Go̧dürea̧ Ma̧ȩ 25 - Biblia Pume

Dëbëdiärea̧ jo̧ oa japapea̧ oa yürütä yo̧rëremȩde Jeova judi

¹ Ado jabë ya̧mi̧ uëräpȩ cjiamȩ oa ja̧di ta̧rëri̧ yo̧rëremȩdejȩ Moiche ju̧i̧ Jeova judi icharaita judiro̧ yürüpea̧ pio ju̧i̧ chjiari, dëbëdiärea̧ jo̧ oa cji̧däpea̧ oa yürüpea̧ pio ju̧i̧ chjiari:

² "Danȩ, icharaita judiro̧ pio coaiäpȩmo̧ yürütä earequedejȩrȩ. Jabechji̧ eami̧ pumȩ üdë, jënȩ yürürea̧ tararä judi, jabechji̧ yürütädique. Ja̧di ta̧rëri̧ yo̧jȩrȩ.

³ Ado judiro̧ yürütämi̧ cjiarä judi, jabechji̧ pio jiro oa yürütä earequedejȩrȩ. Oro oa, parata oa, boro̧che oa yürürea̧ tararä judi, yürütädiro̧coe.

⁴ Peaja̧di chjiboto cara oa, oveja cö̧ra̧ japea̧ chjiboto cara oa, tütüa oa yürürea̧ tararä judi, coëcoëa oa yürürea̧ tararä judi, peaja̧di yürütädiro̧coe. Ado dino quȩmȩ chjibo coto ba chia tjamo̧ oa, ado chivo cö̧ra̧ japea̧ chjiboto cara oa yürütämi̧ cjiarä judi, peaja̧di, yürütädiro̧coe jënȩro̧ jo̧rȩta̧mi̧.

⁵ Ado oveja üi̧ ja̧ iremȩ oa, coëcoëara̧ yu̧i̧ tänȩa̧ oa cjiamȩ iremȩ oa yürürea̧ tararä judi, ado eami̧ ja̧ iremȩ ba chia oa, acachia quȩmȩ to oa yürürea̧ tararä judi, peaja̧di yürütädiro̧coe.

⁶ Ado tataparea̧ yo̧ oa, gu̧ro tänȩrea̧ yo̧ra̧ goaeri̧ pjȩa̧mȩ mirerea̧ oa, ado peaja̧di goaeri̧ pjȩa̧mȩ cäarea̧ oa, goaeri̧ pjȩa̧mȩ cäarea̧ mechjaräpȩ cäapea̧ pio ju̧i̧ yürürea̧ tararä judi, peaja̧di yürütädiro̧coe.

⁷ Ado conarina quȩmȩ ta̧dë oa, dami̧ti̧ ta̧dë ba chia oa yürürä judi, peaja̧di chjadëde. Pio jiro ta̧dë üdë, o ji̧ri̧ chjiari tjamo̧ goë tuti ja̧bepamȩ pio ju̧i̧ ja̧ chjiboro cji̧däpea̧de. Jibëa̧ maito ina̧rea̧rä cji̧däpea̧de.

⁸ Danȩ, icharaita judiro̧ yürüpea̧ üdë, jabechji̧ ca̧ jo̧ oa cji̧däpea̧ maeade cüdë ji̧ri̧ ja̧ chjarerä bëpapea̧ oa.

⁹ Cüdë mȩa na̧rȩpea̧mi̧ cji̧däpea̧ maeade. Ado ca̧ jo̧ tjorä ja̧ üdë, peaja̧di cüdë mȩa na̧rȩpea̧mi̧ japapea̧ maeade." Aja̧, ja̧di ta̧rëri̧ yo̧mȩrȩ yo̧rëremȩdejȩ Moiche ju̧i̧ Ütë tjamo̧ judi.

Yo̧ë cji̧därea̧ ma̧ȩ chiamȩ to cjara pio ju̧i̧ chjiari yo̧rëremȩde Ütë tjamo̧ judi

¹⁰ Ado ji̧dë u̧i̧ yo̧mȩrȩ ja̧di ta̧rëri̧ a̧de yo̧rëremȩdejȩ Jeova judi ya̧mi̧ uëräpȩmȩ oa: "Acachia quȩmȩ tora̧ pio ju̧ri̧ra̧ to cjara oa japatä earequedejȩrȩ icharaita ji̧ri̧ cja̧rȩmȩ metro go̧a̧ti̧ oa, 10 centimetrora̧ a̧de. Ado 65 centimetro ana̧ oa japapea̧de. Ado 65 centimetro uë oa.

¹¹ Ado pio jiro to cjara oa chjadëri̧ ina̧tä earequedejȩrȩ oro chja maeara̧. Dairi pio judiri ina̧pea̧de tjoribo. Peaja̧di to cjara yuroti̧ oa cji̧dätä earequedemȩ oro jujuai̧ra̧.

¹⁷ Peaja̧di to cjara ina̧rea̧ ya oa japapea̧de, cjae ina̧rea̧ ya oa. Jabechji̧ to cjara pio ju̧i̧ chjadëri̧ tuti carapea̧ yade. Aja̧, oro chja maeara̧ japapea̧de. Cja̧rȩmȩ metro go̧a̧ti̧ oa japapea̧de, 10 centimetrora̧ a̧de. Ado 65 centimetro ana̧ oa cji̧däpea̧de. Ado pio jiro ina̧rea̧ ya uërä ju̧ri̧ goe üdë cjaräa̧ oa cjiapade pumȩ judiro̧ chjai̧dëri̧ japea̧ üdë cjae ina̧ oa cjiami̧ dari̧ cjiapea̧ oa. Aja̧, ja̧di dari̧ japatä earequedejȩrȩ cae ina̧rea̧ ya oa.

¹⁸ Ado peaja̧di yo̧a̧ri̧ oa japatä earequedejȩrȩ Jeovarë chamȩräpȩ jidaji̧ri̧ mu̧i̧tjoi̧mi̧ da oa. Mo̧ȩa̧ oa cjiamȩ orora̧ pio ju̧ri̧ra̧ japapea̧de.

¹⁹ Uëräpȩmo̧ cjiari̧ cji̧däpea̧de cjae ina̧rea̧ ya cotoro, cja̧ȩta̧ra̧ cotoribo. Ado jidaji̧ri̧ mu̧i̧tjoi̧mi̧ da pio judiro̧, ado cjae ina̧rea̧ ya üdë, jabechji̧ cja̧rȩmȩ codë oa cji̧däa̧ oa cjiapea̧de goë cji̧därea̧ decjiari̧.

²⁰ Ado danȩ, pio jiro jidaji̧ri̧ mu̧i̧tjoi̧mi̧ da pio judiro̧ dëbë cjiari̧ cji̧däpea̧de ëteräpȩmo̧ daji̧ri̧mi̧ dari̧. Ado pio ji̧ri̧ ja̧ pjö̧dato ja̧re cjia̧ chja̧oerä cjiapade cjae ina̧rea̧ ya üdë.

²¹ Ado to cjara pio ju̧i̧ japea̧ oa goarä, ca̧ ma̧ȩ chiapamȩ ta̧dë pjatë oa boeapea̧de. Tjamo̧ davä. Cüdë mȩa yürüpea̧ ta̧dë pjatë pio ju̧i̧, ca̧ ma̧ȩ chiapamȩ ta̧dë pjatë pio ju̧i̧ boaeparenȩ pio jiro cjararä. Ado ja̧dëa ji̧ tuti caraparenȩjo̧ȩ cjae ina̧rea̧ yara̧ pio ju̧ri̧ra̧.

²² Ado ja̧dëa ji̧ cüdë mȩa nöta dëbëdiärä, cüdë mȩa ma̧ȩ yürüpea̧ oa dëbëdiärä, jabechji̧ cjae ina̧rea̧ yarë chamȩräpȩ cjiamȩrȩ dëbëdiäparequedemȩ, yo̧ë cji̧däa̧ ma̧ȩ chiamȩ to cjararä ju̧ri̧. Aja̧, cjae ina̧rea̧ ya uëmo̧i̧ cjiamȩrȩ, jidaji̧ri̧ mu̧i̧tjoi̧mi̧ da chjarerä cjiamȩrȩ yürüparequedemȩ ca̧ ma̧ȩ chjö̧na̧i̧ oa icharaita ja̧ oa. "Aja̧, ja̧di ta̧rëri̧ yo̧mȩrȩ ni̧bä chjaorëremȩdejȩ Moiche ju̧i̧ Ütë tjamo̧ judi.

Chja̧pe chiamȩ mechja pio ju̧i̧ chjiari yo̧rëremȩde Ütë tjamo̧ judi

²³ Ado pio ju̧i̧ uëri a̧de yo̧rëremȩdejȩ Ütë tjamo̧ judi: "Danȩ, mechja japatä earequedejȩrȩ icharaita ji̧ri̧ acachia tora̧. 90 centimetro go̧a̧ti̧ oa, ado 45 centimetro ana̧ oa, ado 75 centimetro uë oa japatä earequedejȩrȩ.

²⁴ Oro chja maeara̧ ina̧tä earequedejȩrȩ. Ado mechja yuroti̧ oa, oro jujuai̧ra̧ cji̧dätä earequedejȩrȩ.

³⁰ Pio jiro mechja üdë arë cji̧däpea̧de yo̧ë cji̧däa̧ ma̧ȩ chiapamȩ cjara ja̧ dëbëräpȩ. Ado mechja üdë ji̧dë ma chiatäde chja̧pe oa ca̧ dëbëräpȩ." Aja̧, ja̧di ta̧rëri̧ yo̧mȩrȩ yo̧rëremȩdejȩ Moiche ju̧i̧ Jeova judi ya̧mi̧ uëräpȩmȩ oa.

Tataparea̧ chiamȩ to pio ju̧i̧ chjiari yo̧rëremȩde Ütë tjamo̧ judi

³¹ Ado ji̧dë u̧i̧ yo̧mȩrȩ yo̧rëremȩdejȩ Moiche ju̧i̧: "Danȩ, tataparea̧ chiamȩ to oa japatä earequedejȩrȩ icharaita ji̧ri̧ oro chja maeara̧, mo̧ȩa̧ oa cjiamȩ orora̧. Taru chamȩ üdë, ado taru cjiamȩ to üdë, ado a̧ üdë, ado chjacjiamȩparȩrea̧ chjuchjumi̧ da üdë, jabechji̧ mo̧ȩa̧ oa cjiamȩ oro maeara̧ japapea̧de cja̧rȩmȩ codë maeari̧.

³² Ado tjoro cjiamȩ tori pio judiri cjitëpade 6 a̧ üdë. Dëbëribo cjiari̧ cjitëpade. Cja̧ȩta̧ra̧ri cjitëpade tjarari̧ a̧ üdë. Ado cja̧ȩta̧ra̧ pënȩri pio judiri peaja̧di cjitëpade tjarari̧ a̧ üdë." Ja̧di ta̧rëri̧ yo̧mȩrȩ a̧de yo̧rëremȩdejȩ Moiche ju̧i̧ Ütë tjamo̧ judi.