Garata Ma̧ȩ 5 - Biblia Pume

Jare chjadüa̧ oa cjiami̧ dari̧ cjo̧ro̧a̧ oaiä, jabechji̧ ado chjereno̧ tabüa̧ oa cjiami̧ dari̧ cjo̧ro̧dëtäreji̧ri̧rea̧rȩ

¹ Danȩrȩ ca̧ oti̧, a̧ro̧rȩ jare chjadüa̧ oa cjiami̧ dari̧ cjo̧ro̧pea̧ oa go̧dü tänȩrëremȩdiibe Quiricho judi. Pio ju̧i̧iä yo̧tarequededibe to̧bari̧ cjiatä, teracaba jo̧rȩtarea̧ oaiä ado chjereno̧ tabüa̧ oa cjiami̧ dari̧ cjiachea oa, ado chjereno̧ ju̧i̧ ja̧ mu̧i̧tjoi̧mi̧ dari̧ cjiachea oa.

² Danȩrȩ ca̧ oti̧, ta̧rëchji̧coe. Mȩnȩro̧ dibëa̧ icjara oa budoa̧ oa cjiapea̧ oa yürürä judi, mȩnȩro̧, 'Aja̧, budoa̧ oa cjia̧ pio oaiä jabechji̧parȩa̧ oa cjiapaquëda' quëna̧rä judi, Quiricho pio judi badëmi̧ dari̧ cjiadiäpadidibe. Tjamo̧ davä. Pio dibë chjiari tuti japarëremȩ pio judi badëmi̧ dari̧ cjiadiäpadidibe. Jabechji̧ Pablo pio judimȩrȩ yo̧tarequededibe.

³ Ado cüdë tjamo̧ri̧ yo̧mȩrȩ ado yo̧tarequededibe. Eami̧ pumȩ üdë budoa̧ pio ju̧i̧iä jabechji̧parȩa̧ oa cjiatämi̧ cjiarä judi, jabechji̧ nö̧tadäräri̧ ta̧rë ta̧rë japapea̧ chiade Moicherë go̧ȩparërea̧ ma̧ȩ oa jënȩ ja̧boa̧rä yuro, cja̧rȩmȩ co oëra̧diärea̧ decjiari̧.

⁴ Jabechji̧ mȩnȩro̧ Moicherë go̧ȩparërea̧ ma̧ȩ pio ju̧i̧ nö̧tadäräri̧ ta̧rë ta̧rë japea̧ oaiä jabechji̧parȩa̧ oa cjiatämi̧ cjiarä judi, cjäri̧ manȩrȩ, Quiricho ja̧ dairäpȩ cjiami̧ dari̧ tutia̧ oa cjiadiäpanȩrȩ, pio ju̧i̧ nö̧ta ori̧ bagari̧ ëba cjiarea̧mi̧dëri̧. Tjamo̧ davä. Ütërë cjäri̧ri̧ cjia da̧ dairäpȩ cjiami̧ dari̧ tutia̧ oa cjiapanȩrȩ.

⁵ Jabo ja̧di dari̧ quëna̧dë marea̧rȩ ca̧ oti̧. Jabechji̧ a̧ro̧rȩ Tjo tjamo̧ pio ju̧i̧iä jidatarea̧ chiaji̧ri̧rȩ cjo̧ro̧rea̧rȩ, 'tjamo̧ri̧ jabechji̧parȩa̧ oa cjiaquëda' quëna̧ jo̧rȩtaji̧ri̧rȩ.

⁶ Jabechji̧ a̧ro̧rȩ Jechu Quiricho pio judiri ja̧pe baga̧ oaiä, budoa̧ üdë badë mapea̧de. Ado pio ju̧i̧iä a̧dodë madiibe Ütë tjamo̧ ju̧i̧iä. Ado budodëa̧ üdë peaja̧di badë maeade. Peaja̧di a̧dodë madiibe. Jabechji̧ quëna̧ pio judimo̧rȩ ba chiade. Chjadëri̧ a̧dodiibe. Ado a̧ro̧rȩ quëna̧ji̧ri̧rȩ cjo̧ro̧ro, jabechji̧ Ütë tjamo̧ pio ju̧i̧ eariä cjo̧ro̧parea̧rȩ, pumȩ pio ji̧ri̧iäpȩmo̧bo.

⁷ Danȩrȩ ca̧ oti̧, mȩnȩro̧ pearä quëna̧rërea̧ ji̧, goae tarari̧ bagurami̧ dari̧ cjo̧ro̧rëreji̧ri̧nȩrȩ Quiricho pio ju̧i̧iä. Jabo adëdiämi̧ dari̧ cjiadiäa̧nȩrȩ yaba̧. ¿Chjiarë tja̧reparȩmi̧dari̧ japea̧diro̧dibe? ¿Chjiarë jiada tänȩa̧diro̧dibe ma̧ȩ coëma pio ju̧i̧?

⁸ Jabechji̧ dibë ëna̧diäa̧mȩ Ütë pio judi oëra̧diä tänȩdëa̧didibe.

⁹ Jabo ¿chjiadirȩ? Chjiadëdirȩ, oëra̧ a̧ra̧ano̧ji̧ri̧ pio judiro̧dirȩ. Ado judiro̧ ji̧ra̧ tjamo̧dëräbo, jabechji̧ jibëa̧ ma̧ȩ üdë jachi tjamo̧padäräde pumȩ no̧i̧dërë oëra̧ quëna̧pe järea̧mi̧ dari̧. Peaja̧di ta̧rëri̧ yo̧diibe ma̧ȩ üdë. “Chja̧pe oa japamȩ judi pjuru chiaparȩrea̧ piodai̧ maea oa mirea̧räbo, jabechji̧ pjuru chiape jäde cja̧rȩmȩ codë ana̧pe järi̧, pjo̧no̧i̧remȩmi̧ dadëri̧.” Ado peaja̧dimi̧ dari̧ ana̧pe jämi̧ dari̧ baäde oëra̧ a̧ra̧ano̧rea̧ üdë.

¹⁰ Jabo judiro̧ ja̧di dari̧ a̧ra̧ano̧räbo, jabechji̧ chjuari̧ quëna̧requede Ano̧mȩ ju̧i̧ pio dibë chjiari. 'Aja̧, cüdë a̧ra̧ano̧a̧ ma̧ȩ üdë jibëa̧ chji̧rä chjadëri̧ chadida, ado pio jiro ma̧ȩ üdë chjadëri̧ a̧dopadiji̧ri̧da, teracaba a̧ra̧ano̧rea̧ pio ju̧i̧ ta̧rë ja̧bochea oa chjadëri̧ a̧dopadiji̧ri̧da, jabechji̧ pio cüdë quëna̧mi̧ dari̧ quëna̧padiro̧da' quëna̧ jo̧rȩtaquededibe. Ado pio dibë tja̧reparȩmi̧ dari̧ japaji̧ri̧ pio judiro̧ chjadëri̧ bape chjaoa̧ oa cjiatädirȩ Ütë tjamo̧ pio ju̧i̧iä. 'Jabechji̧ pio judiro̧ tjamo̧diro̧da' quëna̧ dabadërequedejȩrȩ, jabo bape chjaomȩ pio judi tjamo̧ri̧ daba dadejȩrȩ.

¹¹ Danȩrȩ ca̧ oti̧, o judiro̧ pio coa chjiari teracabari̧ aechide yo̧ chjaodirȩ. “Aja̧, Pablo judi budoa̧rämo̧ chjätärea̧mi̧ dade a̧ra̧ano̧de” yo̧dirȩ. Jabo cjäri̧ marequede, ja̧di ta̧rëri̧ a̧ra̧ano̧dëmȩrequede. Jabechji̧ cüdë ja̧di dari̧ a̧ra̧ano̧rä judi, judio pio judiro̧ ma̧ chiadëri̧ cjia tjamo̧ji̧ri̧rȩ ta̧rëtäreji̧ri̧diro̧coe. Tjamo̧ davä. Ba chia ta̧rëtäreji̧ri̧diro̧coe cüdë ja̧di dari̧ a̧ra̧ano̧a̧rä judi. Jabo cjäri̧ madiro̧jo̧ȩ, cüdë a̧ra̧ano̧a̧ ma̧ȩ pio ju̧i̧ ea tjamo̧dëdiro̧jo̧ȩ. Ado pio ju̧i̧iä conȩdadiro̧coe. Jabechji̧ Moicherë go̧ȩparërea̧ ma̧ȩ oaiä chjätärea̧mi̧dëde a̧ra̧ano̧a̧ oaiä, dëdë, conȩdadiro̧coe. Aja̧, cüdë Quiricho pio ju̧i̧iämo̧i̧ chjätärea̧mi̧ dade a̧ra̧ano̧a̧ oaiä, toro ja̧boa̧mȩ pio ju̧i̧iämo̧i̧ chjätärea̧mi̧ dade a̧ra̧ano̧a̧ oaiä, jabechji̧ chjuari̧ jiadadiro̧jo̧ȩ cüdë a̧ra̧ano̧a̧ pio ju̧i̧.

¹² Ado pio ju̧i̧iä jabechji̧, pio dibë tja̧reparȩmi̧ dari̧ japaji̧ri̧ judiro̧ jabomo̧ budoa̧ oa cjiadëtäreji̧ri̧dirȩ jabo jabechji̧, ütëbo budotäreji̧ri̧dirȩ jibëa̧ bo ëbarea̧mi̧dëri̧.

¹³ Danȩrȩ ca̧ oti̧, Ütë tjamo̧ pio judi ëna̧diäa̧ oa cjiaji̧ri̧pea̧nȩrȩ jare chjadüa̧ oa cjiami̧ dari̧ cjo̧ro̧pea̧ oa, Moicherë go̧ȩparërea̧ chja̧oerä cjo̧ro̧chea oa. Jabo oëra̧ jo̧rȩtadëtäreji̧ri̧nȩrȩ jabo. ‘Jaeboquëda, jare chjadüa̧ oa cjiami̧ dari̧ cjiaquëda, ado pio ju̧i̧iä eami̧ oa japapai̧ daquëda, ca̧ icjararä chjai̧dë pio judiri cjitëmȩ pio ju̧i̧bo japapai̧ daquëda, jabechji̧ pio ju̧i̧ ja̧ chja̧oeräbo cjo̧ro̧pai̧ daquëda’ quëna̧ jo̧rȩtadëtäreji̧ri̧nȩrȩ. Jabo jabechji̧ coëma cjiari̧ jo̧rȩtaji̧ri̧rȩ a̧dotäreji̧ri̧nȩrȩ dibëa̧ dëbëti̧ra̧ chia, ea tjamo̧ji̧ri̧rȩ.

¹⁴ Jabechji̧ eami̧ üdë jibëa̧ pumȩ pio ji̧ri̧ tjamo̧ri̧ earä judi, pio ji̧ri̧ cjäri̧ri̧ cjia darä judi, jabechji̧ Moicherë go̧ȩparërea̧ ma̧ȩ pio ju̧i̧ nö̧tadäräri̧ ta̧rëdiärea̧mi̧ dade. Tjamo̧ davä. Eami̧ pumȩ üdë o ji̧ri̧iäpȩmo̧ jibëa̧ i oa eami̧ earä judi, jabechji̧ Moicherë go̧ȩparërea̧ ma̧ȩ pio ju̧i̧ nö̧tadäräri̧ ta̧rëdiämi̧ dade.

¹⁵ Jabo danȩrȩ, dai chirirä ja̧ jo̧rȩtarea̧ra̧ jo̧rȩta̧ji̧ri̧ pio judiro̧ cjo̧ro̧mi̧ dari̧ cjo̧ro̧dëchji̧vä. Jabechji̧ chjuaji̧ri̧ pio judiro̧mi̧ dari̧ cjo̧ro̧dëchji̧vä. Jabechji̧ mȩnȩro̧ ja̧dimi̧ dari̧ cjo̧ro̧rä judi, dibëa̧ dëbëti̧ra̧ chia ma̧ȩ goaedëti̧ra̧ ni̧bärä judi, dibëa̧ dëbëti̧ra̧ chia gito ana̧ri̧ jo̧rȩta tänȩrä judi, mȩnȩro̧ dëbë ni̧bätarä judi, dëdë, pio judiro̧mi̧ dari̧ tjamo̧ri̧ cjo̧ro̧panȩrȩ. Ado goe chiari̧ japaji̧ri̧mi̧ dari̧ japapai̧ danȩrȩ davä, jui jui gu̧na̧ji̧ri̧mi̧ dari̧. Tjamo̧ davä. Ja̧bo tänȩa̧ oa cjiami̧ dari̧ cjiadiäpai̧ danȩrȩ ca̧ oti̧. Jabechji̧ mȩnȩro̧ dibëa̧ dëbëti̧ra̧ chia goëdëri̧ cjiarä judi, ërecjiaji̧ri̧rȩ ya̧e chjaorä judi, jabechji̧ ori̧ bagari̧ ëba cjiadëji̧ri̧rȩ cjo̧ro̧panȩrȩ.

Tjo tjamo̧ ja̧ chja̧oerä cjo̧ro̧pea̧de

¹⁶ Pio ju̧i̧iä yo̧requededibe ca̧ oti̧. Tjo tjamo̧ ja̧ chja̧oerämo̧ cjo̧ro̧chji̧vä dibëa̧ icjarari cjitëmȩ chjai̧dë pio ju̧i̧ jiadapea̧ oa.

¹⁷ Jabechji̧ ibëa̧ icjararä chjai̧dë pio judi dëbëpe chjaomi̧ dari̧ japadejȩ Tjo tjamo̧ pio ju̧i̧. Ado Tjo tjamo̧ judi peaja̧di dëbëpe chjaomi̧ dari̧ japadejȩ. Ji̧mo̧ baärea̧mi̧dëde. Jabechji̧ ibëa̧ icjararä chjai̧dë üdë chi̧dëeami̧ chi̧dëeadëdiibe Tjo tjamo̧ judi jabo tjaoëpai̧ da tjamo̧ri̧ chi̧dëeadiibe. Ado pio ju̧i̧iä ji̧dë ma dëbëpe chjaodejȩ ibëa̧ icjararä chjai̧dë pio judi. Jabechji̧ yo̧a̧ri̧ jo̧rȩtarea̧ chiami̧ dari̧ cjo̧ro̧rea̧rȩ. Ado pio ju̧i̧iä jabechji̧ a̧ro̧rȩ eami̧ oa japatärea̧ ji̧, japadërea̧ro̧jo̧ȩ.

¹⁸ Jabo danȩrȩ, a̧ro̧rȩ Tjo tjamo̧ ja̧ chja̧oerä cjo̧ro̧ro, jabechji̧ Moicherë go̧ȩparërea̧ ma̧ȩ pio ju̧i̧ ja̧ chja̧oerä cjiadërea̧rȩ. Jabechji̧ mitë ano̧mi̧ dari̧ japea̧diibe pio jiro ma̧ȩ üdë. Ado pio ju̧i̧iä tjaoëpai̧ dari̧ cjo̧ro̧rea̧ chiarea̧rȩ.

Ibëa̧ icjarari cjitëmȩ chjai̧dë pio ju̧i̧ ütarë yürüdiibe Pablo judi

¹⁹ Danȩrȩ ca̧ oti̧, ibëa̧ icjararä chjai̧dë pio judiri ja̧ üdë, jabechji̧ chjadë maearä cjiami̧ dari̧ cjiade. A̧ro̧rȩ ütëborë darea̧mi̧ dari̧ cjitëde goadirea̧mi̧dëri̧. Tjamo̧ davä. Chjai̧dëri̧ jo̧rȩtarea̧ üdë, china̧chja pio ji̧ baë ëba mo̧a̧rea̧ üdë, jibëa̧ io pio ju̧i̧ idi̧ dari̧ ëba mo̧a̧rea̧ üdë, ivi pio ji̧ri̧ chjiari tüdüa̧mi̧ darä cjo̧ro̧dërea̧ üdë, ji̧dë ma eami̧ti̧ oa dae ja̧bo dae ja̧bo darea̧ üdë, jabechji̧ ibëa̧ icjararä chjai̧dë pio judiri ja̧de.

²⁰ Ado pumȩrȩ jëdano̧a̧ ütë pio ju̧i̧iäpȩmo̧ chjacjiamȩri̧ jo̧rȩtarea̧ üdë, yu̧ ano̧rea̧ üdë, daeearea̧ üdë, na̧nö̧ jea ëte ma̧ȩ yürümȩ pio ju̧i̧ ta̧rërämi̧ cjia̧ üdë, ado cja̧rȩmo̧ ütë oa ëna̧dië ëna̧dië go̧a̧rea̧ üdë, peaja̧di ibëa̧ icjarari ja̧ maeade. Ado pumȩ pio ji̧ri̧iäpȩmo̧ goëdëri̧ cjiari̧ jo̧rȩtarea̧ üdë, ma̧ȩ goaedëra̧ ba dëbë ni̧bätarea̧ üdë, quëbamȩrȩ jo̧rȩtarea̧ üdë, ma̧ cjüëtüri̧ jo̧rȩtarea̧ üdë, ibëa̧ chji̧rämo̧ jo̧rȩtatarea̧ üdë, ibëa̧ maea oa jo̧rȩtarea̧ üdë, cja̧rȩmȩ chji̧ chiami̧ dari̧ jo̧rȩtadërea̧ üdë, jadüchiami̧ bubami̧ dari̧ jo̧rȩtarea̧ üdë, peaja̧di ibëa̧ icjararä chjai̧dë pio judiri ja̧de.

²¹ Ado dami̧ti̧ pio ju̧i̧ chjiari oëra̧ jo̧rȩtarea̧ üdë, 'Aja̧, judi goa̧ üdë ca̧ea̧täremȩdica̧da, pio cüdëmo̧rȩ goatäremȩcuni̧da' quëna̧ jo̧rȩtarea̧ üdë, peaja̧di ibëa̧ icjararä chjai̧dë pio judiri ja̧de. Ado yu̧i̧rea̧ üdë, ërü yu̧i̧mȩrȩ ivi pio ji̧ri̧ nö̧ta idi̧ dari̧ japarea̧ üdë, jabechji̧ ibëa̧ icjararä chjai̧dë pio judiri ja̧ maeade. Ado cüdë ütëbo oa ütaratärea̧ ji̧, ibëa̧ icjararä chjai̧dë pio judiri ja̧ oa ütëbo oa ütaradärätärea̧ ji̧, jabechji̧ ütaradärädëpareconȩ, jabo peaja̧di ibëa̧ icjarari pio judiri cjitë maeade orë. Ma̧i̧ da tjamo̧de. Ado cüdë dibë yo̧rërea̧mi̧ ado yo̧requededibe uapai̧ ta̧rëri̧ yo̧ë cji̧dämȩrȩ. Ja̧di dari̧ japë ano̧dëji̧ri̧ pio judiro̧, jabechji̧ Ütërë yo̧a̧ chja̧oerä cjo̧ro̧dë madirȩ.

Tjo tjamo̧ri ma̧na̧mȩ pio ju̧i̧ ano̧ mire ütarë yürüdiibe Pablo judi

²² Jabo Tjo tjamo̧ pio judiri ma̧na̧mȩ na̧rȩrea̧ üdë tjaoë tjamo̧de. Toro baramȩ jurarea̧ goaemi̧ dade. Ado pio ju̧i̧ ano̧ mire ütarë yo̧requededibe yaba̧. Danȩrȩ, o ji̧ri̧iäpȩmo̧ earea̧ üdë, ma̧ chiadëri̧ cjiari̧ jo̧rȩtarea̧ üdë, ado ma̧ chjupi̧ cjiari̧ jo̧rȩtarea̧ üdë, jabechji̧ Tjo tjamo̧ pio judiri ma̧na̧mȩ na̧rȩrea̧de. Ado Ütë tjamo̧ ju̧i̧iäpȩmo̧ chjuari quëna̧rea̧ üdë, jaepeparea̧ decjiari̧ quëna̧rea̧ üdë, chjai̧dë oa chjätäräbo chjuari̧ quëna̧rea̧ üdë, peaja̧di Tjo tjamo̧ pio judiri ma̧na̧mȩ na̧rȩrea̧de. Ado o ji̧ri̧iäpȩmo̧ cjäri̧ri̧ cjia darea̧ üdë, cjodocjodoami̧ dari̧ jo̧rȩtarea̧ üdë, o ji̧ri̧iäpȩmo̧ chjadëri̧ japarea̧ üdë, o ji̧ri̧iäpȩmo̧ tocoi̧mi̧ u̧i̧parea̧ decjiari̧ cjo̧ro̧rea̧ üdë, jënȩ yo̧a̧mi̧ japarea̧ üdë, jabechji̧ Tjo tjamo̧ pio judiri ma̧na̧mȩ na̧rȩrea̧ maeade.

²³ Ado o ji̧ri̧iäpȩmo̧ cjäri̧ri̧ cjia darea̧ üdë, 'o judiro̧ coa u̧i̧ ba chiadiro̧da' quëna̧rea̧ üdë, icjararä ja̧ chjai̧dë pio ju̧i̧ jiadarea̧ üdë, jabechji̧ Tjo tjamo̧ pio judiri ma̧na̧mȩ na̧rȩrea̧de. Ado eami̧ pumȩ üdë ja̧di dari̧ na̧rȩmȩrȩ cjo̧ro̧rä judi, 'Jabo cjäri̧ madida, tüdüa̧mi̧ darä cjo̧ro̧pea̧ ma̧ȩ pio ju̧i̧ jiadadiji̧da' quëna̧rea̧mi̧dëde. Jabechji̧ ja̧di dari̧ na̧rȩmȩrȩ cjo̧ro̧mȩ pio judi chjadëri̧ cjo̧ro̧de.

²⁴ Danȩrȩ, Jechu Quiricho pio judiri ja̧ji̧ri̧ pio judiro̧ jibëa̧ icjararä chjai̧dë pio judiri cjitëmȩ pio ju̧i̧ toro ja̧bo tänȩmi̧ dari̧ japarëreji̧ri̧diro̧jo̧ȩ. Tjamo̧ davä. Dami̧ti̧ chjai̧dë oa eamȩ pio ju̧i̧, dami̧ti̧ china̧chja oa dae ja̧bo damȩ pio ju̧i̧ ja̧bo tänȩmi̧ dari̧ japea̧diro̧jo̧ȩ.

²⁵ Ado yaba̧ Tjo tjamo̧ pio judi yürüa̧ oa, pea chjari̧ cjo̧ro̧rea̧ chiaji̧ri̧pea̧rea̧rȩ. Ja̧di tara pio judi tara tänȩa̧mi̧ cjo̧ro̧täreji̧ri̧rea̧rȩ, pio ju̧i̧ ja̧ chja̧oerä maearë.

²⁶ Ado pio ju̧i̧iä, a̧ro̧rȩ Tjo tjamo̧ pio ju̧i̧ ja̧ chja̧oerä cjo̧ro̧ji̧ri̧pea̧ pio ju̧i̧iä, jabechji̧ ibëa̧ chji̧rämo̧ jo̧rȩtataji̧ri̧rȩ pio ibë chjiari chjacjiamȩri̧ ni̧bädëtäreji̧ri̧rea̧rȩ. Ado ibëa̧ pumȩ ji̧ri̧ ërecjia tänȩdëtäreji̧ri̧rea̧ro̧jȩrȩ. Ado ibëa̧ pumȩ ja̧ oa dae ja̧bo dae ja̧bo dadë matäreji̧ri̧rea̧rȩ, jabo jabechji̧ tjaoëpai̧ dari̧ cjo̧ro̧ matäreji̧ri̧rea̧rȩ Tjo tjamo̧ pio ju̧i̧iä.