Go̧dürea̧ Ma̧ȩ 4 - Biblia Pume

Jauëchja cjiari̧ na̧rȩpea̧ oa yürürëremȩdejȩ Moiche ju̧i̧ Ütë tjamo̧ judi

¹ Jabo Moiche judi Ütë tjamo̧ ju̧i̧ dëbë yo̧mȩrȩ yo̧rëremȩdejȩ: —Jabo cjäri̧ madiro̧coe, quëna̧dëpadiro̧coe. Ta̧rë ja̧bodëpadiro̧coe. Cüdë ji̧ri̧iäpȩmo̧ yo̧ro, "Cjäri̧ madimȩ. Jeova pio judi tjamo̧ri̧ na̧rȩdëa̧dimȩ" dëbë yo̧pa jirodiro̧coe.

² Ja̧dëa ji̧ Jeova judi iëno̧ë ta̧rëa̧dejȩ Moiche ju̧i̧: —¿Tjana̧ aranȩ na̧ ichirä? Ado Moiche judi: —Tjana̧ aradë, jabechji̧ tjätjäpë tai̧rea̧ to ararequede —dëbë yo̧a̧dejȩ.

³ Ado Jeova judi: —Daburäpȩmo̧ arë cürëvä. Ado Ütë tjamo̧ judi yo̧a̧ oaiä, daburäpȩmo̧ arë cürërëremȩdejȩ jibëa̧ tai̧rea̧ to oa. Ado chjaodëri̧ pope bagarëremȩde toremȩ pio judi. Ado Moiche judi po pio ju̧i̧ daea̧ oaiä bagureno̧a̧de.

⁴ Jabo Jeova judi yo̧a̧dejȩ: —Danȩ, na̧ ichira̧ mitëvä po oa. Chjiari pio judiri mitëjo̧ȩ. Ado Ütë tjamo̧ judi yo̧a̧mi̧ mitëa̧dejȩ. Ado ju̧i̧ mitëa̧ ji̧, chjaodëri̧ tope baga̧de ado chjereno̧.

⁵ Ja̧dëa ji̧ yo̧a̧dejȩ Moiche ju̧i̧ Jeova judi: —Pio jiro na̧rȩrea̧ oa yürürequedemȩ tjamo̧ cjo̧ro̧ji̧ri̧ judiro̧ chjadëri̧ quëna̧pea̧ oa. Jabechji̧ pio jiro na̧rȩrea̧ oa da̧ oaiä, 'Aja̧, Jeova pio judi tjamo̧ri̧ na̧rȩa̧diji̧da, ibëa̧ taru ja̧ Ütë pio judi tjamo̧ri̧ na̧rȩa̧diji̧da, Abaraa̧ ja̧ Ütë pio judi, Icha ja̧ Ütë pio judi, ado Jacobo ja̧ Ütë pio judi tjamo̧ri̧ na̧rȩa̧diji̧da' quëna̧ jo̧rȩtapadirȩ —yo̧mȩrȩ yo̧a̧dejȩ Moiche ju̧i̧ Ütë tjamo̧ judi.

⁶ Ado Jeova judi ji̧dë uëri yo̧mȩrȩ a̧de yo̧a̧dejȩ: —Danȩ, go̧iovä na̧ ichi oa na̧ chjibo ëtemo̧. Ado Ütë tjamo̧ judi yo̧a̧mi̧ go̧ioa̧dejȩ jibëa̧ ichi oa jibëa̧ chjibo ëtemo̧. Ado jibëa̧ ichi oa go̧dü tänȩa̧ ji̧, ma̧i̧ da co chia maea oa go̧dü tänȩrëremȩdejȩ cjari̧da oa, bërebëreati̧ maea oa.

⁷ Ja̧dëa ji̧ Ütë tjamo̧ judi ado yo̧a̧dejȩ: —Ado go̧iovä na̧ ichi oa na̧ chjibo ëtemo̧. Ado Ütë tjamo̧ judi yo̧a̧mi̧ ado japea̧de. Ado jibëa̧ ichi oa chjibori pio judiri ado go̧dü tänȩa̧ ji̧, jabechji̧ co chja maea oa go̧dü tänȩa̧dejȩ, pearäremi̧ dari̧.

⁸ Ja̧dëa ji̧ Jeova judi yo̧a̧dejȩ Moiche ju̧i̧: —Danȩ, icharaita judiro̧, cüdë mȩa yabochja na̧rȩa̧ pio ju̧i̧ da̧ oaiä quëna̧dërä judi, a̧de na̧rȩjȩrȩ ado cja̧rȩmo̧ na̧rȩrea̧ oa. Pio ju̧i̧ da̧ oaiä quëna̧pai̧ dadirȩ.

⁹ Jabo pio ju̧i̧bo daji̧ri̧borë quëna̧dërä judi, jabechji̧ Niro quȩmȩ beari pio judiri ui oa mu̧i̧ go̧dütä earequedemȩ. Ado pio jiro ui oa dabu garäpȩmo̧ arë cjaratä earequedemȩ. Ado mȩnȩ ja̧di dari̧ japea̧ oaiä, jabechji̧ pio jiro uiremȩ pio judi goe mapade —yo̧mȩrȩ yo̧a̧dejȩ Moiche ju̧i̧ Ütë tjamo̧ judi.

¹⁰ Jabo Moiche judi dëbë yo̧a̧dejȩ Jeova ju̧i̧: —Jabo cjäri̧ marequede ca̧ Ano̧mȩ. Goae tarari̧ ni̧bä chjaodëmȩrequede. Peadëri ja̧ ni̧bä chjaodëmȩrequede. Tjopono̧ chachamȩrȩ cjo̧ro̧requede cüdë. Cjiadiä cjiadiä cjia ni̧bämȩrequede. Jaerira̧ ni̧bä ni̧bächämȩrequede cüdë.

¹¹ Jabo Jeova judi yo̧a̧dejȩ: —¿Chjiade pumȩ ya Ano̧mȩ judi? ¿Chjiade ni̧bärea̧ yürümȩ judi? ¿Chjiarë tänȩa̧ oa ta̧ra̧ cotodirȩ o judiro̧? Ado ¿chjiade pumȩ dacho Ano̧mȩ judi? ¿Chjiarë tänȩa̧ oa da cotodirȩ o judiro̧? Chjiarëdë, danȩ, pio Cüdërequede. Jeova pio judirequede.

¹² Ja̧di tara yo̧requedemȩ. Jabechji̧ jävä. Ëba cjiaparequedemȩ. Chjadëri̧ a̧doparequedemȩ mȩnȩ chjadëri̧ ni̧bä chjaopea̧ oa. '¿Tjana̧ yo̧pacjivacuni̧?' quëna̧rea̧mi̧dëri̧ a̧doparequedemȩ. Jabechji̧ jävä —yo̧mȩrȩ yo̧a̧dejȩ Moiche ju̧i̧ Ütë tjamo̧ judi.

¹³ Jabo Moiche judi ji̧dë ma dëbë yo̧mȩrȩ yo̧a̧dejȩ: —Danȩ ca̧ Ano̧mȩ, cjäri̧ri̧ cjia dacoe. Jabechji̧ ado cja̧rȩmo̧ oa ano̧ mire chjadütäremȩrenȩ. Jädëri̧ cjiarequede —yo̧mȩrȩ dëbë yo̧a̧dejȩ Moiche judi.

¹⁴ Ado Moiche judi ji̧dë ma jiada̧ oaiä ërecjiapea̧dejȩ Jeova judi. Ado yo̧a̧dejȩ: —Danȩ, na̧ ayima̧i̧ judi, Aro̧ quȩmȩ pio judide. Chjadëri̧ ni̧bä chjaomȩde. Ado Devi pio judiri ja̧mȩde peaja̧di. Pio judi jana̧dimȩ mȩa nöta dëbëdiäpea̧ oa. Ma̧ chiadëri̧ cjiari̧ jo̧rȩtamȩrȩ dapadimȩ.

¹⁵ Pio judi ni̧bäe yürüpadimȩ. Mȩnȩ pio ju̧i̧iäpȩmo̧ yo̧a̧ pio ju̧i̧ yo̧pade. Jibëa̧ ma̧na̧ri̧ jo̧rȩtamȩrȩ yo̧dëpade jabo pio mȩaiä ta̧rëa̧ pio ju̧i̧mo̧i̧ goë yo̧pade o ji̧ri̧iäpȩmo̧. Ado pio dibë yo̧a̧ri̧bo oa chjadëri̧ a̧doparequededibe. Mȩnȩro̧ japapea̧ pio ju̧i̧ chjadëri̧ yo̧parequededibe.

¹⁶ Mȩnȩ na̧ ayima̧i̧ oa yo̧a̧ pio ju̧i̧ goë yo̧padejȩrȩ icharaita pio ji̧ri̧iäpȩmo̧. Pio mȩnȩ yo̧tärea̧ ji̧, Aro̧ pio judi goë yo̧pade na̧ yami̧ dari̧ cjiamȩrȩ. Aja̧, cüdë mȩa yo̧a̧ pio ju̧i̧mo̧i̧ goë yo̧pade, ca̧ ma̧ȩ duri maea oa.

¹⁷ Ado danȩ, na̧ tai̧rea̧ to pio ju̧i̧ ara jätä earequedemȩ. Pio ju̧ri̧ra̧ jauëchja cjiari̧ na̧rȩparenȩjȩrȩ pumȩ ji̧ri̧ —yo̧mȩrȩ yo̧rëremȩdejȩ Moiche ju̧i̧ Ütë tjamo̧ judi.

Moiche judi cuchupë baärërëmȩde Ejitoräpȩ

¹⁸ Ja̧dëa ji̧ Moiche judi baärëremȩde jibëa̧ bëräpȩ. Joja̧ȩtȩräpȩ, Jetoro quȩmȩ pio ju̧i̧ ja̧ bëräpȩ baäa̧de. Ado joja̧ȩtȩ ju̧i̧ yo̧a̧dejȩ: —Danȩ ja̧ȩtȩ, ca̧ pumȩiäpȩ cuchupapea̧ chiarequede Ejitoräpȩmo̧. 'Jabë cjo̧ro̧ baä jirodiro̧da, goëde jätäremȩquiji̧ri̧da' quëna̧ jo̧rȩtarequedejȩrȩ. Cjäri̧ri̧ cjia dacoe ja̧ȩtȩ. Chjadëri̧ järea̧ yürücoe. Ado Jetoro judi dëbë yo̧a̧dejȩ Moiche ju̧i̧iäpȩmo̧: —Jabechji̧ jävä. Chjadëri̧ jävä —yo̧mȩrȩ dëbë yo̧a̧dejȩ joja̧ȩtȩ judi.

¹⁹ Ado Moiche judi jabë Madiana quȩmȩ chiriräpȩmȩ oa Jeova judi ma̧ȩ yürürëremȩdejȩ. Ja̧di ta̧rëri̧ yo̧mȩrȩ yo̧a̧dejȩ: —Jabechji̧ cuchupavä Ejitoräpȩmo̧. Ja̧boa̧ maeadirȩ mȩa ja̧bo tänȩtämi̧ cjiarëreji̧ri̧ judiro̧. Chjadëpea̧de yaba̧.

²⁰ Ado pio ju̧i̧ ta̧rëmȩrȩ Moiche judi mitërëremȩdejȩ jibëa̧ iei̧ ji̧, jibëa̧ u̧ri̧bo. Ado buroro cha tänȩrëremȩdejȩrȩ. Ado cuchupë baärëremȩde Ejitoräpȩmo̧. Ado Ütërë jȩa ara jätä yo̧a̧ pio ju̧i̧ aramȩrȩ järëremȩde jibëa̧ tai̧rea̧ to pio ju̧i̧.

²¹ Ji̧dë duri oa Jeova judi yo̧a̧dejȩ: —Danȩ, mȩnȩ Ejitoräpȩ go̧düdäräa̧rä, cüdë mȩa na̧rȩa̧ chjö̧na̧i̧ oa na̧rȩtä earequedemȩ pjarao̧ pio ju̧i̧. Jauëchja cjiari̧ na̧rȩjo̧ȩ. Jabo ta̧rë ja̧bodëpadimȩ jabo. Pio cüdë tänȩa̧ oa jiade ta̧rëpadimȩ. Järea̧ yürüdëpadejȩrȩ icharaita ji̧ri̧. Jabechji̧ chjuari̧ jiada tänȩpareconȩ.

²² Ado danȩ, ja̧di ta̧rëri̧ yo̧tä earequedemȩ pio ju̧i̧iäpȩmo̧: "Danȩ pjarao̧, ja̧di ta̧rëri̧ yo̧mȩrȩ yo̧dimȩ Jeova judi: Danȩ, Icharaita judiro̧ ca̧ ja yabomȩmi̧ dari̧ cjiadirȩ.

²³ Ado ca̧ ja yabomȩmi̧ da pio ju̧i̧ chjadütä yo̧tarequedemȩ pio coaiäpȩmo̧ chjacjiamȩri̧ jo̧rȩtapea̧ oa. Jabo mȩnȩ japadërä judi, cüdë yo̧a̧mi̧ japadërä judi, jabechji̧ quëna̧vä. Jabechji̧ na̧ ja yabomȩ pio ju̧i̧ ja̧bo tänȩpareconȩ" yo̧mȩrȩ yo̧parenȩjo̧ȩ pjarao̧ pio ju̧i̧iäpȩmo̧ —yo̧mȩrȩ yo̧a̧dejȩ Jeova judi Moiche pio ju̧i̧iäpȩmo̧.

Moiche judi dëbëdiärëremȩdejȩ jibëa̧ ayima̧i̧ oa

²⁷ Ado Jeova judi yo̧a̧dejȩ Aro̧ ju̧i̧: "Danȩ, chiri maearäpȩ jävä Moiche pio ju̧i̧ dëbëdiäpea̧ oa." Aja̧, ja̧di ta̧rëri̧ yo̧mȩrȩ yo̧rëremȩdejȩ. Ado pio ju̧i̧iä järëremȩde. Ado idëpȩ go̧düdärämȩrȩ darëremȩdejȩ jibëa̧ ayi̧ma̧i̧ oa Chinai quȩmȩ ya̧mi̧räpȩ ju̧ri̧, Ütë tjamo̧ ja̧ ya̧mi̧räpȩ ju̧ri̧. Ado pio ju̧i̧ dadärämȩrȩ ya ibua̧dejȩ chamachoro.

²⁸ Ja̧dëa ji̧ Moiche judi chjö̧na̧i̧ oa ni̧bä chjaorëremȩdejȩ Ütërë pio jȩaiäpȩmo̧ yo̧a̧rea̧ pio ju̧i̧, jënȩro̧ ejichjio pio ji̧ri̧iäpȩmo̧ yo̧pea̧ pio ju̧i̧. Ado jënȩro̧ ejichio pio ji̧ri̧ jauëchja cjiari̧ na̧rȩpea̧ pio ju̧i̧ chjiaribo ni̧bä chjaoa̧dejȩ.

²⁹ Ja̧dëa ji̧ go̧dürëreji̧ri̧dirȩ Ejitoräpȩ baäpea̧ oa. Ado judiro̧ pio ju̧ri̧pȩ go̧düdärärërea̧ ji̧, icharaita pio ji̧ri̧iäpȩ go̧düdäräa̧ ji̧, jabechji̧ tjamo̧ cjo̧ro̧ji̧ri̧ pio ji̧ri̧mo̧ a̧dopa tänȩrëreji̧ri̧diro̧jȩrȩ.

³⁰ Ado a̧dopea̧ oa cjiaji̧ri̧ oa ni̧bä chjaorëremȩdejȩrȩ Aro̧ judi. Jeova judi Moiche ju̧i̧iäpȩmo̧ yo̧a̧ chjö̧na̧i̧ oa ni̧bä chjaoa̧dejȩrȩ. Peaja̧di jauëchja cjiari̧ na̧rȩa̧dejȩrȩ ütëborë dari̧.

³¹ Ado ja̧dëa ji̧ tjamo̧ cjo̧ro̧ji̧ri̧ judiro̧ chjö̧na̧i̧ oa ta̧rëa̧ oaiä, chjö̧na̧i̧ daea̧ oaiä, 'Aja̧, tjamo̧i̧ cjiari̧ yo̧diro̧ibëda' quëna̧ jo̧rȩtaji̧ri̧pea̧dirȩ. Ado ja̧dëa ji̧ judiro̧ chjö̧na̧i̧ oa ta̧rëa̧ oaiä, "Jeova judi pio ibë ana̧ri̧ jo̧rȩtamȩrȩ dadiibe” yo̧a̧ oa ta̧rëa̧ oaiä, “Jeova judi a̧doera̧pea̧diibe” yo̧a̧ oa ta̧rëa̧ oaiä, “Conȩda̧ oa cjiaji̧ri̧ oa daba dae chjaodiibe” yo̧a̧ oa ta̧rëa̧ oaiä, jabechji̧ juchatura̧ tjätjäpë china̧därärëreji̧ri̧dirȩ Jeova pio ju̧i̧iäpȩmo̧ chjacjiamȩri̧ jo̧rȩtaji̧ri̧rȩ.