Go̧a̧rea̧ 51 - Biblia Pume

Davi judi Bechabe pio ji̧ nö̧ta baë ëba mo̧a̧ duri oa, gito ana̧ri̧ jo̧rȩtamȩpea̧mȩrȩ ni̧bärëremȩdejȩ Ütë tjamo̧ ju̧i̧

¹ Ca̧ Ütë, na̧ earea̧ üdë goarijädëmȩde. Ji̧dë ma earenȩque eadëpe bagarea̧ decjiari̧. Mȩnȩ coa cjäri̧ri̧ cjia da̧ üdë a̧dë chjäte ji̧ra̧de. Ado pio ju̧i̧iä yo̧requedemȩ. Cjäri̧ri̧ cjiamȩrȩ dacoe. Cjäri̧ri̧ cjiamȩrȩ duridëparȩcoe cüdë chjai̧dëri̧ japea̧ pio ju̧i̧.

² Ca̧ chjai̧dë gȩrȩ üdë cjiadiädëri̧ bide bide joami̧ dari̧ japacoe cüdë chjai̧dë oa chiarea̧mi̧dëri̧.

³ Danȩ, cüdë chjai̧dëri̧ japea̧ pio ju̧i̧ chjiari dabarequede. Ji̧dë ma jo̧rȩtareconȩ. Pio ju̧i̧iä jëdano̧tämi̧ cjiarequede pio mȩa nö̧ta.

⁴ Pio mȩaiäpȩmo̧ chjai̧dëri̧ japea̧requedemȩ ca̧ Ütë, pio mȩaiäpȩmo̧ ma. Mȩnȩ yo̧a̧räbo, “Aja̧, ja̧di dari̧ japapea̧ üdë chjai̧dëde” yo̧a̧räbo, jabechji̧ chjai̧dëri̧ japea̧requede. Jiada̧requedemȩ. Ado mȩnȩ coa yo̧a̧ ji̧, cüdë pio mȩaiäpȩmo̧ chjai̧dëri̧ japea̧ pio ju̧i̧ chjiari yo̧a̧ ji̧, “Chjai̧dëri̧ japea̧renȩ” yo̧a̧ ji̧, jabechji̧ coëma cjiari̧ yo̧a̧renȩ oëra̧ yo̧rea̧ decjiari̧. Jabechji̧ coëma cjiari̧ ütara̧renȩ pio coa chjiari.

⁵ Danȩ ca̧ Ütë, coa arayi̧ jini̧ coa ara̧ domȩri ja̧, jabechji̧ chjai̧dëri̧ japapai̧ dari̧ cjiarëremȩrequede. Ado cüdë jabë aradëa̧rä, ca̧ ai̧ pio ji̧ ja̧ acärä pearä cjiarërea̧ ji̧, pearä boi̧chji̧rërea̧ ji̧ jabë aradëa̧rä, peaja̧di chjai̧dëri̧ japapai̧ dari̧ cjiarëremȩrequede.

⁶ Danȩ, tjamo̧i̧ cjiari̧ jo̧rȩtatä earenȩque ca̧ chji̧ra̧ pio ju̧ri̧ra̧. O judiro̧ coa dadëräbo, chjai̧dë oa goadi japarea̧ daräbo, jabechji̧ coëma cjiari̧ jo̧rȩtariä dopatä earenȩque. Jabechji̧ japacji̧ quëna̧ japatä eadë marenȩque ca̧ Ano̧mȩ. Pio ju̧i̧iä yo̧requedemȩ ca̧ Ütë mȩnȩ pio coa yürütä, na̧ dabarea̧ra̧ pio ju̧ri̧ra̧ urëdi tjamo̧ oa jo̧rȩtarea̧ yürütä. Aja̧, yürücoe.

⁷ Cüdë chjai̧dë chiadëmȩmi̧ dari̧ jëdano̧coe. Chjadëri̧ joami̧ dari̧ japacoe cüdë chjai̧dë gȩrȩ chiadëmi̧ dari̧ cjiadiäpea̧ oa.

⁸ Aja̧ ca̧ Ütë, ma̧ȩ goae tjamo̧ oa ta̧rëtämi̧ cjiarequede mȩaiä, ca̧ chji̧ oa ma̧ chiadëri̧ cjiari̧ jo̧rȩta tänȩpamȩ ma̧ȩ pio ju̧i̧. Mȩnȩ coa ana̧ tjamo̧ri̧ jo̧rȩta tänȩa̧ oaiä, cjo̧dërë tüe baämi̧ dari̧ jo̧rȩta tänȩa̧ oaiä, jabechji̧ ado chjereno̧ ma̧ chiadëri̧ cjiari̧ cjo̧ro̧rea̧ datämi̧ cjiarequede, ana̧ri̧ jo̧rȩtarërea̧ ji̧.

⁹ Jabechji̧ mo̧a̧mi̧ dari̧ japavä cüdë chjai̧dëri̧ japea̧ pio ju̧i̧ dachea oa. Jabechji̧ cüdë chjai̧dëri̧ japea̧ pio ju̧i̧ duridëparȩmi̧ dari̧ japajo̧ȩ cjiadiärea̧ decjiari̧.

¹⁰ Chjai̧dë oa jo̧rȩtarea̧ decjiari̧ jo̧rȩtapea̧ oa jëdano̧coe ca̧ chji̧ oa ca̧ Ütë. Jabechji̧ jo̧rȩtarea̧ peaja̧ra̧ pio ju̧ri̧ra̧ jo̧rȩtarea̧mi̧ dari̧ jëdano̧coe cüdë ji̧dë ma na̧ ma̧ȩrämo̧ cjo̧ro̧pea̧ oa.

¹² Mȩnȩ pio coaiäpȩmo̧ pearä chjätärea̧ yürürërea̧ oaiä, jabechji̧ ma̧ chiadëri̧ cjia tjamo̧rëremȩrequede. Peaja̧di dari̧ cjiatämi̧ cjiarequede ado chjereno̧. Pio ju̧i̧iä yo̧requedemȩ ca̧ Ütë. Mȩa chjadëri̧ ta̧rëdiärea̧mi̧ dari̧ jëdano̧coe ca̧ chji̧ oa. Pio mȩa tjamo̧ri̧ ta̧rëdiätämi̧ cjiamȩ chji̧ oa yürücoe.

¹³ Ado ja̧di dari̧ japea̧ oaiä, jabechji̧ oëra̧diäa̧ji̧ri̧ pio ji̧ri̧iäpȩmo̧ chjadëri̧ a̧doparequedejȩrȩ. Chjadëri̧ a̧ra̧ano̧parequedejȩrȩ judiro̧ ado chjereno̧ ano̧ mire jo̧rȩtapea̧ oa, judiro̧ chjadëri̧ jëdano̧a̧ oa cjiapea̧ oa.

¹⁴ Aja̧ chjätärea̧ yürümȩ Ütë cjäri̧ri̧ cjiamȩrȩ dacoe. Cüdë ado cja̧rȩmo̧ oa ja̧bo tänȩa̧ ba oa goe gu̧rori̧ ja̧bo tänȩdëcoe. Ado mȩnȩ cjäri̧ri̧ cjia daea̧ oaiä, jabechji̧ ma̧ chiadëri̧ cjiamȩrȩ go̧a̧parequede pio mȩa chjiari, mȩnȩ pio coa chjiari tuti japea̧ pio ju̧i̧ chjiari.

¹⁵ Aja̧ ca̧ Ano̧mȩ, chjadëri̧ a̧docoe pio mȩa chjiari ni̧bäpea̧ ji̧. Ado chjacjiamȩri̧ jo̧rȩtaparequedemȩ.

¹⁶ Ado cüdë pio mȩaiäpȩmo̧ cäë yürütä earä judi, dëdë, yürütäremȩrequedemȩ. Chjaodëri̧ goe gu̧rori̧ yürütäremȩrequedemȩ, jabo pio ju̧i̧ ea tjamo̧dërenȩ.

¹⁷ Ado cja̧rȩmo̧ oa earenȩ. A̧dë chjäte chjadëri̧ yürütä earenȩque. Ado cja̧rȩmo̧ oa cäë yürümi̧ dari̧ yürütä earenȩque. Mȩa dëbëpe chjaodëmȩ chji̧ oa yürütä earenȩque. Mȩa jiadadëmȩ chji̧ oa cäë yürümi̧ dari̧ japatä earenȩque. Tjamo̧ davä. 'Chja ja̧di pio cüdë jo̧rȩta̧mi̧ japatäquëda' quëna̧dëmȩ chji̧ oa, 'chja ja̧di ca̧ chja̧oerämo̧ cjo̧ro̧täquëda' quëna̧dëmȩ chji̧ oa cäë yürümi̧ dari̧ yürütä earenȩque ca̧ Ütë. Ado ja̧di dari̧ yürürä judi, tjamo̧ri̧ ano̧ mire jo̧rȩtamȩ chji̧ oa yürürä judi, jabechji̧ badë dadëparenȩque jabo ba chia daparenȩque. Ado pio ju̧i̧iä ja̧di dari̧ yürütämi̧ cjiarequedemȩ.