Go̧dürea̧ Ma̧ȩ 1 - Biblia Pume

Icharaita judiro̧ conȩda̧ oa cjo̧ro̧rëreji̧ri̧dirȩ ejito quȩmȩ chiriräpȩ

¹ Ja̧di quȩji̧ri̧rëreji̧ri̧dirȩ Icharai ja̧ u̧ri̧ judiro̧ jënȩro̧ Ejito quȩmȩ chiriräpȩ pearä go̧düdärärërea̧ ji̧ jibëa̧ pumȩ pio ji̧ri̧ nöta. Ado Icharai ja̧ u̧ri̧ judiro̧, jabechji̧ Jacobo ja̧ u̧ri̧ pio judiro̧dirȩ.

² Ja̧di quȩji̧ri̧rëreji̧ri̧dirȩ. Cja̧rȩmȩrȩ Rubȩ quȩmȩde. Ado cja̧rȩmo̧rȩ Chimeo̧ quȩmȩde. Ado cja̧rȩmo̧rȩ Devi quȩmȩde. Ado cja̧rȩmo̧rȩ Juda quȩmȩde.

³ Ado cja̧rȩmo̧rȩ Ichaca quȩmȩde. Ado cja̧rȩmo̧rȩ Cheburo̧ quȩmȩde. Ado cja̧rȩmo̧rȩ Bejami̧ quȩmȩde.

⁴ Ado cja̧rȩmo̧rȩ Da̧de quȩmȩde. Ado cja̧rȩmo̧rȩ Netari quȩmȩde. Ado cja̧rȩmo̧rȩ Ga quȩmȩde. Ado cja̧rȩmo̧rȩ Ache quȩmȩde.

⁵ Aja̧, pio judiro̧dirȩ Jacobo ja̧ u̧ri̧ pio judiro̧. Ado Jacobo pio judiri ja̧ji̧ri̧ judiro̧ ütëborë 70 pumȩrëreji̧ri̧dirȩ. Ado jibëa̧ ja üdë, Joche pio judi, jabechji̧ ejitoräpȩ cjo̧ro̧rëremȩde.

⁶ Japamitë ana̧ tjamo̧ chjätä ëte, Joche judi, jibëa̧ oti̧borë ja̧bo marëreji̧ri̧dirȩ, jënȩro̧ nö̧ria̧ pio judiro̧borë.

⁷ Jabo judiro̧ ja̧boa̧räbo, jabechji̧ ji̧ra̧ tjamo̧pe järëreji̧ri̧dirȩ pio judiri ja̧ji̧ri̧ judiro̧. Tjamo̧ davä. Pio judiri ja̧ji̧ri̧ judiro̧, icharaita pio judiro̧ jibëa̧ bori̧ no̧i̧dë tjamo̧ oa ëbarërea̧ oaiä, jabechji̧ ji̧ra̧ tjamo̧pe järëreji̧ri̧dirȩ Ejito chiri nöta oa chjuchjupechä cjo̧ro̧rea̧mi̧ dari̧.

⁸ Ja̧dëa ji̧ japamitë ana̧ chjätä ëte ado cja̧rȩmo̧rȩ ano̧ mire ütëpe bagarëremȩde. Ado pio jiro ütë pio judi Joche quȩmȩrea̧ pio ju̧i̧ chjiari cja̧rȩmȩ co ta̧rëdërëremȩde. Jabechji̧ dabadëa̧de pio ju̧i̧ chjiari.

⁹ Ado judi yo̧mȩrȩ yo̧rëremȩdejȩrȩ jibëa̧ pumȩ ji̧ri̧: —Danȩrȩ, icharaita judiro̧ a̧dë chjäte ji̧ra̧pea̧dirȩ. Jabechji̧ pio ibë u̧i̧ ji̧ra̧pea̧dirȩ. Pio ibë u̧i̧ ju chiami̧ dari̧ cjo̧ro̧ji̧ri̧pea̧dirȩ. Ado pio ju̧i̧iä uapai̧ dadirȩ. Ado ma̧i̧ dari̧ japapai̧ dadiro̧ibe.

¹⁰ Jabechji̧ ibë eadëji̧ri̧ judiro̧ pio ibëiäpȩmo̧ acji jana̧rä judi, jabechji̧ pio judiro̧borë acji jana̧pai̧ dadiro̧ibe pio ji̧ri̧ nö̧ta. Aja̧, ibë eadëji̧ri̧ pio ji̧ri̧ a̧dopai̧ dadiro̧jȩrȩ pio ibë boadäräpea̧ oa. Ado ibë boadärä ëte pio yoa chiriri pio judiri goadi a̧dë baäpai̧ dadiro̧ibe. Ja̧di tara järipea̧ chiarea̧rȩ. Na̧e chiapea̧ chiarea̧rȩ. Ado a̧ro̧rȩ chjadëri̧ ütarë jo̧rȩta̧mi̧ japatäreji̧ri̧rea̧ro̧jȩrȩ pio judiro̧ ibë eami̧ oa japachea oa —yo̧mȩrȩ yo̧rëremȩdejȩrȩ jibëa̧ pumȩ ji̧ri̧ ejitoräpȩ cjo̧ro̧mȩ ütë judi.

¹¹ Ado pio ju̧i̧iä Ejitoräpȩ tjamo̧ cjo̧ro̧ji̧ri̧ judiro̧ mu̧i̧tjoi̧ ma tänȩrëreji̧ri̧diro̧jȩrȩ icharaita pio ji̧ri̧. Ado mitërëreji̧ri̧diro̧jȩrȩ oari ji̧ri̧, tjamo̧ ja̧bepa tänȩji̧ri̧ pio ji̧ri̧. Aja̧, icharaita pio ji̧ri̧ to̧bari̧ ja̧bepa tänȩpea̧ oa, cjäri̧ri̧ cjia dadëji̧ri̧rȩ ja̧bepa tänȩpea̧ oa mitëa̧diro̧jȩrȩ, pio ji̧ri̧ järidëparȩpea̧ oa. Aja̧, Ejitoräpȩ cjo̧ro̧mȩ ütë pio ju̧i̧ ja̧ oa, pjarao̧ yo̧mȩ pio ju̧i̧ ja̧ oa, yo̧a̧ri̧ bë ma̧ri̧ oa japa tänȩrëreji̧ri̧diro̧jȩrȩ pjaro̧ judi jibëa̧ oa chjadëri̧ boeapea̧ oa. Aja̧, Dameche quȩmȩ bë ma̧ri̧ oa, ado Pito quȩmȩ bë ma̧ri̧ oa ja̧bepa tänȩrëreji̧ri̧diro̧jȩrȩ.

¹² Jabo cjäri̧ madiro̧jȩrȩ, Ejitoräpȩ cjo̧ro̧ji̧ri̧ judiro̧ icharaita ji̧ri̧ ma̧i̧ dari̧ ja̧bepa tänȩa̧räbo, ütararea̧mi̧dëri̧ conȩda̧räbo, jabechji̧ ji̧dë u̧i̧ ji̧ra̧pe bagarëreji̧ri̧dirȩ chiri nötai̧ oa chjuchjupechä cjo̧ro̧rea̧mi̧ dari̧. Pio ju̧i̧iä ji̧dë u̧i̧ uapaji̧ri̧pea̧diro̧jȩrȩ Ejitoräpȩ cjo̧ro̧ji̧ri̧ judiro̧.

¹³ Ado pio ju̧i̧iä ji̧dë u̧i̧ to̧bari̧ ja̧bepa tänȩrëreji̧ri̧diro̧jȩrȩ, tocoi̧mi̧ cjäri̧ri̧ cjia dadëji̧ri̧rȩ. Jabechji̧ pumȩ taradai̧ tarari̧ bide cjaeäa̧diro̧jȩrȩ.

¹⁴ Aja̧, ëcarami̧ dari̧ cjo̧ro̧ tänȩji̧ri̧rȩ ja̧bepa tänȩrëreji̧ri̧diro̧jȩrȩ dabu choco oa, tjado oa peaja̧di. Tjamo̧ davä. Gito tjamo̧ri̧ ja̧bepa tänȩa̧diro̧jȩrȩ cjatäcjiarea̧ decjiari̧.

¹⁵ Ado ju̧i̧ uëri ma̧i̧ dari̧ japarëremȩde Ejitoräpȩ cjo̧ro̧mȩ ütë judi. Jabechji̧ ebereo ja̧ oari̧ bori̧ pio ji̧ri̧ ja̧bo tänȩtä yo̧rëremȩde. Pio ju̧i̧iä ma̧ȩ yürürëremȩdejȩrȩ tjamo̧ a̧doji̧ri̧ ivi pio ji̧ri̧, bori̧ ji̧ri̧ ararä a̧doji̧ri̧ ivi pio ji̧ri̧. Aja̧, pea ara̧ oari bori̧ pio ji̧ri̧ ja̧bo tänȩtä yo̧mȩrȩ ma̧ȩ yürüa̧dejȩrȩ ebereo ivi yo̧a̧ri̧ oa. Aja̧, Pua quȩyi̧ oa, Chipja quȩyi̧ oa ma̧ȩ yürümȩrȩ ja̧di ta̧rëri̧ yo̧rëremȩdejȩrȩ:

¹⁶ —Danȩro̧, mȩnȩro̧ icharaita ivi pio ji̧ri̧ arapea̧ ji̧ a̧doro, jabechji̧ chjadëri̧ ütarë dachji̧je. Üi̧ boi̧ ararä judi, jabechji̧ ja̧bo tänȩpea̧di, jabo iei̧ boi̧ ararä judi, ja̧bo tänȩdëpea̧di —yo̧mȩrȩ ma̧ȩ yürüa̧dejȩrȩ.

¹⁷ Jabo pjarao̧ judi yo̧a̧mi̧ ta̧rë japadëa̧ni̧rȩ ivi jini̧ro̧. Jabechji̧ Ütë tjamo̧ pio ju̧i̧ uapea̧ oaiä, ta̧rë japadëa̧ni̧ro̧jo̧ȩ. Ja̧bo tänȩdëa̧ni̧ro̧jȩrȩ oari bori̧ ji̧ri̧.

¹⁸ Pio ju̧i̧iä pjarao̧ judi ma̧ȩ chjadüa̧dejȩrȩ pio jȩaiäpȩ jana̧tä. Ado jȩaiäpȩ go̧düdäräa̧ji̧ri̧ i̧a iëno̧ë ta̧rëa̧dejȩrȩ: —¿Tjana̧pea̧ ji̧ ja̧di dari̧ japea̧mȩnȩro̧ji̧ri̧? ¿Tjana̧ ju̧i̧iä ja̧bo tänȩdëa̧mȩnȩro̧ji̧ri̧ oari bori̧ ji̧ri̧?

¹⁹ Ado dëbë yo̧ji̧ri̧rȩ yo̧a̧ni̧ro̧jo̧ȩ: —Jabo cjäri̧ marea̧rȩ. Japarea̧ dadë marea̧rȩ. Ebereo ivi jini̧ro̧ ejichio ivimi̧ dari̧ aradëni̧rȩ. Chjaodëri̧ arani̧rȩ. A̧ro̧rȩ jabë go̧düdärädëa̧rä arani̧rȩ. Pio ju̧i̧iä ja̧bo tänȩrea̧ dadë marea̧ro̧jȩrȩ —dëbë yo̧ji̧ri̧rȩ yo̧a̧ni̧ro̧jo̧ȩ pjarao̧ ju̧i̧.

^20-21 Pio ju̧i̧iä icharaita judiro̧ ji̧ra̧ tjamo̧dëpe bagatärea̧ ji̧, jabechji̧ ji̧dë u̧i̧ ji̧ra̧pe bagarëreji̧ri̧dirȩ. Ado icharaita ivi ji̧ri̧ a̧doji̧ri̧ ivi ji̧ni̧ro̧ Ütë tjamo̧ ju̧i̧ uapaji̧ri̧rȩ a̧doa̧ oaiä, oari bori̧ pio ji̧ri̧ ja̧bo tänȩdëa̧ oaiä, jabechji̧ cjäri̧ri̧ cjiamȩrȩ darëremȩdejȩrȩ Ütë tjamo̧ judi. Ji̧ri̧ ja̧ pumȩ judiro̧ ji̧ra̧ tjamo̧pe järea̧mi̧ dari̧ cjäri̧ri̧ cjiamȩrȩ daea̧dejȩrȩ.

²² Ja̧dëa ji̧ Ejitoräpȩ cjo̧ro̧mȩ ütë judi, pjarao̧ pio judi ma̧ȩ yürümȩrȩ yo̧rëremȩdejȩrȩ jibëa̧ pumȩ ji̧ri̧ ütëbodärä oa: "Danȩrȩ ca̧ pumȩ, ebereo ja̧ oari bori̧ ji̧ri̧, pea ara̧ oa cjiaji̧ri̧ pio ji̧ri̧ ütëbodärä oa aechide mapea̧de bearäpȩ. Jabo ivi bori̧ ji̧ri̧, jabechji̧ cjo̧ro̧ tänȩpea̧" Aja̧, ja̧di ta̧rëri̧ yo̧mȩrȩ ma̧ȩ yürürëremȩdejȩrȩ pjarao̧ judi jibëa̧ pumȩ ji̧ri̧.