Go̧dürea̧ Ma̧ȩ 13 - Biblia Pume

Yabo ara̧ pio ji̧ri̧ chjiari yo̧rëremȩde Ütë tjamo̧ judi

¹ Ja̧dëa ji̧ Jeova judi yo̧rëremȩdejȩ Moiche ju̧i̧:

² "Danȩ, Icharaita judiro̧, yabo ara̧ pio judiro̧ ütëborë ca̧ea̧ madiro̧quȩ. Ado mȩnȩro̧ goa̧ üdë, yabo ara̧ üdë, baca üdë, oveja üdë, chivo üdë peaja̧di ca̧ea̧ maeade. Ado pio ju̧i̧iä china̧chjari̧ tutitä earequededibe yabo ara̧ ütëbo oa ca̧ea̧ mapea̧ tara." Ja̧di ta̧rëri̧ yo̧mȩrȩ yo̧rëremȩdejȩ Moiche ju̧i̧ Ütë tjamo̧ judi.

Pjuru chiadëmȩ chja̧pe oa juraji̧ri̧rȩ a̧doparea̧ pio ju̧i̧ chjiari yo̧rëremȩde Ütë judi

³ Ado Moiche judi yo̧rëremȩdejȩrȩ icharaita ji̧ri̧: "Danȩrȩ, pio yoa do üdë ji̧dë ma jo̧rȩtapea̧de. Danȩrȩ, pio yaba̧ domȩ üdë Jeova judi chjadëri̧ go̧dü tänȩa̧didibe jibëa̧ ju chiarea̧ra̧ pio ju̧ri̧ra̧. Tjamo̧ davä. Mȩnȩro̧ mu̧i̧tjoi̧ maearë gito ana̧ri̧ ja̧bepe chjaorërea̧ ji̧, jabechji̧ Ejito chiriri pio judiri chjadëri̧ go̧dü tänȩa̧didibe. Ja̧di tara chjadëri̧ jo̧rȩtachji̧vä pio yoa do oa. Ado pjuru chiamȩ chja̧pe oa, jabechji̧ juradëchji̧vä.

⁴ Danȩrȩ, pio yaba̧ domȩ oa yabo baämȩ gupënȩrä, Ejito chiriri pio judiri go̧düa̧nȩrȩ, Abibi quȩmȩ gupënȩrä. Aja̧, jare chjadümi̧ dari̧ go̧dü tänȩa̧didibe.

⁵ Ado pio ju̧i̧iä mȩnȩro̧ dibëa̧ chiriräpȩ cjo̧ro̧ji̧ri̧pea̧rä, jabechji̧ chjadëri̧ jo̧rȩtapea̧ oa a̧dopapanȩrȩ pio yoa gupënȩrä uipamȩ nöta. Danȩrȩ, Jeova judi chiri chjadë oa yürüpea̧ pio ju̧i̧ chjiari jabërä yo̧rëremȩdejȩrȩ dibëa̧ ütëti̧ ji̧ri̧. Aja̧, cananeorë cjo̧ro̧mȩ chiri pio ju̧i̧, jebucheorë cjo̧ro̧mȩ chiri pio ju̧i̧, amoreorë cjo̧ro̧mȩ chiri pio ju̧i̧, eveorë cjo̧ro̧mȩ chiri pio ju̧i̧, ititarë cjo̧ro̧mȩ chiri pio ju̧i̧ yürüpamȩrȩ ma̧ȩ yürürëremȩdejȩrȩ dibëa̧ ütëti̧ pio ji̧ri̧. Ado danȩrȩ, mȩnȩro̧ pio jiro chiri chjadë oa mitëa̧rä, jurarea̧ ji̧ra̧ri̧ yürümȩ chiri oa mitëa̧rä, jabechji̧ uipamȩ nöta pio jiro gupënȩrä a̧dopapanȩrȩ pio jiro do oa jo̧rȩtapea̧ oa.

⁶ Aja̧, pjuru chiadëmȩ chja̧pe maea oa juraji̧ri̧rȩ a̧dopapanȩrȩ 7 do nöta. Ado 6 do chjätä ëte cjiadiärea̧ doro, ji̧ra̧ri̧ juraji̧ri̧rȩ a̧dopapanȩrȩ Jeova pio ju̧i̧iäpȩmo̧ chjacjiamȩri̧ jo̧rȩtapea̧ oa.

⁷ Tjamo̧ davä, 7 do nöta, jabechji̧ pjuru chiadëmȩ chja̧pe maea oa jurapanȩrȩ. Pio jiro do nöta, jabechji̧ dibëa̧ chirirä pjuru chiaparȩrea̧ decjiari̧ a̧dopapanȩrȩ.

⁸ Ado ja̧dëa ji̧ pio jiro doro mȩnȩro̧ pearä tarupë a̧doparä, jabechji̧ ja̧di ta̧rëri̧ yo̧eji̧ri̧renȩro̧jȩrȩ dibëa̧ u̧ri̧ ji̧ri̧. 'Aja̧, a̧ro̧rȩ Ejito chiriri judiri go̧düa̧ ji̧, ana̧ri̧ tuti japarëremȩde Jeova judi pio ibë chjiari. Ado pio ju̧i̧iä ja̧di dari̧ japaji̧ri̧rȩ a̧doparea̧rȩ.' Aja̧, ja̧di ta̧rëri̧ yo̧eji̧ri̧renȩro̧jȩrȩ dibëa̧ u̧ri̧ pio ji̧ri̧.

⁹ Ado danȩrȩ, mȩnȩro̧ uipamȩ nö̧ta ja̧di dari̧ a̧dopapea̧ üdë, jabechji̧ na̧rȩrea̧mi̧ dari̧ cjiadiäpadidibe pio dibëiäpȩmo̧. Jabechji̧ dibëa̧ ichi juro, dibëa̧ daitoro go̧ȩ chiami̧ dari̧ cjiadiäpadidibe. Aja̧, ja̧di dari̧ a̧dopapea̧ üdë chjadëri̧ jo̧rȩta tänȩpadidibe Jeova ja̧ ma̧ȩ pio ju̧i̧ ji̧dë ma ni̧bä chjaopea̧ oa. Jabechji̧ pio judide davä, dibë Ejito chiriri pio judiri go̧dü tänȩa̧mȩ judi. Jibëa̧ ju chiarea̧ ana̧ra̧ pio ju̧ri̧ra̧ chjadëri̧ go̧dü tänȩa̧didibe.

¹⁰ Ja̧di tara uipamȩ nöta, ütara̧ doro ja̧di dari̧ a̧dopapanȩrȩ ma̧ chiadëri̧ cjiaji̧ri̧rȩ." Aja̧, ja̧di ta̧rëri̧ yo̧mȩrȩ ma̧ȩ yürürëremȩdejȩrȩ icharaita ji̧ri̧ Moiche judi.

Yabo ara̧ oari judiro̧ gatëpea̧ maeadirȩ

¹¹ Ado Moiche judi ji̧dë u̧i̧ yo̧mȩrȩ a̧de yo̧rëremȩdejȩrȩ icharaita ji̧ri̧: "Danȩrȩ, Jeova judi dibëa̧ ütëti̧ ji̧ri̧ yo̧rërea̧ chiriräpȩ ju̧ri̧ chjadëri̧ go̧düdärä tänȩpadidibe, cananeorë cjo̧ro̧mȩ chiriräpȩ ju̧ri̧. Ado mȩnȩro̧ pio ju̧ri̧pȩ go̧düdäräa̧rä,

¹² jabechji̧ mȩnȩro̧ yabo nö̧ria̧ oari ütëbo oa china̧chjari̧ tutipea̧ chianȩrȩ Jeova ja̧ oa. Jabechji̧ pio ju̧i̧ ja̧ maeadirȩ. Ado mȩnȩro̧ goa̧ üdë, yabo ara̧ oari chjö̧na̧i̧rȩ, peaja̧di pio ju̧i̧ ja̧ maeade. Peaja̧di china̧chjari̧ tutipea̧ maeade baca üdë, oveja üdë, chivo üdë.

¹³ Jabo buro oa, yabo ara̧ üi̧ pio ju̧i̧ ado chejreno̧ mitëtämi̧ cjiarä judi, jabechji̧ gatëparenȩro̧jo̧ȩ Jeova pio ju̧i̧iä. Ovejara̧ gatëparenȩro̧jo̧ȩ. Oveja oa goe gu̧rori̧ ano̧ mire ja̧bo tänȩa̧ oaiä, jabechji̧ dibëa̧pade buro üdë. Jabo buro oa gatëdëri̧ cjiarä judi, jabechji̧ gürü ju oa yarëpea̧de ado ja̧di. Ja̧bo tänȩpea̧de. Ado dibëa̧ ja üdë, yabo ara̧ ja pio judi, peaja̧di gatëpea̧de Jeova pio ju̧i̧iä.

¹⁴ Ado danȩrȩ, ji̧dë duri oa japamitë chjätä ëte, dibëa̧ u̧ri̧ judiro̧ pio dibëiä iëno̧ë ta̧rërä judi, 'Ama̧i̧, ¿tjana̧pea̧ oa ja̧di dari̧ japarenȩ?' iëno̧ë ta̧rërä judi, jabechji̧ ja̧di ta̧rëri̧ dëbë yo̧parenȩro̧jȩrȩ: 'Danȩ ca̧ ja, Jeova judi jibëa̧ ju chiarea̧ ana̧ra̧ chjadëri̧ go̧dü tänȩrëremȩdiibe Ejito chiriri pio judiri, a̧ro̧rȩ mu̧i̧tjoi̧ maearë cjo̧ro̧rërea̧ chiriri pio judiri.

¹⁵ Ado pjarao̧ judi ibë go̧dü tänȩdëri̧ cjiarërea̧ oaiä, Moiche pio ju̧i̧ chjuari̧ jiadarërea̧ oaiä, jabechji̧ Jeova judi ja̧bo tänȩrëremȩdejȩrȩ Ejitoräpȩ cjo̧ro̧ji̧ri̧ oa ütëbo oa, yabo ara̧ pio ji̧ri̧. Aja̧, pumȩ pio ji̧ri̧ ja̧bo tänȩrëremȩdejȩrȩ. Ado jënȩro̧ goa̧ pio ji̧ri̧bo ja̧bo tänȩrëremȩdejȩrȩ baca oa, oveja oa, chivo oa. Ado pio ju̧i̧iä yaba̧, a̧ro̧rȩ goa̧ pio ji̧ri̧ peaja̧di goe gu̧rori̧ cäë yürü marea̧ro̧jo̧ȩ yabo ara̧ pio ji̧ri̧ Jeova pio ju̧i̧iäpȩmo̧. Tjamo̧ davä. Baca ji̧ri̧, oveja ji̧ri̧, chivo ji̧ri̧ goe gu̧rori̧ cäë yürürea̧ro̧jo̧ȩ yabo ara̧ oari̧ pio ji̧ri̧. Jabo ibëa̧ u̧ri̧ judiro̧, a̧ro̧rȩ nö̧ria̧ pio judiro̧ ja̧bochea oa, yabo ara̧ oari pio judiro̧ ja̧bochea oa, jabechji̧ gatëmi̧ dari̧ gatërea̧ro̧jȩrȩ Jeova pio ju̧i̧iä oveja oa ja̧bo tänȩa̧ oaiä. Tjamo̧ davä. Oveja oa goe gu̧rori̧ ja̧bo tänȩa̧ oaiä, gatërea̧mi̧ dari̧ gatërea̧ darea̧ro̧jȩrȩ Jeova pio ju̧i̧iä' yo̧ji̧ri̧rȩ yo̧panȩrȩ dibëa̧ u̧ri̧ pio ji̧ri̧iäpȩmo̧ judiro̧ pio dibëiä iëno̧ë ta̧rërä judi.

¹⁶ Ja̧di tara yo̧requededibe. A̧ro̧rȩ ja̧di dari̧ japea̧ üdë, jabechji̧ na̧rȩrea̧mi̧ dari̧ cjiadiäpade ibë chjadëri̧ jo̧rȩta tänȩpea̧ oa. Aja̧, ichi juro go̧ȩ chiami̧ dari̧, ibëa̧ daitoro go̧ȩ chiami̧ dari̧ cjiadiäpadiibe ibë chjadëri̧ jo̧rȩta tänȩpea̧ oa. Aja̧, Jeova judi ibë Ejito chiriri pio judiri jibëa̧ ju chiarea̧ ana̧ra̧ pio ju̧ri̧ra̧ go̧dü tänȩrërea̧ pio ju̧i̧ jo̧rȩtapea̧ oa chjadëri̧ jo̧rȩta tänȩpadiibe" yo̧mȩrȩ yo̧rëremȩdejȩrȩ icharaita ji̧ri̧ Moiche judi.

Ütë tjamo̧ judi chjadëri̧ ëba baärëremȩdejȩrȩ icharaita ji̧ri̧

¹⁷ Pjarao̧ judi icharaita ji̧ri̧ Ejito chiriri pio judiri go̧dü tänȩrërea̧ ji̧, Ütë tjamo̧ judi no̧ tjamo̧i̧ ëba baädëa̧dejȩrȩ. Pjiriteo quȩji̧ri̧ pio ji̧ri̧ ja̧ chiriräpȩmo̧ baärea̧ no̧ tjamo̧i̧ oa ëba baädëa̧dejȩrȩ. 'Aja̧, icharaita judiro̧ ano̧ mire jo̧rȩtapai̧ dadiro̧da, Ejitoräpȩ ado chjereno̧ baäpai̧ dadiro̧da, jibë acji jäpaji̧ri̧ pio ji̧ri̧ dëbëpe chjaodëri̧ cjia oaiä ado chjereno̧ baäpai̧ dadiro̧da' quëna̧ jo̧rȩtarëremȩde Ütë tjamo̧ judi.

¹⁸ Ja̧di tara oëra̧ ëba baärëremȩdejȩrȩ no̧dëmo̧. Chiri maearäpȩ chjätä tänȩrëremȩdejȩrȩ ui coëcoëaräpȩmo̧. Ado icharaita judiro̧ guadiami̧ dari̧ baärëreji̧ri̧dirȩ, gu̧na̧rea̧ araji̧ri̧rȩ.

¹⁹ Ado Moiche judi tänȩ oa, goa baärëreji̧ri̧diro̧jo̧ȩ Joche pio ju̧i̧rea̧ ja̧ icjararemȩ oa, pio ju̧i̧rea̧ ja̧ juremȩ oa. Jabë ja̧bodëa̧rä, Joche judi yo̧rëremȩdejȩrȩ jibëa̧ pumȩ ji̧ri̧: "Danȩrȩ, Ütë tjamo̧ judi dibë Ejito chiriri judiri go̧dü tänȩa̧rä, jabechji̧ ca̧ icjararemȩ pio ju̧i̧ chjadëri̧ goa baätä earequededibe." Ado judi ja̧di ta̧rëri̧ yo̧rërea̧ oaiä, jabechji̧ goa baäa̧diro̧jo̧ȩ.

²⁰ Icharaita judiro̧ Chucote quȩmȩ chiriri pio judiri go̧düji̧ri̧rȩ go̧düdärärëreji̧ri̧dirȩ Etama̧ quȩmȩräpȩ, jënȩro̧ mo̧a̧pea̧räpȩ, chiri maea yuroropȩ.

²¹ Ado Jeova judi chjadëri̧ na̧rȩmȩrȩ yabo ëba baärëremȩdejȩrȩ. Doro go̧a̧ra̧ ë jujuarä, uëräpȩmo̧ cjiamȩ go̧a̧ra̧ ërä cjiamȩrȩ ëba baärëremȩdejȩrȩ. Ado gȩnȩrä, cjo̧dë gärimȩrä, jujuarä, uëräpȩmo̧ cjiamȩ gärimȩrä cjiamȩrȩ ano̧ mire ëba baärëremȩdejȩrȩ judiro̧ darea̧mi̧ dari̧, gȩnȩräbo baärea̧mi̧ dari̧. Aja̧, ja̧di dari̧ na̧rȩmȩrȩ yabo ëba baärëremȩdejȩrȩ Jeova judi, jënȩro̧ baäpea̧ tjamo̧i̧.

²² Ado go̧a̧ra̧ ë üdë, jabechji̧ icharaita ja̧ yaboi̧ cjiamȩrȩ baärëremȩde do nöta. Ado gärimȩ üdë, peaja̧di gȩnȩ nöta jibëa̧ yaboi̧ cjiamȩrȩ baärëremȩde.