Go̧dürea̧ Ma̧ȩ 2 - Biblia Pume

Ara̧ oa cjiarëremȩde Moiche judi

¹ Pio jiro japamitërä cja̧rȩmȩrȩ cjo̧ro̧rëremȩde ebereorë, Jacobo pio judiri ja̧mȩ judi, Devi pio judiri ja̧mȩ judi. Ado pio jiro üi̧ judi jibëa̧ iei̧ mitëmȩrȩ ëbarëremȩdejȩ, Devi pio judiri ja̧yi̧ iei̧ pio ji̧.

² Ado jibëa̧ iei̧ pio ji̧ ëba mo̧a̧ oaiä bo maiyi̧pea̧nȩ. Ado japamitë chjätä ëte ara̧nȩjȩ üi̧ boi̧ oa. 'Boi̧chji̧ üdë chjacjiamȩ tjamo̧dida' quëna̧ jo̧rȩtaji̧ri̧rȩ goadirëreji̧ri̧diro̧jo̧ȩ tjarari̧ gupënȩ nöta.

³ Jabo cjäri̧ madiro̧jo̧ȩ, tjarari̧ gupënȩ chjätä ëte chjadëri̧ goadirea̧ dadëa̧diro̧jo̧ȩ. Pio ju̧i̧iä udi taiomi̧ da oa, ana̧ chja oa aea̧nȩjȩ arayi̧ jini̧, cäricäria oa. Ado dairi pio judiri chjadëri̧ joa̧nȩjȩ ërami̧ dara̧. Aja̧, ui üdë tjoräpȩmo̧ acji yu̧a̧chea oa chjadëri̧ joa̧nȩjȩ. Ja̧dëa ji̧ Niro quȩmȩ bearäpȩ ju̧ri̧ mu̧i̧ pjurërëreyi̧nȩjȩ taio oa pada cärä chjarerä. Ado jibëa̧ boi̧chji̧ oa taioro cö̧a̧ ëte idë pjurëa̧nȩjȩ.

⁴ Ado boi̧chji̧ pio ju̧i̧ ja̧ jo̧ëra̧mi̧ pio jini̧ bea yuroräpȩ dae cjiayi̧rȩ goadi jidarëreyi̧nȩjȩ taioromȩ oa, jachi chja cjiayi̧rȩ.

⁵ Ja̧dëa ji̧ pjarao̧ jojabi pio jini̧ bearäpȩ go̧düdäräa̧nȩ ui choapea̧ oa. Ado jënȩ ui choa nöta jibëa̧ mu̧i̧tjoi̧ jini̧ro̧ tai̧rëreji̧ri̧ni̧rȩ bea yuroro. Ado ja̧dëa ji̧ pjarao̧ jojabi pio jini̧ chjaodëri̧ daea̧nȩjȩ taio oa pada cärä chjarerä pjurëmȩ oa. Ado chjadüa̧nȩjȩ jibëa̧ mu̧i̧tjoi̧ oa pio jȩaiäpȩ ida jana̧tä.

⁶ Ado taio oa areia̧ ji̧, ejaro cjiamȩ oa daea̧nȩjȩ boi̧chji̧ ju̧i̧. Ado cjäri̧ri̧ cjia daea̧nȩjȩ. Ado yo̧a̧nȩ: "Ebereo pio ji̧ri̧ ja̧ boi̧chji̧ jirodi."

⁷ Ja̧dëa ji̧ boi̧chji̧ ja̧ jo̧ȩra̧mi̧ pio jini̧ yo̧epea̧nȩjȩ pjarao̧ jojabi pio ji̧iäpȩmo̧. —Damȩ, boi̧chji̧ ju̧i̧ chjadëri̧ jidapea̧ oa, chjuchju yürüpea̧ oa, ebereo iei̧ ji̧ jätä ¿eadëmȩcoa?

⁸ Ado pjarao̧ jojabi jini̧ dëbë yo̧a̧nȩjȩ: —Dëdë, ea. Jäeno̧vä chjadëri̧ jidapayi̧ ji̧. Pio ju̧i̧iäyi̧rȩ jäeno̧a̧nȩjȩ joji̧ni̧ pio ji̧.

⁹ Ja̧dëa ji̧ jini̧ro̧ ado chjereno̧ jana̧ ji̧, pjarao̧ jojabi pio jini̧ yo̧a̧nȩjȩ joji̧ni̧ ji̧: —Jabechji̧ goa baävä boi̧chji̧ ju̧i̧. Chjadëri̧ jidaju̧i̧. Chjuchju yürüju̧i̧. Ado mȩnȩ jida̧ ba oa ba ano̧pacama̧ —yo̧yi̧rȩ yo̧rëreyi̧nȩjȩ boi̧chji̧ arayi̧ ji̧ pjarao̧ jojabi pio jini̧.

¹⁰ Ado boi̧chji̧ judi japamitë chjätä ëte, ütëchjai̧pe bagarëremȩde. Ado ütëchjai̧pea̧rä, jabë boi̧chji̧rä, jojini̧ jini̧ ëba baärëreyi̧nȩjȩ pjarao̧ jojabi pio ji̧iäpȩ. Ado jibëa̧ jami̧ da oa ütëparȩa̧nȩjȩ. Ado quȩpea̧nȩjȩ. Moiche quȩra̧ pio ju̧ri̧ra̧ quȩparëreyi̧nȩjȩ. Ado pjarao̧ jojabi pio jini̧, 'Aja̧, cüdë boi̧chji̧ ju̧i̧ uiri judiri go̧dü tänȩa̧ oaiä, jabechji̧ Moiche quȩra̧ pio ju̧ra̧ quȩpatäreyi̧cuni̧da' quëna̧ jo̧rȩtayi̧rȩ quȩparëreyi̧nȩjȩ.

Moiche judi goadi baärëremȩde Madiana quȩmȩ chiriräpȩ

¹¹ Moiche judi üi̧padäräa̧rä goëdaepea̧dejȩrȩ jibëa̧ pumȩ ji̧ri̧, ebereo pio ji̧ri̧. Ado irä darëremȩdejȩrȩ ejichio judiro̧ ma̧i̧ dari̧ tänȩa̧ oa cjiaji̧ri̧ oa. Mu̧i̧tjoi̧ mape baga̧ji̧ri̧ oa, gitoi̧ dari̧ ja̧bepe cjiaji̧ri̧ oa, a̧dë chjäte to̧bari̧ ja̧bepe cjiaji̧ri̧ oa darëremȩdejȩrȩ. Ado tai̧mȩrȩ daea̧dejȩ ejichio ju̧i̧ ebereo pio ju̧i̧ goae tarari̧ bidë cjaeämȩ oa, jibëa̧ pumȩ pio ju̧i̧ bide cjaeämȩ oa.

¹² Ado Moiche judi ejichio pio ju̧i̧ ja̧bo tänȩrea̧ jo̧rȩtamȩrȩ oëra̧ti̧ oa mire daeno̧a̧de. Ado eami̧ pumȩ oa dadëa̧ oaiä, jabechji̧ gu̧neno̧a̧dejȩ ejichio ju̧i̧. Ado chjaodëri̧ cjae na̧reno̧a̧dejȩ jibëa̧ icjara oa dabu nȩgȩ marä chjadëri̧ goadipea̧ oa.

¹³ Ado dopea̧rä, ado chjereno̧ goëdaepea̧dejȩrȩ jibëa̧ pumȩ ji̧ri̧. Ado tai̧mȩrȩ darëremȩdejȩrȩ yo̧a̧ri̧ oa japataji̧ri̧ oa. Ebereo pio ji̧ri̧ daea̧dejȩrȩ. Ado jibëa̧ pumȩ ju̧i̧iäpȩmo̧ chjai̧dëri̧ japea̧mȩ pio ju̧i̧ iëno̧ë ta̧rëa̧dejȩ: —¿Jabo tjana̧pea̧ oa goae tarari̧ bide cjaeärenȩjo̧ȩ na̧ pumȩ oa, ebereo oa?

¹⁴ Ado dëbë yo̧mȩrȩ yo̧a̧dejȩ: —¿Chjiacjivarenȩ mȩnȩ? ¿Chjiarë tänȩa̧ oa tjamo̧ yo̧mȩpea̧renȩ? ¿Chjiarë tänȩa̧ oa ibë ütaramȩpea̧renȩ? Ado ¿yö̧ta japaparenȩ yaba̧? Mȩnȩ pe judi ejichio pio ju̧i̧ ja̧bo tänȩa̧rea̧mi̧ ¿ja̧bo tänȩdëparenȩque yaba̧? —yo̧mȩrȩ dëbë yo̧a̧dejȩ Moiche ju̧i̧iäpȩmo̧. Ado Moiche judi pio ju̧i̧ ta̧rëa̧ oaiä, uapa tjamo̧pea̧de. Ado judi, 'Chia chia, cüdë pe judi goaditea̧ pio ju̧i̧ daba ma jirodiro̧da' quëna̧ jo̧rȩtamȩpea̧de.

¹⁵ Ado dëdë, pjarao̧ pio judiborë chjaodëri̧ ta̧rëmȩpea̧de Moicherë japea̧ pio ju̧i̧ chjiari. Ado pio ju̧i̧iä chjaodëri̧ chjadürëremȩdejȩrȩ jibëa̧ guadia ji̧ri̧ Moiche pio ju̧i̧ ja̧bo tänȩpea̧ ji̧. Jabo cjäri̧ madiro̧jo̧ȩ, ja̧bo tänȩrea̧ dadëa̧diro̧jo̧ȩ. Jabechji̧ Moiche judi chjaodëri̧ goadi a̧dë baäeno̧a̧ oaiä, eami̧ oa japarea̧ dadëa̧diro̧jo̧ȩ. Ado Moiche judi, jabechji̧ Madiana quȩmȩ chiriräpȩmo̧ goadi baärëremȩde pio ju̧ri̧pȩ ano̧ mire cjo̧ro̧pea̧ oa. Aja̧, do ji̧ra̧ri̧ chjätä ëte, Madiana quȩmȩ chiriräpȩ go̧düdärä ëte, Moiche judi chadärärëremȩde tade puë yuroro.

¹⁶ Ado pio jiro tade puëräpȩ ju̧ri̧ go̧düdärärëreji̧ri̧ni̧rȩ ivi jini̧ro̧, 7rë. Pio ji̧ri̧ ja̧ ama̧i̧ judi goë tuti cjo̧dëmȩrȩ ja̧beparëremȩde Ütë tjamo̧ pio ju̧i̧iä Madiana quȩmȩ chiriräpȩ cjo̧ro̧ji̧ri̧ pio ji̧ri̧ chjiari. Pio ju̧i̧ ja̧ jabi maearë go̧düdäräa̧ni̧rȩ. Jibëa̧ ama̧i̧ ja oveja buba oa chjadëri̧ jara tänȩpea̧ oa go̧düdäräa̧ni̧rȩ ui oa mu̧i̧ gatëpea̧ oa.

¹⁷ Jabo o judiro̧ go̧düdäräa̧rä, ado cja̧rȩmo̧ oveja buba oa jidaji̧ri̧ pio judiro̧borë tade puëräpȩ go̧düdäräa̧rä, baä tänȩtarëreji̧ri̧diro̧jȩrȩ ivi ji̧ri̧, jabo Moiche judi pio ji̧ri̧ chjiari tuti japea̧ oaiä, jabechji̧ baä tänȩrea̧ dadëa̧diro̧jȩrȩ. Ado ja̧di dari̧ japamȩrȩ chjadëri̧ a̧dorëremȩdejȩrȩ pio jiro ivi ji̧ri̧. Jibëa̧ oveja buba oa chjadëri̧ jara tänȩpea̧ oa a̧doa̧dejȩrȩ.

¹⁸ Ado ja̧dëa ji̧ ivi jini̧ro̧ jibëa̧ ama̧i̧ ju̧i̧iäpȩ baädäräa̧ji̧ri̧ ji̧ri̧ iëno̧ë ta̧rërëremȩdejȩrȩ jäja pio judi, ja̧di ta̧rëri̧ yo̧mȩrȩ: —Jabo chjaodëri̧ ma̧nȩno̧a̧nȩro̧. ¿Yö̧ta dari̧ japaji̧ri̧rȩ chjaodëri̧ ma̧narea̧ daea̧nȩro̧?

¹⁹ Ado jojabi jini̧ro̧ dëbë yo̧a̧ni̧ro̧jo̧ȩ: —Danȩ ama̧i̧, Ejitorimȩ üdë chjadëri̧ a̧doa̧diibe. Oveja jidaji̧ri̧ judiro̧ ibë baä tänȩtärea̧ ji̧, japarea̧ dadëa̧diro̧ibe ejitorimȩ judi chjadëri̧ a̧doa̧ oaiä. Chjadëri̧ a̧doa̧diibe. Ui oa mu̧i̧pea̧ ji̧ a̧doa̧diibe peaja̧di. Oveja bubarë jarapea̧ oa chjadëri̧ yürüa̧dejȩrȩ.

²⁰ Ado ju̧i̧ ta̧rëa̧ oaiä, jibëa̧ ama̧i̧ judi, Jetoro quȩmȩ pio judi iëno̧ë ta̧rëa̧dejȩrȩ: —Jabo pio jiro üi̧ judi, ¿tjana̧räpȩdi? ¿Tjana̧ ju̧i̧iä a̧dë ma̧na̧mȩnȩro̧ju̧i̧? Jäeno̧chji̧ju̧i̧. Ëna̧dieno̧chji̧ju̧i̧ judi jurera̧tä —yo̧a̧dejȩrȩ. Pio ju̧i̧iä jäeno̧a̧ni̧ro̧jo̧ȩ Moiche ju̧i̧. Ado jibëa̧ bëräpȩ jana̧mȩ oa jurarea̧ yürüa̧diro̧jo̧ȩ.

²¹ Ado Moiche judi, 'Chja jabechji̧, pio yi cjiadiätäremȩquëda, pio yi bëpatäremȩquëda' quëna̧ jo̧rȩtamȩrȩ cjo̧ro̧mȩpe bagarëremȩde Jetoro quȩmȩ ja̧ bëräpȩ. Ado japamitë chjätä ëte Jetoro pio judi yürürëremȩdejȩ jojabi pio ji̧, Chepjora quȩyi̧ pio ji̧. Aja̧, yürüa̧dejȩ jibëa̧ iei̧ ëbapea̧ oa.

²² Ado japamitë chjätä ëte ara̧nȩjȩ üi̧ boi̧chji̧ oa. Ado jäja pio judi quȩpea̧dejȩ. Gerecho quȩra̧ quȩpea̧dejȩ. "Tjaoë chiriräpȩ chjätäti̧ cjiamȩrȩ cjo̧ro̧requede" yo̧mi̧ ta̧rëri̧ yo̧mȩ quȩra̧ pio ju̧ri̧ra̧ quȩparëremȩdejȩ joja oa.

²³ Japamitë ana̧ chjätä ëte Ejitoräpȩ cjo̧ro̧mȩ ütë judi, pjarao̧ pio judi ja̧boa̧de. Jabo icharaita judiro̧ järätä chjaparea̧rea̧ datärea̧ ji̧, cjiatäcjiarea̧ datärea̧ ji̧, cjäri̧ madirȩ, cjatäcjiarea̧ dadëa̧dirȩ. Jabechji̧ mu̧i̧tjoi̧ maearë tjätjäpë ja̧bepe cjiaji̧ri̧rȩ cjo̧ro̧rëreji̧ri̧dirȩ, ma̧i̧ dari̧ conȩda̧ oa cjiaji̧ri̧rȩ. Ado pio ju̧i̧iä goë cjo̧dërëreji̧ri̧diro̧jo̧ȩ Ütë tjamo̧ ju̧i̧iä pio jibë a̧dotä.

²⁴ Ado Ütë tjamo̧ judi ta̧rërëremȩdejȩrȩ. Aja̧, jënȩ Abaraa̧ ju̧i̧iäpȩmo̧ yo̧rërea̧ ma̧ȩ pio ju̧i̧ jo̧rȩtamȩrȩ ta̧rërëremȩdejȩrȩ. Ado jënȩ Icha ju̧i̧ yo̧rërea̧ ma̧ȩ pio ju̧i̧, jënȩ Jacobo ju̧i̧ yo̧rërea̧ ma̧ȩ pio ju̧i̧bo jo̧rȩtamȩrȩ ta̧rëa̧dejȩrȩ.

²⁵ Jabomo̧ ta̧rëdëa̧dejȩrȩ jabo darëremȩdejȩrȩ peaja̧di. Bücjüri̧ cjiamȩrȩ daea̧dejȩrȩ. Conȩda̧ oa cjo̧ro̧ji̧ri̧ oa, tjätjäpë ja̧bepe cjiaji̧ri̧ oa, pjarao̧ ja̧ mu̧i̧tjoi̧ maea oa cjo̧ro̧ji̧ri̧ oa darëremȩdejȩrȩ icharaita ji̧ri̧.