai̧ dadiibe peaja̧di. Ja̧di tara yo̧rea̧ro̧mȩ ibë chjadëri̧ go̧dürea̧ yürütä.

4 Jabo Ejitoräpȩ cjo̧ro̧mȩ ütë judi dëbë yo̧mȩrȩ yo̧a̧dejȩrȩ: —Danȩ Moiche, danȩ Aro̧, ¿tjana̧pea̧ oa ana̧ri̧ tja̧reparȩrenȩro̧jȩrȩ dibëa̧ pumȩ pio ji̧ri̧? Jabechji̧ ja̧bepa matädirȩ ado chjereno̧ oëra̧diärea̧ decjiari̧.

5 Jabechji̧ na̧ pumȩ judiro̧ a̧dë chjäte ji̧ra̧pea̧dirȩ. Ado mȩnȩro̧, cjäri̧ marenȩro̧jȩrȩ, tja̧reparȩmi̧ dari̧ japarenȩro̧jȩrȩ. Judiro̧ goae tarari̧ ja̧bepatärea̧ ji̧. ja̧bepa tänȩdërenȩro̧jȩrȩ. Ja̧di dari̧ japarea̧mi̧dëde —yo̧mȩrȩ yo̧rëremȩdejȩrȩ pjarao̧ judi Moiche ju̧i̧, Aro̧ pio ju̧i̧.


Ji̧dë u̧i̧ to̧bari̧ ja̧bepa tänȩrëremȩdejȩrȩ icharaita ji̧ri̧ pjarao̧ judi

6 Pio jiro domȩ ju̧i̧iä pjarao̧ judi a̧dopa tänȩrëremȩdejȩrȩ ejichio pio ji̧ri̧, tjamo̧ ja̧bepa tänȩji̧ri̧ pio ji̧ri̧. Ado Icharaita mu̧i̧tjoi̧ jidaji̧ri̧ pio ji̧ri̧bo a̧dopa tänȩa̧dejȩrȩ. Jabechji̧ mu̧i̧tjoi̧ pio ji̧ri̧ chjadëri̧ jidapea̧ oa, mitëa̧ oa cjiarëreji̧ri̧dirȩ pio jiro oari judiro̧ jibëa̧ pumȩ pio ji̧ri̧ chjadëri̧ jidapea̧ oa.

7 Ado a̧dopea̧ oa cjiaji̧ri̧ oa yo̧a̧dejȩrȩ: —Danȩrȩ, mȩnȩro̧ dabu choco oa japaji̧ri̧ pio ji̧ri̧iäpȩmo̧ cärä oa yürürërea̧ ji̧, yürüdë machji̧jȩrȩ yaba̧. Jabechji̧ jibëa̧ ma̧na̧ri̧ boapadiro̧jo̧ȩ cärä oa.

8 Jabo cärä boaji̧ri̧borë, jabechji̧ jënȩro̧ japarërea̧mi̧ japapea̧ chiadirȩ, cja̧rȩmȩ dabu chocorë cjiadiädëri̧. Tjamo̧ davä. Nötadäräri̧ japapea̧ chiadirȩ cja̧rȩmȩrȩ cjiadiädëri̧. Danȩrȩ, judiro̧ jamȩpai̧ dari̧ cjia tjamo̧ji̧ri̧rȩ ja̧bepatärea̧ ji̧, ja̧di dari̧ ja̧bepadë ma jirodirȩ. Jënȩro̧ ja̧bepea̧ üdë nötadë jirodejȩrȩ. Ado pio ju̧i̧iä cjo̧dë chjao jirodiro̧coe chiri maearäpȩ jäpea̧ ji̧ jibëa̧ Ütë pio ju̧i̧iäpȩmo̧ goe gu̧rori̧ yürüpea̧ oa. Jabechji̧ chumi̧dëri̧ cjiadirȩ.

9 Ja̧di tara ji̧dë u̧i̧ ja̧bepa tänȩchji̧jȩrȩ yaba̧. To̧bari̧ ja̧beparërea̧ ji̧, ji̧dë u̧i̧ ja̧bepa tänȩchji̧jȩrȩ. Ado jamȩpai̧ dari̧ cjia tjamo̧ji̧ri̧rȩ ja̧bepe cjia oaiä, jabechji̧ ta̧rë ja̧bodë mapadiro̧jȩrȩ jibë ma̧ȩ chjádë yürüji̧ri̧ pio ji̧ri̧ —yo̧mȩrȩ yo̧rëremȩdejȩrȩ pjarao̧ judi.


Pjarao̧ judi yo̧a̧ pio ju̧i̧ yo̧rëreji̧ri̧diro̧jȩrȩ icharaita ji̧ri̧

10 Ja̧dëa ji̧ a̧dopea̧ oa cjiaji̧ri̧ oa yo̧rëreji̧ri̧diro̧jȩrȩ icharaita pio ji̧ri̧iäpȩmo̧. Tjamo̧ ja̧bepa tänȩji̧ri̧ pio judiro̧, mu̧i̧tjoi̧ jidaji̧ri̧borë yo̧rëreji̧ri̧diro̧jȩrȩ ja̧di ta̧rëri̧ yo̧ji̧ri̧rȩ: —Danȩrȩ, pjarao̧ pio judi yo̧a̧diibe cärä oa yürüdëtä pio dibëiäpȩmo̧.

11 Jabechji̧ pio mȩnȩro̧ ano̧ mire boapea̧ chiarenȩro̧jo̧ȩ cärä oa dami̧ti̧räpȩ. Dibëa̧ ma̧na̧ri̧ boaparenȩro̧jo̧ȩ. Jabo cärä boaji̧ri̧borë, jabechji̧ dabu choco ji̧ra̧ tjamo̧ oa japapea̧de cja̧rȩmȩrȩ cjiadiädëri̧. Jabechji̧ mȩnȩro̧ japarërea̧mi̧ japapea̧ chianȩrȩ tocoi̧mi̧ ja̧beparea̧ decjiari̧ —yo̧ji̧ri̧rȩ yo̧a̧diro̧jȩrȩ dabu choco japaji̧ri̧ pio ji̧ri̧iäpȩmo̧.

12 Ado pio ju̧i̧ ta̧rëa̧ oaiä icharaita judiro̧ Ejito chiri nötai̧ oa chjuchjupechärëreji̧ri̧dirȩ cärä oa boapea̧ oa.

13 Ado tjamo̧ ja̧bepa tänȩji̧ri̧ pio judiro̧ järi tjamo̧ji̧ri̧rȩ goae tarari̧ ja̧bepa tänȩa̧diro̧jȩrȩ nötadäräri̧ japapea̧ oa. 'Jibëa̧ ma̧na̧ri̧ boaji̧ri̧borë nötadäräri̧ japapea̧ chiadiro̧da, a̧ro̧rȩ cärä oa yürüa̧rä japarërea̧mi̧ japapea̧ chiadiro̧da, dabu choco cja̧rȩmȩrȩ cjiadiädëri̧ japapea̧ chiadiro̧da' quëna̧ jo̧rȩtaji̧ri̧rȩ ma̧i̧ dari̧ ja̧bepa tänȩa̧diro̧jȩrȩ.

14 Jabo icharaita judiro̧ dabu choco oa nötadäräri̧ japadëa̧ oaiä, ejichio tjamo̧ ja̧bepa tänȩji̧ri̧ pio judiro̧ goae tarari̧ bide cjaeärëreji̧ri̧diro̧jȩrȩ Icharaita jidaji̧ri̧ mu̧i̧tjoi̧ pio ji̧ri̧. Jabechji̧ dabu choco oa japaji̧ri̧ pio judiro̧ nötadäräri̧ japadëa̧ oaiä, jabechji̧ jidaji̧ri̧ pio ji̧ri̧ bide cjaeäa̧diro̧jȩrȩ. Ado pio ji̧ri̧iäpȩmo̧ bide cjaeä ëte, bide cjaeäji̧ri̧ pio judiro̧ iëno̧ë ta̧rëa̧diro̧jȩrȩ mu̧i̧tjoi̧ jidaji̧ri̧ pio ji̧ri̧: —¿Jabo tjana̧ ju̧i̧iä nötadäräri̧ japadëa̧dirȩ icharaita judiro̧, dibëa̧ chja̧oerä ja̧bepaji̧ri̧ pio judiro̧? Pedi nötadëa̧de dabu choco üdë. Ado yaba̧ domȩ oa peaja̧di nötadëde. Mȩnȩro̧ pearä japarërea̧mi̧ japadëa̧nȩrȩ. Pjärämȩ cjiadiäa̧de —yo̧a̧diro̧jȩrȩ.

15 Pio ju̧i̧ ta̧rëa̧ oaiä icharaita judiro̧, mu̧i̧tjoi̧ jidaji̧ri̧ pio judiro̧ goëdepea̧diro̧jo̧ȩ pjarao̧ ju̧i̧. Ja̧di ta̧rëri̧ yo̧ji̧ri̧rȩ yo̧a̧diro̧jo̧ȩ: —Danȩ ibëa̧ ütë, na̧ mu̧i̧tjoi̧ maearea̧rȩ jabo tocoi̧mi̧ ni̧bä chjaotämi̧ cjiarea̧ro̧mȩ. ¿Tjana̧ ju̧i̧iä ja̧di dari̧ japarenȩibe? Cjäri̧ri̧ cjia daibe.

16 Danȩ, cärä yürüdë madiro̧ibe yaba̧, jabo yürüdëji̧ri̧borë nötadäräri̧ japatä yo̧tadiro̧ibe. Ado dabu choco üdë nötadëa̧ oaiä bide cjaeäa̧diro̧ibe peaja̧di. Jabo danȩ ütë, pio ibëiäpȩmo̧ ma̧i̧ dari̧ jape chjao oaiä, japarea̧mi̧dë pio ju̧i̧ yo̧ chjao oaiä, jabechji̧ japadärärea̧ dadë marea̧rȩ. Pio ju̧i̧iä judiro̧dirȩ chjai̧dëri̧ japaji̧ri̧ judiro̧, a̧ro̧rȩdë —yo̧ji̧ri̧rȩ yo̧a̧diro̧jo̧ȩ pjarao̧ ju̧i̧.

17 Jabo pjarao̧ judi dëbë yo̧mȩrȩ to̧bari̧ yo̧a̧dejȩrȩ: —Cjäri̧ manȩrȩ. Chumi̧dëri̧ cjianȩrȩ. Ja̧bepadëri̧ cjianȩrȩ. Ado pio ju̧i̧iä cjo̧dë chjaorenȩro̧coe chiri maearäpȩ jäpea̧ ji̧ Jeova pio ju̧i̧iäpȩmo̧ goe gu̧rori̧ cäë yürüpea̧ oa.

18 Ja̧di tara yo̧requededibe. Jo̧ȩra̧pe baäeno̧chji̧vä ja̧bepapea̧ oa. Cärä oa yürüdëpadiro̧dibe jabo jabechji̧, nötadäräri̧ japapea̧ chiarenȩrȩ pearä japarërea̧mi̧ cja̧rȩmȩrȩ cjiadiädëri̧ —yo̧mȩrȩ to̧bari̧ yo̧rëremȩdejȩrȩ pjarao̧ judi.

19 Pio ju̧i̧ ta̧rëa̧ oaiä ana̧ri̧ jo̧rȩtaji̧ri̧pea̧dirȩ mu̧i̧tjoi̧ jidaji̧ri̧ judiro̧. 'Yaba̧ cärä yürüdëpadiro̧ibëda, jabo cärä yürüa̧rä japarërea̧mi̧ japatä eatadiro̧ibëda, cja̧rȩmȩ dabu chocorë cjiadiädëri̧ japatä eadiro̧ibëda, chjao tjamo̧padiibëda' quëna̧ jo̧rȩtaji̧ri̧pea̧dirȩ, ana̧ri̧ jo̧rȩtaji̧ri̧rȩ.

20 Pjarao̧ pio ju̧i̧ nöta ni̧bä chjaoa̧ duri oa dëbëdiäa̧diro̧jȩrȩ Moiche ju̧i̧, Aro̧ ju̧i̧. Jibë jidataji̧ri̧ oa dëbëdiäa̧diro̧jȩrȩ.

21 Ado yo̧rëreji̧ri̧diro̧jȩrȩ: —Jeova pio ju̧i̧ ja̧ dachoro chjai̧dëri̧ japea̧renȩro̧ibe —yo̧a̧diro̧jȩrȩ—. Jabechji̧ bape chjaotädidibe. Danȩrȩ, pjarao̧ judi, ejichio tjamo̧ cjo̧ro̧ji̧ri̧ pio judiro̧borë eadë mape baga̧diro̧ibe yaba̧ pio mȩnȩro̧ japea̧ oaiä. Pio mȩnȩro̧ yo̧a̧ pio oaiä ja̧bo tänȩpai̧ dadiro̧ibe —yo̧a̧diro̧jȩrȩ.

22 Pio ji̧ri̧iä ta̧rë ëte Moiche judi yo̧rëremȩdejȩ Jeova ju̧i̧: —¿Tjana̧pea̧ oa conȩdarea̧ oa chjätä tänȩrenȩjȩrȩ na̧ pumȩ ji̧ri̧? ¿Tjana̧pea̧ oa chjadüa̧renȩque pio jauëräpȩmo̧?

23 Danȩ, cüdë pio mȩa chjiari pjarao̧ ju̧i̧ ni̧bä chjaoa̧ pio judiri yurori ji̧dë ma conȩdadejȩrȩ icharaita ji̧ri̧. Ado mȩnȩ ji̧ri̧ a̧dotärea̧ ji̧, a̧dodë marenȩjȩrȩ —yo̧mȩrȩ yo̧rëremȩdejȩ Ütë tjamo̧ ju̧i̧ Moiche judi.

©2021 Global Partners, All Rights Reserved

Global Partners
Lean sinn:



Sanasan