Go̧dürea̧ Ma̧ȩ 11 - Biblia Pume

Yaboji̧ri̧ pio ji̧ri̧ ja̧bo tänȩrëremȩdejȩrȩ Ütë tjamo̧ judi

¹ Ja̧dëa ji̧ Jeova judi yo̧rëremȩdejȩ Moiche ju̧i̧: —Danȩ, pio yoamo̧ conȩdarea̧ oa chjadüpareconȩ pjarao̧ ju̧i̧. Pio yoamo̧ co bape chjaoparequedejȩrȩ ejichio ji̧ri̧. Ado cüdë ja̧di dari̧ japa ëte, jabechji̧ go̧dürea̧ yürüpadidibe pjarao̧ judi. Aja̧, jëreea tjamo̧mȩrȩ go̧dü tänȩno̧padidibe jo̧ȩra̧pe baäpea̧ oa.

² Jabo danȩrȩ, yo̧chji̧jȩrȩ icharaita ütëbodärä oa yaba̧. Jabechji̧ ejichio pio ji̧ri̧iä cjo̧dëtädiro̧jȩrȩ dami̧ti̧ oa. Aja̧, parata oa, oro oa cjo̧dëtädiro̧jȩrȩ jibëa̧ bë queri̧ cjo̧ro̧ji̧ri̧ pio ji̧ri̧iä.

³ Ado Jeova pio judi tänȩa̧ oa, jabechji̧ ejichio judiro̧ cjäri̧ri̧ cjia tjamo̧ darëreji̧ri̧diro̧jȩrȩ icharaita pio ji̧ri̧. Ado pjarao̧ ju̧i̧ a̧doji̧ri̧ pio judiro̧ ba chia darëreji̧ri̧diro̧jo̧ȩ Moiche ju̧i̧. Jabechji̧ ejichio judiro̧ ütëborë ba chia da marëreji̧ri̧diro̧jo̧ȩ, pio ju̧i̧ uape uape daji̧ri̧rȩ.

⁴ Ado ja̧dëa ji̧ Moiche judi Jeova pio ju̧i̧iä ta̧rë ëte, jabechji̧ ado chjereno̧ yo̧epea̧dejȩ pjarao̧ ju̧i̧. Ado pio ju̧i̧ damȩrȩ ja̧di ta̧rëri̧ yo̧rëremȩdejȩ: —Ja̧di ta̧rëri̧ yo̧de Jeova judi: "Pio yaba̧ gȩnȩ tjomo̧ro, Ejito chiri nötai̧därä oa chjätäparequede.

⁵ Ado ejichio ja̧ u̧ri̧ pio ji̧ri̧, yabo ara̧ ütëbodärä oa ja̧bo tänȩparequedejȩrȩ, oari maea oa. Pjarao̧ pio ju̧i̧ ja̧ ja yabomȩ oa, ano̧ mire ütëpamȩ pio ju̧i̧ ja̧bo tänȩpareconȩ, mu̧i̧tjoi̧ pio ju̧i̧ ja̧ ja yabomȩbo, tirigo cho oa jademȩ pio ju̧i̧ ja̧ jabo. A̧dë chiquirea̧ decjiari̧ ja̧bo tänȩparequedejȩrȩ ütëbodärä oa. Baca yabo ara̧borë ja̧bopade oveja yabo ara̧borë. Ja̧di maeari̧ ja̧bopadirȩ yabo ara̧ chjö̧na̧i̧rȩ.

⁶ Ado Ejito chiri nötai̧ oa gito ana̧ri̧ jo̧rȩtaji̧ri̧rȩ ejaro cjia mapadirȩ, ma̧i̧ dari̧ gürë eaji̧ri̧rȩ. Yabo ara̧ oa cjiaremȩ pumȩrea̧ üdë ja̧boa̧ oaiä ana̧ri̧ ejaro cjiapadirȩ. Pumȩrȩ cja̧rȩmȩ co ja̧di dari̧ ejaro cjiamȩ oa ta̧rëdërërea̧de. Ado judiri ta̧rëdëpea̧de peaja̧di.

⁷ Jabo icharaita judiro̧, jabechji̧ ejaro cjiadëpadirȩ. Eami̧ oa japadëpadejȩrȩ. Jabechji̧ gürë earea̧ decjiari̧ cjiapade cjapi maeari̧. Aure cja̧rȩmȩrȩ icharaita ju̧i̧ chjuapatärea̧ ji̧, mau mapade. Ado baca oa, oveja oa chjuapatärea̧ ji̧, japadëpade. Ja̧di dari̧ japapade Jeova judi mȩnȩ chjadëri̧ dabapea̧ oa. 'Aja̧, icharaita pio ji̧ri̧ tjaoëpai̧ dari̧ cjiaji̧ri̧ oa dadiji̧ri̧da, ejichio pio ji̧ri̧ dami̧ dadëdiji̧ri̧da, jabo tutia̧rä cjiami̧ dari̧ cjiaji̧ri̧ oa dadiji̧ri̧da' quëna̧ dabapea̧ oa na̧rȩpadimȩ.

⁸ Ado danȩrȩ, Ejitoräpȩ tjamo̧ yo̧ji̧ri̧ pio judiro̧ ütëborë, pio mȩa a̧doji̧ri̧ pio judiro̧, ca̧ dëbëräpȩ juchatura̧ tjätjäpë china̧däräji̧ri̧rȩ cjo̧dëpadiro̧coe cüdë icharaita pio ji̧ri̧ nöta jo̧ȩra̧pe baätä. Aja̧, judiro̧ ja̧di dari̧ cjo̧dëa̧rämo̧ pio yoa chiriri go̧düparequede" —yo̧mȩrȩ yo̧rëremȩdejȩ pjarao̧ pio ju̧i̧ Moiche judi. Ado ja̧di ta̧rëri̧ yo̧ ëte, jabechji̧ ërecjia tjamo̧mȩrȩ go̧dürëremȩde Moiche judi pjarao̧ ja̧ bëri pio judiri.

⁹ Ado ji̧dë duri oa Jeova judi ado yo̧rëremȩdejȩ Moiche ju̧i̧: —Danȩ, pjarao̧ judi tjamo̧ri̧ ta̧rë ja̧bodëpadimȩ. Jabo jabechji̧de jabo. Judi ji̧dë ma chjuari̧ jiada̧ pio oaiä, jabechji̧ ca̧ jauëcha pio ju̧i̧ ji̧dë u̧i̧ ana̧ri̧ na̧rȩrea̧ daparequede Ejito chiriräpȩ —yo̧mȩrȩ yo̧a̧dejȩ Moiche ju̧i̧ Jeova judi.

¹⁰ Moiche judi, Aro̧borë jauëchja cjiari̧ na̧rȩ chjaorëreji̧ri̧diro̧jo̧ȩ pjarao̧ ju̧i̧. Ji̧ra̧ra̧ na̧rȩ chjaorëreji̧ri̧diro̧jo̧ȩ. Jabo cjäri̧ made. Chjuari̧ jiada̧dejȩrȩ. Jeova pio judi tänȩa̧ oa chjuari̧ jiadarëremȩdejȩrȩ. Ado pio ju̧i̧iä go̧dürea̧ yürüdëa̧dejȩrȩ icharaita ji̧ri̧. Ji̧dë ma chjuari̧ jiadarëremȩde.