Go̧dürea̧ Ma̧ȩ 10 - Biblia Pume

Tagara oa chjadürëremȩdejȩrȩ Jeova judi

^1-2 Ja̧dëa ji̧ Jeova judi yo̧rëremȩdejȩ Moiche ju̧i̧: —Danȩ Moiche, chjuari̧ jiada tänȩa̧reconȩ pjarao̧ ju̧i̧, pio jȩa a̧doji̧ri̧ pio ji̧ri̧bo. Jabechji̧ chjuari̧ jiada tänȩa̧requedejȩrȩ ca̧ jauëchja pio ju̧i̧ ana̧ri̧ na̧rȩpea̧ oa. Aja̧, ja̧di dari̧ japea̧requedejȩrȩ mȩnȩ na̧ u̧ri̧ pio ji̧ri̧, na̧ jadama̧i̧ pio ji̧ri̧ chjadëri̧ ni̧bä chjaopea̧ oa, cüdë ejichio pio ji̧ri̧iäpȩmo̧ ma̧i̧ dari̧ japea̧ pio ju̧i̧ chjiari ni̧bä chjaopea̧ oa. Aja̧, ca̧ jauëchja oa uapai̧ dari̧ na̧rȩa̧ pio ju̧i̧ chjiari, ca̧ jauëchja oa ana̧ri̧ na̧rȩa̧ pio ju̧i̧ chjiari, cüdë ejichio pio ji̧ri̧ japëtaraji̧ri̧mi̧ dari̧ cjia tänȩa̧ pio ju̧i̧ chjiari ni̧bä chjaoparenȩjȩrȩ na̧ jadama̧i̧ pio ji̧ri̧. Ado mȩnȩro̧ ütëborë, 'Aja̧, Jeova pio judimo̧dida' quëna̧ daba maparenȩro̧coe. Ado yaba̧, goëdejo̧ȩ pjarao̧ ju̧i̧. Ado goëdejo̧ȩ. Ado cüdë yo̧pea̧mi̧ yo̧jo̧ȩ. Jabo ta̧rë ja̧bodëpadimȩ.

³ Ja̧di tara Moiche judi, Aro̧borë goëdepea̧diro̧jo̧ȩ pjarao̧ ju̧i̧. Ado ja̧di ta̧rëri̧ yo̧a̧diro̧jo̧ȩ: —Danȩ pjarao̧, Jeova judi, ebereo pio ji̧ri̧ ja̧ Ütë pio judi ja̧di ta̧rëri̧ yo̧dimȩ: "¿Napai̧ japamitë jiade chjaoparenȩque? ¿Na̧parä ta̧rëdiäparenȩque? Jabechji̧ go̧dürea̧ yürüjȩrȩ ca̧ pumȩ ji̧ri̧ judiro̧ pio coaiäpȩmo̧ chjacjiamȩri̧ jo̧rȩtapea̧ oa.

⁴ Jabo ca̧ pumȩ ji̧ri̧ go̧dürea̧ yürüdërä judi, jaco chjadüparequede tagara oa na̧ chiri oa.

⁵ No̧i̧dë tjamo̧ oa chjadüparequede dabu oa darea̧mi̧dëri̧ china̧ri̧. Danȩ, ui choco chacharë gu̧ro tänȩa̧rea̧ o pio ju̧i̧ bae jurapadejȩ tagara üdë, jurarea̧ cjiadiädëri̧. Chirirä cjo̧ro̧mȩ to pio ju̧i̧bo bae jurapadejȩ.

⁶ Ado na̧ bëräpȩ acji yu̧a̧padirȩ peaja̧di. Mȩa a̧doji̧ri̧ ja̧ bëräpȩ, ejichio ja̧ bëräpȩ acji yu̧a̧padirȩ no̧i̧dë tjamo̧rȩ. Na̧ ama̧i̧ judiro̧ ji̧ra̧ tjamo̧ oa cja̧rȩmȩ co dadërërea̧ ji̧, na̧ jadama̧i̧ judiro̧ ji̧ra̧ tjamo̧ oa cja̧rȩmȩ co dadërërea̧ ji̧, chjadüparequede davä tagara oa, a̧dë chjäte ji̧ra̧ oa. Ado ja̧di ta̧rëri̧ yo̧ ëte Moiche judi mȩmȩrȩpae cjiadiämȩrȩ go̧dürëremȩde pjarao̧ ja̧ bëri pio judiri.

⁷ Ado pjarao̧ ju̧i̧ a̧doji̧ri̧ pio judiro̧ iëno̧ë ta̧rëa̧diro̧jo̧ȩ: —Jabo danȩ ütë, pio yodëje jana̧diädiibe. ¿Na̧pai̧rä yuro chjai̧dëri̧ jape chjaopadiibe? Chja jabechji̧ go̧dürea̧ yürütäremȩrenȩjȩrȩ icharaita ji̧ri̧. Jibëa̧ Ütë pio ju̧i̧, Jeova quȩmȩ Ütë pio ju̧i̧ chjacjiamȩri̧ jo̧rȩtapea̧ oa go̧dürea̧ yürütäremȩrenȩjȩrȩ. Danȩ ütë, ¿dabadënȩ chiri pio ju̧i̧ chjiari? Danȩ, Ejito chiri üdë chjadëdë tjamo̧pe baga̧de —yo̧ji̧ri̧rȩ yo̧a̧diro̧jo̧ȩ pjarao̧ ju̧i̧ jȩa a̧doji̧ri̧ pio judiro̧.

⁸ Ado pio ju̧i̧iämȩrȩ pjarao̧ judi ma̧ȩ chjadürëremȩdejȩ Moiche ju̧i̧, Aro̧ ju̧i̧. Aja̧, pio jȩaiäpȩ jana̧tä yo̧ chjadüa̧dejȩrȩ. Ado jana̧na̧ra̧ji̧ri̧ oa yo̧a̧dejȩrȩ: —Jabechji̧de ado ja̧di. Go̧düchji̧vä. Dibëa̧ Ano̧mȩ Ütë pio ju̧i̧ chjacjiamȩri̧ jo̧rȩtapea̧ oa go̧düchji̧vä. Jabo chjadëri̧ yo̧chji̧coe jabo. ¿Chjia tjamo̧dirȩ jäpaji̧ri̧ judiro̧?

⁹ Ado Moiche judi dëbë yo̧mȩrȩ yo̧a̧dejȩ: —Chjia tjamo̧dëdirȩ, jabechji̧ a̧rorȩ ütëbodärärë jäparea̧rȩ. Ibëa̧ bori̧ pio ji̧ri̧, ütama̧i̧ pio ji̧ri̧ ëba jäparea̧ro̧jȩrȩ. Ibëa̧ u̧ri̧ ütëbo oa ëba jäparea̧ro̧jȩrȩ peaja̧di. Ado ibëa̧ oveja oa, ibëa̧ chivo oa, ibëa̧ baca oa peaja̧di ma̧ȩ jäparea̧rȩ. Danȩ, Jeova pio ju̧i̧ jo̧rȩtaji̧ri̧rȩ a̧dopaparea̧rȩ jurapea̧ oa. Ja̧di tara a̧ro̧rȩ goa̧ pio ji̧ri̧bo ma̧ȩ jäpea̧ chiarea̧rȩ —yo̧ji̧ri̧rȩ dëbë yo̧a̧dejȩ pjarao̧ ju̧i̧.

¹⁰ Ja̧dëa ji̧ pjarao̧ judi dëbë yo̧a̧dejȩ Moiche ju̧i̧: —Jabo cjäri̧ marequededibe. Dibë ütëbo oa go̧dürea̧ yürüdëparequededibe. Jabechji̧ Jeova judi pio dibë chjiari ana̧ri̧ tuti japea̧rämo̧ ütëborë go̧dürea̧ datäreji̧ri̧nȩrȩ. Jabo cüdë, cjäri̧ marequededibe, ütëbo oa go̧dürea̧ yürüdëparequededibe. Dibëa̧ ivi ji̧ri̧, ado dibëa̧ u̧ri̧ ji̧ri̧, jabechji̧ go̧dürea̧ yürüdëparequedejȩrȩ. Jabechji̧ jiadarea̧ jo̧rȩtanȩro̧coe. Jabo chjaodëri̧ dabarequede pio dibë chjiari.

¹¹ Ado pio ju̧i̧iä oari maearë jäpanȩrȩ. O ji̧ri̧ ütëbo oa a̧dë jäparenȩro̧jȩrȩ. Jabechji̧ mȩnȩro̧ Jeova pio ju̧i̧ tjamo̧ri̧ jo̧rȩtatämi̧ cjiarä judi, pio ju̧i̧iäpȩmo̧ chjacjiamȩri̧ jo̧rȩtapea̧ oa jätämi̧ cjiarä judi, jabechji̧ goë jaechji̧vä. Jächji̧vä jabo pio mȩnȩro̧mo̧rȩ jäpanȩrȩ, oari maearë —yo̧mȩrȩ yo̧rëremȩdejȩrȩ pjarao̧ judi, to̧bari̧ ni̧bämȩrȩ. Ado yo̧a̧ duri oa, pjarao̧ judi ërecjiape bagamȩrȩ chjaodëri̧ go̧dü tänȩno̧a̧dejȩrȩ jibëa̧ bëri pio judiri.

¹² Ja̧dëa ji̧ Jeova yo̧a̧dejȩ Moiche ju̧i̧: —Danȩ, Ejito chiriräpȩmo̧ ichipë cjiavä tagara üdë acji jana̧pea̧ oa, bubati̧rȩ acji jana̧pea̧ oa. Ado tagara üdë acji jana̧rä, jabechji̧ eami̧ to chjö̧na̧i̧ oa bae jurapadejȩ Ejito chiri nötai̧ oa. Jabechji̧ ui choco chacharemȩ üdë cjiadiä tänȩa̧ pio jiro to chjö̧na̧i̧ oa bae jurapadejȩ cjiadiädëri̧.

¹³ Pio ju̧i̧iä Moiche judi Ejito chiriräpȩmo̧ arë gatërëremȩdejȩ jibëa̧ tai̧rea̧ to oa. Ado Jeova judi tänȩa̧ oa pjaepamȩpea̧de dorë cjitëmȩri pio judiri. Do yoa, gȩnȩ yoa pjaeparëremȩde. Ado dopea̧rä chia ma̧na̧rëremȩdejȩ tagara oa.

¹⁴ Ado tagara no̧i̧dë tjamo̧rȩ pjo̧a̧ bira̧de Ejito chiri nötai̧därä oa. Ejitoräpȩ cjo̧ro̧ji̧ri̧ judiro̧ cja̧rȩmȩ co ja̧di dari̧ dadërëreji̧ri̧dirȩ. Ado judiri dadëpea̧diro̧jo̧ȩ peaja̧di.

¹⁵ Jabechji̧ dabu oa darea̧mi̧dëri̧ china̧rëremȩde. Ado chjaodëri̧ yuropea̧dejȩ cjiadiäremȩ jurarea̧ oa. Ui choco chacharë cjiadiä tänȩa̧rea̧ jurarea̧ chjö̧na̧i̧ oa bae jura̧dejȩ cjiadiädëri̧. Jurarea̧ to oa jurarea̧ chiadë maeari̧ bae jura̧dejȩ. Jabechji̧ to chjö̧na̧i̧rȩ pjö̧da coto maeari̧ bae jura̧dejȩ. Ejito chiri nötai̧ oa cärä cjiadiädëri̧, pjö̧da cjiadiädëri̧ bae jura maeadejȩ chjö̧na̧i̧ oa.

¹⁶ Ja̧dëa ji̧ pjarao̧ judi chjaodëri̧ ma̧ȩ chjadürëremȩdejȩrȩ Moiche ju̧i̧, Aro̧ ju̧i̧ pio jȩaiäpȩ jana̧tä: Ado jana̧na̧ra̧ji̧ri̧ oa yo̧a̧dejȩrȩ: —Danȩrȩ, chjai̧dëri̧ japea̧reconȩ Jeova pio ju̧i̧iäpȩmo̧, dibëa̧ Ütë pio ju̧i̧iäpȩmo̧. Pio dibëiäpȩmo̧ chjai̧dëri̧ japea̧requededibe peaja̧di.

¹⁷ Cjäri̧ri̧ cjia dachji̧coe. Pio yoamo̧ co duridëparȩmi̧ dari̧ a̧dë jo̧rȩtachji̧vä cüdë pio dibëiäpȩmo̧ chjai̧dëri̧ japea̧ pio ju̧i̧. Ado judiri chjai̧dëri̧ japadëparequededibe. Goë tuti cjo̧dëchji̧coe Jeova pio ju̧i̧iä tagara oa baä tänȩtä cüdë ja̧bochea oa —yo̧mȩrȩ yo̧rëremȩdejȩrȩ pjarao̧ judi.

¹⁸ Ado Moiche judi pjarao̧ ju̧i̧ a̧dë go̧düa̧ ëte, jabechji̧ goë tuti cjo̧dërëremȩde Jeova pio ju̧i̧iä.

¹⁹ Ado cjo̧dëa̧ pio ju̧i̧iä, jabechji̧ ano̧ mire pjaepa tänȩrëremȩdejȩ Jeova judi. Dorë cjitëmȩri judiri pjaeparërea̧ ji̧, ano̧ mire pjaepapea̧de dorë biramȩri pio judiri. Ado goae tarari̧ pjaepea̧ oaiä, jabechji̧ tagara decjiapea̧de. Jachi tjamo̧ oa chia baärëremȩdejȩ. Ui coëcoëräpȩ ju̧ri̧ aeno̧a̧dejȩ chjö̧na̧i̧ oa Ejitoräpȩ cja̧rȩmȩ tagararë cjiadiädëri̧.

²⁰ Jabo Jeova judi tagara oa baä tänȩa̧ oa chjuari̧ jiadarëremȩde pjarao̧ judi. Ano̧ mire jo̧rȩtadëri̧ cjiamȩrȩ jiada̧de. Ado icharaita pio ji̧ri̧ go̧dürea̧ yürüdëa̧dejȩrȩ.

Bagönȩ mapa tänȩrëremȩde Jeova judi

²¹ Ja̧dëa ji̧ Jeova judi yo̧rëremȩdejȩ Moiche ju̧i̧: —A̧dë iräpȩmo̧ ichipë cjiavä Ejito chiri nötai̧därä oa ma̧i̧ da bagönȩ mape bagapea̧ oa. Jabechji̧ uapai̧ da tjamo̧ bagönȩ üdë, a̧dë chjäte burëmi̧ chamȩ bagönȩ pio judi biratädejȩ Ejito chiri nötai̧ oa. Ado a̧dë chjäte bagönȩ tjamo̧ oaiä, jabechji̧ tarapadiro̧jo̧ȩ Ejichio judiro̧ —yo̧mȩrȩ yo̧rëremȩdejȩ Moiche ju̧i̧ Ütë tjamo̧ judi.

²² Pio ju̧i̧iä Moiche judi a̧dë iräpȩmo̧ ichipë cjia̧de. Ado chjaodëri̧ bagönȩ mapea̧de Ejito chiri nötai̧därä oa ina̧mi̧ dari̧. Bagönȩ ana̧rȩ bira̧de.

²³ Tjarari̧ dorea̧mi̧ bagönȩ mapea̧de jachidai̧ oa darea̧mi̧dëri̧. Ado pio ju̧i̧iä Ejichio judiro̧ jibëa̧ dëbëti̧ra̧ chia dadëa̧dirȩ. Ado dadë ma oaiä, jabechji̧ bërämo̧ ma cjo̧ro̧rëreji̧ri̧dirȩ. Dairäpȩmo̧ go̧düdë madirȩ. Jabo icharaita judiro̧, jabechji̧ da mirerea̧ daji̧ri̧rȩ cjo̧ro̧rëreji̧ri̧dirȩ.

²⁴ Ja̧dëa ji̧ pjarao̧ judi ado ma̧ȩ chjadürëremȩdejȩ Moiche ju̧i̧ jȩaiäpȩ jana̧tä. Ado jana̧na̧ra̧mȩ oa yo̧a̧dejȩ: —Jaechji̧vä. Jabechji̧ jächji̧vä. Jeova pio ju̧i̧iäpȩmo̧ chjacjiamȩri̧ jo̧rȩtapea̧ oa jächji̧vä. Dibëa̧ ivi pio ji̧ri̧bo ëba jächji̧jȩrȩ, dibëa̧ u̧ri̧ pio ji̧ri̧bo, dibëa̧ bori̧ pio ji̧ri̧bo. Jabo dibëa̧ baca oa, dibëa̧ oveja oa, dibëa̧ chivo oa, jabechji̧ pio yi cjiadiäri̧ a̧dë go̧düparenȩro̧jȩrȩ —yo̧mȩrȩ yo̧rëremȩdejȩ pjarao̧ judi.

²⁵ Jabo Moiche judi dëbë yo̧rëremȩdejȩ: —Jabo cjäri̧ marenȩ, ibëa̧ oveja oa, ibëa̧ chivo oa ma̧ȩ jäparea̧ro̧jo̧ȩ ibëa̧ Ütë pio ju̧i̧ chjacjiamȩri̧ jo̧rȩtapea̧ oa. Aja̧, Jeova quȩmȩ Ütë pio ju̧i̧ goe gu̧rori̧ yürüpea̧ oa, dami̧ti̧ yürürea̧ oa yürüpea̧ oa, jabechji̧ ma̧ȩ jäpea̧ chiarea̧ro̧jo̧ȩ.

²⁶ Ado ibëa̧ baca chjö̧na̧i̧ oa ma̧ȩ jäparea̧ro̧jo̧ȩ peaja̧di, cja̧rȩmȩrȩ a̧dë cjiadiärea̧ decjiari̧. Jabechji̧ chjö̧na̧i̧ oa ma̧ȩ jädärä ëte ütara̧mi̧ mitëparea̧rȩ Jeova quȩmȩ Ütë pio ju̧i̧iäpȩmo̧ chjadëri̧ yürüpea̧ oa. Jabo jabërä mitërea̧mi̧dëde, jabo a̧ro̧rȩ jäpea̧räpȩ go̧düdäräa̧rämo̧ chjadëri̧ mitërea̧ daparea̧rȩ Jeova pio ju̧i̧ yürüpea̧ oa —yo̧mȩrȩ dëbë yo̧rëemȩdejȩ pjarao̧ ju̧i̧ Moiche judi.

²⁷ Jabo Ütë tjamo̧ judi tänȩa̧ oa chjuari̧ jiadarëremȩde pjarao̧ judi. Ado pio ju̧i̧iä icharaita pio ji̧ri̧ go̧dürea̧ yürüdëa̧dejȩrȩ.

²⁸ Ja̧dëa ji̧ pjarao̧ judi yo̧a̧dejȩ Moiche ju̧i̧: —Danȩ, pio yudiri baäa̧mi̧ baävä. Ado chjereno̧ jauëräpȩmo̧ jana̧dëvä. Ado dadëri̧ cjiarequedemȩ bucho ana̧. Mȩnȩ ado jana̧rä judi, jabechji̧ ja̧bo tänȩparequedemȩ. Quëna̧vä —yo̧mȩrȩ yo̧a̧dejȩ Moiche ju̧i̧ pjarao̧ judi.

²⁹ Ja̧dëa ji̧ Moiche judi dëbë yo̧a̧dejȩ: —Jabechji̧de coaiä. Mȩnȩ yo̧a̧mi̧ ado dadëparenȩque —dëbë yo̧mȩrȩ yo̧rëremȩdejȩ Moiche judi.