Go̧dürea̧ Ma̧ȩ 3 - Biblia Pume

Moiche judi dae cjiarëremȩdejȩ cjo̧dë chiamȩ to oa

¹ Moiche judi joja̧ȩtȩ ja̧ oveja buba oa jidamȩrȩ ja̧beparëremȩde Jetoro quȩmȩ ja̧ oa, Madiana quȩmȩräpȩ cjo̧ro̧ji̧ri̧ pio ji̧ri̧ chjiari goë tuti cjo̧dëmȩrȩ ja̧bepamȩ ja̧ oa. Ado cärä chjadë chiamȩ chiri oa dadäräpea̧ oa, ëba järëremȩdejȩ oveja oa chiri maea oëräpȩ. Ado ja̧dira̧ jämȩrȩ go̧düdärärëremȩde Chinai quȩmȩ ya̧mi̧räpȩ, Ütë tjamo̧ ja̧ ya̧mi̧räpȩ.

² Ja̧dëa ji̧ Jeovarë chjadüa̧ mu̧i̧tjoi̧ pio judi chjaodëri̧ na̧rȩrëremȩdejȩ. Tüe baämȩ toro cjiamȩrȩ na̧rȩrëremȩdejȩ. Ado Moiche judi to pio ju̧i̧ dae cjiamȩrȩ jo̧rȩtamȩpea̧de. 'Chia chia, to üdë tüe baädida, jabo tjaepe jädëdida, jabechji̧ gägäari̧ cjiadida' quëna̧ jo̧rȩtamȩrȩ dae cjiarëremȩdejȩ.

³ '¿Jabo tjana̧ ju̧i̧iä tjaepe jädëdida, goëdetäremȩcuni̧da' quëna̧ jo̧rȩtamȩrȩ järëremȩde to pio ju̧i̧iäpȩ.

⁴ Ado Jeova judi Moiche pio ju̧i̧ daea̧ oaiä, to queri̧räpȩ jana̧mȩ oa daea̧ oaiä, jabechji̧ ëna̧diäa̧dejȩ toräpȩ cjiamȩrȩ. Aja̧, ja̧di ta̧rëri̧ yo̧mȩrȩ ëna̧diäa̧dejȩ: —Moiche, Moiche —yo̧mȩrȩ ëna̧diäa̧dejȩ. Ado Moiche judi: —Aja̧, pio yirequede —yo̧mȩrȩ dëbë yo̧a̧dejȩ.

⁵ Ado ja̧dëa ji̧ yo̧a̧dejȩ Ütë tjamo̧ judi: —Jachi cjiavä. Ca̧ queri̧räpȩ jana̧dëvä jabo danȩ, coëno̧vä na̧ ta joë oa. Jabechji̧ china̧chjaräpȩrenȩ cüdë pio yi tara. Ja̧di tara coëno̧vä.

⁶ Danȩ, na̧ taru pio ji̧ri̧ ja̧ Ütërequede cüdë. Abaraa̧ pio ju̧i̧ ja̧ Ütërequede. Icha pio ju̧i̧ ja̧ Ütërequede. Ado Jacobo pio ju̧i̧ ja̧ Ütërequede peaja̧di —yo̧mȩrȩ yo̧rëremȩdejȩ Moiche ju̧i̧iäpȩmo̧ Ütë tjamo̧ judi. Ado Moiche judi pio ju̧i̧ ta̧rëa̧ oaiä, tutirëremȩdejȩ jibëa̧ dacho oa. Ütë tjamo̧ ju̧i̧ dachea oa, uapa tjamo̧mȩrȩ tutia̧dejȩ.

⁷ Ja̧dëa ji̧ Jeova judi yo̧a̧dejȩ: —Danȩ, tjamo̧ri̧ daba darequedejȩrȩ ca̧ pumȩ ji̧ri̧ Ejitoräpȩji̧ri̧ oa. Conȩda̧ oa cjiaji̧ri̧ oa daba darequedejȩrȩ. Ejaro cjiaji̧ri̧ oa ta̧rërequedejȩrȩ ji̧dëri̧. Jabechji̧ tjamo̧ ja̧bepa tänȩji̧ri̧ pio judiro̧ ma̧i̧ dari̧ tänȩa̧ oaiä, ejaro cjiadirȩ. A a ma cjiadirȩ. Ado pio ji̧ri̧ ta̧rërequedejȩrȩ. Conȩda̧ oa cjiaji̧ri̧ oa darequedejȩrȩ.

⁸ Ja̧di tara bira̧requede cüdë. Jabechji̧ chjätärea̧ yürüparequedejȩrȩ judiro̧ ejichio ja̧ chja̧oerä cjo̧ro̧chea oa. Ado Ejito chiriri judiri go̧dü tänȩparequedejȩrȩ. Ado chiri chjadëräpȩ ju̧ri̧, chiri ana̧räpȩ ju̧ri̧ ano̧ mire cjo̧ro̧ tänȩparequedejȩrȩ jabëdiärea̧ decjiaräpȩ ju̧ri̧, jurarea̧ ji̧ra̧ri̧ yürümȩ chiriräpȩ ju̧ri̧. Aja̧, Cananeorë cjo̧ro̧mȩ chiri pio ju̧i̧, ititarë cjo̧ro̧mȩ chiri pio ju̧i̧, amoreorë cjo̧ro̧mȩ chiri pio ju̧i̧ yürüparequedejȩrȩ ca̧ pumȩ ji̧ri̧. Tjamo̧ davä. Pjerecheorë cjo̧ro̧mȩ chiri pio ju̧i̧, eveorë cjo̧ro̧mȩ chiri pio ju̧i̧ yürüparequedejȩrȩ, jebucheorë cjo̧ro̧mȩ chiri pio ju̧i̧.

⁹ Danȩ, ta̧rërequedejȩrȩ davä ca̧ pumȩ ji̧ri̧, icharaita pio ji̧ri̧. Pio coaiä cjo̧dë chjaoji̧ri̧ oa ta̧rërequedejȩrȩ. Ejichiorë conȩda̧ oa cjiaji̧ri̧ oa darequedejȩrȩ.

¹⁰ Ja̧di tara chjadürequedemȩ pjarao̧ pio ju̧i̧iäpȩ. Ejito chiriri pio judiri ëba go̧dütä earequedemȩ ca̧ pumȩ ji̧ri̧, icharaita pio ji̧ri̧ —yo̧mȩrȩ yo̧rëremȩdejȩ Moiche ju̧i̧ Ütë tjamo̧ judi.

¹¹ Ja̧dëa ji̧ Moiche judi dëbë yo̧rëremȩdejȩ Ütë tjamo̧ ju̧i̧: —Jabo cjäri̧ marequede. Pjarao̧ pio ju̧i̧iäpȩ järea̧mi̧dërequede. Ja̧di dari̧ japapea̧ ji̧ nötadërequede cüdë. Icharaita ji̧ri̧ Ejito chiriri judiri go̧dü tänȩpea̧ ji̧ nötadërequede.

¹² Jabo Ütë tjamo̧ judi dëbë yo̧a̧dejȩ Moiche ju̧i̧: —Danȩ, pio cüdë ëba cjiaparequedemȩ. Ado pio cüdë mȩa tjamo̧ri̧ chjadüa̧ pio ju̧i̧ chjiari na̧rȩpea̧ oa, jabechji̧ na̧rȩrea̧ yürüparequedemȩ. Danȩ, ji̧dë duri oa japamitë chjätä ëte, mȩnȩ icharaita pio ji̧ri̧ Ejito chiriri judiri ëba go̧düna̧ra̧rä, jabechji̧ pio yoa ya̧mi̧räpȩ cjiamȩrȩ chacjiamȩri̧ jo̧rȩtaparenȩque icharaita pio ji̧ri̧ nöta. Aja̧, ja̧di dari̧ na̧rȩparequedemȩ —yo̧mȩrȩ dëbë yo̧a̧dejȩ Moiche ju̧i̧ Ütë tjamo̧ judi.

¹³ Jabo Moiche judi dëbë yo̧a̧dejȩ: —Cjäri̧ marequede. Cüdë icharaita ji̧ri̧ yo̧rä judi, "Aja̧, dibëa̧ taru pio ji̧ri̧ ja̧ Ütë pio judi chjadüa̧ oa jana̧requede" yo̧rä judi, iëno̧ë ta̧rëpai̧ dadiro̧coe. "¿Yö̧ta quȩmȩde mȩa chjadüa̧mȩ Ütë judi?" yo̧ji̧ri̧rȩ iëno̧ë ta̧rëpai̧ dadiro̧coe. Ado judiro̧ ja̧di ta̧rëri̧ iëno̧ë ta̧rërä judi, '¿yö̧ta dëbë yo̧täremȩcjivaquë?’ quëna̧ jo̧rȩtarequede cüdë.

¹⁴ Ado ja̧dëa ji̧ Ütë tjamo̧ judi dëbë yo̧a̧dejȩ Moiche ju̧i̧: —Danȩ, CÜDËREQUEDE PIO JUDIREQUEDE CÜDË. Peaja̧di yo̧emȩrenȩ icharaita pio ji̧ri̧iäpȩmo̧. "CÜDËREQUEDE quȩmȩ pio judi chjadüa̧ oa jana̧requede" yo̧emȩrenȩjȩrȩ.

¹⁵ Ado ji̧dë uëri yo̧mȩrȩ a̧de yo̧a̧dejȩ Ütë tjamo̧ judi: —"Danȩ, Jeova judi, Ütë tjamo̧ pio judi chjadüa̧ oa jana̧requede" yo̧emȩrenȩjȩrȩ. "Ibëa̧ taru ja̧ Ütë pio judi, Abaraa̧ ja̧ Ütë pio judi chjadüa̧ oa jana̧requede. Tjamo̧ davä. Icha ja̧ Ütë pio judi, Jacobo ja̧ Ütë pio judi chjadüa̧ oa jana̧requede" yo̧emȩrenȩjȩrȩ. Aja̧, ja̧di ta̧rëri̧ yo̧emȩrenȩjȩrȩ icharaita ji̧ri̧. Danȩ, CÜDËREQUEDE quȩmȩrequede bucho ana̧ jiro quȩ oa chiadëpe bagarea̧ decjiari̧. Jabechji̧ quȩmȩrequede cüdë.

¹⁶ Ja̧di tara Moiche, jäta earequedemȩ Ejitoräpȩ. Ado ju̧ri̧pȩ go̧düdärä ëte, jabechji̧ a̧dopa tänȩjȩrȩ icharaita pio ji̧ri̧, tjamo̧ cjo̧ro̧ji̧ri̧ pio ji̧ri̧mo̧i̧. Ado mȩnȩ pio ji̧ri̧iäpȩmo̧ ni̧bä chjaoro ja̧di ta̧rëri̧ yo̧tä earequedemȩ: "Danȩrȩ, Jeova pio judi na̧rȩa̧dique. Dibëa̧ taru ja̧ Ütë pio judi, Abaraa̧ ja̧ Ütë pio judi, Icha ja̧ Ütë pio judi, Jacobo ja̧ Ütë pio judi na̧rȩa̧dique. Ado ja̧di ta̧rëri̧ yo̧mȩrȩ yo̧a̧dique: "Danȩrȩ, ana̧ri̧ jo̧rȩtarequedejȩrȩ icharaita ji̧ri̧. Daba darequedejȩrȩ. Ejichio judiro̧ pio ji̧ri̧iäpȩmo̧ ma̧i̧ dari̧ japea̧ pio ju̧i̧ daba darequede.

¹⁷ Ado Ejitoräpȩ conȩda̧ oa cjiachea oa, jabechji̧ go̧dü tänȩparequedejȩrȩ. Ado ja̧dëa ji̧ ado cja̧rȩmo̧ chiriräpȩ ano̧ mire cjo̧ro̧ tänȩparequedejȩrȩ. Aja̧, chiri chjadëräpȩ, jabëdiärea̧ decjiaräpȩ ano̧ mire cjo̧ro̧ tänȩparequedejȩrȩ, jurarea̧ ji̧ra̧räpȩ. Cananeorë cjo̧ro̧mȩ chiriräpȩ ju̧ri̧, ititarë cjo̧ro̧mȩ chiriräpȩ ju̧ri̧, amorerorë cjo̧ro̧mȩ chiriräpȩ pio ju̧ri̧ ano̧ mire cjo̧ro̧ tänȩparequedejȩrȩ. Pjererorë cjo̧ro̧mȩ chiriräpȩ ju̧ri̧, eveorë cjo̧ro̧mȩ chiriräpȩ ju̧ri̧, jebucheorë cjo̧ro̧mȩ chiriräpȩ pio ju̧ri̧ ano̧ mi̧re cjo̧ro̧ tänȩparequedejȩrȩ." Aja̧ Moiche, ja̧di ta̧rëri̧ yo̧tä earequedemȩ tjamo̧ cjo̧ro̧ji̧ri̧ pio ji̧ri̧iäpȩmo̧.

¹⁸ Ado danȩ, mȩnȩ pio ji̧ri̧ ni̧bä chjaoro, jabechji̧ ta̧rë ja̧bopadiro̧mȩ. Ado pio ji̧ri̧ nö̧ta ni̧bä chjaoa̧ duri oa, jabechji̧ Ejitoräpȩ cjo̧ro̧mȩ ütë pio ju̧i̧ goëdeparenȩjo̧ȩ pio ji̧ri̧ nöta. Ado ja̧di ta̧rëri̧ yo̧emȩrenȩjo̧ȩ pjarao̧ pio ju̧i̧iäpȩmo̧. "Danȩ ütë, Jeova judi, ebereo ja̧ Ütë pio judi dëbëdiäa̧diibe" yo̧emȩrenȩ. "Ja̧di tara yo̧rea̧ro̧mȩ ibë go̧dürea̧ yürütä chiri maearäpȩ, pumȩ decjiaräpȩ. Aja̧, tjarari̧ do nöta järea̧ jachi oa go̧dürea̧ yürüibe. Ado ju̧ri̧pȩ go̧düdäräa̧rä, jabechji̧ goe gu̧rori̧ yürüparea̧ro̧jo̧ȩ ibëa̧ Ütë oa, Jeova pio ju̧i̧." Aja̧, ja̧di ta̧rëri̧ yo̧tä earequedemȩ pjarao̧ pio ju̧i̧iäpȩmo̧.

¹⁹ Jabo danȩ, Ejitoräpȩ cjo̧ro̧mȩ ütë pio ju̧i̧ chjiari dabarequede jabo. Icharaita pio ji̧ri̧ go̧dürea̧ yürüdëpadejȩrȩ. Jabechji̧ cüdë ca̧ jauëchjara̧ ana̧ri̧ na̧rȩa̧rämo̧ go̧dürea̧ yürüpadejȩrȩ.

²⁰ Ja̧di tara ca̧ jauëchjara̧ pio ju̧ri̧ra̧ ana̧ri̧ na̧rȩparequedejȩrȩ Ejitoräpȩ cjo̧ro̧ji̧ri̧ pio ji̧ri̧. Uapai̧ dari̧ na̧rȩparequedejȩrȩ, gitoi̧ dari̧. Jabechji̧ ja̧di dari̧ na̧rȩa̧rämo̧ go̧dürea̧ yürüpadejȩrȩ pjarao̧.

²¹ Ado mȩnȩro̧ pio jiro chiriri go̧düro, jabechji̧ chjö̧na̧i̧ti̧ cjäri̧ ja̧boji̧ri̧rȩ go̧düdëpanȩrȩ jabo goaji̧ri̧rȩ go̧düpanȩrȩ. Jabechji̧ pio cüdë tänȩa̧ oaiä cjäri̧ri̧ cjia da mapadiro̧dibe ejichio judiro̧.

²² Ado danȩ, icharaita ivi jini̧ro̧ jibëa̧ bë queri̧räpȩ cjo̧ro̧ji̧ri̧ pio ji̧ri̧iä cjo̧dëpani̧ro̧jȩrȩ, ejichio ivi pio ji̧ri̧iä. Ado pio jibë nöta cjo̧ro̧ji̧ri̧ ivi pio ji̧ri̧iäbo cjo̧dëpani̧ro̧jȩrȩ. Dami̧ti̧ ba chia oa cjo̧dëpani̧ro̧jȩrȩ. Oro oa, chjibo oa, ta̧ra̧ märärea̧ oa, parata chiamȩ i̧a̧rea̧ oa cjo̧dëpani̧ro̧jȩrȩ, eami̧ti̧ oa. Ado pio jiro chjibora̧ ina̧ tänȩparenȩro̧jȩrȩ dibëa̧ u̧ri̧ ji̧ri̧. Pio jiro i̧a̧rea̧ oa i̧a̧ tänȩparenȩro̧jȩrȩ dibëa̧ jabi pio ji̧ri̧. Aja̧, ja̧di dari̧ japaji̧ri̧rȩ mitëpanȩrȩ ejichio ja̧remȩ oa judiro̧ bë maearë cjiadiäri̧ —yo̧mȩrȩ yo̧rëremȩdejȩ Moiche ju̧i̧iäpȩmo̧ Ütë tjamo̧ judi.