Garata Ma̧ȩ 6 - Biblia Pume

Ibëa̧ dëbëti̧ra̧ chia a̧dotäreji̧ri̧rea̧rȩ

¹ Danȩrȩ ca̧ oti̧, dibëa̧ omȩ üdë oëra̧diärä judi, jabechji̧ a̧dochji̧jo̧ȩ. Tjo tjamo̧ ja̧ chja̧oerä cjo̧ro̧ji̧ri̧ pio judiro̧ a̧dotäreji̧ri̧renȩro̧jo̧ȩ, no̧räpȩmo̧diärea̧mi̧ dari̧. Aja̧, pio ju̧i̧ ea tjamo̧ji̧ri̧rȩ chi̧dëeatäreji̧ri̧renȩro̧jo̧ȩ, ma̧ȩ bücjüi̧ra̧ ni̧bäji̧ri̧rȩ. Jabo na̧e chiachji̧vä pio mȩnȩro̧borë u̧i̧pea̧ oa cjiachea oa.

² Aja̧, dibëa̧ dëbëti̧ra̧ chia chjadëri̧ a̧dochji̧vä, chacha oa dëbë arami̧ dari̧ japaji̧ri̧rȩ. Ado mȩnȩro̧ ja̧di dari̧ japea̧ oaiä, jabechji̧ Quiricho pio ju̧i̧ ja̧ ma̧ȩ oa nö̧tadäräri̧ ta̧rëdiänȩrȩ.

³ Jabo eami̧ pumȩ üdë jibëa̧ chji̧rämo̧ jo̧rȩtatarä judi, ‘Aja̧, o ji̧ri̧ u̧i̧ ba chiaquëda’ quëna̧ jo̧rȩtarä judi, cjäri̧ made, jibëa̧ ma̧na̧ri̧ japea̧ oaiä u̧i̧pea̧ oa cjiade, ba chia tjamo̧dëmȩrȩ.

⁴ Jabo jabechji̧ chjadëri̧ ütarë da matäreji̧ri̧nȩrȩ mȩnȩro̧ ja̧bepea̧ pio ju̧i̧. Ado chjadëri̧ japea̧ oaiä, jabechji̧ ma̧ chiadëri̧ cjiaji̧ri̧rȩ jo̧rȩtapai̧ danȩrȩ davä mȩnȩro̧ chjadëri̧ japea̧ oaiä. Jabo oëra̧ jo̧rȩtadëtäreji̧ri̧nȩrȩ jabo. Jabechji̧ mȩnȩro̧ chjadëri̧ japea̧ oaiä, 'Aja̧, o ji̧ri̧ u̧i̧ chjadëri̧ ja̧bepamȩquëda’ quëna̧ jo̧rȩtadë matäreji̧ri̧nȩrȩ.

⁵ Jabechji̧ pumȩ nö̧tadärärë jibëa̧ ja̧beparea̧ pio ju̧i̧ chjadëri̧ ja̧bepapea̧ oa järitäreji̧ri̧dirȩ.

⁶ Ado eami̧ pumȩ üdë a̧ra̧ano̧mȩ pio ju̧i̧iä Ütë tjamo̧ ja̧ ma̧ȩ oa dabaparä judi, jabechji̧ chjadëri̧ yürütäremȩdejȩ ma̧ȩ a̧ra̧ano̧a̧ ba oa. Jabechji̧ eami̧ti̧ chjadë oa yürütäremȩdejȩ, chjadëri̧ a̧domȩrȩ.

Tjado oa ponȩmi̧ dari̧ cjo̧ro̧rea̧rȩ

⁷ Ado danȩrȩ, oëra̧ jo̧rȩtadëchji̧vä. ‘Jabechji̧ Ütë tjamo̧ judi tjamo̧ri̧ dabadëdida, pio coa chjiari tjamo̧ri̧ dabadë jirodida, jabechji̧ u̧i̧papai̧ da jirocuni̧da’ quëna̧dëchji̧vä. Jabechji̧ pio ju̧i̧ u̧i̧parea̧mi̧dëde. Jabechji̧ mȩnȩro̧ ponȩa̧ pio ju̧i̧ mitëmi̧ dari̧ cjo̧ro̧panȩrȩ japamitë chjätä ëte. Tjamo̧ davä. Danȩrȩ ca̧ oti̧, mȩnȩro̧ pio yoa chirirä cjo̧ro̧a̧ nö̧ta, jabechji̧ tjadoro ponȩmi̧ dari̧ cjo̧ro̧nȩrȩ. Ado mȩnȩro̧ ponȩa̧ pio ju̧i̧ mitëmi̧ dari̧ cjo̧ro̧panȩrȩ japamitë chjätä ëte.

⁸ Dibëa̧ icjarari cjitëmȩ chjai̧dëra̧ pio ju̧ri̧ra̧ ponȩmi̧ dari̧ cjo̧ro̧rä judi, ja̧borea̧ pio ju̧i̧ mitëmi̧ dari̧ cjo̧ro̧panȩrȩ. Jabo mȩnȩro̧ Tjo tjamo̧ pio judiri ma̧na̧mȩra̧ pio ju̧ri̧ra̧ ponȩmi̧ dari̧ cjo̧ro̧rä judi, jabechji̧ bucho ana̧ cjo̧ro̧rea̧ pio ju̧i̧ mitëmi̧ dari̧ cjo̧ro̧panȩrȩ.

⁹ Pio ju̧i̧iä yo̧requededibe. Järidëpe bagadëchji̧vä o ji̧ri̧iäpȩmo̧ chjadëri̧ japapea̧ ji̧, jabo jabechji̧ ji̧dë ma chjadëri̧ japachji̧jȩrȩ. Ado japamitë chjätä ëte, dëdë, chjadëi̧ pio ju̧i̧ mitërea̧ daparea̧rȩ, Ütërë pio ibëiäpȩmo̧ ba ano̧pea̧ pio ju̧i̧. Aja̧, ja̧di dari̧ mitërea̧ daparea̧rȩ a̧ro̧rȩ ja̧bepa ano̧dërä judi.

¹⁰ Pio ju̧i̧iä a̧ro̧rȩ chjadëri̧ japarea̧ darä judi, jabechji̧ chjadëri̧ japatäreji̧ri̧rea̧ro̧jȩrȩ ütëbodärä oa. Ado quëna̧ji̧ri̧ pio ji̧ri̧iäpȩmo̧ ji̧dë u̧i̧ järitäreji̧ri̧rea̧rȩ pio ji̧ri̧ chjadëri̧ a̧dopea̧ ji̧ ibëa̧ pumȩpea̧ tara.

Cjiadiärea̧ Ma̧ȩ

¹¹ Danȩrȩ, pio yoa ma̧ȩ oa go̧ȩparequededibe ca̧ ichira̧ pio ju̧ri̧ra̧. Go̧ȩ ana̧ra̧ go̧ȩpareconȩ pio yoa. O oa ca̧ ichira̧ go̧ȩpadëa̧reconȩ jabo ca̧ jadü pio judi chjadëri̧ go̧ȩpe yürüa̧dique. Jabo pio yoamo̧ ma̧ȩ oa ca̧ ichira̧ pio ju̧ri̧ra̧ go̧ȩparequede.

¹² Ado yaba̧ ado chjereno̧ go̧ȩpatämi̧ cjiarequededibe oëra̧ a̧ra̧ano̧ji̧ri̧ pio ji̧ri̧ chjiari. Danȩrȩ ca̧ oti̧, mȩnȩro̧ budoa̧ oa cjiatä ea tjamo̧diro̧diibe. Pio ju̧i̧iä ji̧dë ma yo̧tadiro̧dibe. Aja̧, boatämi̧ cjiadiro̧dibe, judio judiro̧ orë pio jibëiäpȩmo̧ ba chia dapea̧ oa. Tjamo̧ davä. Judiro̧ "Quiricho pio ju̧i̧iämo̧i̧ chjätärea̧mi̧ dade" yo̧ji̧ri̧rȩ a̧ra̧ano̧rä judi, toro ja̧boa̧mȩ pio ju̧i̧ chjiari a̧ra̧ano̧rä judi, judio pio judiro̧ orë conȩdapadiro̧jȩrȩ. Pio ju̧i̧iä uapaji̧ri̧rȩ teracabari̧ a̧ra̧ano̧diro̧dibë budoa̧ oa cjiapea̧ pio ju̧i̧ chjiari.

¹³ Jabo judiro̧ budoa̧ oa cjiaräbo, Moicherë go̧ȩparërea̧ ma̧ȩ pio ju̧i̧ nö̧tadäräri̧ ta̧rëdiädë madiro̧jo̧ȩ. Ado ta̧rëdiädëji̧ri̧borë budoa̧ oa cjiatä eatadiro̧dibe. Jabechji̧ pio dibë boapea̧ oa budoa̧ oa cjiatä eatadiro̧dibe, pio dibë chjiari goaeri̧ yo̧pea̧ oa.

¹⁴ Jabo cjäri̧ made, eami̧ pumȩ judi pio jȩa chjiari goaeri̧ yo̧rea̧mi̧dëde. Pio ju̧i̧iä teracaba pio ju̧i̧ chjiari goaeri̧ yo̧dërequede jabo Ano̧mȩ Jechu Quiricho pio ju̧i̧ chjiarimo̧i̧ goaeri̧ yo̧requede. Tjamo̧ davä. Toro ja̧boa̧mȩ pio ju̧i̧ chjiarimo̧ goaeri̧ yo̧rea̧ darequede. Pio ju̧i̧iäpȩmo̧ ma chjacjiamȩri̧ ni̧bäreconȩ. Jabechji̧ pio cüdëborë ja̧boa̧requede pio ju̧i̧ nö̧ta. Aja̧, pio yoa chirirä ja̧ oa, pio yoa chiriri ja̧ jo̧rȩtarea̧ pio ju̧i̧ a̧dë ja̧boa̧reconȩ. Tjamo̧ davä. Ja̧boa̧mi̧ dari̧ cjiadiäa̧requede toro ja̧boa̧ pio ju̧i̧iä.

¹⁵ Ado budoa̧ üdë, jabechji̧ badëde. Ado budodëa̧ üdë peaja̧di badëde. Jabo Ütë tjamo̧ ju̧i̧iä pumȩ peaja̧pe baga̧ pio judimo̧rȩ ba chiade.

¹⁶ Ado pio yoa ma̧ȩrä cjo̧ro̧ji̧ri̧ pio ji̧ri̧ ma̧ chjupi̧ cjiari̧ jo̧rȩtarea̧ yürütädejȩrȩ Ütë tjamo̧ judi. Chjamȩrȩ a̧dotädejȩrȩ. Aja̧, jibëa̧ pumȩ ütëbodärä oa ja̧di dari̧ japatädejȩrȩ Ütë tjamo̧ judi.

¹⁷ Ado yaba̧ pio yoamo̧i̧ ma̧ȩ oa a̧de go̧ȩparequededibe. Danȩrȩ, Ütë tjamo̧ ju̧i̧ eadëji̧ri̧ pio judiro̧ ji̧dë ma conȩdachediro̧coe Quiricho pio ju̧i̧ ja̧ oa ja̧bepamȩ oa. Jabechji̧ pio coa ma̧i̧ dari̧ japea̧ oaiä, ca̧ icjara nö̧tarë ipara chiarequede. Jabechji̧ Jechu pio ju̧i̧ ja̧ mu̧i̧tjoi̧requede. Ado judiri japadëtädiro̧coe jabo.

¹⁸ Aja̧ ca̧ oti̧, ibëa̧ Ano̧mȩ Jechu Quiricho pio judiri ma̧na̧mȩ cjäri̧ri̧ cjia darea̧ üdë ji̧dë ma a̧dotädidibe ütëbodärä oa. Ja̧ditäde. Aja̧, pio ju̧i̧mo̧i̧ ma̧ȩ oa go̧ȩpe chjadürequededibe. Jabechji̧ cjo̧ro̧ cjiaibe. Dibëa̧ omȩ, Pablo.